Euskal Herriko Agintaritzaren Aldizkaria

113. zk., 2025eko ekainaren 17a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

ETXEBIZITZA ETA HIRI AGENDA SAILA

2698

AGINDUA, 2025eko ekainaren 10ekoa, Etxebizitza eta Hiri Agendako sailburuarena, birkokatzeetarako bost etxebizitza baztertzen dituena eta Getxoko Iturribarriko erregimen orokorreko babes ofizialeko 53 etxebizitza errentamenduan esleitzeko prozedura hasten duena.

AURREKARIAK

Lehenengoa.– Etxebizitzak esleitzeko prozedura Etxebizitza, Herri Lan eta Garraioetako sailburuaren 2012ko urriaren 15eko Aginduan aurreikusitakoaren arabera arautuko da (2012ko urriaren 15eko Agindua, Etxebizitza Eskatzaileen Erregistroari eta babes ofizialeko etxebizitzak eta araubide autonomikoko zuzkidura-bizitokiak esleitzeko prozedurei buruzkoa), babes publikoko etxebizitzen araubide juridikoari eta etxebizitzaren eta lurzoruaren inguruko finantza-neurriei buruzko martxoaren 4ko 39/2008 Dekretuaren 12. artikuluan jasotakoaren arabera. Aipatutako Agindua, 2012ko urriaren 15ekoa, Etxebizitza, Herri Lan eta Garraioetako sailburuarena, aldatu egin da, III. kapituluan –alokairu-erregimeneko etxebizitzen eta zuzkidura-bizitokien esleipenak arautzen dituena–, abenduaren 26ko 210/2019 Dekretuaren azken xedapenetatik zazpigarrenaren bidez (210/2019 Dekretua, kreditu-erakundeen eta Euskal Autonomia Erkidegoko Administrazioaren arteko finantza-lankidetzakoa etxebizitzaren eta lurzoruaren arloan, eta etxebizitzaren arloko erregelamendu-xedapenak aldatzekoa).

Era berean, nahitaez aipatu behar da urriaren 10eko 147/2023 Dekretua, etxebizitza bat okupatzeko eskubide subjektiboari buruzkoa. Dekretu horrek, alde batetik, martxoaren 4ko 39/2008 Dekretua aldatzen du azken xedapenetatik lehenengoan, eta, bestetik, 2012ko urriaren 15eko Agindua aldatzen du azken xedapenetatik bigarrenean.

Bigarrena.– Bizkaiko Etxebizitzako lurralde-ordezkariaren 2020ko abenduaren 1eko Ebazpenaren bidez, babes orokorreko etxebizitzen behin-behineko kalifikazioa eskuratu zuen Getxoko udalerriko Iturribarriko (Areneazpi) 58 etxebizitzako sustapenak. Sustapen hori Visesak (Euskadiko Etxebizitza eta Lurra SA) sustatu zuen, EB2-1793/20-LC-000 espediente-zenbakiarekin.

Hirugarrena.– 2017ko azaroaren 2an, «Euskadiko Etxebizitza eta Lurra SA» sozietate publikoak eta Getxoko Udaleko alkateak hitzarmena sinatu zuten Getxoko Iturribarri-II 24-2 egikaritze-unitatean alokairuko etxebizitza publikoak sustatzeko. Hitzarmen horren bigarren klausularen arabera, alokairuko babes ofizialeko etxebizitzen esleipendunek egiaztatu beharko dute, gainera, erreferentzia gisa hartzen den datan, Getxon etenik gabe erroldatuta egon direla, gutxienez, azken 3 urteetan, edo, bestela, azken 10 urteetan gutxienez 5 urtez, tarteka bada ere.

Laugarrena.– 24.2- «Iturribarri-II» egikaritze-unitaterako izapidetutako birpartzelazio-proiektuari lotutako birkokatze-programaren esparruan, Getxoko Udalak bost etxebizitza erreserbatzeko eskatu zuen, Etxebizitza eta Hiri Agenda Sailari zuzendutako 2024ko abenduaren 13ko idazkiaren bidez.

