Euskal Herriko Agintaritzaren Aldizkaria

107. zk., 2026ko ekainaren 9a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

2489

EBAZPENA, 2026ko maiatzaren 22koa, Industria, Trantsizio Energetiko eta Jasangarritasuneko Arabako lurralde-ordezkariarena, aurretiazko administrazio-baimena ematen duena Vitoria-Gasteiz eta Arratzua-Ubarrundia udal-mugarteetako (Araba) «Piparra Solar» eguzki-instalazio fotovoltaikoaren proiekturako, Ventaja Solar 13, SL sozietateak sustatua.

Espediente-zenbakia: 01 GE Y 202400056.

AURREKARIAK

Lehenengoa.– 2024ko urriaren 21ean, Ventaja Solar 13, SL sozietateak aurretiazko administrazio-baimena eta ingurumen-inpaktuaren txostena eskatu zituen Vitoria-Gasteiz eta Arratzua-Ubarrundia udal-mugarteetako (Araba) «Piparra Solar» instalaziorako –eguzki-teknologia fotovoltaikoaren bidez elektrizitatea sortzeko instalazioa da–.

Bigarrena.– 2024ko urriaren 22an, dokumentazio teknikoa eta ingurumen-dokumentazioa osatu zituen, dokumentazio hori zuzentzeko eta hobetzeko egin zitzaion errekerimenduari erantzunez.

Hirugarrena.– Proiektuaren xede den instalazioak sarbide- eta konexio-baimena du, I-DE Redes Eléctricas Inteligentes, SAU enpresa banatzaileak emana, 2024ko apirilaren 25ean (erreferentzia-zk.: 9043141944).

Laugarrena.– 2024ko abenduaren 17an, Ingurumen Administrazioaren Zuzendaritzan, proiektu honen ingurumen-inpaktuaren ebaluazio sinplifikatuaren eskaera hasi zen: «"Piparra Solar" eguzki-instalazio fotovoltaikoa, 5,427 MWp-ekoa, Vitoria-Gasteiz eta Arratzua-Ubarrundia udalerrietan (Araba, EAE)». Eskaera Euskadiko Ingurumen Administrazioaren abenduaren 9ko 10/2021 Legean xedatutakoaren arabera egin zen, Ingurumen Ebaluazioari buruzko abenduaren 9ko 21/2013 Legearen 45. artikuluak eta hurrengoek arautzen duten proiektuaren ingurumen-inpaktuaren ebaluazio sinplifikatuaren prozeduraren esparruan.

Bosgarrena.– 2025eko ekainaren 6an, EHAAn argitaratu zen Ingurumen Administrazioaren zuzendariaren Ebazpena, 2025eko maiatzaren 5ekoa; ebazpen horren bidez egiten zen Ventaja Solar 13, SL sozietateak Vitoria-Gasteiz eta Arratzua-Ubarrundia udalerrietan (Araba) sustatutako «Piparra Solar» eguzki-instalazio fotovoltaikoaren proiektuaren ingurumen-inpaktuaren txostena, non aipatzen baitzen ez zela aurreikusten proiektua gauzatzeak ondorio kaltegarri adierazgarririk izango zuenik ingurumenean, baldin txosten horretan bertan proposatutako neurriak gehitzen baziren. Hori dela eta, ez zen beharrezkotzat jo ingurumen-inpaktuaren ebaluazio arrunta aplikatzea.

Seigarrena.– Ingurumen-ebaluazio sinplifikatuaren prozeduraren ondoren, 2026ko urtarrilaren 22an eta 2026ko otsailaren 25ean, Arabako Industria, Trantsizio Energetiko eta Jasangarritasuneko lurralde-ordezkariaren 2026ko urtarrilaren 12ko iragarkia argitaratu zen, Euskal Herriko Agintaritzaren Aldizkarian (14. zk.) eta Arabako Lurralde Historikoaren Aldizkari Ofizialean (24. zk.), hurrenez hurren. Iragarki horren bidez, jendaurrean jarri zen Vitoria-Gasteiz eta Arratzua-Ubarrundia udal-mugarteetan «Piparra Solar» eguzki-instalazio fotovoltaikoa (4,945 MW) eta hari lotutako azpiegiturak eraikitzeko aurretiazko administrazio-baimenaren eskaera.

