Euskal Herriko Agintaritzaren Aldizkaria

8. zk., 2026ko urtarrilaren 14a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

GOBERNANTZA, ADMINISTRAZIO DIGITAL ETA AUTOGOBERNUAREN SAILA

126

105/2025 EBAZPENA, abenduaren 17koa, Jaurlaritzaren Idazkaritzako eta Legebiltzarrarekiko Harremanetarako zuzendariarena, zeinaren bidez argitara ematen baita Estatuko Administrazio Orokorrarekin eta Renfe Viajeros enpresarekin sinatutako hitzarmena Altsasu-Gasteiz-Miranda korridorean trenbideko garraio publikoko zerbitzuetan hobekuntzak ezartzeko.

Euskal Autonomia Erkidegoko Administrazio Orokorrak aipatu den hitzarmena sinatu du, eta, behar bezalako publikotasuna emateko, hau

EBAZTEN DUT:

Artikulu bakarra.– Euskal Herriko Agintaritzaren Aldizkarian argitaratzea Estatuko Administrazio Orokorrarekin eta Renfe Viajeros enpresarekin sinatutako hitzarmena Altsasu-Gasteiz-Miranda korridorean trenbideko garraio publikoko zerbitzuetan hobekuntzak ezartzeko. Hitzarmen hori ebazpen honen eranskin gisa agertzen da.

Vitoria-Gasteiz, 2025eko abenduaren 17a.

Jaurlaritzaren Idazkaritzako eta Legebiltzarrarekiko Harremanetarako zuzendaria,

JON IÑAKI URBINA GARCÍA DE VICUÑA.

ERANSKINA, JAURLARITZAREN IDAZKARITZAKO ETA LEGEBILTZARRAREKIKO HARREMANETARAKO ZUZENDARIAREN ABENDUAREN 17KO 105/2025 EBAZPENARENA

ESTATUKO ADMINISTRAZIO OROKORRAREN, RENFE VIAJEROS-EN ETA EUSKADIKO ADMINISTRAZIO OROKORRAREN ARTEKO HITZARMENA, ALTSASU-GASTEIZ-MIRANDA KORRIDOREAN TRENBIDEKO GARRAIO PUBLIKOKO ZERBITZUETAN HOBEKUNTZAK EZARTZEKO

BILDU DIRA:

Alde batetik, José Antonio Santano Clavero jauna, Garraioetako eta Mugikortasun Jasangarriko estatu-idazkaria, azaroaren 28ko 967/2023 Errege Dekretuaren bidez izendatua, Estatuko Administrazio Orokorraren (aurrerantzean, EAO) ordezkari gisa, bat etorriz Sektore Publikoaren Araubide Juridikoaren urriaren 1eko 40/2015 Legearen 48. artikuluan eta Gastuetarako kreditu jakin batzuk administratzeko eta eskumenak eskuordetzeko mugak ezartzeari buruzko irailaren 9ko TMA/1007/2021 Aginduaren bosgarren apartatuan xedatutakoarekin.

Bestetik, Álvaro Fernández Heredia jauna, Renfe Viajeros SME SAren (aurrerantzean, Renfe Viajeros) Administrazio Kontseiluko presidentea (egoitza soziala: Bartzelona Hiria etorbidea 4, Madril). Kontseilu hori 2013ko abenduaren 11n eratu zen, Madrilgo Elkargoko José Manuel Senante Romero notarioaren aurrean, 3.553 Luzapen Protokoloaren zenbakiarekin, eta Madrilgo Merkataritza Erregistroan inskribatuta dago (31.997 liburukia, 1. folioa, 8. atala eta M-575733 orria). Sozietate horrek behar bezala baimendu zuen, urtarrilaren 14ko 30/2025 Errege Dekretuaren bidez postu horretarako izendatua, urriaren 1eko 40/2015 Legearen 48.2 artikuluan xedatutakoarekin bat etorriz.

Eta, bestetik, Susana Garcia Chueca andrea, Eusko Jaurlaritzako Mugikortasun Jasangarriaren sailburua, lehendakariaren ekainaren 24ko 30/2024 Dekretuaren bidez izendatua, Euskal Autonomia Erkidegoko Administrazio Orokorraren (aurrerantzean, EAEAO) ordezkari gisa, eta hitzarmen hau sinatzeko baimena eman zaio Gobernu Kontseiluaren 2025eko ekainaren 10eko Erabakiaren bidez.

