Euskal Herriko Agintaritzaren Aldizkaria

124. zk., 2024ko ekainaren 25a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIAREN GARAPEN, JASANGARRITASUN ETA INGURUMEN SAILA

3036

EBAZPENA, 2024ko apirilaren 30ekoa, Ingurumen Jasangarritasunaren sailburuordearena, zeinaren bidez formulatzen baita ingurumen-inpaktuaren adierazpena eta ematen baita ingurumen-baimen bateratua hondakinak balorizatzearen eta horiek eraikuntzarako agregakin bihurtzearen bidez CO2-a finkatzeko Petróleos del Norte SAk (Petronor) Zierbenako udal-mugartean (Bizkaia) sustatutako jarduerarako.

AURREKARIAK

2023ko apirilaren 27an, Petróleos del Norte SAk (Petronor) Zierbenako udal-mugartean (Bizkaia) hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko jarduerarako ingurumen-baimen bateratua eta ingurumen-inpaktuaren nahitaezko adierazpena emateko eskatu zion Eusko Jaurlaritzako Ekonomiaren Garapen, Jasangarritasun eta Ingurumen Sailari, abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginean xedatutakoarekin bat etorriz.

Eskabidearekin batera, dokumentazio tekniko hau aurkeztu zuen:

– Eskabidea.

– Administrazio-datuak.

– Proiektu teknikoa eta ingurumen-inpaktuaren azterketa.

– Planoak.

– Hirigintza-bateragarritasunaren txostena.

– Isilpeko agiriak.

– Dokumentazio sektoriala: urak, zarata, lurzoruak, industria-segurtasuna.

– Laburpen ez-teknikoa.

Aurkeztutako dokumentazioa egokia zela egiaztatu ondoren, Ingurumenaren Kalitatearen eta Ekonomia Zirkularraren zuzendariaren 2023ko abuztuaren 9ko Iragarkiaren bidez erabaki zen jendaurrean jartzea, 30 egun baliodunez, Petróleos del Norte SAk (Petronor) sustatutako proiektua eta ingurumen-inpaktuaren azterketa, egoki jotzen ziren alegazioak aurkezteko. Iragarkia 2023ko irailaren 5ean argitaratu zen Euskal Herriko Agintaritzaren Aldizkarian eta Eusko Jaurlaritzaren iragarki-taula elektronikoan.

Jendaurreko informazioaren izapidea amaitu ondoren, administrazio-espedientean jasotako alegazioen aurkezpena erregistratu zen. Alegazio horiek ebazpen honen eranskinean deskribatzen dira laburbildurik, ingurumen-organo honek alegazioei buruz egindako gogoetekin batera.

Kutsaduraren Prebentzio eta Kontrol Integratuaren Legearen testu bateginaren 17. eta 18. artikuluetan eta Ingurumen Ebaluazioari buruzko abenduaren 9ko 21/2013 Legearen 37. artikuluan xedatutakoa aplikatuz, Eusko Jaurlaritzako Ingurumen Kalitatearen eta Ekonomia Zirkularraren Zuzendaritzak txostenak eskatu zizkien 2023ko irailaren 5ean eta 2023ko urriaren 26an Zierbenako Udalari, Uraren Euskal Agentziari, Kultura Ondarearen Zuzendaritzari, eta Larrialdiei Aurre Egiteko eta Meteorologiako Zuzendaritzari (Eusko Jaurlaritzaren erakundeak dira horiek guztiak), Bilboko Portuko Agintaritzari, Ekologistak Martxan Bizkaia entitateari eta Eguzkizaleak elkarteari.

2023ko urriaren 2an, 2023ko urriaren 9an, 2023ko urriaren 31n, 2023ko azaroaren 20an, 2023ko azaroaren 21ean eta 2023ko azaroaren 24an, txostenak jaso ziren Eusko Jaurlaritzako Kultura Ondarearen Zuzendaritzaren, Eusko Jaurlaritzako Larrialdiei Aurre Egiteko eta Meteorologiako Zuzendaritzaren, Eusko Jaurlaritzako Osasun Sailaren eta Bilboko Portuko Agintaritzaren aldetik.

Ingurumen-ebaluazioari buruzko abenduaren 9ko 21/2013 Legearen 38. artikuluan xedatuta dagoena aplikatzeko, Ingurumen Jasangarritasuneko Sailburuordetzak, 2023ko urriaren 26an eta abenduaren 1ean, jendaurrean jartzeko izapidearen eta administrazio ukituei eta pertsona interesdunei kontsultatzeko izapidearen emaitza bidali zion sustatzaileari.

2023ko abenduaren 18an, sustatzaileak komunikatu zuen ez zuela beharrezkotzat jotzen ez hasierako proiektua ez ingurumen-inpaktuaren azterketa aldatzea.

2023ko abenduaren 19an eta 2024ko urtarrilaren 17an, Zierbenako Udalaren eta Uraren Euskal Agentziaren txostenak jaso ziren.

2023ko abenduaren 20an, Zierbenako Udalaren txostena bidali zitzaion sustatzaileari.

2024ko apirilaren 17an, Kutsaduraren Prebentzio eta Kontrol Integratuari buruzko Legearen testu bateginaren 20. artikuluan xedatutakoa betez, Petróleos del Norte SAren (Petronor) esku utzi zen espedientea.

2024ko apirilaren 22an, Petróleos del Norte SAk (Petronor) alegazioak aurkeztu zituen, idazki baten bidez. Ebazpen honen eranskinean daude jasota, labur, erakunde honek haiei buruz egindako oharrekin batera.

ZUZENBIDEKO OINARRIAK

Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 1. artikuluan ebazten denaren arabera, lege horren xedea da atmosfera, ura eta lurzorua ez kutsatzea edo, hori ezinezkoa denean, gutxi eta kontrolpean kutsatzea. Horretarako, ingurumen osoak babes-maila handia izatea dela xede, kutsadura prebenitu eta kontrolatzeko sistema integratu bat ezarriko da.

Kutsaduraren Prebentzio eta Kontrol Integratuaren Legearen testu bateginaren 1. eranskinean jasota dauden jarduerak garatzen dira instalazioan; horietaz gainera, baimen honek barnean hartzen ditu aipatutako legearen aplikazio-eremuan sartzea ekarri zuten instalazioaren kokapenean garatzen diren jarduera guztiak, baita, eranskin horietan jasota ez egonik, jarduera horrekin lotura teknikoa dutenak eta sor daitezkeen isurketen eta kutsaduraren gainean ondorioak izan ditzaketenak ere.

Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 9. artikuluan xedatutakoaren arabera, Petróleos del Norte SAk (Petronor) Zierbenan hondakinak balorizatuz eta horiek eraikuntzarako agregakin bihurtuz CO₂-a finkatzeko sustatzen duen proiektua I. eranskinean jasota dago; beraz, ingurumen-baimen bateratua behar du jardunean hasi ahal izateko.

Ildo horretatik, 11. artikuluaren arabera, baimen honen oinarrizko helburua da lege hori aplikatu behar duten instalazioei lege horren xedea betearazteko beharrezkoak diren baldintzak ezartzea, baimena ematerakoan esku hartu behar duten administrazio publiko guztien koordinazioa bermatzen duen prozedura baten bitartez, izapideak bizkortzeko eta partikularren zama administratiboak arintzeko. Era berean, indarrean dagoen araudian jasotako ingurumen-baimenak bildu nahi dira administrazioak esku hartzeko egintza bakar batean. Petróleos del Norte SAren (Petronor) kasuan, baimen hauek ematen dira: hondakin arriskutsuak kudeatzeko baimena, itsasora isurtzeko baimena, isuri atmosferikoetarako baimena, eta, ingurumeneko beste zehaztapen batzuen artean, hondakinak sortzeari eta lurzoruaren eta lurpeko uren kutsadura prebenitu eta zuzentzeari dagozkionak. Gainera, egiaztatu da espedientean beste administrazio eta erakunde eskudun batzuek ere parte hartu dutela, nahitaezko txostenak igorriz.

Aipatutako Kutsaduraren Prebentzio eta Kontrol Integratuari buruzko Legearen testu bateginaren 29. artikuluan xedatuaren arabera, ingurumen-baimen bateratua emateko prozedurak lehentasuna izango du administrazio eskudunek jarduera gogaikarri, osasungaitz, kaltegarri eta arriskutsuak egiten dituzten herritarren jardueran esku hartzeko ezar dezaketen beste edozein bideren gainetik. Ondorio horietarako, ingurumen-baimen bateratua toki-agintarientzat loteslea izango da baldin eta jarduerak egitea ukatzeko bada edota zuzenketa-neurriak ezartzeko, baita 22. artikuluan jasotako ingurumen-alderdiei buruzko guztian ere.

Euskadiko Ingurumen Administrazioaren abenduaren 9ko 10/2021 Legearen 37. artikuluak ezartzen du ingurumen-baimen bateratuaren prozedurak, izapide guztietan, jarduera sailkatuaren lizentziaren prozedura ordeztuko duela.

Abenduaren 9ko 10/2021 Legearen 76.1 artikuluan ezarritakoa betez, ingurumen-inpaktuaren ebaluazio arrunta egingo zaie ingurumen-inpaktuaren ebaluazioaren eremuan jasota dauden proiektuei, kasu honetan, II.D eranskineko D8 8.c multzoan. Hondakin arriskutsuak balorizatzeko industria-instalazio finkoak, olio erabilien kudeaketa barne, egunean 10 tona baino gehiago onartzeko edukiera dutenak.

Halaber, abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 11.4 artikuluan eta Ingurumen Ebaluazioari buruzko abenduaren 9ko 21/2013 Legearen 14. artikuluan xedatutakoa aplikatzeko, autonomia-erkidegoek behar diren neurriak hartuko dituzte honako jarduketa hauek ingurumen-baimen bateratua emateko eta aldatzeko prozeduran sartzeko: ingurumen-inpaktua ebaluatzeko jarduketak, edo ingurumen-ebaluazioko beste figura batzuk, autonomia-erkidegoko araudian aurreikusiak, halakorik eska daitekeenean eta horretarako eskumena autonomia-erkidegoarena denean.

Era berean, Euskadiko Ingurumen Administrazioaren abenduaren 9ko 10/2021 Legearen 43. artikuluko 4. apartatuaren arabera, ingurumen-baimen bateratuaren mendeko jarduera ingurumen-inpaktuaren ebaluazio arruntaren mende badago, ingurumen-inpaktuaren adierazpenaren berezko alderdiak jasoko ditu. Abenduaren 9ko 10/2021 Legearen 78. artikuluan adierazten denez, ingurumen-inpaktuaren adierazpenak prozeduraren mugarri nagusien laburpena jasoko du, eta zehaztuko du, ingurumen-efektuei begira, proiektua egitea bidezkoa den ala ez, eta, hala badagokio, zer baldintzatan gara daitekeen. Besteak beste, hartu beharreko babesteko, zuzentzeko eta konpentsatzeko neurriak eta jarraipena egiteko neurriak jasoko ditu.

Era berean, abenduaren 9ko 10/2021 Legearen 23.a artikuluan xedatutakoa aplikatuz, ingurumen-inpaktuaren adierazpena egiteko eskumena Euskal Autonomia Erkidegoko ingurumen-organoari dagokionean, eta jarduera ingurumen-baimen bateratuaren araubidearen mende geratzen denean, ingurumen-baimen bateratuaren prozedura eta ingurumen-inpaktuaren ebaluazio arruntaren prozedura bateratu egingo dira. Gainera, ingurumen-inpaktuaren adierazpenaren edukia ingurumen-baimen bateratuaren parte izango da, eta egintza administratibo berean egingo dira bi adierazpen horiek.

Abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginean eta Euskadiko Ingurumen Administrazioaren abenduaren 9ko 10/2021 Legean adierazitakoari jarraikiz, ingurumen-organoak neurriak hartu ditu ingurumen-inpaktua ebaluatzeko jarduerak ingurumen-baimen bateratuaren prozeduran txertatzeko. Alde horretatik, aipatutako prozedura horren izapideetan, proiektuak ingurumenean izan ditzakeen eragin guztiak batera bildurik hartu dira kontuan, ingurumen-inpaktuaren ebaluazioari buruzko araudiaren ikuspegitik, eta abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginean jasotako ingurumen-preskripzioen ikuspegitik zehaztearren proiektuaren bideragarritasuna zenbaterainokoa den. Bateratze hori ikus daiteke, halaber, ingurumen-baimen bateratua emateko ebazpen-proposamenaren aurreko proiektuaren balioespen orokorrean. Ebazpen honetan ere sartuta dago ingurumen-inpaktua ebaluatzeko aipatutako prozesuaren emaitza. Horretarako, proiektuaren ingurumen-inpaktuaren adierazpena egiten du lehenengo apartatuan, eta aukeratutako kokapenean proiektua bideragarria dela adierazten du, ingurumen-ondorioei soilik erreparatuta; proiektua zer baldintzatan gauzatu behar den ere ezartzen du, eta baldintza horiek koherenteak dira abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bategina aplikatuz proiektuari ezarriko zaizkion zuzenketa-neurriekin.

Azkenik, instalazioan jatorria izan lezaketen substantzia kutsagarrien isurketen muga-balioak zehazteko, bai eta instalazioaren beste ustiapen-baldintza batzuk ere, betiere ingurumena bere osotasunean ahalik eta gehien babesteko, ebazpen hau egitean kontuan izan dira teknika erabilgarri onenak, eta aplikatzekoa den sektoreko legeriak zehaztutako neurriak eta baldintzak. Bereziki kontuan izan da Batzordearen 2018ko abuztuaren 10eko 2018/1147 Betearazpen Erabakia (EB), zeinaren bidez ezartzen baitziren hondakinen tratamendurako teknika erabilgarri onenei (TEO) buruzko ondorioak, Europako Parlamentuak eta Kontseiluak emandako 2010/75/EB Zuzentarauaren arabera.

Orain arte azaldutakoari jarraikiz eta espedienteko txostenak aztertu ondoren, Petróleos del Norte SAk (Petronor) sustatutako jarduerari aplikatu beharreko baldintzak jasotzen zituen ebazpen-proposamena sinatu zen. Nolanahi ere, abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginaren 20. artikuluan jasotako entzunaldi-izapidetik ondorioztatzen dena bete beharko da.

Azaldutakoarekin bat, goian adierazitako izapideak amaitu dira, eta Kutsaduraren Prebentzio eta Kontrol Integratuari buruzko Legearen testu bateginaren 20. artikuluan jasotzen den entzunaldi-izapidea bete da.

Honako hauek ikusi dira: Ebazpena, 2024ko apirilaren 17koa, Sailburuordetzarena; 10/2021 Legea, abenduaren 9koa, Euskadiko Ingurumen Administrazioarena; Kutsaduraren Prebentzio eta Kontrol Integratuari buruzko Legearen testu bategina –abenduaren 16ko 1/2016 Legegintzako Errege Dekretuak onartua–; 21/2013 Legea, abenduaren 9koa, Ingurumen-ebaluazioari buruzkoa; 815/2013 Errege Dekretua, urriaren 18koa, Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatzeko Erregelamendua –zeina, aldi berean, industriako emisioei buruzkoa baita– onartzekoa; 68/2021 Dekretua, otsailaren 23koa, Ekonomiaren Garapen, Jasangarritasun eta Ingurumen Sailaren egitura organikoa eta funtzionala ezartzen duena; 39/2015 Legea, urriaren 1ekoa, Administrazio Publikoen Administrazio Prozedura Erkidearena; eta aplikatu beharreko gainerako arauak. Ondorioz,

EBAZTEN DUT:

Lehenengoa.– Hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko Petróleos del Norte SAk (Petronor) Zierbenako udal-mugartean (Bizkaia) sustatutako proiektuaren (AAI00455 espedientea) aldeko ingurumen-inpaktuaren adierazpena formulatzea, betiere ebazpen honen bigarren, hirugarren, laugarren, seigarren, zazpigarren eta zortzigarren apartatuetan ezarritako baldintzetan.

Proiektua Euskadiko Ingurumen Administrazioaren abenduaren 9ko 10/2021 Legearen II.D eranskinaren D.8.c) multzoan jasota dago:

«Hondakin arriskutsuak balorizatzeko industria-instalazio finkoak, olio erabilien kudeaketa barne, egunean 10 tona baino gehiago onartzeko edukiera dutenak».

Hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko Petróleos del Norte SAk Zierbenako udal-mugartean (Bizkaia) sustatutako jarduerari dagozkion jarduketek, ingurumen-inpaktuaren adierazpen honen xede direnek, barne hartzen dituzte instalazioak kokatzen diren lurzatiaren esparruan egiten direnak eta esparru horretatik kanpo egiten diren eta instalazio horren funtzionamendurako beharrezkoak diren –eta, beraz, horrekin hertsiki lotuta dauden– beste batzuk. Honako hauek dira jarduketa horiek:

1.– Solteko gai solidoak hartzeko instalazioa: instalazio termikoetako zepetatik eta errautsetatik, hareatik eta zementutik datozen hondakinak batez ere.

2.– Lehengaiak deskargatzeko edo jasotzeko sistema (sistema pneumatikoa edo eskuzkoa).

3.– Agregakina fabrikatzeko instalazioa elikatzeko sistema.

4.– Uhal garraiatzailea, agregakina fabrikatzeko atalaren barruan garraiatzeko.

5.– CO₂ likidoa hartzeko instalazioa, batik bat findegian harrapatua.

6.– Agregakinak (agregakin sintetikoak) fabrikatzeko instalazioa.

7.– Agregakin sintetikoak biltegiratzea eta bidaltzea, kamioiak kargatuz, inguruko tokiko kontsumitzaileei banatzeko.

Ingurumen-inpaktuaren ebaluazioaren prozedurak kontuan hartu ditu instalazioari erantsitako azpiegitura horietatik eratorritako eraginak, eta aurreikusitako trazatuen egokitasuna aztertu da, lursailen okupazioa eta bertako ingurumen-balioak, baita azpiegitura horiek egiteko aplikagarri diren zuzenketa-neurriak eta ezaugarri orokorrak ere.

Bigarrena.– Petróleos del Norte SAri (Petronor), egoitza soziala San Martin auzoko 5. zenbakian duenari (48550 Muskiz, Bizkaia), eta IFK: A48053243 duenari, Zierbenako udal-mugartean (Bizkaia) hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko jarduerarako ingurumen-baimen bateratua ematea.

Ondorio horietarako, baimenaren titularrak ebazpen honetan jasotako baldintza guztiak bete beharko ditu.

Jarduera 5.1.b) kategorian sartuta dago: «Hondakin arriskutsuak balorizatzeko edo deuseztatzeko instalazioak, eguneko 10 tonatik gorako gaitasuna dutenak eta, gutxienez, hauetako jarduera bat gauzatzen dutenak: tratamendu fisiko-kimikoa».

Petróleos del Norte SAk (Petronor) garatu nahi duen jardueraren xedea da Petronorren findegiko hidrogenoa fabrikatzeko instalazioan harrapatutako CO₂ finkatzea, horretarako mineralizazio-teknologia erabiliz. Teknologia hori CO₂-aren eta industria-hondakinen (hiri-hondakinen instalazio termikoetatik eta balorizazio energetikotik datozen industria-hondakinak) arteko erreakzio kimikoan datza; izan ere, horrela agregakinak sortzen dira, obra zibilaren sektorean kalitate komertzialeko produktu erantsi gisa erabiltzea aurreikusten diren agregakinak (baldosak, aurrez fabrikatutako blokeak, morteroak, etab.).

Lortutako agregakinek honako ziurtagiri hauek dituzte: UNE-EN 13055-1 ziurtagiria, hormigoi, mortero eta injektaturako agregakin arin gisa erabiltzeko; UNE-EN 13242 ziurtagiria, geruza granularretan eta geruza tratatuetan aplikatzeko; eta UNE-EN 13748-2 ziurtagiria, kanpoan erabiltzeko baldosetarako. Solidoak batik bat lurrez garraiatuko dira lurzatitik bezeroarengana.

Tratatzeko gehieneko gaitasuna 50.000 tonakoa da urtean (instalazio termikoetatik eta hiri-hondakinak balorizatzeko instalazioetatik datozen errautsak), eta CO₂-a hartzeko gaitasuna, berriz, 2.200 tonakoa urtean.

Ekoitzi daitekeen gehieneko agregakin kantitatea: 129.000 tona urtean.

Hondakinak balorizatzearen eta horiek agregakin bihurtzearen bidez CO₂-a finkatzeko instalazioa Bilboko Portuko AZ-1 nasako lurzati batean dago, Zierbenako udal-mugartean. Kokapen horretan, 10.955 m²-ko azalera duen lurzati bat dago; horietatik 2.635 m² lurzoru estalian daude, eta 8.320 m² lurzoru zolatuan. Hauek dira eraikin nagusiak:

– Prozesatzeko pabiloia: 977 m² inguruko azalera du. Pabiloi horrek agregakinak fabrikatzea ahalbidetzen duten ekipoak eta instalazioak izango ditu, kontrol-gela, gela elektrikoa eta rack-gela barne.

– Aletegi moduko pabiloiak, produktu erdibukatuak biltegiratzeko. Produktu erdibukatua biltegiratzeko pabiloiak aletegi estali bat izango du, eta 388 m² inguruko azalera izango du.

– Aletegi moduko pabiloiak, produktu bukatua (agregakina) biltegiratzeko. Produktu bukatua biltegiratzeko pabiloiak bost aletegi estali izango ditu guztira (aletegi bakoitzak 500 tonako edukiera izango du), eta 939 m² inguruko azalera. Pabiloi horien sabaiak ohiko itxitura izango du eta guztiz irekita egongo da alde batetik.

– Bulegoen eraikin orokorra: administrazio-zerbitzuak eta gela teknikoak (laborategia, instalazioak).

Instalaziora sartzeko, bertan dauden sarbideak erabiliko dira, portuko barrutiaren barrualdetik.

Instalazioaren barruan, kamioiak sartu eta irtetean pabiloiko lehengaiak eta produktuak kontrolatzeko eta pisatzeko sistemak instalatuko dira. Instalazioak itxitura bat izango du, burdin hesi bat, eta ate lerragarri batzuetatik sartuko da.

Honako hauek dira instalazioan aurreikusitako prozesuko faseak:

– Hondakinen blendinga.

– Karbonatazioa.

– Betegarriaren eta aglomeratzailearen blendinga.

– Peletizagailua.

– Fraguatzea eta ehotzea.

Hondakinak errepidez garraiatuko dira, 21 tona inguruko batez besteko edukiera duten zisterna moduko kamioi itxiak erabilita. Hondakin onargarriak deskarga- eta harrera-sistema batekin (sistema pneumatikoa edo eskuzkoa) deskargatuko dira siloetara.

Jasotzen diren hondakin guztiek aurrez onartzeko proba fisikoak eta kimikoak egin beharko dituzte. Emaitzak materialen barne-zehaztapenekin alderatuko dira eta, aldekoak badira, hondakina onartu eta dagokion siloan deskargatuko da. Jasotako hondakinak zehaztapenak betetzen ez baditu, berrogeialdian jarriko da proba gehiago egin bitartean, edo hondakina ez da onartuko.

