RSS
68. zk., 2025eko apirilaren 8a, asteartea
- Bestelako formatuak:
- PDF (357 KB - 33 orri.)
- EPUB (2311 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
SPRI-ENPRESEN GARAPENERAKO EUSKAL AGENTZIA
1565
EBAZPENA, 2025eko martxoaren 24koa, SPRI-Enpresa Garapenerako Euskal Agentziako zuzendari nagusiarena, 2025erako «Zibersegurtasuneko Gaitasun Digital Profesionalak» laguntza-programaren oinarri arautzaileak eta deialdia onartzen dituena, Berreskuratze, Eraldaketa eta Erresilientzia Planaren esparruan eta Europar Batasuneko NextGenerationEU funtsek finantzatuta.
SPRI-Enpresen Garapenerako Euskal Agentziak, Eusko Jaurlaritzako Industria, Trantsizio Energetiko eta Jasangarritasunaren Sailaren mendeko zuzenbide pribatuko erakunde publikoak, Euskal Autonomia Erkidegoan industria eta enpresa arloko jarduera bultzatzera bideratutako jardunbideak bideratzeko eta lehiakortasuneko bektore gisa honako hauen arteko trantsizioak Euskadiko enpresetan txertatzen laguntzeko ardura du: teknologia-digitala, energia-ingurumena eta demografia-gizartea. Horretarako, enpresen jarduera ekintzailean inbertsioa, berrikuntza, nazioartekotzea eta jarduera sustatzea bultzatzen ditu.
Ildo horretatik, Euskadi 2025 Eraldaketa Digitalerako Estrategia bultzatzera bideratutako zenbait ekintza garatu ditu SPRI-Enpresen Garapenerako Euskal Agentziak. Ekintza horien artean, aipatzekoak dira Euskadiko eraldaketa digitala bultzatzera bideratutako laguntza-programa anitzak.
Dagoeneko abian dauden beste ekimen batzuen osagarri gisa, «Zibersegurtasuneko Gaitasun Digital Profesionalak» («Programa») izeneko programa hau jarriko da abian. Enpresen lehiakortasuna hobetzea da programaren helburua, Ikanos teknologiaren bidez pertsonen gaitasun digitalak bultzatuta. Horretarako, Ikanos metodologia ezarriko da edozein tamainatako eta edozein jarduera ekonomikotako enpresei zuzendutako berariazko aholkularitza-zerbitzu baten bidez.
Gaitasun Digital Profesionalen alorrari lotutako «Euskadiko Eraldaketa Digitaleko Estrategia 2025» delakoaren jarduera-ildoak garatzeko, beharrezkoa da Zibersegurtasuneko gaitasun digitalak sustatzea. Besteak beste, eremu hauek hartzen dituzte:
Ingeniaritza soziala.
Iruzurrezko mezu elektronikoak: erabiltzaileei mezu elektroniko kaltegarrien bidez iruzur egiteko ingeniaritza soziala erabilita egindako erasoen eraginkortasuna nabarmen ari da handitzen, eta horrek segurtasun korporatiboaren paradigma aldatu du. Egun, perimetroko firewallak eta Interneten eraginpeko zerbitzuen babesa ez dira kontraneurri nahikoak erakunde bat kanpoko erasoetatik babesteko. Erasotzaileek badakite giza alderdiaz baliatzea dela erakunde batek ezarritako segurtasun-irtenbide teknikoak saihesteko metodorik eraginkorrena. Hori horrela, beharrezkoa da phishing, spoofing teknikak eta beste metodo batzuk darabiltzaten mezuak hautemateko gaitasuna hobetzea.
Gailuak eta informazio pertsonala babestea.
Gailu elektronikoen babeserako zibersegurtasuna: gure gailuak arriskuan ez jartzeko WIFI publikoetara ez konektatzea, fitxategirik ez deskargatzea zalantzazko webguneetatik, Sare Pribatu Birtualak (VPN) erabiltzea, Birus eta Ransoware aurreko babesa, nabigatzailearen ezarpenaren arriskuak ezagutzea eta gailu mugikorrak blokeatzea.
