Egoitza elektronikoa

Kontsulta

Kontsulta erraza

Zerbitzuak


Azken aldizkaria RSS

Euskal Herriko Agintaritzaren Aldizkaria

247. zk., 2022ko abenduaren 28a, asteazkena


Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

HERRI-KONTUEN EUSKAL EPAITEGIA
5684

ERABAKIA, Herri Kontuen Euskal Epaitegiaren Osokoak 2022ko urriaren 27ko bilkuran hartua Herri Kontuen Euskal Epaitegiaren Barne-Araubidearen Erregelamendua onesten duena.

Herri Kontuen Euskal Epaitegiaren Osokoak 2022ko urriaren 10ean egindako bilkuran

ERABAKI DU:

Herri Kontuen Euskal Epaitegiaren Barne-Araubidearen Erregelamendua onestea, Erabaki honen eranskin modura ageri dena.

HKEEren 1/1988 Legearen 13.2 atalak aurreikusten duena betez, txostenaren ondorioak dagozkion aldizkari ofizialetan argitaratzeko xedatzea.

Vitoria-Gasteiz, 2022ko urriaren 27a.

La Presidenta del TVCP,

ANA HELGUERA LÍBANO.

HKEEren idazkari nagusia,

JULIO ARTETXE BARKIN.

ERANSKINA
HERRI KONTUEN EUSKAL EPAITEGIAREN BARNE-ARAUBIDEAREN ERREGELAMENDUA
ZIOEN AZALPENA

Eusko Legebiltzarraren otsailaren 5eko 1/1988 Legeak, martxoaren 1eko 6/2012 Legeak eta urriaren 28ko 6/2021 Legeak aldatua, Herri Kontuen Euskal Epaitegia sortu zuen, Euskal Sektore Publikoaren ekonomia- eta finantza-jarduerak fiskalizatzeko organo goren gisa, zuzenean Eusko Legebiltzarraren mende.

Urriaren 28ko 6/2021 Legearen lehenengo eta bigarren xedapen gehigarrien bidez, Eusko Legebiltzarrak agindu zuen Epaitegiak erakundearen barne-araubidearen erregelamendua onar zezala, lege hori argitaratu eta 12 hilabeteko epean.

Legegileak ezarritako agindu hori betetzeko, barne-araubideko erregelamendu hau onartzen da, 6/2021 Legearen bigarren xedapen gehigarrian xedatutakoaren arabera, eta Herri Kontuen Euskal Epaitegiaren 1/1988 Legearen III. ataleko bigarren eta hirugarren kapituluen garapena jasotzen du.

Barne-araubideko erregelamendu-arau hau onartzeko eskumena Herri Kontuen Euskal Epaitegiari berari dagokio, 1/1988 Legearen azken xedapenetako lehenengoaren bidez. Xedapen horrek ezartzen du Eusko Legebiltzarrak duela legearen arau osagarriak onartzeko eskumena, III. ataleko bigarren eta hirugarren kapituluak garatzeko arauak izan ezik, horiek onartzea Herri Kontuen Euskal Epaitegiaren Osoko Bilkurari baitagokio, 1/1988 Legearen 21.4 artikuluak berresten duen moduan.

Herri Kontuen Euskal Epaitegiaren 1/1988 Legeak aitortzen dizkion eskumenez eta ahalmenez baliatuz, Epaitegiaren Osoko Bilkurak erregelamendu hau onartu du. Erregelamendu horrek zioen azalpena eta bi atal ditu, eta, bertan, Epaitegiaren antolamendua eta funtzionamendua ez ezik, erakundearen ekonomia- ondare- eta langile-araubideak garatzen dira.

Lehenengo atalak, Herri Kontuen Euskal Epaitegiak antolatzeko duen ahala erabiliz, bere egitura propioa eratzen du, Herri Kontuen Euskal Epaitegiaren 1/1988 Legeak ezarritako mugen barruan. Lege horrek Herri Kontuen Euskal Epaitegiko organoak sortzen ditu, eta Osoko Bilkurari ahalmena ematen dio organo horien edukia eta eginkizunak garatzeko eta legean adierazitako organoen mendeko beste zerbitzu batzuk sortzeko.

Bigarren atalak Herri Kontuen Euskal Epaitegiaren ekonomia-, ondare- eta langile-araubidea garatzen du, eta behar bezala jasotzen ditu erakundearen beharrezko independentzia eta izaera berezia, Legebiltzarraren mendeko organoa delako eta Estatutuak garrantzia aitortzen diolako.

Erregelamendu horrek Epaitegia arautzen duen Legean ezarritako arau-edukia eta garapena osatu nahi ditu, onartutako fiskalizazio-prozedurei buruzko arau edo jarraibideekin edo Epaitegiko organoek onar ditzaketenekin batera, beren jardunean premia-, efikazia-, proportzionaltasun-, segurtasun juridiko-, gardentasun- eta efizientzia-printzipioen aplikazioa hobetzeko balio dezaten, Administrazio Publikoen Administrazio Prozedura Erkidearen urriaren 1eko 39/2015 Legearen 129. artikuluan ezarritakoaren arabera.

Herri Kontuen Euskal Epaitegiaren administrazioko zuzenbideari lotutako jarduerak arautzean, erregelamendu honek Euskal Sektore Publikoari buruzko maiatzaren 12ko 3/2022 Legean jasotako antolamendu- eta funtzionamendu-printzipioak hartu ditu kontuan, lege horren bigarren xedapen gehigarrian ezarritako baldintzetan.

