Euskal Herriko Agintaritzaren Aldizkaria

15. zk., 2025eko urtarrilaren 23a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

UNIBASQ-EUSKAL UNIBERTSITATE SISTEMAREN KALITATEA EBALUATU ETA EGIAZTATZEKO AGENTZIA

365

AKORDIOA, 2025eko urtarrilaren 9koa, Unibasq-Euskal Unibertsitate Sistemaren Kalitate Agentziaren Gobernu Kontseiluarena, zeinaren bidez onartu eta argitara ematen baita doktore ikertzaileak, irakasle agregatuak, irakasle osoak, ikerkuntzako irakasleak eta unibertsitate pribatuko doktore-tituludun irakasleak ebaluatzeko eta akreditatzeko ohiko deialdia.

Unibertsitate Sistemaren Lege Organikoaren 85. artikuluan ezarritakoaren arabera eta lege organiko horren araubide iragankorraren babesean, eta kontuan izanik Euskal Unibertsitate Sistemaren otsailaren 25eko 3/2004 Legea, Unibasq-Euskal Unibertsitate Sistemaren Kalitate Agentziaren ekainaren 28ko 13/2012 Legea eta abenduaren 28ko 350/2010 Dekretuaren bidez aldatutako azaroaren 13ko 192/2007 Dekretuaren 2. artikulua (dekretu horren bidez, Euskal Herriko Unibertsitateko irakasle eta ikertzaile kontratatuek eta unibertsitate pribatuetako doktore-tituludun irakasleek Unibasqen ebaluazioa eta akreditazioa lortzeko prozedura arautzen da), eta bat etorriz deialdia irekitzean indarrean dagoen protokoloan ezarritakoarekin, Agentziaren Gobernu Kontseiluak

EBAZTEN DU:

Onartzea eta argitara ematea honako figura hauetako bat egiaztatu nahi duten irakasleen irakaskuntza-jarduera eta/edo ikerketa-jarduera ebaluatzeko deialdia: doktore ikertzailea, irakasle agregatua, irakasle osoa, ikerkuntzako irakaslea eta unibertsitate pribatuko irakasle doktorea. Horretarako, aintzat hartuko dira oinarri hauek:

OINARRIAK

Lehenengoa.– Xedea.

1.– Deialdi honen xedea da figura hauetako baten kontratua lortu nahi duten irakasleen irakaskuntza-jarduera eta/edo ikerketa-jarduera ebaluatzea: Euskal Herriko Unibertsitateko doktore ikertzailea, irakasle agregatua, irakasle osoa, ikerkuntzako irakaslea, eta unibertsitate pribatuko irakasle doktorea.

Bigarrena.– Figura bakoitzerako eskabidea aurkezteko baldintzak:

a) Irakasle osoaren modalitatean: agregatu figuraren akreditazioa edo baliokidea edukitzea.

b) Irakasle agregatuaren modalitatean: doktore-titulua edukitzea eta, gutxienez, irakasle eta ikertzaile gisa hiru urtez jardun izana, doktore egin eta gero, ahal dela.

c) Unibertsitate pribatuko irakasle doktorearen modalitatean: doktore-titulua izatea.

d) Doktore ikertzailearen modalitatean: doktore-titulua edukitzea eta unibertsitateko irakasle edo ikertzaile gisa hiru urteko jarduna egiaztatzea.

e) Ikerkuntzako irakaslearen modalitatean: doktore ikertzaile edo irakasle agregatu figuraren akreditazioa edo baliokidea edukitzea.

Baldintza horiek deialdia amaitu baino lehenagotik betetzen direla egiaztatzen duten ziurtagiriak aurkeztu beharko dira.

Hirugarrena.– Ebaluazioaren eskabidea aurkezteko epea.

Eskabideak aurkezteko epea 2025eko otsailaren 17tik 2025eko martxoaren 17ra artekoa izango da figura hauetarako: doktore ikertzailea, irakasle agregatua, irakasle osoa, ikerkuntzako irakaslea eta unibertsitate pribatuko irakasle doktorea.

