Euskal Herriko Agintaritzaren Aldizkaria

97. zk., 2025eko maiatzaren 26a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

HERRI KONTUEN EUSKAL EPAITEGIA

2244

ERABAKIA, Herri Kontuen Euskal Epaitegiaren Osoko Bilkurak 2025eko apirilaren 10eko bilkuran hartua, Herri Kontuen Euskal Epaitegiaren barneko informazio sistema onesten duena.

Herri Kontuen Euskal Epaitegiaren Osoko Bilkurak 2025eko apirilaren 10ean egindako bilkuran

ERABAKI DU:

Herri Kontuen Euskal Epaitegiaren barneko informazio sistema onestea; araua erabaki honen eranskin modura jaso da.

39/2015 Legearen 45. eta 131. artikuluak aurreikusitakoa betez, arauaren ondorioak dagozkion aldizkari ofizialetan argitaratzeko xedatzea.

Vitoria-Gasteiz, 2025eko apirilaren 10a.

HKEEko lehendakaria,

ANA HELGUERA LÍBANO.

HKEEko idazkari nagusia,

JULIO ARTETXE BARKIN.

ERANSKINA

HERRI KONTUEN EUSKAL EPAITEGIAREN BARNEKO INFORMAZIO SISTEMA ARAUTZEA BISHKEE

Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko otsailaren 20ko 2/2023 Legeak Europako Parlamentuaren eta Kontseiluaren 2019ko urriaren 23ko 2019/1937 (EB) Zuzentarauaren transposizioa egiten du, Batasunaren Zuzenbidearen arau-hausteei buruzko informazioa ematen duten pertsonen babesari buruzkoa.

Urriaren 30eko 1101/2024 Errege Dekretuak informatzailea babesteko agintaritza independentearen estatutua sortzen eta onartzen du, 2/2023 Legean aurreikusia dagoena.

Lege horretan aurreikusitako neurrietako bat da administrazio publikoek barneko informazio-sistema bat sortzeko duten obligazioa, lehentasunezko bide izango dena bere artikuluan jasotako ekintzen edo ez-egiteen berri emateko.

2/2023 Legeak, 13. artikuluan, betebehar hori hedatzen du konstituzio-organoetara, garrantzi konstituzionala dutenetara eta aurrekoen antzekoak diren erakunde autonomikoetara, eta horien artean dago, besteak beste, Herri Kontuen Euskal Epaitegia.

Arau honen bidez obligazio hori bete nahi da, Herri Kontuen Euskal Epaitegiaren informaziorako barne-sistema sortuta eta berariazko informazio-kanalaren bidez jasotzen diren informazioak izapidetzeko prozedura araututa.

HKEEren web-orrian, Barneko Informazio Sistemaren informazioa ematen da, kontsulten eta iradokizunen postontzitik bereizitako atal independente batean.

Erabaki honen bidez sortu eta arautzen den sistemak informatzailearen konfidentzialtasuna bermatzen du, eta baimenik ez duten langileei salaketarako sarbidea galarazten die, eta, era horretan, komunikazioek eragindako pertsonen eskubideak ere bermatzen dira.

Azkenik, Barneko Informazio Sisteman sartzen dira informatzaileak babesteko eta laguntzeko neurriak eta eragindako pertsonak babestekoak, otsailaren 20ko 2/2023 Legearen VII. tituluan xedatutakoaren arabera aplikatuko direnak.

Aurrekoa ikusita, Langileen Batzordeari kontsulta egin ondoren, eta Osoko Bilkurari aitortzen zaizkion eskumenak baliatuz, otsailaren 5eko 1/88 Legearen 21.4 artikuluak eta Erregelamenduaren 5.5 artikuluak Barneko Informazio Sistema sortzea onartzen dute, zeina honako arau hauek arautzen baitute:

1. artikulua.– Xedea.

Erabaki honen helburua Herri Kontuen Euskal Epaitegiaren Barneko Informazio Sistema (aurrerantzean, BISHKEE) sortzea eta arautzea da, Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko otsailaren 20ko 2/2023 Legean ezarritako ondorioetarako (aurrerantzean, IBL).

