Euskal Herriko Agintaritzaren Aldizkaria

16. zk., 2024ko urtarrilaren 22a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HEZKUNTZA SAILA

320

AGINDUA, 2024ko urtarrilaren 9koa, Hezkuntzako sailburuarena, 2023-2024 ikasturteari dagokion ikastetxeei buruzko informazioa eredu bateratuaren bidez biltzeko dena.

Hezkuntza-plangintza eta kudeaketa arloetako beharrei erantzun ahal izateko, eta estatistika ondorioetarako, unibertsitateaz besteko irakaskuntzak ematen dituzten Euskal Autonomia Erkidegoko ikastetxe guztietan 2023-2024 ikasturteari buruzko bateratutako informazioa bilduko da. Horretarako, Administrazio eta Zerbitzuen Sailburuordetzaren eta Hezkuntza Sailburuordetzaren proposamenez, hauxe

XEDATZEN DUT:

Lehenengoa.– Euskal Autonomia Erkidegoan egoitzak dituzten unibertsitateaz besteko ikastetxe guztiek zehaztasunez eta zorroztasunez erantzun eta bete beharko dituzte, Hezkuntza Sailaren aplikazioak erabiliz, zenbait dokumentu eta inprimaki; zehazki, honako hauek: Eskola Jarduera, Ordutegiak, Espediente Akademikoak, Notak, Faltak (akta finalak) eta HPB-Hezkuntza Premia Bereziak.

Bigarrena.– Ikasturtean zehar, Hezkuntza Sailak zer galdeketa bete behar diren komunikatuko dio ikastetxe bakoitzari, eta epeak eta prozedura egokiak adieraziko.

Hirugarrena.– Ikastetxeko zuzendariak gainbegiratu beharko du ereduak nola bete diren; izan ere, horrek bermatzen du ematen den informazioaren zehaztasuna. Dokumentuak bete ondoren, ezarritako prozedurak eta epeak errespetatuz bidali behar dira, hala badagokio, eta ondoren, behar denean, haiek berrikusteari ekingo zaio.

AZKEN XEDAPENETAKO LEHENENGOA

Baimena ematen zaie Administrazio eta Zerbitzuen sailburuordeari, Hezkuntzako sailburuordeari eta Hezkuntzako lurralde-ordezkariei, behar diren neurriak har ditzaten agindu honetan xedatzen dena ahal den ongien garatu eta aplikatzeko.

AZKEN XEDAPENETAKO BIGARRENA

Agindu honek Euskal Herriko Agintaritzaren Aldizkarian argitaratzen denetik aurrera izango ditu ondorioak.

Vitoria-Gasteiz, 2024ko urtarrilaren 9a.

Hezkuntzako sailburua,

JOKIN BILDARRATZ SORRON.

Azterketa dokumentala