I. TITULUA
ANTOLAKETA ETA FUNTZIONAMENDUA
I. KAPITULUA

1. artikulua.– Herri Kontuen Euskal Epaitegiko kideak.

1.– Herri Kontuen Euskal Epaitegia Eusko Legebiltzarraren Osoko Bilkurak hautatutako zazpi kidek osatzen dute, urriaren 28ko 6/2021 Legeak aldarazitako Herri Kontuen Euskal Epaitegiari buruzko 1/1988 Legearen 14. eta 15. artikuluetan xedatutakoaren arabera.

2.– Kideak hautatzen direnetik, haien agintaldia sei urtekoa izango da, Legeak aurreikusitako salbuespenezko kasuetan izan ezik. Epaitegiko kide izateari uzteko arrazoiak eta berriro hautatzeko araubidea eta mugak Herri Kontuen Euskal Epaitegiaren otsailaren 5eko 1/1988 Legearen -6/2021 Legeak aldarazitakoa- 16. eta 17. artikuluetan aurreikusitakoak dira.

3.– Herri Kontuen Euskal Epaitegiko kideek berezkoak dituzten inpartzialtasun- eta duintasun-printzipioen arabera beteko dituzte beren eginkizunak, eta kargu publiko izaera dute, Herri Kontuen Euskal Epaitegiari buruzko otsailaren 5eko 1/1988 Legearen 16. artikuluan xedatutakoaren arabera. Hori dela eta, Kargu publikoen jokabide kodea eta haien interes gatazkak arautzen dituen 1/2014 Legean jasotako betebeharren mende daude, lege horren 2 e) eta f) artikuluan xedatutakoaren arabera.

Kargu publikoen katalogoaren ondorioetarako, Eusko Legebiltzarraren espezialitate eta eskumenei erreparatu behar zaie, Epaitegia haren mendeko organoa baita, 156/2016 Dekretuak seigarren Xedapen gehigarriaren 3. puntuan ezartzen duenaren arabera.

II. KAPITULUA

2. artikulua.– Herri Kontuen Euskal Epaitegiko organoak.

1.– Herri Kontuen Euskal Epaitegia honako organo hauetan egituratzen da, otsailaren 5eko 1/1988 Legearen 18. artikuluak xedatutakoaren arabera:

a) Lehendakaritza.

b) Lehendakariordetza.

c) Osoko Bilkura.

d) Idazkaritza Nagusia.

2.– Aurreko epigrafean adierazitakoez gain, bere helburuak betetzeko, Epaitegiak organo laguntzaileak sortu ahal izango ditu, hala nola, aurreko epigrafean zerrendatutako organoren baten mendeko zerbitzuak, komisioak eta ponentziak, Herri Kontuen Euskal Epaitegiaren otsailaren 5eko 1/1988 Legearen 18. artikuluaren 2. puntuan ezarritakoaren arabera, titulu honetako III. kapituluan arautzen den bezala.

3.– Bestalde, Osoko Bilkurak, Epaitegiaren kide anitzeko organo den aldetik, batzordeak edo ponentziak sortu ahal izango ditu. Batzorde edo Ponentzia horiek kide anitzeko edo kide bakarreko funtzionamendua izango dute, eta horiek sortzeko erabakiak zehaztuko ditu haien iraupena, antolaketa eta eskumenak.

3. artikulua.– Herri Kontuen Euskal Epaitegiko Lehendakaritza.

1.– Herri Kontuen Euskal Epaitegiko Lehendakaritza okupatzen duen kidea Lehendakariak izendatuko du egintza formalean, dekretu bidez. Izendapena eraginkorra izango da karguaz jabetzen den egunetik aurrera eta Lehendakariaren Dekretua Euskal Herriko Agintaritzaren Aldizkarian argitaratu ondoren.

2.– Lehendakariaren Dekretu bidezko izendapena Herri Kontuen Euskal Epaitegiaren Osoko Bilkurak proposatuko du, eta Herri Kontuen Euskal Epaitegiko lehendakaritzarako kideen gehiengo osoz kideetako bat hautatuko du. Aukeratutako pertsonak jarduneko lehendakariaren zereginak hartuko ditu bere gain, Osoko Bilkurak lehendakariari proposamena egiten dion egunetik izendapena indarrean jarri arte.

3.– Lehendakariaren agintaldia hiru urtekoa izango da, nola eta ez duen kargua uzten Herri Kontuen Euskal Epaitegiaren otsailaren 5eko 1/1988 Legearen 19.4 artikuluan ezarritako arrazoiren baten ondorioz.

Nolanahi den ere, agintaldia amaitu delako kargua uzten badu, jarduneko karguan jarraituko du, harik eta Epaitegiaren Osoko Bilkurak batzordekide bat lehendakari izendatzeko hautatu eta proposatzen duen arte.

4.– Epaitegiaren Lehendakaritzak honako eskumen eta egiteko hauek izango ditu:

a) Idazkaritza Nagusia okupatuko duen pertsonaren izendapena proposatzea Osoko Bilkurari, onar dezan.

b) Herri Kontuen Euskal Epaitegiaren ordezkaritza judiziala eta judizioz kanpokoa, eta, ondorio horietarako, besteak beste, honako egiteko hauek gauzatuko ditu:

• Epaitegiak bere eginkizunak betetzean egiten dituen txosten guztiak sinatu.

