Euskal Herriko Agintaritzaren Aldizkaria

249. zk., 2025eko abenduaren 26a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

5512

EBAZPENA, 2025eko azaroaren 6koa, Ingurumen Jasangarritasunaren sailburuordearena, zeinaren bidez funtsean aldatzen baita Ederfil Becker Koop. Elkarteari Alegiako (Gipuzkoa) udal-mugartean kobrezko eta aluminiozko hari esmaltatua ekoizteko emandako ingurumen-baimen bateratua.

GERTAKARIAK

1.– Ingurumeneko sailburuordearen 2009ko martxoaren 9ko hasierako Ebazpenaren bidez, ingurumen-baimen bateratua eman zitzaion Ederfil Becker Koop. Elkarteari, Alegian (Gipuzkoa) gauzatzen duen kobre eta aluminiozko hari esmaltatua ekoizteko jarduerarako, Kutsaduraren Prebentzioari eta Kontrol Integratuari buruzko uztailaren 1eko 16/2002 Legearen esparruan.

2.– Ingurumeneko sailburuordearen 2015eko azaroaren 12ko Ebazpenaren bidez, Ederfil Becker Koop. Elkarteari Alegiako (Gipuzkoa) udalerrian kobrezko eta aluminiozko hari esmaltatua ekoizteko jarduerarako emandako ingurumen-baimen bateratua aldatu eta gauzatu zen.

3.– Ingurumen Jasangarritasuneko sailburuordearen 2024ko abenduaren 4ko Ebazpenaren bidez, Alegiako udal-mugartean (Gipuzkoa) Ederfil Becker Koop. Elkarteari kobrezko eta aluminiozko hari esmaltatua ekoizteko jarduerarako emandako ingurumen-baimen bateratua berrikusi zen, Batzordearen 2020ko ekainaren 22ko (EB) 2020/2009 Betearazpen Erabakian jasotako baldintzetan. Horrela, baimenean jasotako neurri teknikoak eta baldintzak ebazpen honen eranskinetan jasotzen direnak izango dira.

4.– 2025eko maiatzaren 15ean, Ederfil Becker Koop. Elkarteak Ingurumen-organo honi eskatu zion ingurumen-baimen integratua funtsean alda zezala, Kutsaduraren Prebentzio eta Kontrol Integratuari buruzko Legearen testu bategina onartzen duen abenduaren 16ko 1/2016 Legegintzako Errege Dekretuan xedatutakoaren arabera, Alegiako (Gipuzkoa) plantaren egungo instalazioetan ekoizpen-ahalmena urtean 25.000 t kobre-baliokidera handitzeko proiekturako. Eskabidearekin batera, agiri tekniko hauek aurkeztu zituen:

– Ingurumen-baimen bateratuaren funtsezko aldaketa egiteko memoria teknikoa.

– Airearen sektoreko dokumentazioa.

– Hondakinen sektoreko dokumentazioa.

5.– Aurkeztutako dokumentazioa egokia zela egiaztatu ondoren, Ingurumen Administrazioaren zuzendariaren 2025eko maiatzaren 28ko Iragarkiaren bidez erabaki zen jendaurrean jartzea, 30 egun baliodunez, Ederfil Becker Koop. Elkarteak sustatutako proiektua, egoki jotzen ziren alegazioak aurkezteko. Iragarkia 2025eko ekainaren 10ean argitaratu zen Euskal Herriko Agintaritzaren Aldizkarian, Eusko Jaurlaritzaren iragarki-taula elektronikoan.

6.– Industriako isurpenen Erregelamenduaren 15.6 artikuluan eta Kutsaduraren Prebentzio eta Kontrol Integratuari buruzko uztailaren 1eko 16/2002 Legea (urriaren 18ko 815/2013 Errege Dekretuaren bidez onartua) eta Ingurumen Ebaluazioari buruzko abenduaren 9ko 21/2013 Legearen 37. artikuluan xedatutakoa betez, Ingurumen Administrazioaren Zuzendaritzak txostena eskatu zien Alegiako Udalari, Beasaingo Udalari, Eusko Jaurlaritzako Osasun Sailari, Eusko Jaurlaritzako Larrialdiei Aurre Egiteko eta Meteorologiako Zuzendaritzari eta Gipuzkoako Foru Aldundiko Ingurumen Sailari.