Bosgarrena.– Sustapen honetan esleituko diren 53 etxebizitza horietako 2 mugikortasun urri iraunkorreko desgaitasuna dutenei egokituta daude, bi logela dituzte eta 82,94 m²-ko azalera dute. Gainerako 51 etxebizitzetatik, 40 etxebizitza bi logelakoak dira eta 49,56 m² y 65,04 m² bitarteko azalera dute; eta 11 etxebizitza hiru logelakoak dira eta 80,14 m² y 82,09 m² bitarteko azalera dute. Etxebizitzak lagatzeko araubidea errentamendua izango da. Etxebizitza horiek kupotan banatuko dira seigarren ebazpen zatian ezartzen den bezala.

ZUZENBIDEKO OINARRIAK

Lehenengoa.– Etxebizitza eta Hiri Agendako sailburuari dagokio honako agindu hau xedatzea, bat etorrita honako arau hauetan ezarritakoarekin: martxoaren 4ko 39/2008 Dekretua, Babes publikoko etxebizitzen araubide juridikoari eta etxebizitzaren eta lurzoruaren inguruko finantza-neurriei buruzkoa –12. artikulua, zehazki–, eta Etxebizitza, Herri Lan eta Garraioetako sailburuaren 2012ko urriaren 15eko Agindua, –48. artikulua, zehazki– Etxebizitza-eskatzaileen erregistroari eta babes ofizialeko etxebizitzak nahiz araubide autonomikoko zuzkidura-bizitokiak esleitzeko prozedurei buruzkoa (aurrerantzean, Etxebizitza, Herri Lan eta Garraioetako sailburuaren 2012ko urriaren 15eko Agindua)

Bigarrena.– Etxebizitzaren arloan kreditu-erakundeen eta Euskal Autonomia Erkidegoko Administrazioaren arteko finantza-lankidetzari eta etxebizitzaren arloko erregelamendu-xedapenak aldatzeari buruzko abenduaren 26ko 210/2019 Dekretuaren azken xedapenetako zazpigarrenak, 4. puntuan, Etxebizitza, Herri Lan eta Garraioetako sailburuaren 2012ko urriaren 15eko Aginduaren II. tituluko III. kapitulua aldatzen du. Agindu horren bidez, etxebizitzaren arloan eskumena duen sailak babes ofizialeko etxebizitzak eta errentamendu-erregimeneko zuzkidura-bizitokiak esleitzea arautzen da. Erantsitako 47.bis artikuluak dioenez, sustapen guztietan, berariaz kolektibo jakin bati zuzendutako araubide autonomikoko zuzkidura-bizitokietan izan ezik, honako kolektibo hauen premiei erantzuteko etxebizitza-kupoak gordeko dira: desgaitasuna duten pertsonak, gutxienez titularretako bat 36 urtetik beherakoa duten bizikidetza-unitateak, etxebizitza-eskubide subjektiboaren titularrak, etxebizitza-premia berezia duten pertsonak, gainerako eskatzaileak edo kupo orokorra. Etxebizitzen kupoek arestian aipatutako 47.bis artikuluko 4. puntuan adierazitako ehunekoak errespetatu behar dituzte.

Hirugarrena.– Etxebizitza, Herri Lan eta Garraioetako sailburuaren 2012ko urriaren 15eko Aginduaren 50. artikuluak, egungo idazketan, honako hau dio: etxebizitzaren esleipena honako hauen arabera egingo da: 47.bis artikuluan aipatzen diren kupoak, etxebizitzen egokitzapena eta prozeduran sartutako pertsonek edo bizikidetza-unitateek 51. artikuluan aipatzen den baremoa aplikatuz lortutako puntuazio-ordena. 51. artikulu horrek baremoa arautzen du honako hauen arabera: eskatzaileen diru-sarrerak, bizikidetza-unitateko kideen kopurua, etxebizitza-eskatzaileen erregistroan duten antzinatasuna eta etxebizitza-premia berezia.