• Eusko Legebiltzarraren Osoko Bilkurak hala eskatzen duenean, Legebiltzarraren aurrean agertu, igorritako txostenak argitzeko. Lehendakaritza okupatzen duen pertsona ager daiteke, beharrezkotzat joz gero, fiskalizazio-jarduketak zuzendu dituen kidearekin edo egokitzat jotzen duen Epaitegiko teknikariarekin batera.

• Fiskalizatuen aurrean agertu, Herri Kontuen Euskal Epaitegiaren Osoko Bilkurak beharrezkotzat jotzen badu.

c) Herri Kontuen Euskal Epaitegiaren zerbitzu tekniko eta administratiboak zuzentzea.

d) Epaitegiaren funtzionamendurako beharrezkoak diren obrak, ondasunak, zerbitzuak, hornidurak eta gainerako prestazioak kontratatzea eta hitzarmenak baimentzea, 1/1988 Legearen 25.2 artikuluan xedatutakoa aplikatuz.

e) Gastuak baimentzea eta xedatzea, bai eta Epaitegiari dagozkion ordainketak agindu eta diru-sarrerak formalizatzeko agiriak baimentzea ere.

f) Osoko Bilkurari lanpostuen zerrendak eta horien aldaketak proposatzea, bai eta enplegu publikoaren eskaintzak ere, onar ditzan.

g) Lanpostuak betetzeko hautaprobetarako deialdia egitea; oro har, Lehendakaritzaren eskumena da Herri Kontuen Euskal Epaitegiko lanpostuak aldi baterako eta behin betiko betetzea.

h) Funtzionarioak izendatu eta kentzea, eta nahitaezko erretiroak, borondatezko erretiroak eta ezintasunagatiko erretiroak deklaratzea.

i) Behin-behineko langileak izendatu eta kargutik kentzea, hala badagokio, Herri Kontuen Euskal Epaitegiko kideek proposatuta, lanpostuen zerrendan aurreikusitakoaren eta haien funtzioen izaeraren arabera.

j) Epaitegiko zerbitzura diharduten langileen gaineko diziplina-ahala erabiltzea.

k) Herri Kontuen Euskal Epaitegiaren Osoko Bilkurako buru izatea, kide anitzeko organoa baita, eta, ondorio horietarako, eginkizun hauek hartuko ditu bere gain, besteak beste:

• Osoko Bilkuraren ordezkari izatea.

• Bilkuretarako deialdiak egitea eta gai-zerrenda zehaztea, gainerako kideen eskaerak kontuan hartuta, baldin eta zazpi egun natural lehenago egin badira. Bilkuretako buru izatea, eztabaidak bideratzea eta eztabaida horiek bertan behera uztea, horretarako arrazoirik badago.

• Berdinketak bere botoarekin ebaztea, erabakiak hartu ahal izateko.

• Organoaren erabakien aktak eta ziurtagiriak ikus-onestea.

• Organoko lehendakari izateak berez dakartzan gainerako eginkizun guztiak betetzea.

• Epaitegiaren Osoko Bilkurak bere eskumenak baliatuz hartzen dituen erabakiak betearazteko beharrezkoa dena xedatzea.

l) Epaitegiko idazkari nagusiak emandako egintzen aurkako gora jotzeko administrazio-errekurtsoak ebaztea, Herri Kontuen Euskal Epaitegiaren otsailaren 5eko 1/1988 Legearen 27.2.a) artikuluan ezarritakoaren arabera.

m) Herri Kontuen Euskal Epaitegiaren otsailaren 5eko 1/1988 Legeak esleitzen dizkionak.

n) Epaitegiaren Osoko Bilkurak esleitzen dizkionak.

5.– Lehendakaritzaren eskumenak ebazpenen bidez gauzatzen dira, normalean Idazkaritza Nagusiak proposamena egin ondoren. Idazkaritza Nagusiari eskuordetu ahal izango dio eskumen hori, baldin eta Herri Kontuen Euskal Epaitegiaren ekonomia-, ondare- eta langile-erregimenarekin zerikusia duten gaiak badira.

6.– Emakumeen eta Gizonen Berdintasunerako Zerbitzua Lehendakaritzaren baitakoa da. Herri Kontuen Euskal Epaitegiaren esparruan emakumeen eta gizonen berdintasunerako politikak bultzatu, planifikatu, aholkatu eta ebaluatzea du eginkizun. Zerbitzu horrek HKEEren Emakumeen eta Gizonen Berdintasunerako Plana garatuko du eta beharrezkoak diren giza baliabideak, baliabide ekonomikoak eta materialak hornitzeko proposamena egingo du; proposamen hori Osoko Bilkurak onartu beharko du. Era berean, emakumeen eta gizonen berdintasunaren arloko prestakuntza-plana egin eta gauzatuko du.

4. artikulua.– Herri Kontuen Euskal Epaitegiko Lehendakariordetza.

1.– Herri Kontuen Euskal Epaitegiko Lehendakariordetza okupatzen duen kidea Lehendakariak izendatuko du egintza formalean, dekretu bidez. Izendapena eraginkorra izango da karguaz jabetzen den egunetik aurrera eta Lehendakariaren Dekretua Euskal Herriko Agintaritzaren Aldizkarian argitaratu ondoren.

2.– Lehendakariaren Dekretu bidezko izendapena Herri Kontuen Euskal Epaitegiaren Osoko Bilkurak proposatuko du, eta Herri Kontuen Euskal Epaitegiko Lehendakariordetzarako kideen gehiengo osoz kideetako bat hautatuko du. Aukeratutako pertsonak jarduneko lehendakariordearen zereginak hartuko ditu bere gain, Osoko Bilkurak lehendakariari proposamena egiten dion egunetik izendapena indarrean jarri arte.

