Euskal Herriko Agintaritzaren Aldizkaria

19. zk., 2024ko urtarrilaren 25a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIAREN GARAPEN, JASANGARRITASUN ETA INGURUMEN SAILA

398

EBAZPENA, 2023ko abenduaren 1ekoa, Ingurumen Jasangarritasunaren sailburuordearena, zeinaren bidez berrikusten eta aldatzen baita Bunge Ibérica SA sozietateari Zierbenako udal-mugartean (Bizkaia) olio-haziak ehotzeko eta landare-olioak fintzeko emandako ingurumen-baimen bateratua.

EGITATEAK

1.– Ingurumeneko sailburuordearen 2004ko ekainaren 22ko hasierako Ebazpenaren bidez (AAI00013), ingurumen-baimen bateratua eman zitzaion Moyresa, Molturación y Refino SA enpresari, Zierbenako udal-mugartean (Bizkaia) olio-haziak ehotzeko eta landare-olioak fintzeko, Kutsaduraren Prebentzio eta Kontrol Integratuari buruzko uztailaren 1eko 16/2002 Legearen esparruan.

2.– 2005eko martxoaren 15ean, Moyresa, Molturación y Refino SAk ingurumen-baimen bateratua eskatu zuen Zierbenako (Bizkaia) udal-mugartean biodiesela ekoizteko jarduerarako.

3.– 2006ko urtarrilaren 19an, Moyresa, Molturación y Refino SAk organo honi jakinarazi zion sozietatearen izena aldatu egin zela eta, ordutik aurrera, Bunge Ibérica SA izango zela; horretarako, sozietatearen izena aldatzeko notario-eskrituraren kopia aurkeztu zuen.

4.– Ingurumeneko sailburuordearen 2007ko ekainaren 7ko Ebazpenaren bidez, ingurumen-inpaktuaren adierazpena egin eta ingurumen-baimen bateratua –2004ko maiatzaren 20ko Ebazpenaren bidez emana– zabaldu zitzaion Bunge Ibérica SAri, biodielesa fabrikatzeko Zierbenako udal-mugartean (Bizkaia).

5.– Ingurumeneko sailburuordeak, 2011ko otsailaren 28ko Ebazpenaren bidez, aldatu egin zituen Bunge Ibérica SAri 2007ko ekainaren 7ko Ebazpenaren bidez Zierbenako (Bizkaia) udal-mugartean biodiesela ekoizteko jarduerarako emandako ingurumen-inpaktuaren adierazpena eta ingurumen-baimen bateratua, eta ingurumen-baimen bateratua indarrean jarri zuen.

6.– Ingurumeneko sailburuordeak, 2014ko irailaren 12ko Ebazpenaren bidez –zeinaren bidez ingurumen-baimen bateratua aldatu eta indarrean jarri zuen–, Biodiesel Bilbao SL enpresaren alde eskualdatu zuen Bunge Ibérica SA enpresari Zierbenako (Bizkaia) udal-mugartean biodiesela ekoizteko jarduerarako emandako ingurumen-baimen bateratua.

7.– Bunge Ibérica SAk funtsezkoak ez ziren honako aldaketa hauek eskatu ditu, honako eskaera-data eta organo honen jakinarazpen- edo ebazpen-data hauetan:

– 2013ko urtarrilaren 9a: beste biltegiratze-tanga bat –bigarrena– instalatzea (2013ko urtarrilaren 18a).

– 2014ko urtarrilaren 2a: bero-berreskuragailua ipintzea kogenerazio-taldeetako batean (2014ko urtarrilaren 15a).

– 2015eko azaroaren 30a: biozida baimentzeko eskaera eta IBBaren alderdi batzuk aldatzeko eskaera isurketen arloan (2016ko irailaren 20a).

– 2017ko uztailaren 20an eta 26an: ordezko piezen eta material osagarrien biltegia eta gas naturalaren zuzeneko linea eraikitzea (2017ko irailaren 12an).

– 2018ko maiatzaren 14a, ekainaren 13a eta 21a: hileko biozida-talkak areagotzea, hondakin berriak, olanaztatze-eremua handitzea eta euri-urak tratatzeko sistema bat egokitzea (2018ko uztailaren 2a).

– 2019ko uztailaren 19a: gas-berreskuragailu bat instalatzea (2019ko urriaren 2a).

8.– Ingurumeneko sailburuordearen 2019ko uztailaren 30eko Ebazpenaren bidez, ofizioz berrikusi zen olio-haziak ehotzeko eta landare-olioak fintzeko instalazioaren ingurumen-baimen bateratua –Bunge Iberica SAk Zierbenan (Bizkaia) sustatua–, Uraren Euskal Agentziak eskatuta.