Hondakinak tratamendu-unitatera garraiatzeko eta elikatzeko, garraio-sistema pneumatiko itxiak erabiliko dira.

Era berean, siloek hautsa hartzeko iragazkiak dituzte (horietan hautsa sortzen da) partikulak ez isurtzeko. Hautsa arintzeko sistemak egongo dira (garraio-sistema pneumatikoak, adibidez) garraiatzaileen arteko transferentzietan, horietan hautsa nabarmen sortzea espero baita.

Hona hemen ekoizpen-prozesuen deskribapena:

a) Hondakinen blendinga.

6 silo zilindriko metaliko itxi daude, bakoitza 125 m³-koa eta 13,8 m inguruko altuerakoa, eta hiru hondakin mota deskargatzeko aukera ematen du. Siloak betetzeko hodiek iragazkiak dituzte hondakinetan egon daitekeen zikinkeria oro ezabatzeko, ibaian behera dauden ekipoak ez blokeatzeko edo kaltetzeko. Silo bakoitzak torloju garraiatzaile bat du, «amaigabea», produktua erreaktoreetara deskargatzeko. Silo bakoitzak prestakuntza-tobera bat elikatzen du, eta silo bakoitzetik jasotako kantitatea pisatu egiten da, fabrikazio-sorta bakoitzaren errezeta bermatzeko.

Zementuzko siloak (aglomeratzailea) hondakinenak duen espezifikazio berbera du (125 m³-ko edukiera), baina ez du behar iragazketa-sistemarik sarrerako hodian.

Zementua amaigabeko torloju garraiatzaile batzuekin garraiatzen da.

b) Karbonatazioa.

Lehengaia (hondakinak) karbonataziorako nahasgailu berezi batera bidaltzen da, eta, bertan, urarekin eta CO₂-arekin nahasten da presio jakin batean, karbonatazio-erreakzioa eraginez.

Erreakzioaren errendimendua maximizatzeko kontrolatu beharreko aldagaiak hauek dira: tenperatura, presioa eta erreaktorean egon behar duen denbora.

Erreakzioak nahiko exotermikoak dira eta, beraz, hozteko uraren zirkuitu itxi bat erabiltzen da.

Nahasgailua tobera estali batera deskargatzen da bigarren nahasketa-fasera igarotzeko.

c) Betegarriaren eta aglomeratzailearen blendinga.

«Hondakin karbonatatua» bigarren nahasketa-ekipo batera elikatzen da eta, bertan, harearekin eta zementuarekin nahasten da.

Harea 220 tona inguruko aletegi estali batean biltegiratzen da.

Era berean, ura erabiltzen da erreakziorako eta nahasgailuen hozte-zirkuiturako.

d) Peletizagailua.

Ontzi birakari bat da, dentsitatea handitu eta bigarren nahasketa-fasean sortutako tarteko produktua aglomeratzen duena. Pelletak fraguatze-eremura garraiatzen dira oso abiadura baxuan lan egiten duen uhal garraiatzaile baten bidez, uhalean bertan fraguatzeko denbora ziurtatzeko, biltegiratu aurretik.

e) Agregakinaren tratamendua.

Sortutako agregakina aletegi estali batzuetan biltegiratzen da denboraldi batez, merkaturatzeko beharrezkoak diren baldintzak lortzeko. Eskatutako granulometria bete ahal izateko, ehotze- eta/edo bahetze-fase bat gehitu behar da.

Instalazio laguntzaile nagusiak hauek dira:

– Azpiegitura elektrikoa.

– Behe-tentsioko instalazioa.

– Aire konprimatua.

– Gasolioaren biltegiratzea.

– CO₂-aren hornidura.

– Ur-hornidurako sistema eta saneamendu-sareak.

– Suteen aurka babesteko sistemak.

– Pisatze-sistema.

– Landako tresneria.

– Kontrol-sistema. Katigamenduak, sua eta gasa.

– Laborategia.

Baliabide-kontsumoa.

Erabiliko den uraren jatorria sarearena berarena da, eta 25.000 litroko edukierako bi ur-biltegi instalatuko dira.

Ura karbonatatze- eta hozte-erreakzioetarako behar da, suteen aurkako babes-sistemetarako, zerbitzu sanitarioetarako, gurpilak garbitzeko eta hezetzeko gainazalak ureztatzeko. Urtean 18.873 m³ ur kontsumitzea aurreikusten da.

Instalazioan erabiltzen diren energia-iturri nagusiak energia elektrikoa eta gasolioa dira, makina mugikorretarako.

Isurketak.

Prozesuak ez du sortzen hondakin-uren efluenterik; erabilitako ur guztia produktuan xurgatuta geratzen da edo ekoizpenean lurruntzen da. Sortzen diren efluente bakarrak zerbitzu sanitarioetatik datozen urak, gurpilak garbitzeko ura, hezetzeko ureztatze-urak eta hautsa saihesteko urak dira. Euri-urak prozesuan berrerabiliko dira ahal den neurrian, eta dekantazio bidezko tratamendu-sistema bat izango dute horretarako.

Atmosferara egiten diren isurketak hondakinen karga- eta deskarga-eragiketekin lotuta daude biltegiratze-siloetan, baita hautsezko materialak biltegiratzearekin eta manipulatzearekin, eta ibilgailuak eta makina mugikorrak garraiatu eta mugitzearekin ere. Ez da aurreikusten kanalizatutako isurketa-fokurik.

Instalazioan, sortzen diren hondakin nagusiak zerbitzu orokorretan sortutako hondakinak dira.

Instalazioak Best Available Techniques (BAT) Reference Document for Waste Treatment (2018ko urria) agirian eta Batzordearen 2018ko abuztuaren 10eko 2018/1147 (EB) Betearazpen Erabakian –erabaki horren bidez, hondakinen tratamendurako teknika erabilgarri onenei (TEO) buruzko ondorioak ezartzen ziren, Europako Parlamentuak eta Kontseiluak emandako 2010/75/EB Zuzentarauaren arabera– jasotako teknika hauek izango ditu: TEO1, TEO2, TEO3, TEO4, TEO5, TEO6, TEO11, TEO14, TEO17, TEO18, TEO19, TEO20, TEO21, TEO22, TEO23, TEO24, TEO40 eta TEO41.

Hirugarrena.– Baldintza hauek ezartzea hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko Petróleos del Norte SAk (Petronor) Zierbenako udal-mugartean (Bizkaia) sustatutako jarduera instalatzeko egokitzapen-lanetarako:

A) Proiektua egikaritzen hasteko epea.

Lau urteko epea jartzen da proiektua egikaritzen hasteko, ingurumen-inpaktuaren adierazpen hau Euskal Herriko Agintaritzaren Aldizkarian argitaratzen denetik aurrera. Epe hori igaro eta artean ez bada hasi proiektua egikaritzen, ingurumen-inpaktuaren adierazpen honen iraunaldia amaituko da, eta dagozkion ondoreak sortzeari utziko dio. Kasu horretan, sustatzaileak berriro hasi beharko du proiektuaren ingurumen-inpaktuaren ebaluazioaren izapidea, non eta ez den erabakitzen ingurumen-inpaktuaren adierazpenaren indarraldia luzatzea. Hori guztia, bat etorriz abenduaren 9ko 10/2021 Legearen 78.4 artikuluan eta abenduaren 9ko 21/2013 Legearen 43. artikuluan ezarritakoarekin. Horretarako, sustatzaileak Ingurumen Jasangarritasuneko Sailburuordetzari komunikatu beharko dio, gutxienez hilabete lehenago, noizko aurreikusten den proiektua egikaritzen hastea.

B) Instalazioa egokitu eta muntatzeko baldintza orokorrak.

Proiektua bera eta babes- eta zuzenketa-neurriak indarrean dagoen araudiaren arabera egikarituko dira, hurrengo apartatuetan adierazitakoa kontuan hartuta, eta, aurrekoaren aurkakoa ez den orotan, sustatzaileak Ingurumen Jasangarritasuneko Sailburuordetzan aurkeztutako dokumentazioan aurreikusitakoa kontuan hartuta:

B.1.– Jarduketa-esparrua mugatzea.

a) Proiektuak adierazitako esparruan egingo dira obrak eta lurzoruaren okupazioa dakarten lan osagarriak. Ahalik eta gehien murriztuko da obrako makinak eta ibilgailuak aipatutako mugetatik kanpo zirkulatzea.

b) Aipatutako esparrutik kanpo ustekabean gertatutako erasanen kasuan, zuzenketa- eta lehengoratze-neurri egokiak aplikatuko dira.

c) Obrarako sarbideak, makina-parkea, obrako materialak aldi baterako biltegiratzeko gunea, hondeaketa-lurren eta hondakinen aldi baterako metaketak ingurumenean ahalik eta eragin txikiena izateko moduan proiektatuko dira. Obrak hasi aurretik, aurreko alderdiak xehetasunez adierazten dituen mugaketa egingo da kartografian.

B.2.– Ura eta lurzorua babesteko neurriak.

a) Eraikuntza-lanak egin bitartean ahalik eta material xehe gutxien bota behar da drainatze naturaleko sarera. Horretarako, urak bideratzeko egiturak eta solido esekiei eusteko sistemak proiektatu eta, hala badagokio, egikarituko dira, kutsa litezkeen urak haietan biltzeko.

Gailu horien neurria zehazteko kalkulu hidraulikoak egingo dira, solidoei ongi eusten dietela bermatzeko, eta, botatzen badira, gune jakin batean botatzen direla bermatzeko, betiere uraren parametro fisiko-kimikoak indarrean dagoen araudiaren araberakoak direla ziurtatuta.

Hormigoi-upelak espresuki horretarako egokitutako guneetan garbituko dira, garbitu behar badira. Ez da inola ere onartuko hormigoi garbiketako esnea ibaiaren ibilgura isurtzea. Hormigoiaren hondakinak ebazpen honetako hirugarren apartatuaren B.5 puntuan ezartzen diren baldintzen arabera kudeatu beharko dira.

b) Berariaz debekatuta egongo da makinak konpontzea edo makinei olioa aldatzea zeregin horretarako berariaz ezarritako eremuetatik kanpo. Obratako makinak gordetzeko eremua eta horien mantentze-lanak egiteko gunea drainatze-sare naturaletik isolatuta egongo dira. Zolata iragazgaitza eta efluenteak biltzeko sistema izango dute, olioa eta erregaiak direla-eta lurzorua eta ura kutsa ez daitezen. Erregaien zamalanak, olio-aldaketak eta tailerreko jarduerak ezin izango dira horretarako adierazitako guneetatik kanpo egin.

Lanak egiteko eremuetan, hidrokarburoak xurgatzeko material espezifikoa izango da, berehala erabili ahal izateko, ustekabeko isuririk edo ihesik badago: biribilkiak, material pikortatua, etab.

c) Behar bezala bermatu beharko da obren ondorioz lurpeko urak kutsatuko ez direla.

B.3.– Zaratak, dardarak eta horien eraginak gutxitzeko neurriak.

a) Egokitzapen-obrek iraun bitartean, beharrezkotzat jotzen diren obrako jardunbide egokiak aplikatu beharko dira, obrako makinen mantentze orokorrari eta zarata jatorrian murrizteari dagokienez.

b) Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuaren 22. artikuluan aurreikusitakoaren arabera, zonakatze akustiko, kalitate-helburu eta emisio akustikoei dagokienez, obrak egitean erabiliko diren makinak egokitu egin beharko dira kanpoan erabiltzeko makinen soinu-emisioei buruz indarrean dagoen legerian ezarritako aginduetara, eta, bereziki, eta hala badagokio, Kanpoan erabiltzeko makinek ingurumenean sortzen dituzten soinu-emisioak arautzen dituen otsailaren 22ko 212/2002 Errege Dekretuan eta arau osagarrietan ezarritakora.

B.4.– Hauts-emisioak murrizteko neurriak.

a) Obrak dirauen artean, bideak eta ibilgailuak igarotzeko beste lekuak garbitzeko kontrol zorrotza egingo da, nola obrek ukitutako ingurunean, hala obra horietarako sarbideetan. Sistema bat eduki beharko da aldi baterako hutsik dauden pistak eta inguruak ureztatzeko.

b) Ibilgailuak garbitzeko elementuak jarriko dira obra-guneen irteeran.

c) Hezetasun-baldintza egokietan garraiatuko da indusketa-materiala, hain zuzen, zama estaltzeko modua duten ibilgailuetan, lohi eta partikularik ez barreiatzeko.

B.5.– Hondakinak kudeatzeko neurriak.

a) Obrek iraun bitartean sortutako hondakinak, lanak prestatzeko operazioetatik sortzen direnak, enbalajeak, errefus-lehengaiak eta garbiketa-lanetako soberakinak Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legean eta aplikagarri diren araudi zehatzetan ezarritakoaren arabera kudeatuko dira.

Hondakinak kudeatzeko hierarkia-printzipioei jarraituz, hondakinak sortzea prebenitu behar da, edo, hala badagokio, apirilaren 8ko 7/2022 Legearen 8. artikuluan ezarritako lehentasun-hurrenkerari jarraituz kudeatu behar dira, hau da: prebenitzea, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa barne. Hondakinak kasu honetan baino ezingo dira ezabatu: haiek balorizatzea teknikoki, ekonomikoki eta ingurumenaren ikuspegitik bideraezina dela behar bezala frogatzen denean.

Berariaz debekatuta dago sortzen diren tipologia ezberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira, eta horiek bildu eta biltegiratzeko bide egokiak jarriko dira, nahasketak ekiditeko.

b) Eraikitze- eta eraispen-jardueren ondorioz sortutako hondakinak eraikuntza- eta eraispen-hondakinen ekoizpena eta kudeaketa arautzeko otsailaren 1eko 105/2008 Errege Dekretuan eta eraikuntza- eta eraispen-hondakinen ekoizpena eta kudeaketa arautzeko ekainaren 26ko 112/2012 Dekretuan aurreikusitakoa betez kudeatuko dira.

Aipatutako 112/2012 Dekretuaren 4. artikuluaren arabera, proiektuaren sustatzaileak hondakinen eta eraikuntza- eta eraispen-materialen kudeaketa-azterlan bat gehitu beharko du oinarrizko proiektuetan eta obra gauzatzeko proiektuetan; azterlan horrek, I. eranskinean ezarritako gutxieneko edukia izan beharko du.

Bestalde, otsailaren 1eko 105/2008 Errege Dekretuan ezarritako eskakizunak betetzeaz gain, plan bat prestatuko du kontratistak, obrako eraikuntza- eta eraispen-lanetan sortzen diren hondakin eta materialekiko betebeharrak nola beteko dituen azaltzeko. Plan hori obraren kontratu-agiriei erantsiko zaie.

c) Hondakindegi baimendura bidali beharreko hondakinak Hondakinak hondakindegietan biltegiratuta ezabatzea arautzen duen uztailaren 7ko 646/2020 Errege Dekretuan eta Hondakinak hondakindegietan biltegiratuta eta betelanak eginda ezabatzea arautzen duen otsailaren 24ko 49/2009 Dekretuan xedatutakoaren arabera kudeatuko dira.

Jarduerako soberakinak betelanak egiteko erabiltzen badira, aipatutako otsailaren 24ko 49/2009 Dekretuan ezarritako baldintzak bete beharko dira.

EBA-A ebaluazioko balio adierazgarrietatik beherako eduki kutsatzaileak dituzten materialak soilik utzi ahal izango dira lursailak betetzeko edo egokitzeko, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legearen III. eranskinean jasotakoari jarraikiz.

d) Hondakin arriskutsuak dituzten ontziek Ekonomia Zirkularrerako Hondakinei eta Lurzoru Kutsatuei buruzko 7/2022 Legearen 21.d) artikuluan ezarritako segurtasun-arauak beteko dituzte, eta itxita egon beharko dira kudeatzaileari eman arte, isurita edo lurrunduta gal ez daitezen.

Aipatutako ontziak era argian, irakurgarrian eta ezabaezinean etiketatuta egon beharko dira, indarrean dagoen araudiaren arabera.

e) Sortutako olio erabilia industrian erabilitako olioaren kudeaketa arautzen duen ekainaren 2ko 679/2006 Errege Dekretuari jarraituz kudeatu beharko da.

Erabilitako olioak aldi baterako biltegiratzea, hau da, baimendutako kudeatzaileak biltzen dituen arte, ontzi edo segurtasun-sistema batean gordetako biltegietan egingo da, horrela biltegi nagusiak haustura edo galeraren bat izanez gero olioa sakabanatzea saihesteko.

f) Hondakinak kudeatzeko araudia errazago bete ahal izateko, hainbat lanetan sortutako hondakinak kudeatzeko sistemak jarri beharko dira. Lan horien arduradunek kudeatuko dituzte sistema horiek, eta haien ardura izango da, halaber, langileek behar bezala erabiltzea hondakinak. Bereziki, inola ere ez da kontrolik gabeko efluenterik sortuko, erregai eta produktuak biltegiratzeagatik, makinen mantentze-lanak egiteagatik edo hondakinak erretzeagatik.

g) Aurrekoaren ildotik, gune espezifiko bat prestatuko da, eta bertan jarriko dira hondakin arriskutsuak (olio-latak, iragazkiak, olioak, pinturak eta abar) aldi baterako gordeko dituzten instalazio estaliak. Gainera, hondakin arriskugabeak eta inerteak biltzeko edukiontzi espezifikoak jarriko dira beste leku batean, aurrekoetatik bereizirik. Edukiontzi horiek itxita egongo dira kudeatzaileari eman arte, edukirik gal ez dadin isurita edo lurrunduta. Orobat, obrak egiten ari diren bitartean sortzen diren hondakinak biltzeko elementu estankoak (bidoiak eta abar) instalatu behar dira; hondakinak moten arabera bereizi behar dira, aipatutako garbigunean aldi baterako gorde aurretik.

h) Obretan sortutako hondakinen ingurumen-jarraipena jasoko duen txosten bat egin beharko da, eta indarreko legedian jasotako identifikazio-dokumentuak eta tratamendu-kontratuak txosten horretan sartu beharko dira.

B.6.– Hondeaketa-lanekin lotutako neurriak.

Hondeaketa-eragiketetan edo lur-mugimenduetan, edo istripu baten edo beste inguruabar baten ondorioz, kutsadura-zantzuak antzemanez gero, kontuan hartuko da Lurzorua kutsatzea saihestu eta kutsatutakoa garbitzeko ekainaren 25eko 4/2015 Legearen 22. artikuluan ezarritakoa.

B.7.– Kultura-ondarea babesteko neurriak.

6/2019 Legeak, maiatzaren 9koak, Euskal Kultura Ondarearenak, ezarritako gainerako xedapenak gorabehera, obretan aztarna arkeologikoren bat egon daitekeela pentsarazten duen zerbait aurkitzen bada, berehala jakinaraziko zaio Bizkaiko Foru Aldundiko Kulturako Zuzendaritza Orokorrari; gero, beharrezkoa bada, hark erabakiko du zer neurri ezarri.

B.8.– Obraren garbiketa eta akabera.

Obra bukatu ondoren, garbiketa-kanpaina zorrotz bat egingo da, eta proiektuak erasandako eremua obrako batere hondakinik gabe utzi beharko da.

B.9.– Ingurumen-aholkularitza.

Obrak amaitu arte eta obra horren bermeak dirauen artean, ingurumen gaietan, eta babes- eta zuzenketa-neurrietan aholkularitza gaitua eduki beharko du Obra Zuzendaritzak, ingurumen-inpaktuaren azterketak zehazten duenaren arabera. Obra-zuzendaritzak baldintza-agiriak gai horiei buruz esleitzen dizkion funtzioen alorreko erabakiak hartu aurretik, aholkularitza hori ematen duten adituek txosten bat egin beharko dute.

B.10.– Lan-programaren diseinua.

Kontratistak jarduera-proposamen xehatu batzuk egin beharko ditu, ondorengo azpiapartatuetan adierazitako alderdiei buruz. Proposamen horiek ebazpen honetan kasu bakoitzerako ezartzen diren irizpideen arabera diseinatuko dira. Obra-zuzendaritzak espresuki onetsi beharko ditu eta lanak egiteko programan txertatuko dira. Hauek dira dokumentuak:

a) Kontratistaren instalazio-eremuen lokalizazioari eta ezaugarriei eta hondakinak aldi baterako biltegiratzeari buruzko xehetasunak, ingurumen-baimen bateratuan ezarritakoarekin bat etorriz.

b) Ur-eroanbideen sareen eta solido esekiak atxikitzeko gailuen xehetasunak eta kokapena, ingurumen-baimen bateratuan ezarritakoarekin bat etorriz.

c) Ibilgailuak garbitzeko gailuen xehetasunak eta kokapena, ingurumen-baimen bateratuan ezarritakoarekin bat etorriz.

d) Obretan sortutako eraikuntza- eta eraiste-hondakinak kudeatzeko plana, eraikuntza- eta eraiste-hondakinen ekoizpena eta kudeaketa arautzen dituen ekainaren 26ko 112/2012 Errege Dekretuan ezarritakoaren arabera.

B.11.– Obrek dirauten bitarteko jardunbide egokien kontrola.

Obren jardunbide egokien kontrola egingo da, eta bereziki kontuan hartuko dira alderdi hauek: hondakinen kudeaketa, indusketa-soberakinena ere aintzat hartuz, hautsa eta zarata sortzea eta txosten honetan adierazitako bestelako alderdiak.

B.12.– Obra-amaierako txostena.

Sustatzaileak obraren amaierako txostena bidali beharko dio Ingurumen Jasangarritasuneko Sailburuordetzari; obrak egin bitartean izan diren gertaeren berri emango du bertan, eta ebazpen honetan jasotako babes- eta zuzenketa-neurriak zenbateraino betetzen diren azalduko du, eta ingurumen-organoak hondeaketa-materialak behar bezala kudeatzeko ezarritako neurrien berri ere emango du.

Horrekin batera, eta hala badagokio, proiektua egikaritu bitartean egindako aldaketak xehetasunez dokumentatu beharko dira aipatutako txostenean, eta ingurumenaren gaineko eraginaren ikuspegitik duten justifikazioa azaldu ere bai. Halaber, eraikuntza-fasean baliatutako ingurumena zaintzeko programaren emaitzak eta hondeaketa-materialen erabilera zehatza dokumentatu behar dira, material horien zenbaketari eta ezaugarriei buruzko datuak gehituta.

Laugarrena.– Hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko Petróleos del Norte SAk (Petronor) Zierbenako udal-mugartean (Bizkaia) sustatutako jarduera ustiatzeko eta bertan behera uzteko.

A) Ingurumen-erantzukizuna.

Jardueraren operadoreak ingurumen-kalteak prebenitzeko, saihesteko eta konpontzeko neurriak hartu eta betearazi behar ditu, eta haien kostuak ordaindu behar ditu, zenbatekoa edozein dela ere, baita dolorik, errurik edo zabarkeriarik ez bada ere, Ingurumen-erantzukizunari buruzko urriaren 23ko 26/2007 Legearen 19.1 artikuluan adierazten den bezala.

B) Erantzukizun zibileko asegurua.