3.– Lehendakariaren agintaldia hiru urtekoa izango da, nola eta ez duen kargua uzten Herri Kontuen Euskal Epaitegiaren otsailaren 5eko 1/1988 Legearen 19.4 artikuluan ezarritako arrazoiren baten ondorioz.

Nolanahi den ere, agintaldia amaitu delako kargua uzten badu, jarduneko karguan jarraituko du, harik eta Epaitegiaren Osoko Bilkurak batzordekide bat lehendakariorde izendatzeko hautatu eta proposatzen duen arte.

4.– Epaitegiaren Lehendakariordetzak honako eskumen eta egiteko hauek izango ditu:

a) Lehendakaritza okupatzen duen pertsona automatikoki ordezkatzea, kargua hutsik dagoenean, kanpoan denean edo kargutik kentzen denean, inolako adierazpenik egin beharrik gabe. Osoko Bilkurako lehendakariaren eginkizunetan ere ordezkatuko du.

b) Lehendakariari bere eginkizunetan laguntzea.

c) Herri Kontuen Euskal Epaitegiaren otsailaren 5eko 1/1988 Legeak esleitzen dizkionak.

d) Epaitegiaren Osoko Bilkurak esleitzen dizkionak.

e) Lehendakaritzaren eskumenekoak izanik, hark eskuordetzen dizkionak.

5. artikulua.– Osoko Bilkura.

1.– Herri Kontuen Euskal Epaitegiaren otsailaren 5eko 1/1988 Legearen 21. artikuluak ezartzen duenez, Herri Kontuen Euskal Epaitegiaren Osoko Bilkura kide anitzeko organoa da, eta kideek eta idazkari nagusiak osatzen dute; idazkari nagusiak Osoko Bilkuran hitza du baina ez du botorik.

2.– Herri Kontuen Euskal Epaitegiko lehendakaria izango da Epaitegiaren Osoko Bilkurako buru, eta Osoko Bilkurako idazkaria, berriz, Herri Kontuen Euskal Epaitegiko idazkari nagusia.

Berritzea egin ondoren, Epaitegiko kideek egiten duten lehenengo Osoko Bilkurako burua kiderik zaharrena izango da. Osoko Bilkura horretan, idazkari-lanak idazkari nagusiak beteko ditu, eta, idazkari nagusia oraindik izendatu ez bada, kide anitzeko organoa osatzen duen edozein kide. Izendapena gai-zerrendako lehen puntu gisa egingo da.

3.– Herri Kontuen Euskal Epaitegiaren Osoko Bilkurako kideek honako eskubide hauek dituzte:

• Deialdiak gutxienez 48 ordu lehenago jasotzekoa, bileren gai-zerrendarekin batera. Gai-zerrendako gaiei buruzko informazioa epe berean egongo da kideen eskura.

• Bilkuretako eztabaidetan parte hartzekoa.

• Botoa emateko eskubideaz baliatzekoa, boto partikularra ematekoa, eta botoaren esanahia eta arrazoiak adieraztekoa.

• Galde-eskeak egitekoa.

• Esleitutako eginkizunak betetzeko behar den informazioa lortzekoa.

• Kide anitzeko organoko kide izateari lotutako beste edozein eginkizun.

4.– Hona hemen Osoko Bilkurako kideen betebeharrak:

• Deitutako osoko bilkuretara edo batzordeetara joatea eta Osoko Bilkuran eztabaidatzeko gai-zerrendako gaiak prestatuta eramatea.

• Abstentzio- edo errekusazio-kausaren bat duten gaietan parte ez hartzea.

• Osoko Bilkuraren eztabaidak isilpean gordetzea.

• Osoko Bilkurak agintzen dizkion erantzukizunak gauzatzea eta lanak zuzentzea, erregelamendu honen 7.2 artikuluan xedatutakoaren arabera.

5.– Hona hemen Herri Kontuen Euskal Epaitegiaren Osoko Bilkuraren eskumenak:

a) Lehendakariari proposatuko zaizkion kideak hautatzea, lehendakaria eta lehendakariordea izenda ditzan. Epaimahaia berritu ondoren, kideek egiten duten lehenengo Osoko Bilkurak aukeratuko ditu Herri Kontuen Euskal Epaitegiko lehendakaria eta lehendakariordea, hurrengo hiru urteetarako.

b) Epaimahaiko idazkari nagusia izendatzea eta kargutik kentzea, lehendakariak proposatuta.

c) Epaitegiaren egiteko fiskalizatzailearen ondoriozko txostenak edo memoriak onartzea, hori onartzeko eskumena duen organo bakarra izanik.

d) Herri Kontuen Euskal Epaitegiko kideen artean lan-arloen eta txostenen banaketa onartzea, eta fiskalizazio-lanen kalitate-kontrolak haien artean banatzea. Gainera, Osoko Bilkurak arlo bakoitzari esleitutako langile kopurua onartuko du, Lehendakaritzak egindako proposamenarekin bat etorriz.

e) Urteko lan-programa onartzea, Herri Kontuen Euskal Epaitegiaren otsailaren 5eko 1/1988 Legearen 11. artikuluan ezarritakoaren arabera.

f) Fiskalizazio Prozeduren Eskuliburua eta fiskalizazio-prozesuak arautzen dituzten arauak onartzea.

