Euskal Herriko Agintaritzaren Aldizkaria

74. zk., 2026ko apirilaren 22a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

1661

EBAZPENA, 2026ko apirilaren 1ekoa, Industria, Trantsizio Energetiko eta Jasangarritasuneko Bizkaiko lurralde-ordezkariarena, zeinaren bidez aurretiko administrazio-baimena eta eraikuntzako administrazio-baimena eman eta onura publikoko deklarazioa egiten baita honako proiektu honetarako: 132 kV-ko Ortuella TA – Abanto TA zirkuitu bikoitzeko linea elektrikoa eraberritzea, Abanto y Ciérvana-Abanto Zierbena, Ortuella, Santurtzi eta Zierbenako (Bizkaia) udal-mugarteetan.

Espedientea: 48-AT-Y-2025-00027.

AURREKARIAK

1.– 2025eko apirilaren 8an, I-DE Redes Eléctricas Inteligentes SAUk aurretiko administrazio-baimena eta eraikuntzako administrazio-baimena eta onura publikoaren deklarazioa eskatu zituen honako proiektu honetarako: 132 kV-ko Ortuella TA – Abanto TA zirkuitu bikoitzeko linea elektrikoa eraberritzea, Abanto y Ciérvana-Abanto Zierbena, Ortuella, Santurtzi eta Zierbenako (Bizkaia) udal-mugarteetan.

2.– Martxoaren 31ko 48/2020 Dekretuaren 10. artikuluan (dekretu horren bidez arautzen dira instalazio hauen administrazio-baimenerako prozedurak: argindarra ekoitzi, garraiatu nahiz banatzeko instalazioak) eta abenduaren 1eko 1955/2000 Errege Dekretuaren 144. artikuluan adierazitako ondorioetarako, argitara eman zen horren iragarkia, eskabide hori jendaurrean jartzeko, 2025eko azaroaren 13ko EHAAn, 2025eko azaroaren 12ko BAOn, Abanto y Ciérvana-Abanto Zierbenako, Ortuellako, Santurtziko eta Zierbenako udaletxetako iragarki-taulan eta 2025eko abenduaren 3ko El Correo egunkarian.

3.– 2025eko azaroaren 5ean, honako erakundeei egoki iritzitako baldintza teknikoak aurkezteko eskaera bidali zitzaien: Abanto y Ciérvana-Abanto Zierbenako, Ortuellako, Santurtziko eta Zierbenako udalei, Bizkaiko Foru Aldundiko (BFA) Azpiegituretarako eta Lurralde Garapenerako Sailari, Uraren Euskal Agentziari, Nortegasi, Red Eléctrica de España SAri eta Telefónica España SAUri.

4.– Arauzko epean, honako baldintza tekniko hauek jaso dira:

– 2025eko abenduaren 19an Telefónica de España SAUk azaldu du ez dagoela proiektuaren aurka, betiere indarrean dagoen araudia betetzen bada. Gainera, instalazioetan kalteak edo komunikazioetan perturbazioak gertatuz gero, jarduteko eskubidea erabili ahalko du.

– 2026ko urtarrilaren 12an, BFAko Azpiegituretarako eta Lurralde Garapenerako Sailak bere eskumenen esparruan bete beharreko baldintzak adierazi ditu, eta proiektua gauzatu aurretik baimena eskatu behar dela adierazi du.

Agiri guztiak I-DE Redes Eléctricas Inteligentes, SAUri bidali zitzaizkion, eta hark agiri guztiak onartzen zituela eta horiekin guztiekin ados zegoela adierazi zuen.

5.– Halaber, arauzko epean ez da alegaziorik aurkeztu.

6.– Jendaurreko informazioaren izapidearekin eta beste administrazio publiko, organismo edo enpresa batzuei egindako kontsultekin batera, ordezkaritza honek erreferentziako proiektuaren ingurumen-inpaktuaren ebaluazio sinplifikatua egiteko eskaera bidali zion Eusko Jaurlaritzako Ingurumen Administrazioaren Zuzendaritzari. Eskaerari EIAS – 369 erreferentzia esleitu zitzaion.

7.– 2026ko otsailaren 4an, Ingurumen Administrazioaren zuzendariak ebazpena eman zuen, zeinaren bidez formulatzen baita I-DE Redes Eléctricas Inteligentes SAUk sustatutako Ortuella TA – Abanto TA (Bizkaia) zirkuitu bikoitzeko 132 kV-ko linea elektrikoa eraberritzeko proiektuaren ingurumen-inpaktuaren txostena. 2026ko martxoaren 3ko EHAAn argitaratu zen.

Ingurumen-inpaktuaren txostenak ondorioztatzen du, betiere ezarritako babes- eta zuzenketa-neurriak eta kontrolak hartzen badira, bai eta sustatzaileak planteatutakoak ere –aurrekoen aurkakoak ez badira–, ez dela beharrezkoa proiektua egikaritzean ingurumen-inpaktuaren ebaluazio arrunta egitea.

