Euskal Herriko Agintaritzaren Aldizkaria

181. zk., 2025eko irailaren 24a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

3993

EBAZPENA, 2025eko irailaren 4koa, Industria, Trantsizio Energetiko eta Jasangarritasuneko Arabako lurralde-ordezkariarena, aurretiazko administrazio-baimena ematen duena Aguraingo eta Iruraiz-Gaunako udal-mugarteetan (Araba) FV Ubalza eguzki-teknologia fotovoltaikoaren bidez argindarra sortzeko instalazioa egiteko Cañaveras Solar SLk sustatutako proiekturako.

Espediente-zenbakia: 01GEY 202300014.

AURREKARIAK

Lehenengoa.– 2023ko apirilaren 27an, Cañaveras Solar SLk aurretiazko administrazio-baimena eta ingurumen-inpaktuaren adierazpena eskatu zituen eguzki-teknologia fotovoltaikoaren bidez argindarra sortzeko Agurain, Iruraiz-Gauna eta Donemiliagako udal-mugarteetan (Araba) berak sustatutako FV Ubalza instalaziorako.

Bigarrena.– 2024ko urtarrilaren 18an, dokumentazio teknikoa eta ingurumen-dokumentazioa osatu zituen, haiek zuzentzeko eta hobetzeko egin zitzaion errekerimenduari erantzunez.

Hirugarrena.– 2024ko otsailaren 7an eta 9an, Arabako Industria Administrazioko lurralde-ordezkariaren 2024ko urtarrilaren 26ko iragarkia argitaratu zen Euskal Herriko Agintaritzaren Aldizkarian (28. zk.) eta Arabako Lurralde Historikoaren Aldizkari Ofizialean (17. zk.), jendaurrean jartzeko Aguraingo eta Iruraiz-Gaunako udal-mugarteetan (Araba) «26,63MWp-ko Ubalza eguzki-instalazio fotovoltaikoa eta hari lotutako ebakuazio-azpiegitura» proiektuaren aurretiazko administrazio-baimena eta ingurumen-inpaktuaren adierazpena lortzeko eskaerak.

Laugarrena.– Jendaurreko informazioaren izapidea egitearekin batera, kontsulta egin zitzaien ukitutako administrazio publiko hauei eta interesdun hauei: Aguraingo, Iruraiz-Gaunako eta Donemiliagako udalei; Arabako Foru Aldundiko Kulturako, Nekazaritza eta Natura Inguruneko eta Errepide eta Mendi Zerbitzuetako zuzendaritzei; Eusko Jaurlaritzako Kultura Ondarearen Zuzendaritzari, Nekazaritza eta Abeltzaintza Zuzendaritzari, Larrialdiei Aurre Egiteko eta Meteorologiako Zuzendaritzari, Osasun Publikoaren eta Adikzioen Zuzendaritzari eta Natura Ondarearen eta Klima Aldaketaren Zuzendaritzari; URA Uraren Euskal Agentziari; Ebroko Konfederazio Hidrografikoari; Alaitza, Gereñu eta Langarikako administrazio-batzarrei; Arabako Ekologistak Martxan antolakundeari; Arabako Natur Institutuari; Gaden elkarteari; SEO Birdliferi, eta Eguzkizaleak elkarteari.

Ukitutako ondasun eta eskubideei buruzko separatak bidali zitzaizkien Red Eléctrica de España SAU eta i-DE Redes Eléctricas Inteligentes SAU enpresei.

Bosgarrena.– Jendaurrean jartzeko izapidean, UAGA Arabako Nekazarien Elkartearen alegazioak jaso ziren. Alegazioak honetan oinarritu ziren:

– Pertsonen bizitzaren gaineko eragina, jarduera sozioekonomikoei eta ingurunearen balio naturalari dagokienez.

– Proiektuaren eta Alaiza eta Egileorren arteko distantzia: 500 metro baino gutxiago.

– Eskala txikiko proiektuak lehenestea.

– Erabilerarik eta jarduerarik gabeko eremuak lehenestea FV instalazioaren proiektua kokatzeko.

– Lurraldea zatitzea, Arabako Lautadan beste proiektu batzuk baitaude.

– Balio estrategiko handiko partzelei eragitea.

– Energia bideratzeko azpiegitura, zeinak beste eguzki-parke batzuekin lotura zuzena baitauka, makroproiektu bat izatea.

– Lurzorua artifizial bihurtzea eta lurzoru emankorra babestea. Horrelako proiektuak nekazaritza-erabilerarik gabeko partzeletan, partzela elkorretan edo inpaktua ahalik eta txikiena den beste kokaleku batzuetan egin behar dira.