9.– 2019ko abenduaren 4an, Batzordearen 2019/2031 2019ko azaroaren 12ko Betearazpen Erabakia argitaratu zen Europako Batzordearen Aldizkari Ofizialean, zeinaren bidez ezartzen baitziren elikagaien, edarien eta esnearen industrietako teknologia erabilgarri onenei (TEO) buruzko ondorioak, Europako Parlamentuaren eta Kontseiluaren 2010/75/EB Zuzentarauaren arabera (C/2019/7989).

10.– Bunge Ibérica SAk funtsezkoak ez ziren honako aldaketa hauek eskatu ditu, honako eskaera-data eta organo honen jakinarazpen- edo ebazpen-data hauetan:

– 2021eko otsailaren 25a: Bunge Ibérica SAren instalazioek hartzen duten lurzatiaren azalera murriztea (2021eko martxoaren 3a).

– 2021eko ekainaren 15a: irin-biltegiko teilatutik datozen euri-urak kanalizatzea, euri-uren tratamendu-instalaziora arte, 1. transferentzia-dorrean edukiera handiagoko iragazki bat instalatzea eta 1-d eta 2-d fokuak foku sistematiko gisa katalogatzea (2021eko ekainaren 30a).

– 2021eko uztailaren 23a: Hazia prestatzeko prozesuan ijezte-ekipo berri bat sartzea (2021eko abuztuaren 11).

– 2022ko azaroaren 30a: «Caldera Vulcano» izeneko tanga edo galdararen titulartasuna aldatzea, FE18 fokuari lotutako jarduerari dagokionez, Biodiesel Bilbao SL merkataritza-sozietatearen alde; galdara berri bat jartzea eta instalazioaren jarduerari lotutako hondakin berriak barne hartzea; instalazioaren funtzionamendu normalean sortutako hondakin arriskutsu eta arriskugabeen kantitateei buruzko taulak eguneratzea, bai eta 5., 6., 13., 16. eta 19. fokuei lotutako errekuntza ertaineko instalazioak errekuntza-instalazio ertainen (EIE) erregistroan inskribatzea. (2023/02/24).

11.– 2023ko otsailaren 8an, ingurumen-organoak, baimena berrikuste aldera, honako hauek igortzeko eskatu zion Bunge Ibérica SAri: instalazioaren funtzionamenduaren eta ondorioetan deskribatutako teknika erabilgarri onenen arteko alderaketa eta instalazioari buruzko beste dokumentu batzuk.

12.– 2023ko martxoaren 14an, ingurumen-baimen bateratua berrikusteko eskatu zitzaion dokumentazioa aurkeztu zuen Bunge Ibérica SAk.

13.– Ikusi eta gero nahikoa zela aurkeztutako dokumentazioa, Ingurumenaren Kalitatearen eta Ekonomia Zirkularraren zuzendariaren 2023ko martxoaren 31ko Iragarkiaren bidez, Bunge Ibérica SAren ingurumen-baimen bateratuaren berrikuspena jendaurrean jarri zen 30 egun balioduneko epean, egoki iritzitako alegazioak aurkezteko. Euskal Herriko Agintaritzaren Aldizkarian argitaratu zen iragarkia, 2023ko apirilaren 5ean.

14.– Ingurumen-baimen bateratua jendaurrean jartzeko izapideak amaituta, egiaztatu da ez dela alegaziorik aurkeztu.

15.– Urriaren 18ko 815/2013 Errege Dekretuaren 16. artikuluan xedatua aplikatuz, Eusko Jaurlaritzaren Ingurumen Kalitatearen eta Ekonomia Zirkularraren Zuzendaritzak txostena eskatu zien URA Uraren Euskal Agentziari, Bizkaiko Osasun Publikoaren Zuzendariordetzari, Larrialdiei Aurre Egiteko eta Meteorologiako Zuzendaritzari eta Zierbenako Udalari 2023ko maiatzaren 12an.

16.– Zierbenako Udalak, Bizkaiko Osasun Publikoaren eta Adikzioen Zuzendariordetzak eta Larrialdiei Aurre Egiteko eta Meteorologiako Zuzendaritzak txostenak bidali zituzten maiatzaren 18an, maiatzaren 22an eta ekainaren 15ean (espedientean ageri den emaitza jasotzen dute txosten horiek).

17.– 2023ko maiatzaren 29an, Bunge Ibérica SAk bere baimenean (AAI00013_MNS_2023_001) aldaketa ez-funtsezko bat egitea eskatu zuen, baimendutako gehieneko isurketa-emariak aldatzeko eta emari horien datuen maiztasuna aldatzeko. 2023ko ekainaren 8an, eskaera URAri helarazi zitzaion, bere eskumenen esparruan egokitzat jotzen diren ohar guztiak jasoko zituen txostena eman zezan.