Esku hartzen duten guztiek hitzarmen hau sinatzeko legezko gaitasuna aitortzen diote elkarri, eta, horretarako, honako hau

ADIERAZTEN DUTE:

I.– Bidaiariak aldiriko trenbidez garraiatzeko zerbitzuei dagozkien Estatuko Administrazioaren eginkizunak Euskal Autonomia Erkidegoari eskualdatzeari buruzko apirilaren 9ko 368/2024 Errege Dekretuaren bidez (2024ko apirilaren 19an argitaratu zen Estatuko Aldizkari Ofizialean), Batzorde Mistoak 2024ko martxoaren 11ko osoko bilkuran hartutako akordioa onartu zen –Batzorde Misto hori Euskal Autonomia Erkidegoko Autonomia Estatutuaren bigarren xedapen iragankorrean aurreikusita dago–. Erabaki horren bidez, Euskal Autonomia Erkidegoko Administrazio Orokorrari (aurrerantzean, EAEAO) eskualdatzen zaizkio aldiriko trenbidez bidaiariak garraiatzeko zerbitzuei dagozkien Estatuko Administrazio Orokorraren (aurrerantzean, EAO) eginkizunak. Erabaki hori aipatutako errege-dekretuaren eranskin gisa transkribatzen da. Erabaki horretan, eskualdatuko ziren eginkizunak eta eskualdatze hori gauzatzeko baldintzak ezarri ziren.

Zehazki, eranskinaren B) atalak autonomia-erkidegoak bere gain hartzen dituen eginkizunak zehazten ditu, eta C) atalak Estatuko Administrazioak bere gain uzten dituen eginkizunak adierazten ditu.

Bestalde, F) 2 atalak zehazten duenez, Interes Orokorreko Trenbide Sarearen gainean Euskal Autonomia Erkidegoaren lurraldetik oso-osorik igarotzen diren trenbide-zerbitzuak, Autonomia Erkidegoak bere gain hartzen dituen eginkizunei buruzkoak, Renfe Viajeros, SME, SAk egiten ditu, Estatuko Administrazio Orokorraren eta Estatuko merkataritza-sozietate honen artean sinatutako zerbitzu publikoko kontratuaren esparruan. Kontratu hori indarrean zegoen akordioa onartu zen egunean.

Apirilaren 9ko 368/2024 Errege Dekretuak berak xedatzen zuen funtzioen eskualdaketa eraginkorra izango zela honako une honetatik Aurrera: Euskal Autonomia Erkidegoko Administrazio Orokorra Estatuko Administrazio Orokorraren kontratu-posizioan subrogatzeko erabakia indarrean jartzen denetik, Renfe Viajeros SME SArekin (aurrerantzean, Renfe Viajeros) egindako zerbitzu publikoko kontratuan. Ildo horretan, transferentzia hori 2025eko urtarrilaren 1ean gauzatu da EAEAOren aldetik, Renfe Viajerosek eta EAOk 2024ko azaroaren 28an kontratuaren subrogazioa sinatu ondoren.

Horren ondoren, 2024ko abenduan, 6. gehigarria sinatu zen, Estatuko Administrazio Orokorrak eta Renfe Viajeros SME SA Estatuko merkataritza-sozietateak 2018ko abenduaren 18an sinatutako kontratua aldatzeko.

Gehigarri horretan, kontratua banantzen da Euskal Autonomia Erkidegoko aldirietako zerbitzuei dagokionez, eta Eusko Jaurlaritzak subrogatu egiten da Estatuko Administrazio Orokorraren posizioan Renfe Viajerosekin egindako kontratuaren zati bereizian.

II.– Transferentzia honen helburua da Renfe Viajerosek Euskal Autonomia Erkidegoan ematen dituen zerbitzuen koordinazioa hobetzea, zerbitzu horiek pixkanaka hobetu daitezen. Hobetzeko borondate hori modu formalean gauzatu zen aipatutako eskualdatze-erabakiaren akordio osagarrietan. Akordio horiek Transferentzien Batzorde Mistoak 2024ko martxoaren 11n egindako osoko bilkuran hartu ziren, zehazki, 2. erabaki osagarrian. Erabaki horren e) apartatuan ezartzen denez, Euskal Autonomia Erkidegoak, bere eskumenak baliatuz, indarrean dagoen kontratuan aurreikusitako kalitate- edo zerbitzu-estandarretako batzuk aldatzeko eska liezaioke Renfe Viajerosei.