2. artikulua.– Barneko informazio-sistema. Xede-eremua.

1.– BISHKEE lehentasunezko komunikazio-tresna da Europar Batasuneko Zuzenbidea urratzea eragin dezaketen ekintza edo ez-egiteei buruz edo arau-hauste penal edo administratibo larri edo oso larria izan daitezkeen egite edo ez-egiteei buruz informatzeko, betiere Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko Legearen 2. artikuluan aipatzen diren aurreikuspenak betetzen badira, eta informazioak Herri Kontuen Euskal Epaitegiaren jarduerarekin eta funtzionamenduarekin zerikusia badu.

2.– Zehazki, honako gertakari hauek jakinarazten direnean aplikatuko da araudi hau:

a) Europar Batasuneko Zuzenbidea urratzea eragin dezakeen edozein ekintza edo ez-egite, baldin eta:

1) Europako Parlamentuaren eta Kontseiluaren 2019ko urriaren 23ko 2019/1937 (EB) Zuzentarauaren (Europar Batasunaren Zuzenbidearen arau-hausteei buruzko informazioa ematen duten pertsonak babesteari buruzkoa) eranskinean zerrendatutako Europar Batasunaren egintzen aplikazio-eremuaren barruan sartzen badira, barne-ordenamendu juridikoak arau-hauste horiei buruz egiten duen kalifikazioa gorabehera.

2) Europar Batasunaren finantza-interesei eragiten badiete, Europar Batasunaren Funtzionamenduari buruzko Tratatuaren (EBFT) 325. artikuluan jasotzen den moduan.

3) Barne-merkatuan eragina badute, EBFTaren 26. artikuluko 2. paragrafoan jasotako moduan, Europar Batasunak lehiaren arloan emandako arauak eta estatuek emandako laguntzak urratzea barne, bai eta barne-merkatuari buruzko arau-hausteak ere, sozietateen gaineko zergaren arauak hausten dituzten egintzei edo sozietateen gaineko zergari aplikatu beharreko legeriaren xedea edo xedea indargabetzen duen zerga-abantaila lortzeko jardunbideei dagokienez.

b) Arau-hauste penal edo administratibo larria edo oso larria izan daitezkeen ekintzak edo ez-egiteak. Nolanahi ere, Ogasunari eta Gizarte Segurantzari kalte ekonomikoa dakarkioten arau-hauste penal edo administratibo larri edo oso larri guztiak sartzen direla ulertuko da.

3.– Araudi honetan aurreikusitako babesetik espresuki kanpo geratzen dira honako eduki mota hauei buruzko informazioa ematen duten pertsonak:

a) Barneko informazio-kanalen baten bidez edo Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko Legearen 18.2.a) artikuluan aurreikusitako arrazoiren baten ondorioz onartu ez diren komunikazioetan jasotako informazioak.

b) Pertsonen arteko gatazkei buruzko erreklamazioekin lotutako informazioak, edo informatzaileari eta komunikazioaren edo jakinarazpenaren xede diren pertsonei soilik eragiten dietenak.

c) Jendearentzat erabat eskuragarri dauden informazioak edo zurrumurru hutsak direnak.

d) Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko Legearen 2. artikuluan jasota ez dauden ekintzei edo ez-egiteei buruzko informazioak.

4.– Barneko informazio-sistema Herri Kontuen Euskal Epaitegiaren administrazio elektronikoko plataforman integratuko da, egoitza elektronikoan, «salaketa-kanala» izenarekin, eta bertan erregistratu eta kudeatuko da jasotako informazio guztia.

5.– Otsailaren 20ko 2/2023 Legearen 26. artikuluan ezarritakoaren arabera, Erregistroa ez da publikoa izango, eta agintaritza judizialak soilik eskuratu ahal izango du, eskaera arrazoituaren bidez eta prozedura judizial baten esparruan.

3. artikulua.– Aplikazio-eremu subjektiboa.

Araudi hau aplikatuko zaie HKEEko langile diren informatzaileei eta HKEEren jarduerarekin eta funtzionamenduarekin lan- edo lanbide-testuinguru batean zerikusia duten edo izan duten Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko Legearen 3. artikuluan aipatutako kasuren batean dauden pertsonei.

