Euskal Herriko Agintaritzaren Aldizkaria

84. zk., 2025eko maiatzaren 7a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

1916

EBAZPENA, 2025eko apirilaren 11koa, Deskarbonizazioko zuzendariarena, zeinaren bidez ukatzen baita Arraia-Maeztu, Iruraiz-Gauna eta Donemiliagako (Araba) udal-mugarteetan Aixeindar SA konpainiak sustatutako «Laminoria» parke eolikoa instalatzeko aurretiazko administrazio-baimena.

Espedientea: 01GEY 202200019 (Laminoria parke eolikoa).

AURREKARIAK

1.– 2022ko abenduaren 1ean, Aixeindar SA merkataritza-sozietateak aldez aurreko administrazio-baimena eta ingurumen-inpaktuaren adierazpena eskatu zituen «Laminoria berriztagarrien gunea» deritzona barne hartzen duten proiektu hauetarako:

– «Laminoria» parke eolikoa (espedientea: 01GEY 202200019). Parke eolikoaren aurreproiektua, 8 aerosorgailuz osatua, Arraia-Maeztu, Iruraiz-Gauna eta Donemiliagako udal-mugarteetan. Hor, halaber, 30 kV-ko lurpeko ebakuazio-azpiegitura sartzen da, SET San Millán azpiestazioraino doana eta «Laminoria» instalazio fotovoltaikoarekin partekatzen dena.

– «Laminoria» instalazio fotovoltaikoa (espedientea: 01GEY 202200020). 61.994 moduluk eta 3.437 kWn-eko 10 inbertitzailek osatutako instalazio fotovoltaikoaren egikaritze-proiektua, 34,37 MW-ko potentzia instalatuarekin, Arraia-Maeztuko udal-mugartean.

2.– Industria Administrazioko Arabako lurralde-ordezkariaren 2022ko abenduaren 19ko iragarkia argitaratu zen Arabako Lurralde Historikoaren Aldizkari Ofizialean (ALHAO) eta Euskal Herriko Agintaritzaren Aldizkarian (EHAA) 2022ko abenduaren 20an eta 2023ko urtarrilaren 3an, hurrenez hurren. Iragarki horrek jendaurrean jartzen du «Laminoria» parke eolikorako aldez aurreko administrazio-baimenaren eskaera, izan ditzakeen lehiakide posibleen ondorioetarako, betiere 115/2002 Dekretuaren 4. artikuluan aurreikusitakoarekin bat etorriz (maiatzaren 28ko 115/2002 Dekretua, Euskal Autonomia Erkidegoan parke eolikoetako energia eolikotik energia elektrikoa ekoizten duten instalazioei baimena emateko prozedura arautzen duena).

3.– 2023ko ekainaren 15ean, Industria Administrazioko Arabako lurralde-ordezkariaren ekainaren 6ko ebazpena argitaratu zen EHAAn, zeinak lehia-prozedura ebazten baitu Aixeindar SAk aurkeztutako proiektu eolikoa hautatuz, ez delako lehiatzeko beste sustatzailerik aurkeztu.

4.– 2023ko azaroaren 23an, Aixeindar SA sustatzaileak hiru hilabeteko luzapena eskatu zuen 115/2002 Dekretuaren 7. artikuluan ezarritako dokumentazioa aurkezteko, Laminoria parke eolikoaren ingurumen-azterketa estrategikoaren irismen-dokumentua oinarri hartuta. Dokumentu horrek beste azterketa batzuk egitea ezarri zuen, hasieran aurreikusitakoez gain. 2023ko abenduaren 4an, eskatutako luzapena onartu zen.

5.– 2024ko martxoaren 18an, Aixeindar SA sustatzaileak «Laminoria» parke eolikoaren, «Laminoria» instalazio fotovoltaikoaren eta baterako ingurumen-inpaktuaren azterketaren proiektuen 01 berrikuspena aurkeztu zuen, bai eta administrazio publikoentzako, organismoentzako eta zerbitzu-enpresentzako separatak ere.