– Elikadura-subiranotasuna; proiektuak –eta antzeko beste batzuekin edo tamaina handiagoko beste batzuekin metatzeak– laborantza-lurrak galtzea ekartzea.

– Ureztatzeko azpiegiturak errespetatzea.

– Euskadiko nekazaritza-azalera erabilia (NAE) txikia izatea; hori dela eta, ez lirateke okupatu behar nekazaritzan eta abeltzaintzan erabiltzen diren lur gehiago beste erabilera batzuetarako.

– Landako biztanleria ez errotzea, proiektuak ez baitie inolako onurarik ekarriko inguruko biztanleei.

– Paisaiaren degradazioa.

Seigarrena.– Txosten hauek jaso ziren ukitutako administrazio publikoei eta interesdunei egindako kontsulten izapidean:

Aguraingo Udalak proiektuaren Plan Bereziari buruzko aurrekarien berri eman zuen, horrek Hiri Antolamenduko Plan Orokorrean, Euskadiko Energia Berriztagarrien Lurralde Plan Sektorialean (LPS) eta Araba Erdialdea-Aurrerapena Lurralde Plan Partzialean (2022) duen eraginari buruz, eta alegazioak aurkeztu zituen instalazioa hiriguneetatik hurbil egoteari buruz (Egileor eta Alaitza), eta balio estrategiko handikotzat jotako nekazaritza-lurren hamabost hektareak kanpoan uzteko eskatu zuen.

Iruraiz-Gaunako Udalak jakinarazi zuen proiektuak nola eragingo lukeen Euskadiko Energia Berriztagarrien LPSan, Araba Erdialdeko indarreko LPPan eta haren berrikuspenean eta nola eragingo luketen proiektuaren ebakuazio-lineak eta azpiestazio berean husten diren beste batzuek, eta alegazioak aurkeztu zituen instalazioa hiriguneetatik gertu egoteari buruz (Egileor eta Alaitza), balio estrategiko handikotzat jotako nekazaritza-lurren hamabost hektareak kanpoan uzteari buruz eta proiektuak ukitzen dituen ustezko zona arkeologikoen presentziari buruz.

Arabako Foru Aldundiko Kultura Zuzendaritzak Ondare Historiko Arkitektonikoaren Zerbitzuaren eta Museo eta Arkeologia Zerbitzuaren txostenak aurkeztu zituen: Ondare Historiko Arkitektonikoaren Zerbitzuaren arabera, proiektuak ez du eraginik eremu horretan; Museo eta Arkeologia Zerbitzuaren arabera, kontrol arkeologikoa egin behar da ustezko zona arkeologikoetan.

Arabako Foru Aldundiko Nekazaritza Zuzendaritzako Nekazaritza Garatzeko Zerbitzuak nekazaritza-arloko afektazioaren ebaluazio-protokoloa egin zuen (NAAEP), eta proiektuaren inpaktua bateragarritzat jo zuen, Nekazaritza eta Basozaintzako LPSan ezarritakoaren arabera.

Arabako Foru Aldundiko Natura Ingurunearen Zuzendaritzak jakinarazi zuen proiektutik kanpo utzi behar direla Alaitzako eta Egileorreko herrietatik 500 metrorainoko eremu guztia eta Nekazaritza eta Basozaintzako LPSaren arabera «balio estrategiko handikotzat» katalogatutako eremuak. Neurri horiek funtsezkoak izango lirateke mirotz urdina eta mirotz zuria ugaltzeko eremuen gaineko inpaktua maila onargarrietaraino jaisteko, eta, sustatzaileak proposatutakoez gain, beste neurri batzuk proposatu zituen.

Arabako Foru Aldundiko Errepide Zerbitzuak adierazi du jatorrizko proiektuaren PV1 azpieremua Arabako Errepideen Plan Integralaren eraginpeko A-3110 errepidearen afektazio-eremuaren barruan dagoela, eta proiektua gauzatzeko baldintzatzaileak adierazi ditu, bai eta polizia-baimena eskatu beharra ere Arabako Lurralde Historikoko errepideen babes-eremuetan edozein jarduketa egin aurretik.

Eusko Jaurlaritzako Kultura Ondarearen Zuzendaritzak Euskal Kultura Ondarearen Zentroaren txostena erantsi zuen. Txosten horren arabera, ez dago inolako eragozpenik kultura-ondarearen ikuspegitik, eta proiektua Arabako Foru Aldundiko Kultura Sailak agintzen duen eran gauzatzera behartzen du. Halaber, zundaketa arkeologikoak proiektuaren behin betiko administrazio-baimena eman aurretik egitea gomendatzen du.

