Euskal Herriko Agintaritzaren Aldizkaria

38. zk., 2025eko otsailaren 25a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

887

EBAZPENA, 2025eko otsailaren 6koa, Trantsizio Energetikoko sailburuordearena, zeinaren bidez aurretiazko administrazio-baimena ematen baitzaie jatorrizko proiektuaren aldaketei, eta eraikitzeko administrazio-baimena «Vitoria Solar 2» eguzki-instalazio fotovoltaikoari dagokion proiektuari eta haren ebakuazio-azpiegiturei, Vitoria-Gasteiz eta Burgeluko udal-mugarteetan. Indarberri SLk sustatu ditu.

Espedientea: 01GEY 202400007.

AURREKARIAK

1.– Arabako Industria Administrazioko lurralde-ordezkariaren 2023ko azaroaren 30eko ebazpenaren bidez aurretiazko administrazio-baimena eman zitzaion Indarberri, SL enpresak sustatutako proiektu bati, «Vitoria Solar 2» eguzki-instalazio fotovoltaikoaren proiektuari, Vitoria-Gasteiz eta Burgeluko udal-mugarteetan (2024ko urtarrilaren 11ko EHAA, 8. zk.).

2.– Aldez aurretik, 2023ko irailaren 15ean, Ingurumen Kalitatearen eta Ekonomia Zirkularraren Zuzendaritzak proiektu hartarako ingurumen-inpaktuaren adierazpena egin zuen (2023ko urriaren 30eko EHAA, 207. zk.).

3.– 2024ko urtarrilaren 31n, Indarberri SLk aurretiazko administrazio-baimenaren eskaera aurkeztu zuen jatorrizko aurreproiektuaren aldean egindako aldaketarako, eta eraikitzeko administrazio-baimenaren eskaera ere aurkeztu zuen. Aldaketok honako hauek dira:

3.a.– Eguzki-instalazio fotovoltaikoa aldatzea, ingurumen-inpaktuaren adierazpenaren baldintzak betetzeko, bai eta Noryeste Ureztatzaileen Komunitateak ezarritako baldintzak ere, bai eta Arabako Foru Aldundiko Mugikortasunaren eta Bide Azpiegituren Saileko Errepide Zerbitzuak ezarritakoak ere.

3.b.– «Vitoria Solar 2» instalazio fotovoltaikoan dagoen ebaketa-zentroaren eta 220 kV-eko Promotores Vitoria TAE azpiestazioaren arteko 30 kV-ko lurpeko ebakuazio-linearen trazadura aldatzea; azpiestazio hori sustatzaile beraren «Vitoria Solar 1» proiektuarekin eta zenbait sustatzaileren beste proiektu batzuekin partekatua da.

4.– Eskaerarekin batera dokumentu hauek aurkeztu zituzten:

– «49,97 MWp-ko Vitoria Solar 2 eguzki-instalazio fotovoltaikoa. Vitoria-Gasteiz eta Burgeluko udalerriak» egiteko proiektua.

– «30 kV-eko Vitoria Solar 2 ebakuazio-linea» egiteko proiektua.

– Ukitutako ondasun eta zerbitzuetarako eraginei dagozkien separatak.

– «Vitoria Solar 1 eta Vitoria Solar 2 eguzki-instalazioa fotovoltaikoen eta 220 kV-eko Vitoria lotunerako ebakuazio-azpiegituren proiektuaren aldaketa ez-funtsezkoaren ingurumen txostena» izeneko txostena.

5.– Adierazitako ingurumen-txostena 2024ko otsailaren 23an helarazi zitzaion ingurumen-organoari, Vitoria Solar 1 eta Vitoria Solar 2 proiektuetan egindako aldaketek ingurumen-ebaluaziorik behar zuten galdetzeko.

6.– 2024ko martxoaren 19an, ingurumen-organoak egindako kontsultari erantzun zion, eta adierazi zuen proposatutako aldaketak ez zirela iristen honako hauetan ezarritako atalaseetara: Ingurumen-ebaluazioari buruzko abenduaren 9ko 21/2013 Legearen 7.2.c artikuluan, eta Euskadiko Ingurumen Administrazioaren abenduaren 9ko 10/2021 Legearen II.E eranskineko 4. apartatuan. Halaber, adierazten dute proiektuaren aldaketak ingurumenaren ikuspegitik arrazoitu dituztela 2023ko irailaren 15eko ebazpenaren 4.1.3 apartatuan adierazitakoari jarraikiz (haren bidez Vitoria Solar 1 eguzki-instalazio fotovoltaikorako ingurumen-inpaktuaren adierazpena egiten da).

