Euskal Herriko Agintaritzaren Aldizkaria

134. zk., 2023ko uztailaren 14a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

LURRALDE PLANGINTZA, ETXEBIZITZA ETA GARRAIO SAILA

3420

AGINDUA, 2023ko ekainaren 27koa, Lurralde Plangintza, Etxebizitza eta Garraioetako sailburuarena, birgaitze integratuko areetarako orokorrean ezarritako finantzaketa kualifikatua Bilboko udalerriko Uribarri II eremura zabaltzea erabakitzen duena.

2022ko abenduaren 22an eta 26an, Bilboko Udalak, Surbisa udal hirigintza-sozietatearen bitartez, Lurralde Plangintza, Etxebizitza eta Garraio Sailari eskatu zion birgaitze integratuko areetarako zehaztutako laguntzak Uribarri II eremuari emateko. Idazkiarekin batera, hauek ere bidali zituen: eremuaren mugaketa-planoa, deskribapen eta justifikazio memoria, gizarte eta hirigintza azterlana, ekonomia eta finantza azterlana eta jarduketa-programa.

Eremu horren jardute-esparruaren mugaketa espedientean jasotzen diren dokumentazioan oinarritzen da, zehazki erakunde eskatzaileak aurkeztutako mugaketa planoan.

Lurralde Plangintza, Etxebizitza eta Garraio Saila da espediente hau ebazteko organo eskuduna, Sailaren egitura organikoa eta funtzionala ezartzen duen urtarrilaren 19ko 11/2021 Dekretuaren 10.2.n) artikuluan eta Ondare urbanizatua eta eraikia birgaitzeko jarduketa babestuei buruzko abenduaren 30eko 317/2002 Dekretuan aurreikusitakoaren arabera.

Aipatutako 317/2002 Dekretuaren hirugarren xedapen gehigarrian adierazitakoaren arabera, sail eskuduneko sailburuak, horretarako emandako aginduaren bidez, birgaitze integratuko area zehaztutako laguntzak eman ahal izango dizkie dekretu horren 9.2 artikuluan definitutako eremuei, Birgaitzeko Plan Berezia idatzi beharrik ez badute.

Espedientea aztertu ondoren, uste da 317/2002 Dekretuaren 9.2 artikuluan ezarritako degradazio ekonomiko, sozial eta urbanistiko-arkitektonikoko baldintzak eremuan betetzen direla. Beraz, eremua Area Degradatutzat jotzen da.

XEDATEN DUT:

Lehenengoa.– Baimentzea, ondare eraikiari dagokionez, abenduaren 30eko 317/2002 Dekretuan ezarritako birgaitze integratuko areetarako dirulaguntzak ematea Bilboko Uribarri II eremuan egingo diren babespeko birgaitze jarduketei.

Bigarrena.– Agindu honen berri ematea Bilboko Udalari eta Bizkaiko Foru Aldundiari.

Hirugarrena.– Agindu hau Euskal Herriko Agintaritzaren Aldizkarian eta Bizkaiko Aldizkari Ofizialean argitaratzea.

Laugarrena.– Agindu honen aurka berraztertzeko errekurtsoa jarri ahal izango zaio Lurralde Plangintza, Etxebizitza eta Garraioetako sailburuari hau jakinarazten den biharamunetik hasi eta hilabeteko epearen barruan edo, bestela, administrazioarekiko auzi-errekurtsoa jarri ahal izango da Euskal Autonomia Erkidegoko Auzitegi Nagusian bi hilabeteko epean, jakinarazpena jasotzen denetik hasita, argitaratzea eragotzi gabe denok jakinaren gainean egon gaitezen.

Vitoria-Gasteiz, 2023ko ekainaren 27a.

Lurralde Plangintza, Etxebizitza eta Garraioetako sailburua,

IGNACIO MARÍA ARRIOLA LÓPEZ.

(Ikus .PDF)

Azterketa dokumentala