Nekazaritza eta Abeltzaintza Zuzendaritzaren ustez, oso garrantzitsua da lurzoru urbanizaezinetik edo degradatutik kanpoko kokalekuak baloratzea eta lehenestea, nekazaritza-lurzoruak –balio estrategiko handikoak batez ere– eta ureztatze-eremuak okupatu gabe betiere. Horretarako, lurralde-antolamenduko tresna aplikagarrietan egokitzat jotzen diren kokalekuak aukeratu beharko dira, eta efektu sinergikoen balorazioa nekazaritzako eta basozaintzako erabileren gaineko efektuetara zabaltzea gomendatzen du.

Larrialdiei Aurre Egiteko eta Meteorologiako Zuzendaritzak babes zibilaren arriskuak aztertu zituen lurrikaren arriskuei eta baso-suteen arriskuei zegokienez, eta azaroaren 2ko 227/2010 Dekretuaren arabera autobabeserako plan bat egiteko beharra adierazi zuen (277/2010 Dekretua, azaroaren 2koa, 21/2019 Dekretuak aldatua, zenbait jarduera, zentro edo establezimenduren autobabes-betebeharrak arautzen dituena, larrialdiei aurre egiteko).

Natura Ondare eta Klima Aldaketa Zuzendaritzak, oro har, zuzentzat eta egokitzat jo zituen prebentzio-, zuzenketa- eta konpentsazio-neurriak, baita ingurumena zaintzeko programan jasotako kontrol-neurriak ere. Faunaren gaineko ingurumen-inpaktuaren azterketan proposatu ziren neurri horiek, eta neurriak berrikustea proposatu zuen, honako hauei zegokienez: fauna instalazioen barruan harrapatzearen ondorioz izan litekeen hilkortasuna kontrolatzea, mirotz urdinaren populazioaren jarraipena egitea eta instalazio fotovoltaikoen azpiegiturekin talka egiteagatik izan litekeen hilkortasuna kontrolatzea.

Alaitzako administrazio-batzarrak kultura-ondarearen gaineko zuzeneko eraginen berri eman zuen (31. ustezko zona arkeologikoa, «Eskandazabalgo asentamendua»), eta proiektua eremu horretatik ateratzeko eskatu, zona horretan sartzen baita.

Gereñu eta Langarikako administrazio-batzarrek Iruraiz-Gaunako Udalarena bezalako informazioa eman zuten, eta proiektua aldatzeko eskatu zuten, herriguneetatik 500 metroko tartea uzteko eta «balio estrategiko handiko» nekazaritza-lur kalifikatutako lurren 15 hektareak kanpoan uzteko.

URA Uraren Euskal Agentziaren iritziz, bateragarriak izango dira, itxura batean, proiektuaren ondoriozko jarduerak egitea eta eremuko eta inguruko lurgaineko eta lurpeko uren egoera aurrerantzean ere ona izatea. Horretarako, kontuan hartu beharreko oharrak egin zituen ibilguen gurutzatzeei, ibilguetako ezponda naturalak errespetatzeari, jabari publiko hidraulikotik kanpo edo ibilguen bost metroko zortasuna okupatuta kutxatilak kokatzeari eta zortasun- eta zaintza-eremuetan ura hartzeko, isurketak egiteko edo jarduketak egiteko baimen-eskaeraren beharrari dagokienez.

Ebroko Konfederazio Hidrografikoak jabari publiko hidraulikoaren edo ibilguak zaintzeko eremuaren gaineko eraginaren berri eman zuen, eta baldintza teknikoak eta baimenen beharra ezarri zituen.

Zazpigarrena.– Jasotako alegazioak eta txostenak sustatzaileari bidali zitzaizkion, kontuan har zitzan, eta sustatzaileak, 2024ko abuztuaren 2an, beste proiektu bat aurkeztu zuen, jatorrizkoa aldatuta, okupatutako eremua 53,9 ha-tik 22,22 ha-ra ekarriz, jatorrizko proiektuan sartuta ez zeuden partzelei eragin gabe.

– 553 partzelaren mendebaldeko sektorea kanpoan utzi da, A-3110 errepidea aldatzeko asmoa baitago.

– 553, 501, 511 eta 512 partzelen hegoaldeko muturrak kanpoan utzi dira, eta gutxienez 500 metroko zerrenda bat utzi da Egileor (Agurain) eta Alaitza (Iruraiz-Gauna) biztanleguneetatik.

– Aguraingo Hiri Antolamenduko Plan Orokorrak «Ibaiak eta errekak babesteko eremu» kalifikatutako eremua libre geratu da, bai eta eremu horrekiko 15 metroko zerrenda bat ere.