7.– 2025eko abuztuaren 25ean Eusko Jaurlaritzako Osasun Sailaren txostena jaso zen.

8.– Ingurumen-baimen bateratuaren funtsezko aldaketa jendaurrean jartzeko izapideak amaituta, ez dela alegaziorik aurkeztu egiaztatu da.

9.– 2025eko urriaren 15ean eta abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 20. artikulua aplikatuta, Ederfil Becker Koop. Elkartearen esku utzi zen espedientea, Industria, Trantsizio Energetiko eta Jasangarritasunaren Sailak egindako ebazpen-proposamenaren zirriborroa erantsita.

10.– 2025eko urriaren 24an, sustatzaileak alegazioak aurkeztu zituen entzunaldi-izapidean jasotako proposamena ikusita (2024ko uztailaren 25eko ebazpenaren bidez ebatzitako MNS_ 2024_ 001 espedientearen hasierako proiektuan aurreikusitako foku bati baja emateko eskatu zen), eta ingurumen-organo honek baja hori jakinarazitzat jotzen du, gertaera hori ebazpen honetan jasota.

ZUZENBIDEKO OINARRIAK

1.– 2013ko urriaren 19an, Estatuko Aldizkari Ofizialean 815/2013 Errege Dekretua argitaratu zen, urriaren 18koa, Industriako Emisioen Erregelamendua onartu eta Kutsaduraren Prebentzio eta Kontrol Integratuaren uztailaren 1eko 16/2002 Legea garatzen duena.

2.– 2016ko abenduaren 31n Estatuko Aldizkari Ofizialean argitaratu zen 1/2016 Legegintzako Errege Dekretua, abenduaren 16koa, Kutsaduraren Prebentzio eta Kontrol Integratuari buruzko Legearen testu bategina onartzen duena.

3.– 2021eko abenduaren 31n Euskal Herriko Agintaritzaren Aldizkarian argitaratu zen 10/2021 Legea, abenduaren 9koa, Euskadiko Ingurumen Administrazioarena.

4.– Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuaren Legearen testu bateginaren 1. artikuluan ebazten denaren arabera, lege horren xedea da atmosfera, ura eta lurzorua ez kutsatzea edo, hori ezinezkoa denean, gutxi eta kontrolpean kutsatzea. Horretarako, ingurumenak bere osotasunean babes-maila handia izatea dela xede, kutsadura prebenitu eta kontrolatzeko sistema integratu bat ezarriko da.

5.– Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 9. artikuluak xedatzen duenaren arabera, ingurumen-baimen bateratua beharko da haren 1. eranskinean aipatzen diren jardueretako edozeinetan aritzen diren instalazioak ustiatzeko.

6.– Industriako Isurpenen Erregelamendua onartzen duen eta Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatzen duen urriaren 18ko 815/2013 Errege Dekretuaren 6. artikuluan xedatutakoarekin bat etorriz, baimen honetan sartzen dira abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuari buruzko Legearen testu bateginaren 1. eranskinean zerrendatuta egon ez arren, lege horren aplikazio-eremuan sartzea eragin zuen jarduera duten eta jarduera horrekin lotura teknikoa duten instalazioen kokalekuan garatzen diren eta sortuko diren isurietan eta kutsaduran ondorioak izan ditzaketen ekoizpen-elementu eta -lerro guztiak.

7.– Lehenago aipatutako artikuluarekin bat etorriz, Ingurumen-baimen bateratuaren bitartez, egintza bakarrean eta Euskal Autonomia Erkidegoko ingurumen-organoak aurretiaz emandako prozedura administratibo bakarrean bateratuko dira hondakinak ekoizteko eta kudeatzeko baimenak, kolektorera, jabari publiko hidraulikora eta itsasoko eta lehorreko jabari publikora eginiko isurien baimenak eta atmosferara eginiko isurpenen baimenak, eta dagozkien isurpenen mugako balioak ezarriko dira, eskura dauden teknologia onenetan oinarrituta.

