Euskal Herriko Agintaritzaren Aldizkaria

144. zk., 2025eko uztailaren 31, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

ETXEBIZITZA ETA HIRI AGENDA SAILA

3366

151/2025 DEKRETUA, uztailaren 15ekoa, zeinaren bidez urgentziako deklaratzen baita Bilbao Bizkaia Ur Partzuergoak, nahitaezko desjabetzea egiteko, «Berangoko Larrañazubi bideko ur-hornidurako sarea hobetzeko proiektua» burutzeko beharrezkoak diren ondasun eta eskubideak lehenbailehen hartu behar dituela deklaratzeko dena.

Bilbao Bizkaia Ur Partzuergoak, «Berangoko Larrañazubi bideko ur-hornidurako sarea hobetzeko proiektua» egiteko eta formalki onartzeko espedientea egin eta onartu ondoren, proiektua egiteko lur guztiak erabilgarri izateko beharra adierazi zuen.

2024ko irailaren 26an, Bilbao Bizkaia Ur Partzuergoak nahitaezko desjabetze-espedienteari hasiera ematea eta ukitutako ondasun eta eskubideen zerrenda hilabeteko epean jendaurrean jartzea erabaki zuen, 2024ko urriaren 8ko Bizkaiko Aldizkari Ofizialean (194. zk.) eta prentsan argitaratutako iragarkien bidez. Ondoren, 2025eko otsailaren 12an egindako bilkuran, Bilbao Bizkaia Ur Partzuergoak erabaki zuen Eusko Jaurlaritzari eskatzea proiektu horren eraginpeko ondasun eta eskubideak lehenbailehen hartu beharrekoak direla deklaratzeko, Nahitaezko Desjabetzeari buruzko Legearen 52. artikuluan aurreikusitako ondorioetarako.

Urgentziaz okupatu beharreko ondasunak eta eskubideak zehaztuta eta banakatuta agertzen dira espedientean jasotako zerrendan, identifikazioak egiteko behar adina datuekin agertu ere. Zerrenda hori jendaurrean jarri zen, egoki zenean, eta lau alegazio aurkeztu ziren, administrazio-espedientean adierazten denez.

Ondasun eta eskubide horiek okupatzea luzaezintzat jotzen da eskatzaileak adierazitako honako inguruabar hauengatik:

Espedientearen arabera, premiazkotzat jo behar da Larrañazubi auzoko hornidura-sarearen funtzionamendu egokia benetan eta etengabe arriskuan jartzen duen egoerari erantzuteko premia larria.

Eskaera hau egiteko arrazoiak honako hauek dira:

– Ohiz kanpoko ustiapen-presioen ondoriozko haustura-maiztasun handia eroanbideetan; izan ere, ura galtzearen ondorioz kalte ekonomikoa eta ingurumenekoa eragiteaz gain, etengabe eteten da hornidura, eta herritarren ongizateari eta bizi-baldintzei eragiten die.

– Egoera larriagotzeko arriskua: hodien egiturazko narriadurak aurrera egiteak sarea partzialki edo guztiz kolapsatzeko arriskua areagotzen du, eta horrek zerbitzua luzaroan etetea eragin dezake dentsitate handiko hiri-eremu batean.

– Zerbitzuaren kalitatean zuzeneko ondorioak: etengabeko matxurek zaildu egiten dute sarean presio eta emari egokiari eustea, uraren kalitate mikrobiologikoari eragiten dioten gorabeherak sortuz, batez ere behin-behineko konponketek eragindako tarteetan.

– Ingurumen-inpaktua: hausturekin lotutako ur-ihesek ur-baliabideak xahutzea dakarte, eta uraren ziklo integralaren kudeaketan eskatzen diren iraunkortasun- eta efizientzia-printzipioen aurka doa.

Horrez gain, deskribatutako egoerak urratu egiten ditu 3/2023 Errege Dekretuan, urtarrilaren 10ekoan, kontsumorako uraren kalitatearen irizpide tekniko-sanitarioak ezartzen dituenean, jasotako baldintzak; izan ere, baldintza horien arabera, uneoro bermatu behar da banaketa-sareetan osasungarritasuna, garbitasuna eta presio egokia. Matxura eta ihesekiko esposizio jarraituak arriskuan jartzen ditu estandar horiek eta, ondorioz, operadoreak legezko betebeharrak betetzea, osasun publikoa eta abonatuen konfiantza arriskuan jartzeaz gainera.

Euskal Autonomia Erkidegoko Lurralde Antolamenduari buruzko maiatzaren 31ko 4/1990 Legearen 26.1.f artikuluan xedatzen denez, Eusko Jaurlaritzari dagokio deklaratzea urgentziaz okupatu behar direla nahitaez desjabetu beharreko ondasunak eta eskubideak, nahitaezko desjabetzeak honako hauek hartzen dituenean: burutze-unitate osoak, lurraldearen hirigintza-antolaketari dagozkion sistema orokorrak edo antolaketa horren elementuren bat eta hiri-lurzoruan egin beharreko banakako jarduketak. Goian aipatutako lege horrek 26.2 artikuluan ezarritakoaren arabera, lurralde-antolamenduaren eskumenak dituen sailburuari dagokio horretarako proposamena aurkeztea Jaurlaritzaren Kontseiluari.

Hori dela eta, Etxebizitza eta Hiri Agendako sailburuak proposaturik, Gobernu Kontseiluak, 2025eko uztailaren 15ean bilkuran gaia aztertu ondoren, honako hau

XEDATZEN DUT:

Artikulu bakarra.– Nahitaezko Desjabetzeari buruzko Legearen 52. artikuluan eta Euskal Herriko Lurralde Antolakuntzari buruzko Legearen 26.ean xedatutakoari jarraituz, «Berangoko Larrañazubi bideko ur-hornidurako sarea hobetzeko proiektua» burutzeko beharrezkoak diren ondasun eta eskubideak Bilbao Bizkaia Ur Partzuergoak lehenbailehen hartu beharrekoak direla deklaratzea. Berariaz hasiarazitako espedientean jasotako zerrendan daude zehaztu eta banakatuta ondasun eta eskubide horiek.

AZKEN XEDAPENA

Dekretu honek amaiera ematen dio administrazio-bideari, eta, beronen aurka, aurretiaz berraztertze-errekurtsoa jar dakioke Gobernu Kontseiluari, hilabeteko epean, edo, bestela, zuzenean, administrazioarekiko auzi-errekurtsoa jar daiteke Euskal Autonomia Erkidegoko Justizia Auzitegi Nagusiko Administrazioarekiko Auzien Salan, bi hilabeteko epean. Epeok, dekretu hau argitaratu eta hurrengo egunean hasiko dira.

Vitoria-Gasteizen, 2025eko uztailaren 15ean.

Lehendakaria,

IMANOL PRADALES GIL.

Etxebizitza eta Hiri Agendako sailburua,

DENIS ITXASO GONZÁLEZ.

Azterketa dokumentala