– Ebakuazio-linearen trazaduran aldaketa zehatz bat egin da, A-3110 errepideari kalterik ez egiteko, eta beste ezeri eragin gabe.

– ST San Millan 220/30 kV azpiestazioan dagoen potentzia-transformadorea aldatu da, 25 MVAtik 55 MVAra, FV Ubalza II proiektuan sortutako energiari lekua egiteko, biek ebakuazio-azpiegitura berak erabiltzen baitituzte. FV Ubalza II proiektua ez da baimen honen xedea.

Azalera eta, beraz, instalatutako moduluen kopurua murriztearen ondorioz, potentzia-erpina 15,75 MWp-ra jaitsi da, eta potentzia izendatua, 13,53 MWn-ra.

Era berean, sustatzaileak hauek sartu zituen ingurumen-inpaktuaren azterketan: florari eta landarediari buruzko txostena, jarduketa aurreko fauna-azterketa, nekazaritza-arloko afektazioaren ebaluazio protokoloa (NAAEP), balorazio arkeologikoko zundaketen txostenaren emaitzak eta Kantauri-Mediterraneoa (Iruñea-Euskal Y konexioa tartea) trenbide-igarobidearen proiektuarekiko efektu sinergikoen azterketa.

Zortzigarrena.– 2024ko irailaren 13an, ingurumen-ebaluazioaren espedientea aurkeztu zen Ingurumenaren Kalitatearen eta Ekonomia Zirkularraren Zuzendaritzan, Euskal Autonomia Erkidegoko ingurumen-organoa den aldetik, azter zezan. Espediente horri EIAO–145 erreferentzia esleitu zitzaion, eta bertan hauek sartu ziren: proiektuaren dokumentazio teknikoa eta ingurumen-inpaktuaren azterketa, jendaurreko informazioaren eta kontsulten izapideetan jasotako alegazioak eta txostenak, bai eta sustatzaileak horiei buruz egindako gogoetak ere.

Bederatzigarrena.– 2025eko urtarrilaren 24an, ingurumen-organoak egindako eskaerari erantzunez sustatzaileak aurkeztutako dokumentazioa gehitu ondoren, Ingurumenaren Kalitatearen eta Ekonomia Zirkularraren Zuzendaritzak osatutzat eman zuen eskaera.

Hamargarrena.– 2024ko apirilaren 15ean eta 2025eko maiatzaren 19an, Eusko Jaurlaritzako Natura Ondarearen eta Klima Aldaketarekiko Egokitzapenaren Zuzendaritzaren eta Arabako Foru Aldundiko Natura Ingurunearen Zuzendaritzaren txostenak sartu ziren ingurumen-ebaluazioaren espedientean, zazpigarren aurrekariaren arabera proiektuan egindako aldaketei buruzkoak, ingurumen-organoak eskatutakoak.

Hamaikagarrena.– 2025eko ekainaren 12an, Ingurumen Administrazioaren zuzendariak 15,75 MWp-ko Ubalza instalazio fotovoltaikoaren eta hari lotutako ebakuazio-azpiegituraren proiektuaren ingurumen-inpaktuaren adierazpena egin zuen (aurrerantzean, IIA) (2025eko abuztuaren 7ko Euskal Herriko Agintaritzaren Aldizkaria, 148. zk.); proiektua Cañaveras Solar SLk sustatu du, Agurainen eta Iruraiz-Gaunan (Araba).

Hamabigarrena.– Sustatzaileak sarbide- eta konexio-baimenak ditu FV Ubalza eguzki-instalazio fotovoltaikorako, 2022ko azaroaren 29koak, garraio-sarearen kudeatzaile Red Eléctrica de España SAUk emandakoak, Elgea azpiestazioan sortutako energia ebakuatzeko.

Hamahirugarrena.– Ebakuazio-azpiegiturak partekatzeko sustatzaileen arteko akordio bat dago, 1955/2000 Errege Dekretuaren 123.2 artikuluaren arabera, SET San Millan 30/220 kV-eko azpiestazioaren eta San Millan-Elgea 220 kV-eko linearen bidez FV Ubalza eguzki-instalazio fotovoltaikoan sortutako energia ebakuatzeko. Azpiestazio hori eta linea hori Aixeindar SA sustatzailearen Azazeta parke eolikoaren proiektuaren barruan baimendu ziren, eta ez dira ebazpen honen xede, salbu eta FV Ubalza proiektuaren ebakuazioa azpiestazio horretara egiten hasteko posizioari dagokiona.