Zazpigarrena.– Jendaurreko informazioaren izapidearekin batera, kontsulta egin zitzaien ukitutako administrazio publiko hauei: Vitoria-Gasteizko eta Arratzua-Ubarrundiako udalak. Ukitutako ondasun eta eskubideei buruzko separatak bidali zitzaizkion i-DE Redes Eléctricas Inteligentes, SAU enpresari.

Zortzigarrena.– Jendaurreko informazioaren izapidean, Fotovoltaica de Aldeamayor 2 S.L.ren alegazioa jaso zen. Alegazioak adierazten zuen Fotovoltaica de Aldemayor 2, SLk azalera-eskubidea duela, indarrean, «Piparra Solar» proiektua planteatuta dagoen hiru lurzatitan, eta errentamendu-kontratuaren kopia bat erantsi zuen.

Bederatzigarrena.– Txosten hauek jaso ziren ukitutako administrazio publikoei eta interesdunei egindako kontsulten izapidean:

Arratzua-Ubarrundiako Udalaren txostena, udalerrian eragindako eremuetan indarrean dagoen HAPOaren arabera aplikatu beharreko araudiari buruzko informazioa ematen zuena. Laburbilduz, proiektuari dagokionez, hau ondorioztatzen da:

– Aurretiko txostenean aipatutako araudi guztia betetzen dela zaindu beharko duela.

– Edozein obra-lizentzia eman aurretik, administrazio edo zerbitzuen baimenak lortu beharko dituela, haien eskumenei dagozkienean.

– Azpiegitura edo instalazioa onura edo interes publikokoa dela deklaratzen duen agiria lortu beharko duela.

– Plan berezi bat izapidetu beharko duela.

– Azpiegituraren ebakuazio-lineak lurpean egin behar direla, ahal den neurrian (...) edo afekzio gutxien sortzen diren lekuetan (...).

Vitoria-Gasteizko Udalaren txostena, udalerrian eragindako eremuetan indarrean dagoen HAPOaren arabera aplikatu beharreko araudiari buruzko informazioa ematen zuena. Laburbilduz, proiektuari dagokionez, hau ondorioztatzen da:

– Erabilera onargarria dela, aipatutako baldintzetan egiten bada.

– Lizentzia eskatzeko proiektua aurkezteko unean, arau-zehaztapena justifikatu beharko dela.

– Lizentzia izapidetzean egiaztatuko dela betetzen dela.

Hamargarrena.– Jasotako alegazioak eta txostenak sustatzaileari bidali zitzaizkion, kontuan hartu zitzan, eta sustatzaileak bi udalek bidalitako txostenekin ados zegoela adierazi zuen; idazki bat ere aurkeztu zuen sustatzaileak, jakinaraziz alegazioan aipatutako lurzatien jabeak ez duela azalera-eskubideko kontraturik sinatu Fotovoltaica de Aldeamayor 2, SL entitatearekin, lurzati horien jabeak adierazitakoaren arabera.

ZUZENBIDEKO OINARRIAK

Lehenengoa.– Arabako Industria, Trantsizio Energetiko eta Jasangarritasunaren Lurralde Ordezkaritza da espediente hau izapidetzeko eta ebazteko organo eskuduna, hala xedatzen baita 410/2024 Dekretuaren 20. artikuluan (410/2024 Dekretua, abenduaren 3koa, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duena).

Bigarrena.– Espedientean bete dira lege hauetan agindutako arauzko izapideak: 24/2013 Legea, abenduaren 26koa, Sektore Elektrikoari buruzkoa; eta Eusko Jaurlaritzaren 48/2020 Dekretua, martxoaren 31koa, zeinaren bidez arautzen baitira energia elektrikoa ekoizteko, garraiatzeko eta banatzeko instalazioen administrazio-baimenaren prozedurak. Eta honako hauekin bat etorriz bete dira, proiektuari ingurumen-ebaluazio sinplifikatua egin behar zaiola eta: 21/2013 Legea, abenduaren 9koa, Ingurumen-ebaluazioari buruzkoa, eta 10/2021 Legea, abenduaren 9koa, Euskadiko Ingurumen Administrazioarena.

