RSS
78. zk., 2025eko apirilaren 25a, ostirala
- Bestelako formatuak:
- PDF (136 KB - 2 orri.)
- EPUB (105 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
SEGURTASUN SAILA
1794
AGINDUA, 2025eko apirilaren 10ekoa, Segurtasuneko sailburuarena, Herritarren Segurtasuna Babesteko 4/2015 Lege Organikoaren 36. artikuluaren 16. eta 18. apartatuetako arau-hausteak zehatzeko eskumena Vitoria-Gasteizko Udalari eskuordetzeko dena.
Herritarren Segurtasuna Babesteko 4/2015 Lege Organikoaren 32.3 artikuluak honako hau ezartzen du: «Autonomia-erkidegoko agintariek izango dute lege honetan tipifikatutako zehapenak ezartzeko eskumena, herritarren segurtasunaren arloan dituzten eskumenen esparruan».
Segurtasuneko sailburuak eskumena du herritarren segurtasunaren arloan zehatzeko ahala erabiltzeko (Segurtasun Sailaren egitura organikoa eta funtzionala ezartzen duen urriaren 29ko 318/2024 Dekretuaren 4.2 k) artikulua).
HSBLOren 36. artikuluak arau-hauste larritzat tipifikatzen du «droga toxikoak, estupefazienteak edo substantzia psikotropikoak legez kanpo kontsumitzea edo edukitzea, nahiz eta trafikorako ez izan, leku, bide, establezimendu publiko edo garraio kolektiboetan, bai eta horretarako erabilitako tresnak edo bestelako gauzak leku horietan uztea ere» (16. apartatua) eta «droga toxikoak, estupefazienteak edo substantzia psikotropikoak legez kanpo landatzea eta landatzea jendearentzat ikusgai dauden lekuetan, baldin eta arau-hauste penala ez badira» (18. apartatua).
Vitoria-Gasteizko Udalak ahalmena du bere udaltzaingoak aurreko paragrafoan aipatutako arau-hausteei buruz egindako txostenen ondoriozko zehapen-prozedurak izapidetzeko. Era berean, Udal Laborategia du, beharrezko analisiak egiteko gaituta dagoena, atzemandako substantziak substantzia estupefazientetzat hartzen diren zehazteko.
Horrenbestez, eta Euskadiko Toki Erakundeei buruzko apirilaren 7ko 2/2016 Legearen 22. artikuluan eta hurrengoetan xedatutakoaren arabera, honako hau
EBAZTEN DUT:
Lehenengoa.– Vitoria-Gasteizko Udalari (Segurtasun Zuzendaritza Orokorra) eskuordetzea Vitoria-Gasteizko Udaltzaingoak HSBLOren 36. artikuluko 16. eta 18. apartatuetan tipifikatutako arau-hausteengatik egindako txostenen ondoriozko zehapen-prozedurak hastea, izapidetzea eta ebaztea. Eskuordetze horrek barnean hartuko ditu jartzen diren administrazio-errekurtsoak ebaztea eta jurisdikzio-organoetan zehapen-ebazpenak defendatzea.
Bigarrena.– Udalak bere burua antolatzeko ahalmen osoa egikarituko du eginkizun horietan.
Hirugarrena.– Udalak, Udal Laborategiaren bitartez, konfiskatutako substantzien beharrezko analisiak egingo ditu.
Laugarrena.– Ezarritako zehapenekin biltzen den zenbatekoa Vitoria-Gasteizko Udalaren diru-sarrera izango da. Ez da beharrezkoa Eusko Jaurlaritzak baliabide materialak, pertsonalak, ekonomikoak eta finantzarioak eskura jartzea, ezta zerbitzuaren benetako kostua baloratzea ere.
Bosgarrena.– Vitoria-Gasteizko Udalak Eusko Jaurlaritzak prozedura horiei dagokienez zehatzeko ahala baliatzeari buruz emandako jarraibideak eta gidalerroak beteko ditu, eta horri buruz eskatzen dion informazioa emango dio.
Seigarrena.– Eskumen-eskuordetze hori baliatuz ematen diren ebazpenetan, agindu honen bidez eman direla adieraziko da.
Zazpigarrena.– Eskuordetzea agindu hau sinatu eta hurrengo egunean jarriko da indarrean, eta bost urteko iraupena izango du, Toki Araubidearen Oinarriak arautzen dituen apirilaren 2ko 7/1985 Legearen 27.1 artikuluan ezarritakoaren arabera. Indarrik gabe geratuko da, errebokatzen bada edo beharrezkoa ez izatea eragiten duten lege-aldaketak gertatzen badira.
Vitoria-Gasteiz, 2025eko apirilaren 10a.
Segurtasuneko sailburua,
BINGEN ZUPIRIA GOROSTIDI.