7.– «Vitoria Solar 2» eta harekin lotutako azpiegiturak eraikitzeko proiektuak, jatorrizko proiektuaren aldean egindako aldaketak barne, jendaurrean azaldu dira Arabako Industria Administrazioaren Lurraldeko Ordezkaritzaren 2024ko maiatzaren 2ko iragarkia argitaratuz, zeinaren bidez jendaurrean azaltzen da «Vitoria Solar 2» eguzki-instalazio fotovoltaikoaren proiektua (49,980 MW) eta haren ebakuazio-azpiegiturak, Vitoria-Gasteizko eta Burgeluko udal-mugarteetan (Araba), aldatzeko aurretiazko administrazio-baimenaren eskaera, bai eta eraikitzeko administrazio-baimena ere (Indarberri, SL sustatzaileak aurkeztu zituen). Hori guztia, honako hauetan ezarritako ondorioetarako: martxoaren 31ko 48/2020 Dekretuaren 10. artikulua (dekretu horren bidez arautzen dira energia elektrikoa ekoizteko, garraiatzeko eta banatzeko instalazioen administrazio-baimenaren prozedurak), eta Sektore Elektronikoari buruzko abenduaren 26ko 24/2013 Legearen 53.1 artikulua.

– 2024ko maiatzaren 21eko Euskal Herriko Agintaritzaren Aldizkaria, 98. zenbakia.

– 2024ko maiatzaren 27ko Arabako Lurralde Historikoaren Aldizkari Ofiziala, 59. zenbakia.

8.– Ezarritako epearen barruan honako hauen alegazioak jaso ziren: Arabako Nekazarien Elkartea (UAGA), Trebiñu eta Araba Landaren Alde (ATACA) elkartea, Arabako Ureztatzaileen Erkidegoen Elkartea (ACORA), Arabako Mendiak Aske, Faustina Martínez de Marigorta Gil andrea, Gasteizko Kontzejuen Elkartea (ACOVI), eta hainbat administrazio-batzar (Andetxa, Gereña, Uribarri Dibiña, Eztarroa, Mendotza, Gamiz, Gardelegi, Krispiña, Aberasturi, Lopidana, Betoñu, Aretxabaleta, Otobarren, Margarita, Ilarratza, Lermanda, Legarda, Martioda, Jungitu, Lubinau, Oreitia, Arkauti eta Bolibar), eduki berarekin; Easy Above Systems SLU enpresa, «PSFV AgriPV BW Ramos», «VT Elburgo Solar» eta «BW Mendijur Solar» instalazio fotovoltaikoen proiektuekin lotuta, eta José Ramón Ruiz de Azua Pérez de Mendiguren jauna, alegazioan identifikatzen ez dituen zenbait lurzatiren titular gisa.

Alegazioak Indarberri SLri igorri zitzaizkion, eta erantzun egin zien.

Aurkeztutako alegazioak, laburtuta, honako argudio hauetan oinarritzen dira:

– Noryeste Ureztatzaileen Komunitateari eta Ebroko Konfederazio Hidrografikoak emandako ur-emakidari eragitea, bai eta Noryeste putzua deitutakoaren balizko erabilerari ere.

– Bateraezintasuna Nekazaritza eta Basozaintzako LPSarekin, eta nekazaritza-balio handiko elementuei nahiz nekazaritzako jarduerari eragitea.

– Bateraezintasuna Energia Berriztagarrien LPSaren hasierako dokumentuarekin, lehentasunez kokatzeko eta baztertzeko irizpideei dagokienez, eta fotovoltaikoetarako ingurumen-sentsibilitateko zonakatzearen proposamenarekin ere.

– Arau-hutsunea energia berriztagarrien hedapenari dagokionez, energia berriztagarrien LPSa behin betiko onetsita ez dagoelako eta Trantsizio Energetikoaren eta Klima Aldaketaren 1/2024 Legea erregelamenduz garatu gabe dagoelako.

– Jendaurreko informazioaren izapide berririk ez 21/2013 Legearen ondorioetarako.

– Kudeaketa-plana onartua duen fauna mehatxatua.

– Osasunerako eraginak.

– Proiektuaren metatze-efektuak edo efektu sinergikoak.

– Proiektuaren zatiketa.

– Ukitutako lurzatiak erabiltzeko akordiorik ez.

– Zenbait proiekturen ebakuazio-lineen trazadurak bat etortzea.

9.– Jendaurreko informazioaren izapidearekin batera, honako kontsulta hauek egin zitzaizkien ukitutako ondasunak edo zerbitzuak dituzten administrazio publikoei, enpresei eta organismoei, 48/2020 Dekretuaren 11. artikuluari jarraituz, sustatzaileak aurkeztu eta ondasunak, instalazioak, obrak eta zerbitzuak ukitzen dituzten proiektuaren zatien separata teknikoei dagokienez: Gasteizko Udala, Burgeluko Udala, Noryeste Ureztatzaileen Komunitatea, AESA, Burgeluko Kontzejua, Jungituko Kontzejua, Lubinauko Kontzejua, Uribarri Arratzuko Kontzejua, Arabako Foru Aldundiko Nekazaritza Zuzendaritza, Arabako Foru Aldundiko Errepide Zerbitzua, i-DE Redes Eléctricas Inteligentes SA, Red Eléctrica de España, SA eta URA-Uraren Euskal Agentzia.