18.– 2023ko ekainaren 6an, 19an eta 22an, Bunge Ibérica SAk bere baimenean aldaketa ez-funtsezkoak egiteko eskatu zuen. Hona hemen eskatutako aldaketa horiek: industria-uren tratamendurako existitzen zen instalazioan T.100 B (AAI00013_MNS_2023_002) izeneko homogeneizazio-tanga berri bat sartzea; instalazioan aire-konpresoreen gela bat sartzea, existitzen zirenak ordezkatuko dituzten aire-konpresoreen ekipo berriak kokatzeko (AAI00013_MNS_2023_003); eta landare-olioak fintzeko instalazioaren barruan oleinak fabrikatzeko tratamenduan dekantazio-tanga bat ordeztea (AAI00013_MNS_2023_004); 2023ko abuztuaren 3an organo honek ez-funtsezkotzat egiaztatu zituen aldaketa horiek.

19.– 2023ko urriaren 31n, Bunge Ibérica SAk jakinarazi zuen tratamendu biozidan erabilitako agente sakabanatzailea ordeztu egin zela: Turbodispin 4360tik 4363ra igaro zen.

20.– 2023ko azaroaren 14an, Kutsaduraren Prebentzio eta Kontrol Integratuari buruzko Legearen testu bateginaren 20. artikuluan xedatutakoa betez, Bunge Ibérica SAren esku utzi zen espedientea.

21.– 2023ko azaroaren 27an, Bunge Ibérica SAk idazki bat igorri zuen, eta, han, alegazioak aurkeztu.

ZUZENBIDEKO OINARRIAK

1.– 2016ko abenduaren 31n, Estatuko Aldizkari Ofizialean argitaratu zen 1/2016 Legegintzako Errege Dekretua, abenduaren 16koa, Kutsaduraren Prebentzio eta Kontrol Integratuari buruzko Legearen testu bategina onartzen duena.

2.– Aipatutako testu bateginaren 26. artikuluan daude ezarrita baimena berrikusteko kondizioak. Horri jarraituz, lau urteko epean, instalazioaren jarduera nagusiari dagozkion TEOen inguruko ondorioak argitaratzen direnetik aurrera, organo eskudunak ziurtatuko du instalazioaren baimenaren kondizio guztiak berrikusi direla eta, beharrezkoa izanez gero, egokitu direla, eta instalazioak aipatutako TEO erreferentzia-agirien ondorio aplikagarriak betetzen dituela.

3.– 2019ko urriaren 15ean, urriaren 10eko TEC/1023/2019 Agindua argitaratu zen Estatuko Aldizkari Ofizialean, zeinetan ezartzen baita noiztik aurrera eskatu ahal izango zaien nahitaezko finantza-bermea Ingurumen Erantzukizunari buruzko urriaren 23ko 26/2007 Legearen III. eranskinean jasotako jarduerei –ekainaren 22ko ARM/1783/2011 Aginduaren bidez 3. lehentasun-mailakotzat sailkatuak–.

4.– 2020ko urtarrilaren 27an, Euskal Herriko Agintaritzaren Aldizkarian argitaratu zen 4/2020 Dekretua, urtarrilaren 21ekoa, zeinaren bidez indargabetu egiten baita irailaren 25eko 183/2012 Dekretua, Ingurumeneko administrazio-prozeduretan zerbitzu elektronikoen erabilera arautzeko eta ingurumenean eragina duten jardueren Euskal Autonomia Erkidegoko erregistroa sortzeko eta arautzeko dena.

5.– Ingurumen-baimen bateratua eman ondoren, ingurumenari buruzko araudi berria promulgatu da; beraz, egokia da indarrean dagoen araudi berrira egokitzea, ofizioz, Ingurumeneko sailburuordearen 2004ko ekainaren 22ko Ebazpenaren kondizioak, ebazpen horren bosgarren apartatuan ezarritakoari jarraikiz eta Ingurumen-ebaluazioari buruzko abenduaren 9ko 21/2013 Legearen 44. artikuluan ezarritakoari jarraikiz.

6.– Ebazpen honetan, kontuan izan dira teknika erabilgarri onenak eta aplikatzekoa den sektoreko legeriak zehaztutako neurriak eta kondizioak, bai instalazioak gehienez isur edo igor ditzakeen gai kutsagarrien muga-balioak zehazteko, bai ingurumen osoa ahalik eta gehien babesteko asmoz instalazioaren ustiapenari ezarriko zaizkion bestelako kondizioak zehazteko. Zehazki, Europako Batzordearen BREF dokumentu honen edukia hartu da kontuan: 2019ko TEOak elikagaien, edarien eta esnearen industrian («Best Available Techniques [BAT] Reference Document for the Food, Drink and Milk Industries»).