4. artikulua.– Printzipio orokorrak.

1.– BISHKEEk Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko Legeak ezarritako baldintzak eta bermeak beteko ditu, eta, bereziki, printzipio hauek:

a) Barne Informazio Sistema erabiltzean segurtasuna, konfidentzialtasuna eta, hala badagokio, anonimotasuna.

b) Kalterik izango ez duelako bermea eta informatzaileen aurkako errepresaliak berariaz debekatzea.

c) Egiaztapen-jarduketek errugabetasun-presuntzioa eta ohorerako eskubidea errespetatzea bermatuko dute igorritako informazioen eraginpeko pertsonei dagokienez.

d) Datu pertsonalak babesteko eskubidea errespetatzea.

e) Barneko Informazio Sistemaren arduradunek autonomoak eta burujabeak izatea beren eginkizunak betetzean, eta beren eginkizunaren ondorioz ezagutzen duten informazio oro isilpean gordetzeko obligazioa.

2.– BISHKEEk bere sorreraren eta funtzionamenduaren oinarri diren printzipioei buruz informatuko du, eta publikotasuna emango die, eta, bereziki, informatzaileen defentsari buruzko aurreikuspenei dagokienez, horretarako prestakuntza- eta dibulgazio-jarduerak antolatuta.

5. artikulua.– Barneko Informazio Sistemaren kudeaketa eta arduraduna.

1.– BISHKEEren ardura Herri Kontuen Euskal Epaitegiko Barneko Informazio Sistemaren Organo Arduraduna (aurrerantzean, BISOA) izeneko kide anitzeko organo bati dagokio, IBLren 8. artikuluan aurreikusitako baldintzekin.

HKEEko BISOA honako hauek osatuko dute: HKEEko idazkari nagusiak eta Osoko Bilkurak proposaturiko bi funtzionariok, zeinak Osoko Bilkuraren erabakiaren bidez izendatuko baitira.

2.– BISOAk eginkizunak betetzeko independentzia funtzionala izango du, eta ezin izango du inolako jarraibiderik jaso. HKEEko Idazkaritza Nagusiak BISOAri bere eginkizuna behar bezala betetzeko behar duen euskarri pertsonala eta materiala emango dio, eta informazio-sistemaren kudeaketaz arduratuko da, betiere IBLn aurreikusitako bermeak betetzen direla ziurtatuz.

3.– BISOAk funtzionamendurako barne-arauak ezarriko ditu, eta, osagarri gisa, Sektore Publikoaren Araubide Juridikoaren urriaren 1eko 40/2015 Legean xedatutakoa aplikatuko da.

6. artikulua.– Informazio- eta irisgarritasun-kanala.

1.– BISHKEEk informazio-kanal bat izan beharko du, eta Herri Kontuen Euskal Epaitegiaren erakundeko webgunearen hasierako orritik eskuragarri egongo da, 3. artikuluan aipagai diren pertsonei informazioa ematea bideratzeko. Informazio bat gaitutako kanaletik jasotzen denean, BISOAk bakarrik izango du informazio hori eskuratzeko aukera.

2.– Komunikazioak idatziz zein ahoz aurkeztu ahal izango dira barne-kanal honetan BISOAren aurrean, dela aurrez aurre, dela horretarako gaitutako edozein bitarteko elektronikoren bidez edo telefonoz, dela ahots-mezularitzaren bidez.

3.– Ahozko komunikazioak dokumentatu egin beharko dira, informatzailearen aldez aurreko baimenarekin, elkarrizketa grabatuta edo transkripzio oso eta zehatzaren bidez, eta informatzaileak behar bezala egiaztatu eta onartu beharko du. Ahozko komunikazioa aurrez aurre egin beharko da BISOAren aurrean, elkarrizketa eskatzen denetik zenbatzen hasita gehienez ere zazpi eguneko epean.

4.– Era berean, informazio-kanalak komunikazio anonimoak aurkezteko eta ondoren izapidetzeko aukera emango du.