10.– Honako txosten hauek jaso ziren: Arabako Foru Aldundiko Nekazaritza Zuzendaritza, Vitoria-Gasteizko Udala, Uribarri Arratzuko Administrazio Batzarra, Jungituko Administrazio Batzarra, Lubinauko Administrazio Batzarra, Noryeste Ureztatzaileen Komunitatea, Red Eléctrica de España eta URA-Uraren Euskal Agentzia.

Txosten horiek Indarberri, SLri igorri zitzaizkion, eta erantzun egin zien.

URA-Uraren Euskal Agentziari dagokionez, sustatzailea ados agertu zen txostenaren edukiarekin.

Red Eléctrica de Españari dagokionez, hau ez zen proiektuaren kontra agertu.

Nekazaritza Zuzendaritzak jakinarazi zuen proiektuak eragina duela balio estrategiko handikotzat hartutako lurzoruetan, Noryeste Ureztatzaileen Komunitatean eta ukitutako kontzejuetako aisiarako eremuetan. Horrez gain, lanak gauzatu aurretik erregistratutako landa-bideetarako eraginari buruzko txosten teknikoa eskatzeko beharra dagoela ere esan du. Horri guztiari dagokionez, sustatzaileak eskaerarekin ados dagoela agertu du, eta prebentzio- eta zuzenketa-neurriak hartzeko asmoa adierazi du, ingurumen-inpaktuaren adierazpenaren baldintzetan nahiz ingurumen-inpaktuaren azterketan bertan ezarri bezala. Indarberri SL sustatzailearen erantzuna Nekazaritza Zuzendaritzari igorri zitzaion, eta honek ez zuen aurka egiteko edo eragozteko beste idazkirik.

Vitoria-Gasteizko Udalaren txostenari dagokionez (hirigintzako alderdietan oinarritzen zen, eta batez ere Hiri Antolamenduko Plan Orokorraren aplikazioan), sustatzaileak Udalari emandako erantzuna igorri zen, zeinak adierazi baitzuen gai horri buruzko alderdiak dagokion hirigintza-izapidean egiaztatuko direla.

Uribarri Arratzuko, Jungituko eta Lubinauko Administrazio Batzarrek proiektuarekiko oposizioa agertu zuten, batez ere oinarrituta honako hauetan: lurralde-antolamenduari buruzko kontuak; ingurumen eta paisaian izandako eraginak, ureztatzeko sisteman izandako eraginak eta pertsonen osasunean izandakoak, eta sustatzaile beraren beste proiektu batzuekin izandako efektu sinergikoak. Sustatzaileak emandako erantzuna igorri zitzaien administrazio-batzarrei, eta oposizioa berretsi zuten.

Noryeste Ureztatzaileen Komunitateak honako hauekin lotutako alderdien berri eman zuen: ur-emakidaren araubide juridikoa, ukitutako lurzatien etorkizuneko erabilera (gaur egun laborantza ureztatura zuzenduta), ingurumena, proiektuaren eraginak, bai eta Noryeste putzuaren ordezko erabilera posiblea ere. Sustatzaileak komunitate hori emandako erantzuna igorri zen, eta berriz adierazi zuen komunitatearen gaineko jarduketa oro komunitateak onetsi eta Ebroko Konfederazio Hidrografikoak berretsi beharra dagoela, berriz eskatu zuen ordezko kokapen bat aztertzeko, eta aldaketen ingurumen-ebaluazioa egiteko, eta komunitatea zuzenbide publikoko korporazio gisa aitortzeko, bai eta proiektua baimentzeari eman dion ezezkoa ere.

11.– «Vitoria Solar 2» proiektuak sarbide-baimena du, Red Eléctrica de España SAUk emana 2021eko otsailaren 17an, 220 kV-eko Vitoria azpiestazioan.

OINARRI JURIDIKOAK

Lehenengoa.– Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzeko abenduaren 3ko 410/2024 Dekretuaren 20.3.f artikuluan ezarritakoari jarraikiz, Industria, Trantsizio Energetiko eta Jasangarritasuneko lurralde-ordezkariak du eskumena ebazpen hau emateko. Kasu zehatz honetan, Lurralde Ordezkaritzaren eta mendekoa den zuzendaritzaren titulartasunak hutsik egonik, eta lehen xedapen gehigarriaren d) eta e) puntuetan xedatutakoari jarraikiz, Trantsizio Energetikoko sailburuordeari dagokio haien ordezkoa izatea.

