RSS
100. zk., 2025eko maiatzaren 29a, osteguna
- Bestelako formatuak:
- PDF (140 KB - 3 orri.)
- EPUB (111 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
HEZKUNTZA SAILA
2320
AGINDUA, 2025eko maiatzaren 16koa, Hezkuntzako sailburuarena, Donostiako (Gipuzkoa) «Manuel de Larramendi» Bigarren Hezkuntzako ikastetxe pribatuaren baimena azkentzen duena, udalerri bereko «ElaiEnea» Haur Hezkuntzako, Lehen Hezkuntzako eta Bigarren Hezkuntzako ikastetxe pribatuan integratzeagatik, eta azken ikastetxe horren baimena aldatzen duena (unitateak gehitzeagatik).
Aztertu da «Manuel de Larramendi» Bigarren Hezkuntzako ikastetxe pribatuaren titularra den «Fundación ELIKEL» erakundeak eta «Fundación Escuela Teresiana» entitateak, «ElaiEnea» Haur Hezkuntzako, Lehen Hezkuntzako eta Bigarren Hezkuntzako ikastetxe pribatuaren titularra denak, eskatuta hasarazi den espedientea. Espediente hori «Elaienea» Haur Hezkuntzako, Lehen Hezkuntzako eta Bigarren Hezkuntzako ikastetxe pribatuan integratzeagatik lehen ikastetxeari emandako baimena iraungitzeko eta integrazio horren ondorioz ikastetxe horren unitateak aldatzeko da.
Espediente hori ezarritako prozeduraren arabera izapidetu da, indarrean dagoen araudiak eskatzen duen dokumentazioa erantsi zaio, eta gai horretan eskumena duten erakundeek horri buruzko txostena egin dute.
Hauek aztertu dira: Hezkuntzari buruzko maiatzaren 3ko 2/2006 Lege Organikoa, Unibertsitateaz kanpoko araubide orokorreko irakaskuntzak emateko baimenak ikastetxe pribatuei emateari buruzko apirilaren 3ko 332/1992 Errege Dekretua, Haur Hezkuntzako bigarren zikloa, Lehen Hezkuntza eta Bigarren Hezkuntza ematen duten ikastetxeen gutxieneko baldintzak ezartzen dituen otsailaren 12ko 132/2010 Errege Dekretua, eta azaroaren 16ko 215/2004 Dekretua, 0 eta 3 urte bitarteko umeentzako haur-eskolek bete beharreko gutxieneko baldintzak ezarri, eta abenduaren 17ko 297/2002 Dekretuaren artikulu batzuk indarrean iraunarazten dituena. Azken Dekretu horrek Euskal Autonomia Erkidegoko zero urtetik hiru urtera bitarteko umeen haur-eskolak arautu zituen 2002-2003 eta 2003-2004 ikasturteetan. Gainera, gai horretan aplikatzekoak diren indarreko gainerako legeak ere aztertu dira, eta, horren ondorioz, honako hau
EBAZTEN DUT:
Lehenengoa.– Baimena ematea Donostiako «Elaienea» Haur Hezkuntzako, Lehen Hezkuntzako eta Bigarren Hezkuntzako ikastetxe pribatuan integratzeagatik ondoren zehazten den ikastetxe pribatuaren baimena iraungitzeko:
Kode-zenbakia: 012518 (EAE) eta 20004757 (unibertsala).
Izen generikoa: Bigarren Hezkuntzako ikastetxe pribatua.
Izen espezifikoa: «Manuel de Larramendi».
Titularra: «ELIKEL Fundazioa»
Helbidea: Heriz 82.
Udalerria: Donostia.
Lurralde Historikoa: Gipuzkoa.
Bigarrena.– «Manuel de Larramendi» Bigarren Hezkuntzako ikastetxe pribatuaren jarduera behin betiko eteteak 2025eko irailaren 1etik aurrera izango ditu ondorioak, eta baja emango zaio Euskal Autonomia Erkidegoko unibertsitateaz kanpoko ikastetxeen erregistroan duen inskripzioari.
