Euskal Herriko Agintaritzaren Aldizkaria

225. zk., 2023ko azaroaren 24a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EUSKAL TRENBIDE SAREA

5291

EBAZPENA, 2023ko azaroaren 9koa, Red Ferroviaria Vasca-Euskal Trenbide Sarearen Kontratazio batzorde delegatuaren presidentearena, zeinaren bidez onartu egiten baitira honako honen espedientea eta gastua: «Jabari publikoko baimena, Burtzeña-Barakaldoko Vega de Tapia kaleko lurzatian dauden lursailak okupatu eta partzialki erabiltzeko».

AURREKARIAK

Lehenengoa.– ETSko Ondare Saila, interesdunak eskatuta, Burtzeña-Barakaldon (Bizkaia) Vega de Tapia kaleko lurzatian kokatutako lursailak okupatzeko eta partzialki erabiltzeko jabari publikoko baimena izapidetzen hasi zen ofizioz, apirilaren 13ko 475/2007 Errege Dekretuaren eranskineko 49.4 taldeko 49. dibisioan aurreikusitako jarduera bat garatzeko.

Bigarrena.– 2023ko azaroaren 7an egiaztatu da Euskadiko Ondareari buruzko Legearen Testu Bategina onartzen duen azaroaren 6ko 2/2007 Legegintzako Dekretuaren 74.3 artikuluan aurreikusitako aurretiazko aldeko txostena eman dela.

Hirugarrena.– Baimenaren aurrekontua 3.840,00 eurokoa da, BEZik gabe, kanon gisa; hilean 320 euro ordainduko dira (BEZik gabe), eta ETSk egindako euskarri-tasazio ofizialaren arabera zehaztu da. Egikaritzeko hasierako epea bi (2) urtekoa da, eta, bi alderdiak ados jarrita, luzatu egin daiteke, gehienez ere bi (2) urte, Euskadiko Ondareari buruzko Legearen Testu Bategina onartzen duen azaroaren 6ko 2/2007 Legegintzako Dekretuaren 80.2 artikuluan xedatutakoaren arabera.

OINARRI JURIDIKOAK

Lehenengoa.– Aurrekarietan aipatutako hasitako espedientearen xedea da jabari publikoko baimen bat arautzea erabilera pribatiborako, Euskadiko Ondareari buruzko Legearen Testu Bategina onartzen duen azaroaren 6ko 2/2007 Legegintzako Dekretuaren 68.b) artikuluan aurreikusitakoaren arabera, Burtzeña-Barakaldon (Bizkaia) Vega de Tapia kaleko lurzatian kokatutako lursailen barruan 1.000 m²-ko azalera partzialki okupatzeko eta erabiltzeko, salgaien errepideko garraioaren merkataritza-jarduera bat garatzeko.

Bigarrena.– Higiezin hori herri-jabariko ondasuna da, EAEAO Euskal Autonomia Erkidegoko Administrazio Orokorraren titulartasunekoa, eta Red Ferroviaria Vasca-Euskal Trenbide Sarea (aurrerantzean, ETS) ente publikoari atxikita dago. Baimendunak proposatutako jarduera garatzeko erabiliko da zati batean, eta, horretarako, hark behar diren espedienteak izapidetu beharko ditu, bere kontura eta arriskuak berak hartuz, baimena ustiatzeko eta bere jarduera gauzatzeko eskatzen diren mota guztietako baimenak eta lizentziak lortzeko.

Hirugarrena.– Erreferentziako espedientean jasotako dokumentazioa eta informazioa aztertuta, behar bezala betetzen da Euskadiko Ondareari buruzko Legearen Testu Bategina onartzen duen azaroaren 6ko 2/2007 Legegintzako Dekretuan jabari publikoko baimenei buruz aurreikusitakoa.

Laugarrena.– Euskadiko Ondareari buruzko Legearen Testu Bateginaren 70.2 artikuluan xedatutakoaren arabera, ETSri dagokio, ondasuna atxikita daukan entitatea den aldetik, administrazio-baimenei buruzko espedienteak izapidetzea.

Bosgarrena.– Baimen-erabakian jaso beharreko edukiari dagokionez, espedientean jasotako dokumentazioan eta informazioan honako hauek daude jasota:

– Ondasuna edo eskubidea erabiltzeko araubidea.

– Baimenak edo emakidak bete beharreko ekonomia-araubidea.

– Jarri beharreko bermea, hala badagokio.