Erantzukizun zibileko aseguru bat eratu beharko da milioi bat (1.000.000) euroko zenbatekoaz, honako hauek estaliko dituena: hirugarren pertsonei edo horien ondasunei sortutako balizko kalteengatiko kalte-ordainak, eta baimen honek onartutako jardueraren ondorioz ingurumen aldatua konpondu eta lehengoratzeko kostuak. Petróleos del Norte SAk (Petronor) kontratatutako aseguruaren baldintza orokor, partikular eta zehatzen kopia bat bidali beharko dio ingurumen-organoari, eta hark onartu egin beharko du.

Horrez gain, Erantzukizun Zibileko Asegurua eguneratu izanaren egiaztagiria bidali beharko dio urtero ingurumen-organoari, eta polizan aldaketaren bat izanez gero, horren berri eman beharko dio ingurumen-organoari, kontratatutako aseguruaren baldintza orokor, partikular eta zehatzen kopiarekin batera.

Aseguru horren zenbatekoa urtero eguneratu ahal izango da, aurreko 12 hilabeteetako kontsumoko prezioen indizearen (KPI) arabera handituta.

C) Fidantza.

Fidantza bat emango da, milioi bat hirurehun eta berrogeita bost mila (1.345.000) eurokoa, hondakinen arloko finantza-bermeei buruzko martxoaren 22ko 208/2022 Errege Dekretuko 3.1.a) artikuluko 1. apartatuan ezarritako terminoetan.

Fidantza horren zenbatekoa urtero eguneratu ahal izango da ingurumen-organo honek horrela eskatuz gero, aurreko 12 hilabeteetako Kontsumoko Prezioen Indizearen (KPI) arabera handituz.

Horrez gain, Kostaldeei buruzko 1988ko uztailaren 28ko 22/1988 Legearen 88.4 artikuluan xedatutakoaren arabera, ebazpen honen E.3.5 apartatuan aipatzen den isurien kanona ezartzen denean, aipatutako legearen 85. artikuluan eta hura garatzeko onartzen den araudian ezarritako irizpideen arabera, Eusko Jaurlaritzako Ekonomiaren Garapen, Jasangarritasun eta Ingurumen Sailak fidantza bat era dezala eskatu ahalko dio Petróleos del Norte SAri (Petronor), ezarri zaizkion isurketa-baldintza guztiak beteko dituela ziurtatzeko.

D) Administrazioarekiko harremanen arduraduna.

Administrazioarekiko harremanez arduratuko den pertsonaren gainean Ingurumen Sailburuordetzari eman zaizkion datuak aldatuz gero, Petróleos del Norte SAk (Petronor) aldaketa horien berri emango du. Aldaketa oro Petróleos del Norte SAren (Petronor) legezko ordezkari batek eta izendatutako pertsonak sinatutako dokumentu batean jasoko da, eta datu hauek bildu beharko ditu: izen-abizenak, NANa, harremanetarako helbidea eta prestakuntza teknikoa. Petróleos del Norte SAk (Petronor) ingurumen-organoari jakinaraziko dio aipatutako aldaketa.

E) Instalazioaren jardunerako baldintza orokorrak.

E.1.– Hondakinak kudeatzeko prozesurako baldintzak eta kontrolak.

E.1.1.– Baldintza orokorrak.

a) Baimen honen E.1.2 apartatuan jasotako hondakinak onartu aurretik, Petróleos del Norte SAk (Petronor) baimenaren xede diren instalazioetan hondakin horiek jaso eta balorizatzeko aukera dagoela egiaztatu beharko du.

b) Lantegian tratatu beharrekotzat jotzen den hondakin-jatorri bakoitzeko, eragileak kasuan kasuko tratamendu-kontratua igorri beharko dio Ingurumen Jasangarritasuneko Sailburuordetzari, eta, beharrezkoa izanez gero, hondakina onartzeko parametro mugatzaile edo baldintzatzaileen proposamena erantsiko da.

c) Hondakin jakin bat onargarria dela egiaztatu ondoren, jardueraren titularrak dokumentu horren titularrari onarpena ziurtatzen duen agiria igorriko dio, onarpen horren baldintzak ezarrita. Horrez gain, hondakina onartzeko parametro mugatzaileak edo baldintzatzaileak jasoko dira, eta, hala badagokio, hondakin-partida bakoitza hartu aurretik aztertu beharreko parametroak.

d) Instalazioan inolaz ere ez dira onartuko baimendu ez diren hondakinak, edo hondakin onargarrien artean adierazitakoak izanik ere, bestelako hondakin mota generikoren batekin nahastuta egoteagatik kutsatuta daudenak.

e) Hondakin bat baztertzen denean, eta hondakin horren EHZ kodea hondakin baimenduena bada, tratamendu-kontratuan aurreikusitakoarekin bat etorriz, Organo honi jakinarazpen bat bidaliko zaio berehala (ippc@euskadi.eus helbide elektronikora), eta honako hauek jakinarazi beharko zaizkio:

– Baztertzeko arrazoia.

– Lekualdaketaren operadoreak hondakin baztertua kudeatzeko aukeratu duen bide alternatiboa.

– Beste kudeatzaile bati bidaltzea proposatzen bada, nahitaezkoa izango da dagokion tratamendu-kontratua aurkeztea, betiere lekualdaketa egin aurretik.

– Baldin eta ekoizleari itzultzen bazaio, identifikazio-agiriko gorabeheren apartatuan jaso beharko da gertakari hori, eta lekualdaketaren data eman.

Onartu ez den partida beste autonomia-erkidego batetik badator, jatorrizko ingurumen-organoari ere jakinarazi beharko zaio.

f) Hondakin bat ezin bada onartu, zeinaren EHZ kodea hondakin baimenduen artean baitago, tratamendu negatiboaren kontratu bat egin beharko da, hondakin horiek kudeatzeko ezintasunaren arrazoiak azalduz.

E.1.2.– Hondakin onargarriak eta kudeaketa-eragiketa.

Petróleos del Norte SAk (Petronor) Europako zerrendan (Europako Hondakinen Zerrenda, 2014ko abenduaren 18ko Batzordearen Erabakiz argitaratua, zeinaren bidez aldatu egiten baita hondakinen zerrendari buruzko 2000/532/EE Erabakia) ageri diren EHZ kode hauei dagozkien hondakinak tratatu ahal izango ditu, Europako Parlamentuaren eta Kontseiluaren 2008/98/EE Zuzentaraua eta hurrengo epigrafea betez, betiere hondakin horiek apartatu honetan adierazitako onarpen-baldintza espezifikoak eta organo honek baliozkotutako tratamendu-kontratuan ezarritako onarpen- eta jasotze-irizpideak betetzen badituzte. Hortaz, hondakin hauek baino ez dira onartuko:

(Ikus .PDF)

Gehieneko tratamendu-gaitasuna: 50.000 t/urte

Gehieneko biltegiratze-gaitasuna: 450 t.

Ekonomia Zirkularrerako Hondakinei eta Lurzoru Kutsatuei buruzko buruzko apirilaren 8ko 7/2022 Legearen II. eranskineko R0506 kodea dagokio jarduera kudeatzeko eragiketari:

«R0506 Hondakin ez-organikoen balorizazioa, agregakinak ekoizteko».

E.1.3.– Hondakinak lekualdatzea.

a) Hondakinak lekualdatzeko, hondakinak lekualdatzen diren guztietan, bai instalaziotik kanpora, bai kanpotik instalaziora, behar bezala bete beharko da ekainaren 2ko 553/2020 Errege Dekretua eta Euskal Autonomia Erkidegoan gerora egiten den arau horren garapena.

b) Horrekin bat etorriz, hondakinak lekualdatzeko, identifikazio-agiri bat aurkeztu beharko da, jarraipen eta kontrola egiteko, Ekonomia Zirkularrerako Hondakinei eta Lurzoru Kutsatuei buruzko buruzko apirilaren 8ko 7/2022 Legearen 31.2 artikuluaren arabera.

c) Unean uneko egoeraren ezaugarriei erreparatuta, ingurumen-organoak azalpenak eska ditzake, argitu diezaioten zergatik den ekonomikoki eta teknikoki ezinezkoa baimen honen barruko hondakinak Euskal Autonomia Erkidegoan kudeatzea, eta hori egingo du autosufizientzia- eta gertutasun-printzipioak aintzat hartuta eta Euskadiko Hondakinak Prebenitu eta Kudeatzeko 2030 Planeko helburu estrategikoetan ezarritakoarekin bat etorriz.

d) Jardueraren titularrak lekualdaketari buruzko informazioa jaso beharko du bere fitxategi kronologikoan, eta identifikazio-agiriaren kopia sinatua gorde beharko du hiru urtez; bertan, hondakinak entregatu eta onartu izana adieraziko da.

e) Aldez aurretik jakinarazi beharreko hondakinen lekualdaketak identifikatzeko dokumentuen kasuan, jardueraren titularrak hondakina jasotzen denetik gehienez 30 eguneko epea izango du identifikazio-agiri hori organo eskudunari bidaltzeko. Bidalketa hori gauzatzeko, Ekonomiaren Garapen, Jasangarritasun eta Ingurumen Sailaren ingurumen-informazioa kudeatzeko sistema baliatuko du.

E.1.4.– Estatuz kanpotik inportatutako hondakinak.

a) Kudeatu beharreko hondakinak beste estatu batzuetakoak badira, nahitaez bete beharko da Europako Parlamentuaren eta Kontseiluaren 2006ko ekainaren 14ko 1013/2006 Erregelamenduan ezarritakoa (Hondakinen Lekualdaketei buruzko Erregelamendua).

b) Horrez gain, aurreikusten bada zabortegian ezabatu beharko direla inportatu beharreko hondakinak zein inportatutako hondakinen destinoko instalazioan aurreikusitako balorizazio- eta ezabatze-tratamendutik lortutako korronte esanguratsuren bat, orduan, kontsulta bat egin beharko zaio organo honi, justifikatuz aurreikusitako mugaz gaindiko lekualdaketak bat datozela Euskadiko Hondakinak Prebenitzeko eta Kudeatzeko 2030 Planean zehaztutako hondakinen inguruko plangintzaren helburuekin.

E.1.5.– Hondakinen sarrera kontrolatzea.

a) Instalaziora tratamendua egiteko iristen diren hondakinen kontrola egin beharko da, baimeneko baldintzen arabera instalazioan onargarriak direla bermatzeko.

b) Kontrol horretan, Ingurumen Jasangarritasuneko Sailburuordetzak onartutako tratamendu-kontratuan ezarritako egiaztapena egin beharko da. Agiri horretan, onartzeko parametro mugatzaile eta baldintzatzaileak ezarriko dira. Egiaztatze hori sarrera-kontroleko agiri batean erregistratuta geratuko da.

c) Tratamendu-kontratuak Estatuaren lurralde barruko hondakinen lekualdaketa arautzen duen ekainaren 2ko 553/2020 Errege Dekretuaren 5. artikuluan ezarritakoa bete beharko du, eta, besteak beste, alderdi hauek jaso beharko ditu: hondakinei emango zaien tratamendua, hondakin horiek onartzeko baldintzak eta alderdiek dituzten betebeharrak hartzaileak hondakina baztertzen badu.

d) Ezin izango da onartu baimen honetan adierazitakoez bestelako hondakinik. Nolanahi ere, beste hondakin batzuk ere kudeatu nahi badira, beharrezkoa izango da aldez aurretik Ingurumen Jasangarritasuneko Sailburuordetzaren onespena, ebazpen honetan xedatutakoari jarraikiz.

E.1.6.– Zamalanak.

a) Hondakin horien zamalanak egiteko ibilgailuen geralekuek zolata iragazgaitza izango dute, eta, orobat, behar diren maldak eta balizko jarioak biltzeko sareak, horiek kutxatila itsurantz edo biltzeko putzurantz zuzentzeko, betiere bidean ibilgailuaren azpitik igaro gabe edo beste ibilgailu edo instalazio batzuetara hurbildu gabe.

b) Zamalanak egitean, substantzia arriskutsuak manipulatzeko eskatutako segurtasun-baldintzak bete beharko dira.

c) Instalazioan egiten diren hondakinen zamalanek eta manipulazioek, ekipoen estankotasunak eta deskargatzeetan biltegiratutakoen xurgapenak isurketa lausoak edo kontrolik gabeak saihestu beharko dituzte, edo, saihestu ezin denean, ahalik eta gehien murriztu.

E.1.7.– Jasotako hondakinak biltegiratzea.

a) Balorizatu beharreko hondakinen gehieneko biltegiratze-epea bi urtekoa izango da hondakinak arriskugabeak badira, eta sei hilekoa arriskutsuak badira.

b) Ezingo da gainditu ezarritako biltegiratze-ahalmena, baimenean kopururen bat zehaztu bada.

c) Solteko hondakinei dagokienez, izaerari, konposizioari eta kodifikazioari dagokienez homogeneoak diren hondakinak bakarrik biltegiratu ahal izango dira batera, eta aldez aurretik karakterizatu egin beharko dira, baterako biltegiratzeak arriskugarritasuna areagotzen ez duela eta azken kudeaketa zailtzen ez duela ziurtatzeko.

d) Tratatu beharreko hondakinak biltegiratzeko instalazioek lurzoru estankoak izan behar dituzte, aurreikusitako karga guztiak jasateko eta horien isuri edo ihesak atxikitzeko gaitasunarekin. Biltegiratze-gune bereiziak egongo dira, hondakin onargarrien mota generiko bakoitzerako.

e) Hondakin arriskutsuak biltegiratzearen ondoriozko arriskuak murrizte aldera, jardueraren titularrak eremu bereizi bat jarri beharko du instalazioetan horiek biltegiratzeko. Gune horrek estalita egon beharko du eta lurzoru iragazgaitzak izan beharko ditu.

f) Instalazioan onartutako hondakinak biltegiratzeko orduan, prezipitazio atmosferikoak sartzea eta haizeak hondakinak arrastatzea saihestu beharko da.

g) Hauts-itxurako hondakinak eta soltean jasotakoak pabiloiaren barruan gorde beharko dira, multzotan eta/edo gelaxketan, tratamendua egiteko unea iritsi arte.

h) Egoera fisiko likidoan edo oretsuan daudelako edo oso bustita daudelako, isurketak edo lixibiazioak sor ditzaketen hondakinen kasuan, haiek biltzeko kubeta edo sistema egokiak jarriko dira, gerta daitezkeen isurketak kanpora irten ez daitezen. Bilketa-sistema horiek independenteak izango dira, baldin eta, hondakinen tipologia dela-eta, isurketa baten ondorioz nahasiz gero arriskutsuago bihurtu badaitezke edo kudeaketa zaildu badezakete.

i) Hondakinak desagertu edo galtzen badira, edo ihesen bat gertatzen bada, berehala jakinaraziko da gertatutakoa Ingurumen Jasangarritasuneko Sailburuordetzan eta Zierbenako Udalean.

j) Instalazioaren etenaldi teknikoaren egoera berezietan, edo instalazioaren ezohiko funtzionamenduaren ondoriozko bestelako egoeretan, instalazioaren titularrak baimendutako hondakinen transferentzia-zentro gisa jardun ahal izango du, hondakinak kudeatzeko beste instalazio baimendu batera eramateko.

E.1.8.– Kudeaketa-eragiketen hierarkia.

Edonola ere, birziklatu edo balorizatu daitezkeen hondakin kudeatuak helburu horietara bideratuko dira, eta jardueraren titularrak hondakin horien hartzaileekin egindako tratamendu-kontratuetan jasoko da gertaera hori.

E.1.9.– Kudeatutako hondakinen datuak erregistratzea.

a) Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 64. artikuluan ezarritakoari jarraikiz, jardueraren titularrak fitxategi kronologiko fisiko edo telematiko bat izan beharko du, eta bertan, esku hartutako jarduera guztiei buruzko datuak jasoko dira ordena kronologikoan. Aipatutako fitxategi kronologikoan sartuko da, orobat, hondakinen ekoizpen- eta kudeaketa-lanen agiri bidezko egiaztapenean bildutako informazioa, eta bertan, gutxienez, honako datu hauek jasoko dira:

– Onartutako hondakinen jatorria (jatorria eta prozesua, enpresa sortzailea eta enpresa garraiolaria).

– Hondakin horien kantitateak, izaera, konposizioa eta identifikazio-kodea.

– Hondakin-partida bakoitzaren onarpen- eta harrera-data, eta, hala dagokionean, ematean sortutako kontrol- eta jarraipen-agiria.

– Onartu ez diren hondakin-partidei buruzko datuen erregistroa (jatorria, kopurua, enpresa garraiolaria, ez onartzeko arrazoiak eta ordezko destinoa).

– Biltegiratutako hondakinak instalazioko zer tokitan dauden.

– Hondakin-partidak aurretik egokitzeko edo multzokatzeko eragiketak, datak, parametroak eta partida horiei buruzko datuak, hondakinen ondorengo destinoa eta partida bakoitzari emandako EHZ kodea.

– Instalazioko kudeaketa-lanen datak edo azken kudeatzaile baimenduari bidalketa egin zaionekoa, kudeatzaile horren identifikazio-datuak, eta, hala badagokio, sortutako identifikazio agiriarenak.

– Bereizitako hondakin arriskutsuen mota bakoitzaren izaera eta pisuarekiko zatikia.

b) Artxibo kronologiko hori bost urtez gorde beharko da gutxienez eta urtero bidali beharko da Ingurumen Jasangarritasuneko Sailburuordetzara, dagokion urteko ingurumena zaintzeko programaren barruan.

c) Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 65. artikuluarekin bat etorriz, urte bakoitzeko martxoaren 1a baino lehen aurkeztu beharko da fitxategi kronologikoan jasotako informazioaren memoria laburra, dagokion urteko ingurumena zaintzeko programaren barruan.

d) Halaber, birziklatutako agregakin merkaturatuen erregistro bat ere gordeko da (kopurua eta norakoa), harrizkoak ez diren frakzioen kopurua eta norakoa, instalazioan sortutako baztertuen kopurua eta norakoa, baita zehaztu gabeko produktuaren kopurua eta norakoa ere.

e) Aurreko apartatuetan adierazitako agiriak Ingurumen Jasangarritasuneko Sailburuordetzara bidaliko dira, Euskal Autonomia Erkidegoko Administrazio Orokorrak eskura jarritako kanal, sistema edo aplikazio informatikoak erabiliz.

E.1.10.– Sortutako agregakinaren bizitza amaitutzat jotzeko bete beharreko baldintzak.

a) Jarduketan zehar, Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 5. artikuluan ezarritako baldintzak bete beharko dira kudeaketa-prozesuan sortutako agregakina merkaturatzeko. Jarduera lehenengoz martxan jarri ondoren, hori betetzen dela egiaztatu beharko da fabrikatutako produktuen ingurumen-organoaren aurrean, baita ingurumena zaintzeko programaren urteko txostenetan ere.

b) Merkaturatzen diren material guztiek arau hauetakoren bat bete beharko dute, eta ziurtatu egin beharko dira. Hori justifikatzeko, arau hauei dagozkien ziurtagiriak aurkeztu beharko dira:

– UNE-EN 13055:1 araua: hormigoi, mortero eta injektatutarako agregakin arinak.

– UNE-EN 13242 araua: geruza granularretan eta geruza tratatuetan aplikatzea.

– UNE-EN 13748:2 araua: Terrazozko baldosak kanpoan erabiltzeko.

c) Sortutako agregakina merkaturatzea ahalbidetzen duten ziurtagiriekin edo ziurtagiri horietan ezarritako baldintzekin lotutako eguneraketa, aldaketa edo gorabehera oro organo honi jakinarazi beharko zaio.

d) Erreferentziazko arau bakoitzean ezarritako baldintza teknikoez gain, ekoiztutako materialak honako baldintza hauek bete beharko ditu:

– Hondakinen balorizaziotik sortutako agregakin birziklatuekin EN 12457-4 arauak agindutako entsegua egin beharko da, eta ziurtatu emaitzak jarraian zehaztutako balioak baino txikiagoak direla:

(Ikus .PDF)

– UNE EN ISO 17025 arauari jarraikiz egiaztatutako laborategiek egingo dituzte adierazitako saiakuntzak. Lagin bat aztertuko da agregakin birziklatuaren 2.000,00 m³-ko, eta laginketa UNE-EN 932-1:1997 arauari jarraikiz egingo da («Agregakinen propietate orokorrak zehazteko entseguak. 1. zatia: laginketa-metodoak».

– UNE-EN ISO 17020 arauaren arabera egiaztatutako erakundeak arduratuko dira laginketa diseinatzeaz eta laginketa bera egiteaz. Erakunde egiaztatua ez da izango erakunde ustiatzailea, sustatzailea eta azken erabiltzailea.

e) Ingurumena Zaintzeko Programaren jarraipenari buruzko informazioa entregatzean, arestian aipatutako arauen betetze-mailaren jarraipenari buruzko informazioa aurkeztu beharko da, baita ingurumen-jarraipena ere.

E.2.– Airearen kalitatea babesteko baldintzak.

Instalazioa ustiatzean, ez dira gaindituko ingurumen-baimen bateratu honetan ezarritako gehieneko isurketen muga-balioak, eta ingurumen-organoak bere kasuan kasuko jarraibide teknikoetan ezarritako baldintza teknikoak bete beharko dira.

Prozesuko gai kutsatzaile oro bildu eta bide egokienetatik kanporatuko da, gai kutsatzaileen ezaugarrien arabera diseinatutako gasak arazteko sistema batetik iraganarazi ondoren, behar izanez gero.

Arau orokor honetatik salbuetsi ahalko dira emisio konfinatu gabeak, baldin eta teknikoki edota ekonomikoki atzeman ezin badira edo ingurunean oso eragin txikia dutela frogatuta badago.

Neurri egokiak hartuko dira istripuz gertatutako isurien probabilitatea txikitzeko, eta haien efluenteek giza osasunerako nahiz segurtasun publikorako arriskurik ez izateko. Gas-efluenteak tratatzeko instalazioak behar bezala ustiatu eta mantenduko dira; alegia, efluenteen tenperatura- eta konposizio-aldaketei eraginkortasunez aurre egiteko moduan. Era berean, ahalik eta gehien murriztuko dira instalazio horiek gaizki dabiltzan edo geldirik dauden aldiak.

Atmosfera Kutsa dezaketen Jardueretarako Instalazioak arautzen dituen abenduaren 27ko 278/2011 Dekretuaren 5. artikuluan jasotako betebeharrak bete beharko dituzte instalazioaren titularrek.

E.2.1.– Isurketak identifikatzea.

Petróleos del Norte SAren (Petronor) instalazioan garatutako jarduera atmosferako jarduera potentzialki kutsagarriaren kode honi dagokio: A 09 10 09 01 (hondakin arriskutsuen balorizazioa, egunean 10 tonako baino gehiagoko ahalmenarekin), urtarrilaren 28ko 100/2011 Errege Dekretuaren arabera, zeinaren bidez atmosferako jarduera potentzialki kutsagarrien katalogoa eguneratzen baita eta katalogo hori ezartzeko xedapenak ezartzen baitira. Era berean, indarrean dagoen araudiaren arabera katalogatutako jarduera hauek egiten dira instalazioan:

(Ikus .PDF)

Instalazioan sortzen diren isurketa lausoak erregimen eten bidez sortzen dira eta hondakinen karga- eta deskarga-eragiketekin lotuta daude biltegiratze-siloetan, baita hautsezko materialak biltegiratzearekin eta manipulatzearekin, eta ibilgailuak eta makina mugikorrak garraiatu eta mugitzearekin ere.