Horri dagokionez, transferentzia izapidetu bitartean, Mugikortasun Jasangarriaren Sailak, Renfe Viajerosekin lankidetzan, Euskal Autonomia Erkidegoan ematen diren trenbide-zerbitzuen mugikortasun-eskaintzan Interes Orokorreko Trenbide Sarean egin zitezkeen hobekuntzak aztertu zituen. Azterketa horien ondorioz, Bilboko aldirietako guneko C-3 linean (Bilbo-Urduña) ematen diren zerbitzuen birmoldaketa txiki bat egin da, eskaintza homogeneizatuz eta tren ia zuzenekoak sortuz. Birmoldaketa hori 2025eko urtarrilaren 1ean ezarri zen.

Aurrekoarekin lotuta, apirilaren 9ko 368/2024 Errege Dekretuaren eranskinean (bidaiariak aldiriko trenbidez garraiatzeko zerbitzuak EAEri eskualdatzekoa), zabalera iberikoa eta zabalera metrikoa duten aldiriko zerbitzuen zerrendan (eranskineko 1. zerrenda), Araia-Gasteiz eta Gasteiz eta Manzanos-Erriberabeitia arteko konexioak ere jasotzen dira, etorkizuneko aldiriko zerbitzuen zati gisa.

EAEAOk trenbide-zerbitzua hobetu nahi du arlo horretan, gaur egun zerbitzua ematen duten zirkulazioak handituz. Hala ere, kontuan hartuta eragin-eremua eta Gasteizko hiriburuaren inguruan dagoen eskaria, eta Manzanosen eta Araian ibiltzeko inbertsio-maniobrak egiteko zailtasun teknikoak, komeni da Arabako Lautadako zerbitzua Altsasu eta Miranda udalerrietara zabaltzea, Euskal Autonomia Erkidegoaren eskumen- eta lurralde-eremutik kanpo daudenak.

Gaur egun, Arabako Lautadako zerbitzuak Altsasu eta Miranda udalerrietaraino hartzen duen ibilbidea Estatuko Administrazio Orokorraren eskumeneko trenbide-zerbitzuen bidez egiten da, «Distantzia ertaina» izenarekin, zabalera konbentzionaleko sarean (Burgos-Gasteiz-Iruña, Iruña-Gasteiz eta Gasteiz-Irun erlazioen barruan). Horiek guztiak zerbitzu publikoko betebeharraren mende geratzen dira, Ministro Kontseiluaren 2017ko abenduaren 15eko Erabakian ezarritakoaren arabera. Erabaki hori 2024ko abenduaren 3an berrikusi zen, eta Estatuko Administrazio Orokorraren eskumenekoak diren trenbideko bidaiari-garraioko zerbitzuei dagozkien zerbitzu publikoko betebeharrak ezartzen ditu interes orokorreko trenbide-sarean.

Eusko Jaurlaritzako Mugikortasun Jasangarriaren Sailak uste du behar bezala justifikatuta dagoela Arabako Lautadako trenbide-garraioko zerbitzuan (Miranda-Gasteiz-Altsasu) hobekuntza horiek ezartzea, garraio-sistemaren iraunkortasuna eta gizartearen eskaria direla eta. Era berean, proposatutako hobekuntzak probaldi gisa egingo lirateke, 2025etik 2027ra bitarteko aldirako, eta Eusko Jaurlaritzak finantzatuko luke gertatzen den ustiapen-defizita.

Ondorioz, hitzarmen bat formalizatu behar da Estatuko Administrazio Orokorraren, Renfe Viajerosen eta Euskal Autonomia Erkidegoko Administrazio Orokorraren artean, Altsasu-Gasteiz-Miranda korridorean trenbideko garraio publikoko zerbitzuetan hobekuntzak ezartzeko.

Horrenbestez, indarrean dagoen araudian ezarritakoaren arabera, eta, bereziki, irailaren 29ko 38/2015 Legearen 59.5 artikuluan ezarritakoaren arabera (horren bidez, Garraio eta Mugikortasun Jasangarriaren Ministerioak hitzarmenak egin ditzake autonomia-erkidegoekin, zerbitzuaren kostua finantzatzeko), bai eta Sektore Publikoaren Araubide Juridikoaren urriaren 1eko 40/2015 Legean (SPAJL) xedatutakoaren arabera ere, alderdiek erabaki dute administrazioen arteko hitzarmen hau formalizatzea, eta honako klausula hauen arabera sinatzen dute:

KLAUSULAK

Lehenengoa.– Hitzarmenaren xedea.