5.– Postontzi elektronikoaren bidez informazio bat jasotzen denean, kanal horrek abisua emango dio BISOAri.

6.– Informazio hori posta arruntez jasotzen denean, berehala bidaliko zaio sistemaren kudeaketaz arduratzen den organoari, ireki gabe eta erregistratu gabe. Komunikazioa 5.1.b) artikuluan adierazitako moduan bidali ez delako irekitzen bada, baina edukia xedapen honetan adierazitako eremu materialari dagokiona dela antzematen bada, BISOAra bidaliko da berehala, erregistratu gabe.

7.– Oro har, komunikazioa ezarrita ez dauden salaketa-kanalen bidez edo haren tratamenduaren erantzule ez diren HKEEko langileei bidaliz gero, konfidentzialtasuna bermatu beharko da beti. Langileei dagokion prestakuntza eman beharko zaie arlo horretan, eta konfidentzialtasun-bermea urratzea arau-hauste oso larritzat tipifikatuta dagoela jakinaraziko zaie. Era berean, jakinarazpena jasotzen duenak berehala BISOAra bidaltzeko betebeharra du.

7. artikulua.– Erregistroa.

Jasotako informazioen eta horiek eragin dituzten egiaztapen-lanen erregistro-liburu elektroniko bat sortuko da, eta, betiere, segurtasun-, konfidentzialtasun- eta sarbide mugatuko baldintzak bermatuko dira, hori guztia IBLren 26. artikuluari jarraikiz.

8. artikulua.– Informatzaileen eskubideak eta bermeak.

1.– Informatzaileek honako eskubide hauek izango dituzte beren jardueretan:

a) Informazioa modu anonimoan edo kanalaren bidez identifikatuta aurkezteko eskubidea, betiere nortasuna isilean gordea dagoela bermatuta, zeina ez baitzaie hirugarrenei jakinaraziko.

b) Informazioa ahoz edo idatziz emateko eskubidea.

c) Komunikazioak jasotzeko helbide bat, posta elektroniko bat edo leku seguru bat adierazteko eskubidea, edo, hala badagokio, komunikazio horiek jasotzeari uko egitekoa.

d) BISOAren aurrean agertzeko eskubidea, bere ekimenez eta, nahi izanez gero, abokatu batek lagunduta.

e) Datu pertsonalak babesteko legeriak ematen dizkion eskumenak baliatzeko eskubidea.

f) emandako informazioaren tramitazioaren egoera eta egiaztapen-lanen emaitzak ezagutzeko eskubidea.

2.– Informatzaileek ezin izango dute inolako errepresaliarik jasan, ezta ere ikerketak ondorioztatzen badu IBLren aplikazio-eremuan ez dela inolako egitate, ekintza edo omisiorik gertatu.

9. artikulua.– Eragindako pertsonen eskubideak eta bermeak.

Igorritako informazioaren eraginpeko pertsonek honako eskubide hauek izango dituzte:

a) Errugabetasun-presuntziorako eskubidea eta haren zintzotasuna babestekoa.

b) Egozten zaizkien ekintzei edo ez-egiteei buruzko informazioa jasotzeko eta edozein unetan entzunak izateko eskubidea, betiere informatzailea identifikatzen lagun dezaketen elementuak ezkutatu direla bermatuta.

c) Egiaztapen-prozesuan behar den informazioa jasotzeko eskubidea, defentsa-eskubidea erabili ahal izateko eta egokitzat jotzen duten guztia alegatzeko.

d) Espedienterako sarbidea izateko eskubidea, betiere informatzailea identifikatzen lagun dezaketen elementuak ezkutatu direla bermatuta.

e) Aurkeztutako informazioan jasotako gertakarien ikerketa objektiboa, zorrotza eta harekin bat datorrena egiteko eskubidea.

f) Beren eskubideak eta interesak defendatzeko egokitzat jotzen dituzten informazioa eta dokumentazioa aurkezteko eta frogabideak proposatzeko eskubidea.

g) Prozeduraren fase guztietan abokatu baten laguntza izateko eskubidea, hala eskatzen badute.

10. artikulua.– Konfidentzialtasun-bermea.