Bizikidetza-unitateko kideen kopuruagatik ematen den puntuazioa sustapeneko etxebizitzek duten logela kopuruaren arabera emango da. Hala, logela bateko etxebizitzetarako: puntu 1 emango zaie 2 kidez osatutako bizikidetza-unitateei, eta 0 puntu pertsona bakarreko bizikidetza-unitateei. 2 logelako etxebizitzetarako: 3 puntu emango zaizkie 3 kidez osatutako bizikidetza-unitateei, puntu 1 2 kidez osatutako bizikidetza-unitateei eta 0 puntu pertsona bakarreko bizikidetza-unitateei. Azkenik, 3 edo 4 logelako etxebizitzetarako: 7 puntu emango zaizkie 6 kidez edo gehiagoz osatutako bizikidetza-unitateei, 5 puntu 5 kidez osatutako bizikidetza-unitateei, 3 puntu 4 kidez osatutako bizikidetza-unitateei eta puntu 1 3 kidez osatutako bizikidetza-unitateei.

Laugarrena.– Etxebizitza, Herri Lan eta Garraioetako sailburuaren 2012ko urriaren 15eko Aginduaren 27. artikuluak zehazten du noiz hartu behar den egokitzat etxebizitza bat, bizikidetza-unitateko kideen kopurua eta esleitu beharreko etxebizitzako logelak kontuan hartuta.

Bosgarrena.– Ekainaren 28ko 80/2022 Dekretuak, Euskal Autonomia Erkidegoko etxebizitzen eta zuzkidura-bizitokien gutxieneko bizigarritasun-baldintzak eta diseinu-arauak arautzen dituenak, 5. artikuluko 4., 5. eta 6. ataletan aipatzen du noiz gertatzen den gainokupazioa etxebizitza edo bizitoki batean

Seigarrena.– Lurralde Plangintza, Etxebizitza eta Garraioetako sailburuaren 2022ko ekainaren 30eko Aginduak zehazten ditu babes publikoko etxebizitzen gehieneko prezioak eta gehieneko errentak eta zuzkidura-bizitokien kanona.

Zazpigarrena.– Etxebizitza bat okupatzeko eskubide subjektiboari buruzko urriaren 10eko 147/2023 Dekretuaren azken xedapenetako lehenak martxoaren 4ko 39/2008 Dekretua aldatzen du, eta dekretu horren 19. artikuluari 3. apartatua gehitzen dio, zeinak babes ofizialeko etxebizitza eskuratzeko eska daitezkeen urteko gehieneko diru-sarrera haztatuen mugei eragiten baitie.

Zortzigarrena.– Babes publikoko etxebizitzen araubide juridikoari eta etxebizitzaren eta lurzoruaren inguruko finantza-neurriei buruzko martxoaren 4ko 39/2008 Dekretuaren 12.2 artikuluak dioenez, Etxebizitza eta Gizarte Gaietako sailburuaren Agindu bidez esleipen-prozeduretatik kanpo utzi ahal izango dira etxebizitza-premia espezifikoei erantzuteko erabiltzen diren babes ofizialeko etxebizitzak.

Horrenbestez, aipatutako lege-manuak, horiekin bat datozenak eta aplikatu behar diren gainerakoak aztertu ondoren, honako hau

EBAZTEN DUT:

Lehenengoa.– Bost etxebizitza esleipen-prozeduratik kanpo uztea Getxoko Udalaren birkokatze-premiei erantzuteko.

Bigarrena.– Getxoko udalerrian, Iturribarrin, EB2-1793/20-LC-000 espedienteko babes ofizialeko araubide orokorreko 53 etxebizitza errentamendu-araubidean esleitzeko prozedura hastea.

Hirugarrena.– Sustapen honetako etxebizitzak lagatzeko araubidea errentamendua izango da.

Laugarrena.– Sustapenean ezin izango dute parte hartu 6 kide baino gehiagoko bizikidetza-unitateek, alde batetik, etxebizitza egokia arautzen duen 2012ko urriaren 15eko Aginduaren 27. artikuluari jarraituz, eta, bestetik, gainokupazioa arautzen duen ekainaren 28ko 80/2022 Dekretuaren 5. artikuluari jarraituz.