Hitzarmen honen xedea da EAOk, Renfe Viajerosek eta EAEAOk Arabako Lautadako trenbide-garraioko zerbitzuan hobekuntzak garatzeko eta ezartzeko konpromisoa hartzen duten baldintzak ezartzea. Hobekuntza horien xedea Miranda eta Altsasu herrien artean egiten diren zirkulazioak handitzea da. Zerbitzu horiek Estatuko Administrazio Orokorraren eskumeneko trenbide-zerbitzuen bidez ematen da, «Distantzia ertaina» izenarekin, zabalera konbentzionaleko sarean, eta zerbitzu publikoko betebeharra dute. Horrek Araia-Gasteiz eta Gasteiz eta Manzanos-Erriberabeitia konexioen zerbitzua hobetzea ekarriko du, aipatutako herrien artean baitaude.

Bigarrena.– Eusko Jaurlaritzak eskatutako zerbitzu berriaren deskribapena.

Honako hau da zerbitzu berriaren osaera:

– 10 zirkulazio gehiago izango dira astelehenetik ostiralera, 8 larunbatetan eta 7 igandetan; zehazki, honela:

– Luzapena ematea Renfe Viajerosen eta EAOren arteko kontratuan jasotako trenen 4 zirkulaziaori, astelehenetik ostiralera, Gasteiz eta Altsasu artean (bi Altsasu eta Gasteiz artean, eta bi Gasteiz eta Altsasu artean).

– Luzapena ematea Renfe Viajerosen eta EAOren arteko kontratuan sartutako trenen 3 zirkulazioari, astelehenetik ostiralera, Gasteiz eta Miranda artean (bat Miranda eta Gasteiz artean eta bi Gasteiz eta Miranda artean).

– Astelehenetik ostiralera 3 zirkulazio berri ezartzea Miranda eta Altsasu artean (Altsasu-Miranda bat eta bi Miranda-Altsasu).

– Larunbatetan, Renfe Viajerosen eta EAOren arteko kontratuan jasotako tren baten zirkulazio bat luzatzea Altsasu eta Gasteiz artean, 2 Gasteiz eta Miranda artean eta 1 Miranda eta Gasteiz artean.

– Larunbatetan 4 zirkulazio berri sortzea: 2 Altsasutik Miranda aldera eta 2 Miranda eta Altsasu artean.

– Igandetan 6 zirkulazio berri sortzea: 3 Altsasutik Miranda aldera eta 3 Miranda eta Altsasu artean.

– Igandetan, zirkulazio 1 luzatu da Gasteiztik Altsasura.

– Zerbitzu hori emateko, unitate elektriko bat behar da, 447, 449, 470 seriekoa edo baliokidea, material gurpildunaren eskuragarritasunaren arabera.

– Egindako distantziari dagokionez, zerbitzu berriak 182,9 mila kilometro inguruko zenbatekoa ekarriko luke urtean.

– Zerbitzu berrirako proposatutako ordutegiak 1. eranskinean jaso dira.

Zerbitzu berria proba-izaerarekin egingo litzateke, hitzarmen hau indarrean jartzen denetik 2027ko abenduaren 31ra arte.

Guztira, zerbitzu berria egiteko kostua zortzi milioi bederatziehun eta hirurogeita zortzi mila eurokoa (8.968.000,00) izango da (BEZik gabe), hitzarmen honen indarraldirako.

Zerbitzu berriari Estatuko Administrazio Orokorrak ekitaldi bakoitzerako onartutako T1 merkaturatze-tarifak eta -baldintzak aplikatuko zaizkio, distantzia ertaineko OSP zerbitzuetarako.

Hirugarrena.– Alderdiek hartutako konpromisoak.