Bigarrena.– Espedientea izapidetzean, honako arau hauetan ezarritako izapideak bete dira: 24/2013 Legea, abenduaren 26koa, Sektore Elektrikoari buruzkoa; 1955/2000 Errege Dekretua, abenduaren 1ekoa, Energia elektrikoko instalazioen garraio-, banaketa-, merkaturatze- eta hornidura-jarduerak eta baimen-prozedurak arautzen dituena; eta 48/2020 Dekretua, martxoaren 31koa, energia elektrikoa ekoizteko, garraiatzeko eta banatzeko instalazioen administrazio-baimenaren prozedurak arautzen dituena.

Hirugarrena.– 24/2013 Legearen 53.1 artikuluak adierazten du lege horretan jasotako ekoizpen-instalazio berriak jardunean jarri aurretik administrazio-baimena behar izango dela; hain zuzen ere, eraikitzeko eta ustiatzeko baimena.

Ezartzen du, halaber, eraikitzeko administrazio-baimenaren ebazpena emateko, zerbitzu publikoak edo interes ekonomiko orokorreko zerbitzuak ematen dituzten administrazio publiko, organismo edo enpresen baldintza teknikoak (ez bestelakoak) soilik aztertu beharko direla, eta soilik erakunde horien jabetzakoak diren eta instalazioaren eraginpean dauden ondasun eta eskubideei dagokienez.

Era berean, 48/2020 Dekretuaren 11. artikuluak, beste administrazio publiko, erakunde edo enpresa batzuei kontsulta egiteko izapideari buruzkoak, hauxe adierazten du: «Aurreproiektuaren edo proiektuaren separata bat emango zaie dagokien administrazio, erakunde edo zerbitzu publikoko edo interes orokorreko zerbitzuetako enpresei, instalazioak beren ardurapeko ondasun eta eskubideei eragiten dien heinean, eskatutako baimena hilabeteko epean eman edo uka dezaten».

Sektore Elektrikoari buruzko 24/2013 Legearen 53.7 artikuluaren arabera, Administrazio Publikoak baimena ukatu ahalko du, baina aplikatu beharreko araudian ezarritako eskakizunak betetzen ez direnean edo sistemaren funtzionamendurako kaltegarria denean bakarrik.

Halaber, 53.6 artikuluak adierazten du administrazio-baimenak administrazio eskudunak emango dituela, aplikatu beharreko bestelako xedapenen arabera eta, bereziki, lurraldearen antolamenduari eta ingurumenari buruzko xedapenen arabera beharrezkoak diren emakida eta baimenak alde batera utzi gabe. Ildo horretatik, esparru horiei eta instalazioa ezartzean eragina duten beste batzuei dagokienez, zeinetan ordezkaritza honek eskumenik ez duen, espedientea izapidetu bitartean jasotako alegazio eta txostenetan planteatutako kontuak, egokia den izapidetze espezifikoan ebatziko ditu gai horietan eskumena duen organoak.

Horrenbestez, baimenaren aurretiazko kontsulten xedea mugatu beharko da zerbitzu publikoko administrazioen, organismoen eta enpresen konturako ondasun eta eskubideetan izandako eraginetara. Eragin horietatik haratago doazen beste alderdi jakinarazi batzuk, esate baterako hirigintzaren eta ingurumenaren arlokoak, beste prozedura espezifiko eta independenteen xede direnak, ezin dira baloratu eta ez dira baloratu behar aldaketen aurretiazko administrazio-baimenerako eta proiektua eraikitzeko administrazio-baimenerako espediente hau izapidetzean.

Laugarrena.– Jendaurreko informazioaren aldian eta kontsulta-aldian jasotako txostenetan aurkeztutako alegazioei dagokienez, haien edukia eta sustatzaileak emandako erantzunak aztertu ondoren, hauxe adierazi behar da:

a) Aldez aurretik, adierazi beharra dago jasotako alegazio gehienak proiektuaren aurretiazko ingurumen-ebaluazioaren aldiari dagozkio, eta proiektuak, lehen eta bigarren aurrekarietan adierazi bezala, aurretiazko ingurumen-inpaktuaren adierazpena eta administrazio-baimena ditu. Proiektuan egindako aldaketen aurretiazko administrazio-baimenera eta eraikitzeko administrazio-baimenera mugatzen da baimen hau. Alegazioak ezin dira onartu, horrenbestez, haien asmoa bada proiektuaren izapideak hasierako aldietara, jada amaitutakoetara, eramatea. Nolanahi ere, egindako alegazioei erantzungo zaie orain.

