Euskal Herriko Agintaritzaren Aldizkaria

27. zk., 2024ko otsailaren 6a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

OSAKIDETZA-EUSKAL OSASUN ZERBITZUA

657

162/2024 EBAZPENA, urtarrilaren 23koa, Osakidetza-Euskal osasun zerbitzuko zuzendari nagusiarena, Osakidetza-Euskal osasun zerbitzuko Larrialdiei atxikitako kontratazio-mahaiko kideen izendapena aldatzen duena.

Osakidetza-Euskal osasun zerbitzua Ente Publikoaren Estatutuak ezartzen dituen azaroaren 11ko 255/1997 Dekretuak 20.4 artikuluan xedatzen duenez, «Ente Publikoaren Zuzendaritza Nagusiak, Administrazio Kontseiluak baimena eman ondoren, beharrezkotzat jotzen diren Kontratazio Mahaiak sortuko ditu, Ente Publikoko erakundeen tamainaren arabera eta kontratuak esleitzean kontratazio-organoari laguntzeko eginkizunak betetzeko.

Sortzen diren Kontratazio Mahaiek honako kide hauek izango dituzte:

a) Lehendakaria: erakundearen zuzendaritza-kargua, erakundearen kontratazio-organoa ez bezalakoa.

b) Kontratazio-organoak izendatutako bi kide.

c) Mahaikide-idazkari bat, kontratazio-organoak izendatua, dagokion erakundeari atxikitako legelarien edo zuzenbidean lizentziatutako kudeaketa-teknikarien artetik; aholkulari juridikoaren eta mahaiko idazkariaren eginkizunak beteko ditu, eta hitza eta botoa izango ditu».

Une honetan, Larrialdien egitura aldatu berri denez, Larrialdien Kontratazio Mahaia eguneratu behar da, laguntza tekniko espezializatuko organoa den aldetik.

Mahaiburuaren ekimenez, kontratuaren xedearekin zerikusia duten gaietan ezagutza egiaztatua duten teknikari edo aditu independenteak sartu ahal izango dira mahaiaren bileretan, eta espedientean jasoko dira bertaratutako teknikarien edo adituen nortasunak, prestakuntza eta esperientzia profesionala. Guztiek hitz egiteko eskubidea izango dute, baina botorik ez.

Kontratazio-mahaiaren funtzionamenduak ez du gastu publikoaren gehikuntzarik ekarriko, eta kideek ez dute ordainsaririk jasoko organo horretako kide gisa betetzen dituzten eginkizunengatik. Osakidetzaren Emergentziei esleitutako giza baliabideen, baliabide teknikoen eta aurrekontu-baliabideen bidez sortuko eta funtzionatuko da.

Zuzendaritza Nagusiko kontratazio-mahaiak izapidetutako espedienteak.

Ebazpen hau indarrean jartzen denean, Ebazpen honetan araututako kontratazio-mahaiak, kasuan kasuko kontratuak burutu edo Osakidetzako Zuzendaritza Nagusiko kontratazio-mahaiari dagokion ebazpena eman aurreko edozein izapide-fasetan dauden espedienteak eta prozedurak izapidetuko ditu.

Horregatik guztiagatik, Zuzendaritza Nagusi honek, legez eman zaizkion ahalmenez baliatuz, honako hau,

EBATZI DU:

Lehenengoa.– Larrialdiei atxikitako kontratazio-mahaiko kideen osaera aldatzea, honako osaera honen arabera

Lehendakaria:

Titularra: Kudeaketa Zuzendaritzako titularra. Monica Elena Zárate Gutierrez.

1. mahaikidea:

Titularra: Ana María Varela Freijomil.

Ordezkoak: Erizaintzako albokoa. Eva María López Gil.

2. mahaikidea:

Titularra: María Nieves González Diez larrialdietan materialak eta lotutako prozesuak kudeatzeko gainbegiralea.

Ordezkoak: Asistentzia-arduraduna. M.ª Gracia Garijo Gonzalo.

Batzordekide idazkaria:

Titularra: Naiara Domínguez Azcue.

Zuzenbidean lizentziatutako kudeaketa-teknikariak edo Larrialdietara atxikitako abokatuak.

Bigarrena.– Mahaiko kideei eta ateratzen direnei ebazpen hau jakinaraztea.

Hirugarrena.– Ebazpen honek 2024ko urtarrilaren 23tik aurrera izango ditu ondorioak.

Administrazio Publikoen Administrazio Prozedura Erkidearen urriaren 1eko 39/2015 Legearen 112., 121. eta hurrengo artikuluetan ezarritakoaren arabera, ebazpen honek ez du administrazio-bidea amaitzen, eta, beraz, interesdunek gora jotzeko errekurtsoa aurkeztu ahal izango diote Osakidetzako Administrazio Kontseiluari, hilabeteko epean, ebazpena jakinarazi eta hurrengo egunetik aurrera.

Vitoria-Gasteiz, 2024ko urtarrilaren 23a.

Osakidetza-Euskal osasun zerbitzuko zuzendari nagusia,

MARIA ROSA PÉREZ ESQUERDO.

Azterketa dokumentala