RSS
172. zk., 2025eko irailaren 11, osteguna
- Bestelako formatuak:
- PDF (168 KB - 7 orri.)
- EPUB (261 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
MUGIKORTASUN JASANGARRIAREN SAILA
3820
EBAZPENA, 2025eko irailaren 1ekoa, Garraio Azpiegituren zuzendariarena, «Bilboko Metropoli Trenbidearen 5. lineako obraren 1. proiektu aldatuari buruzkoa, tartea: Aperribai-Galdakao» proiektuak ukitutako ondasun eta eskubideen zerrenda onartzen duena, eta titularrei dei egiten diena okupazioaren aurretiko aktak egiteko.
2022ko apirilaren 11ko Ebazpenaren bidez, «Bilboko Metropoli Trenbidearen 5. linea eraikitzeko proiektua. Tartea: Aperribai-Galdakao» onetsi zen.
Ebazpen horren bitartez onartzen den proiektuaren xedea da zehaztea Bilboko Hiri Trenbidearen 5. linea berriaren bigarren tartea –Euskotrenek ustiatua, Aperribai auzotik eta Galdakaoko hiriguneraino– ezarri ahal izateko egin beharreko herri-lanak eraikuntza mailan.
2025eko apirilaren 16ko Ebazpenaren bidez, «Bilboko Metropoli Trenbidearen 5. lineako obraren 1. proiektu aldatua. Tartea: Aperribai-Galdakao» onetsi zen. Ebazpena 2025eko maiatzaren 13an argitaratu zen Euskal Herriko Agintaritzaren Aldizkarian (88. zk.).
Oinarrizko proiektuaren preskripzioekin lotuta obran gertatzen diren aldaketak, 1. proiektu aldatua idaztea justifikatzen dutenak, geografikoki ordenatutako obrako 4 gunetan ekoizten dira: Olabarrieta, Bengoetxe, Galdakao eta Abusu.
Egin beharreko aldaketak proiektua obraren errealitate fisikora egokitzearen ondorio dira; izan ere, proiektuan jasotzen ez diren soluzio teknikoak behar dira.
Jarraian zehazten da zer arrazoi dagoen indarrean dauden eraikuntza-soluzioak aldatzeko:
– Olabarrietako larrialdi-irteera.
– Bengoetxeko geltokia.
– Abusuko larrialdi-irteera.
– Hondakin-uren arazketa.
Lursailak lortzeko eta ukitutako ondasun eta eskubideak kudeatzeko, proiektuak ondasun eta eskubide horien identifikazio xehatua biltzen du (desjabetzeen eranskinean jaso dira lurzatien zerrenda eta planoak).
Garraio Azpiegituren zuzendariaren 2025eko maiatzaren 21eko Ebazpenaren bidez, erabaki zen hasiera ematea proiektua gauzatzeko beharrezkoak diren ondasun eta eskubideak nahitaez desjabetzeko prozedurari eta jendaurrean jartzea desjabetzeen eranskinaren zerrenda. Interesdunei jakinarazi zitzaien, eta 2025eko ekainaren 13an argitaratu zen Bizkaiko Aldizkari Ofizialean, Euskal Herriko Agintaritzaren Aldizkarian eta «El Correo» eta «Deia» egunkarietan. Ondasun eta eskubideen zerrenda hori Galdakaoko udaletxeko iragarki-taulan ere jarri zen.
Izapide honetan sei alegazio-idazki aurkeztu dira; Zerbitzu Teknikoetara bidali da, neurriak hartzeko eta kontuan hartzeko, akatsak zuzendu behar badira ere. Banakako erantzuna bidali zaie.
Jendaurrean jartzeko epea amaituta, ukitutako ondasun eta eskubideen behin betiko zerrenda egin da.
Organo honek eskumena du garraio-azpiegituren arloko jarduerak gauzatzeko beharrezkoak diren desjabetze-espedienteak izapidetzeko, Eusko Jaurlaritzako Mugikortasun Jasangarriaren Sailaren egitura organikoa eta funtzionala ezartzen duen azaroaren 19ko 382/2024 Dekretuaren 11.2.c) artikuluak xedatzen duenaren arabera.