Datu pertsonalen eta pribatutasunaren babesa. Sarean datu pertsonalak edo profesionalak argitaratzeak arriskuan jar dezake gure segurtasuna zein lan egiten dugun enpresarena. Pertsonak eta enpresak zaurgarri egiten ez dituzten datuak argitaratzen ikasi behar dugu, baita gure datuen backupa egiten ere, eta datuen zifraketak nola funtzionatzen duen ezagutu behar dugu.
Pasahitzen kudeaketa segurua.
Gailu elektronikoen babeserako zibersegurtasuna: pasahitz sendoak eta pasahitzen kudeatzaileak erabiltzea, zenbait faktoretako egiaztatzea ezagutu eta erabiltzea, etab.
Interneten segurtasunez nabigatzea.
Gaitasun digitalak segurtasunez nabigatzeko: Interneten informazioa bilatzeko segurtasun-irizpideak eta internet erabiltzeak hartu beharreko neurri orokorrak sendotzea, besteak beste, cookiei lotutako arriskuak ezagutu eta hautematea, SSL segurtasun-egiaztagiriek nola funtzionatzen duten, etab.
Eduki faltsua identifikatzea. Albiste eta informazio faltsua hautematen ikasi behar da, beharrezkoa da iturriak identifikatzea eta haien fidagarritasuna balioztatzea.
Segurtasuneko gertaerak.
Lehentasunezko jarduketak segurtasun-gertakarien eta zaurgarritasunen aurrean. Arriskuak prebenitzen eta gure enpresaren zibersegurtasuna arriskuan dagoela uste dugun egoeretan erantzuten lagunduko diguten gaitasun digitalak garatzean datza. Enpresaren informazio-sistemaren osotasuna arriskuan egon daitekeela hautematen dugun egoeretan erantzuten ikasi behar dugu.
Dirulaguntzen araubidea Erregulatzeko 2023ko abenduaren 21eko 20/2023 Legeak (DEAL) 7.2.a) artikuluan eskatzen du lege horrek ezartzen duen dirulaguntzen kudeaketa eta esleipena zenbait printzipioren arabera egiteko, besteak beste, publizitate-printzipioaren arabera. Era berean, DEALen 8.3 artikuluak ezartzen du dirulaguntza edo diruz lagundutako programa mota bakoitzaren oinarri arautzaileak argitaratu behar direla Euskal Herriko Agintaritzaren Aldizkarian.
Hori guztia dela eta, honako hau
EBAZTEN DUT:
Lehenengoa.– 2025erako «Zibersegurtasuneko Gaitasun Digital Profesionalak» laguntza-programaren oinarri arautzaileak eta deialdia onartzea, Berreskuratze, Eraldaketa eta Erresilientzia Planaren esparruan eta Europar Batasuneko NextGenerationEU funtsek finantzatuta. Programa horren edukia ebazpen honen eranskin gisa argitaratu da.
Bigarrena.– Ebazpen hau Euskal Herriko Agintaritzaren Aldizkarian osorik argitaratzea.
Hirugarrena.– Ebazpen honen aurka, aukerako berraztertze-errekurtsoa jar dakioke SPRI-Enpresen Garapenerako Euskal Agentziaren Zuzendaritza Nagusiari, hilabeteko epean, ebazpen hau argitaratu eta hurrengo egunetik hasita, edo administrazioarekiko auzi-errekurtsoa administrazioarekiko epaitegietan, bi hilabeteko epean, ebazpen hau argitaratu eta hurrengo egunetik hasita.
AZKEN XEDAPENA
Ebazpen honek Euskal Herriko Agintaritzaren Aldizkarian argitaratu eta hurrengo egunetik aurrera izango du eragina.
Bilbao, 2025eko martxoaren 24a.
SPRI-Enpresa Garapenerako Euskal Agentziako zuzendari nagusia,
JON ANSOLEAGA UGARTE.