Bosgarrena.– 53 etxebizitzako esleipen-prozedura honetan parte hartzerik izango dute agindu hau argitaratzen den egunean baldintza hauek betetzen dituztenek:

a) Getxon alokairuko etxebizitzaren eskatzaile gisa alta emanda egotea Babestutako Etxebizitza eta Zuzkidura Bizitokien Eskatzaileen Erregistroan. Nolanahi ere, mugikortasun murriztua egiaztatu duten pertsonek izango dute parte hartzerik, eskatzen duten udalerria edozein dela ere.

b) Eskaeraren titularretako batek, gutxienez, Getxon erroldatuta egon behar du azken 3 urteetan etenik gabe, edo, bestela, azken 10 urteetan 5 urtez, tarteka bada, agindu hau argitaratzen den egunean. Mugikortasun murriztua egiaztatzen duten pertsonak eta genero-indarkeriaren biktima diren emakumeak salbuetsita daude esleipen-prozeduran erroldatuta egotearen baldintza betetzetik.

c) 9.000 eta 45.022,57 euro bitarteko diru-sarrera haztatuak izatea 2023ko errenta-ekitaldiari dagokion zergaldian. Mugikortasun urriko desgaitasuna egiaztatu duten pertsonen, desgaitasun psikikoa egiaztatu duten pertsonen edo genero-indarkeriaren biktima diren emakumeen kasuan, ez da eskatuko gutxieneko diru-sarrerarik egiaztatzea. Etxebizitzarako eskubide subjektiboa aitortuta duten pertsonek ere ez dituzte diru-sarrerak egiaztatu beharko. Alokairuan hartzeko, diru-sarrera konputagarrien hartzailetzat hartuko dira gaitasuna judizialki aldatu ez zaien eta bizikidetza-unitateko kide diren adin nagusiko pertsona guztiak.

d) Bizikidetza-unitateek ez dituzte izango 6 kide baino gehiago.

e) Bizikidetza-unitatea osatzen dutenetatik inork ezin du izan ez etxebizitzarik jabetzan, ez azalera- edo gozamen-eskubiderik, agindua argitaratzen den egunean. Dena dela, etxebizitza-gabeziaren eskakizunari dagozkion salbuespenak aplikatuko dira 2012ko urriaren 15eko Aginduaren 9.bis artikuluari jarraituz, zeina Etxebizitza bat okupatzeko eskubide subjektiboari buruzko urriaren 10eko 147/2023 Dekretuaren azken xedapenetako bigarrenak erantsi baitzuen.

Seigarrena.– Esleitu beharreko 53 etxebizitza horietatik honako hauek gordeko dira:

a) 2 etxebizitza, mugikortasun urriko desgaitasun iraunkorra egiaztatzen duten pertsonei egokituak.

Etxebizitza horiek esleitzeko, Etxebizitza, Herri Lan eta Garraioetako sailburuaren 2012ko urriaren 15eko Aginduaren 52. artikuluan ezarritako lehentasun-hurrenkerari jarraituko zaio, bat etorrita 888/2022 Errege Dekretuaren lehenengo xedapen gehigarrian ezarritakoarekin (888/2022 Errege Dekretua, urriaren 18koa, Desgaitasun-maila aitortu, deklaratu eta kalifikatzeko prozedura ezartzen duena):

Lehenik eta behin, egokitutako etxebizitzak esleituko zaizkie Desgaitasun-maila aitortu, deklaratu eta kalifikatzeko prozedurari buruzko abenduaren 23ko 1971/1999 Errege Dekretuaren 2. eranskinean A letrarekin kalifikatutako desgaitasunen bat duten pertsonei; gero, 2. eranskin horretan B letrarekin kalifikatutako desgaitasunen bat duten pertsonei, eta, azkenik, 7 puntu edo gehiago eskuratzen dituztenei eranskin bereko D eta H bitarteko letretan ezarritakoak batuz.

b) 51 etxebizitza gainerako eskatzaileen artean banatuko dira, kupo hauek errespetatuta:

– 16 etxebizitza esleituko zaizkie (sustapen honetan esleituko direnen % 31,37) 36 urtetik beherako gutxienez titular bat duten bizikidetza-unitateei.