8.– Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 11. artikuluan xedatuta dagoenaren arabera, baimen honen oinarrizko helburua baldintzak ezartzea da, araua berau aplika daitekeen instalazio guztietan betetzen dela bermatzeko; horretarako, baimena ematen parte hartuko duten administrazio publikoen artean koordinatuta egongo den prozedura bat erabili nahi da, izapideak errazteko eta partikularrek ordaindu beharreko kargak gutxitzeko. Era berean, egintza administratibo bakar batean bildu nahi dira indarrean dagoen legerian jasotako ingurumeneko administrazio-baimen guztiak.

9.– Abenduaren 9ko 10/2021 Legearen 76.1 artikuluan ezarritakoa betez, ingurumen-inpaktuaren ebaluazio arrunta egingo zaio ingurumen-ebaluazioaren eremuan,II.D eranskina jasota dagoen baimendutako proiektuaren aldaketari. Horri dagokionez, Ederfil Becker Koop. Elkartea ez dago eranskin horretan sartuta.

10.– Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 10. artikuluan xedatutakoaren arabera, Alegian (Gipuzkoa) Ederfil Becker Koop. Elkartearen instalazioetan planteatutako aldaketa funtsezko aldaketatzat jotzen da, ekoizpen-ahalmena % 50 baino gehiago handitu delako. Zehazki, aldaketa ekoizpen-ahalmena % 108 handitzean datza, 12.000 tonatik 25.000 t kobre baliokide izatera igaro baita.

11.– Alegian dagoen Ederfil Becker Koop. Elkartearen instalazioen ekoizpen-ahalmena handitzeko proiektuak urriaren 18ko 815/2013 Errege Dekretuaren 14.1 artikuluaren b) substantzialtasun-irizpidea betetzen du (815/2013 Errege Dekretua, Industriako Isurpenen Erregelamendua onartzen duena eta Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatzen duena).

12.– Ingurumen-baimen bateratuak funtsean aldatzeko prozedurari dagokionez, Euskadiko Ingurumen Administrazioaren abenduaren 9ko 10/2021 Legearen 45. artikuluak ezartzen du prozedura hori kutsaduraren prebentzio eta kontrol integratuari buruzko legeria garatzen duen oinarrizko araudian aurreikusitakoa izango dela.

13.– Abenduaren 16ko 1/2016 Legegintzako Errege Dekretuak onartutako Kutsaduraren prebentzio eta kontrol integratuari buruzko uztailaren 1eko Legearen testu bateginaren 29. artikuluan xedatutakoaren arabera, ingurumen-baimen integratua emateko prozedurak lehentasuna izango du administrazio eskudunek jarduera gogaikarri, osasungaitz, kaltegarri eta arriskutsuak egiten dituzten herritarren jardueran esku hartzeko ezar dezaketen beste edozein bideren gainetik. Hala, ingurumen-baimen bateratua toki-agintarientzat loteslea izango da, baldin eta jarduerak egitea ukatzeko bada edota zuzenketa-neurriak ezartzeko, baita 22. artikuluan jasotako ingurumen-alderdiei buruzko guztian ere.

14.– Hala ere, Euskadiko Ingurumen Administrazioaren abenduaren 9ko 10/2021 Legearen 37. artikuluaren arabera ingurumen-baimen bateratuaren prozedurak jarduera sailkatuaren lizentziaren prozedura ordezkatuko du izapide guztietan.

15.– Azkenik, instalazioak gehienez isur ditzakeen gai kutsagarrien balioak eta ingurumena, oro har, ahalik eta gehien babesteko ustiapenerako ezarriko zaizkion beste baldintza batzuk zehazte aldera, ebazpen hau egiterakoan kontuan izan dira teknika erabilgarri onenen erabilera eta aplikatzekoa den arloko legerian ezarritako neurriak eta baldintzak.

16.– Orain arte azaldutakoari jarraikiz eta espedienteko txostenak aztertu ondoren, Ederfil Becker Koop. Elkarteak sustatutako jarduerari aplikatu beharreko baldintzak jasotzen zituen ebazpen-proposamena sinatu zen. Hau guztia abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 20. artikuluan aipatutako entzunaldi-izapidean jasotakoari kalterik egin gabe.