– Kontserbazio- eta mantentze-gastuak, zergak, tasak eta gainerako tributuak bere gain hartzea, bai eta ondasuna bere izaeraren arabera erabiltzeko eta jasotzen den egoeran entregatzeko konpromisoa hartzea ere.

– Ondasunaren erabilerak edo haren gainean egin beharreko jarduerak eskatzen dituen lizentzia eta baimen guztiak aurrez bere kontura eskuratzeko konpromisoa.

– Okupazioaren ondoriozko erantzukizuna bere gain hartzea, eta, hala badagokio, dagokion aseguru-poliza formalizatzeko betebeharra aipatzea.

– Lagatzaileak baimenaren xede den ondasuna ikuskatzeko ahalmena gordetzea, baimenean jarritako baldintzen arabera erabiltzen dela bermatzeko.

– Luzapen- eta subrogazio-epe eta –araubidea, hala badagokio; nolanahi ere, aldez aurreko baimena beharko da luzatzeko eta subrogatzeko.

Seigarrena.– Hautatutako esleipen-prozedura Euskadiko Ondareari buruzko Legearen testu bateginaren 74.3 artikuluan araututako konkurrentzia-prozedura da, eta, hori emateko, lege-testu horren beraren 74.4 artikuluan ezarritakoari jarraituko zaio.

EHAAn iragarki bat argitaratu beharko da, interesdunak aurkeztutako eskaerari erantzuteko baimena emateko baldintzak jasotzen dituena. Hona hemen xehetasunak:

– Eskatzailea: Dagase, S.L.

– Xedea: Burtzeña-Barakaldo eremuko 1000,00 m²-ko azaleraren okupazioa eta erabilera pribatiboa; 013-1104-05001 erreferentziako lurzati nagusitik datoz.

– Hasierako okupazio-epea: 2 urte; okupazio hori gehienez 2 urte gehiagoz berritzeko aukera dago, bi alderdiak ados jarrita.

– Enpresak proposatutako aldez aurreko lanak, eta bere jarduera garatzeko kokalekua egokitzeko edo gaitzeko beharrezkoak diren gainerako lan gehigarriak, enpresaren kontura izango dira, eta haren kontura izango dira kontserbazio-, mantentze-, zaintza- eta segurtasun-gastuak, zergak, tasak eta gainerako zergak, bai lursailaren titulartasunari lotutakoak, bai bertan garatu beharreko jarduerari lotutakoak, bai eta okupazio horren xede diren ondasunak beren izaeraren arabera erabiltzeko eta jasotzen dituzten egoeran itzultzeko konpromisoa ere.

– Sarbidea, lursailak dauden lekura sartzeko gune komun bakarra denez, libre, hutsik eta kontserbazio- eta segurtasun-egoera onean mantendu beharko da, esleituta daukan helbururako erabilgarria eta eraginkorra dela ziurtatzeko, eta eskatutako okupazioarekin zerikusirik ez duen gainerako lursailaren egiazko bide-zorra da.

– Okupatuko diren lursailak kokatuta dauden lurzatiaren barruko igarotze- eta zirkulazio-araubideari dagokionez, kokalekuan dauden gainerako okupatzaileekin eta jarduerekin koordinatu beharko da, bateragarri egin ahal izateko, interesdun guztiek jarduera normal garatu ahal izan dezaten.

– Eskatzaileak berak hartuko du, bere kontura, lursailen erabilerak edo horien gainean egin beharreko jarduerak eskatzen dituen lizentzia eta baimen guztiak lortzeko konpromisoa.

– Eskatzaileak erantzun beharko du inor trenbide-instalazioetara behar ez bezala sartuz gero, bai eta instalazio horiei edozein kalte edo galera eraginez gero ere, eta haren kontura izango dira okupazio-aldian sortzen diren konponketa-gastuak eta erantzukizunak.

– Aldi baterako okupazio horrek ez dio inolako erantzukizunik ekarriko ETSri, eta eskatzailea arduratuko da ezarritako epean mantentze-lanez eta segurtasun-baldintzez.

– ETSk eta Euskal Autonomia Erkidegoko Administrazio Orokorrak ez dute inolako erantzukizunik izango, instalazioen aldi baterako okupazioaren eta erabileraren ondorioz interesdunek (okupatzaileek eta, oro har, eraginpean leudekeen hirugarrenek) kalteak jasanez gero.