Laugarrena.– Ebaluazioaren eskabidea betetzea.

1.– Interesdunak telematikoki egin behar du eskaera, Agentziaren webgunean (www.unibasq.eus) horretarako argitaratutako aplikazio informatikoa erabilita, bat etorriz ekainaren 22ko 11/2007 Legearen 27.6 artikuluarekin (ekainaren 23ko BOE) eta abenduaren 28ko 350/2010 Dekretuaren bidez aldatutako azaroaren 13ko 192/2007 Dekretuaren 3.2 artikuluarekin.

2.– Eskabidean merezimendu guztiak aipatu behar dira, banan-banan, eta ez dira kontuan hartuko deialdi honetako eskabidean aipatzen ez diren merezimenduak. Gainera, eskatzailearen curriculum vitae osoa aurkeztu beharko da, bai eta eskatutako baldintzak eta interesdunaren historia akademikoa osatzen duten merezimendu guztiak egiaztatzen dituen dokumentazioaren kopia eskaneatua ere (merezimendu horiek deialdian parte hartzeko epea amaitu baino lehen egiaztatu behar dira). Zuzen egiaztatzen ez diren merezimenduak ez dira kontuan hartuko ebaluazioan.

3.– Euskal Autonomia Erkidegoko Administrazioaren Tasa eta Prezio Publikoei buruzko Legearen 95 bis eta 95 quinquies artikuluei jarraikiz, tasa bat ezarriko da irakasleak akreditatzeko ebaluazioaren eskabide bakoitza izapidetzeagatik, Agentziaren webgunean argitaratutako prozeduraren arabera (www.unibasq.eus).

4.– Ez da beharrezkoa izango merezimenduak egiaztatzeko dokumentazioa aurkeztea, baldin eta lehendik Unibasq Agentziaren esku badago dokumentu horien kopia, irakasle eta ikertzaileak akreditatzeko aurreko deialdietan aurkeztu direlako. Horrelakoetan, nahikoa izango da dagokion espedientearen erreferentzia egitea eskabidean.

5.– Unibasqek une oro eskubidea izango du eskatzaileei dokumentazioa aurkez dezatela eskatzeko, baldin eta beharrezkoa bada legez eskatutako baldintzak edo alegatutako merezimenduak betetzen direla egiaztatzeko. Unibasqeko ebaluazio-prozesuetan gardentasuna eta sinesgarritasuna sustatzeko, eskatzaileek informazio egiazkoa eta zehatza emateko konpromisoa hartzen dute. Horrela ez bada, Unibasqeko Etika eta Eskubideen Batzordearen 2019ko ekainaren 24ko Akordioan xedatutakoa aplikatuko da (akordio horren bidez, Unibasqeko ebaluazio-prozesuetan pertsonek edo entitateek emandako informazioetan egon daitezkeen irregulartasunei aurre egiteko prozedura onartzen da), dagozkion erantzukizun administratibo edo penalez gain.

Bosgarrena.– Eskabidea formalizatzea.

1.– Eskabidea behar bezala beteta aurkezteaz gain, interesdunek eskabidea formalizatu beharko dute, Unibasqi honako dokumentu hauek bidalita, deialdian ezarritako epearen barruan:

a) Egoitza elektronikoan prozesua amaitu eta gero sortzen den laburpen-dokumentua.

2.– Aurreko puntuan aipatutako dokumentuak bide honetatik soilik bidaliko zaizkio Unibasqi:

Bitarteko elektronikoetatik: Erregistro telematikoa www.euskadi.net helbide elektronikoan egingo da, bitarteko elektronikoz, bat etorriz Administrazio Elektronikoari buruzko 21/2012 Dekretua bigarrenez aldatzen duen apirilaren 21eko 55/2020 Dekretuarekin (2020ko apirilaren 30eko EHAA). Izapidetzeko argibideak eskuragarri daude aplikazio informatikoan (https://app.unibasq.eus).