– 9 etxebizitza esleituko zaizkie (sustapen honetan esleituko direnen % 17,65) agindu hau argitaratzen den egunean etxebizitza duina eta egokia eskuratzeko eta legez okupatzeko eskubide subjektiboa duten eskatzaileei.

– 17 etxebizitza esleituko dira (sustapen honetan esleituko direnen % 33,33) etxebizitza-premia berezia duten pertsonen artean.

– 9 etxebizitza esleituko dira (sustapen honetan esleituko direnen % 17,65) gainerako eskatzaileen artean (kupo orokorra).

Zazpigarrena.– Egokitu gabeko etxebizitzak dagokien kolektiboko pertsonei edo bizikidetza-unitateei esleitu gabe geratuko balira kuporen batean, etxebizitza horiekin handituko litzateke kupo orokorrera bideratutako etxebizitzen kupoa.

Era berean, kupo orokorreko eskaeren artetik etxebizitzarik esleitu gabe geratuko balitz, kupo bakoitzean gordetako etxebizitzak kontuan izanda eskaera gehien izan dituen kupoko pertsonen artean esleituko dira soberako etxebizitza horiek.

Esleipen-prozedura bukatu ondoren, etxebizitzak esleitu gabe geratuko balira, bigarren esleipenetarako zehaztuta dagoen prozeduraren bidez esleituko lirateke.

Halaber, mugikortasun urriko kupoan parte hartzen dutenen artean etxebizitza egokituak esleitu gabe geratuko balira, zuzenean bigarren esleipenetarako zehaztuta dagoen prozeduraren bidez esleituko lirateke.

Zortzigarrena.– 2012ko urriaren 15eko Aginduaren 47.bis.2. artikuluak esaten duenari jarraituz, kolektibo bateko baino gehiagoko kide diren pertsonak edo bizikidetza-unitateak etxebizitzen kopuru handiena duen kupoko taldera sartuko dira.

Bederatzigarrena.– Agindu honetan eta aplikatu beharreko gainerako arauetan ezarritako baldintzak betetzen dituzten pertsonek sustapen honetako esleipen-prozeduran parte hartu nahi badute, dagokion inprimakia aurkeztu beharko dute 2025eko ekainaren 18tik uztailaren 4ra bitartean (biak barne) hauetako bide baten bitartez:

– Telematikoki: http://www.etxebide.euskadi.eus webgunearen bidez.

– Zuzenean zerbitzuan (aurrez hitzordua hartuta), Kale Nagusia 85, beheko solairua. 48011 Bilbao.

– Postaz: Bizkaiko Etxebizitzako Lurralde Ordezkaritza, Kale Nagusia 85, 6. solairua. 48011 Bilbao. Posta administratiboa erabiltzea gomendatzen da.

Hamargarrena.– 2012ko urriaren 15eko Aginduaren 51. artikuluak dioenari jarraituz, eskaerek barematze-irizpide hauen araberako puntuazioa jasoko dute:

a) Diru-sarrerak: 10 puntu emango zaizkie 0 eta 10.389,82 euro bitarteko diru-sarrerak dituzten eskatzaileei; 9 puntu, 10.389,83 eta 17.316,37 euro bitartekoak dituztenei; 8 puntu, 17.316,38 eta 28.860,62 euro bitarteko diru-sarrerak dituzten eskatzaileei, eta 5 puntu 28.860,63 eta 45.022,57 euro bitarteko diru-sarrerak dituztenei.

b) Bizikidetza-unitateko kide kopurua: bizikidetza-unitateko kide kopurua puntuatzeko orduan, sustapeneko etxebizitzen logela kopurua hartuko da kontuan. Bi logelako etxebizitzak: 3 puntu emango zaizkie hiru kide dituzten bizikidetza-unitateei, 1 puntu bi kide dituzten bizikidetza-unitateei eta 0 puntu pertsona bakarreko bizikidetza-unitateei. Bestalde, 3 logelako etxebizitzetarako, 7 puntu emango zaizkie sei kidek edo gehiagok osatutako bizikidetza-unitateei, 5 puntu bost kidek osatutako bizikidetza-unitateei, 3 puntu lau kidek osatutako bizikidetza-unitateei eta 1 puntu hiru kidek osatutako bizikidetza-unitateei.