6.– 2024ko apirilaren 22an eta 2024ko maiatzaren 6an, Industria Administrazioko Arabako lurralde-ordezkariaren 2024ko apirilaren 4ko Iragarkia argitaratu zen EHAAn eta ALHAOn, hurrenez hurren. Iragarki horren bidez, jendaurrean jarri ziren «Laminoria» parke eolikoaren eta «Laminoria» eguzki-instalazio fotovoltaikoaren proiektuen aurretiazko administrazio-baimenaren eta ingurumen-inpaktuaren adierazpenaren eskaerak.

7.– Aldi berean, kontsulta hauek egin ziren Laminoria Gune Berriztagarriaren ingurumen-inpaktuaren azterketan sartutako proiektuei buruz, bai eta, beharrezko kasuetan, dagokion afekzio-separatari buruz ere:

– Eusko Jaurlaritzako Larrialdiei Aurre Egiteko eta Meteorologiako Zuzendaritza.

– Eusko Jaurlaritzako Natura Ondare eta Klima Aldaketa Zuzendaritza.

– Eusko Jaurlaritzako Osasun Publikoaren eta Adikzioen Zuzendariordetza.

– Eusko Jaurlaritzako Kultura Ondarearen Zuzendaritza.

– Eusko Jaurlaritzako Nekazaritza eta Abeltzaintza Zuzendaritza.

– URA-Uraren Euskal Agentzia.

– Ebroko Konfederazio Hidrografikoa.

– Arabako Foru Aldundiko Natura Ingurunearen Zuzendaritza.

– Arabako Foru Aldundiko Kultura Zuzendaritza.

– Arabako Foru Aldundiko Errepideen Zerbitzua.

– Arabako Foru Aldundiko Nekazaritza Zuzendaritza.

– Arabako Foru Aldundiko Mendi Zerbitzua.

– Arraia-Maeztuko Udala.

– Iruraiz-Gaunako Udala.

– Donemiliagako Udala.

– Laminoriako Errege Haraneko Administrazio Batzarra.

– Azazetako Administrazio Batzarra.

– Uribarri-Jauregiko Administrazio Batzarra.

– Adanako Administrazio Batzarra.

– Jauregiko Administrazio Batzarra.

– Egiletako Administrazio Batzarra.

– Aziluko Administrazio Batzarra.

– Gereñuko Administrazio Batzarra.

– Arabako Mendiak Aske.

– Ekologistak Martxan.

– Natura Defendatzeko eta Ikertzeko Arabako Taldea (Gaden).

– Arabako Natur Institutua (IAN-ANI).

– SEO Birdlife.

– Eguzkizaleak SR.

– Itelazpi SA.

– Arabako Ehizako Lurralde Federazioa.

– Sibelco Minerales SA.

– I-DE Redes Eléctricas Inteligentes SAU.

– San Miguel de Mendierreko Ureztatzaileen Elkartea.

8.– Arabako Foru Aldundiko (AFA) Mendi Zerbitzuak, Iruraiz-Gaunako Udalak eta Arabako Mendiak Aske elkarteak txostenak egiteko epea luzatzeko eskatu zuten, eta kasu guztietan onartu zen.

9.– Jendaurreko informazioaren izapidean alegazioak aurkezteko ezarritako epearen barruan, honako alegazio hauek jaso ziren:

– Arraia-Maeztuko EH Bildu.

– Ángel Baquedano Iñiguez.

– Herediako Administrazio Batzarra.

– 2.000 partikularrek eduki berarekin aurkeztutako alegazioa.

Labur-labur, aurkeztutako alegazioak honako puntu hauetan oinarritzen dira:

– Sustatzaile berarena den Azazeta parke eolikoaren jarraitutasuna eta hurbiltasuna.