ZUZENBIDEKO OINARRIAK

Lehenengoa.– Arabako Industria, Trantsizio Energetiko eta Jasangarritasunaren Lurralde Ordezkaritza da espediente hau izapidetzeko eta ebazteko organo eskuduna, hala xedatzen baita 410/2024 Dekretuaren 20. artikuluan (410/2024 Dekretua, abenduaren 3koa, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duena).

Bigarrena.– Espedientean bete dira lege hauetan agindutako arauzko izapideak: 24/2013 Legea, abenduaren 26koa, Sektore Elektrikoari buruzkoa; eta Eusko Jaurlaritzaren 48/2020 Dekretua, martxoaren 31koa, zeinaren bidez arautzen baitira energia elektrikoa ekoizteko, garraiatzeko eta banatzeko instalazioen administrazio-baimenaren prozedurak. Eta honako hauekin bat etorriz bete dira, proiektuari ingurumen-ebaluazio arrunta egin behar zaiola eta: 21/2013 Legea, abenduaren 9koa, Ingurumen-ebaluazioari buruzkoa, eta 10/2021 Legea, abenduaren 9koa, Euskadiko Ingurumen Administrazioarena.

Hirugarrena.– Aurkeztutako alegazioei dagokienez –bosgarren aurrekarian laburtuta daude–, bai eta zenbait toki-administraziok eta interesdunek egindako alegazioei gagozkiela ere –seigarren aurrekarian adierazi den bezala–, horien edukia, sustatzaileak emandako erantzunak, FV Ubalza eguzki-instalazio fotovoltaikoaren proiektuaren ingurumen-inpaktuaren adierazpena eta Arabako Lurralde Ordezkaritzak emandako txostena aztertu ondoren, honako hauek adierazi behar dira:

1.– Ingurumenari lotutako alegazioei dagokienez, alegazio horiek kontuan hartu ziren Ingurumen Administrazioaren Zuzendaritzak ingurumen-inpaktuaren adierazpena (IIA) egin aurretik egindako ingurumen-azterketan. Jasota utzi behar da eguzki-instalazio fotovoltaikoaren ingurumen-inpaktuaren adierazpenak barne hartzen dituela proiektuak bete beharreko baldintzak eta ingurumen-ondorio kaltegarrietarako prebentzio-, zuzenketa- eta konpentsazio-neurriak, ingurumen-organoak ezarritakoak.

2.– Pertsonen bizimoduaren gaineko eraginari buruzko alegazioek, jarduera sozioekonomikoetan, elikadura-subiranotasunean eta ingurunearen balio naturalean izango liratekeen ondorioengatik, izaera subjektiboa dute, ez baita azterketa xeherik egin ondorio horiei buruz, eta gai horiek ere ez dira espedientearen xede. Nolanahi ere, nekazaritzari dagokionez, organo eskudunak NAAEPa egin zuen, eta, haren arabera, inpaktua bateragarritzat jotzen da. Balio naturalari dagokionez, ingurumen-organoak aldekoa egin du ingurumen-inpaktuaren adierazpena.

3.– Sustatzaileak kontuan hartu ditu Egileorreko eta Alaitzako herriguneetatik 500 metrorainoko eremu guztia proiektutik kanpo uzteari buruzko alegazioak, zazpigarren aurrekarian adierazten den bezala.

4.– Balio estrategiko handiko lurzoruen 15 hektarea proiektutik kanpo uzteko eskaerari dagokionez, adierazi behar da NAAEPa egin dela, Nekazaritza eta Basozaintzako LPSaren arabera, eta inpaktua bateragarritzat jotzen duela eta ez dagoela berariazko araudirik halako lurzoruetan instalazio fotovoltaikoak ezartzea debekatzen duenik.

5.– Kontsiderazioak egin dira mota honetako instalazioak jartzeko kokalekuen, tamainaren eta tipologiaren lehentasunei buruz, baina horiek ez dagozkio prozedura honen esparruari. Prozedura hau proiektu jakin bat baimentzeko baino ez da, eta kontsiderazio horiek ordezkaritza honen eskumen-eremua gainditzen dute. Ordezkaritzaren eskumen-eremua hau baino ez da: administrazio-baimenen eskaera zehatzak ebaztea, instalazioen eta haiei lotutako ekipamenduaren baldintza teknikoak eta segurtasunekoak egiaztatu ondoren eta ingurumena babesteko baldintzak eta instalazioaren kokalekuaren ezaugarriak behar bezala bete direla eta proiektua gauzatzeko gaitasun legal, tekniko eta ekonomikoa badagoela egiaztatu ondoren.