Hondakinak automatikoki kargatzen eta deskargatzen dira zisterna-kamioi itxietatik siloetara, betetze-hodi baten bidez. Siloek iragazkiak dituzte kargan zehar partikulen isurketa lausoak hartzeko eta arazteko. Silo bakoitzaren goialdean, bertikalki jarritako elementu iragazleak dituen iragazki bat edo eraginkortasun bereko sistema bat dago.

Era berean, hauts-itxurako materialak biltegiratzean eta manipulatzean isurketa lausoak ahalik eta gutxien sortzeko, neurri hauek hartzen dira:

– Hauts-itxurako materialak (hondakin onargarriak eta zementua) xede horretarako diseinatutako siloetan biltegiratzen dira, eta iragazkiak dituzte.

– Harea, produktu erdilandua eta agregakina estalitako aletegietan biltegiratzen dira, haizearen aurka babesteko.

Materialen joan-etorrietan sortutako isuriak gutxitzeko, honako neurri hauek aurreikusi dira:

– Hormigoizko edo asfaltozko zoladura ibilgailuen zirkulazio-bideetan.

– Gainazalak hezetzea.

– Aldian behin mantentzea eta garbitzea, hautsa ahalik eta gutxien sakabanatzeko, eta ibilgailuen joan-etorrien abiadura murriztea.

– Uhal garraiatzaile itxiak.

E.3.– Itsasora isurtzeko baldintzak.

E.3.1.– Isurien sailkapena, jatorria, ingurune hartzailea eta kokalekua.

Isuria sortzen duen jarduera mota nagusia: Hondakinen balorizazioa.

Jarduera taldea: 0 – Hondakinen kudeaketa.

ESJN: 1–7 Ter. 3832.

(Ikus .PDF)

Hondakin-urak solidoak dituzten karga-eremuetako euri-urak drainatzean eta hezetzeko ureztatze-uretan sortzen dira.

Isurketa zeharka egiten da, Portuko Agintaritzaren titulartasuneko euri-uren eroanbidea erabiliz. Tratatutako urak X puntuan sartzen dira eroanbide horretan: 495417; Y: 4.800.870 (UTM koordenatuak: ETRS 89).

Zerbitzu sanitarioak erabiltzetik eratorritako ur sanitarioak ur grisak jasotzeko sistema estanko batean bilduko dira, eta gero kudeatzaileak aterako ditu. Fluxu hori Portuko saneamendu-sarera konektatuko da zerbitzuan jarri orduko, eta ez dago baimenduta itsaso eta lehorraren arteko jabari publikora isurtzea.

E.3.2.– Gehienez isur daitezkeen emariak eta bolumenak.

– 1. isuria: Kutsatuta egon daitezkeen euri-uren jariatze-urak eta hezetzeko ureztatze-urak.

(Ikus .PDF)

E.3.3.– Isurketen muga-balioak.

Ondorengo zerrenda honetan ageri dira isurketa eragin duen jardueraren parametroen ezaugarri nagusiak, bakoitzarentzat ezarritako isurketen muga-balioekin:

(Ikus .PDF)

Ezin izango dira diluzio-teknikak erabili isurketen muga-balioak lortzeko.

Gainera, ingurune hartzaileko ingurumen-arloko kalitate-arauak bete beharko dira. Hori horrela ez bada, titularrak beharrezkoa den tratamendu egokia ezarri beharko du, isurketaren ondorioz aipatutako kalitate-helburuak urratzen ez direla ziurtatzeko.

Instalazioa martxan jartzen den unean, fluxu horren karakterizazio kualitatiboa egin beharko da. Apartatu honetan aurreikusten ez diren kutsatzaileak antzematen badira, ingurumen-organoari horren berri eman beharko zaio, Uraren Euskal Agentziak dagozkion muga-balioak ezar ditzan.

Baimen honek ez du babesten baldintza honetan esplizituki adierazi ez den beste gairik isurtzea, bereziki gai arriskutsurik (irailaren 11ko 817/2015 Errege Dekretuaren IV. eta V. eranskinak).

E.3.4.– Arazteko eta husteko instalazioak.

Industria-instalazio guztietarako arazteko instalazioak edo industriako uren zuzenketa-neurriak enpresa eskatzaileak aurkeztutako agirietara egokituko dira, eta elementu hauek izango dituzte funtsean:

1. isuria: Kutsatuta egon daitezkeen euri-uren jariatze-urak eta hezetzeko ureztatze-urak.

Tratamendu bikoitza aurreikusi da. Lehenengo fasean, hareak eta beste elementu flotatzaile edo jalkikor batzuk ezabatuko dira, eta 350 m³/orduko emarirako diseinatutako harrera-pit bat izango du; puntu horretatik, 20 m³/orduko gehieneko tratamendu-ahalmena duen dekantazio-sistema batera igaroko da. 155 mm/ordutik gorako intentsitate plubiometriko baterako (30 minutuz baino gehiago), sistemak bypass bat izango du.

Arazketa-sistemetatik eratorritako lohiak instalazioaren prozesura bideratuko dira.

Hartutako zuzenketa-neurriak nahikoak ez direla ikusiz gero, Petróleos del Norte SAk (Petronor) behar beste aldaketa egingo ditu arazketa-instalazioetan isurketak baimenean ezarritako baldintzak bete ditzan. Aldaketak Administrazioari jakinaraziko dizkio aurretik; behar izanez gero, baimena aldatzeko ere eskatuko du.

Kontrol-puntuetan egingo dira erakunde titularrari eskatutako emariaren autokontrolak eta neurketak, baita Uraren Euskal Agentziak egin beharreko ikuskapen- eta zaintza-lanak ere. Horretarako, argi eta garbi identifikatutako kontrol-kutxatila bat jarriko da baimendutako ur-fluxu bakoitzerako. Horiek sarbide zuzeneko leku batean jarri beharko dira, behar bezala ikuskatu eta zaindu ahal izateko, eta Uraren Euskal Agentziako langileek edozein unetan sartu ahal izango dute.

Araztutako efluentearen kontrolgunea araztegiko efluentearen irteeraren eta isurketa-puntuaren artean kokatu beharko da ahal izanez gero, laginketa ingurune hartzailera egindako azken isurketaren ezaugarrien adierazgarri izan dadin.

Beste kontrol-puntu hauek ere ezarriko dira, instalazioak behar bezala funtzionatzen duela egiaztatzeko:

– Euri-uren kontrol-puntua (IKP1): kutsatzaileak eraman ditzaketen euri-urak eta hezetzeko ureztatze-urak tratatzetik datorren efluentea.

(Ikus .PDF)

Administrazioak, egoki deritzonean, araztegiak ikuskatu eta efluentearen emariak eta analisiak aztertuko ditu, isurketen emari eta parametroek muga baimenduak gainditzen ez dituztela egiaztatzeko, eta, hala badagokio, araztegien errendimendua. Halaber, arazteko instalazioen ustiapenaren arduradun bat, titulazio egokia duena, izendatzea eskatu ahalko dio Petróleos del Norte SAri (Petronor).

Petróleos del Norte SAk (Petronor) ebazpen honetan eskatzen diren emarien edo parametroen datuak lortzeko beharrezkoak diren tresnak, kontrol-elementuak edo neurketa-sistemak izan beharko ditu; horrez gain, instalazioak eta azpiegiturak eta neurketarako sistemak eta elementuak funtzionamendu-egoera ezin hobean mantentzeko beharrezkoak diren prozedurak eta giza baliabideak eta baliabide teknologikoak izan beharko ditu.

E.3.5.– Isurketen kontrol-kanona.

Kostei buruzko uztailaren 28ko 22/1988 Legearen 85. artikuluak ezartzen duenez, lehorretik itsasora isurtzen diren hondakin-urei kanon bat ezarriko zaie, haien karga kutsatzailearen arabera.

Urei buruzko Legeak (1/2006 Legea, ekainaren 23koa), 7. artikuluan, Uraren Euskal Agentziaren esku uzten du uraren arloko indarreko legeriak ezarritako zergak kudeatu, kitatu, ikuskatu eta biltzea, bai eta lehorretik itsasora isurketak egiteko baimena ematea ere.

Abenduaren 10eko 459/2013 Dekretuak, lehorretik itsasora egiten diren isurketei buruzkoak, aipatu berri den kanona arautzen du: itsasotik lehorrerako isurketek eragindako kutsadura minimizatzera eta Estatuko jurisdikziopeko uren baitan euskal itsasertzari dagozkion uretan ingurumen-helburuak lortzera bideratutako jarduerak finantzatzeko izango da oso-osorik. Dekretu horretan, gainera, kanon hori kalkulatzeko prozedura ezartzen da, besteak beste.

Hala, dekretu horretako 17. eta 18. artikuluetan ezarritakoari jarraiki, isurketa baten karga kutsatzailea, kutsadura-unitateetan neurtuta, bider 3.000,00 euro egingo da, prezioa unitateko, isurketak kontrolatzeko kanonaren zenbatekoa kalkulatzeko. Karga kutsatzailea kalkulatzeko, berriz, isurketen urteko bolumena biderkatuko da isurketaren kutsadura-mailaren, hartan egon daitezkeen substantzia arriskutsuen nahiz hustuketarako erabilitako eroanbide motaren ezaugarrien arabera ezarritako koefiziente batez.

Aurrekoa oinarri hartuta, Lehorretik Itsasora egiten diren Isurketei buruzko abenduaren 10eko 459/2013 Dekretuaren 14. eta hurrengo artikuluak aplikatuz, isurtze honen urteko kanonaren kalkulua honako hau izango da:

1. isuria: Kutsatuta egon daitezkeen euri-uren jariatze-urak eta hezetzeko ureztatze-urak

Isurketa-kanona = C x P_UC

C = K x V.

K = k₁ x k₂ x k₃.

Definizioak:

C = Karga kutsatzailea, kutsadura-unitateetan neurtuta.

P_UC = Kutsadura-unitatearen balioa.

K = Kanonaren koefizientea, 459/2013 Dekretuaren III. eranskinean ezarritakoaren arabera.

k₁ = Karga kutsatzailearekin lotutako koefizientea.

k₂ = Eroanbide motak zehazten duen koefizientea.

k₃ = Substantzia arriskutsuekin eginiko isurketei aplikatzeko koefizientea.

V = Baimendutako isurketaren bolumena (m³/urte).

k₁: (7,75*OEK + 7,75*SE + 58,11*AG + 77,48*HC)*10^-9

k₁:(7,75*160+7,75*80+58,11*20+77,48*15)*10^-9= 4,1844*10^-6

k₂: Gainerako baldintzak. k₂ = 1,00.

k₃: II. eranskineko substantzia kutsatzailerik ez. k₃ =1,00.

K = 4,1844*10^-6 x 1,00 x 1,00 = 4,1844*10^-6.

V bolumena = 5.365 m³/urte.

Karga kutsatzailea C = 4,1844*10^-6 x 5.365 = 0,022449.

Isurketa-kanona = 0,022449 x 3.000 = 67,35 euro/urte.

Isurketaren titularrak 459/2013 Dekretuaren 16. artikuluan araututako Jarraipenerako Aukerako Protokoloari heltzen badio, handik ondorioztatutako K-ren eta V-ren balioak aplikatuko dira isurketaren kanona kalkulatzeko.

Aipatutako dekretuaren 20. artikuluak ezartzen duenaren arabera, isuria baimentzen duen erabakia indarrean sartzen denean sortuko da kanona. Baimenaren indarraldiko ondorengo urteetan, tasaren sortzapena urte bakoitzeko urtarrilaren 1ean gertatuko da.

Halaber, aipatutako manuaren arabera, kanona urte natural osorako likidatuko da, isurketarako baimena, haren aldaketa, etetea edo azkentzea ematen den ekitaldian izan ezik, edo Jarraipenerako Aukerako Protokoloa onartzen den ekitaldian izan ezik, orduan baimena indarrean egondako egunen kopuruaren arabera kalkulatuko baita kanona, urte osoko egunak aintzat hartuta.

Dekretu hori betez, Uraren Euskal Agentziak urte bakoitzeko lehen seihilekoan egingo ditu aurreko urteari dagozkion likidazioak.

E.4.– Instalazioan sortutako hondakinak egoki kudeatzen direla bermatzeko baldintzak.

E.4.1.– Hondakin guztientzako baldintza orokorrak.

Instalazioetan sortutako hondakin guztiak kudeatuko dira Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legean eta aplikatzekoak diren araudi espezifikoetan ezarritakoaren arabera, eta, beharrezkoa bada, karakterizatu egin beharko dira euren izaera eta destino egokiena zehazteko.

Berariaz debekatuta dago sortzen diren tipologia ezberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira, eta horiek bildu eta biltegiratzeko bide egokiak jarriko dira, nahasketak ekiditeko.

Hondakinak kudeatzeko hierarkia-printzipioei jarraituz, hondakinak sortzea prebenitu behar da, edo, hala badagokio, apirilaren 8ko 7/2022 Legearen 8. artikuluan ezarritako lehentasun-hurrenkerari jarraituz kudeatu behar dira, hau da: prebenitzea, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa barne. Hondakinak kasu honetan baino ezingo dira ezabatu: haiek balorizatzea teknikoki, ekonomikoki eta ingurumenaren ikuspegitik bideraezina dela behar bezala frogatzen denean.

Halaber, Euskal Autonomia Erkidegoan baimendutako tratamendu-instalazioetan trata daitezkeen hondakinak lehentasunez bideratu beharko dira helburu horretara, autosufizientziaren eta hurbiltasunaren printzipioak betetze aldera.

Hondakinen azken erabilera zabortegian ezabatzea dela aurreikusten bada, orduan, hondakin horiek ezaugarrituko dira, Kontseiluaren 2002ko abenduaren 19ko 2003/33/EE Erabakiak –Hondakinak hondakindegietan hartzeko irizpideak eta prozedurak ezartzen dituenak– xedatutakoari jarraikiz, eta Hondakinak hondakindegietan utziz ezabatzeko jarduera arautzen duen uztailaren 7ko 646/2020 Dekretuak ezarritako jarraibideen arabera; era berean, Hondakinak hondakindegietan biltegiratuta eta betelanak eginda ezabatzea arautzen duen otsailaren 24ko 49/2009 Errege Dekretuak ezarritako jarraibideak ere bete beharko dira.

Instalazioan sortutako hondakinen kantitateak –ebazpen honetan jasotakoak– orientagarriak dira soilik; kantitate horiek kalkulatzeko, kontuan hartu dira jardueraren ekoizpen-gorabeherak eta ekoizpenaren eta sortutako hondakinen arteko erlazioa. Azken datu horiek jardueraren adierazleetan ageri dira. Hargatik eragotzi gabe abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuaren Legearen testu bateginaren 10. artikuluan (4.d apartatua) ezarritakoa, instalazioko aldaketak kalifikatzeko, kasu honetan soilik eskatu beharko da baimena egokitzea: baldin eta sortutako hondakinen kantitatea handitzeak aurretik ezarri diren biltegiratze- eta ontziratze-baldintzak aldatu beharra badakar.

Hondakinak biltegiratzeko eremuek lurzoru iragazgaitza izango dute. Haien egoera fisiko, likido edo oretsua dela-eta, edo haien inpregnazio-mailarengatik isurketak eragin edo lixibiatuak sor ditzaketen hondakin arriskutsuentzat ontziak edo bilketa-sistema egokiak jarriko dira izan litezkeen isuriak kanpora isurtzea saihesteko. Hautsezko hondakinen kasuan, hondakinak euri-urarekin bustitzea edo haizeak herrestan eramatea eragotziko da, eta, beharrezkoa izanez gero, estali egingo dira.

Hondakinak lehen aldiz atera aurretik, kudeatzaile baimenduari ematen zaizkion hondakinak behar bezala identifikatu eta sailkatzen direla justifikatu beharko da, bereziki hondakin arriskutsuen izaerari eta arrisku-ezaugarriei dagokienez, betiere honako hauetan ezarritako irizpideei jarraikiz: Europako Hondakinen Zerrenda, Batzordearen 2014ko abenduaren 18ko Erabakiz argitaratua, zeinaren bidez aldatzen baita Hondakinen Zerrendari buruzko 2000/532/EE Erabakia; eta Batzordearen 2014ko abenduaren 18ko 1357/2014 (EB) Erregelamendua, zeinaren bidez ordezten baita Europako Parlamentuaren eta Kontseiluaren 2008/98/EE Zuzentarauaren III. eranskina (hondakinei buruzko zuzentarau horrek zuzentarau jakin batzuk baliogabetu zituen). Hori egiaztatu ondoren, eguneratu egingo dira baimen honetan jasota dauden eta berori izapidetzeko orduan indarrean zeuden identifikazioa eta sailkapena.

Hondakinak desagertu edo galtzen badira, edo ihesen bat gertatzen bada, berehala jakinaraziko da gertatutakoa Ingurumen Jasangarritasuneko Sailburuordetzan eta Zierbenako Udalean.

Sortutako hondakinak beste autonomia-erkidego batzuetara lekualdatzeko, Estatuaren lurraldearen barruan hondakinak lekualdatzea arautzen duen ekainaren 2ko 553/2020 Errege Dekretua eta Euskal Autonomia Erkidegoan gerora errege-dekretu hori garatuta xedatzen dena bete beharko da.

Hori hala izanik, hondakinak beste autonomia-erkidego batera lekualdatzeko, identifikazio-agiri bat aurkeztu beharko da, jarraipena eta kontrola egiteko, bat etorriz Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 31.2 artikuluarekin.

Nahitaezko aurretiko jakinarazpen-kasuetan, apirilaren 8ko 7/2022 Legearen 31. artikuluan aurreikusitako eta martxoaren 13ko 553/2020 Errege Dekretuaren 9. artikuluan garatutako kausetako bat gertatzen denean, hala organo honek nola destinoko autonomia-erkidegoko organo eskudunak hondakinak garraiatzearen aurka egin ahalko dute; arrazoitutako erabakia garraio-jakinarazpena aurkeztu eta gehienez hamar eguneko epean jakinarazi beharko diote operadoreari.

Baldin eta hondakinak Espainiatik kanpora esportatzen badira, Europako Parlamentuaren eta Kontseiluaren 2006ko ekainaren 14ko 1013/2006 Erregelamenduan (hondakinen lekualdaketei buruzkoa) ezarritakoa bete beharko da.

E.4.2.– Hondakin arriskutsuak.

Sustatzaileak hondakin arriskutsu hauek aitortu ditu:

(Ikus .PDF)

a) Hondakin bakoitzaren egoera eta ezaugarriak aintzat hartuta ezartzen dira hondakin arriskutsu bakoitzari dagozkion izendapena eta kodea, eta horiei buruzko informazioa baimena izapidetzean jasotzen da. Kode batzuek aldaketaren bat izan badezakete ere, beste batzuk, oinarrizkoak direlako, aldatu gabe utzi behar dira ekoizpen-jardueran zehar. Horiek definitzen dituzte mota eta hondakinaren osagai arriskutsuak. Kudeaketa-bideetan hierarkizazioa egokia dela egiaztatzeko eta Hondakinak Kudeatzeko Europako Estrategian bai Hondakinak Prebenitzeko eta Kudeatzeko Euskadiko 2030 Planean ezarritakoa betetzen dela bermatzeko, organo honek onartu egin beharko du hondakin bakoitzaren tratamendu-kontratuetan jasotako informazioa, dagokion kudeatzaile baimenduak horretarako eskabidea egin ostean. Egiaztatzeak garrantzi berezia izango du, batez ere, berreskuratzea edo balorizazioa kudeatzeko eragiketa-kodearen arabera kudeatu diren hondakinen tratamendu-kontratuetan uzte- edo ezabatze-kodeak balioztatzea eskatzen bada.

b) Hondakin arriskutsuak biltzeko sistemak bereiziak izango dira, duten tipologia dela-eta isurketaren baten ondorioz nahasiz gero arriskutsuago bihurtu badaitezke edo kudeaketa zaildu badezakete.

c) Hondakin arriskutsuak ontziratzeko, indarrean dagoen araudian ezarritako segurtasun-arauak bete beharko dira. Hondakin arriskutsuak dauzkaten ontziek etiketa argia, irakurgarria eta ezabagaitza eduki beharko dute, eta itxita egon beharko dute kudeatzaileari eman arte, edukiak isurita edo lurrunduta gal ez daitezen.

d) Hondakin arriskutsuak ezingo dira 6 hilabetetik gora eduki biltegian. Salbuespenezko kasuetan, ingurumen-organoak epe hori aldatu ahalko du, behar bezala justifikatutako arrazoiak direla medio, baldin eta giza osasuna eta ingurumena babestuko direla bermatzen bada.

e) Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legeak adierazten duenez, hondakin arriskutsuak behar bezala biltegiratzeko egokitutako eta identifikatutako gune bat egongo da, eta gune horrek higiene- eta segurtasun-baldintza egokiak bete beharko ditu; hondakin horiek aterpean egon beharko dute, eta isurketak eta jarioak atxikitzeko sistemak izan beharko dituzte.

f) Hondakinak kudeatzaile baimenduaren instalazioetara eraman aurretik, nahitaezko baldintza izango da agiri baten bidez egiaztatzea kudeatzaile baimendu horrek hondakinak onartu dituela. Agiri horretan, hondakinak onartzeko baldintzak ezarriko dira, eta egiaztatu egingo da tratatu beharreko hondakinaren ezaugarriak bat datozela administrazio-baimenarekin. Agiri hori Ingurumen Jasangarritasuneko Sailburuordetzara bidaliko da hondakina lehenengoz erretiratu aurretik, eta, behar izanez gero, hondakinen kudeatzaile berri batengana bidali aurretik. Beharrezkoa bada, karakterizazio zehatza egingo da, proposatutako tratamendua egokia den aztertzeko. Hala badagokio, arrazoitu egin beharko da proposatutako kudeaketa modua ebazpen honetako hondakin-kudeaketari buruzko printzipio hierarkikoei egokitzen zaiela.

g) Hondakin arriskutsuak lekuz aldatu aurretik eta, hala badagokio, horretarako egin beharreko jakinarazpena aurretiaz eginda dagoela, araudian zehaztutako moduan, identifikazio-agiria bete beharko da; agiri horren ale bat garraiolariari emango zaio, eta zamarekin batera eraman beharko du jatorritik destinoraino. Petróleos del Norte SAk (Petronor) artxiboan erregistratu eta gutxienez bost urtez gorde beharko ditu identifikazio-agiriak edo agiri ofizial baliokideak.

h) Egiaztatu egin beharko da baimendutako kudeatzailearen instalazioetara hondakin arriskutsuak eramateko garraioak bete egiten dituela halako salgaiak garraiatzeari buruzko indarreko legerian eskatutako betekizunak.