– Naturagune babestuetan ingurumen-eragina izatea: Natura 2000 Sarea, Batasunaren intereseko habitatak (BIH), babes bereziko eremuak (KBE), hegaztientzako babes bereziko eremuak (HBBE).

– Floraren eta faunaren gaineko eragina.

– Hesi-efektua eta korridore ekologikoen gaineko eragina.

– Inguruko akuiferoen kalteberatasuna.

– Udaleko hirigintza-araudira egokitzea.

– Proiektua eremu hondatuan garatzea.

– Instalazioetarako sarbideak eta trafiko astuna areagotzea.

– Paisaiaren, kulturaren eta gizartearen eremuan duen eragina.

– Eragindako eremuetan pertsonen bizitzan duen eragina.

– Inpaktu akustikoa eta argi-inpaktua.

– Mendiaren industrializazioa.

– Lurzoruaren gaineko inpaktua.

– Mugarri Planeko zentral eolikoak baztertze-eremuetan kokatzea.

– Azpiestazio berri bat eta 220 kV-eko goi-tentsioko linea bat eraikitzea.

– Ondare historiko eta arkeologikoaren gaineko inpaktua.

– Landa-eremua despopulatzea eta pobretzea.

– Proiektuan parte-hartze publikoa izatea.

– Ez egotea egungo Elgea-Urkilla eta proiektatutako Azazeta-Laminoria zentral eolikoen azterketa metatzaile eta sinergikorik.

– Energia berriztagarrien «burbuilaren» ondorioak.

– Musituko simaurtegiarekiko hurbiltasuna.

– Gizarte-adostasunik ez izatea.

– Energia Berriztagarrien Lurralde Plana ez onartzea.

– Ebakuaziorako aireko lineak Herediako kontzejuan izango duen eragina, trazadura alternatiboa diseinatzeko edo trazadura lurperatzeko proposamena.

Alegazioak sustatzaileari bidali zitzaizkion, aintzat har zitzan eta erantzun ziezaien.

10.– Kontsulten izapidean, honako administrazio publiko eta pertsona interesdun hauen txostenak edo alegazioak jaso ziren, eta sustatzaileari bidali zitzaizkion, kontuan har zitzan eta erantzun ziezaien:

– Iruraiz-Gaunako Udalarenak, Aziluko Administrazio Batzarrarenak eta Gereñuko Administrazio Batzarrarenak, denak ere eduki berekoak eta, neurri handi batean, jendaurreko informazioaren izapidean aurkeztutako alegazioekin bat zetozenak. Parke eolikoa ez egiteko eta eguzki-instalazio fotovoltaikoko plaka fotovoltaikoen kokapena birplanteatzeko eskatzen dute, harrobiaren eremuko ingurunea zuzen eta egoki berreskuratzen dela ziurtatzeko.

– Donemiliagako Udalarenak eta Uribarri-Jauregiko Administrazio Batzarrarenak, denak ere eduki berekoak. Ingurumen-inpaktuaren azterketari buruzko zenbait ingurumen-gogoeta egin dituzte.

– Arabako Foru Aldundiko (AFA) Kultura Zuzendaritzako Museo eta Arkeologia Zerbitzua. Baterako ingurumen-ebaluazioaren xede diren bi proiektuetarako kontrol arkeologikoak egitea planteatzen du. Sustatzaileak ados dagoela adierazi du.

– AFAren Nekazaritza Zuzendaritzarenak. Obrak egiteko behar diren prebentzio- eta zuzenketa-neurriak planteatzen ditu.

– AFAko Natura Ingurunearen Zuzendaritzako Ingurumen Jasangarritasuneko eta Natura Ondareko Zerbitzuenak. Uste dute «Laminoria» parke eolikoarentzat aurreikusitako tamaina ez dela onargarria; aitzitik, «Laminoria» eguzki-parke fotovoltaikoaren kasuan, aurreikusitako tamaina onargarritzat jotzen dute.