6.– Hirigintza-izaerako eta lurralde-antolamenduarekin lotutako alegazioei dagokienez –barnean direla inguruan proiektuak pilatzeak lurraldean eragindako zatiketari buruz egindakoak–, adierazi behar da sustatzaileak zegokion plan berezia egiteko eskatu zuela, ingurumen-organo foralaren ingurumen-ebaluazio estrategikoaren mendekoa, Lurzoruari buruzko 12/2007 Legean xedatutakoaren arabera. Ebaluazio-izapide hori ez dago proiektuaren aurretiazko administrazio-baimenaren izapideari lotua, baina osagarria da, sektore elektrikoari buruzko araudiaren arabera; administrazio-baimena da ebazpen honen xedea. Nolanahi ere, ezinbestean zehaztu behar da baimen hau emateak ez duela kentzen sustatzaileak proiektua gauzatzeko behar diren bestelako baimen edo lizentzia batzuk lortu behar izatea.

7.– Energia berriztagarrien LPSari buruzko alegazioak, berriz, ezin dira onartu, aipatutako LPS hori ez baitago behin betiko onartuta, eta indarrean dagoen araudia baino ezin da aplikatu.

8.– Ebakuazio-azpiegitura partekatuei buruzko alegazioei dagokienez, sektoreko arauek onartzen dute partekatze hori, abenduaren 1eko 1955/2000 Errege Dekretuan (1955/2000 Errege Dekretua, abenduaren 1ekoa, Argindarra garraiatzeko, banatzeko, merkaturatzeko eta hornitzeko jarduerak eta argindarreko instalazioak baimentzeko prozedurak arautzen dituena), 123.2 artikuluan. Aukera horrek, gainera, eragin txikiagoa du lurraldean eta ingurumenean, bikoiztasunak saihesten baititu. Espedientean jasota dago Aixendar SAk eta Cañaveras Solar SLk azpiegitura berak erabiltzeko akordioa, aipatutako artikuluan adierazitakoaren arabera; izan ere, proiektuek garraio-sarearen posizio berean egiten dute ebakuazio-lana.

9.– Kultura- eta arkeologia-ondarearen gaineko eraginari buruzko alegazioei dagokienez, kultura-ondarea babesteko neurriak ezartzen dira ingurumen-inpaktuaren adierazpenean, eraginpean izan daitezkeen ustezko zona arkeologikoetan balorazio arkeologikoko zundaketak eta kontrol arkeologikoak eginez babestekoak.

10.– Ureztatzeko azpiegituren gaineko eragina, berriz, egikaritze-proiektuan kontuan hartu beharko du sustatzaileak, eta Mendierreko San Migel Ureztatzaileen Elkarteari eman beharko dio haren berri, ingurumen-inpaktuaren adierazpenaren 4.4.1. apartatuan ezarri bezala.

11.– Paisaiaren degradazioari buruzko alegazioei erantzunez, ingurumen-inpaktuaren adierazpenean, paisaia babesteko eta ukitutako eremuak lehengoratzeko neurriak ezartzen dira (4.2 apartatua).

Laugarrena.– Proiektuak ingurumenean inpaktua izan lezakeela kontuan hartuta, IIAn, ebazpen-zatiaren bigarren puntuan, proiektuaren baldintzak eta ingurumen-ondorio kaltegarrietarako prebentzio-, zuzenketa- eta konpentsazio-neurriak ezarri dira, ingurumen-inpaktuaren azterketan adierazitakoez gain. Hona hemen neurriok, laburbilduta eta azaletik adierazita:

– Paisaia babesteko eta ukitutako eremuak lehengoratzeko neurriak, barnean dela landare-pantailak instalatzea eta ukitutako inguruak lehengoratzea.

– Ingurune naturala babesteko neurriak:

1.– Sastrakak kentzeko lanak martxoaren 15etik ekainaren 15era bitartean hastea galaraztea, inguruko hegaztien ugaltze-aldia ez eragozteko.

2.– Seinale islatzaileak jartzea hamar metrotik behin hesiaren trazadura osoan.

3.– Modulu fotovoltaikoei islapenaren aurkako estaldura aplikatzea.

4.– Etxabarri eta Aranzubi erreken gurutzatzeetan landare-formazioei ez eragitea.

5.– Fauna aztertzea obrak hasi aurretik.

– Nekazaritza-erabilera babesteko neurriak: ukitutako ureztalurren erabilera-aldaketa jakinarazi beharko zaio Mendierreko San Migel Ureztatzaileen Komunitateari, bai eta landa-bideen gaineko eragina zein den ere Arabako Foru Aldundiari.

– Lurzorua eta urak babesteko neurriak.