b) Plan Bereziaren izapideei dagokienez, oinarri hartuta 2/2006 Legea, ekainaren 30ekoa, EAEko Lurzoruari eta Hirigintzari buruzkoa, ez da bidezkoa ezer adieraztea, administrazio-baimen honekin zerikusirik ez duen prozedura baita. Plan Bereziaren izapideen barruan egindako txosten-eskaerei dagokienez, organo eskudunari zuzendu beharko zaizkio izapidetu ditzan.

c) Noryeste Ureztatzaileen Komunitateari eta Ebroko Konfederazio Hidrografikoak emandako emakidari eragitea, bai eta Noryeste putzua deitutakoaren balizko erabilerari ere. Sektore Elektrikoaren Legean adierazi bezala, Lege horretan araututako administrazio-baimenak ematen dira proiektua gauzatzeko behar diren gainerako baimenak eta lizentziak alde batera utzita. Horregatik, ez dagokio Ordezkaritza honi lurzatien erabilera arautzea, ezta izan lezaketen ureztatzeko sistemaren araubidea ere; hori horrela, sustatzaileak dagokion erregulazio sektorialean xedatutakoa bete behar du, eta, hala badagokio, behar diren baimenak eskatu behar dizkie Ureztatzaileen Komunitateari eta Ebroko Konfederazio Hidrografikoari.

Noryeste putzua deitutakoaren balizko erabilerari dagokionez (Arratzua-Ubarrundia eta Vitoria-Gasteizko udal-mugarteetan), besterik gabe adierazi behar da Ordezkaritza honek soilik izapidetzen dituela eta, hala badagokio, baimentzen dituela proiektu zehatzak kokapen zehatzetan, eta kokapenak hautatzea ez dagoela bere jarduera-esparruan.

Dagoen ureztatzeko sisteman izandako eraginari dagokionez, proiektuak haren eroanbideetarako zortasunak errespetatu behar ditu, Noryeste Ureztatzaileen Komunitateak aurretiazko administrazio-baimenaren aldiko alegazioetan adierazi bezala (sustatzailea alegazio horiekin ados agertu zen). Halaber, sustatzaileak adierazi du lanak egin aurretik eroanbideen mapaketa egingo duela georradarra erabiliz, haietan eraginik egon ez dadin.

Ureztatzeko sisteman eragina duten jarduketei dagokienez, berriz, xehetasun-azterketa hidrauliko espezifikoa egin beharko da, hala badagokio. Alabaina, proiektu espezifikoa onestea ez da Ordezkaritza honen eskumena, eta sustatzaileak egokiak diren izapideak egin beharko ditu dagokion organoaren aurrean. Era berean, lanak egin bitartean jarduketak koordinatu beharko dituzte, Ureztatzaileen Komunitatearen erabiltzaileengan eraginik egon ez dadin.

Bideetatik doazen eroanbide elektrikoei dagokienez, lursailean zuzenean lurperatutako kableei dagokienez, sustatzaileak adierazi du babesa jarriko duela trazadura osoan; hartarako, kableak estaltzeko behar beste plaka ezarriko dira zangaren luzera eta zabalera osoan.

d) Bateraezintasuna Nekazaritza eta Basozaintzako Lurralde Plan Sektorialarekin (LPS), eta nekazaritza-balio handiko elementuei eragitea. Berriz adierazi behar da Vitoria Solar 2 proiektuak ingurumen-ebaluazio arrunta izan zuela, eta ingurumen-inpaktuaren adierazpenik baduela, zeinean, beste alderdi batzuekin batera, eragina kontuan hartu baitzen Nekazaritza eta Basozaintzako LPSean oinarrituta, eta prebentzio- eta zuzenketa-neurriak ezarri baitziren (4.4 apartatuan), baita neurri konpentsatzaileak ere (4.12 apartatuan).

e) Bateraezintasuna Energia Berriztagarrien LPSaren hasierako dokumentuarekin, lehentasunez kokatzeko eta baztertzeko irizpideei dagokienez, eta fotovoltaikoetarako ingurumen-sentsibilitateko zonakatzearen proposamenarekin ere. Adierazi behar da Vitoria Solar 2 proiektuaren hasierako eskaera Energia Berriztagarrien LPSaren hasierako dokumentua argitaratu aurrekoa izan zela, eta LPS hori ez dela behin betiko onetsi; horrenbestez, ez zaio aplikagarri proiektu honi. Bestalde, ingurumen-zonakatzeko proposamena erreferentziako dokumentua da, ez-arautzailea.

f) Arau-hutsunea energia berriztagarrien hedapenari dagokionez, energia berriztagarrien LPSa behin betiko onetsita ez dagoelako eta Trantsizio Energetikoaren eta Klima Aldaketaren 1/2024 Legea erregelamenduz garatu gabe dagoelako. Baimen honen izapideak egiteko orduan, indarrean den araudia hartu da kontuan, plan edo erregelamendu jakin batzuk garapen-egoera berean ez izatea alde batera utzita. Sektore Elektrikoaren Legeak berariaz adierazi bezala, baimena ukatu egingo da aplikatu beharreko araudian ezarritako betekizunak betetzen ez baditu bakarrik.

