Euskal Herriko Agintaritzaren Aldizkaria

108. zk., 2023ko ekainaren 8a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIAREN GARAPEN, JASANGARRITASUN ETA INGURUMEN SAILA
EKONOMIA ETA OGASUN SAILA

2714

70/2023 DEKRETUA, maiatzaren 23koa, baimen hauek ematen dituena: SPRI-Enpresen Garapenerako Euskal Agentziari baimena ematen dio Sociedad Parque Científico y Tecnológico de Gipuzkoa – Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko, eta Euskal Autonomia Erkidegoko Administrazio orokorraren eta instituzionalaren zuzeneko eta zeharkako titulartasuneko akzioen ordezkariei baimena ematen die sozietate horren estatutuen 2. artikulua aldatzeko onespena emateko.

SPRI-Enpresen Garapenerako Euskal Agentziak parte hartzen du Sociedad Parque Científico y Tecnológico de Gipuzkoa – Gipuzkoako Zientzia eta Teknologia Parkea SA sozietatearen kapitalean, eta haren akziodun nagusia da.

Gipuzkoako Zientzia eta Teknologia Parkea SA sozietatearen xedea da industria-arloko ekimenak eta inbertsioak bultzatzea eta sustatzea. Horretarako, zenbait eraikin eraiki, eta lursail-multzoak egokituko ditu, eta haien ustiaketa kudeatuko du errentamendu-formulen bidez, jabetza-eskualdatze bidez edo beste edozein bide erabiliz, prekarioko lagapena barne dela. Sozietateak, halaber, lokal eta zerbitzuak sustatu eta merkaturatuko ditu, teknologia zabaldu eta eskualdatzeko jarduerak gauzatuko ditu, eta parkean ezartzekoak diren enpresa hautagaiak gonbidatu eta aukeratuko ditu, hau da, teknologia aurreratuan jarduerak egingo dituzten enpresak.

Gipuzkoako Zientzia eta Teknologia Parkea SA sozietateak kapitala zabaldu beharra dauka, Galarretako campusean eraikin berri bat egin ahal izateko, hain zuzen ere sozietatearen xedea garatzeko espazio fisiko egoki gehiago edukitze aldera.

SPRI-Enpresen Garapenerako Euskal Agentziaren Administrazio Kontseiluak baimena eskatu du Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko.

Baimen hori beharrezkoa da, hala xedatzen baitu Euskadiko Ondareari buruzko Legearen testu bategina onartzen duen azaroaren 6ko 2/2007 Legegintzako Dekretuaren 110.1 artikuluak; honela dio artikulu horrek: enpresa-ondarea osatzen duten ondasunak eta eskubideak eskuratzeko, aurretiaz, Gobernu Kontseiluaren baimena beharko da, dekretu bidez emana.

Aurreikusitako eragiketan, SPRI-Enpresen Garapenerako Euskal Agentzia erakundeak, guztira, 4.213.500 euroko zenbatekoarekin parte hartuko luke kapital-zabalkuntza horretan, hau da, proposatutako zabalkuntzaren % 76,64. Horren ondorioz, % 67,68ra igoko litzateke Gipuzkoako Zientzia eta Teknologia Parkea SAren kapitalean duen partaidetza.

Kapital-zabalkuntzak berekin dakar kapital-sozietateen estatutuen 2. artikulua berriz idatzi beharra. Hori dela eta, Euskadiko Ondareari buruzko Legearen testu bateginaren 111.2 artikulua aplikatu behar da, honela dioena: zuzenean nahiz zeharka Euskal Autonomia Erkidegoko Administrazio orokorraren edo instituzionalaren titulartasunpekoak diren akzioen ordezkariek sozietate-estatutuak onartzeko edo aldatzeko onarpena emateko, Gobernu Kontseiluaren baimena beharko dute, ondareari buruzko eskumenak dituen sailburuak eta sozietatea loturik duen sailburuak biek batera proposaturik.

Ondorioz, Ekonomiaren Garapen, Jasangarritasun eta Ingurumeneko sailburuak eta Ekonomia eta Ogasuneko sailburuak batera proposaturik, eta Gobernu Kontseiluak 2023ko maiatzaren 23ko bileran proposamena aztertu eta onartu ondoren, honako hau

XEDATZEN DUT:

1. artikulua.– SPRI-Enpresen Garapenerako Euskal Agentziari baimena ematea Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko. Lau milioi berrehun eta hamahiru mila eta bostehun (4.213.500) eurokoa izango da parte-hartzea, hau da, zabalkuntzaren % 76,64. Eragiketa horren ostean, % 67,68ko partaidetza izango du SPRI-Enpresen Garapenerako Euskal Agentziak sozietate horretan.

2. artikulua.– SPRI-Enpresen Garapenerako Euskal Agentziaren titularitatekoak diren akzioen ordezkariei baimena ematea kapital-zabalkuntzaren ondorioz Gipuzkoako Zientzia eta Teknologia Parkea SA sozietatearen estatutuen 2. artikulua aldatzeko onespena emateko. Artikulu horren idazketan, sozietatearen kapitalaren zenbateko berria jasoko da.

AZKEN XEDAPENA

Dekretu honek onartzen den egunetik aurrera izango ditu ondorioak.

Vitoria-Gasteizen, 2023ko maiatzaren 23an.

Lehendakaria,

IÑIGO URKULLU RENTERIA.

Ekonomiaren Garapen, Jasangarritasun eta Ingurumeneko sailburua,

MARÍA ARANZAZU TAPIA OTAEGUI.

Ekonomia eta Ogasuneko sailburua,

PEDRO MARÍA AZPIAZU URIARTE.

Azterketa dokumentala