– Kultura-ondarea babesteko neurriak:

1.– Balorazio arkeologikoko zundaketak egitea 51/1/297 partzelan, 14. ustezko zona arkeologikoari eragiten baitio («Andra Mari baseliza, Arana»).

2.– Kontrol arkeologikoa egitea 51/1/553 partzelan, 31. ustezko zona arkeologikoari eragiten baitio («Eskandazabalgo herrigunea»).

3.– Lurpeko ebakuazio-linearen eta «irlen» arteko interkonexio-linearen kontrol arkeologikoa egitea ustezko zona arkeologiko hauen inguru hurbilean: 19. ustezko zona arkeologikoa («Zumalburuko herrixka»), 31.a («Eskandazabalgo herrigunea»), 5.a («Abitonako herrixka») eta 26.a («Ozabalgo herrigunea»).

– Hauts-emisioak murrizteko neurriak.

– Zarataren eta bibrazioen ondorioak gutxitzeko neurriak.

– Hondakinak eta lurrak kudeatzeko neurriak.

– Kutsatuta egon daitezkeen lurzoruekin lotutako neurriak: Eguzki-jatorriko energia elektrikoa ekoizteko jarduera (azpiestazioak eta potentzia-transformadoreak bakarrik) lurzorua kutsa dezakeen energia gisa jasota dago. Beraz, instalazio horiek nahitaez bete beharko dituzte 4/2015 Legean jasotako betebeharrak (4/2015 Legea, ekainaren 25ekoa, Lurzorua kutsatzea saihestu eta kutsatutakoa garbitzekoa).

– Garbitzea eta obra bukatzea.

– Konpentsazio-neurriak.

– Jarduera etetea.

– Ingurumen-aholkularitza.

– Jardunbide egokien sistema bat ezartzea.

– Lan-programa diseinatzea.

Bosgarrena.– Sektore Elektrikoari buruzko 24/2013 Legearen 53.1 artikuluak ezartzen du energia elektrikoa ekoizteko instalazioek aurretiazko administrazio-baimena behar dutela. Era berean, ezartzen du hura ez dela emango, baldin eta titularrak ez baditu aldez aurretik lortzen garraio- edo banaketa-sareetara sartzeko eta konektatzeko baimenak.

Seigarrena.– Sektore Elektrikoari buruzko 24/2013 Legearen 53.6 artikuluak adierazten du administrazio-baimenak administrazio eskudunak emango dituela, aplikatu beharreko bestelako xedapenen arabera eta, bereziki, lurraldearen antolamenduari eta ingurumenari buruzko xedapenen arabera beharrezkoak diren emakida eta baimenak alde batera utzi gabe.

Zazpigarrena.– Sektore Elektrikoari buruzko 24/2013 Legearen 53.7 artikuluaren arabera, Administrazio publiko eskudunak baimena ukatu ahalko du, baina aplikatu beharreko araudian ezarritako eskakizunak betetzen ez direnean edo baimena ematea sistemaren funtzionamenduaren kalterako denean soilik.

Aipatutako lege-xedapenak ikusita, eta oro har zein zehazki aplikagarri diren gainerakoak oinarri hartuta, Industria, Trantsizio Energetiko eta Jasangarritasuneko Arabako lurralde-ordezkariak

EBAZTEN DU:

Cañaveras Solar, SLri aurretiazko administrazio-baimena ematea FV Ubalza eguzki-instalazio fotovoltaikoaren eta haren ebakuazio-azpiegituraren proiektua egiteko Aguraingo eta Iruraiz-Gaunako udal-mugarteetan. Hau da proiektua:

a) FV Ubalza eguzki-instalazio fotovoltaikoa; 13,53 MWn-ko potentzia instalatua izango du, eta 22,22 ha okupatuko ditu; bi sektore izango ditu, Aguraingo udal-mugarteko 1. poligonoko 553, 501, 511 eta 512 partzeletan, eranskinean adierazten den bezala. Instalazio hauek izango ditu:

– 21.720 modulu, 725 Wp-koak, guztira 15,75 MWp-ko potentzia instalatua dutenak.

– 41 inbertsore, 330 kW-eko potentzia nominalekoak.

– 0,8/30 kV-ko lau transformadore, 6.600 eta 3.300 kVA-koak.