i) Petróleos del Norte SAk (Petronor) sortutako olio erabilia kudeatu beharko du, Erabilitako olio industrialen kudeaketa arautzen duen ekainaren 2ko 679/2006 Errege Dekretuari jarraikiz.

j) Ekipo elektriko eta elektronikoen hondakinak –besteak beste, lanpara fluoreszenteenak– kudeatzeko, otsailaren 20ko 110/2015 Errege Dekretua bete beharko da, Gailu elektriko eta elektronikoen hondakinei buruzkoa. Halaber, Pilei eta Metagailuei eta Haien Hondakinen Ingurumen Kudeaketari buruzko otsailaren 1eko 106/2008 Errege Dekretuan xedatutakoa bete beharko dute pilen eta metagailuen hondakinek. Kudeatzaile baimenduaren tratamendu-kontratua izateko, garraioaren aurretiko jakinarazpena egiteko eta identifikazio-agiria betetzeko betebeharretik salbu egongo dira kudeaketa-sistema integratuko kudeaketa-azpiegituretara eramaten diren hondakinak, bai eta toki-erakundeei ematen zaizkienak ere, gaika bildutako udal-hondakinekin eta haien parekoak direnekin batera kudeatu ditzaten, baldin eta dagokion toki-erakundeek entrega horiek egin direla egiaztatzen badute. Toki-erakundeei eman-izanaren egiaztagiriak gutxienez bost urtez gorde beharko dira.

k) Europako Parlamentuak eta Kontseiluak ozono-geruza agortzen duten substantzien gainean 2009ko irailaren 16an eman zuen 1005/2009 (EE) Erregelamenduak adierazten dituen substantzia erabiliak baldin baditu Petróleos del Norte SAk (Petronor), berreskuratu egingo ditu, horiek deuseztatzeko alderdiek onetsitako bitarteko teknikoen bidez edo ingurumenaren ikuspegitik onargarri den beste edozein deuseztatze-bide tekniko erabiliz; bestela, birziklatzeko edo birsortzeko erabiliko ditu aparatuak berrikusteko edo mantentzeko eragiketetan, edo desmuntatu edo deuseztatu aurretik.

l) Petróleos del Norte SAk (Petronor) urtero adierazi beharko dio Ingurumen Jasangarritasuneko Sailburuordetzari ekitaldi bakoitzean sortu dituen hondakin arriskutsu guztien jatorria, kopurua, helburua eta aldi baterako biltegiratuta dauden hondakinen zerrenda. Datu horiekin batera, ingurumena zaintzeko programa, dagokion urtekoa, bidali beharko du.

m) Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 65. artikuluan ezarritakoaren arabera, Petróleos del Norte SAk (Petronor), datuak jaso ondorengo urteko martxoaren 1a baino lehen eta dagokion ingurumena zaintzeko programaren barruan, artxibo kronologikoan jasotako informazioaren laburpen-memoria bat aurkeztu beharko du, zeinak lege horren XV. eranskinean agertzen den gutxieneko edukia barne hartu beharko baitu.

n) Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 64. artikuluaren arabera, Petróleos del Norte SAk (Petronor) formatu elektronikoko artxibo kronologiko bat izan beharko du, non jasoko baitira, ordena kronologikoan, sortutako hondakinen kopurua, mota eta jatorria, bai eta berrerabiltzeko, birziklatzeko, beste balorizazio-eragiketa batzuk egiteko eta deuseztatzeko produktu, material edo substantzien eta horien ondoriozko hondakinen kopurua ere; eta, hala badagokio, eragiketa horien ondorioz sortutako hondakinaren destinoa, bilketaren maiztasuna, garraiobidea eta aurreikusitako tratamendu-metodoa ere inskribatuko dira, bai eta produktu, material eta substantzien destinoa ere. Artxibo kronologikoaren inskripzioak, aplikatzekoa denean, apirilaren 8ko 7/2022 Legearen II. eta III. eranskinen arabera baimendutako tratamendu-eragiketa bakoitzeko egingo dira. Artxibo kronologikoa hondakinen ekoizpen- eta kudeaketa-lanetarako eskatutako egiaztatze dokumentaleko informazioa oinarri hartuta egingo da. Artxibo kronologiko hori bost urtez gorde beharko da gutxienez eta urtero bidali beharko da Ingurumen Jasangarritasuneko Sailburuordetzara, dagokion urteko ingurumena zaintzeko programaren barruan.

o) Baldin eta Petróleos del Norte SA (Petronor) Ontziei eta Ontzien Hondakinei buruzko apirilaren 24ko 11/1997 Legearen lehen xedapen gehigarriari atxiki zaion hornitzaile batengandik eskuratutako merkataritza- edo industria-ontzi baten azken jabea bada, Petróleos del Norte SA (Petronor) bera izango da ontzi-hondakin edo ontzi erabili horren ingurumen-kudeaketa zuzena egitearen arduraduna, eta, beraz, hondakin hori kudeatzeko baimena duen kudeatzaile bati entregatu beharko dio.

p) Apartatu honetako f), g) (kudeatzaileak EAEn daudenean), l), m) eta n) apartatuetan adierazitako agiriak Ingurumen Jasangarritasuneko Sailburuordetzara bidaliko dira transakzio elektroniko bidez, Euskadiko Autonomia Erkidegoko Administrazio Orokorrak eskainitako kanal, sistema edo aplikazio informatikoak erabiliz.

q) Amiantoa duten hondakinak antzemanez gero, Petróleos del Norte SAk (Petronor) Amiantoak ingurumenean sortzen duen kutsadura saihestu eta gutxitzeko 1991ko otsailaren 1eko 108/1991 Errege Dekretuan ezarritako eskakizunak bete beharko ditu. Era berean, amiantoa duten hondakinak kudeatzeko egingo diren manipulazioak martxoaren 31ko 396/2006 Errege Dekretuan ezarritako aginduen arabera egingo dira. Amiantoarekin lan egitean segurtasun- eta osasun-arloan bete behar diren gutxieneko baldintzak ezartzen ditu Errege Dekretu horrek.

E.4.3.– Hondakin arriskugabeak.

Sustatzaileak adierazitako hondakin arriskugabeak hauek dira:

(Ikus .PDF)

a) Erabilitako ontziak eta ontzi-hondakinak gaika eta behar bezala bereizi behar dira, eta eragile ekonomiko bati eman (hornitzaileari), erabilitako ontzien kasuan berriro erabili ahal izateko; ontzi-hondakinak, berriz, leheneratzaile, birziklatzaile edo balorizatzaile baimendu bati eman beharko zaizkio.

b) Hondakin horiek desagerrarazi beharrekoak direnean, ezingo dira urtebetez baino gehiagoz biltegiratuta eduki; hondakinen azken erabilera balorizatzea denean, berriz, bi urtez gorde ahal izango dira.

c) Oro har, desagerrarazi aurretik, hondakin guztiek izan beharko dute kudeatzaile baimendu batek emandako tratamendu-kontratua, onarpen-baldintzak zehaztuta. Hala badagokio, arrazoitu egin beharko da proposatutako kudeaketa modua ebazpen honetako hondakin-kudeaketari buruzko printzipio hierarkikoei egokitzen zaiela. Petróleos del Norte SAk (Petronor) artxibategian gorde beharko ditu tratamendu-kontratuak edo horien agiri ofizial baliokideak, nahitaezkoak izanez gero, bost urtean gutxienez.

d) Hondakina zabortegian biltegiratuz gero, jarraipen- eta kontrol-agiria bete beharko da hondakin arriskugabea lekualdatu aurretik, Hondakinak hondakindegian biltegiratuta eta betelanak eginda ezabatzea arautzen duen otsailaren 24ko 49/2009 Dekretuan ezarritakoari jarraikiz.

e) Hori hala izanik, hondakinak lekualdatzeko, identifikazio-agiri bat aurkeztu beharko da, jarraipena eta kontrola egiteko, Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 31.2 artikuluari jarraikiz.

f) Ontziei eta Ontzien Hondakinei buruzko Legearen (11/1997 Legea, apirilaren 24koa) lehen xedapen gehigarriari atxiki zaion hornitzaile batengatik eskuratutako merkataritzarako edo industriarako ontzi baten azken jabea bada Petróleos del Norte SA (Petronor), ontzi-hondakin edo ontzi erabili horren ingurumen-kudeaketa zuzena egitearen arduraduna da Petróleos del Norte SA (Petronor), eta, beraz, ontzi hori kudeatzeko baimena duen kudeatzaile bati entregatu beharko dio.

g) Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 65. artikuluan ezarritakoaren arabera, Petróleos del Norte SAk (Petronor), datuak jaso ondorengo urteko martxoaren 1a baino lehen eta dagokion ingurumena zaintzeko programaren barruan, artxibo kronologikoan jasotako informazioaren laburpen-memoria bat aurkeztu beharko du, zeinak lege horren XV. eranskinean agertzen den gutxieneko edukia barne hartu beharko baitu.

h) Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 64. artikuluaren arabera, Petróleos del Norte SAk (Petronor) formatu elektronikoko artxibo kronologiko bat izan beharko du, non jasoko baitira, ordena kronologikoan, sortutako hondakinen kopurua, mota eta jatorria, bai eta berrerabiltzeko, birziklatzeko, beste balorizazio-eragiketa batzuk egiteko eta deuseztatzeko produktu, material edo substantzien eta horien ondoriozko hondakinen kopurua ere; eta, hala badagokio, eragiketa horien ondorioz sortutako hondakinaren destinoa, bilketaren maiztasuna, garraiobidea eta aurreikusitako tratamendu-metodoa ere inskribatuko dira, bai eta produktu, material eta substantzien destinoa ere. Artxibo kronologikoaren inskripzioak, aplikatzekoa denean, apirilaren 8ko 7/2022 Legearen II. eta III. eranskinen arabera baimendutako tratamendu-eragiketa bakoitzeko egingo dira. Artxibo kronologikoa hondakinen ekoizpen- eta kudeaketa-lanetarako eskatutako egiaztatze dokumentaleko informazioa oinarri hartuta egingo da. Artxibo kronologiko hori bost urtez gorde beharko da gutxienez eta urtero bidali beharko da Ingurumen Jasangarritasuneko Sailburuordetzara, dagokion urteko ingurumena zaintzeko programaren barruan.

i) Erregistro bat egingo da, hondakinei buruzko datu hauek jasoko dituena: kantitatea, izaera, identifikazio-kodea, jatorria, tratatzeko metodoak eta tokiak, hondakinen sorrera- eta lagapen-datak, biltzeko maiztasuna eta garraiatzeko modua. Urtero, Ingurumen Jasangarritasuneko Sailburuordetzari bidaliko zaio kontrolerako erregistro horren kopia.

j) Apartatu honetako c) eta d) apartatuetan (kudeatzaileak EAEn daudenean), eta g), h) eta i) apartatuetan adierazitako agiriak Ingurumen Jasangarritasuneko Sailburuordetzara bidaliko dira, transakzio bidez, Euskal Autonomia Erkidegoko Administrazio Orokorrak eskainitako kanal, sistema edo aplikazio informatikoak erabiliz.

E.5.– Lurzoruaren babesaren inguruko baldintzak.

Urtarrilaren 14ko 9/2005 Errege Dekretuan, ekainaren 25eko 4/2015 Legean eta abenduaren 26ko 209/2019 Dekretuan (Lurzorua kutsatzea saihestu eta kutsatutakoa garbitzeko ekainaren 25eko 4/2015 Legea garatzen duena) ezarritako aginduak betez, Petróleos del Norte SAk (Petronor) lurzorua babesteko behar diren neurriak hartu beharko ditu, baita ingurumen-organoak beharrezkotzat jotzen dituen edo eskatzen dituen guztiak ere.

Ekainaren 25eko 4/2015 Legearen 16. artikuluko 2. apartatuari jarraikiz, lurzoruaren egoeraren txostenak aurkeztu beharko dira, gutxienez, 5 urtean behin, lege hori indarrean jartzen denetik aurrera.

Era berean, aurreko paragrafoan aipatutako araudian (abenduaren 16ko 1/2016 Legegintzako Errege Dekretua eta urriaren 18ko 815/2013 Errege Dekretua), lurzorua babesteko betebeharrak ezartzen dira, eta, hain zuzen ere, horiek betetze aldera, sustatzaileak hauek aurkeztu beharko ditu:

– Oinarrizko txostena, abenduaren 26ko 209/2019 Dekretuaren 20. artikuluan aipatutako epeak eta maiztasunak beteta.

– Lurzoruen eta lurpeko uren kontrol- eta jarraipen-dokumentuak, urriaren 18ko 815/2013 Errege Dekretuaren 10.2 artikuluan ezarritako epeen arabera.

Nolanahi ere, sustatzaileak lurzoruen dokumentu bakar bat bidaliko du, ikerketa-lanak egiten eta lurzoruaren kalitatea lehengoratzen diharduen erakunde ezagun batek egina, eta aipatutako txostenak bilduko ditu hor (lurzoruaren egoerari buruzko aldizkako txostena, oinarrizko txostena eta lurzoruen eta lurpeko uren kontrol- eta jarraipen-agiriak). Emandako agiriak aldatu edo agiri berriak eman behar diren bakoitzean, lurzoruen agiri bakar berri bat helaraziko da.

Sustatzaileak baldintza hauek bete beharko ditu instalazioetan egindako aldaketek eragindako lur-mugimenduei dagokienez:

1.– Aurreikusten bada aldaketaren bat egin behar dela instalazioa baimenduta dagoen lurzatiaren barruan, eta aldaketa horren ondorioz lurrak mugitu behar badira:

a) Bat etorriz ekainaren 25eko 4/2015 Legearen 25. artikuluko 1.c) apartatuan jasotzen denarekin, induskatu beharreko materialak (lurrak, eraiste-hondakinak, etab.) karakterizatu egin beharko ditu jardueraren sustatzaileak, ekintza kutsatzaileen ondorioz erasan zaien ala ez egiaztatzearren eta, karakterizazio horren emaitzen arabera, horiek kudeatzeko bide egokiena zehaztearren.

b) Jarduketa horretan aurreikusten bada induskatu beharreko materialen bolumena 500 m³-tik gorakoa dela (zolatak barne), edo jarduketa egin bitartean gainditze hori antzemango balitz, nahitaezkoa izango da lurzoruaren kalitatea ikertzeko eta oneratzeko akreditatutako erakunde batek egindako hondeaketa selektiborako plan bat aurkeztea. Indusketa-planak abenduaren 26ko 209/2019 Dekretuaren IV. eranskinean adierazitako edukia jaso beharko du, eta ingurumen-organoak onartu beharko du hura gauzatu aurretik.

c) Induskatu beharreko bolumena 500 m³-tik beherakoa bada, aldaketaren jakinarazpenak honako informazio hau jaso beharko du:

– Jarduketaren pertsona fisiko edo juridiko sustatzailearen eta jarduketa burutuko duen kontratudunaren identifikazioa.

– Jarduketak ukituko duen lekuaren kokapen-datuak, Lurzoruaren Kalitatearen Administrazio Erregistroaren erreferentzia barne hartuta.

– Jarduketaren xede den eremuaren mugaketa eta azalera. Jakinarazpenean, lurzatia eta jarduketa-eremua zehatz-mehatz non dauden jakitea ahalbidetzen duten planoak erantsiko dira.

– Jarduketaren deskribapen xehatua.

– Induskatuko diren materialen bolumena, zolatak barne.

– Ingurumen-jarraipeneko lanen eta azken txostena egitearen arduradunaren identifikazioa; artikulu honetan aipatutako kasuetan erakunde egiaztatua izan beharko du.

– Jarduketa hasteko aurreikusitako datak.

d) Aurreko kasuetako edozeinetan, obra egin ondoren, azken txostena bidali beharko du. Bertan, lurren ezaugarritzearen emaitzak adierazi beharko dira; horrez gain, induskatutako materialen berrerabilera edo kudeaketa egokia egiaztatzeko txosten bat ere bidali beharko da. Indusketaren bolumena 100 m³-tik gorakoa bada, entitate egiaztatu batek egingo ditu ingurumen-jarraipenerako lanak eta txostena.

e) Arau orokor gisa, kutsatutako lurzoruetan indusketa selektiboak egiteko gidaliburuan jasotako irizpideak beteko dira. Esteka honetan eskura daiteke gida:

Ihobe - Argitalpenak - Kutsatutako lurzoruetan indusketa selektiboak egiteko gida

f) Soberakinetarako aurreikusitako erabilera hondakindegian uztea denean, ezaugarritzea dekretu hauetan ezarritakoaren arabera egin beharko da: 646/2020 Errege Dekretua, uztailaren 7koa, Hondakinak hondakindegietan utziz ezabatzeko jarduera arautzen duena, eta 49/2009 Dekretua, otsailaren 24koa, Hondakinak hondakindegietan biltegiratuta eta betelanak eginda ezabatzea arautzen duena. Oro har, laginketa egiteko, oinarrizko irizpide batzuk bete beharko dira; hain zuzen ere, abenduaren 26ko 209/2019 Dekretuaren IV. eranskinean eta gidaren 10.2.6 apartatuan («Induskatu behar diren lurzoruetan in situ egindako laginketa») adierazitako oinarrizko irizpideak, induskatu beharreko materialen ezaugarritze-kanpaina diseinatzerakoan kontuan hartu beharrekoak.

g) Soberako materialak instalazio berean berrerabili ahal izateko, balio hau izan beharko dute material horiek: Lurzorua kutsatzea saihestu eta kutsatutakoa garbitzeko ekainaren 25eko 4/2015 Legean ezarritako EBA-B (industria-erabilera) balioaren azpikoa. Horrez gain, lur horien hidrokarburo-edukia ezin izango da arriskutsua izan. Horretarako, egiaztatutako erakunde batek egin beharko ditu laginketa eta azterketa, urriaren 10eko 199/2006 Dekretuaren arabera, zeinaren bidez ezartzen baita lurzoruaren kalitatea ikertu eta berreskuratzeko erakundeak egiaztatzeko sistema, eta zehazten baita erakunde horiek lurzoruaren kalitatearen gainean egindako ikerketen edukia eta norainokoa.

h) Lur garbitzat hartuko dira ekainaren 25eko 4/2015 Legean ezarritako EBA-Ak baino balio txikiagoak eta TPHetarako 50 mg/kg baino balio txikiagoak dituzten lurrak, eta, beraz, onartu egingo dira baimendutako betelanerako.

i) Substratu harritsu osasuntsua murrizketarik gabe kudeatu ahalko da. Lurzoru naturalaren parekoa den substratu harritsu meteorizatuaren kasuan, aurreko puntuetan ezarritako irizpidea beteko da.

2.– Instalazioa baimenduta dagoen lurzatitik kanpo aldaketaren bat egitea aurreikusten bada (lurzoru berria okupatuz) eta okupatu nahi den lurzoru berriak lehenago izan badu ekainaren 25eko 4/2015 Legearen I. eranskinean aipatutako jardueraren bat, sustatzaileak lurzoruaren arloko adierazpena lortu beharko du, egin nahi diren aldaketak egiten hasi aurretik.

Era berean, ekainaren 25eko 4/2015 Legearen 22. artikuluko 2. apartatuaren arabera, lurraren kutsadura-aztarnak aurkitzen badira, horren berri eman beharko zaie dagokion udalari eta Ingurumen Jasangarritasuneko Sailburuordetzari, sailburuordetza horrek ezar ditzan hartu beharreko neurriak, betiere aipatutako 4/2015 Legearen 23. artikuluko 1.e) apartatuarekin bat etorriz.

E.6.– Zaratari buruzko baldintzak.

a) Petróleos del Norte SAk (Petronor) behar diren neurriak hartu beharko ditu instalazioak kanpoko ingurumenari transmiti ez diezazkion Euskal Autonomia Erkidegoko hots-kutsadurari buruzko urriaren 16ko 213/2012 Dekretuaren I. eranskineko F taulan (eremu akustiko mota: B) muga-balio gisa ezarritakoak baino zarata-maila handiagoak. Muga-balio horiek ingurumen-zarataren ebaluazioari dagokionez Zaratari buruzko azaroaren 17ko 37/2003 Legea garatzen duen abenduaren 16ko 1513/2005 Errege Dekretuaren II. eranskineko prozeduren arabera ebaluatzen dira.

(Ikus .PDF)

Kanpoaldeko gehieneko balioek lurretik 2 metroko garaiera eta leihodun fatxaden kanpoaldeko eraikuntzaren garaiera guztiak dituzte erreferentziatzat.

Lokal mugakideak egonez gero, lokal horien erabilera kontuan hartuta, instalazioak ezingo du aipatutako urriaren 16ko 213/2012 Errege Dekretuaren I. eranskineko G eta H tauletan ezarritako gehieneko balioak baino zarata-maila handiagoa transmititu haietara.

Ezarritako zarata-immisioaren muga-balioak errespetatzen direla ulertuko da baldin eta, aipatutako urriaren 16ko 213/2012 Dekretuaren II. eranskinean ezarritako prozeduren arabera, ebaluatutako adierazle akustikoen balioek, urtebeteko epean, baldintza hauek betetzen badituzte:

– Urteko batez besteko balioek ez dituzte gainditzen aipatutako I. eranskineko F taulak ezarritako balioak.

– Eguneroko balioek ez dituzte 3 dB-tan gainditzen aipatutako I. eranskineko F taulak ezarritako balioak.

– Lkeq, Ti indizearen batez besteko balioek ez dituzte 5 dB-etan gainditzen aipatutako I. eranskineko F taulan adierazitako balioak.

b) Zamalanetan eta materiala kamioietan garraiatzean egiten den zaratak ez du nabarmen handituko sentikortasun akustiko handieneko guneetako zarata-maila.

F) Ingurumena Zaintzeko Programa.

Ingurumena zaintzeko programa sustatzaileak aurkeztutako agirietan eta apartatu hauetan ezarritakoaren arabera gauzatu beharko da:

F.1.– Atmosferara eginiko immisioak kontrolatzea.

Immisioko laginketa-datuak biltzeko kanpaina bat egingo da sei hilean behin gutxienez, bai langileen lan-eremuetan edo lan-ingurunean, bai instalazioaren ingurunean.

Laginketa-kanpaina horiek ahalik eta egoera okerrena duen aldean egingo dira. Lan-ingurunearen gaineko eragina baloratuko da, eta, horretarako, laginketak egingo dira lan eta eragiketetan.

Sei hilean behin, honako parametro hauen immisio-mailak neurtuko dira, gutxienez, funtzionamenduan dagoen instalazioaren bi puntu adierazgarritan:

(Ikus .PDF)

Kontrol horien emaitzak dagokion urteko ingurumena zaintzeko programarekin batera igorriko dira.

F.2.– Isuritako uraren kalitatea kontrolatzea.

Sustatzaileak aurkeztu dituen agirien arabera, analisi hauek egingo dira:

a) Kutsatuta egon daitezkeen euri-uren jariatze-urak eta hezetzeko ureztatze-urak (IKP1).

(Ikus .PDF)

Parametroen analisia «Standard Methods For the Examination of Water and Wastewater» txostenean (APHA, AWWA, WPCF, azken argitalpena) edo «ASTM Water and Environmental Technology» txostenaren azken argitalpeneko 11. atalean jasotako metodo normalizatuetako baten bidez egingo da. Eredurik egokiena aukeratuko da, parametroaren ohiko kontzentrazioaren arabera. Egun erabiltzen direnak ez beste azterketa-metodo batzuk ere ezarri ahalko dira, emisioen kontzentrazioa hobeto definitze aldera.

