Euskal Herriko Agintaritzaren Aldizkaria

39. zk., 2023ko otsailaren 24a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

AGINTARIAK ETA LANGILERIA

Oposaketak eta lehiaketak

OSAKIDETZA-EUSKAL OSASUN ZERBITZUA

1038

2/2023 EBAZPENA, urtarrilaren 10ekoa, Arabako Errioxako Erakunde Sanitario Integratuko zuzendari-gerentearena, Osakidetza-Euskal osasun zerbitzuko Arabako Errioxako Erakunde Sanitario Integratuko Lehen Mailako Atentzioko unitateburuaren lanpostu bat izendapen askez betetzeko deialdia egiten duena.

Arabako Errioxako ESIko Lehen Mailako Atentzioko unitateburuaren lanpostua behin-behinean beteta dagoenez, Euskadiko Antolamendu Sanitarioari buruzko ekainaren 26ko 8/1997 Legearen 28. artikuluan, Osakidetzako lanpostu funtzionalak arautzen dituen uztailaren 19ko 186/2005 Dekretuan eta azaroaren 11ko 255/1997 Dekretuan xedatutakoarekin bat etorriz, lanpostu hori izendapen askez betetzeko deialdi publikoa iragartzea erabaki du Gerentziako Zuzendaritza honek. Hona hemen

OINARRIAK

1.– Parte hartzeko betekizunak.

Deialdi honetan parte hartu ahal izango dute honako baldintza hauek betetzen dituztela egiaztatzen dutenek:

a) Pertsonal finkoa, estatutarioa, funtzionarioa edo lan-kontratuduna izatea Osakidetzako edozein zerbitzu-erakundetan, eta lanpostua jabetzan izatea A1/B1 lanbide-taldean.

b) Honako titulazio hauetakoren bat izatea:

b.1.– Medikuntza eta Kirurgiako lizentziatura, Familia eta Komunitateko Medikuntzako espezialitatearekin edo Medikuntza Orokorreko medikuen eginkizunak betetzeko ezarritako titulu, ziurtagiri edo diplometako batekin, Osakidetza Ente Publikoaren lanpostu funtzionalak arautzen dituen uztailaren 19ko 186/2005 Dekretuaren I. eranskinean aurreikusitakoaren arabera, edo Pediatriako espezialitatearekin.

b.2.– Hezkuntza eta Zientzia Ministerioak emandako OLT edo Erizaintzako Unibertsitate Diplomaturako titulazioa, edo Erizaintzako Graduko titulazioa, 186/2005 Dekretuko I. eranskinean zehaztutakoa betez, uztailaren 19koa, Osakidetza Zuzenbide Pribatuko Entitate Publikoaren lanpostu funtzionalak arautzen dituenekoa.

c) A1 eta B1 taldeetako zereginetan gutxienez 3 urteko esperientzia.

2.– Kontuan hartu beharreko merezimenduak.

a) Lehen mailako arretako unitateak kudeatzeko esperientzia eta prestakuntza.

b) Taldeak eta pertsonak antolatzeko eta kudeatzeko trebetasuna.

c) Kudeaketa-tresnei buruzko prestakuntza eta ezagutzak (SAP – Karteldegiak, Osakidetza, kalitate-ereduak, prozesuak, segurtasun klinikoa, etengabeko hobekuntza, ISO eta MGA).

d) Arabako Errioxako Lehen Mailako Arretako Unitatearen Kudeaketa Memoria-Proiektua egitea baloratuko da.

Interesgarritzat jotzen diren eta lanpostu horretan jarduteari balioa eransten dioten merezimendu guztiak aurkeztu ahal izango dira.

3.– Euskararen ezagutza.

Osakidetza-Euskal osasun zerbitzuan euskararen erabilera normalizatzeko martxoaren 18ko 67/2003 Dekretuan eta hori garatzeko arauetan aurreikusitakoaren arabera baloratuko da.

4.– Eskabideak aurkezteko epea.