– EAOk, Garraio eta Mugikortasun Jasangarriaren Ministerioko Lurreko Garraioaren Idazkaritza Nagusiaren bidez, konpromisoa hartzen du, Arabako Lautadako zerbitzu berriak Altsasu eta Miranda udalerrietaraino egingo lukeen ibilbidea zeharkatzen duten trenbide-zerbitzuen gaineko eskumena duen administrazioa den aldetik –zerbitzuak «Distantzia ertaina» izenarekin ematen dira, zabalera konbentzionaleko sarean, eta zerbitzu publikoko betebeharra dute–, hitzarmen honen xede diren eta zerbitzu publikoko betebeharraren mende dauden zerbitzuen gehikuntza sartzeko, hitzarmenaren bigarren klausulan agertzen den deskribapenaren arabera, Renfe Viajerosekin trenbideetako OSP zerbitzu publikoak emateko kontratuan, eta Renfe Viajerosi baimena emateko zerbitzu horiek ematen hasteko, gehienez ere 15 eguneko epean, Hitzarmen hau indarrean jartzen denetik zenbatzen hasita.

– Renfe Viajeros, bere aldetik, hitzarmen honetan zehaztutako zerbitzuak zuzendu, kudeatu eta emateko konpromisoa hartzen du. Era berean, konpromisoa hartzen du Dirulaguntzen Araubidea Erregulatzeko abenduaren 21eko 20/2023 Legearen 14. artikuluan eta Dirulaguntzei buruzko azaroaren 17ko 38/2003 Lege Orokorraren artikulu berean ezarritako betebeharrak betetzeko.

– Euskal Autonomia Erkidegoko Administrazioak, Mugikortasun Jasangarriaren Sailaren bitartez, konpromisoa hartzen du zerbitzu berria emateagatik sortzen den ustiapen-defizitaren konpentsazioa finantzatu eta ordaintzeko, arrazoizko etekina barne, Renfe Viajerosen eta EAOren arteko zerbitzu-prestazioko kontratuan ezarritako baldintzen arabera.

2025-2027 aldirako, Euskal Autonomia Erkidegoko Administrazioak, Mugikortasun Jasangarriaren Sailaren bidez, gehienez ere zortzi milioi bederatziehun eta hirurogeita zortzi mila euroko (8.968.000,00) jarriko ditu. Horretarako, 1001211000 1.51314.43900 2025/001080 aurrekontu-aplikazioa zuzkitu da beharrezkoa den kredituarekin hitzarmenaren gehieneko kostu ekonomikoari aurre egiteko. Aurrekontu-partida hori Euskal Autonomia Erkidegoko 2025erako Aurrekontu Orokorren kargura gaitu da, eta beharrezkoak diren kontabilitate-egokitzapenak egin dira, honako hau oinarri:1/2011 Legegintzako Dekretua, maiatzaren 24koa, Euskadiko aurrekontu-araubidearen arloan indarrean diren lege-xedapenen testu bategina onartzen duena eta Euskal Autonomia Erkidegoko sektore publikoko fundazio eta partzuergoei aplikatu beharreko aurrekontu-araubidea arautzen duena, eta banaketa honen arabera:

2025. urtean: 2.232.000 euro.

2026. urtean: 3.369.000 euro.

2027. urtean: 3.367.000 euro.

3. eranskinean, konpentsazioak kalkulatzeko aurreikusitako emaitzen kontua zehazten da.

Laugarrena.– Dirulaguntzaren xedea eta ordainketa.

1.– Hitzarmen honen xede diren zerbitzu berrien konpentsazioaren zenbatekoa zuzenean ordainduko dio EAEAOk Renfe Viajerosi. Konpentsazio hori 2. eranskinean adierazitako irizpideen arabera kalkulatuko da.

2.– Zerbitzu berriak konpentsatzeko EAEAOren dirulaguntza, aplika litekeen arrazoizko etekina alde batera utzita, Renfe Viajerosek Altsasu-Gasteiz-Miranda korridorean trenbideko garraio publikoko zerbitzuetan hobekuntzak ezartzearen ondoriozko kostua finantzatzeko baino ezin izango du erabili.

3.– Dirulaguntza zuzena da eta bateragarria da jarduera horiek egiteko pertsona fisikoek edo juridikoek eman ditzaketen beste laguntza edo dirulaguntza batzuekin. Hala ere, laguntza eta dirulaguntza horien baturak eta hitzarmen honen bidez bideratutakoek ezin izango dute gainditu jardueren kostua, ezta Renfe Viajeros eta EAOren arteko kontratuaren baldintzen arabera aplika daitekeen arrazoizko etekina ere (Renfe Viajerosek egiaztatu behar du etekin hori).