– AFAren Mendi Zerbitzuarenak. Baldintza teknikoak ezartzen ditu, eta sustatzaileak onartu.

– Eusko Jaurlaritzako (EJ) Kultura Ondarearen Zuzendaritzaren Kultura Ondarearen Zentroarenak. Beharrezkotzat jotzen du proiektuaren ekintzen aldizkako eta unean uneko jarraipena eta kontrol arkeologikoa egitea. Sustatzaileak ados dagoela adierazi du.

– Eusko Jaurlaritzako Nekazaritza eta Abeltzaintza Zuzendaritzarenak. Oso positibotzat jotzen du eguzki-instalazio fotovoltaikoaren kokapena, kontuan hartzen baitu energia berriztagarriak hedatzeko lehentasuna eman beharko litzaiekeela nekazaritza-eragina minimizatzen den lekuei.

– Eusko Jaurlaritzako Larrialdiei Aurre Egiteko eta Meteorologiako Zuzendaritzarenak. «Kapildui» radarraren gaineko eraginari, babes zibilaren arriskuei eta autobabeserako plan bat egiteko beharrari buruzko gogoetak egiten ditu, azaroaren 2ko 277/210 Dekretuan oinarrituta. Dekretu horren bidez zenbait jarduera, zentro edo establezimenduren autobabes-betebeharrak arautzen dira, larrialdiei aurre egiteko.

– Eusko Jaurlaritzako Natura Ondare eta Klima Aldaketa Zuzendaritzarenak. Haien ustez, parke eolikoaren inpaktu- eta zalantza-maila hain da handia, ezen instalazioa ezbaian jartzen baita.

– URA-Uraren Euskal Agentziarenak. Exekuzioari buruz, hainbat gogoeta egin eta zenbait baldintza tekniko-administratibo ezartzen ditu, eta sustatzaileak horiekin ados dagoela adierazten du.

– Ebroko Konfederazio Hidrografikoarenak. Exekuzioari buruz, hainbat gogoeta egin eta zenbait baldintza tekniko-administratibo ezartzen ditu, eta sustatzaileak horiekin ados dagoela adierazten du.

– Laminoriako Errege Haraneko Administrazio Batzarrarenak. Haien ustez, parke eolikoaren eraginek ondorio larriak izango dituzte inguruko herrietako bizilagunengan, inpaktu akustikoengatik, ikusmen-inpaktuengatik eta paisaia-inpaktuengatik, aerosorgailuak balizatzeagatik eta sarbideei eragiteagatik, bai eta trafiko astuna areagotu daitekeelako ere. Eguzki-instalazio fotovoltaikoari dagokionez, zalantzak ditu instalazio hori bat ote datorren meatze-ustiategiaren ingurumen-lehengoratzearekin, bai eta ustiapen-kanonetik, lur-erreserbatik eta lehengoratzetik eratorritako baldintza ekonomikoekin ere. Azken alderdi horri dagokionez, sustatzaileak adierazten du proiektua izapidetzeko fase aurreratuagoetan okupazio-kanon bat adostuko dela AFAren Mendi Zerbitzuarekin lankidetzan.

– Arabako Natur Institutuarenak. Ingurumenari buruzko gogoetak egiten ditu, batez ere «Laminoria» parke eolikoari eta horrek floran eta faunan duen inpaktuari buruzkoak. Bi proiektuen aurkako ingurumen-inpaktuaren adierazpena emateko eskatu du. Halaber, uste du jarraitutasuna dagoela sustatzaile beraren «Azazeta» parke eolikoarekin.

– SEO Birdlife-renak. Ingurumen-gogoetak egiten ditu, batez ere «Laminoria» parke eolikoari buruzkoak, eta, bi proiektuen aurkako ingurumen-inpaktuaren adierazpena emateko eskatu du. Halaber, uste du jarraitutasuna dagoela sustatzaile beraren «Azazeta» parke eolikoarekin.