1.– BISOAk dagokion isiltasuna gorde beharko du araudi honetan xedatutakoaren ondorioz izan dezkakeen zeinahi informaziori dagokionez, eta ezin izango du erabili ordenamendu juridikoan berariaz ezarritakoez bestelako helburuetarako.

2.– BISOAk informatzailearen identitatearen konfidentzialtasuna gorde beharko du, eta ez die hirugarren pertsonei jakinaraziko, nola eta ez duen informatzaileak berariaz horretarako baimenik ematen. Egiten diren komunikazio, egiaztapen-jarduketa edo dokumentazio-eskaera guztietan, ez da informatzailearen identitateari buruzko daturik jasoko, ez eta guztiz edo partzialki identifikarazi dezakeen beste edozein datu ere.

3.– BISOAk eraginpeko pertsonen konfidentzialtasuna gorde beharko du, eta komunikazioetan identitatea ezkutatuko da, aurreko 2. atalean adierazitako moduan. Eskubide hori, halaber, igorritako informazioan aipatutako hirugarren pertsonei ere zabaldu ahal izango zaie, hala badagokio.

4.– Aurreko ataletan ezarritakoa gorabehera, legeek hala ezartzen dutenean, zigor-, administrazio- edo diziplina-ikerketa baten esparruan, informatzaileen identitatea jakinarazi beharko zaie, bai eta eraginpeko pertsonena ere, agintaritza judizialari, Fiskaltzari edo administrazio-agintaritza eskudunari.

11. artikulua.– Errepresaliak debekatzea.

1.– Berariaz debekatzen da errepresalia-egintza oro, errepresalia-mehatxuak eta errepresalia-saiakerak barne, araudi honetan aurreikusitakoaren araberako informazioa aurkezten duten pertsonen aurka.

2.– Errepresaliatzat joko dira IBLren 36. artikuluan eta horrekin bat datozenetan jasotako egintzak edo ez-egiteak.

12. artikulua.– Informazioa bidaltzea eta jasotzea.

1.– Araudi honen aplikazio-eremuko ekintzei edo ez-egiteei buruzko informazioa bidaltzeak ikerketa-prozedura hastea dakar.

2.– Informazioa arau honen 6. artikuluan jasotako zeinahi bitartekoren bidez jasoko da.

3.– Informazioak gertakarien deskribapen zehatz eta xehatua jasoko du, eta, ahal denean, honako hauek identifikatuko ditu: egitateetan parte hartu duen edo duten pertsonak, horren berri izan dezaketen gainerako pertsonak, IBLren aplikazio-eremu materialaren barruko egitateak edo jokabideak, Herri Kontuen Euskal Epaitegiaren jarduerarekin eta funtzionamenduarekin zerikusia dutenak, eta egitateak gertatu ziren data zehatza edo gutxi gorabeherakoa. Informatzaileak dokumentazioa aurkez dezake, edo egitateak egiaztatzea errazten duten gainerako froga-elementuak jakinarazi.

4.– Behin informazioa bidali edo, hala badagokio, aurrez aurreko bilera eginez gero, BISHKEEn erregistratuko da, dagokion espedientea irekiko da, identifikazio- eta jarraipen-kode bat esleituko zaio, eta jaso izanaren berri emango da jaso eta hurrengo zazpi egun naturalen barruan, nola eta informatzaileak ez dion berariaz uko egin BISHKEEren komunikazioak jasotzeari.

13. artikulua.– Informazioa izapidetzeko onartzea.

1.– BISOAk egiaztatuko du bidalitako informazioa Herri Kontuen Euskal Epaitegiaren jarduerarekin eta funtzionamenduarekin zerikusia duten eta IBLren aplikazio-eremu materialean jasota dauden egitateei, ekintzei edo ez-egiteei buruzkoa den. Izapide hori informazioa jaso eta gehienez ere hamar egun balioduneko epean egin beharko da, eta informazioa onartzea ala ez onartzea ekarriko du.