Interesdunek Osakidetza-Euskal osasun zerbitzuko Arabako Errioxako ESIko Pertsonaleko Zuzendaritzara bidali beharko dituzte eskabideak (Vitoria-Gasteiz - Logroño errepidea 59 km.01309 Laguardia, Araba).

Horretarako, 15 egun balioduneko epea izango dute, ebazpen hau EHAAn argitaratu eta hurrengo egunetik aurrera. Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan ezarritako moduan ere aurkeztu ahal izango dira.

Interesdunek goian adierazitako Pertsonaleko Zuzendaritzara bidali beharko dute eskabidea, beren datu pertsonal guztiekin, curriculum vitae dokumentatuarekin batera. Dokumentazioak honako forma hau izan beharko du:

NANaren, pasaportearen edo gidabaimenaren fotokopia konpultsatua.

Funtzionarioaren edo estatutupeko langilearen izendapenaren fotokopia konpultsatua edo, hala badagokio, lan-kontratudun langile finkoa dela egiaztatzen duen agiriarena.

Baldintzak betetzen direla egiaztatzen duen dokumentazioaren fotokopia konpultsatua.

Kontuan hartu beharreko merezimendu guztien fotokopia konpultsatua.

Ez da beharrezkoa izango aurreko paragrafoan adierazitako moduan egiaztatzea CVen aplikazio informatiko korporatiboan behar bezala baliozkotuta dauden alderdiak, baina egoera hori izangaiaren eskabidean adierazi beharko da.

5.– Balorazio Batzordea.

Batzorde bat eratuko da aurkeztutako eskabideak baloratzeko, zuzendari-gerentea edo hark eskuordetutako pertsona buru dela. Batzorde hori osatuko dute erizaintzako laguntzaileak eta Pertsonaleko zuzendariak (azken hori idazkaria izango da). Batzorde hori izangaiei jakinaraziko zaie.

Batzordeak, eskaerak baloratu ondoren, hautagaiei jakinaraziko zaizkien eginbide osagarriak egitea erabaki ahal izango du.

Hautagaien balorazioa egin ondoren, eta hura aztertu ondoren, dagokion izendapena formalizatzeko proposamena egingo da. Izangaiak eskatutako baldintzak betetzen ez baditu, epaimahaiak, arrazoitutako txostena egin ondoren, bete gabe uztea proposatu ahal izango du.

Batzordearen bilkura bakoitzaren akta egingo da. Bertan jasoko dira aurkeztutako izangaiak, egindako eginbide osagarriak (halakorik balego) eta lanpostua horietako bati esleitzeko edo, hala badagokio, deialdia bete gabe uzteko kontuan hartutako arrazoiak.

6.– Hautatzeko prozedura.

Inola ere ezingo dira kontuan hartu deialdia EHAAn argitaratzen den egunean ez dauden merezimenduak, ezta eskabideak aurkezteko epea amaitu baino lehen behar bezala alegatu eta egiaztatu ez direnak ere.

7.– Prozedurari amaiera ematen dion ebazpena.

Hemen hasten den prozedura (lanpostua esleitzea edo bete gabe uztea) Osakidetza-Euskal osasun zerbitzuko Arabako Errioxako ESIko zuzendari kudeatzailearen ebazpenaren bidez amaituko da, eta ebazpen hori Euskal Herriko Agintaritzaren Aldizkarian, intranetean eta Osakidetzaren web-orri korporatiboan argitaratuko da.

Ebazpen horrek EHAAn argitaratzen den egunetik aurrera izango ditu ondorioak, bertan besterik xedatzen ez bada.

8.– Ebazpen honen aurkako errekurtsoak.

Ebazpen honen aurka gora jotzeko errekurtsoa aurkeztu ahal izango zaio Osakidetza-Euskal osasun zerbitzuko zuzendari nagusiari. Horretarako, hilabeteko epea izango da, ebazpen hau Euskal Herriko Agintaritzaren Aldizkarian argitaratu eta biharamunetik hasita.

Laguardia, 2023ko urtarrilaren 10a.

Arabako Errioxako ESI zuzendari-gerentea,

CARLOS RUIZ DE VERGARA LAORDEN.

Azterketa dokumentala