Eskabidearen osteko izapideak helbide honetan egingo dira, bide elektronikoz: https://www.euskadi.eus/nire-karpeta/y22-izapide2/eu/

Eskatzaileek, bide hori erabil ahal izateko, sinadura elektronikoko ziurtagiri aitortu bat eduki beharko dute.

Seigarrena.– Eskabidearen edukia.

Eskabidean, datu pertsonalez gain, ebaluazioa edo txostena egiteko eskaera zer kontratu motari dagokion eta zer arlo ezagutzari dagokion adierazi beharko da. Deialdi berean, kontratu mota bererako, gehienez ere bi ezagutza-arloren ebaluazio edo txostena egiteko eskatu ahal izango da, irakasle osoen eta ikerkuntzako irakasleen modalitateetan izan ezik; kasu horietan, txosten bakarra eskatu ahal izango da jakintza-arlo bakar baterako, figura horiek ezagutza-arlo bati lotutako ibilbide koherentea eta sendoa eskatzen baitute.

Zazpigarrena.– Ebaluazio-irizpideak.

Unibasqen ebaluazio-batzordeek, beren jardunean, bat egingo dute Agentziak duen irakasleak eta ikertzaileak ebaluatzeko eta akreditatzeko protokoloan ezarritako ebaluazio-irizpideekin. Protokolo hori Agentziaren Aholku Batzordeak onartu zuen, 2024ko abenduaren 16an, Unibasq – Euskal Unibertsitate Sistemaren Kalitate Agentziari buruzko ekainaren 28ko 13/2012 Legearen 9.2b artikuluaren arabera, eta Agentziaren webguneko irakasleak eta ikertzaileak akreditatzeko zerbitzuari dagokion atalean dago argitaratuta (www.unibasq.eus).

Zortzigarrena.– Ebazpena.

1.– Unibasqeko zuzendariak baterako ebazpen bat emango du https://www.euskadi.eus iragarki-taula elektronikoan, emaitzak jakinarazteko. Ebazpen hori iragarki-taula elektronikoan argitaratzen den eguna izango da, hain zuzen ere, ebazpenaren jakinarazpena komunikatzeko egun formala, xede guztietarako. Nolanahi ere, ondorengo egunetan ebazpen indibidualizatua bidaliko zaie eskatzaileei Administrazio Elektronikoaren bidez.

Ebazpen horren aurka berraztertzeko errekurtsoa jarri ahal izango da, nahi izanez gero, Unibasqen aurrean, hilabeteko epean, edo zuzenean administrazioarekiko auzi-errekurtsoa jarri ahal izango da administrazioarekiko auzien epaitegi eskudunetan, bi hilabeteko epean (bi kasuetan, ebazpen kolektiboa iragarki-taula elektronikoan jakinarazten denetik aurrera hasiko dira epeak).

2.– Ebazpenetan, adierazi beharko da ebaluazioa zer kontratu-figuratarako egin den, ebaluazioa positiboa edo negatiboa izan den eta txostena aldekoa edo kontrakoa izan den. Halaber, ebazpena kontrakoa izan bada, dagokion batzordeak egindako ebaluazioaren edo txostenaren laburpena eskuragarri egongo da eskabidea bete den aplikazio informatikoan (https://app.unibasq.eus).

3.– Ebaluazioaren ebazpenak deialdi honetan eskabideak aurkezteko ezarritako epea amaitu eta hurrengo sei hilabeteen barruan jakinarazi beharko zaizkie interesdunei, alde batera utzi gabe Herri Administrazioen Araubide Juridikoaren eta Administrazio Prozedura Erkidearen urriaren 1eko 39/2015 Legearen 22 eta 23. artikuluetan xedatutakoa.

4.– Administrazio-isiltasunaren zentzua ezeslea izango da, Euskal Unibertsitate Sistemaren Legearen 85.3 artikuluak akreditazio-prozedura horietarako ezartzen duen bezala.

5.– Ebaluazio negatiboa jaso duen interesdunak ezin izango du figura bererako beste ebaluazio-eskabiderik aurkeztu harik eta ebazpena jakinarazi eta sei hilabete igaro arte, bat etorriz abenduaren 28ko 350/2010 Dekretuaren bidez aldatutako azaroaren 13ko 192/2007 Dekretuaren 8.2 artikuluarekin (dekretu horren bidez, Unibasqen ebaluazioa eta akreditazioa lortzeko prozedura arautzen da).