Kanpoko kontrol bakoitza, laginketa nahiz ondorengo azterketa, «Administrazio hidraulikoaren erakunde kolaboratzaile» batek egin eta ziurtatu behar du, hala baitaukate xedatuta Jabari Publiko Hidraulikoaren Erregelamenduaren 255. artikuluak eta MAM/985/2006 Aginduaren 13. artikuluak. Nolanahi ere, beste laborategiren batek ere egin dezake lan hori, baldin eta eskatzekoak diren parametroak betetzen baditu, UNE-EN ISO/IEC 17025 serieko arauetan ezarritako betekizunak betetzen baditu (edo jarduera-eremuaren arabera gerora hori ordeztuko duen serieko arauak), eta aurreko puntuetan aipatutako parametro horietako bakoitzerako egingo da. Lagin horrek emariarekiko proportzionala den 24 ordukoa izan beharko du edo, bestela, lagin zehatz adierazgarria.

Kutsatzaile gehien sortzen den aldietan egingo dira laginketak beti.

Baimendutako parametroen azterketen emaitzak, Ingurumen Jasangarritasuneko Sailburuordetzara bidali beharreko informazioa dena dela, Uraren Euskal Agentziari bidaliko zaizkio laginketa egiten denetik gehienez ere hilabete bateko epean. «Datuak kudeatzeko tresna» (aurrerantzean, DKT) Eusko Jaurlaritzaren Egoitza Elektronikoaren bidez kargatuko zaizkio web-aplikazioari. Kargatzeko jarraibideak helbide honetan daude eskuragarri:

https://www.uragentzia.euskadi.eus/analisien-eta-emarien-berri-ematea-dkt-tresnan/webura00-contents/eu/

Analitiken emaitzak edo emarien txostena jasotzen dituen fitxategiaren baliozkotzea, egoitza elektronikora behin betiko igo aurretik, DKT bidez egin beharko da. Fitxategiak kargatu ondoren, informazio horren ondorengo kudeaketa ere DKTren bidez egingo da. Tresna hori URAren webguneko atari pribatuaren bidez eskuratu daiteke, «Isurketen analitika eta emarien datu-karga» moduluan; bestela, zuzenean sartzeko aukera ere badago helbide honen bidez:

https://apps.euskadi.eus/aa08aVistaWar/inicioMigas/maintInicioMigas?R01HNoPortal=true

Era berean, ofizialki homologaturiko laborategi propioak edo kanpoko laborategiak egindako buletin analitikoak telematikoki aurkeztu behar dira, egoitza elektronikoaren bitartez, adierazi bezain maiz.

Isuriak baimenaren baldintza guztiak betetzen dituela ulertuko da ezarritako kontrol-parametro guztiek E.3.3 apartatuan ezarritako mugak betetzen dituztenean.

Aipatutako maiztasunarekin, aldi bakoitzean efluenteak ezaugarri baimenduekiko dituen balizko desbiderapenei, horien kausei eta zuzentzeko hartutako neurriei buruzko gorabeheren adierazpen bat erantsiko da.

Euskal Autonomia Erkidegoko Administrazioko Uraren Euskal Agentziak, egoki deritzonean, arazketa-instalazioak ikuskatuko ditu, eta efluentea neurtu eta aztertu ahal izango du, isurketen emariek eta parametroen kontzentrazioek baimendutako mugak gainditzen ez dituztela egiaztatu ahal izateko. Halaber, arazketa-instalazioen ustiapenaren arduradun bat, titulazio egokia duena, izendatzea eskatu ahalko dio titularrari.

F.3.– Instalazioaren inguruko ingurune urtarrean duen eraginaren kontrola.

Jardueraren hondakin-uren ezaugarriak direla eta, ez dago ingurune hartzailea zaintzeko planik ezarri beharrik, isurketaren ezaugarriak eta ingurune hartzailearen kalitate helburuak aldatzen ez diren bitartean; horietakoren bat aldatuz gero, Uraren Euskal Agentziak aipatutako plana aurkezteko eska diezaioke.

F.4.– Zarata kontrolatzea.

a) Adierazle akustikoen ebaluazio hauek egin beharko dira: Ld, Le, Ln, LAeq,Ti eta LAeq, 60 segundotan eta urteroko maiztasunarekin, E.6 apartatuko a) puntuan ezarritako mugak betetzen direla egiaztatzeko.

b) Neurketa bidezko ebaluazioak Administrazioaren II. mailako entitate laguntzaile batek egin beharko ditu, bat etorriz urriaren 16ko 212/2012 Dekretuan ezarritakoarekin. Entitate horrek UNE-EN ISO/IEC 17025 arauaren araberako egiaztagiria eduki beharko du akustikaren arloan espazio- eta denbora-laginketa egiteko. Nolanahi ere, ingurumen-organoak zainduko du ebaluazio horiek egiten dituzten entitateek gaitasun tekniko egokia dutela.

c) Ebaluazio-metodoak eta -prozedurak eta ebaluazio horiei buruzko txostenak Ingurumen Jasangarritasuneko Sailburuordetzak emandako jarraibide teknikoetan eta abenduaren 16ko 1513/2005 Errege Dekretuaren (Zaratari buruzko azaroaren 17ko 37/2003 Legea garatzen duena) II. eranskinean ezarritakora egokituko dira.

F.5.– Tresneriaren kontrola.

Urtean behin, tresneriaren kontrolean espezializatutako enpresa batek txosten bat egingo du zuzenketa-neurrien funtzionamenduari eta prozesuen eta inguruneko kalitatea kontrolatzeko sistemen funtzionamenduari buruz.

Aipatutako txostena dagokion urteko ingurumena zaintzeko programari atxikiko zaio.

F.6.– Jardueraren adierazleak.

Sustatzaileak jardueraren funtzionamenduari buruzko parametro adierazle hauen jarraipena egingo du urtero, ingurumenean duten eraginari dagokionez:

(Ikus .PDF)

Adierazle horiek urtero kalkulatu eta kontrolatuko dira, eta ingurumena zaintzeko dagokion urteko programarekin batera aurkeztu beharko dituzte.

F.7.– Ingurumeneko finantza-bermearen kontrola, ingurumena zaintzeko programaren –IZParen– barnean.

Petróleos del Norte SAk (Petronor) bere jardueraren ingurumen-arriskuen azterketa (IAA) egin beharko du, abenduaren 22ko 2090/2008 Errege Dekretuaren 34. artikuluan ezarritakoaren arabera, finantza-bermea eratu behar duen ebaluatzeko, bat etorriz 26/2007 Legearen 24. artikuluarekin (2090/2008 Errege Dekretuaren bidez, Ingurumen Erantzukizunari buruzko urriaren 23ko 26/2007 Legea zati batean garatzen duen Erregelamendua onartu zen). Finantza-bermea eratu ondoren, erantzukizunpeko adierazpen bat aurkeztu beharko dio agintaritza eskudunari, eta adierazpen horrek 2090/2008 Errege Dekretuaren IV.1 eranskinean adierazitako informazioa jaso beharko du gutxienez. 26/2007 Legearen 28. artikuluko a) eta b) apartatuetan adierazitako salbuespenei jarraikiz jarduera finantza-bermea eratzetik salbuetsita badago, erantzukizunpeko adierazpena aurkeztu beharko dio agintaritza eskudunari; adierazpen horretan, IV.2 eranskinean adierazitako informazioa jasoko da gutxienez.

IZParekin batera, honako dokumentu hauek bidali beharko dira, programa aurkezteko prozedura telematikoan gaitutako dokumentu-ereduak erabilita:

– Finantza-bermea eratu behar izanez gero, indarrean dagoen ingurumen-aseguruaren polizaren kopia edo eratutako finantza-berme motaren ziurtagiria aurkeztu beharko da urtean behin.

– Ingurumeneko finantza-bermea eratzetik salbuetsita egonez gero, eta 300.000 eta 2.000.000 euro bitarteko zenbatekoarekin konpon daitezkeen kalteak eragin ditzaketen operadoreak izanez gero (Ingurumen Erantzukizunari buruzko urriaren 23ko 26/2007 Legearen 28.b artikulua), erakunde independente batek emandako ziurtagiriaren kopia aurkeztu beharko da urtero; ziurtagiri horrek egiaztatu behar du erakunde horrek etengabe atxikirik egon behar duela Batasunaren Ingurumen Kudeaketako eta Ikuskaritzako Sistemara (EMAS) edo indarrean den UNE-EN ISO 14001 Ingurumen Kudeaketarako Sistemara.

– Operadoreak ingurumen-arriskuen azterketa (IAA) eguneratuko du egoki irizten badu, eta, betiere, funtsezko aldaketak gertatzen direnean jardueran, instalazioan edo oinarrizko baimenean. Finantza-bermearen zenbatekoa urtero eguneratuko da, KPIaren arabera. Ingurumen-arriskuen azterketaren eguneraketak kasuan kasuko MARMA prozedurako dokumentazioaren barnean aurkeztuko dira.

F.8.– Emaitzak igortzea.

Ingurumena zaintzeko programa osatzen duten txostenen eta azterketen emaitzak behar bezala erregistratu behar dira, eta Ingurumen Jasangarritasuneko Sailburuordetzara bidali, Ekonomiaren Garapen, Jasangarritasun eta Ingurumen Sailaren webguneko bidalketa-prozedura telematikoari jarraikiz:

https://www.euskadi.eus/baimena/ibb-ippc/web01-a2inguru/eu/

Era horretan, aipatutako programak zehaztutako aldian egiten diren kontrol guztiak, ibilgura eta/edo itsasora isuritako urei dagozkienak izan ezik, ingurumena zaintzeko programarekin batera bakarrik aurkeztuko dira, eta erreferentziako urtea amaitu ondoren.

Ezarritako baldintzak urratzen diren kasuetan bakarrik bidali beharko da berehalako jakinarazpena Ingurumen Jasangarritasuneko Sailburuordetzara, gertatutakoaren berri izan ondoren; horretarako helbide elektronikoa: ippc@euskadi.eus eta inspeccionambiental@euskadi.eus

Horrez gain, urtean behin baino gehiagotan egiten diren kontrolak kontrola egiten den urteari dagokion programaren barruan baino ez dira bidaliko.

Emaitza horiek urtero bidaliko dira, martxoaren 31 baino lehen, eta txosten bat aurkeztu beharko da zaintza-programaren emaitzekin batera. Txosten horretan jasoko dira babes- eta zuzenketa-neurrien eta prozeduren kontrolerako eta ingurumenaren kalitaterako sistemen funtzionamendua eta emaitzen analisia, epe horretan izandako gertakari nagusiak bereziki aipatuta, haien balizko kausak eta konponbideak azalduz; halaber, laginak nola hartu diren zehaztuko da, aldez aurretik hala egin ez bada.

F.9.– Ingurumena zaintzeko programaren dokumentu bategina.

Sustatzaileak ingurumena zaintzeko programaren agiri bategina prestatu beharko du. Bertan, aurkeztutako dokumentazioan proposatutako betebeharrak eta ebazpen honetan jasotakoak bildu beharko ditu. Honako hauek zehaztu beharko ditu programa horrek: kontrolatu beharreko parametroak, parametro bakoitzerako erreferentzia-mailak, analisi edo neurketen maiztasuna, laginketak eta analisiak egiteko teknikak, eta laginak hartzeko puntuen kokaleku xehatua. Halaber, dagokion aurrekontua ere barne hartu beharko du.

Era berean, ingurumena zaintzeko programak jardueraren adierazleak zehaztu beharko ditu eta adierazle horiek aztertzeko sistematika barruan izan beharko du, horien arabera enpresan bertan ingurumen-hobekuntza ziurtatzearren ezarritako neurri eta mekanismoen eraginkortasuna egiaztatu ahal izateko (ingurumen-adierazleak).

G) Ezohiko egoeretako prebentzio-neurriak eta jardunerako baldintzak.

G.1.– Instalazioa gelditzeko eta abiarazteko lanak eta mantentze-lanetarako programatutako lanak.

Programatutako urteko mantentze-lanei dagokienez, sortuko diren isurketen eta hondakinen zenbatespena egin beharko du enpresak, eta, dagokionean, haiek kudeatzeko eta tratatzekoa ere bai.

Instalazioa gelditzean nahiz abiaraztean, mantentze-eragiketetan eta ohiz kanpoko egoeretan sortutako hondakinak laugarren apartatuko E.4 azpiapartatuan («Instalazioan sortutako hondakinak egoki kudeatzen direla bermatzeko baldintzak») ezarritakoari jarraituz kudeatu beharko dira, baina ez da beharrezkoa izango hondakin horiek baimendutako hondakinen zerrendan jasota egotea.

G.2.– Jarduera etetea.

Jarduerari lege hauek aplikatu behar zaizkio: 4/2015 Legea, ekainaren 25ekoa, Lurzorua kutsatzea saihestu eta kutsatutakoa garbitzekoa, eta 9/2005 Errege Dekretua, urtarrilaren 14koa, Lurzorua kutsa dezaketen jardueren zerrenda eta lurzoru kutsatuen deklaraziorako estandarrak eta irizpideak ezartzen dituena. Horrenbestez, Petróleos del Norte SAk (Petronor) jarduera uzte horren berri eman beharko dio ingurumen-organoari, bi hilabeteko epea agortu baino lehen; jakinarazpen horrekin batera, jarduketa-proposamen bat ere aurkeztu beharko da, erakunde horrek ezar dezan noraino iristen diren bere betebeharrak eta lurzoruaren kalitatea deklaratzeko prozedura hasteko epea noiz hasiko den beranduenez, ekainaren 25eko 4/2015 Legearen 31.3 artikuluan xedatutakoari jarraikiz.

Jarduera utzi baino lehen, Petróleos del Norte SAk (Petronor) instalazioetan dauden hondakin guztiak kudeatu beharko ditu ebazpen honen laugarren apartatuaren E.4 azpiapartatuan ezarritakoarekin bat etorriz.

G.3.– Jarduera aldi baterako etetea.

Jarduera aldi baterako etetea eskatuz gero, Industriako isurketen Erregelamendua onartzen duen urriaren 18ko 815/2013 Errege Dekretuaren 13. artikuluan arautu bezala, Petróleos del Norte SAk (Petronor) jarduera aldi baterako eteteko eskabidearekin batera, dokumentu bat bidali beharko du instalazioa jardunik gabe egonda ere aplikagarriak zaizkion ingurumen-baimen bateratuko kontrolak eta baldintzak nola beteko dituen adierazteko.

Era berean, instalazioa berriz abiarazi baino lehen, ziurtatu beharko da instalazioek egokiro funtzionatzen dutela, ingurumenean eragina izan dezakeen isurketarik edo emisiorik gerta ez dadin.

G.4.– Prebentzio-neurriak eta ezohiko funtzionamendurako jarduketak.

Aurkeztutako agirietan egindako proposamenean zehaztuta dauden prebentzio-neurriez eta ezohiko egoeretan aplikatu beharreko funtzionamendu-baldintzez gain, ondorengo apartatuetan aipatzen diren baldintzak bete beharko dira:

a) Prebentziozko mantentze-lanen eskuliburua eduki beharko da instalazioen egoera ona bermatzeko; batez ere, ustekabeko jario edo ihesak daudenean kutsadura saihesteko eskuragarri dauden baliabideei eta ezarritako segurtasun-neurriei dagokienez. Ihesik izanez gero, lurzorua babesteko hartu beharreko neurriak zehaztuko dira, eta zehatz adieraziko da hauei dagokien guztia: eraikuntza-materialak (iragazgaiztasuna), biltegiratzeko neurri bereziak (substantzia arriskutsuak), gerta litezkeen ihesei antzemateko neurriak edo gehiegizko betetzeaz ohartarazteko alarma-sistemak, fabrikako kolektoreen sarea zaindu eta garbitzekoak (sistematikoki garbitu beharra, maiztasuna, garbiketa mota) eta lurzoru gaineko isurketak biltzeko sistemak.

Aurreko paragrafoan adierazitako eskuliburuak ikuskapen eta kontrolerako programa jaso beharko du, hauek bilduko dituena: estankotasun-probak, mailen eta adierazleen egoera, balbulak, presioa arintzeko sistema, hormen egoera eta lodieren neurketa, andelen barnealdearen ikuskapen bisualak (hormena eta estaldurena) eta kubetetako detekzio-sistemen aldizkako kontrol sistematikoa, lurzorua kutsatzeko arriskua dakarren edozein egoera prebenitzeko.

Era berean, airearen eta ur-ingurunearen kutsadura eta isuri atmosferikoak eta uretara egiten diren isuriak prebenitzeko eta zuzentzeko sistemen (arazketa, minimizazioa, eta abar) eta ikuskatu eta kontrolatzeko ekipamenduen egoera ona bermatzeko neurriak jaso beharko dira.

Arazteko instalazioei garbiketa eta mantentze-lan egokiak egingo zaizkie errendimendu egokia ziurtatzeko, eta, aldizka, pilatutako solidoak eta lohiak kendu beharko dituzte.

Jardueran edo arazteko instalazioetan sortzen diren gainerako hondakinei dagokienez (erabateko hustuketa eta biltegietako garbiketa, eta abar), indarreko legeriak dioen moduan tratatuko dira, haien izaeraren arabera.

Entitate titularrak behar diren bitartekoak izango ditu arazketa-instalazioak behar bezala ustiatzeko eta ustekabeko isurketak prebenitzeko segurtasun-neurriak eraginkor mantentzeko

Pabiloien barruan zolatak garbitzean sortutako urak tratamendu-lerrora bidaliko dira, edo, bestela, kudeatzaile baimendu batek kudeatuko ditu.

Hondakin-urak ezingo dira «bypass» bidez isuri arazketa-instalazioetan.

Programatutako mantentze-lanetan nahitaez egin behar badira isurketak «bypass» bidez, titularrak Ingurumen Jasangarritasuneko Sailburuordetzari jakinaraziko dio aurretiaz, segurtasun-neurrien eta isurketak ingurune hartzailearen kalitatean duen eragina ahal den neurrian gutxitzeko neurrien funtzionamendua zehaztuta. «Bypass» horretan aurreikusi gabeko isurketa bat egongo balitz, titularrak segurtasun-neurrien funtzionamendua egiaztatu beharko du, dagokion txostena Ingurumen Jasangarritasuneko Sailburuordetzara bidalita, apartatu honetako o) letran adierazitakoari jarraituz.

b) Era berean, ustiapenari buruzko eskuliburu bat eduki behar da, eta bertan, aldizka egindako mantentze-lanen berri eman behar da, baita antzemandako gorabeherena ere.

c) Besteak beste, erabilitako olioak, efluenteen arazketako hondakinak, eta, orokorrean, fabrikan sortutako hondakinak maneiatzean, baliteke lurzorua eta ura kutsatzea. Beraz, isurketak, jarioak edo ihesak gertatzeko arriskua duten lurzatien gainazal guztiak iragazgaiztuko dira.

d) Hautsezko produktuak biltegiratzeko, hautsa xurgatzeko sistemak dituzten pabiloi estaliak edo itxiak edo iragazkidun silo itxiak izan beharko dira.

e) Prozesurako behar diren lehengaiak, erregaiak eta produktuak ingurunean ez sakabanatzeko moduan biltegiratuko dira.

f) Titularrak behar diren bitartekoak izango ditu arazketa-instalazioak behar bezala ustiatzeko eta ustekabeko isurketak prebenitzeko segurtasun-neurriak eraginkor mantentzeko.

g) Segurtasun-tarteei eta babes-neurriei dagokienez, biltegiratze-instalazioek eskakizun batzuk bete beharko dituzte; zehazki, produktu kimikoak biltegiratzeari buruz indarrean dagoen araudian ezarritakoak. Betebehar hori betetzen dela egiaztatzeko, erakunde eskudunek emandako egiaztagiriak aurkeztuko zaizkio Ingurumen Jasangarritasuneko Sailburuordetzari.

h) Larrialdi-egoeran berehala eta eraginkortasunez jarduteko beharrezkoak diren material guztien behar besteko kantitatea eduki beharko da: berriro ontziratzeko erreserbako edukiontziak, beharrezkoa izanez gero; gertatzen diren jarioei aurre egiteko produktu xurgatzaile selektiboak; segurtasuneko edukiontziak, kaltetutako ingurunea isolatzeko hesiak eta seinaleztapen-elementuak, eta norbera babesteko ekipo egokiak.

i) Arazte-prozesuan pilatutako hondakin solidoak eta lohiak aldizka aterako dira instalazioa behar bezala ibil dadin. Hala dagokionean, hondoan hustubiderik ez duten andel iragazgaitzetan biltegiratuko dira.

j) Petróleos del Norte SAk (Petronor) beharrezko arreta-neurriak hartuko ditu produktuak, erregaiak, erreaktiboak eta abar gordetzeko andeletan ustekabean sortutako isurketak, bai eta horiek ontziz aldatzerakoan sortutakoak, ibilgu publikoetara irits ez daitezen.

k) Debekatu egiten da aire zabalean hondakin solidoak, obra-hondakinak edo substantziak pilatzea, edonolakoak izan eta edonon pilatu nahi izanda ere, baldin eta euritik eratorritako jariatze-urak edo itsas-lehorreko jabari publikoko urak kutsa baditzakete edo inguruaren degradazioa badakarte.

l) Kasu bakoitzean lortutako azken hondakinak instalazio-esparrutik kanpo erretiratu eta garraiatuko dira, eta dagozkien araudiak bete beharko dituzte, horien destinoaren edo ondoren produktu edo azpiproduktu gisa izan dezaketen erabilerarekin bat.

m) Arazketa-instalazioak zuzen ustiatzeko eta istripuen ondoriozko isurketak prebenitzeko hartu diren segurtasun-neurriak abian jartzeko behar diren bitarteko egokiak jarriko ditu Petróleos del Norte SAk (Petronor).

n) Entitate titularrak neurri egokiak hartuko ditu osasunerako edo pertsonen segurtasunerako arriskutsuak izan daitezkeen edo itsaso eta lehorreko jabari publikoan eta babes-zortasuneko eremuan kalte edo narriaduren bat eragin dezakeen ezusteko isuriak ekiditeko.

o) Gorabeheraren bat izanez gero, agintariei jakinaraztea.

Ingurunearen edo jardueraren kontrolaren inguruan kalteak eragin ditzakeen gorabeheraren edo ezohiko gertakariren baten aurrean, sustatzaileak gorabehera edo ezohiko gertakari horren berri berehala eman beharko dio Ingurumen Jasangarritasuneko Sailburuordetzari (zuzentzeko edo eusteko neurri egokiak hartu ondoren), horretarako gaitutako helbide elektronikoaren bitartez: ippc@euskadi.eus eta inspeccionambiental@euskadi.eus. Jakinarazpenean, alderdi hauek adierazi beharko dira gutxienez:

– Gorabehera mota.

– Jatorriak eta kausak (unean zehaztu daitezkeenak).

– Berehala aplikatutako zuzenketa- edo euste-neurriak.