g) Jendaurreko informazioaren izapide berririk ez 21/2013 Legearen ondorioetarako. Adierazi bezala, hasierako proiektuak ingurumen-ebaluazio arrunta jaso zuen, eta, horrenbestez, bete egin zuen jendaurreko informazioaren izapidea, Ingurumen-ebaluazioari buruzko abenduaren 9ko 21/2013 Legean ezarritakoa. Proiektuan egindako aldaketei dagokienez, bosgarren eta seigarren aurrekarietan adierazi bezala, ingurumen-organoak ondorioztatu zuen aldaketok ez zituztela gainditzen ingurumen-ebaluazioari buruzko araudian ingurumen-ebaluazioaren prozedura egiteko ezarritako atalaseak, ingurumen-inpaktuaren adierazpenean adierazten zen bezala. Horregatik, proiektuan egindako aldaketa ez-funtsezkoen aurretiazko administrazio-baimenerako jendaurreko informazioa egin zen 48/2020 Dekretuaren 10.5 artikuluan ezarritakoari jarraikiz, espedientean ez baitaude jasota aldaketok eragina dutenen edo jabeen igarotzen uzteko edo erabiltzeko baimenak. Eraikitzeko baimena batera eskatu zenez, bi administrazio-baimen konkurrenteetarako egin zen jendaurreko informazioa.

h) Kudeaketa-plana onartua duen fauna mehatxatua. Igaraba arruntarengan (Lutra lutra) eragina duela adierazten da. Horri dagokionez, adierazi behar da ingurumen-inpaktuaren adierazpenak faunaren gaineko eragina hartu zuela kontuan, 4.3.5 apartatuan, eta igarabaren nahiz bisoi europarraren habitati buruzko neurri konpentsatzaileak ezarri ziren, 4.12 apartatuan.

i) Osasunerako eraginak. Eragin posibleak alegatzen dira koroa efektuaren ondorioz airea ionizatzeagatik eta poliklorobifeniloa (PCB) eta sufre hexafluoruroa (SF6) erabiltzeagatik. Horri dagokionez, adierazi behar da proiektutako goi-tentsioko lineak lurpekoak direla, eta horregatik, ezinezkoa da airea ionizatzea; halaber, ez da PCBa duten instalaziorik proiektatzen (hura erabiltzea debekatuta dago gaur egun). SF6a erabiltzeari dagokionez, erregelamenduz onartutako konposatua da gaur egun goi-tentsioko ekipamenduetan erabiltzeko, instalazioaren eragiketako tentsio-mailetarako.

j) Proiektuaren metatze-efektuak edo efektu sinergikoak. Horri dagokionez, berriz adierazi behar da Vitoria Solar 2 proiektuak kontuan izan zituela, ingurumen-inpaktuaren azterketan, proiektuaren metatze-efektuak edo efektu sinergikoak, eta aurretiazko ingurumen-inpaktuaren adierazpena eta administrazio-baimena dituela jada, 2021eko abuztuaren 11n egindako eskaeran oinarrituta (hau da, sustatzaile berak aurkeztutako beste proiektu batzuena baino askoz lehenagokoa).

k) Proiektuaren zatiketa. Alegatzen da Vitoria Solar 1 eta Vitoria Solar 2 proiektuek instalazio bakarra osatuko luketela, eta baterako potentziak 50 MW-tik gorakoa izanik, organo eskuduna Estatuko Administrazio Orokorra izan beharko litzatekeela. Horri dagokionez, adierazten da Vitoria Solar 2 proiektuak sarbide eta konexioko baimen independentea duela, eta ebakuazio-azpiegitura propioak dituela, baina Promotores Vitoria azpiestazioan ebakuazio-azpiegiturak partekatzen dituela sustatzaile beraren garraio-sareko posizio bereko sarbide- eta konexio-baimena duten beste proiektu batzuekin (tartean Vitoria Solar 1 proiektua); aukera hori jasota dago aplikatu beharreko araudian (1955/2000 Errege Dekretuaren 123.2 art. eta 1183/2020 Errege Dekretuaren 12.3 artikulua). Horregatik, alegazioa baztertu beharrekoa da.

Aitzitik, alegatu egin da instalazio fotovoltaikoa osatzen duten esparru edo uharteetako bakoitza instalazio independentetzat hartu beharko litzatekeela. Aplikatu beharreko araudiak ez du eragozten proiektatutakoa bezalako konfigurazioa, modulu fotovoltaikoak dauden esparru desberdinek osatutakoa.