– Sibelco Minerales SLk hainbat gogoeta egin ditu meategien ustiapenari eta ingurumena lehengoratzeari eta lurrak birgaitzeari buruz. Sustatzaileak ados dagoela adierazi du.

– Arabako Mendiak Askerenak. Ingurumenari buruzko gogoeta luzeak egiten ditu, alderdi hauei buruzkoak, batez ere: zentral eolikoen inpaktua eta ingurumena eta biodibertsitatea babesteko araudia, lurraldea antolatzeko figurak, ingurumen-ebaluazioari, plangintza energetikoari eta jasangarritasunari buruzko araudia eta proiektuaren eta ingurumen-inpaktuaren azterketaren alderdi zehatzak. Beste administrazio-jarduketa batzuei buruzko iritzia ematen du (proiektuaren Plan Berezia izapidetzearen ondoriozko jarduketak dira, Lurzoruari eta Hirigintzari buruzko ekainaren 30eko 2/2006 Legea eta Energia Berriztagarrien Lurralde Plan Sektoriala aplikatzearen ondoriozkoak). Prozedura baliogabea dela alegatzen du. Proiektuaren aurkako ingurumen-inpaktuaren adierazpena eskatzen du, bai eta aldez aurreko administrazio-baimenaren eskaerari ezezko ebazpena ematea ere.

11.– 2024ko uztailaren 19an, ingurumen-organoari (orduan Ingurumenaren Kalitatearen eta Ekonomia Zirkularraren Zuzendaritza zenari) eskabidea aurkeztu zitzaion, «Laminoria» Gune Berriztagarriaren ingurumen-inpaktuaren adierazpena eman zezan. Proiektuen dokumentazio teknikoa, ingurumen-inpaktuari buruzko azterketa bateratua eta jendaurreko informazioaren izapideen eta kontsulten emaitzak bidali ziren, sustatzailearen oharrak barne. Eskabidea 2024ko azaroaren 28an osatu zen, zuzendaritza horrek egindako zuzenketa-errekerimendua bete ondoren ingurumen-inpaktuaren azterketari eranskin bat aurkeztuta.

12.– 2025eko urtarrilaren 20an, Ingurumen Administrazioaren zuzendariak ebazpen bat eman zuen, eta, haren bidez, ingurumen-inpaktuaren adierazpena formulatu, proiektu honi buruz: Aixeindar SAk Arabako Arraia-Maeztu, Iruraiz-Gauna eta Donemiliagako udal-mugarteetan sustatutako Laminoria gune berriztagarriaren proiektua (parke eolikoa eta instalazio fotovoltaikoa). Ebazpen hori Euskal Herriko Agintaritzaren Aldizkarian argitaratu zen, 51. zenbakian, 2025eko martxoaren 14an.

Ebazpen horretan, zuhurtziaren eta kautelazko ekintzaren printzipioari jarraikiz, Laminoria parke eolikoaren aurkako ingurumen-inpaktuaren adierazpena egin zen, ingurumen-organoak ondorioztatu zuelako Laminoriako parke eolikoaren proiektua eraikitzeak eta abian jartzeak sortuko lukeen ingurumen-inpaktuak eragin kritikoa eta onartezina izango lukeela arriskuan dauden abifaunan eta kiropteroetan, Natura 2000 Sareko eremuen arteko konektagarritasun ekologikoan eta Batasunaren Intereseko edo Lehentasunezko landaredian eta habitatetan.

OINARRI JURIDIKOAK

Lehenengoa.– Arabako Industria, Trantsizio Energetiko eta Jasangarritasunaren Lurralde Ordezkaritza da espediente hau izapidetzeko eta ebazteko organo eskuduna, hala xedatzen baita Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuaren 20. artikuluan.