17.– Goian adierazitako izapideak amaituta, abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 20. artikuluan jasotzen den entzunaldi-izapidea bete da, eta ebazpen hau egin da.

18.– Aintzat hartu da organo honek eskumena duela ingurumen-baimen bateratu hau emateko, bat etorriz Industria, Trantsizio Energetiko eta Jasangarritasun Sailaren egitura organikoa eta funtzionala ezartzen duen abenduaren 3ko 410/2024 Dekretuan xedatutakoarekin.

19.– Honako hauek ikusi dira: Sailburuordetza honek 2025eko urriaren 15ean emandako ebazpena; Euskadiko Ingurumen Administrazioaren abenduaren 9ko 10/2021 Legea; 1/2016 Legegintzako Errege Dekretua, abenduaren 16koa, Kutsaduraren Prebentzio eta Kontrol Integratuari buruzko Legearen testu bategina onartzen duena; 815/2013 Errege Dekretua, urriaren 18koa, Industriako Isurpenen Erregelamendua onartu eta Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatzen duena; 21/2013 Legea, abenduaren 9koa, Ingurumen-ebaluazioari buruzkoa; 410/2021 Dekretua, abenduaren 3koa, Industria, Trantsizio Energetiko eta Jasangarritasun Sailaren egitura organikoa eta funtzionala ezartzen dituena; 39/2015 Legea, urriaren 1ekoa, Administrazio Publikoen Administrazio Prozedura Erkidearena; eta oro har aplikatzekoak diren gainerako arauak.

EBAZTEN DUT:

Lehenengoa.– Eskaera ingurumen-inpaktuaren ebaluaziorik behar ez duen funtsezko aldaketatzat hartzea, Kutsaduraren Prebentzio eta Kontrol Integratuari buruzko Legearen testu bategina onartzen duen abenduaren 16ko 1/2016 Legegintzako Errege Dekretuan, Euskal Autonomia Erkidegoko Ingurumen Administrazioaren abenduaren 9ko 10/2021 Legean eta Ingurumen-ebaluazioari buruzko abenduaren 9ko 21/2013 Legean xedatutakoaren ondorioetarako. Aldaketa honen bidez, Ederfil Becker Koop. Elkarteak Alegian (Gipuzkoa) sustatutako instalazioetan kobre ekoizpen-gaitasuna urteko 12.000 tonatik 25.000 t baliokidera igoko da. Horrez gain aurretik alta emandako fokuen datuak eguneratzen dira eta sortutako hondakinak sartzen dira.

Bigarrena.– Ederfil Becker Koop. Elkarteari emandako ingurumen-baimen bateratua aldatzea, kobrezko eta aluminiozko hari esmaltatua ekoizteko jarduerarako, Alegiako udal-mugartean. Baimena 2024ko abenduaren 4ko Ebazpenaren bidez berrikusi da, eta, ildo horretan, BP-Jarduera, BP-Hondakinen ekoizpena (gaur egun sortutako hondakinen datuen eguneratzea) eta BP-Airea (2000000329-85 fokuaren baja) atalak berrikusi dira.

Hirugarrena.– Ebazpen honen edukia jakinaraztea Ederfil Becker Koop. Elkarteari, Alegiako Udalari, ingurumen-baimen bateratuaren funtsezko aldaketa emateko prozeduran parte hartu duten erakundeei eta gainerako interesdunei.

Laugarrena.– Ingurumen-baimen bateratu hau Euskal Herriko Agintaritzaren Aldizkarian argitaratzeko agindua ematea.

ERREKURTSOAK

Ebazpen honek ez dio amaiera ematen administrazio-bideari, eta, beronen aurka, gora jotzeko errekurtsoa aurkez dakioke Industria, Trantsizio Energetiko eta Jasangarritasuneko sailburuari, hilabeteko epean, ebazpen hau jakinarazi eta hurrengo egunetik aurrera, Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluan eta hurrengoetan xedatutakoari jarraikiz.

Vitoria-Gasteiz, 2025eko azaroaren 6a.

Ingurumeneko sailburuordea,

JOSU BILBAO BEGOÑA.

(Ikusi .PDF Fitxategia)

Azterketa dokumentala