– 30 kV-ko sekzionamendu-zentroa (sartzeko, linea babesteko bi gelaxka; ateratzeko, linea babesteko gelaxka bat, eta neurketa-modulua).

b) 30 kV-ko lurpeko ebakuazio-linea bat, zirkuitu sinplekoa, eguzki-instalazio fotovoltaikoaren sekzionamendu-zentrotik –instalazio fotovoltaikoaren mendebaldean dago zentro hori– Donemiliagako 30/220 kV-ko transformazio-azpiestazioraino doana, Aguraingo eta Iruraiz-Gaunako udal-mugarteetan.

c) Donemiliagako 30/220 kV transformazio-azpiestazioa handituko da, Iruraiz-Gaunako udal-mugartean. Azpiestazio horrek beste posizio bat izango du. Hauek gehituko zaizkio: kontrolerako eraikin bat eta babes- eta neurketa-tresneria, 30 kV-koa (barnekoa eta aire librekoa) eta 220 kV-koa (aire librekoa); 30/220 kV transformadore bat, 55 MVAkoa; zerbitzu osagarrien eta instalazio osagarrien transformadore bat. Posizio berria azpiestazioaren perimetroaren barruan errendituko da, perimetroa aldatu gabe, eta hesituta egongo da.

d) Instalazio fotovoltaikoak sortutako energia sustatzaile beraren beste proiektu batzuekin eta beste sustatzaile batzuen beste proiektu batzuekin partekatutako ebakuazio-azpiegituraren bidez ebakuatuko da garraio-sarera, azpiegiturak besterekin batera erabiltzeko akordioaren arabera. Ebakuazio-azpiegitura partekatua (Donemiliagako 30/220 kV transformazio-azpiestazioa eta Donemiliaga-Elgeako 220 kV-eko aireko linea) ez da baimen honen xede; Aixeindar, SA sustatzailearen Azazeta parke eolikoa eraikitzeko aurretiazko administrazio-baimenetan sartu zen (01GEY 202000006 eta 01GEY 202300015 espedienteak).

Baldintza orokor hauek jarrita ematen da baimen hau:

Ebazpen hau jakinarazten denetik hamabi hilabete igaro baino lehen eskatu beharko da eraikitzeko administrazio-baimena. Eskabidea adierazitako epean aurkezten ez bada, aurretiazko administrazio-baimena iraungitzat jo ahal izango da.

Exekuzio-proiektua Ingurumen Administrazioaren Zuzendaritzak 2025eko ekainaren 12an egindako eta 2025eko abuztuaren 7ko Euskal Herriko Agintaritzaren Aldizkarian (148. zk.) argitaratutako ingurumen-inpaktuaren adierazpenean ezarritako baldintzetara eta babes- eta konpentsazio-neurrietara egokitu beharko da. Era berean, administrazioek, organismoek eta zerbitzu-enpresek kontsulta-fasean ezarritako eta sustatzaileak onetsitako baldintza teknikoak jaso beharko ditu.

Onartzeko aurkeztutako proiektuak araudi elektrikoaren arabera eta industriaren arloan aplikagarriak diren industriako segurtasun- eta kalitate-arauak bete beharko ditu, eta laneko arriskuen prebentzioari buruzko dokumentazioa jaso, bai eta ingurumen-inpaktuaren adierazpenean ezarritakoa ere, instalazio elektrikoei aplikatu beharreko araudian adierazitako agiri eta zehaztapenez gain. Aplikatu beharreko araudia betetzen dela egiaztatzen duen erantzukizunpeko adierazpena egin beharko da eta erantsi.

Sistemaren operadoreak ezartzen dituen arau teknikoak eta jardunbideak bete beharko dira.

Ebazpen hau ematen da ezertan eragotzi gabe udal- eta foru-mailako eskumeneko baimen edo lizentziak, eta ezertan eragotzi gabe obrak egiteko beharrezkoak diren beste baimen batzuk nahiz aplikatzekoak diren xedapenetatik eratorritakoak, lurralde- eta ingurumen-antolamenduari dagozkienak bereziki, eta eskatzaileak beroriek eskatu beharko ditu hala dagokionean. Era berean, hirugarrenen eskubideak alde batera utzi gabe ematen da, jabetza-eskubidea salbu utzita.

Ebazpen honek ez dio amaiera ematen administrazio-bideari, eta, beronen aurka, gora jotzeko errekurtsoa jar dakioke Deskarbonizazioko zuzendariari, hilabeteko epean, ebazpen hau jakinarazi eta hurrengo egunetik aurrera kontatzen hasita, bat etorriz Administrazio Publikoen Administrazio Prozedura Erkidearen 39/2015 Legearen 121. artikuluan eta hurrengoetan xedatutakoarekin.

Vitoria-Gasteiz, 2025eko irailaren 4a.

Industria, Trantsizio Energetiko eta Jasangarritasuneko Arabako lurralde-ordezkaria,

JAVIER AIZPURU OCHOA DE ERIBE.

(Ikus .PDF)

Azterketa dokumentala