Hirugarrena.– Zenbait entitatek lursailen titulartasunari edo erabilgarritasunari buruz egindako adierazpenak ez dira prozedura honetan baloratzen; izan ere, aldez aurreko administrazio-baimenaren xedearekin eta irismenarekin zerikusirik ez duten gai juridiko eta pribatuak dira, eta baimen horrek ez du inola ere gaitzen lursailak okupatzeko edo benetan erabiltzeko.

Laugarrena.– Proiektuak ingurumenean inpaktua izan lezakeela kontuan hartuta, ingurumen-inpaktuaren adierazpenean, ebazpen-zatiaren bigarren puntuan, proiektuaren baldintzak eta ingurumen-ondorio kaltegarrietarako prebentzio-, zuzenketa- eta konpentsazio-neurriak ezarri dira, ingurumen-inpaktuaren azterketan adierazitakoez gain. Hona hemen neurriok, laburbilduta eta azaletik adierazita:

– Natura-ondarea babesteko neurriak.

Jardunean hasi aurretik, azterlan bat egingo da, eta mirotz urdinak (Cyrcus pygargus) eremu hori apiriletik ekainera bitartean nola erabiltzen duen aztertzen duen analisia jasoko da bertan.

Fauna aztertzea obrak hasi aurretik.

Leheneratze-plana, Arabako Foru Aldundiko ingurumen-organoari aurkeztu beharrekoa, kontrastatzeko eta gainbegiratzeko, bai eta Ingurumen Administrazioaren Zuzendaritzari ere.

Modulu fotovoltaikoei islapenaren aurkako estaldura aplikatzea.

– Lurzorua eta urak babesteko neurriak.

– Zaraten ondoriozko efektuak gutxitzeko neurriak.

– Kultura-ondarea babesteko neurriak.

– Landa-ingurunea babesteko neurriak. Arabako Foru Aldundiko Nekazaritza Garapenerako Zerbitzuaren txostena eskatu beharko da, erregistratutako landa-bideetan jarduketak egin aurretik, eta Noryeste ureztatzaileen elkarteari eragiten dioten jarduketen berri eman beharko da.

– Hondakinak kudeatzeko neurriak.

– Atmosfera ahalik eta gutxien kutsatzeko eta hauts gutxiago aireratzeko neurriak.

– Ingurumena Zaintzeko Plana.

– Jardunbide egokien sistema bat ezartzea.

– Garbiketa eta obra-amaiera.

– Jarduera etetea.

– Ingurumen-aholkularitza.

Bosgarrena.– Sektore Elektrikoari buruzko 24/2013 Legearen 53.1 artikuluak ezartzen du energia elektrikoa ekoizteko instalazioek aurretiazko administrazio-baimena behar dutela. Era berean, ezartzen du hura ez dela emango, baldin eta titularrak ez baditu aldez aurretik lortzen garraio- edo banaketa-sareetara sartzeko eta konektatzeko baimenak.

Seigarrena.– Sektore Elektrikoari buruzko 24/2013 Legearen 53.6 artikuluak adierazten du administrazio-baimenak administrazio eskudunak emango dituela, aplikatu beharreko bestelako xedapenen arabera eta, bereziki, lurraldearen antolamenduari eta ingurumenari buruzko xedapenen arabera beharrezkoak diren emakida eta baimenak alde batera utzi gabe.

Zazpigarrena.– Sektore Elektrikoari buruzko 24/2013 Legearen 53.7 artikuluaren arabera, administrazio publiko eskudunak baimena ukatu ahalko du, baina aplikatu beharreko araudian ezarritako eskakizunak betetzen ez direnean edo baimena ematea sistemaren funtzionamenduaren kalterako denean soilik.