Abenduaren 19ko 26/2022 Legeak aldatutako Trenbide Sektoreari buruzko irailaren 29ko 38/2015 Legearen 6.2 artikuluan xedatutakoaren arabera, trenbide-lineen proiektuak, haien tarteak edo trenbide-azpiegiturako beste elementu batzuk onesteak edo lehendik daudenak aldatzeak eskatzen badu lursail berriak erabiltzea, haietan identifikatutako eraginpeko ondasun eta eskubideen nahitaezko desjabetzearen ondorioetarako, onura publikoko edo gizarte-intereseko deklarazioa egingo da, eta deklaratuko da okupatu beharrekoa eta presakoa dela. Legezko adierazpen horrek administrazioari ahalmena ematen dio Nahitaezko Desjabetzeari buruzko 1954ko abenduaren 16ko Legearen 52. artikuluan aurreikusitako prozedurara jotzeko; hartara, lurrak okupatu edo ukitutako ondasunak eskuratuko ditu, ondasun edo eskubide horiek deskribatzen dituzten aktak egin ondoren, titularrak identifikatuz eta baloraziorako beharrezkoak diren datuak jasoz, eta, aldez aurretik, okupazioaren aurreko gordailu gisa perituak zehaztutako zenbatekoa ordainduz edo kontsignatuz, eta, hala badagokio, okupatzeko presak eragindako kalteen zenbatekoa ordainduz edo kontsignatuz.
Ondorioz, egindakoa ikusita, eta Nahitaezko Desjabetzeari buruzko 1954ko abenduaren 16ko Legearen 20., 21. eta 52. artikuluetan eta Nahitaezko Desjabetzeari buruzko Legearen Erregelamendua onartzen duen 1957ko apirilaren 26ko Dekretuaren 56. artikuluan eta bat etorriz harekin bat datozen eta oro har aplikatu beharreko gainerako xedapenetan xedatutakoarekin, honako hau
EBAZTEN DUT:
Lehenengoa.– «Bilboko Metropoli Trenbidearen 5. lineako obraren 1. proiektu aldatua. Tartea: Aperribai-Galdakao» proiektuak ukitutako ondasun eta eskubideen zerrenda onartzea, eta deklaratzea hura okupatu behar dela Trenbide Sektoreari buruzko irailaren 29ko 38/2015 Legearen 6.2 artikuluan adierazitako ondorioekin.
Bigarrena.– Zerrenda horretan agertzen diren jabeei dei egitea, Galdakaoko Udalera joan ondoren, ukitutako ondasun eta eskubideak okupatu aurreko aktak egiteko, zerrenda horretan adierazitako egun eta orduetan, eta, hala badagokio, haiek formalki okupatzeko; hala ere, beharrezkoa izanez gero, aukera egongo da lursailetara bertaratzeko, interesdunek hala eskatuta.
Egintza horretara interesdunek berek joan beharko dute, edo haien izenean jarduteko behar bezalako baimena jaso duten ordezkoek, titulartasuna egiaztatzen duten agiriak aurkeztu beharko dituzte (eskritura publikoak, Jabetza Erregistroko ziurtagiriak edo informazio-oharrak, etab.), bai eta beste edozein agiri ere, beren eskubideak egiaztatzen dituena. Egoki iritziz gero, beren perituekin eta notario batekin batera aurkeztu ahal izango dira, baina hori haien kontura izango da.
Era berean, eta bat etorriz Nahitaezko Desjabetzeari buruzko Legearen Erregelamendua onartzen duen 1957ko apirilaren 26ko Dekretuaren 56.2 artikuluan xedatutakoarekin, interesdunek alegazioak aurkeztu ahal izango dituzte okupazioaren aurreko akta egiten den egunera arte, akatsik egonez gero haiek zuzentzeko. Horretarako, Mugikortasun Jasangarriaren Saileko Garraio Azpiegituren Zuzendaritzara jo beharko dute, idatziz (Donostia kalea 1, Lakua 1, 01010 Vitoria-Gasteiz).
Ebazpen hau ez da behin betikoa administrazio-bidean, eta, beronen aurka, interesdunek gora jotzeko errekurtsoa aurkez diezaiokete Azpiegitura eta Garraioetako sailburuordeari, hilabeteko epean, ebazpena jakinarazi edo argitaratu eta hurrengo egunetik aurrera. Errekurtsoa jartzeko idazkia organo honi edo Azpiegitura eta Mugikortasun Jasangarriaren sailburuordeari zuzendu behar zaio.
Administrazio publikoek administrazioarekiko auzi-errekurtsoa jarri ahal izango dute, bi (2) hilabeteko epean, Euskal Autonomia Erkidegoko Justizia Auzitegi Nagusiko Administrazioarekiko Auzien Salan. Nolanahi ere, aurretik aukera izango dute errekerimendua egiteko, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan zehaztutako moduan eta epean.
Vitoria-Gasteiz, 2025eko irailaren 1a.
Garraio Azpiegituren zuzendaria,
MARÍA DOLORES DE JUAN DE MIGUEL.