g) Barne Erregimeneko Erregelamendua onartzea, Herri Kontuen Euskal Epaitegiaren otsailaren 5eko 1/1988 Legearen III. tituluko bigarren eta hirugarren kapituluak garatuz.

h) Herri Kontuen Euskal Epaitegiaren Emakumeen eta Gizonen Berdintasunerako Plana onartzea.

i) Lanpostuen zerrenda onartzea, aurrekontu-mugei dagokienez, bai eta Epaitegiaren lan-eskaintza publikoa ere, horren ondoriozko oinarri-arauekin.

j) Epaitegiaren atribuzio-gatazkak eta eskumen-arazoak ebaztea.

k) Kontuen Epaitegiarekin, Kanpo Kontroleko Organoekin edo beste edozein erakunde publiko edo pribaturekin fiskalizazio-arloan lankidetza-akordioak edo hitzarmenak egiteko baimena ematea.

l) Osoko Bilkurako kideen abstentzio- eta errekusazio-auziak ebaztea.

m) Datuen babesaren arloko Tratamendu Jardueren Erregistroa eta segurtasun-politika onartzea.

n) Lehendakariak edo lehendakariordeak emandako administrazio-egintzen aurka jarritako erregu-errekurtsoak ebaztea. Erregu-errekurtsoaren ebazpenak administrazio-bidea agortuko du, eta gora jotzeko errekurtso administratiboari aplikatu beharreko araudiaren arabera arautuko da, Herri Kontuen Euskal Epaitegiari buruzko otsailaren 5eko 1/1988 Legearen 27.b) artikuluan ezarritakoaren arabera.

Oro har, Osoko Bilkuraren eskumenak dira Herri Kontuen Euskal Epaitegiko beste organo batzuei esleitu ez zaizkien guztiak.

6.– Herri Kontuen Euskal Epaitegiaren Osoko Bilkurak ekonomiaren, langileen eta ondarearen araubideari buruz ematen dituen egintzek agortu egiten dute administrazioarekiko auzien jurisdikzioaren aurreko bidea.

7.– Osoko bilkurak deitzea, eratzea eta egitea.

Lehendakaritzari dagokio Osoko Bilkurarako deia egitea, bere ekimenez edo gutxienez bi kidek idatziz eskatzen duten guztietan. Eskabide horretan jasoko da Osoko Bilkuraren eskumenekoak izanik, aztertzeko proposatzen den gaien zerrenda. Kasu horretan, Osoko Bilkurarako deia egiteko gehieneko epea hamabost egunekoa izango da, eta deialdia egin eta hurrengo lau egunetan egin beharko da bilkura.

Lehendakariak ezarriko du bilkurako gai-zerrenda, eta Osoko Bilkurako kideen eskura jarriko du, eztabaidatzeko eta erabakiak hartzeko beharrezko dokumentazioarekin batera, bilkura egin baino berrogeita zortzi ordu lehenago gutxienez. Deialdia eta jakinarazpena Idazkaritza Nagusiak egingo ditu.

Edozein kidek eskatu ahal izango du Osoko Bilkuran aztertzeko gairen bat sartzeko; kasu horretan, deitzen den hurrengo bilkuraren gai-zerrendan agertuko da. Gai-zerrendan ageri diren gaiak baino ezin izango dira aztertu eta bozkatu.

Bilkurako gai-zerrendan aurreikusi gabeko gaiak sartu ahal izateko, honako baldintza formal hauek bete behar dira: Osoko Bilkurako kide guztiek egon behar dute bertan, eta gehiengoaren aldeko botoa behar da; gainera, presa arrazoitua deklaratu behar da, eta sartu nahi den gaia nahitaez Osoko Bilkuraren eskumenekoa izango da.

Herri Kontuen Euskal Epaitegiko kideak nahitaez joan behar dira arauz deitutako osoko bilkuretara, nola eta ez dagoen behar bezala justifikatutako arrazoirik.

Osoko Bilkura ezin izango da eratu, ezta jardun ere, lehendakaria eta idazkaria bertan ez badaude, edo horiek erregelamendu bidez ordezkatzen dituena, eta, nolanahi ere, kideen gehiengo osoa bertan ez badago. Hala ere, behar bezala eratuta geratu ahal izango da, kide guztiak bertan badaude eta aho batez hala erabakitzen dutenean. Kasu horretan, gai-zerrenda ekitaldi berean zehaztuko da, nahiz eta deialdiaren baldintzak bete ez.

Herri Kontuen Euskal Epaitegiaren zerbitzura diharduten langileei dei egin dakieke Osoko Bilkuretara joateko. Langile horiek gai jakin bati buruzko eztabaidetan parte hartuko dute, gaia aztertzeko bertaratzea eskatu bazaie, eta hitza izango dute, baina botorik ez.

Osoko Bilkuraren bilkurak aurrez aurre edo telematikoki egin ahal izango dira. Modu telematikoan egiten diren bileretan kideak toki desberdinetan egon ahal izango dira, baldin eta baliabide elektronikoen bidez bermatzen bada – halakotzat hartuko dira telefono bidezkoak eta ikus-entzunezkoak – haien identitatea, adierazpenen edukia, horiek gertatzen diren unea eta aldiberekotasuna, bai eta haien arteko elkarreragina eta interkomunikazioa denbora errealean eta bileran zehar bitartekoak eskuragarri izatea ere. Osoko Bilkurako idazkariari dagokio, behar den laguntza teknologikoarekin, baldintzak eta erabilitako baliabideak egokiak direla bermatzea eta egiaztatzea.

