Euskal Herriko Agintaritzaren Aldizkaria

1. zk., 2025eko urtarrilaren 2a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

5

473/2024 DEKRETUA, abenduaren 17koa, SPRI-Enpresa Garapenerako Euskal Agentziari baimena ematekoa Parque Científico y Tecnológico de Gipuzkoa - Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko, eta Euskal Autonomia Erkidegoko Administrazio Orokorraren eta Instituzionalaren zuzeneko eta zeharkako titulartasuneko akzioen ordezkariei baimena ematekoa sozietate horren estatutuetako 2. artikulua aldatzeko onespena emateko.

SPRI-Enpresen Garapenerako Euskal Agentziak Parque Científico y Tecnológico de Gipuzkoa - Gipuzkoako Zientzia eta Teknologia Parkea SA sozietate publikoaren kapital sozialean parte hartzen du, eta haren akziodun nagusia da.

Parque Científico y Tecnológico de Gipuzkoa - Gipuzkoako Zientzia eta Teknologia Parkea SA sozietatearen xede da industria-arloko ekimenak eta inbertsioak bultzatzea eta sustatzea. Horretarako, zenbait eraikin egin eta lursailak egokitzen ditu, eta horien esplotazioa kudeatzen du, errentamenduen bidez, jabetza transferituz edo beste molde batzuen bidez, are ordainik gabe lagaz ere. Sozietateak, halaber, lokalak eta zerbitzuak sustatu eta merkaturatzen ditu, teknologia zabaldu eta transferitzeko jarduerak gauzatzen ditu, eta parkean ezarri nahi duten enpresak gonbidatzen eta hautatzen ditu, hau da, teknologia aurreratuan jarduerak egingo dituzten enpresak.

Parque Científico y Tecnológico de Gipuzkoa - Gipuzkoako Zientzia eta Teknologia Parkea SA sozietateak kapital-zabalkuntzaren beharra dauka, C eraikineko lokal eta garaje-plaza batzuk erosi ahal izateko, Parkearen jabetzako eraikinen okupazio maila altua baita.

SPRI-Enpresen Garapenerako Euskal Agentziaren Administrazio Kontseiluak baimena eskatu du Parque Científico y Tecnológico de Gipuzkoa - Gipuzkoako Zientzia eta Teknologia Parkea SA sozietatearen kapital-gehikuntzan parte hartzeko. Baimen hori beharrezkoa da Euskadiko Ondareari buruzko Legearen 110.1 artikuluan xedatutakoaren arabera (azaroaren 6ko 2/2007 Legegintzako Dekretuaren bidez onartu zen lege horren testu bategina); izan ere, artikulu horrek ezartzen du enpresa-ondarea osatzen duten ondasunak eta eskubideak eskuratzeko, aurretiaz, Gobernu Kontseiluaren baimena behar dela, dekretu bidez emana.

Sozietatea egitekoa den kapital-zabalkuntzan, SPRI-Enpresen Garapenerako Euskal Agentzia enteak guztira 1.123.600 euroko zenbatekoarekin parte hartuko luke, hau da, proposatutako zabalkuntzaren % 72,93rekin. Hala, % 68,52koa izango da aurrerantzean SPRIk Parque Científico y Tecnológico de Gipuzkoa - Gipuzkoako Zientzia eta Teknologia Parkea SAren kapitalean izango duen partaidetza.

Kapital-zabalkuntzak berekin dakar kapital-sozietateen estatutuen artikulua berridatzi beharra. Hori dela eta, Euskadiko Ondareari buruzko Legearen testu bateginaren 111.2 artikulua aplikatu behar da, zeinak ezartzen baitu Euskal Autonomia Erkidegoko Administrazio Orokorraren eta Instituzionalaren zuzeneko eta zeharkako titulartasuneko akzioen ordezkariek, sozietate-estatutuak onartzearen edo aldatzearen alde egiteko, Gobernu Kontseiluaren baimena beharko dutela, eta ondareari buruzko eskumenak dituen sailburuak eta sozietatea loturik duen sailburuak biek batera proposatu behar dutela baimena ematea.

Ondorioz, Ogasun eta Finantzetako sailburuak eta Industria, Trantsizio Energetiko eta Jasangarritasuneko sailburuak batera proposatuta, Gobernu Kontseiluak 2024ko abenduaren 17an egindako bilkuran gaia aztertu eta onartu ondoren, hau

XEDATZEN DUT:

1. artikulua.– SPRI-Enpresen Garapenerako Euskal Agentziari baimena ematea Parque Científico y Tecnológico de Gipuzkoa - Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko. Milioi bat ehun eta hogeita hiru mila eta seiehun eurokoa izango da parte-hartzea (1.123.600 euro), hau da, kapital-zabalkuntzaren % 72,93. Eragiketa horren ostean, % 68,53ko partaidetza izango du SPRI-Enpresen Garapenerako Euskal Agentziak sozietate horretan.

2. artikulua.– SPRI-Enpresen Garapenerako Euskal Agentziaren titulartasunekoak diren akzioen ordezkariei baimena ematea kapital-zabalkuntzaren ondorioz Parque Científico y Tecnológico de Gipuzkoa - Gipuzkoako Zientzia eta Teknologia Parkea SA sozietatearen estatutuen 2. artikulua aldatzeko onespena emateko. Artikulu horren idazketan, kapital sozialaren zenbateko berria adieraziko da.

AZKEN XEDAPENA

Dekretu honek onartzen den egunetik aurrera izango ditu ondorioak.

Vitoria-Gasteizen, 2024ko abenduaren 17an.

Lehendakaria,

IMANOL PRADALES GIL.

Ogasun eta Finantzetako sailburua,

NOËL D’ANJOU OLAIZOLA.

Industria, Trantsizio Energetiko eta Jasangarritasuneko sailburua,

MIKEL JAUREGI LETEMENDIA.

Azterketa dokumentala