Bederatzigarrena.– Dokumentu-araubidea eta datu pertsonalen inguruko eskubideak.

1.– Datuak babesteko araudiaren arabera (kontuan hartuko da Europako Parlamentuaren eta Kontseiluaren 2016/679 Erregelamendua, 2016ko apirilaren 27koa (RGPD), bai eta 3/2018 Lege Organikoa ere, abenduaren 5ekoa, Datu Pertsonalak Babestekoa eta Eskubide Digitalak Bermatzekoa), interesdunek emandako datuak fitxategi pertsonal automatizatu batean sartuta gera daitezke. Unibasq da fitxategiaren titularra, eta Agentziak egindako deialdi-prozesuak garatzeko erabiliko ditu datuak, betiere interesdunek bertan parte hartzen badute.

2.– Zure datu pertsonalak erabili egingo dira, eta tratamendu-jarduera honi erantsiko zaizkio: Irakasleen ebaluazio-programak.

– Arduraduna: Unibasq-Euskal Unibertsitate Sistemaren Kalitate Agentzia.

– Helburua: Unibertsitateko irakasleen irakaskuntzarekin, ikerkuntzarekin, ezagutzaren zabalkundearekin eta kudeaketarekin lotutako merezimenduak ebaluatzea, dagokion programaren arabera.

– Legitimazioa:

Tratamendua beharrezkoa da interes publikoaren aldeko eginkizunen bat betetzeko edo tratamenduaren arduradunari emandako botere publikoak betetzeko.

– Hartzaileak:

Hala badagokio, UPV/EHU, Deustuko Unibertsitatea, Mondragon Unibertsitatea, Euneiz eta Eusko Jaurlaritzaren Hezkuntza Saila.

– Eskubideak: datuak eskuratzeko, zuzentzeko eta ezabatzeko eskubidea duzu, baita informazio osagarrian jasotzen diren bestelako eskubide batzuk ere.

– Informazio osagarria: gure webgunean kontsulta dezakezu datuen babesari buruzko informazio osagarri eta zehaztua:

www.euskadi.eus/informazio-klausulak/web01-sedepd/eu/gardentasuna/034900-capa2-eu.shtml

– Araudia:

Datuen Babeserako Erregelamendu Orokorra (www.euskadi.eus/contenidos/informacion/normativa_dpd/eu_def/adjuntos/RGPD-2016_0679_eu.pdf).

3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa (www.boe.es/boe_euskera/dias/2018/12/06/pdfs/BOE-A-2018-16673-E.pdf).

Hamargarrena.– Errekurtsoak.

Deialdi hau eta haren oinarriak behin betikoak dira administrazio-bidean, eta, haien aurka, interesdunek administrazioarekiko auzi-errekurtsoa aurkeztu ahal izango diete Euskal Autonomia Erkidegoko administrazioarekiko auzien jurisdikzio-organoei, bi hilabeteko epean, deialdia Euskal Herriko Agintaritzaren Aldizkarian argitaratu eta hurrengo egunetik hasita, hala ezarrita baitago Herri Administrazioen Araubide Juridikoaren eta Administrazio Prozedura Erkidearen urriaren 1eko 39/2015 Legearen 114. artikuluan eta Administrazioarekiko Auzien Jurisdikzioa arautzen duen uztailaren 13ko 29/1998 Legearen 14. eta 46. artikuluetan. Halaber, nahi izanez gero, berraztertzeko errekurtsoa jarri ahal izango diote Agentziari, hilabeteko epean, adierazitako 39/2015 Legearen 123. eta 124. artikuluei jarraikiz.

Vitoria-Gasteiz, 2025eko urtarrilaren 9a.

Unibasqeko Gobernu Kontseiluko burua,

JUAN IGNACIO PÉREZ IGLESIAS.

Azterketa dokumentala