Euskal Herriko Agintaritzaren Aldizkaria

231. zk., 2025eko abenduaren 1a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

AGINTARIAK ETA LANGILEAK

Izendapenak, egoerak eta gorabeherak

JUSTIZIA ETA GIZA ESKUBIDEEN SAILA

5119

AGINDUA, 2025eko azaroaren 6koa, Justizia eta Giza Eskubideen sailburuarena, Amurrio, Azpeitia, Balmaseda, Bergara, Durango, Gernika-Lumo, Getxo, Irun eta Tolosako barruti judizialetako auzialdiko auzitegien bulego judizialak, erregistro zibileko bulego orokorrak eta udalerriko eta horien elkarteetako justizia-bulegoak ezartzearen ondorioz eskakizun bereziko lanpostuak betetzeko berariazko lehiaketa behin betiko ebazten duena.

Justizia eta Giza Eskubideen sailburuaren 2025eko uztailaren 30eko Aginduaren bidez, berariazko lehiaketa deialdia egin zen Amurrio, Azpeitia, Balmaseda, Bergara, Durango, Gernika-Lumo, Getxo, Irun eta Tolosako barruti judizialetako Auzialdiko Auzitegien bulego judizialak, erregistro zibileko bulego orokorrak eta udalerriko eta horien elkarteetako justizia-bulegoak ezartzearen ondoriozko eskakizun bereziko lanpostuak betetzeko.

Berariazko lehiaketa horren ondorioz izapidetutako espedientea ikusita, eta bat etorriz Justizia eta Giza Eskubideen sailburuaren 2025eko uztailaren 30eko Aginduaren hamaikagarren oinarriarekin, Botere Judizialaren uztailaren 1eko 6/1985 Lege Organikoa aldatzen duen abenduaren 23ko 19/2003 Lege Organikoaren VI. liburuko VIII. tituluarekin eta Justizia Administrazioaren zerbitzuko funtzionarioen sarrerari, lanpostuak betetzeari eta lanbide-sustapenari buruzko Erregelamenduaren 43. artikuluarekin eta hurrengoekin (abenduaren 7ko 1451/2005 Errege Dekretuaren bidez onartu zen erregelamendu hori), honako hau

EBAZTEN DUT:

Lehenengo artikulua.– Behin betiko ebaztea Justizia Administrazioko Kudeaketa Prozesal eta Administratiboko, Izapidetza Prozesal eta Administratiboko eta Laguntza Judizialeko kidego eta eskaletako funtzionarioen arteko lekualdatze-lehiaketa, Justizia eta Giza Eskubideen sailburuaren 2025eko uztailaren 30eko Aginduaren bidez deitua, eranskinean adierazten den bezala.

Bigarren artikulua.– Lehiaketa honetan esleitu ez diren lanpostuak bete gabe uztea.

Hirugarren artikulua.– Lanpostuaz jabetzeko eguna Justizia Administrazioko zuzendariaren ebazpen baten bidez zehaztuko da.

Laugarren artikulua.– Ezin izango zaie esleitutako destinoei uko egin. Justizia Administrazioko Zuzendaritzak horien esleipenaren berri emango dio Justizia Ministerioari.

AZKEN XEDAPENETAKO LEHENENGOA

Agindu honen aurka, aukerako berraztertzeko errekurtsoa aurkez dakioke Justizia eta Giza Eskubideen sailburuari, hilabeteko epean; bestela, administrazioarekiko auzi-errekurtsoa aurkez daiteke Vitoria-Gasteizko Administrazioarekiko Auzien Epaitegian, bi hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera.

AZKEN XEDAPENETAKO BIGARRENA

Agindu hau Euskal Herriko Agintaritzaren Aldizkarian eta Estatuko Aldizkari Ofizialean argitaratu eta hurrengo egunean jarriko da indarrean.

Aldi berean argitaratzea lortzen ez bada, Euskal Herriko Agintaritzaren Aldizkarian argitaratu eta hurrengo egunetik aurrera zenbatuko dira epeak.

Vitoria-Gasteiz, 2025eko azaroaren 6a.

Justizia eta Giza Eskubideen sailburua,

MARÍA JESÚS CARMEN SAN JOSÉ LÓPEZ.

(Ikusi .PDF Fitxategia)

Azterketa dokumentala