2.– Honako hauek izango dira ez onartzeko arrazoiak:

a) Kontatutako egitateek edo jokabideek argi eta garbi sinesgarritasunik edo oinarririk ez izatea.

b) Kontatutako egitateak edo jokabideak ez sartzea IBLren eta erregulazio honen aplikazio-eremu materialean.

c) Kontatutako egitateek edo jokabideek ez izatea zerikusirik Herri Kontuen Euskal Epaitegiaren jarduerarekin eta funtzionamenduarekin; kasu horretan, informazioa izapidetzeko eskumena duen organo, agintaritza edo entitateari bidaliko zaio, informazioaren konfidentzialtasuna bermatzeko behar diren neurriak hartuta eta informatzaileari horren berri emanda.

d) Kontatutako egitateek edo jokabideek amaitutako prozedurei buruzko informazio berri eta esanguratsurik ez izatea, salbu eta prozedura berri bat justifikatzen duten egitatezko edo zuzenbideko inguruabar berriak ikusten badira.

e) Kontatutako egitate edo jokabideei buruzko informazioa delitu baten bidez eskuratu izana. Kasu horretan, ez onartzeaz gain, jasotako informazioa Fiskaltzari igorriko zaio.

3.– Informatzaileari jakinaraziko zaio izapidetzeko onartu den ala ez, erabakia hartu eta hurrengo bost egun baliodunen barruan, salbu eta berariaz uko egin badio BISHKEEren komunikazioak jasotzeari.

4.– Kontatutako egitateak, zantzuen arabera, ez-zilegi penala izan badaitezke, BISOAk berehala helaraziko dio informazioa Fiskaltzari.

14. artikulua.– Interes-gatazken prebentzioa.

Aipatutako egiteak edo ez-egiteak BISOAren arduradunen bati buruzkoak badira, horrek berehala utzi beharko du prozedura, eta eraginpeko pertsona izaera hartuko du prozedura honen ondorioetarako.

15. artikulua.– Egiaztapen-fasea.

1.– Egitateak egiaztatzea BISOAren eskumena da. Fase horretarako, dagokion gaian adituak diren HKEEko langileen laguntza izan dezake eta, hala badagokio, baita kanpoko adituen laguntza ere, eta horiek araudi honetan jasotzen den konfidentzialtasun-betebeharraren mende geratuko dira.

2.– Egiaztapen-fasean, informazioan azaldutako egitateak eta jokabideak egiaztatzeko jarduketa guztiak sartzen dira, 2. artikuluak aipagai duen kasuren bat edo batzuk gertatzen diren zehazteko.

3.– Ikerketa-lanak osatzeko, BISOAk egokitzat jotzen duen dokumentazio edo informazio gehigarria eskatu ahal izango die informatzaileari eta informazio hori eskura duten pertsona eta organoei.

4.– Anonimotasuna eskatu ez duen informatzailea eta, hala badagokio, gertaeren berri izan dezaketen beste pertsona batzuk elkarrizketa bat izatera gonbidatu ahal izango ditu BISOAk, elkarrizketa hori ikerketa-lanetarako baliagarria izan daitekeela uste badu.

5.– Eraginpeko pertsonei ikerketa-fasearen hasieraren berri emango zaie, 9. artikuluan aitortutako eskubideak baliatu ahal izan ditzaten. Jakinarazpenean gertakarien zerrenda labur bat jaso beharko da. Datu pertsonalen tratamenduaren bermeen berri ere eman beharko zaie.

6.– 9. artikuluan aitortutako eskubideei kalterik egin gabe, eta ahal den guztietan, eraginpeko pertsonari deituko zaio BISOArekin elkarrizketa bat izateko. Elkarrizketa horretan, errugabetasun-presuntzioa erabat errespetatuz, egitateen bertsioa azaldu eta egokitzat jotzen dituen frogabideak aurkeztu ahal izango ditu.

7.– Kontatutako egitateak dagozkion pertsonari ez zaio inola ere jakinaraziko informatzailea nor den.

16. artikulua.– Prozedura amaitzea eta jarduteko erabakia hartzea.