4.– Finantzaketaren gehieneko zenbatekora iritsi arte, zenbatekoaren igorpena egingo da Renfe Viajerosek urte bakoitzeko abenduaren 31 baino lehen egindako eta amaitutako jardueren jatorrizko fakturak edo horien fotokopia konpultsatuak aurkezten dituenean, hurrengo urteko urtarrilaren 31 baino lehen, emandako finantzaketa osoa osatu arte. Dirulaguntzaren xedearekin lotuta egindako gastuak justifikatu ondoren, dagokion ordainketa egingo da banku-transferentzia bidez.

5.– Euskal Autonomia Erkidegoko Administrazio Orokorreko Mugikortasun Jasangarriaren Saileko Mugikortasun Jasangarrirako Estrategiaren Zuzendaritza izango da dirulaguntza kudeatzeaz arduratuko den organoa.

Bosgarrena.– Jarduketen Jarraipen Batzordea.

1.– Jarraipen Batzorde bat eratuko da, alderdi bakoitzeko bi kidek osatua, honako eginkizun hauek betetzeko:

– Hitzarmen honetan aurreikusitako jarduketak behar bezala gauzatzen ari direla ikusteko gainbegiratzea, eta irizpideak eta moduak zehaztea elkarri informazioa emateko eta dagozkien konpromisoak behar bezala betetzeko.

– Kasu bakoitzean behar diren izapideak azkar egitea eragozten duten oztopoak kentzen laguntzea.

– Hitzarmen honen xede diren jarduketak betetzen direla bermatzeko behar diren neurriak jakinaraztea eta proposatzea.

– Hitzarmenak sor ditzakeen interpretazio- eta gauzatze-arazoak konpontzen saiatzea.

2.– Hitzarmena indarrean dagoen bitartean, eta alderdietako edozeinek proposatuta, jarduketak behar bezala egiteko behar den guztietan bilduko da batzordea. Erabakiak bertaratutakoen gehiengoz hartuko dira, eta alderdi bakoitzeko ordezkarien ehuneko berrogeita hamar gutxienez egon beharko da bertan.

3.– Hitzarmenak jarraipen-batzordearentzat berariaz aurreikusten ez dituen gaietan, Sektore Publikoaren Araubide Juridikoaren urriaren 1eko 40/2015 Legearen atariko tituluaren II. kapituluaren 3. atalean araututako kide anitzeko organoen araubidea aplikatuko da.

Seigarrena.– Hitzarmenaren araubidea eta interpretazioa.

1.– Hitzarmen hau administratiboa da, eta, beraz, interpretatzeko eta garatzeko, hitzarmenei aplikatu beharreko ordenamendu juridikoari jarraituko zaio.

2.– Hitzarmenak edo hura betearazteak sortarazitako interpretazio-arazoak jarraipen-batzordeak konponduko ditu aurreko klausulan esandakoaren arabera; ezin badira ebatzi, administrazioarekiko auzien jurisdikzioko epaitegi eta auzitegietan ebatziko dira, hamargarren klausulan aurreikusitakoaren arabera.

Zazpigarrena.– Indarraldia.

1.– Hitzarmen hau, sinatzen den egunean perfekzionatzen dena, eraginkorra izango da Estatuko sektore publikoko Lankidetza Organo eta Tresnen Estatuko Erregistro Elektronikoan inskribatzen den egunean, eta 2027ko abenduaren 31ra arte egongo da indarrean, Sektore Publikoaren Araubide Juridikoaren urriaren 1eko 40/2015 Legearen 49. artikuluaren 1. apartatuan eta 48.8 artikuluan ezarritakoaren arabera. Gainera, Estatuko Aldizkari Ofizialean argitaratuko da, Euskal Sektore Publikoaren maiatzaren 12ko 3/2022 Legearen 32.1 eta 33. Artikuluak ezarritako publizitate-araubidea jarraikiz.

2.– Amaitzeko aurreikusitako epea bete aurreko edozein unetan, hitzarmenaren sinatzaileek aho batez ados dezakete hitzarmena luzatzea, beste lau urteko aldi baterako gehienez, edo hura suntsiaraztea. Luzapena gehigarriaren bidez erabakiko da, eta gehigarri hori arauz aurreikusitako baldintzetan izapidetuko da.

Zortzigarrena.– Hitzarmena aldatzea.

