Euskal Herriko Agintaritzaren Aldizkaria

63. zk., 2026ko apirilaren 7a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIA, LAN ETA ENPLEGU SAILA

1466

EBAZPENA, 2026ko martxoaren 16koa, Laneko eta Gizarte Segurantzako zuzendariarena, zeinaren bidez erregistratu, gordailutu eta argitaratzen baita Osakidetza-Euskal osasun zerbitzuko garbiketa-zerbitzuaren enpresa emakidadunentzako hitzarmen kolektiboko Batzorde Paritarioaren akordioa, 2026ko soldata-taulen eguneraketari buruzkoa (+ % 1,5). Hitzarmenaren kodea: 86002115012003.

AURREKARIAK

Lehenengoa.– 2026ko martxoaren 13an, REGCON erregistroan aurkeztu da aipatutako hitzarmen-kolektiboaren Batzorde Parekideak egindako akordioaren dokumentazioa.

ZUZENBIDEKO OINARRIAK

Lehenengoa.– Lehendakariaren ekainaren 23ko 18/2024 Dekretuak (Euskal Autonomia Erkidegoko Administrazioko sailak sortu, ezabatu eta aldatzen dituenak eta horien egitekoak eta jardun-arloak finkatzen dituenak), 2. artikuluan, Ekonomia, Lan eta Enplegu Saila sortzen du, eta, 7. artikuluan ezarritakoaren arabera, lan-arloko legeriak lan-harremanei buruz ezartzen duena betearazi behar du sail horrek, besteak beste.

Bigarrena.– Langileen Estatutuari buruzko Legearen testu bateginaren 85., 87., 88., 89. eta 90. artikuluetan xedatutako eskakizunak betez sinatu da akordioa.

Hirugarrena.– Aurkeztu den erabakia inskribatu beharreko egintza bat da, maiatzaren 28ko 713/2010 Errege Dekretuaren 2.1.a) artikuluan aurreikusitakoari jarraikiz. Inskripzio-eskaera eta erantsitako dokumentazioa aztertuta, egiaztatu da eskaerak betetzen dituela legez eskatzen diren baldintzak; beraz, bat etorriz Euskal Autonomia Erkidegoko lan-hitzarmen eta akordio kolektiboen eta berdintasun-planen erregistroari eta gordailuari buruzko urtarrilaren 25eko 9/2011 Dekretuak (2023ko otsailaren 14ko 20/2023 Dekretuaren bidez aldatuak) 9. artikuluan xedatutakoarekin, hau

EBAZTEN DUT:

Lehenengoa.– Agindua ematea akordioa inskribatu eta gordailutu dadin Euskal Autonomia Erkidegoko Lan Hitzarmen eta Akordio Kolektiboen eta Berdintasun Planen Erregistroan, eta horren berri aldeei jakinarazi dakien.

Bigarrena.– Xedatzea Euskal Herriko Agintaritzaren Aldizkarian argitara dadila.

Vitoria-Gasteiz, 2026ko martxoaren 16a.

Laneko eta Gizarte Segurantzako zuzendaria,

MARÍA VICTORIA PORTUGAL LLORENTE.

1. ERANSKINA

ZIURTAPENA

Leire Idirin Requetak, Osakidetzako garbiketa-zerbitzuaren enpresa emakidadunentzako hitzarmen kolektiboko batzorde paritarioak emandako baimena baliatuta, honako hau

ADIERAZTEN DU:

2026ko martxoaren 13an egindako bilkuran, batzorde horrek jarraian azaltzen den gaia aztertu du, CCOO sindikatuaren eskariz; hona hemen bilkuran hartutako erabakia, bileraren aktatik transkribatua.

Eskaria: SLOs/3/2026.

Planteatu den gaia: sina daitezela 2026rako hitzarmen kolektiboko soldata-taulak, Osakidetzan aplikatutako % 1,5eko igoerari dagozkionak, Jaurlaritzaren Idazkaritzako eta Legebiltzarrarekiko Harremanetarako zuzendariaren otsailaren 24ko 35/2026 Ebazpena argitaratu ondoren. Ebazpen horren bidez argitara ematen da Euskal Autonomia Erkidegoko Administrazioaren sektore publikoaren zerbitzuko langileen ordainsarien 2026. urterako igoera onartzen duen Erabakia.

EBAZPENA

Batzordeak hau erabaki du aho batez:

«Onartu egiten dira Osakidetzako garbiketa-zerbitzuaren enpresa emakidadunentzako hitzarmen kolektiboko soldata-taulak, akta honen eranskinean jasota eta sinatuta daudenak. Taula horietan, soldata-kontzeptuak % 1,5 eguneratu dira, 2025eko abenduaren 31n indarrean zeudenen aldean, 2026ko urtarrilaren 1etik aurrerako ondorioekin, bat etorriz Jaurlaritzaren Idazkaritzako eta Legebiltzarrarekiko Harremanetarako zuzendariaren otsailaren 24ko 35/2026 Ebazpenean aurreikusitako baldintzekin (ebazpen horren bidez, argitara ematen da Euskal Autonomia Erkidegoko Administrazioaren sektore publikoaren zerbitzuko langileen ordainsarien 2026. urterako igoera).

Soldata-taulak Euskal Herriko Agintaritzaren Aldizkarian argitara ematen direnetik aurrera gauzatuko dira ordainketak».

Eta hala ziurtatzen du, dagozkion ondorioak izan ditzan, Bilbon, 2026ko martxoaren 13an.

Leire Idirin Requeta, lan-harremanetako teknikaria.

2. ERANSKINA

(Ikusi .PDF Fitxategia)

Azterketa dokumentala