8.– Erabakiak hartzea.

Osoko Bilkuraren erabakiak bertaratutako kideen gehiengoz hartuko dira, eta, nolanahi ere, gutxienez bi kideren aldeko botoarekin, legeek gehiengo handiagoa eskatzen dutenean izan ezik. Berdinketarik egonez gero, Osoko Bilkurako lehendakariaren edo haren ordezkoaren kalitatezko botoak ebatziko du.

Erabakiak ohiko bozketaren bidez hartuko dira, nola eta bertaratutakoren batek, arrazoiak emanez, gai jakin baterako isilpeko bozketa egitea eskatzen ez duen eta Osoko Bilkurak hala erabakitzen duen. Osoko Bilkurako kide bakoitzaren botoa aldekoa, aurkakoa edo abstenitzekoa izan daiteke.

Gai edo txosten batean gehiengoaren erabakiaren aurka bozkatu duen Osoko Bilkurako kideak Osoko Bilkurak hartutako erabakiarekin edo haren oinarriekin ados ez dagoela adierazi ahal izango du boto partikular baten bidez, desadostasunak adieraziz. Boto partikularra disidentea izango da Osoko Bilkurak hartutako azken erabakiarekin bat ez badator, edo konkurritzailea izan daiteke gehiengoaren argudioarekin bat ez badator, baina bai hartutako azken erabakiarekin.

Bozketa fiskalizazio-txosten baten onarpenari buruzkoa denean, boto partikularra txostenaren edukiari erantsiko zaio.

Boto partikular bat emateko asmoa edo Osoko Bilkurako beste kide baten botoarekiko atxikimendua akordioa hartzen den unean adierazi behar da, eta Osoko Bilkurako idazkariak horren berri eman beharko du bilkuraren aktan. Halaber, boto partikularra idatziz formalizatuko da bost egun balioduneko epean, eta Herri Kontuen Euskal Epaitegiko Idazkaritza Nagusian aurkeztu behar da idazki bidez.

9.– Aktak.

Osoko Bilkurak egiten duen bilkura bakoitzaren akta egingo du idazkariak. Akta horretan, nahitaez, honako hauek zehaztuko dira: bertaratutakoak, bileraren gai-zerrenda, bilera non eta noiz egin den, eztabaiden puntu nagusiak, bozketak eta hartutako erabakien edukia.

Kide anitzeko organoak egindako bilkura guztiak grabatu ahalko dira. Bilkuretako aktarekin batera, grabaziotik ateratako fitxategia eta idazkariak emandako ziurtagiria aurkeztu ahal izango dira, grabazioaren benetakotasunari eta osotasunari buruzkoa, bai eta bilkurako dokumentu gisa euskarri elektronikoan erabiltzen diren dokumentu guztiena ere.

Osoko Bilkurara bertaratutako kideek bileran egindako adierazpen jakin batzuk aktan jasotzeko nahia adierazi ahal izango dute bilkuran. Horretarako, hiru egun naturaleko epea izango dute, bilkura egin eta hurrengo egunetik zenbatzen hasita, Idazkaritza Nagusian adierazpen horien edukia idatziz aurkezteko. Adierazpen horiek bat etorri beharko dute bileran adierazitakoarekin.

Osoko Bilkurako idazkariak lehendakariaren oniritziarekin sinatutako aktak Osoko Bilkurak onartuko ditu, egiten diren bilkuran bertan edo hurrengoan. Idazkariak bitarteko elektronikoen bidez bidaliko die akta Osoko Bilkurako kideei, eta horiek, bide berberak erabiliz, testuarekiko adostasuna edo eragozpenak adierazi ahal izango dituzte, onar daitezen.

Akta onartzea eragotzi gabe, idazkariak hartutako erabakiak ziurtatu ahal izango ditu akta onartu aurretik, eta ziurtagirian berariaz jaso beharko du inguruabar hori.

Egindako bilkurak grabatzea edo euskarri elektronikoko dokumentuak erabiltzearen aldeko hautua egiten bada, fitxategi elektronikoen osotasuna eta benetakotasuna bermatzeko moduan gorde beharko dira, bai eta kide anitzeko organoko kideek fitxategi horietarako sarbidea izateko moduan ere.

6. artikulua.– Idazkaritza Nagusia.

1.– Herri Kontuen Euskal Epaitegiko idazkari nagusia izendatzea eta kargutik kentzea, Lehendakaritzaren proposamenez, Osoko Bilkurak erabakiko du eta Euskal Herriko Agintaritzaren Aldizkarian argitaratzeko aginduko du; une horretatik aurrera izango dute indarra.

Idazkari nagusiaren kargurako beste izendapen bat egin arte iraungo du izendapenak.

2.– Herri Kontuen Euskal Epaitegiko idazkari nagusiaren kargua kargu publikoa da, Herri Kontuen Euskal Epaitegiaren otsailaren 5eko 1/1988 Legearen 16. artikuluan xedatutakoaren arabera, eta kargu publikodunen jokabide-kodea eta haien interes-gatazkak arautzen dituen 1/2014 Legean jasotako betebeharren mende dago, Lege horren 2.e) eta f) artikuluan xedatutakoaren arabera.

Kargu publikoen katalogoaren ondorioetarako, Eusko Legebiltzarraren espezialitate eta eskumenei erreparatu behar zaie, 156/2016 Dekretuak seigarren xedapen gehigarriaren 3. puntuan ezartzen duenaren arabera.