Hirugarrena.– Aipatutako integrazioaren ondorioz, Donostiako (Gipuzkoa) «ElaiEnea» Haur Hezkuntzako, Lehen Hezkuntzako eta Bigarren Hezkuntzako ikastetxe pribatuaren baimena aldatzea. 2025eko irailaren 1etik aurrera, ikastetxe hori Hezkuntza Saileko unibertsitateaz kanpoko ikastetxeen erregistroan inskribatuta geratuko da, erregistro-datu hauekin:
Kode-zenbakia: 012547 (EAE) eta 20004149 (unibertsala).
Izen generikoa: Haur Hezkuntzako, Lehen Hezkuntzako eta Bigarren Hezkuntzako ikastetxe pribatua.
Izen espezifikoa: «ElaiEnea».
Titularra: Escuela Teresiana Fundazioa.
Helbidea: Manuel Lardizabal 25 (egoitza nagusia) eta Heriz 82.
Udalerria: Donostia.
Lurralde Historikoa: Gipuzkoa.
Ondoriozko osaera:
– Haur Hezkuntza, lehen zikloa: 4 unitate:
• 0-1 urteko haurrentzako unitate 1, 8 ikaspostutarako edukierarekin.
• 1-2 urteko haurrentzako unitate 2, bakoitza 13 ikaspostutarako edukierarekin.
• 2-3 urteko haurrentzako unitate 1, 18 ikaspostutarako edukierarekin.
– Haur Hezkuntza, bigarren zikloa: 5 unitate, bakoitza 25 ikaspostutarako edukierarekin.
– Lehen Hezkuntza: 13 unitate, bakoitza 25 ikaspostutarako edukierarekin.
– Derrigorrezko Bigarren Hezkuntza: 16 unitate, bakoitza 30 ikaspostutarako edukierarekin.
– Batxilergoa: 8 unitate, bakoitza 35 ikaspostutarako, eta modalitate hauek:
• Zientziak eta Teknologia;
• Giza eta Gizarte Zientziak;
• Orokorra.
Laugarrena.– Hezkuntzarako Eskubidea arautzen duen uztailaren 3ko 8/1985 Lege Organikoaren hamahirugarren artikuluan ezarritakoaren arabera, ikastetxeak ezingo du erabili erregistroko inskripzioan agertzen den izena ez den beste izenik.
Halaber, Estatuz kanpoko ikastetxeen izenak eta publizitatea arautzen dituen otsailaren 13ko 401/1979 Errege Dekretuaren 10. artikuluan xedatutakoa bete beharko du ikastetxeen publizitateak.
Bosgarrena.– Emandako baimena indarrean dagoen bitartean, agindu honetan zehaztutako ikastetxeen erakunde titular bakoitzak indarrean dagoen araudia bete beharko du eskola-postuen kopuruari, ekipamenduari, irakasleen titulazio akademikoari, hizkuntza-eskakizunari eta aplika daitekeen indarreko gainerako legeriari dagokienez, bai eta baimena berrikusteko eskatu ere, bere legezko ordezkariaren bitartez, ikastetxeko erregistro-datuetako edozein aldatu behar denean. Hala egiten ez bada, emandako baimena indarrik gabe utzi ahalko da.
Era berean, martxoaren 17ko 314/2006 Errege Dekretuak onartutako Eraikuntzaren Kode Teknikoa bete beharko da, bai eta indarrean dagoen legeriak ezartzen dituen higiene-, osasun-, akustika-, bizigarritasun-, segurtasun- eta irisgarritasun-baldintzak ere. Baldintza horiek ez betetzearen erantzukizuna erakunde titularrari dagokio.
AZKEN XEDAPENETAKO LEHENENGOA
Agindu honetan jasotako baimena emateak ez du esan nahi, inola ere, hezkuntza-itunen araubidearen edo dirulaguntzen deialdien bidez laguntzak lortuko direnik.
AZKEN XEDAPENETAKO BIGARRENA
Agindu honen kontra aukerako berraztertzeko errekurtsoa aurkez dakioke Hezkuntzako sailburuari, hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera; bestela, administrazioarekiko auzi-errekurtsoa aurkez daiteke Euskal Autonomia Erkidegoko Auzitegi Nagusian, bi hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera.
Vitoria-Gasteiz, 2025eko maiatzaren 16a.
Hezkuntzako sailburua,
MARÍA BEGOÑA PEDROSA LOBATO.