Hitzarmen hau aldatzerik bada, hitzarmena sinatu duten erakundeek hala adosten badute. Alderdiek aldaketa gehigarri bidez adostuko dute, eta gehigarri hori arauz aurreikusitako baldintzetan izapidetuko da.

Bederatzigarrena.– Ez-betetzea.

Dirulaguntzaren erakunde onuradunak hitzarmen honen hirugarren klausularen arabera bere gain hartutako betebeharrak behin eta berriz betetzen ez baditu, edo Dirulaguntzen Araubidea Erregulatzeko abenduaren 21eko 20/2023 Legean eta Dirulaguntzei buruzko azaroaren 17ko 38/2003 Lege Orokorraren 37. artikuluan ezarritako kausaren bat gertatzen bada, erakunde onuradunak emandako laguntzaren zenbateko osoa itzuli beharko du, baita aplikatu beharreko berandutze-interesak ere.

Hala ere, erakunde onuradunaren betetze-maila nabarmen hurbiltzen bada erabateko betetzera, eta erakunde onuradunak argi eta garbi egiaztatzen badu konpromisoak betetzera bideratutako jarduketa bat egin duela, itzuli beharreko zenbatekoa zehaztuko da, hala badagokio, baina inola ere ez da gaindituko justifikatu beharreko guztizkotik egiaztatutako betetze osoa kentzearen ondoriozko zenbatekoa, proportzionaltasun-irizpidearen arabera.

Hamargarrena.– Hitzarmena suntsiaraztea.

Alderdietako batek ez baditu betetzen bere gain hartutako konpromisoak, gainerako alderdiek eskubidea izango dute hitzarmena suntsiarazteko eskatzeko. Nolanahi ere, hitzarmena suntsiarazteko arrazoitzat hartuko dira urriaren 1eko 40/2015 Legearen 51.2 artikuluan aurreikusitakoak. Hitzarmena suntsiarazten bada, alderdiek zehaztuko dituzte gauzatzen ari diren jarduerak amaitzeko eta ordaintzeko baldintzak; horretarako, alderdiek epe luzaezin bat ezarriko dute, eta, epe hori igarotakoan, hitzarmena likidatu beharko da.

Hamaikagarrena.– Datu pertsonalak.

Alderdi sinatzaileek honako hauek bete beharko dituzte: 2016/679 (EB) Erregelamendua, 2016ko apirilaren 27koa, Europako Parlamentuarena eta Kontseiluarena, datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa eta 95/46/EE Zuzentaraua (Datuak Babesteko Erregelamendu Orokorra) indargabetzen duena; 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa; eta datuen babesaren arloan unean-unean aplikatzekoa den gainerako araudia.

Hamabigarrena.– Araubide juridikoa.

1.– Hitzarmen honi indarrean dagoen ordenamendu juridikoan ezarritako xedapenak aplikatuko zaizkio, bereziki Sektore Publikoaren Araubide Juridikoaren urriaren 1eko 40/2015 Legean, Dirulaguntzei buruzko azaroaren 17ko 38/2003 Lege Orokorrean eta Dirulaguntzen Araubidea Erregulatzeko abenduaren 21eko 20/2023 Legean jasotako xedapenak.

2.– Hitzarmen hau garatu eta betearaztean alderdien artean auzirik sortuz gero, Espainiako administrazioarekiko auzien jurisdikziora joko da, Administrazioarekiko Auzien Jurisdikzioa arautzen duen uztailaren 13ko 28/1998 Legean xedatutakoaren arabera.

Eta ezarritakoarekin bat datozela frogatzeko, bertaratuek elektronikoki sinatzen dute.

Egoitza elektronikoa, 2025eko uztailaren 1a.

Garraioetako eta Mugikortasun Jasangarriko ministroa irailaren 9ko TMA 1007/2021 Aginduaren eskuordetze bidez.

Garraioetako eta Mugikortasun Jasangarriko estatu-idazkaria,

JOSÉ ANTONIO SANTANO CLAVERO JAUNA.

Renfe Viajeros, SME, SAko lehendakaria,

ÁLVARO FERNANDEZ HEREDIA JAUNA.

Euskal Autonomia Erkidegoko Administrazioko Mugikortasun Jasangarriaren sailburua,

SUSANA GARCIA CHUECA ANDREA.

(Ikusi .PDF Fitxategia)

Azterketa dokumentala