Aipatutako lege-xedapenak ikusita, eta oro har zein zehazki aplikagarri diren gainerakoak oinarri hartuta, Industria, Trantsizio Energetiko eta Jasangarritasuneko Arabako lurralde-ordezkariak hau

EBAZTEN DU:

Ventaja Solar 13, SL sozietateari aurretiazko administrazio-baimena ematea «Piparra Solar» eguzki-instalazio fotovoltaikoaren eta haren ebakuazio-azpiegituraren proiektua egiteko Vitoria-Gasteiz eta Arratzua-Ubarrundia udal-mugarteetan. Hau da proiektua:

– «Piparra Solar» eguzki-instalazio fotovoltaikoa, 4,6 MWn-eko potentzia instalatua eta 7,05 ha-ko azalera okupatua duena; Arratzua-Ubarrundiako 2. poligonoko 122-1, 123-1, 123-2, 376 eta 127 lurzatiak okupatzen ditu, eta Vitoria-Gasteizko 39. poligonoko 45-1 lurzatia. Instalazio hauek izango ditu:

a) 9.438 modulu, 575 Wp-ekoak, guztira 5,427 MWp-eko potentzia-erpin instalatua dutenak.

b) 23 inbertsore, 200 kW-eko potentzia nominalekoak.

c) Bi transformazio-zentro (0,8/30 kV), 2.500 Kva-koak.

– Lurpeko ebakuazio-linea, 30kV-ekoa; CT–2 transformazio-zentrotik erdi-tentsioko ebakuazio-linearen terminaletaraino doa, eta sekzionamendu-zentrora sartzen da, Arratzua-Ubarrundia udal-mugartean.

– Instalazio fotovoltaikoak sortutako energia garraio-sarera ebakuatzeko, Gamarra STaren (30 kV) 5. linea baliatuko da –hau da, Gamarra-Villareal I, 30kV-ekoa–.

Baldintza orokor hauek jarrita ematen da baimen hau:

Ebazpen hau jakinarazten denetik hamabi hilabete igaro baino lehen eskatu beharko da eraikitzeko administrazio-baimena. Eskabidea adierazitako epean aurkezten ez bada, aurretiazko administrazio-baimena iraungitzat jo ahal izango da.

Egikaritze-proiektua Ingurumen Administrazioaren Zuzendaritzaren ingurumen-inpaktuaren txostenean ezarritako baldintzetara eta babes- eta konpentsazio-neurrietara egokitu beharko da. Txosten hori 2025eko maiatzaren 5ean egin zen eta 2026ko ekainaren 6an argitaratu zen Euskal Herriko Agintaritzaren Aldizkarian (106. zk.). Era berean, administrazioek, organismoek eta zerbitzu-enpresek kontsulta-fasean ezarritako baldintza teknikoak jaso beharko ditu. Sustatzaileak baldintza horiekiko adostasuna adierazi zuen.

Onartzeko aurkeztutako proiektuak araudi elektrikoaren arabera eta industriaren arloan aplikagarriak diren industriako segurtasun- eta kalitate-arauak bete beharko ditu, eta laneko arriskuen prebentzioari buruzko dokumentazioa jaso, bai eta ingurumen-inpaktuaren adierazpenean ezarritakoa ere, instalazio elektrikoei aplikatu beharreko araudian adierazitako agiri eta zehaztapenez gain. Aplikatu beharreko araudia betetzen dela egiaztatzen duen erantzukizunpeko adierazpena erantsi beharko da.

Sistemaren operadoreak ezartzen dituen arau teknikoak eta jardunbideak bete beharko dira.

Ebazpen hau ematen da ezertan eragotzi gabe udal- eta foru-mailako eskumeneko baimen edo lizentziak, ez eta obrak egiteko beharrezkoak diren beste baimen batzuk nahiz aplikatzekoak diren xedapenetatik eratorritakoak ere, lurralde- eta ingurumen-antolamenduari dagozkienak bereziki, eta eskatzaileak haiek eskatu beharko ditu hala dagokionean. Era berean, hirugarrenen eskubideak alde batera utzi gabe ematen da, jabetza-eskubidea salbu utzita.

Ebazpen honek ez dio amaiera ematen administrazio-bideari, eta, beronen aurka, gora jotzeko errekurtsoa aurkeztu dakioke Deskarbonizazioko zuzendariari, hilabeteko epean, ebazpen hau jakinarazi eta hurrengo egunetik aurrera, bat etorriz Administrazio Publikoen Administrazio Prozedura Erkidearen 39/2015 Legearen 121. artikuluan eta hurrengoetan xedatutakoarekin.

Vitoria-Gasteiz, 2026ko maiatzaren 22a.

Industria, Trantsizio Energetiko eta Jasangarritasuneko Arabako lurralde-ordezkaria,

JAVIER AIZPURU OCHOA DE ERIBE.

Azterketa dokumentala