8.– Ingurumen-inpaktuaren txostena I-DE Redes Eléctricas Inteligentes SAU enpresari bidali ondoren, enpresa horrek, 2026ko otsailaren 24an, baieztatu du proiektuak ingurumen-organoak ezarritako babes- eta zuzenketa-neurriak eta kontrolak jasoko dituela, 2026ko otsailaren 4ko Ebazpenean aurreikusitakoa betetzeko (2026ko martxoaren 3ko EHAA).

9.– 2026ko martxoaren 27an, ingurumen-organoak BFAko Natura Ondarearen Zerbitzuaren txostena helarazi zion ordezkaritza honi. Txosten hori ingurumen-inpaktuaren ebaluazio sinplifikatuaren prozeduran emandako epea amaitu ondoren eta Ingurumen Administrazioaren zuzendariaren 2026ko otsailaren 4ko Ebazpenaren ondoren jaso zen.

Laburbilduz, txostenak adierazten du beharrezkoa dela aurretik dagoen linea 700 metroko tarte txiki batean lurperatzeko alternatibak aztertzea, zehazki, 12. eta 15. euskarrien artean, eta, ahal bada, egungo bidegorriaren trazadura erabiltzea, haren inguru hurbila, edo ingurutik igarotzen diren beste bide batzuk.

10.– 2026ko martxoaren 30ean, txosten horren berri eman zitzaion I-DE Redes Eléctricas Inteligentes SAU enpresari, eta hark, 2026ko martxoaren 31n, adierazi du txostena erregelamenduz ezarritako epetik kanpo eman dela, eta, gainera, txostenak aipatzen dituen lurperatze-alternatibak aplikatzea oso zaila dela lehendik dagoen linea baten kasuan.

11.– Behin espedientea aztertuta, eskaeraren aldeko txostena ebatzi dute Industria, Trantsizio Energetiko eta Jasangarritasuneko Bizkaiko Lurralde Ordezkaritzako energia-arloko zerbitzu teknikoek.

Ebazpen hau honako hauetan oinarritzen da:

ZUZENBIDEKO OINARRIAK

1.– Industria, Trantsizio Energetiko eta Jasangarritasuneko Bizkaiko Lurralde Ordezkaritza da espediente hau izapidetzeko eta ebazteko organo eskuduna, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuan xedatutakoaren arabera.

2.– Arau hauetan ezarritako arauzko izapide hauek bete dira espedientean: Sektore Elektrikoari buruzko azaroaren 26ko 24/2013 Legea; Energia elektrikoko instalazioen garraioko, banaketako, merkaturatzeko eta hornidurako jarduerak eta baimentze-prozedurak arautzen dituen abenduaren 1eko 1955/2000 Errege Dekretua; Eusko Jaurlaritzaren martxoaren 31ko 48/2020 Dekretua; eta bat datorren gainerako legedia.

3.– Gainera, arau hauek aplikatu behar dira: Euskadiko Ingurumen Administrazioari buruzko abenduaren 9ko 10/2021 Legea eta Ingurumen-ebaluazioari buruzko abenduaren 9ko 21/2013 Legea, ingurumen-inpaktuaren ebaluazio sinplifikatuaren prozedurari eta haren emaitzak baimen honetan sartzeari dagokienez. 10/2021 Legearen 79.1 artikuluaren arabera, ingurumen-inpaktuaren txostena loteslea da, eta, beraz, bertan ezarritako guztia nahitaez bete beharko da proiektua gauzatzean.

4.– Ingurumen-ebaluazioari buruzko 21/2013 Legearen 46. artikuluan xedatutakoaren arabera, ingurumen-organoak eragindako administrazio publikoei eta pertsona interesdunei kontsulta egingo die, eta horiek erregelamenduz ezarritako epean eman beharko dute irizpena. Epe hori amaitzen bada haien adierazpenik jaso gabe, prozedurak aurrera egingo du, baldin eta ingurumen-organoak ingurumen-inpaktuaren txostena egiteko irizpen-elementu nahikoak baditu. Kasu horretan, lehen aipatutako adierazpenak geroago jasotzen badira, ez dira kontuan hartuko.

Ildo horretatik, BFAko Natura Ondarearen Zerbitzuak txostena garaiz kanpo eman duenez, eta ingurumen-organoak berak 2026ko otsailaren 4ko Ebazpena aldatu ez duenez, ingurumen-inpaktuaren txostena egiteko irizpen-elementu nahikoak zituela ulertu behar da, eta, beraz, txosten horrek erabateko baliozkotasunari eta eraginkortasunari eusten dio. Beraz, baimen honen esparruan, Ebazpen horretan ezarritako prebentzio- eta zuzenketa-neurriak baino ez dira aplikagarriak, eta ezin dira eskatu BFAren Natura Ondarearen Zerbitzuaren epez kanpoko txostenean jasotako proposamenak.