– Era berean, ETSk eta Euskal Autonomia Erkidegoko Administrazio Orokorrak ez dute inolako erantzukizunik izango, okupatzaileak edo hirugarren erabiltzaileek trenbide-instalazioetan eta lursailetan kalteak eraginez gero.

– Une oro, lursailean daudenek trenbideko teknikariek emandako jarraibideak bete beharko dituzte, hala eskatuz gero.

– Instalazio horietan egin beharreko edozein obra, lan edo egokitzapen-jarduketa, txosten honetan aipatutakoez gain, aldez aurretik jakinaraziko zaio ETSri, teknikariek adostasuna eman dezaten eta gauzatzeko beharrezkoak diren baldintzak zehaztu ditzaten.

– Eskatzaileak erantzukizun zibileko aseguru-poliza bat entregatuko du ETSn, prima ordaindu izanaren frogagiriarekin batera, aipatutako kontingentziak estaltzeko; poliza horrek frankizia bat ezarria badu, eskatzaileak edo haren izenean jarduten duenak ordainduko du frankiziaren zenbatekoa.

– Ez da beharrezkotzat edo nahitaezkotzat jotzen interesdunak fidantza gehigarria eratzea.

– Hasieran, baimen horri dagokion zenbatekoa honako hau izango da: 320 euro hileko alokairua (BEZik gabe).

– Zenbateko hori urtero handituko da, okupazioaren indarraldiko urte bakoitzean, eta eguneratu egingo da Euskal Autonomia Erkidegoan aplikatu beharreko kontsumoko prezioen indizeak aurreko urte arteko aldiari dagokionez izandako aldakuntzaren arabera, zeina Estatistikako Institutu Nazionalak, Eustatek edo Euskal Autonomia Erkidegoan hura ordezka dezakeen antzeko erakundeak onartzen duen.

– Okupazio hori, baimentzen denetik ondorioak izatea alde batera utzi gabe, Irauregi-Lutxana lineako trenbide-garraioa martxan jartzeak baldintzatuko du, linea hori ETSrentzat lehentasunezkoa izango baita. Horren harira, trenbideko garraioari berriro ekin zaiola egiaztatzen bada, eta garraioa garatzeko beharrezkoa edo komenigarria bada, okupazioaren baldintzak berrikusi egingo dira (eta, hala badagokio, okupazioa ebazteko edo amaitzeko aukera ere izango da), inolako kontraprestaziorik edo konpentsaziorik sortu gabe. Era berean, interesdunak, okupazio hau dagoen lursailean kokatutako gainerako garraio-operadoreen konkurrentzia-erregimenean eta baldintza berberetan, prest egon beharko du trenbideko garraioko salgaien azken garraioa –instalazioetatik entrega-puntuetaraino– trenbide-operadorearekin hitzartu beharreko egintza edo negozio juridikoaren bidez egiteko.

– ETSk berariaz gordeko du baimenaren xede den ondasuna edozein unetan ikuskatzeko ahalmena, onartutako xedearen edo helburuaren arabera eta baimendutako baldintzen arabera erabiltzen dela bermatzeko.

Interesdunek 30 egun naturaleko epea izango dute, EHAAn argitaratu eta hurrengo egunetik aurrera, ondasun bera okupatzeko beste eskaera batzuk aurkezteko, interesdunak nahi duen helburu berarekin. Epea amaitzeko eguna balioduna ez bada, hurrengo egun baliodunera luzatuko da automatikoki.

Horiek horrela, ETSren Kontratazio Batzorde Delegatuak honako hau

EBAZTEN DU:

Lehenengoa.– «Burtzeña-Barakaldoko Vega de Tapia kaleko lurzatian dauden lurrak okupatzeko eta partzialki erabiltzeko (1.000,00 m²) herri-jabariko baimena emateko» espedientea eta gastua onartzea. Aurrekontua 3.840,00 eurokoa da, BEZik gabe, kanon gisa; hileko 320 euroko ordainketa egingo da (BEZik gabe); eta egikaritze-epea bi (2) urtekoa da, baina luza daiteke, gehienez ere bi (2) urtez.

Bigarrena.– Euskal Herriko Agintaritzaren Aldizkarian argitaratzeko agintzea.

Bilbao, 2023ko azaroaren 9a.

Kontratazio batzorde delegatuaren presidentea,

ERNESTO MARTINEZ DE CABREDO ARRIETA.

Azterketa dokumentala