Euskal Herriko Agintaritzaren Aldizkaria

101. zk., 2025eko maiatzaren 30a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

ETXEBIZITZA ETA HIRI AGENDA SAILA

2357

EBAZPENA, 2025eko maiatzaren 15ekoa, Etxebizitza, Lurzoru eta Arkitekturaren zuzendariarena, Orozko eta Laudio udalerrietan «Nerbioi ibaiaren goiko arroa saneatzeko kolektoreen proiektua. 1. aldaketa. Basaurbe tartea. 8. eta 9. tarteak» izeneko proiektuko desjabetze-espedienteak eragindako ondasun eta eskubideak okupatu aurreko aktak egiteko datak zehazten dituena.

2024ko martxoaren 15ean, Uraren Zuzendaritza Nagusiak, Ingurumeneko Estatu Idazkaritzaren eskumenak eskuordetuta eta TED/533/2021 Agindua (2021eko maiatzaren 31ko BOE) eta ondorengo aldaketak kontuan hartuta, teknikoki onartu zuen Nerbioi ibaiaren goiko arroa saneatzeko kolektoreen proiektua, Laudio, Orozko, Aiara eta Amurrio udal-mugarteetan (Araba eta Bizkaia). 2. lotea. 1. aldaketa.

Eusko Jaurlaritzako Etxebizitza eta Hiri Agenda Saileko Etxebizitza, Lurzoru eta Arkitekturako zuzendariaren 2024ko azaroaren 11ko Ebazpenaren bidez hasi zen nahitaezko desjabetzearen espedientea «Nerbioi ibaiaren goiko arroa saneatzeko kolektoreen proiektua. 1. aldaketa. Basaurbe tartea. 8. eta 9. tarteak» izeneko proiektuaren eraginpeko ondasunak eta eskubideak okupatzeko, Laudio eta Orozko udalerrietan (Araba eta Bizkaia), kontuan hartuta lanak herri onurakoak direla eta eragindako lurzoru eta eraikinak hartu behar direla, desjabetzea egiteko edo zorrak ezarri ahal izateko. Hori guztia, Plan Hidrologiko Nazionalaren uztailaren 5eko 10/2001 Legean eta Uraren Legearen testu bategina onartzen duen uztailaren 20ko 1/2001 Legegintzako Errege Dekretuan xedatutakoaren arabera. Agindu beraren bidez, informazio publikorako izapidea egin zen, eraginpeko ondasunen eta eskubideen berri emateko (2024ko azaroaren 27ko Euskal Herriko Agintaritzaren Aldizkarian –231. zk–., Bizkaiko Aldizkari Ofizialean –229. zk.– eta Arabako Lurralde Historikoaren Aldizkari Ofizialean –135. zk.–)

Informazioa jendaurrean jartzeko denboraldia igarota, Etxebizitza eta Hiri Agendako sailburuaren apirilaren 1eko 78/2025 Dekretuaren bidez, okupazioa presako deklaratu zen Orozko eta Laudio udalerrietan, «Nerbioi ibaiaren goiko arroa saneatzeko kolektoreen proiektua. 1. aldaketa. Basaurbe tartea. 8. eta 9. tarteak» izeneko proiektuko desjabetze-espedientearen eraginpeko ondasunak eta eskubideak nahitaez desjabetu ahal izateko.

Ondorioz, Nahitaezko Desjabetzeari buruzko Legearen 52. artikuluan xedatutakoa betetzearren, honen bidez dei egiten zaie erantsitako zerrendako ondasun eta eskubideen titularrei, adierazitako egunean eta orduan, eta aldez aurretik beren udalean agertu ondoren, aldez aurretiko aktak egiteko bai eraginpeko ondasun eta eskubideak okupatzeko, bai, hala badagokio, lurzoruak okupatzeko; dena den, interesdunek hala eskatuz gero eta beharrezkoa bada, lurzoruetara bertara joan ahal izango da.

Egintza horretara interesdunek beraiek agertu beharko dute, edo haien izenean jarduteko behar bezala baimendutakoek, eta titulartasuna egiaztatzeko agiriak (eskritura publikoak, pribatuak, Jabetza Erregistroaren ziurtagiriak edo ohar informatiboak, eta abar) eraman beharko dituzte, baita haien eskubideak egiaztatzeko beste ezein agiri ere; hala nahi izanez gero, peritu edo notario batek lagunduta ere joan daitezke. Era berean, Nahitaezko Desjabetzeari buruzko Legearen Erregelamenduaren 56.2 artikuluan xedatutakoarekin bat etorriz, argitaratutako zerrenda horretan agian agertzen ez diren eskubide errealen zein interes ekonomikoen titularrek eta interesdunek egoki iritzitako alegazio guztiak aurkeztu ahal izango dituzte, eraginpeko ondasun eta eskubideen zerrenda horretako okerrak zuzentzearren bakarrik. Alegazio horiek idatziz aurkeztu beharko dira Eusko Jaurlaritzako Etxebizitza eta Hiri Agenda Saileko Etxebizitza, Lurzoru eta Arkitektura Zuzendaritzan: Donostia kalea 1, 01010 Vitoria-Gasteiz. Eta hori egiteko epea ondasunak okupatu aurreko aktak egiteko egunean amaituko da.

Egoitza elektronikoa, 2025eko maiatzaren 15a.

Etxebizitza, Lurzoru eta Arkitekturaren zuzendaria,

PABLO GARCIA ASTRAIN.

(Ikus .PDF)

Azterketa dokumentala