1.– Egiaztapen-lanak amaitutakoan, BISOAk txosten bat egingo du, eta, bertan, ikertutako egitateak edo jokabideak azaltzeaz gain, egindako egiaztapen-lanak, balorazioa eta 2. artikuluan ezarritako ondorioetarako eskuratutako ondorioak azaltzeaz gain, honako erabaki hauetakoren bat hartuko du:

a) Espedientea artxibatzea, baldin eta jarraitutako prozeduratik ezin bada ondorioztatu IBLren aplikazio-eremu materialaren barruan jasotako egitateak edo jokabideak gertatu direla, edo Herri Kontuen Euskal Epaitegiaren jarduerarekin eta funtzionamenduarekin zerikusirik ez dutenak, edo prozedura honetan ez onartzeko aurreikusitako kausaren bat badago.

b) Informazioa eta azken txostena bidaltzea IBLren aplikazio-eremu materialaren barruan egitateak edo jokabideak jazartzeko eskumena duen organoari.

c) Berehala bidaltzea Fiskaltzari, baldin eta egitateak, zantzuen arabera, delitu izan badaitezke eta prozeduraren aurreko faseetan detektatu eta igorri ezin izan badira; hala badagokio, eraginpeko pertsonari aldez aurretik entzunaldia ematea baloratuko da. Egitateek Europar Batasunaren finantza-interesei eragiten badiete, informazioa Europako Fiskaltzari igorriko zaio.

2.– BISOAren iritziz, egindako jarduketen ondorioz Herri Kontuen Euskal Epaitegiko enplegatu publiko baten aurkako zehapen- edo diziplina-neurriak hartu behar badira, txostena HKEEko organo eskudunari igorriko zaio, baloratu dezan eta, ahal bada, dagokion zehapen-prozedura has dezan, behar den konfidentzialtasuna bermatuz.

3.– Azken txostenean hartutako erabakia, hala badagokio, informatzaileari eta eragindako pertsonari edo pertsonei jakinaraziko zaie.

4.– Artikulu honetako 1. paragrafoko b) eta c) apartatuan eta 2. paragarfoan aurreikusitako kasuetan, Herri Kontuen Euskal Epaitegiaren Osoko Bilkurari jakinaraziko zaio, HKEEren organo gorena baita, betiere 10. artikuluan aurreikusitako konfidentzialtasun-betebeharra gordeta.

17. artikulua.– Ebazteko gehieneko epea.

Ikerketa-jarduketei erantzuteko gehieneko epea hiru hilabetekoa izango da, jakinarazpena barneko informazio-kanalaren bidez jasotzen denetik zenbatzen hasita.

Hala ere, eta epea luzatzea eskatzen duten konplexutasun bereziko kasuetan, epea beste hiru hilabetez luzatu ahal izango da gehienez, BISOAk arrazoituta eta informatzaileari jakinarazita.

18. artikulua.– Errekurtsoak.

BISOAren erabakien aurka ezin izango da errekurtsorik jarri ez administrazio-bidean, ez administrazioarekiko auzibidean. Hala ere, administrazio-errekurtsoa edo administrazioarekiko auzi-errekurtsoa jarri ahal izango da azaldutako egitateak direla-eta has daitekeen zehapen-prozedura amaitzen duen ebazpenaren aurka.

19. artikulua.– Datu pertsonalen tratamendua.

Barneko informazio-kanalaren bidez jasotako informazioak izapidetzeko prozedurak datu pertsonalen babesari buruzko xedapenak errespetatu beharko ditu, IBLren VI. tituluan eta aplikatu beharreko gainerako araudian aurreikusitakoaren arabera.

Datu pertsonalak HKEEk tratatuko ditu, eta «Informatzailearen informazio eta defentsarako barne-sistema» izeneko tratamendu-jardueran sartuko dira.

a) Ez da datu pertsonalik jasoko, baldin eta datu horien egokitasuna agerikoa ez bada informazio espezifiko bat tratatzeko, edo, istripuz jasotzen badira, berehala ezabatuko dira.

b) Barne-komunikazioko kasuetan, datu pertsonalen tratamendua zilegitzat joko da Europako Herri Kontuen Euskal Epaitegiaren eta Kontseiluaren 2016ko apirilaren 27ko 2016/679 (EB) Erregelamenduaren 6.1.c) artikuluan, Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoaren 8. artikuluan eta Arau-hauste penalak prebenitzeko, detektatzeko, ikertzeko eta epaitzeko eta zehapen penalak betearazteko tratatzen diren datu pertsonalak babesteari buruzko maiatzaren 26ko 7/2021 Lege Organikoaren 11. artikuluan xedatutakoaren arabera.