3.– Idazkari edo Idazkaritza Nagusiko kargua betetzen duenari dagozkio, Lehendakaritzaren zuzendaritzapean, honako eskumen eta eginkizun hauek:

a) Herri Kontuen Euskal Epaitegiaren zerbitzu teknikoak eta administratiboak kudeatzea eta honako arlo hauetan aplikatzekoa den araudia betetzen dela zaintzea: administrazio-kontratazioa, gardentasuna, datuen babesa, administrazio elektronikoa eta Epaitegiaren zerbitzuen funtzionamendu egokiari eragiten dioten beste gai batzuk.

b) Herri Kontuen Euskal Epaitegiko organoei eta kideei laguntza juridikoa, teknikoa eta administratiboa ematea.

c) Sinadura bidez Epaitegiak emandako ziurtagiriak baimentzea, erabakien eta ebazpenen fede publikoaren gordailuzain gisa.

d). Osoko Bilkuraren erabakiak eta lehendakariaren ebazpenak betearazteko behar diren jarduerak egitea.

e) 1/1988 Legearen 13.3 artikuluan aipatzen den urteko memoria-proiektua egitea, ondoren Osoko Bilkurak onar dezan.

f) Herri Kontuen Euskal Epaitegiaren gai orokorrak eta gobernu-gaiak zuzentzea eta kudeatzea, eta, zehazkiago, artxiboak kontratatzea, erregistratzea eta zaintzea.

g) Kontuak emateko erregistroak kudeatzea.

h) Sistema informatikoak eta teknologikoak zuzentzea, planifikatzea eta ezartzea.

i) Bulegoak eta instalazioak zaintzea eta mantentzea.

j) Herri Kontuen Euskal Epaitegiko giza baliabideen plangintza. Eta Osoko Bilkurak eta Lehendakaritzak onartutako planen aplikazioa gainbegiratzea.

k) Giza baliabideak kudeatzea, Osoko Bilkurak edo lehendakariak horri buruz hartzen dituen erabakiak gauzatzeko beharrezkoak diren jarduerak gauzatuz.

l) Langileen prestakuntza kudeatzea, Epaitegiko Prestakuntza Batzordearen laguntzarekin.

m) Herri Kontuen Euskal Epaitegiko langileen burutza.

n) Epaitegiaren aurrekontuaren aurreproiektua egitea, Osoko Bilkurak onar dezan, bai eta likidazioa eta kontuen aitorpena ere, Legebiltzarrera bidaltzeko.

o) Oro har, Herri Kontuen Euskal Epaitegiaren ekonomiaren eta aurrekontuaren kudeaketa, haren kontabilitatea bere ardurapean duela.

p) Herri Kontuen Euskal Epaitegiaren jarduera ekonomikoaren kontu-hartzailetzako eta barne-kontroleko eginkizunak betetzea; Epaitegiaren zerbitzuko langileen artean eskuordetu ahal izango ditu eginkizun horiek.

q) Idazkari nagusiari dagokio, halaber, Epaitegiaren Osoko Bilkurako idazkari-lanak egitea; zehazki:

• Lehendakaritzari eta Herri Kontuen Euskal Epaitegiko kideei aholkularitza ematea.

• Osoko bilkuretako gai-zerrenda prestatzea eta bideratzea, lehendakariaren jarraibideen arabera.

• Osoko bilkuretara joatea, hitzarekin baina botorik gabe.

• Kide anitzeko organoaren jarduketen legezkotasun formala eta materiala zaintzea, eta eratzeko eta erabakiak hartzeko prozedurak eta arauak errespetatzen direla bermatzea.

• Osoko Bilkura bakoitzeko aktak idaztea, honako hauek adieraziaz: bertaratutakoak, bileraren tokia, eguna eta ordua, eztabaidatutako gaiak eta hartutako erabakiak bozketa moldea zehaztuaz eta bozketen emaitza.

• Sinadurarekin, Osoko Bilkuraren erabakien ziurtagiriak jaulkitzea eta baimentzea, lehendakariaren oniritziarekin eta, hala badagokio, eztabaiden sekretua gordeta.

Eta, oro har, Herri Kontuen Euskal Epaitegiaren Idazkaritza Nagusiaren eskumeneko izango dira Osoko Bilkurak esleitzen dizkionak eta Lehendakaritzak eskuordetzen dizkionak, betiere Herri Kontuen Euskal Epaitegiaren otsailaren 5eko 1/1988 Legearen III. tituluko hirugarren kapituluan aipatzen diren gaiak badira.

4.– Idazkaritza Nagusia okupatzen duen pertsonaren postua hutsik badago, edo pertsona hori kanpoan, lizentziarekin edo gaixorik badago, Herri Kontuen Euskal Epaitegiaren Osoko Bilkurak, lehendakariaren proposamenez, horretarako ezarritako baldintzak betetzen dituen funtzionario bat izendatuko du eginkizun horiek betetzeko.

III. KAPITULUA

7. artikulua.– Lan arloak eta ponentziak.

1.– Epaitegiak fiskalizazioaren arloan esleituta dituen eginkizunak betetzeko eskumena Osoko Bilkurak du, eta berak banatuko ditu erantzukizunak kideen artean, lana arloka edo txostenka bereiziz. Banaketa horrek ez du aldatzen Herri Kontuen Euskal Epaitegiaren Osoko Bilkurak fiskalizazioaren alorrean duen eskumena.

