Euskal Herriko Agintaritzaren Aldizkaria

55. zk., 2025eko martxoaren 20a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

AGINTARIAK ETA LANGILERIA

Oposaketak eta lehiaketak

KULTURA ETA HIZKUNTZA POLITIKA SAILA

1270

AGINDUA, 2025eko martxoaren 5ekoa, Jaurlaritzako lehenengo lehendakariorde eta Kultura eta Hizkuntza Politikako sailburuarena, deialdi publikoa iragartzeko, goi-kargudunaren idazkari lanpostua (520010/85) izendapen askeko sistema bidez hornitzeko.

Goi-kargudunaren idazkari lanpostua hutsik dagoenez (520010 kodea, 85 dotazioa), Hizkuntza Politikako Sailburuordetzako Kultura Sustatzeko eta Kultura eta Sormen Industrietako Zuzendaritzan, Euskal Enplegu Publikoaren abenduaren 1eko 11/2022 Legearen 94.2 eta 102.2 artikuluetan xedatutakoari jarraituz eta Enplegu Publikoko Zuzendaritzak aldeko txostena eman duenez, sail honek erabaki du deialdi publikoa egitea eranskinean azaltzen den lanpostua izendapen askeko sistema erabiliz hornitzeko. Hona hemen deialdiaren

OINARRIAK

Lehenengoa.– Parte hartzeko baldintzak.

1) Deialdi honetan parte hartzeko aukera izango dute Euskal Autonomia Erkidegoko administrazio Orokorreko eta haren organismo autonomoetako karrerako funtzionarioek eta EAEko administrazio orokorrarekin lotuta dauden zuzenbide pribatuko ente publikoetako karrerako funtzionarioek, lanpostu-zerrendan ezartzen diren baldintzak betetzen badituzte (eranskinean zehaztuta daude).

Aipatutako langileek edozein administrazio-egoeratan egonda har dezakete parte deialdian, honako egoera hauetan izan ezik:

– Eginkizun-gabetze irmoa ezarrita; egoera horrek dirauen bitartean.

– Norberaren kontuetarako edo familia elkartzeko borondatezko eszedentzian; ez badute bete eszedentzian egon beharreko gutxieneko denbora (2 urte).

2) Orobat, parte hartzeko moduan izango dira beste administrazio publiko batzuetako karrerako funtzionarioak, irakaskuntzako eta Justizia Administrazioko karrerako funtzionarioak, bai eta erakunde sanitarioetako estatutupeko langile finkoak ere, betiere espresuki ezartzen bada lanpostu- zerrendan langile mota horrek betetzeko moduko lanpostua dela, eta, hortaz, zehazki identifikatuta badago dagokion kodearekin, agiri honen eranskinean zehaztutakoarekin bat etorriz.

Langile horiek deialdi honetan parte hartzekotan, lanpostu-zerrendan ezarritako baldintzak egiaztatu behar dituzte eta, gainera, zerbitzu aktiboko administrazio-egoeran edo jatorrizko administrazioan lanpostua gordetzea dakarren administrazio-egoeran egon behar dute, non eta ez duten 6 hilabetetik beherako eginkizun-gabetzea, behin-behinekoa edo irmoa.

Bigarrena.– Eskabideak.

Parte hartzeko eskabideak agindu hau Euskal Herriko Agintaritzaren Aldizkarian argitaratu eta hurrengo egunetik 15 egun balioduneko epean aurkeztu beharko dira.

EAEko Administrazio Orokorrean eta haren organismo publikoetan jardunean dauden karrerako funtzionarioek EIZU enplegatuaren atariaren bidez egin ditzakete eskabideak. Jakina bidez eta Internet bidez sar daiteke atari horretara, helbide honetatik: Funtzio Publikoa - Eusko Jaurlaritza - Euskadi.eus.

Gainerako izangaiek erregistro elektronikoaren bidez bidaliko dituzte eskabideak, Kultura eta Hizkuntza Politika Saileko Zerbitzu Zuzendaritzara.

Hirugarrena.– Betekizunak eta merezimenduak.

Honen eranskinean ezartzen dira lanpostu-zerrendan goi-kargudunaren idazkari lanpostua (520010/85) betetzeko eskatzen diren baldintzak.