c) Antzinatasuna etxebizitza-eskatzaileen erregistroko inskripzioan: 1 puntu emango da antzinatasunik handiena duen bizikidetza-unitateko kidearen inskripzio-urte bakoitzeko; 7 puntu emango dira gehienez ere.

d) Etxebizitza-premia berezia: 4 puntu emango zaizkie etxebizitza-premia bereziko kolektiboren bateko titularren bat duten espedienteei. Desgaitasun intelektual edo garapen-desgaitasunen bat duten pertsonei eta gaixotasun mentalen bat duten pertsonei dagokienez, espedienteei 4 puntu emango zaizkie, bizikidetza-unitatean egoera hori egiazta dezakeen kideren bat badago. Kolektibo bateko baino gehiagoko kide direnei, 4 puntu emango zaizkie horietako bakoitzeko; 8 puntu emango dira gehienez ere.

Hamaikagarrena.– Agindu honen argitaratze-data kontuan hartuta kalkulatuko da baremazioa. Berdinketarik badago, antzinatasun handiena duen eskaeraren alde egingo da eta, antzinatasuna ere berdina bada, etxebizitza-eskatzaileen erregistroan lehenago sartu zena aukeratuko da.

Hamabigarrena.– Bi logelako etxebizitzak gehienez lau kideko bizikidetza-unitateei esleituko zaizkie. Hiru logelako etxebizitzak, berriz, gehienez sei kide dituzten bizikidetza-unitateei esleituko zaizkie.

Hamahirugarrena.– 2012ko urriaren 15eko Aginduaren 50. artikuluaren idazketa berrian ezarri bezala, etxebizitzak esleitzeko orduan, irizpide hauei jarraituko zaie: Aginduaren 47.bis artikuluan zehaztutako kupoak, etxebizitzen egokitzapena eta prozeduran sartutako pertsonek edo bizikidetza-unitateek lortutako puntuazio-ordena, betiere 51. artikuluan xedatutako baremoa aplikatuz.

Hamalaugarrena.– Esleipena amaitutakoan, zenbat kupo dauden, hainbat itxarote-zerrenda egingo dira, parte hartu bai baina etxebizitzarik eskuratu ez dutenentzat. Itxaron-zerrenda agortzen bada, 2012ko urriaren 15eko Aginduaren 59. artikuluaren idazketa berrian ezarritako prozedurari jarraituko zaio etxebizitzak esleitzeko.

Hamabosgarrena.– Onartutakoen eta baztertutakoen zerrendak, etxebizitza-esleipenak eta itxaron-zerrendak Eusko Jaurlaritzaren Herritarrentzako Zerbitzuaren (Zuzenean) iragarki-oholetan argitaratuko dira, baita Euskal Autonomia Erkidegoko Administrazio Publikoaren egoitza elektronikoaren iragarki-ohol elektronikoan ere (www.euskadi.eus > egoitza elektronikoa > iragarki-taula).

Hamaseigarrena.– Agindu honen aurka, aukerako berraztertze-errekurtsoa aurkez dakioke Etxebizitza eta Hiri Agendako sailburuari, hilabeteko epean; bestela, zuzenean administrazioarekiko auzi-errekurtsoa aurkez daiteke, bi hilabeteko epean, Euskal Autonomia Erkidegoko Justizia Auzitegi Nagusiko Administrazioarekiko Auzien Salan. Errekurtso biak aurkezteko epea Euskal Herriko Agintaritzaren Aldizkarian agindu hau argitaratu eta hurrengo egunean hasiko da.

Vitoria-Gasteiz, 2025eko ekainaren 10a.

Etxebizitza eta Hiri Agendako sailburua,

DENIS ITXASO GONZÁLEZ.

Azterketa dokumentala