Euskal Herriko Agintaritzaren Aldizkaria

92. zk., 2026ko maiatzaren 19a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

ONGIZATE, GAZTERIA ETA ERRONKA DEMOGRAFIKOAREN SAILA

2094

AGINDUA, 2026ko maiatzaren 13koa, Ongizate, Gazteria eta Erronka Demografikoaren sailburuarena, apirilaren 16ko 48/2024 Dekretuak, emakumeen aurkako indarkeria matxistaren hildako biktimen seme-alaba umezurtzentzako laguntza arautzen duenak, aurreikusitako laguntzarako esleitutako zuzkidura argitara ematen duena.

Apirilaren 16ko 48/2024 Dekretuaren arabera, emakumeen aurkako indarkeria matxistaren ondorioz hildako biktimen seme-alaba umezurtzentzako laguntza ekonomikoa arautzen da (EHAA, 98. zk., 2024ko maiatzaren 21ekoa). Dekretu horren 15.2 artikuluan ezartzen denez, «Euskal Herriko Agintaritzaren Aldizkarian argitaratutako Agindu bidez, Euskal Autonomia Erkidegoko Aurrekontu Orokorretan dekretu honetan aurreikusitako laguntzari esleitutako urteko zuzkidura jakinaraziko da».

Euskal Autonomia Erkidegoko Administrazio Orokorreko sailak sortu, ezabatu eta aldatzen dituen eta horien egitekoak eta jardun-arloak finkatzen dituen lehendakariaren ekainaren 23ko 18/2024 Dekretuaren 15. artikuluko d) idatz-zatian adierazten denez, Ongizate, Gazteria eta Erronka Demografiko Sailari dagokio komunitatearen garapenari, gizarte-ongizateari eta gizarte-zerbitzuei buruzko jardun-arloa.

Eta Ongizate, Gazteria eta Erronka Demografikoaren Sailaren egitura organikoa eta funtzionala ezartzen duen urriaren 29ko 320/2024 Dekretuaren 11. artikuluko m) idatz-zatian adierazten denez, Bizitza Beterako Laguntzen Zuzendaritzari honako eginkizun hauek dagozkio: «Emakumeen aurkako indarkeria matxistaren ondorioz hildakoen seme-alaba umezurtzentzako dirulaguntzak eta sexu-indarkeriaren biktimentzako laguntza ekonomikoak kudeatzea, ebaztea eta ordaintzea, laguntza horiei aplikatu beharreko araudiak eginkizun horietakoren bat beste organo bati esleitzen dionean izan ezik».

Bestalde, dirulaguntza hori Dirulaguntzen Araubidea arautzen duen abenduaren 21eko 20/2023 Legean (2023ko abenduaren 29ko EHAA, 247. zk.) xedatutakoaren mende dago. Lege hori 2023ko abenduaren 30ean sartu zen indarrean, eta Ongizate, Gazteria eta Erronka Demografikoaren Sailaren Dirulaguntzen Plan Estrategikoan sartu zen. Plan Estrategikoa 2025-2028 aldirako Dirulaguntzen Plan Estrategikoa onartzen duen Ongizate, Gazteria eta Erronka Demografikoaren sailburuaren 2025eko otsailaren 21eko Aginduaren bidez onartu zen.

Ondorioz, honako hau

EBATZI DUT:

Artikulu bakarra.– Publizitate-printzipioa betetze aldera, adierazten da 2026ko ekitaldian, apirilaren 16ko 48/2024 Dekretuan aurreikusitako laguntzak finantzatzeko, 100.000 euro bideratuko direla emakumeen aurkako indarkeria matxistaren ondorioz hildakoen seme-alaba umezurtzentzako laguntza ekonomikora. Zenbateko hori hurrengo urteetarako konpromiso-kreditu gisa ere ezartzen da: genero-indarkeriaren biktima diren umezurtzentzako laguntzak kudeatzea. 2027: 50.000; 2028: 50.000; 2029: 50.000; 2030: 50.000, 2036 arteko gainerakoa 300.000 euro.

AZKEN XEDAPENETAKO LEHENENGOA

Agindu honek amaiera ematen dio administrazio-bideari, eta, beraren aurka, aukerako berraztertzeko errekurtsoa aurkez dakioke Ongizate, Gazteria eta Erronka Demografikoaren sailburuari, hilabeteko epean, agindua Euskal Herriko Agintaritzaren Aldizkarian argitaratu eta biharamunetik aurrera; bestela, administrazioarekiko auzi-errekurtsoa aurkez daiteke zuzenean, Euskal Autonomia Erkidegoko Auzitegi Nagusiko Administrazioarekiko Auzien Salan, bi hilabeteko epean, agindua EHAAn argitaratu eta biharamunetik aurrera.

AZKEN XEDAPENETAKO BIGARRENA

Agindu honek Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.

Vitoria-Gasteiz, 2026ko maiatzaren 13a.

Ongizate, Gazteria eta Erronka Demografikoaren sailburua,

NEREA MELGOSA VEGA.

Azterketa dokumentala