I) José Ramón Ruiz de Azua jaunak egindako alegazioari dagokionez (haren bidez adierazi zuen ez duela inolako akordiorik lortu Indarberri SL enpresarekin bere jabetzako lurzatiak erabiltzeko; ez ditu identifikatu), adierazi behar da baimen hau ematen dela hirugarrenek lituzketen eskubideak galarazi gabe eta jabetza-eskubidea errespetatuta.

m) Easy Above Systems, SLU sustatzaileak alegatu zuen enpresa hark sustatutako proiektuen ebakuazio-lineen trazadurak (PSFV AgriPV BW Ramos, BW Mendijur Solar eta VT Elburgo Solar, Ordezkaritza honetako izapideen zenbait alditan) zati batez bat datozela Vitoria Solar 2 proiektuan jasotako instalazioekin. Proiektu haien ebakuazioen trazadurak eta Vitoria Solar 2 instalazioko ebakuazioa bateragarri egiteko aukera eskatzen zuen, dauden bideetatik batera joan zitezen, baita zanga beretan ere.

Alegazioa Indarberri SLri helarazita, obra-zuinketan bide-ertzak erabiltzeko aukera ebaluatzeko prest agertu zen; halere, adierazi zuenez, proiektuen garapen-fase desberdinen ondorioz, ezin dira batera garatu obra zibila eta Easy Above Systems, SLUk sustatutako proiektuak.

Bestalde, landa-bideen ezaugarriak direla bide –zabalera mugatua dute–, baliteke teknikoki ezinezkoa izatea aurreikusitako ebakuazio guztiak erregistratutako landa-bide beretatik joatea, eta hartarako organo eskudunari (Arabako Foru Aldundiaren Nekazaritza Garapenerako Zerbitzua) kontsulta egin beharko zaio, eraikitzeko administrazio-baimenak izapidetzean, ea Easy Above Systems, SLUk sustatuko proiektuek bide haietan zer-nolako eragina duten.

Adierazitako oinarri juridikoekin eta aplikazio orokorrekoak eta aldi berean aplikatzekoak diren beste batzuekin bat etorriz, Proiektu Estrategikoen eta Industria Administrazioaren zuzendariak honako hau

EBAZTEN DU:

Lehenengoa.– Aurretiazko administrazio-baimena ematea hasieran baimendutako proiektuaren aldean egindako aldaketei eta eraikitzeko administrazio-baimena Indarberri SLk sustatutako «Vitoria Solar 2» proiektuari, Vitoria-Gasteiz eta Burgeluko udal-mugarteetan (Araba).

Proiektu horrek instalazio hauek ditu:

a) Eguzki-instalazio fotovoltaikoa, 7 eremu hesitu dituena, Vitoria-Gasteizko eta Burgeluko udal-mugarteetan, 59,23 ha-ko azalerakoa; elementu hauek osatzen dute:

– 90.074 panel, 555 Wp-koak, guztira 49,99 MWp-ko puntako potentzia dutenak.

– 3.437 kVA-ko 14 inbertsore, guztira 48,12 MW-ko potentzia instalatua dutenak.

– Zazpi transformazio-zentro (0,6/30 kV), 7,2 MVA-koak.

– Ebaketa-zentro bat, 30 kV-ekoa, instalazioko poligonalean, Vitoria-Gasteizko udal-mugartean.

– Transformazio-zentroek elkarrekin eta ebaketa-zentroarekin bat egiten dute, lurperatutako 30 kV-eko 3 barne-zirkuituren bidez; Vitoria-Gasteizko eta Burgeluko udal-mugarteei eragiten diete.

b) 30 kV-eko linea elektrikoa, instalazio fotovoltaikoan dagoen 30 kV-eko ebaketa-zentroa eta 220/30 kV-ko Promotores Vitoria azpiestazioa (berrian berri eraikia) elkarri lotzeko; ez da baimen honen xede. Lineak lurpeko ibilbidea du, Vitoria-Gasteizko udal-mugartean.

c) Sortutako energia garraio-sarera (Red Eléctrica de España, SAUren 220 kV-eko Vitoria azpiestazioan) ebakuatuko da Indarberri, SL sustatzailearen Vitoria Solar 1 proiektuarekin eta posizio berean emandako sarbide-baimena duten bestelako proiektuekin partekatutako ebakuazio-azpiegituren bitartez (01GEY 202400006 espedientea).

Bigarrena.– Agintzea baimen hau eskatzaileari eta pertsona interesdunei jakinaraz dakiela, eta argitara dadila, halaber, Euskal Herriko Agintaritzaren Aldizkarian eta Arabako Lurralde Historikoko Aldizkari Ofizialean.