Bigarrena.– Abenduaren 3ko 410/2024 Dekretuak lehenengo xedapen gehigarrian arautzen du ordezkapenen araubidea, eta honako hau ezartzen du:

«Dekretu honetan aipatutako organoen titularrak ez badaude edo gaixorik badaude, edo karguak hutsik badaude, edo abstenitzeko edo errefusatzeko adierazpena egin bada, sailburuak berariazko ebazpenik eman ezean, titularrak ordezteko arau hauek beteko dira: (...)

d) Saileko gainerako zuzendarien ordezkoa haien gainetik dagoen sailburuordea izango da.

e) Organo periferikoetako titularren ordezkoa haien gainetik dagoen zuzendaria izango da».

Beraz, ebazpen honen datan Arabako lurralde-ordezkariaren lanpostua hutsik dagoenez, Deskarbonizazioko zuzendariari dagokio hura ordeztea.

Hirugarrena.– Espedientean bete dira lege hauetan agindutako arauzko izapideak: 24/2013 Legea, abenduaren 26koa, Sektore Elektrikoari buruzkoa; 48/2020 Dekretua, martxoaren 31koa, Eusko Jaurlaritzarena, zeinaren bidez arautzen baitira energia elektrikoa ekoizteko, garraiatzeko eta banatzeko instalazioen administrazio-baimenaren prozedurak; eta 115/2002 Dekretua, maiatzaren 28koa, Euskal Autonomia Erkidegoan parke eolikoetako energia eolikotik energia elektrikoa ekoizten duten instalazioei baimena emateko prozedura arautzen duena. Honako hauekin bat etorriz egin da: 21/2013 Legea, abenduaren 9koa, Ingurumen-ebaluazioari buruzkoa; eta 10/2021 Legea, abenduaren 9koa, Euskadiko Ingurumen Administrazioari buruzkoa.

Laugarrena.– 115/2002 Dekretuaren 7. artikuluaren arabera, ingurumen-inpaktuaren adierazpenaren edukiak ondorio lotesleak izango ditu proiektuak gauzatzeko neurriei eta baldintzei dagokienez, bai eta aurkako adierazpen baten ondorioz gauzatu ezin izateari dagokionez ere.

Bosgarrena.– Ingurumen-ebaluazioari buruzko abenduaren 9ko 21/2013 Legearen 41. artikuluak ezartzen duenez, ingurumen-inpaktuaren adierazpena nahitaezko txosten erabakigarria izango da, eta proiektuek ingurumenean dituzten ondorio esanguratsuak jasoko ditu.

Aipatutako oinarri juridikoekin eta aplikazio orokorreko beste batzuekin bat etorriz, eta Arabako Industria, Trantsizio Energetiko eta Jasangarritasunaren Lurralde Ordezkaritzako zerbitzu teknikoek egindako txostena ikusita, Deskarbonizazioko zuzendariak honako hau

EBAZTEN DU:

Aldez aurreko administrazio-baimena ukatzea Arraia-Maeztu, Iruraiz-Gauna eta Donemiliagako udal-mugarteetako «Laminoria» parke eolikorako, proiektu horren aurkako ingurumen-inpaktuaren adierazpena egin baita.

Ebazpen honek ez dio amaiera ematen administrazio-bideari, eta, beraz, beronen aurka, gora jotzeko errekurtsoa jar dakioke Trantsizio Energetikoko sailburuordeari, hilabeteko epean, ebazpen hau jakinarazi eta hurrengo egunetik aurrera, bat etorriz, betiere, Administrazio Publikoen Administrazio Prozedura Erkidearen 39/2015 Legearen 121. artikuluan eta hurrengoetan xedatutakoarekin.

Vitoria-Gasteiz, 2025eko apirilaren 11.

Arabako lurralde-ordezkaria ordezkatuz, eta bat etorriz Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuaren lehenengo xedapen gehigarriak e) apartatuan dioenarekin,

Deskarbonizazioko zuzendaria,

GUILLERMO ALLENDE ARANGUIZ.

Azterketa dokumentala