– Sortutako ondorioak.

– Epe laburrera aurreikusitako jardunak, halakorik balego.

Intzidentzia edo arazo larriren bat edo istripuzko isuri bat edo isurketaren bat gertatzen bada, SOS Deiaki, Zierbenako Udalari, Uraren Euskal Agentziari (alertak-isurketak@uragentzia.eus helbide elektronikora) eta Ingurumen Jasangarritasuneko Sailburuordetzari jakinarazi beharko zaie berehala. Ondoren, eta gehienez ere 48 orduren barruan, ezbeharrari buruzko txosten xehatua bidali beharko da Ingurumen Jasangarritasuneko Sailburuordetzara (ippc@euskadi.eus eta inspeccionambiental@euskadi.eus helbide elektronikora idatzita), eta bertan, datu hauek agertuko dira gutxienez:

– Gorabehera mota.

– Gorabehera non, zergatik eta zer ordutan gertatu den.

– Gorabeheraren iraupena.

– Ustekabeko isurketa gertatuz gero, emaria eta isuritako gaiak eta ingurune hartzailean antzeman daitekeen eragina zehaztu beharko dira, haren analisia barne hartuta.

– Mugak gaindituz gero, emisioei buruzko datuak.

– Eragindako kalteen zenbatespena.

– Hartutako zuzenketa-neurriak.

– Ezohiko gertaera berriro ez gertatzeko prebentzio-neurriak.

– Prebentzio-neurriak eraginkortasunez aplikatzeko aurreikusitako epeak.

Baimenaren baldintzak urratzen dituen isurketa gertatzen bada eta, gainera, pertsonen osasunerako arriskutsua bada edo sistema naturalen orekari modu larrian kalte egin badiezaioke, titularrak berehala etengo du isuri hori, eta, horrez gain, gertaeraren berri eman beharko die Euskal Autonomia Erkidegoko Administrazioko Uraren Euskal Agentziari eta babes zibilaren eta ingurumenaren arloan ardurak dituzten erakundeei, baita SOS Deiak (112) larrialdi-zerbitzuei ere, behar diren neurriak har ditzaten.

Aurreko apartatuetan xedatutakoa betetzeak ez du esan nahi isurketa eragin duen jardueraren titularra salbuetsita dagoenik indarrean dagoen araudiarekin bat eska litezkeen erantzukizunetatik.

p) Aurreko apartatuan ezarritakoaz gain, gerta litezkeen gorabeherak edo arazoak saiheste aldera, jardueraren titularrak berehala jakinarazi beharko dio Ingurumen Jasangarritasuneko Sailburuordetzari instalazioko edozein etenaldi programatu, etengabeko prozesu bati badagokio, baita aurreikusitako prebentziozko mantentze-lanak ere, ahalik eta aurrerapen handienarekin, betiere.

q) Baimen hau izan arren, titularrak isurketak laboreetan, animalietan, arrain-faunan, pertsonetan edo ondasunetan eragin ditzakeen kalteengatik izan dezakeen erantzukizun zibila izaten jarraituko du, eta, beraz, kalte-ordaina emateko betebeharra izango du. Era berean, ez du salbuetsiko ere delitu ekologikoak arautzen dituen legeriaren ondoriozko erantzukizun penaletik.

r) Larrialdi-egoeretan, babes zibileko legeria aplikatuko da, eta bertan ezarritako betekizun guzti-guztiak bete beharko dira.

H) Instalazioan aldaketak egitea.

Babes- eta zuzenketa-neurriak eta ingurumena zaintzeko programa aldatzeko aukera egongo da, bai eta neurtu behar diren parametroak, neurketen maiztasuna eta parametroen mugak ere, hala komeni bada araudi berriak indarrean jartzen direlako edo inplikatutako sistemen egitura eta funtzionamenduari buruzko ezagutza esanguratsu berrietara egokitzeko beharragatik. Era berean, babes- eta zuzenketa-neurriak eta ingurumena zaintzeko programa aldatzeko aukera egongo da, jardueraren sustatzaileak hala eskatuta edo ofizioz, ingurumena zaintzeko programan lortutako emaitzetan oinarrituta.

Instalazioetan egiten diren aldaketa guztien berri eman behar da, osorik beteta helbide elektroniko honetan ageri den formularioa:

Inprimakia_MNS.docx (live.com)

Organo honen onespena ere eskatu beharko da, abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginaren 10. artikuluan xedatutakoa betetzeko.

Industriako Isurketen Erregelamendua onartu eta Kutsaduraren Prebentzio eta Kontrol Integratuaren uztailaren 1eko 16/2002 Legea garatzen duen urriaren 18ko 815/2013 Errege Dekretuaren 14.1 artikuluak ezartzen ditu aldaketa funtsezkotzat jotzeko irizpideak.

Nolanahi ere, bat etorriz aipatutako urriaren 18ko 815/2013 Errege Dekretuaren 14.2 artikuluan zehaztutakoarekin, irizpide horiek orientagarriak dira, eta ingurumen-organoak kalifikatuko du eskatutako aldaketa, funtsezkotzat edo ez-funtsezkotzat jota, bat etorriz Kutsaduraren Prebentzio eta Kontrol Integratuaren Legearen testu bategina onartzen duen abenduaren 16ko 1/2016 Legegintzako Errege Dekretuaren 10. artikuluan ezarritako irizpideekin.

Era berean, proiektua aldatzen den kasuetan, aplikatzekoa izango da abenduaren 9ko 21/2013 Legeak, Ingurumen-ebaluazioari buruzkoak, 7.1.c eta 7.2.c artikuluetan xedatutakoa.

Baldin eta aldaketak lurzoru berria okupatzea aurreikusten badu eta aipatutako lurzoruak lurzorua kutsa dezaketen jarduerak edo instalazioak baditu edo izan baditu, aldaketa egikaritu aurretik, hartu beharreko kokalekuaren lurzoru-kalitatearen deklarazioa eduki beharko da, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legean ezarritakoari jarraikiz.

I) E-PRTR jakinarazpena.

Urtean behin, martxoaren azken eguna baino lehenago, Petróleos del Norte SAk (Petronor) aurreko urtean atmosferara eta uretara isuritako isurtzeei eta sortutako hondakin mota guztiei buruzko datuen ingurumen-adierazpena igorriko dio Ingurumen Jasangarritasuneko Sailburuordetzari, E-PRTR-Euskadi Kutsatzaileen Isurtzeen eta Transferentzia Inbentarioa egiteko eta eguneratuta edukitzeko, 508/2007 Errege Dekretuarekin eta Ingurumena Zaintzeko Programari jarraikiz.

Informazio hori bidaltzeko, Euskal Autonomia Erkidegoko Administrazio Orokorrak eskura jarritako kanal, sistema edo aplikazio informatikoak erabiliko dira.

Ingurumen-adierazpena publikoa izango da, bat etorriz uztailaren 18ko 27/2006 Legearen xedapenekin. Lege horren bidez, informazioa eskuragarri izateko, herritarren partaidetzarako eta ingurumen-gaietan justizia eskura izateko eskubideak arautzen dira (2003/4/EE eta 2003/2005/EE zuzentarauak jasotzen ditu). Horrez gain, une oro bermatu beharko da Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan ezarritakoa betetzen dela.

J) Ingurumen-baimen bateratuaren berrikuspena ofizioz egingo da kasu hauetan:

a) Instalazioak sortutako kutsadura dela eta, finkatuta dauden isurketaren muga-balioak berrikustea edo beste batzuk ezartzea komeni bada.

b) Isurketak nabarmen murriztu badaitezke, teknika erabilgarri onenetan aldaketa handiak egiteko gehiegizko kostuak ezarri gabe.

c) Prozesuaren edo jardueraren funtzionamendu-segurtasuna dela-eta beste teknika batzuk erabili behar badira.

d) Instalazioari aplikatu behar zaion sektoreko legediak hala eskatzen badu, edo, abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuaren Legearen testu bateginaren 22.3 artikuluari jarraikiz, ingurumen-kalitateko arau berriak edo berrikusiak betetzea beharrezkoa bada.

e) Aplikatu beharreko araudi berria jartzen bada indarrean.

f) Ingurunearen egitura eta funtzionamenduari buruzko ezagutza esanguratsu berrietara egokitzeko beharra, bereziki inplikatutako sistemen hauskortasuna areagotzen dela antzematen bada.

g) Ingurumena zaintzeko programan jasotako emaitzen edo bestelako oharpenen arabera, ingurumen-inpakturako ezarritako babes-, zuzenketa- edo konpentsazio-neurriak nahikoak ez direla egiaztatzen bada.

h) Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuaren Legearen 26. artikuluko 1., 2. eta 3. apartatuetan ezarritakoarekin bat etorriz egindako azterketa eginda, aldatu egin behar dela ondorioztatzen bada.

Ingurumen-baimen bateratua berrikusteak ez dakar kalte-ordaina jasotzeko eskubidea, hala ezarrita baitago abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 26.5 artikuluan.

K) Baimen hau iraungitzeko arrazoiak izango dira hauek:

– Petróleos del Norte SAren (Petronor) nortasun juridikoa azkentzen bada, indarreko arauek aurreikusitako kasuetan.

– Epean ez bada egiaztatzen ebazpen honen zazpigarren apartatuan ezarritako baldintzak betetzen direla, non eta interesdunak ez duen behar bezala justifikatuz epea luzatzeko eskatzen.

Horrez gain, isurtzeko baimena ezeztatu ahal izango da, Kostei buruzko 22/88 Legea Betearazteko eta Garatzeko Erregelamendu Orokorraren 115. artikuluan eta hurrengoetan ezarritako baldintzetan.

Bosgarrena.– 16-I-01-000000000455 erregistro-kodea eta 4820219584 NIMA esleitzea Petróleos del Norte SAk (Petronor) ustiatutako instalazioari, Bilboko Portuko AZ-1 kaian (Zierbena, Bizkaia). Kokapena (UTM ETRS 89 koordenatuak): X: 495370, Y: 4800810.

Seigarrena.– Petróleos del Norte SAri (Petronor) eskatzea, hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko instalazio berria eraikitzeko lanak amaitu ondoren, instalazioak eragiketak eraginkortasunez abian jartzeko gaituta daudenean –hala badagokio, dagozkion lizentziak, baimenak, jakinarazpenak edo inskripzioak izan behar ditu dagozkion erregistro sektorialetan–, jarduerari ekin aurretik honako alderdi hauei erantzun diezaiela:

– Teknikari eskudun batek sinatutako ziurtagiria, egiaztatuko duena instalazioak onartutako proiektura egokitzen direla eta bete direla ebazpen honetan ezarritako baldintzak.

– Titularraren erantzukizunpeko adierazpena; alegia, instalazioa onartutako proiektura egokitzen dela eta ezarri zaizkion baldintzak beteko dituela konpromisoa hartzen duela.

– As built proiektua.

– Ingurumen-arriskuen analisia eta, hala badagokio, ingurumen-erantzukizunari buruzko araudiko finantza-bermea eratu izanaren egiaztagiria (laugarren apartatua, A eta F.7 azpiapartatuak).

– Erantzukizun zibileko asegurua, laugarren apartatuaren B azpiapartatuan ezartzen denarekin bat etorriz.

– Fidantza, laugarren apartatuaren C azpiapartatuan ezarritakoaren arabera.

– Sortutako agregakinaren bizi-amaierako baldintzak betetzen direla egiaztatzen duen informazioa, laugarren apartatuko E.1.10 azpiapartatuaren arabera.

– Lurzoruaren egoerari buruzko txostena, «as built» proiektuan oinarrituta.

– Lurzoruaren eta lurpeko uren kalitatearen kontrol-puntuen proposamena.

– Immisioen kontrol-puntuen proposamena, laugarren apartatuko F.1 azpiapartatuaren arabera.

– Larrialdiei Aurre Egiteko eta Meteorologiako Zuzendaritzak egindako txostenean adierazitako alderdiak (larrialdi-plana, autobabeserako plana, drainatze-lanen diseinua prezipitazioen isomaximoak kontuan hartuta) bete eta, hala badagokio, bidali izanaren justifikazioa.

– Espero diren immisioen modelizazioa (indize akustiko hauen ebaluazioa: Lk,d, Lk,e eta Lk,n), zarata-fokuen emisio-datu errealetatik abiatuta, eta lantegiaren ebaluazio akustikoaren txostena, ezarritako gehieneko emisio-balioak betetzen direla egiaztatzen duena.

– Ingurumena zaintzeko programaren agiri bategina.

Jakinarazpenak jasotako edo harekin batera aurkeztutako datuak, adierazpenak edo dokumentuak zehatzak ez badira, faltsututa badaude edo funtsezko zerbait agertzen ez bada, edo horrelakorik aurkezten ez bada, ezin izango da jarduketa egiten jarraitu gertakari horien berri izaten den unetik, kasu horretan egon litezkeen erantzukizun penal, zibil edo administratiboei kalterik egin gabe.

Zazpigarrena.– Baimen hau eraginkorra izan dadin eta bertan baimendutako hondakinak kudeatzeko jarduera has dadin, Ingurumen Jasangarritasuneko Sailburuordetzari agiri bidez egiaztatu beharko zaio ebazpen honen seigarren apartatuan ezarritako baldintzak betetzen direla, eta aldez aurretik egiaztatu beharko da. Ikuskatze-bisita egingo dute ingurumen-organo honi atxikitako zerbitzu teknikoek, instalazioak aurkeztutako proiektuaren eta ebazpen honetan xedatutakoaren arabera eta Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legearen 33.7 artikuluan xedatutakoari jarraikiz eraiki eta hornitu direla egiaztatzeko.

Instalazioa ezingo da abiarazi ingurumen-baimen bateratua eraginkorra dela adierazi arte. Hala ere, probaldian abiarazteko aldi bat baimenduko da, gehienez ere bederatzi hilabetekoa. Epe horretan, besteak beste, zuzenketa-neurrien eraginkortasuna egiaztatuko da.

Zortzigarrena.– Abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginaren 5 d) artikuluan xedatutakoari jarraikiz, hondakinak balorizatzearen eta horiek eraikuntzarako agregakin bihurtzearen bidez CO₂-a finkatzeko jarduerari dagokionez, zeina ebazpen honen xede baita, gerta litekeen titulartasun-aldaketa ororen berri eman beharko dio Petróleos del Norte SAk (Petronor) Ingurumen Jasangarritasuneko Sailburuordetzari, azken horrek onar dezan.

Bederatzigarrena.– Ingurumen-baimen bateratu honetan ezarritako baldintzak ez betetzea arau-hauste larri edo oso larri gisa tipifikatuta dago Kutsaduraren Prebentzio eta Kontrol Integratuaren Legearen testu bateginak, abenduaren 16ko 1/2016 Legegintzako Errege Dekretuaren bidez onartuak, 31. artikuluan dioenari jarraituz, eta aipatutako arauaren 32. artikuluan jasotako zehapenak ezartzea ekar dezake.

Hamargarrena.– Ebazpen honen edukia jakinaraztea Petróleos del Norte SAri (Petronor), Zierbenako Udalari, Bilboko Portuko Agintaritzari, Uraren Euskal Agentziari, ingurumen-baimen bateratua emateko prozeduran parte hartu duten erakundeei, eta gainerako interesdunei.

Hamaikagarrena.– Ebazpen hau Euskal Herriko Agintaritzaren Aldizkarian argitara dadila agintzea.

Hamabigarrena.– Ebazpen honek ez dio amaiera ematen administrazio-bideari, eta, beronen aurka, gora jotzeko errekurtsoa jar dakioke Ekonomiaren Garapen, Jasangarritasun eta Ingurumeneko sailburuari, hilabeteko epean, jakinarazpena egin eta hurrengo egunetik aurrera, bat etorriz Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluan eta hurrengoetan xedatutakoarekin.

Vitoria-Gasteiz, 2024ko apirilaren 30a.

Ingurumen Jasangarritasunaren sailburuordea,

AITOR ALDASORO ITURBE.

I. ERANSKINA

ALEGAZIOEN ANALISIA

Petróleos del Norte SAk (Petronor) Zierbenan sustatutako jarduerarentzako ingurumen-baimen bateratua izapidetzerakoan egindako entzunaldian hainbat alegazio-idatzi jaso dira. Horiek hemen jaso dira modu laburtuan, ingurumen-organoak alegazioen inguruan egindako gogoetekin batera.

1.– Alegazioa: Udalaren hirigintza-bateragarritasunari buruzko txostenak ez du baliozkotasunik.

Udalean aurkeztutako eskabidea ingurumen-inpaktuaren azterketa eta proiektu teknikoa baino lehenagokoa da, eta, beraz, Udalak ez zuen eskabidean aurkeztutako dokumentaziorik. Era berean, Udalaren txostenean bertan adierazten da bere eskumenetatik haratago doala proposatutako jarduera berria portuarekin zuzenean edo zeharka lotuta dagoen ala ez erabakitzea. Horrenbestez, baliogabetzat jotzen da proiektua hirigintza-araubidearekin bateragarria dela adierazten duen Udalaren ebazpena.

Erantzuna:

Kutsaduraren Prebentzio eta Kontrol Integratuari buruzko Legearen testu bateginak ez du zehazten araudi hori bete behar duen instalazioa sustatu nahi den lurraldearen udalari egindako hirigintza-txostenaren eskabidea batek zer nolako irismena eta edukia izan behar dituen.

2.– Alegazioa: Aukeratutako kokapena ez dator bat portuko jabari publikoan baimendutako erabilerekin eta jarduerekin.

Adierazten da, Estatuko Portuei eta Nabigazio Zibilari buruzko Legearen testu bategina onartzen duen irailaren 5eko 2/2011 Errege Dekretuan adierazten denez, portuko jabari publikoan portuko erabilerekin bateragarriak diren jarduerak bakarrik gauzatu ahal izango direla. Petronorrek aurkeztutako proiektutik ondoriozta daitekeenez, instalazio berriak ez du inolako loturarik portuko trafikoarekin, lehengaiak jatorria inguruko instalazioetan duten kamioien bidez hornitzen baitira. Era berean, ekoizpena tokiko eremu batera mugatuta dago, eta ez da portua erabiltzen sarrerako edo irteerako bide gisa. Horrenbestez, ez litzateke baimendu behar proposatutako lekuan instalatzea, ez baititu betetzen portuan jarduteko ezarritako baldintzak.

Erantzuna:

Bilboko Portuko Agintaritzak 2023ko azaroaren 20an txosten bat egin zuen espediente horri buruz. Honako hau zioen: «... Bilboko Portuko Agintaritzak portu-esparruan egin daitezkeen portuko eta portukoez bestelako jarduerak eta erabilerak zehazteko eskumena du, esklusiboa eta baztertzailea, EPMMLTB-ren 25. artikuluan jasotzen den moduan, batez ere b) eta d) apartatuetan. Bi apartatu horien arabera, portuko agintaritzei dagokie, portuko araudian ezarritako prozedurekin bat etorriz, portuko zerbitzugunea eta atxikitako portuko erabilerak antolatzeari buruzko eskumena, baita portuko jabari publikoa kudeatzea ere. Beraz, alegatzaileek ez dute legitimitaterik ingurumen-izapide honetan portu-eremuan zer erabilera egin daitezkeen ezartzeko eta erabilera horiek zalantzan jartzeko, edo horiek zuzenbidearekin bat datozen adierazteko, alderdi horiek zehaztea Portu Agintaritza honi baitagokio, portuko araudi sektorialean ezarritako izapideen arabera; bertan, jendaurreko informazioaren izapide egokia aurreikusten da besteak beste, jarraian adieraziko den bezala».

Era berean, txosten horretan erakundeak berresten duenez: «Proiektu honek sekulako garrantzia du eta, aldi berean, portu-interes handiko jarduera da». Karbonoa atzitzea eta biltegiratzea eta ekonomia zirkularra sustatzea dira, hain zuzen ere, Bilboko Portuaren deskarbonizazioa lortzeko neurrietako batzuk, Petronorrek planteatutako proiektuarekin bat etorriz.

Azkenik, Petronorrek sustatutako proiektuaren portu-interesa berresten du: «Gainera, bat dator aplikatu beharreko portu-araudiarekin eta indarrean dauden portu-plangintzako tresnekin, eta bat dator portuko jabari publikoan baimendutako erabilerekin eta jarduerekin...».

3.– Alegazioa: Konfinatu gabeko instalazioa, horren murriztaileak ez diren neurriekin.

Ez dira bereizten hondakin arriskutsuak eta arriskugabeak izango diren kantitateak 100/2011 Errege Dekretuari begira, modu murriztaileagoan katalogatu ahal izateko; izan ere, ez da instalazio konfinatu bat eta, beraz, ezinezkoa da Errege Dekretu horretan ezarritako mugak aplikatzea.

Erantzuna:

Atmosferako jarduera potentzialki kutsagarria kode honi dagokio: A 09 10 09 01 (hondakin arriskutsuen balorizazioa, egunean 10 tonako baino gehiagoko ahalmenarekin), urtarrilaren 28ko 100/2011 Errege Dekretuaren arabera, zeinaren bidez atmosferako jarduera potentzialki kutsagarrien katalogoa eguneratzen baita eta katalogo hori ezartzeko xedapenak ezartzen baitira. Era berean, airearen kalitatea babesteari buruzko apartatuan, instalazioak izan behar dituen neurri espezifikoak ezartzen dira, biltegiratze-siloetan hondakinak kargatzeko eta deskargatzeko eragiketetan sortzen diren isurketa lausoak saihesteko, baita hauts-itxurako materialak biltegiratzeko eta manipulatzeko orduan sortzen direnak eta materialak ontziz aldatzerakoan sortzen direnak ere.

Edonola ere, atmosferara egindako immisioak kontrolatzeko neurri bat ezarri da ebazpen honetako laugarren apartatuko F.1 azpiapartatuan.

4.– Alegazioa: Instalazioaren kokalekuan dauden partikulei gehitu beharreko partikula arriskutsuen isuriak.

Hondakin arriskutsuak eta arriskugabeak lantzeko eta manipulatzeko eremua ez dago konfinatuta, hauek kontuan hartuta: partikula arriskutsuak direla, Bilboko portuko airearen kalitatea neurtzeko geltokien arabera solteko gai solidoak mugitzeko arazoak daudela, eta, literatura zientifikoaren arabera, partikulek pertsonen osasunean ondorioak eragiten dituztela.

Erantzuna:

Aurreko alegazioan adierazi den bezala, instalazioan gerta daitezkeen immisioak kontrolatzeko neurriak ezarri dira, nahiz eta proiektuak isurketa lauso horiek ez sortzeko neurriak barne hartzen dituen.

5.– Alegazioa: Isurketen kontrolak.

Ur-isurketetan ez dago kontrol analitikorik lehorretik itsasora egiten diren isurketei buruzko 459/2013 Dekretuan ezarritako isurketen muga-balioak betetzen direla ziurtatzeko.

Erantzuna:

Ebazpen horretako isuritako uraren kalitatea kontrolatzeko apartatuak instalazioko isurketetan egin beharreko kontrolak ezartzen ditu.

6.– Alegazioa: Sartutako hondakinen kontrola.