Aipatutako lege-xedapenak ikusita, eta oro har zein zehazki aplikagarri diren gainerakoak oinarritzat hartuta, eta Lurralde Ordezkaritzako energia-arloko txostenarekin bat etorriz, Industria, Trantsizio Energetiko eta Jasangarritasuneko Bizkaiko lurralde-ordezkariak hau

EBAZTEN DU:

1.– Aurretiko administrazio-baimena eta eraikitzeko baimena ematea I-DE Redes Eléctricas Inteligentes SAU enpresari, proiektu honetarako: 132 kV-ko Ortuella TA – Abanto TA zirkuitu bikoitzeko linea elektrikoa eraberritzea, Abanto y Ciérvana-Abanto Zierbena, Ortuella, Santurtzi eta Zierbenako (Bizkaia) udal-mugarteetan.

2.– Deklaratzea baimentzen den instalazio elektrikoa onura publikokoa dela. Sektore Elektrikoari buruzko abenduaren 26ko 24/2013 Legearen 56. artikuluan xedatutakoaren arabera, deklarazioak hauek dakartza berekin: ondasunak okupatu eta eraginpeko eskubideak hartu beharra, eta okupazioa, gainera, urgentziaz egin beharra. Deklarazioak, halaber, Nahitaezko Desjabetzeari buruzko 1954ko abenduaren 16ko Legearen 52. artikuluan presaz okupatzeko deklaraziorako ezartzen diren ondorioak dakartza, 53. artikuluan zehaztutako erregistro-ondorioekin.

Ebazpen hau ematen da 48/2020 Dekretuan xedatutakoaren arabera, eta baldintza orokor hauek kontuan hartuta:

1.– Obrak egiteko, onartutako proiektua bete behar da, kasu bakoitzean eskatu eta baimentzen diren aldaketak eginda.

2.– Proiektuak ingurumenean ondorio kaltegarri nabarmenik izan ez dezan, 2026ko otsailaren 4ko Ingurumen Inpaktuaren Txostenean (2026ko martxoaren 3ko EHAA) ezarritako baldintzak bete beharko ditu. Baldintza horiek ebazpen honen parte dira. Zehazki, eta laburbilduta, txosten horretan ezarritako neurri hauek hartu beharko dira:

– Natura-ondarea babesteko neurriak.

– Fauna babesteko neurriak.

– Jabari publiko hidraulikoa babesteari buruzko neurriak.

– Urak eta lurzoruak babesteko neurriak.

– Paisaia babesteko eta ukitutako eremuak lehengoratzeko neurriak.

– Zaraten eta bibrazioen ondorioak minimizatzera zuzendutako neurriak.

– Hondakinen kudeaketara bideratutako neurriak.

– Kutsatuta egon daitezkeen lurzoruen kudeaketarekin lotutako neurriak.

– Airearen kutsadura minimizatzeko neurriak.

– Kultura-ondarea babesteko neurriak.

– Jardunbide egokien sistema bat ezartzea.

– Garbiketa eta obra-akabera.

– Ingurumen-aholkularitza.

Era berean, kontsulta-fasean administrazioek, organismoek eta enpresek ezarritako baldintza teknikoak bete beharko ditu, sustatzaileak horiekiko adostasuna adierazi baitzuen.

3.– Martxan jartzeko epea hiru urtekoa izango da, ebazpen hau ematen den egunetik aurrera. Epe hori igaro eta instalazioa ustiatzeko baimenik eskatu ez bada, ebazpen hau iraungitzat jo ahal izango da.

4.– Lanak amaitutakoan, instalazioen titularrak Bizkaiko Lurralde Ordezkaritzari jakinarazi beharko dio lanen amaiera, behin betiko onarpena eman, eta abian jartzeko akta egiteko.

5.– Obrak egiteko behar diren udal- eta probintzia-eskumenetako eta bestelako baimenak edo lizentziak eragotzi eta aparte utzi gabe ematen da ebazpen hau, eta eskatzaileak nahitaez eskuratu beharko ditu baimen horiek guztiak. Era berean, hirugarrenen eskubideak kaltetu gabe emango da, jabetza-eskubidea salbu utzita.

Ebazpen honek ez du administrazio-bidea amaitzen, eta, beronen aurka, gora jotzeko errekurtsoa jar dakioke Industria, Trantsizio Energetiko eta Jasangarritasun Saileko Deskarbonizazioaren zuzendariari, hilabeteko epean, ebazpen hau jakinarazi eta hurrengo egunetik aurrera, eta hori guztia Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluaren eta hurrengoen arabera.

Jarritako errekurtsoaren ebazpena emateko eta jakinarazteko gehieneko epea hiru hilabetekoa izango da. Epe hori igaro eta ebazpenik eman ez bada, gora jotzeko errekurtsoa ezetsitzat joko da.

Bilbao, 2026ko apirilaren 1a.

Industria, Trantsizio Energetiko eta Jasangarritasuneko Bizkaiko lurralde-ordezkaria,

MARÍA JESÚS MARKAIDA URIARTE.

Azterketa dokumentala