Hirugarrena.– Ebazpen hau ematen da honako baldintza orokorrak kontuan hartuta:

1.– Baimendutako proiektuari jarraikiz egin beharko dira obrak, kasu bakoitzean eskatu eta baimenduko diren aldaketekin. Bete egingo dira, orobat, proiektuaren ingurumen-inpaktuaren adierazpenean ezarritako baldintzak eta, zehazki, Industria Administrazioko Lurralde Ordezkaritzan bertan ezarritako dokumentazio hau, ingurumen arloko organoari helarazteko:

– Obrak hasi aurretik, ingurumena zaintzeko programaren dokumentu bategina, ingurumena lehengoratzeko eta paisaia integratzeko proiektua eta konpentsazio-plana.

– Obrak amaitutakoan, obrak egin bitartean izandako gorabeheren erregistroa eta babes- eta zuzenketa-neurrien betetze-mailarena. Halaber, urtean behin, jarduera hasten denetik eta jardueraren bizitza baliagarri osoan, eta lehengoratzearen berme-aldiaren amaieran, ingurumena zaintzeko programaren emaitzei buruzko dokumentua.

2.– Martxan jartzeko epea hiru urtekoa izango da, ebazpen honen egunetik aurrera. Epe hori bukatzen bada instalazioa ustiatzeko baimena eskatu gabe, ebazpen hau iraungitzat jotzeko aukera egongo da, alde batera utzi gabe sustatzaileak heltzea abenduaren 27ko 8/2023 Errege Lege Dekretuaren, Ukrainako eta Ekialde Hurbileko gatazken ondorio ekonomiko eta sozialei aurre egiteko eta lehortearen ondorioak arintzeko neurriak hartzekoaren, 28. artikuluan xedatutakoari, behin betiko ustiatzeko baimena eskuratzeko administrazio-epea luzatzeko.

3.– Instalazioen titularrak, proiektua gauzatu ondoren, eta arauzko egiaztapenak egin ondoren, obrak amaitu direla jakinaraziko dio Industria Administrazioko Arabako Lurralde Ordezkaritzari, ustiatzeko eta martxan jartzeko baimena eman dezan. Horrekin batera, aplikatu beharreko erregelamendu teknikoetan adierazten den dokumentazioa aurkeztuko du. Horrez gain, Ekoizpen Elektrikoko Instalazioen Administrazio Erregistroan inskribatu beharko da, instalazioa zerbitzuan dagoenean.

4.– Ebazpen hau eman da ezertan eragotzi gabe udal- eta probintzia-mailako eskumeneko baimen edo lizentziak, ez eta obrak egiteko beharrezkoak diren udal- eta foru-eskumeneko edo beste baimen batzuk ere, lurralde- eta ingurumen-antolamenduari dagozkionak bereziki, eta eskatzaileak haiek eskatu beharko ditu hala dagokionean. Era berean, hirugarrenen eskubideak alde batera utzi gabe ematen da, jabetza-eskubidea salbu utzita.

Baldin eta, dagozkien baimenak eta lizentziak izapidetzetik eta sustatzaileak onetsitako baldintza teknikoak betetzetik gauzatzeko proiektuaren funtsezko aldaketak badatoz, eta aldaketa horiek ingurumen-ebaluazioa izateko beharra ondorioztatzen bada, dagokion baimena eskatu beharko da.

5.– Obrak gauzatu aurretik, Aireko Segurtasunaren Estatuko Agentziaren (AESA) aldeko erabakia eskuratu beharko da.

6.– Jarduera uzteko, ixteko aurretiazko administrazio-baimena beharko da. Hartarako, eskaera egin beharko da, justifikazio-memoriarekin, plano eguneratuekin eta instalazioa eraisteko planarekin batera, eta eskaera ingurumen-inpaktuaren adierazpenean ezarritako baldintzei egokitu beharko zaie.

7.– Sistemaren operadoreak ezartzen dituen arau teknikoak eta jarduteko prozedurak bete beharko dira.

Ebazpen honek ez dio amaiera ematen administrazio-bideari, eta, beraz, beronen aurka, gora jotzeko errekurtsoa jar dakioke Industria, Trantsizio Energetiko eta Jasangarritasuneko sailburuari, hilabeteko epean, ebazpen hau jakinarazi eta hurrengo egunetik aurrera, bat etorriz, betiere, Administrazio Publikoen Administrazio Prozedura Erkidearen 39/2015 Legearen 121. artikuluan eta hurrengoetan xedatutakoarekin.

Vitoria-Gasteiz, 2025eko otsailaren 6a.

Arabako lurralde-ordezkaria falta izanik, eta bat etorriz Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuaren lehenengo xedapen gehigarriak d) eta e) apartatuan dioenarekin.

Trantsizio Energetikoko sailburuordea,

IRANTZU ALLENDE FERNÁNDEZ DE ERIBE.

Azterketa dokumentala