7.– Aipatutako IPPC Legearen 3. artikuluak honela definitzen ditu «teknika erabilgarri onenak»: oinarri jakin bat eratzeko teknika batzuen gaitasun praktikoa frogatzen duten jardueren eta ustiapen moten garapen faserik eraginkorrena eta aurreratuena; zehazki, emisioen muga-balioen oinarria eratzeko eta emisioak eta ingurumen osoan eta pertsonen osasunean emisioek duten eragina saihesteko edo –hori saihetsezina denean– murrizteko baimenaren beste kondizio batzuen oinarria eratzeko teknikak darabiltzaten jardueren eta ustiapen moten garapen faserik eraginkorrena eta aurreratuena.

8.– Kutsaduraren Prebentzio eta Kontrol Integratuaren Legearen testu bategina onartzen duen abenduaren 16ko 1/2016 Legegintzako Errege Dekretuaren 7.6 artikuluak honako hau ezartzen du:

«6.– Organo eskudunak artikulu honetan eta 4.1.a) artikuluan ezartzen diren betekizunen salbuespenak onartu ahal izango ditu aldi baterako (guztira bederatzi hilabeterako, gehienez ere), probak egiteari eta azaleratzen ari diren teknikak erabiltzeari dagokionez. Betiere, ezarritako aldia igaro ondoren, teknika eten egin beharko da edo bestela jarduerak teknika erabilgarri onenei dagozkien isurtze-mailak edo maila hobeak lortu beharko ditu».

9.– Ingurumen-baimen bateratuaren berrikuspena izapidetu bitartean, beharrezko diren agiriak aurkeztu dira. Beraz, bidezkoa da Bunge Ibérica SAk egindako eskaera onartzea eta C.1.2.3 apartatua egokitzea, baita probak egiteko epe bat eta fosforoaren muga-balioetarako muga iragankor bat ezartzea ere.

10.– Administrazio Publikoen Administrazio Prozedura Erkidearen urriaren 1eko 39/2015 Legearen 72. artikuluan xedatutakoa aplikatuko da –izapideak kontzentratzeari buruzko artikulua–: «Administrazioa sinplifikatzeko printzipioarekin bat, egintza bakar batean erabakiko dira izaeragatik batera bultza daitezkeen eta nahitaez bata bestearen ondoren bete beharrekoak ez diren izapide guztiak».

11.– Ingurumen Jasangarritasuneko Sailburuordetzak Ebazpen hau emateko eskumena du, Ekonomiaren Garapen, Jasangarritasun eta Ingurumen Saileko egitura organikoa eta funtzionala ezartzeko den otsailaren 23ko 68/2021 Dekretuan xedatutakoaren arabera.

Aipatutako legeria, eta gai honetan aplikatu behar diren gainerako xedapen guztiak aintzat hartuta, honako hau

EBAZTEN DUT:

Lehenengoa.– Berrikustea Bunge Ibérica SAri 2004ko ekainaren 22ko Ebazpenaren bidez emandako ingurumen-baimen bateratua (Zierbenako udal-mugartean –Bizkaia– olio-haziak ehotzeko eta landare-olioak fintzeko jarduerarako), Batzordearen 2019ko azaroaren 12ko 2019/2031 (EB) Betearazpen Erabakian azaltzen den baldintzetan.

Bigarrena.– Ebazpen honen eranskinean zehaztutako baldintzetan, etengabe aipatutako ingurumen-baimen bateratuaren apartatu hauek aldatzea:

– Lehenengoa.

– Bigarrena.

– Zortzigarrena.

Hirugarrena.– Ebazpen honen edukia jakinaraztea Bunge Ibérica SA enpresari, Zierbenako Udalari, ingurumen-baimen bateratua berrikusteko prozeduran parte hartu duten erakundeei eta gainerako interesdunei.

Errekurtsoak:

Egintza honek ez du administrazio-bidea amaitzen, eta, haren aurka, gora jotzeko errekurtsoa jarri ahalko zaio Ekonomiaren Garapen, Jasangarritasun eta Ingurumeneko sailburuari, jakinarazpena egin eta hurrengo egunetik aurrera hilabeteko epean, bat etorriz Administrazio Publikoen Administrazio Prozedura Erkidearen urriaren 1eko 39/2015 Legearen 121. eta 122. artikuluetan xedatutakoarekin.

Vitoria-Gasteiz, 2023ko abenduaren 1a.

Ingurumen Jasangarritasunaren sailburuordea,

AITOR ALDASORO ITURBE.

(Ikus .PDF)

Azterketa dokumentala