Parte hartzeko eskabideari «curriculum vitaea» erantsiko zaio, eta, hor, datu pertsonalak eta zein talde, azpitalde edo kidegotakoa den ez ezik, beste hauek ere adierazi beharko dira:

a) Tituluak.

b) Orain arte administrazio publikoan nahiz enpresa pribatuan betetako lanpostuak, lehiatzen den lanpostuaren antzeko funtzioak dituztenak.

c) Egiaztatutako hizkuntza-eskakizuna.

d) Jasotako edo emandako prestakuntza-ikastaroak.

e) Hizkuntza-gaitasunak.

f) Eskatutako lanpostuari esleitutako funtzio eta zereginekin lotuta, egoki jotzen diren bestelako merezimendu eta konpetentzia guztiak.

Eskabidearekin batera, deialdian eskatzen diren betekizunen eta alegatutako merezimenduen egiaztagiriak aurkeztu beharko dituzte izangaiek, baldin eta EAEko administrazio orokorraren Langileen Erregistroan ez badaude.

Izangaia deitutako lanpostuaren funtzioetara ongi egokitzen dela ziurtatzeko, deialdia egin duen organoak aukera izango du izangaiak alegatutako merezimenduak egiaztatzeko egoki jotzen dituen bitartekoak erabiltzeko; elkarrizketa pertsonala edo proba egin dezake horretarako, edo Giza Baliabideen Zerbitzuko organo teknikoen txostenak eskatu.

Deialdi hau Euskal Herriko Agintaritzaren Aldizkarian argitaratzen den datan bertan bete behar dira eskatutako betekizunak, eta esleitutako lanpostuez jabetu arte eutsi behar zaie. Parte hartzeko baldintzak gerora betetzen ez dituzten parte-hartzaileak ezin izango dira jabetu esleitutako lanpostuaz.

Laugarrena.– Ebazpena.

Jaurlaritzako lehenengo lehendakariorde eta Kultura eta Hizkuntza Politikako sailburuaren agindu bidez ebatziko da deialdi hau, gehienez ere hiru hilabeteko epean, eskabideak aurkezteko epea amaitu eta hurrengo egunetik aurrera. Agindu hori EHAAn argitaratu beharko da.

Lanpostua lortzen duen pertsonak esleipen-aginduan ezarritako datan jabetu beharko du lanpostuaz, eta, ordu arte lanposturen bat baldin bazeukan, horren titulartasuna galduko du.

Ebazpen hori arrazoitzeko, kontuan hartuko da izangaiak deialdian eskatzen diren baldintzak eta zehaztapenak bete dituela, izendapena egiteko eskumena badaukala ebazleak, eta lanpostuari buruz monografian ezarritako eginkizunak eta zereginak betetzeko egokia dela izangaia. Horretarako, gainerako izangaiekin (baldin badaude) alderatuko dira merezimenduak (eta, hala badagokio, elkarrizketaren edo probaren emaitza).

Gerta liteke deialdia hutsik geratzea, baldin eta izangaietako batek ere ez baditu betetzen lanpostuaren baldintzak edo izangaietako bat ere ezin bada egokitzat jo, deitutako lanpostua betetzeko behar beste merezimendu eta konpetentzia ez dituelako.

Bosgarrena.– Errekurtsoak.

Agindu honek amaiera ematen dio administrazio-bideari eta, beronen aurka, aukerako berraztertzeko errekurtsoa aurkez dakioke ebazpena eman duen organoari, hilabeteko epean, ebazpena Euskal Herriko Agintaritzaren Aldizkarian argitaratu eta hurrengo egunetik aurrera. Bestela, administrazioarekiko auzi-errekurtsoa aurkez daiteke, dagokion Administrazioarekiko Auzien Epaitegian, bi hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera.

Vitoria-Gasteiz, 2025eko martxoaren 5a.

Jaurlaritzako lehenengo lehendakariorde eta Kultura eta Hizkuntza Politikako sailburua,

IBONE BENGOETXEA OTAOLEA.

ERANSKINA

Deitutako lanpostua: Goi-kargudunaren idazkaria.

Kodea: 520010.

Dotazioa: 85.

Kidegoa eta eskala: EAEko Administrazio Orokorreko Administrarien Eskala (EGC101) eta Administrari Laguntzaileen Eskala (EGC201).

Lanpostu-mailako osagarria: 18.

Berariazko osagarria: VI-A.

Kokapena: Kultura Sustatzeko eta Kultura eta Sormen Industrietako Zuzendaritza.

Lan-lekua: Vitoria-Gasteiz.

Hizkuntza-eskakizuna: 2.

Derrigortasun-data: 05-07-2022.

Azterketa dokumentala