c) Komunikazioan jasotako egitateak aipagai dituen pertsonak aurka egiteko eskubidea baliatzen badu, uste izango da, bestelakorik frogatu ezean, arrazoi legitimo larriak daudela datu pertsonalen tratamendua legitimatzeko.

d) BISHKEEn jasotako datu pertsonaletarako irispidea, beren eskumenen eta eginkizunen esparruan, honako hauetara mugatuko da:

1.– BISHKEEko arduradunak.

2.– Herri Kontuen Euskal Epaitegiak izendatzen dituen tratamenduaren arduradunak.

3.– Herri Kontuen Euskal Epaitegiko datuak babesteko ordezkaria.

a) Zilegi izango da beste pertsona batzuek datuak tratatzea, baita hirugarrenei jakinaraztea ere, Herri Kontuen Euskal Epaitegian neurri zuzentzaileak hartzeko edo, hala badagokio, bidezko diren zehapen- edo zigor-prozedurak izapidetzeko beharrezkoa denean. Kasu horretan, BISOAk aholkularitza eskatuko dio Herri Kontuen Euskal Epaitegiko datuak babesteko ordezkariari.

b) Jasotako informazioa izapidetzean eskuratutako datuak kontserbatzeari eta ezabatzeari dagokionez, IBLren 35. artikuluan eta horrekin bat datozenetan eta HKEEren Tratamenduko Jardueren Erregistroan (TJE) ezarritakoa beteko da.

LEHENENGO XEDAPEN GEHIGARRIA.– Osagarritasun-araubidea.

Araudi honetan aurreikusi ez den guztian, Arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko otsailaren 20ko 2/2023 Legean edo etorkizunean hura ordeztuko duen arauan xedatutakoa aplikatuko da.

BIGARREN XEDAPEN GEHIGARRIA.– BISHKEEren urteko txostena.

BISOAk erregulazio honen jarraipenari buruzko urteko txosten-memoria egingo du, eta Herri Kontuen Euskal Epaitegiaren Osoko Bilkurari helaraziko dio.

Urteko memoria-txostenak BISHKEEren funtzionamenduarekin eta hura arautzen duen araudiarekin lotutako hobekuntza- eta eguneratze-proposamenak jaso ahal izango ditu.

HIRUGARREN XEDAPEN GEHIGARRIA.– Prestakuntza eta zabalkundea.

Informazioaren edo komunikazioaren kultura interes publikoaren aurkako mehatxuak prebenitzeko eta detektatzeko mekanismo gisa sustatzeko, Herri Kontuen Euskal Epaitegiak aldian behin prestakuntza-ekintzak programatuko ditu bere langileentzat IBLaren xede diren gaietan.

LAUGARREN XEDAPEN GEHIGARRIA.– BISOAren egitekoa ebaluatzea.

HKEEren Osoko Bilkurak, behin BISOAk erregulazio honen jarraipenari buruzko urteko memoria-txostena egin ondoren, BISOAren lana ebaluatuko du, eta, segun eta zenbatekoa den lan-karga, araudi honetan aurreikusitako eginkizunak baloratzeko beharrezkoak diren antolamendu-neurriak hartzea erabaki ahal izango du.

AZKEN XEDAPENETAKO LEHENENGOA.– Araudia garatzea.

HKEEko Lehendakaritzari ahalmena ematen zaio arau hau garatzeko beharrezkotzat jotzen dituen xedapen guztiak eman ditzan. Xedapen horien berri eman beharko dio Herri Kontuen Euskal Epaitegiaren Osoko Bilkurari, indarrean jarri aurretik.

AZKEN XEDAPENETAKO BIGARRENA.– Argitaratzea eta indarrean jartzea.

Arau hau EHAAn argitaratu eta hurrengo egunean jarriko da indarrean.

Azterketa dokumentala