Euskal Herriko Agintaritzaren Aldizkaria

209. zk., 2024ko urriaren 25a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

LEHENDAKARITZA

4906

42/2024 DEKRETUA, urriaren 18koa, lehendakariarena, zeinaren bitartez lehendakariaren eskumenak eskuordetzen baitira eLankidetza-Lankidetzarako eta Elkartasunerako Euskal Agentziaren presidentearen eginkizunei dagokienez.

Ekainaren 19ko 5/2008 Legeak, zeinaren bidez eLankidetza-Lankidetzarako eta Elkartasunerako Euskal Agentzia sortu eta arautzen baita, 8. artikuluan ezartzen duenez, Agentziaren Lehendakaritza lankidetzan eta elkartasunean eskumena duen sailburuari dagokio, eta Lehendakariordetza, berriz, arlo horretan eskumena duen sailburuordeari.

Euskal Autonomia Erkidegoko Administrazio Orokorreko sailak sortu, ezabatu eta aldatzen dituen eta sail bakoitzaren egitekoak eta jardun-arloak finkatzen dituen lehendakariaren ekainaren 23ko 18/2024 Dekretuaren 4.3 artikuluaren arabera, lankidetza eta elkartasun arloa Lehendakaritzari esleitu zaio.

Orain izapidetzen ari den Egitura Organikoari buruzko Dekretuaren proiektuko 4.2 artikuluan aurreikusten denez, eLankidetza-Lankidetzarako eta Elkartasunerako Euskal Agentzia zuzenbide pribatuko ente publikoa Lehendakaritzari atxikita egongo da Kanpo Harremanen eta Euskadi Globalaren Idazkaritza Nagusiaren bidez, Garapenerako Lankidetzaren Euskal Agentzia sortu eta arautzen duen ekainaren 19ko 5/2008 Legean (ondoren Lankidetzarako eta Elkartasunerako otsailaren 15eko 3/2024 Legeak aldatua) ezarritakoari jarraikiz, eta lankidetzaren eta elkartasunaren arloa eLankidetza-Lankidetzarako eta Elkartasunerako Euskal Agentziari dagokio.

Hortik ondorioztatzen da, indarrean dagoen araudian ezarritakoaren arabera, lehendakariari dagokiola agentzia horretako presidentea izatea; izan ere, Lehendakaritzaren egungo egitura organikoan, Jaurlaritzako kide bati berez lotuta dauden eginkizunak lehendakariak berak bete behar ditu.

Sektore Publikoaren Araubide Juridikoaren urriaren 1eko 40/2015 Legearen 9. artikuluan ezarritakoaren arabera, administrazio publikoetako organoek administrazio bereko beste organo batzuen esku utz ditzakete esleituta dituzten eskumenak. Gauza bera ezartzen da Euskal Sektore Publikoaren maiatzaren 12ko 3/2022 Legearen 25. artikuluan.

Administrazio-jardunean arintasun eta eraginkortasun handiagoa lortzeko, eta eLankidetza-Lankidetzarako eta Elkartasunerako Euskal Agentzia Lehendakaritzari atxikitzearen ondorioz, aipatutako Agentziako Lehendakaritzari esleitutako eskumenak eskuordetu behar dira.

Hori dela eta, honako hau

XEDATZEN DUT:

1. artikulua.– eLankidetza-Lankidetzarako eta Elkartasunerako Euskal Agentziaren lehendakariorde den aldetik, Europar Batasuneko eta Kanpo Harremanetarako Idazkaritza Nagusiko titularrari eskuordetzea eLankidetza-Lankidetzarako eta Elkartasunerako Euskal Agentziaren presidentetzari dagokionez lehendakariari esleitutako eskumenak.

2. artikulua.– Dekretu honen bidez eskuordetutako eskumenak edozein unetan eskuordetu ahal izango ditu organo eskuordetzaileak.

3. artikulua.– Xedapen honek emandako eskumenen eskuordetzaz baliatuz ematen diren ebazpen guztietan berariaz adierazi beharko da inguruabar hori, eta dekretu hau onartu den eguna eta Euskal Herriko Agintaritzaren Aldizkarian argitaratu den eguna aipatu beharko dira.

4. artikulua.– Dekretu hau Euskal Herriko Agintaritzaren Aldizkarian argitaratu eta hurrengo egunean jarriko da indarrean.

Vitoria-Gasteizen, 2024ko urriaren 18an.

Lehendakaria,

IMANOL PRADALES GIL.

Azterketa dokumentala