Euskal Herriko Agintaritzaren Aldizkaria

231. zk., 2025eko abenduaren 1a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

SPRI-ENPRESEN GARAPENERAKO EUSKAL AGENTZIA

5123

EBAZPENA, 2025eko azaroaren 10ekoa, SPRI-Enpresa Garapenerako Euskal Agentziako zuzendari nagusiarena, 2025erako «Datuen heldutasunaren diagnostikoa» laguntza-programaren oinarri arautzaileak eta deialdia onartzen dituena, Europar Batasuneko NextGenerationEU funtsek finantzatutako Suspertze, Eraldaketa eta Erresilientzia Planaren esparruan.

SPRI-Enpresa Garapenerako Euskal Agentziak, Eusko Jaurlaritzako Industria, Trantsizio Energetiko eta Jasangarritasunaren Sailaren mendeko zuzenbide pribatuko erakunde publikoak, Euskal Autonomia Erkidegoan industria- eta empresa- jarduera bultzatzeko jarduketak bideratzeko eta lehiakortasuneko bektore gisa trantsizio teknologiko-digitala, energetiko-ingurumenekoa eta demografiko-soziala Euskadiko enpresetan txertatzen laguntzeko ardura du. Horretarako, enpresen jarduera ekintzailean inbertsioa, berrikuntza, nazioartekotzea eta jarduera sustatzea bultzatzen ditu.

Ildo horretatik, Euskadi 2025 Eraldaketa Digitalerako Estrategia bultzatzera bideratutako hainbat ekintza garatu ditu SPRI-Enpresa Garapenerako Euskal Agentziak. Ekintza horien artean, aipatzekoak dira Euskadiko enpresetan eraldaketa digitala eta adimen artifiziala bultzatzera bideratutako askotariko laguntza-programak.

Ondorioz, Laguntza Programa honen lehentasunezko helburua datuen estrategia sustatzea da, datuen kudeaketan heldutasun maila handitzeko eta datuen espazioetara sartzea bizkortzeko, Adimen Artifiziala (AA) euskal enpresetan aplika dadin bultzatzeko.

Ildo horretan, abian jarritako beste ekimen batzuen osagarri gisa, «Datuen heldutasunaren diagnostikoa» («Programa») izeneko programa hau abiarazten da. Programa horren helburua da enpresa-lehiakortasuna hobetzea, datuen kudeaketa estrategikoaren bidez. Horretarako, diagnostiko-zerbitzu bat ematen da, hau da, datuen heldutasun maila ebaluatzen da, eta edozein tamaina eta jarduera ekonomikotako enpresei datuen estrategiaren arloko aholkularitza indibidualizatua ematen zaie.

Dirulaguntzen Erregimena Arautzen duen 2023ko abenduaren 21eko 20/2023 Legeak (DEAL) 7.2.a) artikuluan eskatzen du lege horrek ezartzen duen dirulaguntzen kudeaketa eta esleipena hainbat printzipioren arabera egiteko; besteak beste, publizitate-printzipioaren arabera. Era berean, DEALen 8.3 artikuluak ezartzen du dirulaguntza edo diruz lagundutako programa mota bakoitzaren oinarri arautzaileak argitaratu behar direla Euskal Herriko Agintaritzaren Aldizkarian.

Hori guztia dela eta, honako hau

EBAZTEN DUT:

Lehenengoa.– 2025erako «Datuen heldutasunaren diagnostikoa» laguntza-programaren oinarri arautzaileak eta deialdia onartzea, Europar Batasuneko NextGenerationEU funtsek finantzatutako Suspertze, Eraldaketa eta Erresilientzia Planaren esparruan. Programa horren edukia ebazpen honen eranskin gisa erantsi da.

Bigarrena.– Ebazpen hau Euskal Herriko Agintaritzaren Aldizkarian osorik argitaratzea.

Hirugarrena.– Ebazpen honen kontra, berraztertzeko errekurtsoa jar daiteke SPRI-Enpresa Garapenerako Euskal Agentziaren Zuzendaritza Nagusiaren aurrean, hilabeteko epean, ebazpen hau argitaratzen den egunaren biharamunetik kontatzen hasita, edo administrazioarekiko auzi-errekurtsoa administrazioarekiko auzien jurisdikzioan, bi hilabeteko epean, ebazpen hau argitaratzen den egunaren biharamunetik kontatzen hasita.

AZKEN XEDAPEN BAKARRA

Ebazpen honek eragina izango du Euskal Herriko Agintaritzaren Aldizkarian argitaratu eta hurrengo egunetik hasita.

Bilbao, 2025eko azaroaren 10a.

SPRI-Enpresa Garapenerako Euskal Agentziako zuzendari nagusia,

JON ANSOLEAGA UGARTE.

(Ikusi .PDF Fitxategia)

Azterketa dokumentala