Ez da ezartzen jasotako lehengaiak pisatzeko eta zorrotz kontrolatzeko gunerik, batik bat errausketa-instalazioetatik datozen hondakinak direla kontuan hartuta.

Erantzuna:

Prozesua deskribatzen duen apartatuak hau adierazten du:

«Instalazioaren barruan, kamioiak sartu eta irtetean pabiloiko lehengaiak eta produktuak kontrolatzeko eta pisatzeko sistemak instalatuko dira...».

Aurrerago, honako hau ere adierazten da:

«Jasotzen diren hondakin guztiek aurrez onartzeko proba fisikoak eta kimikoak egin beharko dituzte. Emaitzak materialen barne-zehaztapenekin alderatuko dira eta, aldekoak badira, hondakina onartu eta dagokion siloan deskargatuko da. Jasotako hondakinak zehaztapenak betetzen ez baditu, berrogeialdian jarriko da proba gehiago egin bitartean, edo hondakina ez da onartuko».

Horrenbestez, ekoizpen-prozesuan sartzen diren hondakin guztiak zehatz-mehatz kontrolatzen direla uste da.

7.– Alegazioa: Lortutako azken produktuaren hondakin izaeraren amaiera egiaztatzea.

Aurkeztutako dokumentazioan ez da frogatzen lortutako azken produktuak hondakin izateari uzten diola eta 7/2022 Legean (5. artikulua) xede horretarako ezarritako baldintza guztiak betetzen direla. Era berean, Ministerioan ez da jasotzen produktu horren hondakin izaeraren amaiera onartu denik. Fabrikatutako produktuak hondakina izaten jarraituko luke eta, beraz, ekoagregakin horiekin manufakturatutako produktuak manipulatzeko arriskutsuak izan daitezke, baita amaierako produktu gisa erabiltzeko orduan ere, substantzia arriskutsuak dituztelako. Era berean, ez da frogatzen lortutako produktuak inpaktu kaltegarri orokorrik eragiten ez duenik ingurumenean edo gizakien osasunean. Azkenik, ekoagregakinaren hondakinaren izaera amaitu dela egiaztatzeko azterketa teknikorik ez dagoenez, ezin da kontrolatu Europar Batasunaren tratatuaren zuhurtzia-printzipioa betetzen den, instalazioan tratatzea aurreikusten diren hondakinetako asko hondakin arriskutsuak baitira. Gizakiaren osasunean eta ingurumenean izan ditzakeen arriskuak ebaluatzeko azterketak gehitu beharko lirateke prozeduraren fase honetan, ingurumen-ebaluazioa egin ahal izateko eta informazio guztia publikoa izateko.

Erantzuna:

Sustatzaileak gizakiaren osasunean eta ingurumenean eragin ditzakeen arriskuen azterketa espezifiko bat aurkeztu du, eta ez da identifikatu hartzaileekiko esposizio-mekanismoetarako arrisku-maila onartezinik eraikuntza-material gisa erabiltzeko orduan.

Edonola ere, hondakinaren bizi-amaierako baldintzak betetzen direla egiaztatzen duen dokumentazioa aurkez dezala eskatu zaio sustatzaileari, materialaren lehen ekoizpenerako nahiz jarduera garatzen den bitartean, baita ziurtapenari dagokionez materialei buruzko araudia betetzen dela egiaztatzeko ere.

8.– Alegazioa: Findegiko industria-jarduera deskarbonizatzeko estrategiko gisa planteatutako proiektua.

Alegatzailea ez dator bat planteamendu horrekin, sostengaezina dela uste baitu; izan ere, Petronorren jarduera nagusia petrolioa fintzea da, eta jarduera hori nekez deskarboniza daiteke, azken produktuak erregai fosilak baitira. Proposatutako proiektua gauzatzeko energia eta material kantitate handiak erabili beharko dira, eta horien egokitasuna nabarmen murriztuko litzateke; horrela, bada, baliabide ekonomikoak, energetikoak eta materialak kendu beharko dira portua eta haren ingurunea deskarbonizatzeko eraginkorragoak diren beste proposamen batzuetatik. Adierazten denaren arabera, ekonomia zirkularra modu frogagarrian ezarriko balitz, zabortegira bideratutako hondakinak guztiz desagertu arte murriztu beharko lirateke. Beraz, ez da onargarria proiektu hau ekonomia zirkulartzat jotzea.

Erantzuna:

Egindako alegazioak ez du eraginik alderdi zehatz eta kuantifikagarri bakar batean; beraz, ezin da baieztatu instalazioak instalazioa deskarbonizatzeko balioko ez duenik.

Hala ere, kontuan izan behar da prozesuan zehar erabilitako lehengaietako bat findegian harrapatutako CO₂-a dela, eta hori azken produktuan finkatzen dela karbonatazioaren bidez. Hau da, findegian sortutako CO₂-aren zati bat isurtzea saihesten da, findegiaren deskarbonizazioan lagunduz.

9.– Alegazioa: Petronorren egoera juridiko irregularra.

Petronorren instalazioak itsaso eta lehorraren arteko jabari publiko bat hartzen du, eta emakida iraungita du dagoeneko; instalazioa berariazko baimenik gabe handitu da (koke eta baterako sorkuntzarako instalazioa) eta, beraz, jarduerarekin jarraitzea eragiten duen proiektu berri oro baimenik gabe utzi beharko da.

Erantzuna:

Alegazioa itsaso eta lehorraren arteko jabari publikoan emakidak emateari buruzkoa da, eta, kutsaduraren prebentzio eta kontrol integratuari buruzko araudiaren arabera, hori ez da sartzen ingurumen-baimen bateratuaren eskabidean, ezta edukian ere.

Dena den, espediente honen xedea ez izan arren, argitu behar da findegiaren itsaso eta lehorraren arteko jabari publikoa okupatzea Hidrokarburoen sektoreari buruzko urriaren 7ko 34/1998 Legearen 22. xedapen iragankorrak babestuta egon dela, Ekonomia Iraunkorrari buruzko martxoaren 4ko 2/2011 Legeak emandako idazketan. 2023ko abenduan, Bilboko Portuko Agintaritzaren (APB) Administrazio Kontseiluak portuko jabari publikoa okupatzeko gaikuntza-titulua eman zion Petronorri, Muskizko udalerrian duen bere titulartasuneko findegiari atxikitako portuko jabari publikoaren lursailei dagokienez.

10.– Alegazioa: Prozesuan sartzen diren hondakinen karakterizazioa.

Hondakinak onartzeko protokoloa isilpekoa da, baina errautsen karakterizazio-proposamenean ez dira jasotzen dioxinak, PAHak edo COPak. Era berean, proiektuan adierazten da hondakinek ez dutela sortzen inolako gasik, baina hondakinak tratatzeko sektoreko ondorioen dokumentuko TEO40an, H2 sortzeko potentzialaz hitz egiten da, errekuntza-gasen tratamenduko hondakinak urarekin nahastu ondoren (errauts hegalariak, adibidez). Horrez gain, ez da deskribatzen prozesuan sartzen diren zepen egoera, kontuan hartuta errausketa-labearen zulotik ateratzen diren zepak nahiko erreaktiboak direla eta ura eman daitekeen heltze-prozesu bat behar dela. Azkenik, proiektuan ez dira aipatzen hondakinak biltegiratzeko siloetan sortuko liratekeen lixibiatuak.

Erantzuna:

«Enpresa-sekretuei» buruzko otsailaren 20ko 1/2019 Legea ikusita, organo honek uste du adierazitako informazioa prozesuaren efizientzia deskribatzen duten antolamendu-alderdiei buruzkoa dela eta, beraz, arauan «industria-sekretu» gisa identifikatutakoa izango litzatekeela; beraz, konfidentzialtasun-eskubideak informazio hori babesten du, eta horren berri ematea legez kontrakoa izango litzateke.

Hala ere, adierazi behar da aztertu beharreko ezaugarriak eta parametroak ez direla dagokion EHZ kodearekin identifikatutako hondakin motaren araberakoak bakarrik, baizik eta hondakina bera sortzen den jatorrizko instalazio/prozesuaren ezaugarri espezifikoen araberakoak.

Baimen honetan bi kontrol-maila daude: batetik, tratamendu-kontratua onartzearekin eta jaulkitzearekin lotutakoa, E.1.1 apartatuan zehazten den bezala; eta, bestetik, aldian behingo jarraipenarekin lotutakoa, karakterizazio horren arabera finkatutako muga-parametroak betetzen direla egiaztatzekoa, E.1.5 apartatuan deskribatzen dena.

Horregatik, organo honek tratamendu-kontratu bakoitza onartzen duenean egiaztatzen da karakterizazioa nahikoa dela, hondakin bakoitzaren jatorriaren eta ezaugarrien arabera.

Beste alderdi batzuen artean, hondakina onartzearekin lotutako karakterizazioan behar bezala fiskalizatuko da aztertutako substantziak eta konposatuak bat datozela hondakin-korronte horren jatorrizko prozesuaren ezaugarriekin.

Hondakin onargarriei dagokienez, ebazpen honetan gasen tratamenduko hondakin solidoak (errautsak) bakarrik onartzen dira, eta, beraz, ez dira eskatu behar alegazioan aipatzen diren zepetarako baldintzak.

Era berean, kontuan hartuta hondakinak errepidez garraiatuko direla zisterna moduko kamioi itxiak erabiliz eta hondakinak siloetara zuzenean deskargatuko direla, ez da aurreikusten hondakinak biltegiratzeko siloetan lixibiatuak sortzea; izan ere, prozesuaren deskribapenaren apartatuan adierazten den bezala, silo itxiak dira.

11.– Alegazioa: Lortutako produktuaren ezaugarriak.

Ez dago azken produktuaren lixibiatu-proben emaitzarik, kontuan hartuta proiektuan bertan adierazten dela metal astunen edukia ezagutzea funtsezkoa dela.

Erantzuna:

Agregakin birziklatuaren bizi-amaierako baldintzen apartatuan zehazten da agregakin balorizatuari lixibiatze-saiakuntza egin beharko zaiola eta zehaztutako muga-balioak bete beharko direla.

Oraingoz, beste instalazio batzuetan instalazio pilotuen mailan egindako probetan lortutako emaitzak bakarrik daude, EAEn ez baitago martxan industria-instalaziorik.

12.– Alegazioa: Ez dago kokapenaren alternatiben azterketarik.

Legeriak proiektuaren alternatiba tekniko egingarrien azterketa egin beharra ezartzen du. Alternatiba horien artean, zero alternatiba edo ez jardutearen alternatiba sartu behar da, baita hartutako irtenbidearen arrazoi nagusien justifikazioa ere. Aurkeztutako proiektuan ez dago justifikatuta instalazioa zergatik dagoen kokatuta Bilboko Portuan; izan ere, jarduerak ez du inolako loturarik portuarekin, eta CO₂-aren kantitate txiki bat baino ez luke jasoko findegitik (kamioi bat eguneko, batez beste). Horrenbestez, uste dugu ez dagoela alternatiben baliozko azterketarik, eta ez dago instalazio horiek Bilboko Portuan kokatzeko inolako arrazoirik, proiektuak ez baitu Portuarekin inolako loturarik.

Erantzuna:

Aurkeztutako ingurumen-inpaktuaren azterketak adierazten duenez, Bilboko Portuaren kokapenak negozio-eredu berri horiek garatzeko «zentro neuralgiko» bat eratzeko moduko ezaugarriak ditu. Gainera, findegitik gertu egoteak guztiz baldintzatzen du, CO₂ gutxiko hidrogenoa ekoizteko gaitasuna baitu, atzitze-prozesuak dituelako.

Era berean, adierazten da proiektua hiru nodo funtzional handiren inguruan egituratzen dela: Petronorren findegia (CO₂ sorgailu gisa), Portua (prozesurako beharrezko azpiegitura dagoelako) eta kontsumo-zentroak.

Beraz, apartatu horri dagokion ingurumen-inpaktuaren azterketak ondorioztatzen du hautatutako kokapenaren alternatiba dela guztietan egokiena.

13.– Alegazioa: Partikulen hedapenak eragindako inpaktua.

Instalazioaren kokapenak eragin handia izango du Abra inguruan, oso gune jendetsua baita. Prozesatuko diren substantzia arriskutsuak (metal astunak) dituzten errautsen partikulek pertsonen osasuna jarriko dute arriskuan inguruko udalerrietako populazioetan.

Erantzuna:

Aurreko alegazio batean adierazi den bezala, hondakinak errepidez garraiatuko dira zisterna moduko kamioi itxiak erabiliz, eta hondakinak zuzenean silora deskargatuko dira; horregatik, ez da aurreikusten materialak ontziz aldatzen diren bitartean partikulak isurtzea. Era berean, immisioak kontrolatzea ezarri da.

14.– Alegazioa: Dokumentuak jendaurreko informazioaren izapidetik kanpo uztea, aldez aurretik baloratu eta arrazoitu gabe.

Jendaurreko informazioaren izapidetik kanpo geratu dira sustatzaileak konfidentzial gisa tratatzea eskatu duen dokumentu osoak, konfidentzialak diren datu zehatzak eta legezko justifikazioa justifikatu gabe. Ez dira justifikatu konfidentzialtasuna babesten duten indarreko xedapenak. Horrek guztiak ingurumenaren arloan informazioa jasotzeko eta parte hartzeko eskubidea eta interes legitimoak kaltetzen ditu. Edonola ere, agintari publikoek ezin izango dute konfidentzialtasun-arrazoietara jo ingurumen-isurketei buruzko informazio-eskabide bati uko egiteko, eta eskubidearen muga oro behar bezala arrazoitu beharko da.

Erantzuna:

Euskadiko Ingurumen Administrazioaren abenduaren 9ko 10/2021 Legearen 27. artikuluaren arabera, ingurumenean esku hartzeko prozeduretan parte hartzen duten administrazio publikoek sustatzaileak emandako informazioen isilpekotasuna errespetatu beharko dute, aplikagarria den araudiarekin bat etorrita, kasu guztietan interes publikoaren babesa kontuan hartuz.

15.– Alegazioa: Uraren erabilera.

17.500 ur tona erabiltzea planteatzen da 129.000 tona agregakin fabrikatzeko. Ur hori Zierbenako Udala partaide den Udal Sareak saretik jasoko da. Giza kontsumorako uraren kalitateak izan behar dituen irizpide tekniko-sanitarioak eta haren kontrola eta hornikuntza ezartzen dituen urtarrilaren 10eko 3/2023 Errege Dekretuaren 9. artikulua betetzen dela egiaztatu beharko da. Artikulu horretan adierazten denez, banatutako kontsumorako uraren bolumenak herritarren behar higieniko-sanitarioetarako eta hornidura-eremuko jarduera garatzeko nahikoa izan beharko du, eta hornidura garbia edo batez besteko kontsumorako hornidura gutxienez 100 litrokoa izango da biztanleko eta eguneko.

Erantzuna:

Alegazioa jabari publiko hidraulikoaren esparruko ur-hornidurari edo emakidei buruzkoa da, eta, kutsaduraren prebentzio eta kontrol integratuari buruzko araudiaren arabera, hori ez da sartzen ingurumen-baimen bateratuaren eskabidean, ezta edukian ere.

Horrela, bada, organo eskudunak ezarri beharko ditu, hala badagokio, dagozkion baldintzak eta mugak.

II. ERANSKINA

PETRÓLEOS DEL NORTE SAK (PETRONOR) ENTZUNALDI-IZAPIDEAN EGINDAKO ALEGAZIOEN AZTERKETA

2024ko apirilaren 22an, Petróleos del Norte SAk (Petronor) entzunaldi-izapidean bidalitako ebazpen-proposamenari buruzko alegazio-idazkia aurkeztu zion ingurumen-organoari. Dokumentuan gai hauek jasotzen dira:

Lehenengo apartatua, jarduerari buruzko jarduketei buruzkoa.

Ebazpen-proposamenaren zirriborroaren lehenengo apartatuan, CO₂-a finkatzeko jarduerari buruzko jarduketak deskribatzen dira, eta hau da horietako bat: «Findegian harrapatutako CO₂ likidoa hartzeko instalazioa».

Hidrogeno-unitatean (H₃) edo lotutako unitateetan mantentze-lanetarako geldialdi programatuak egin behar direla aurreikusten bada, inguruko beste ekoizpen-instalazio batzuetatik CO₂-a jaso ahal izatea eskatzen da.

Erantzuna:

Alegazioa onartu da eta esaldia eskatutakoaren arabera aldatu da. Horrenbestez, alegazioa onartu da eta jarduketa horretan honako idazketa hau gehitu da:

«CO₂ likidoa hartzeko instalazioa, batik bat findegian harrapatua».

Bigarren apartatua, isurketak kontrolatzeko sistemen deskribapenari buruzkoa.

Bigarren apartatuan, atmosferara isuriak saihesteko dauden sistemak deskribatzen dira. Bertan, hauts-hondakinak garraiatzeko sistemak pneumatikoak direla, eta, beraz, hauts-isurketarik gertatzen ez dela adieraztea eskatzen da.

Erantzuna:

Alegazioa onartu da, eta honekin ordeztu da aipatutako paragrafoa:

«Era berean, siloek hautsa hartzeko iragazkiak dituzte (horietan hautsa sortzen da) partikulak ez isurtzeko. Hautsa arintzeko sistemak egongo dira (garraio-sistema pneumatikoak, adibidez) garraiatzaileen arteko transferentzietan, horietan hautsa nabarmen sortzea espero baita».

Bigarren apartatua, instalazio osagarrien deskribapenari buruzkoa.

Bigarren apartatuan, instalazio osagarri nagusiak deskribatzeari buruzkoan, «Suteen aurkako defentsa-sistema» ordez «Suteen aurkako babes-sistema» jartzea eskatzen da.

Erantzuna:

Alegazioa onartu da eta erreferentzia aldatu da, eskatutakoaren arabera.

Hirugarren apartatua, ura eta lurzorua babesteko neurriei buruzkoa.

B.2 apartatuan, lurpeko uren kutsadura hauteman den eremuetan lur-mugimendurik ez egiteari erreferentzia egiten dion puntua ezabatzea eskatzen da, deskontaminazio-jarduerak egin arte. Zentzu horretan, adierazten da lurzoruaren kalitateari buruz egindako esplorazio-ikerketaren txostenean egiaztatu dela ez duela lurpeko uretan eraginik.

Erantzuna:

Kontuan hartuta instalazioaren ingurumen-baimen bateratua eskatzeko espedientean aurkeztutako lurzoruaren kalitatearen esplorazio-ikerketan ez dela hauteman lurpeko urei eragiten zaienik, puntu hori aldatzea planteatu da, esaldi orokor bat sartuta; esaldi horretan, bermatuko da obrak egiten diren bitartean ez dela kutsadura-transferentziarik egingo lurpeko uretara.

Hirugarren apartatua, ingurumen-aholkularitzari buruzkoa.

B.9 apartatuan, «... ingurumen-inpaktuaren azterketako zehaztapenen arabera» esaldia honako honekin ordeztea eskatzen da: «... ingurumen-inpaktuaren azterketak zehazten duen moduan».

Erantzuna:

Alegazioa onartu da eta esaldiaren idazkera moldatu da.

Laugarren apartatua, hondakin onargarriei eta kudeaketa-eragiketei buruzkoa.

E.1.2 apartatuan, instalazioan kudeatu daitezkeen hondakinen taulan, hondakin berari dagozkion EHZ kodeak ere sartzea eskatzen da (hiri-hondakin solidoen errausketa-instalazioetako errautsak), mota bereko beste instalazio batzuetan beste EHZ kode batekin kodifikatzen direnak.

Erantzuna:

Kontuan hartuta hiri-hondakin solidoen errausketa-instalazioetako errautsen hondakinak kasu batzuetan 190107 kodea ez den beste EHZ kode batekin kodetzen direla, egokitzat jotzen da eskatutako EHZ kode gehigarri horiek gehitzea, betiere hondakin bera dela zehaztuz. Beraz, instalazioan onartzekoak diren hondakinen taulan honako kode hauek gehitu dira: 190105, 190112, 190113, 190114 eta 190402 EHZ kodeak.

Laugarren apartatua, sortutako agregakinaren bizi-amaierarako baldintzei buruzkoa.

E.1.10 apartatuan, UNE-EN 13748:2 arauaren deskribapenean egindako akats bati egiten zaio erreferentzia. Honela izan beharko luke: «Terrazozko baldosak kanpoan erabiltzeko».

Erantzuna:

Akatsa hauteman ondoren, aipatutako apartatuko akatsa zuzendu da.

Laugarren apartatua, emisioen identifikazioari buruzkoa.

E.2.1 apartatuan, biltegiratze-siloek duten iragazki motari egiten zaio erreferentzia: bertikalki jarritako zazpi elementu iragazle dituen iragazki bat. Teknologia-aldaketak edo fabrikatzailearen aldetik aldaketak egon daitezkeenez, erreferentzia orokorragoa izan dadila eskatzen da.

Erantzuna:

Alegazioa onartu da eta siloetako iragazkien deskribapena aldatu da.

Laugarren apartatua, zaratari buruzko baldintzena.

E.6 apartatuan eskatzen da instalazioari aplika dakiokeen eremu akustikoa honako hau dela zehaztu dadila: «B. Industria-erabilerako lurzoruak nagusi diren lurralde-esparru edo -sektoreak».

Erantzuna:

Alegazioa onartu da eta E.6 apartatuan instalazioari aplikagarri zaion eremu akustiko mota zehaztu da.

Laugarren apartatua, ezohiko funtzionamendua izanez gero aplikatu beharreko neurriei eta jarduerei buruzkoa.

G.4 apartatuan hiru akats daudela ohartarazten da, a) eta i) puntuetan hain zuzen ere, eta horiek zuzentzeko eskatzen da.

Erantzuna:

Akatsak ikusi ondoren, aipatutako apartatuetan adierazitako akatsak zuzendu dira.

Seigarren apartatua, jarduerari ekin aurretik eskatu beharreko alderdiei buruzkoa.

Seigarren apartatuan, zenbait alderdi aurkeztu behar direla adierazten da, instalazioak jarduera hasi aurretik gaituta daudenean eta jarduerari ekin aurretik. Alderdi horiek instalazioak eragiketak eraginkortasunez hasteko gaituta daudenean aurkeztu behar direla zehazteko eskatzen da.

Erantzuna:

Alegazioa onartu eta eskatutakoa zehaztu da.

Zazpigarren apartatua, baimenaren eraginkortasunari buruzkoa.

Zazpigarren apartatuan, probaldian martxan jartzeko epea bederatzi hilabetera luzatzea eskatzen da, adierazitako bost hilabeteen ordez. Zentzu horretan, fabrikazio-prozesuan martxan jartzeko eta optimizatzeko, lortutako produktuen CE marka lortu behar da. Horretarako, iraupen luzeko saiakuntzak egin behar dira (10 aste arte), eta, beraz, prozesuan doikuntzak egin behar izanez gero, denborak bikoiztu egingo lirateke, proposamenean zehaztutako bost hilabeteko epea ez bailitzateke nahikoa izango.

Erantzuna:

Alegazioa onartu da eta probaldia bederatzi hilabetera luzatu da.

Azterketa dokumentala