2.– Kide txostengile bakoitzaren erantzukizunak Epaitegiaren Osoko Bilkurak Urteko Lan Programa onartzearekin batera zehaztuko dira; bertan, kide bakoitzak txostengile gisa egingo dituen txostenak, kalitate-kontrolak eta bestelako lanak adierazi beharko dira.

8. artikulua.– Batzordeak.

1.– Herri Kontuen Euskal Epaitegian organo laguntzaile gisa izaera iraunkorra duten batzordeak honako hauek dira: Auditoretza Batzorde Teknikoa (aurrerantzean, ABT), Emakumeen eta Gizonen Berdintasunerako Batzordea, Prestakuntza Batzordea, Euskara Batzordea, Informazioaren Segurtasunerako Batzordea, Agiriak Garbitzeko Batzordea eta Segurtasun eta Osasun Batzordea.

2.– Herri Kontuen Euskal Epaitegiaren Osoko Bilkurak, beharrezkotzat jotzen duenean, aurrekoez bestelako zerbitzu eta eginkizunak sortu ahal izango ditu. Batzorde horiek sortzeko akordioan zehaztu beharko dira helburua, langileak eta baliabideak, eta zerbitzua edo eginkizuna mugagabea edo aldi baterakoa den.

3.– Oro har, batzorde, ponentzia eta beste zerbitzu batzuen osaera, bai eta kontratazio-mahaien eta langileak hautatzeko epaimahaiena ere, gizonen eta emakumeen ordezkaritza orekatuaren printzipioari egokitu behar zaizkio, Emakumeen eta Gizonen Berdintasunerako otsailaren 18ko 4/2005 Legean ezarritakoaren arabera.

9. artikulua.– Auditoretzako Batzorde Teknikoa.

1.– Auditoretzako Batzorde Teknikoa (ABT) kide anitzeko organo laguntzaile bat da, izaera teknikoa eta aholku-emailea duena. Honako hauek osatzen dute: Epaitegiko Lehendakaritzak lan-arlo bakoitzeko kide arduradunaren proposamenez izendatutako auditoretzako aholkulari-postuak betetzen dituzten pertsonek, Epaitegiko lehendakariak – kide anitzeko organoaren presidentetza-eginkizunak ere beteko ditu – eta idazkari nagusiak – kide anitzeko organoaren idazkaritza-eginkizunak beteko ditu –.

2.– Auditoretzako Batzorde Teknikoaren eginkizunak Herri Kontuen Euskal Epaitegiaren Fiskalizazio Prozeduren Eskuliburuan ezarritakoak dira, eta, bereziki, honako hauek ziurtatzea: fiskalizazio-prozedura teknikoak mamitu eta normalizatzea, txostenen kalitate-kontrola, fiskalizazio-jarduketen homogeneotasuna, eta horiei guztiei aplika dakizkiekeen irizpide eta arau komunak hartzen, prozeduren eta emaitzen kalitatea ebaluatzen eta hobetzen laguntzea, bai eta Osoko Bilkurak esleitzen dizkion gainerakoak ere.

10. artikulua.– Beste Batzorde iraunkor batzuk.

1.– Emakumeen eta Gizonen Berdintasunerako Batzordea honako hauek osatuko dute: Lehendakaritza saileko pertsona batek, Batzordeko idazkari gisa jardungo duen beste batek, eta gutxienez hiru bokalek, Herri Kontuen Euskal Epaitegiko langileen artetik Idazkaritza Nagusiko titular denak proposatuko dituenak. Batzorde horren eginkizuna izango da Epaitegiko Osoko Bilkurak onartutako Berdintasun planaren betetze-mailaren jarraipena egitea. Urtero, planaren garapenari buruzko ebaluazio-txostena aurkeztuko dio Osoko bilkurari, Berdintasun planean jasotako helburuak eta neurriak nola gauzatu eta lortu diren adieraziaz.

2.– Prestakuntza Batzordea kontsulta-organo paritarioa da, idazkari nagusiak eta gutxienez hiru kidek osatua, horietako bat Idazkaritza Nagusiko titular denak proposatua, eta bi Epaitegiko langileen ordezkariek proposatutakoak. Epaitegiko langileen prestakuntza kudeatzea eta Idazkaritza Nagusiari arlo horretan laguntzea ditu eginkizun.

3.– Euskara Batzordea organo aholku-emaile paritarioa da, idazkari nagusiak eta gutxienez hiru kidek osatua, bat Idazkaritza Nagusiko titular denak proposatua, eta bi Epaitegiko langileen ordezkariek proposatutakoak. Herri Kontuen Euskal Epaitegiaren eremuan euskararen erabilera sustatzea du eginkizun.

4.– Epaitegiko Informazioaren Segurtasun Batzordeari dagokio Segurtasun Eskema Nazionala arautzen duen urtarrilaren 8ko 3/2010 Errege Dekretuan aurreikusitako eginkizunak garatzea. Herri Kontuen Euskal Epaitegiaren Informazioaren Segurtasun Politikan aurreikusitako kideek osatzen dute.

5.– Agiriak Garbitzeko Batzordea organo aholku-emailea da. Idazkari nagusiak eta Herri Kontuen Euskal Epaitegiko langileen artetik Idazkaritza Nagusiko titular denak proposatutako hiru kidek osatzen dute, gutxienez. Honako eginkizun hauek ditu: dokumentazioa ebaluatzeko eta aukeratzeko irizpide orokorrak ezartzea, horiek garbitzeko; irizpide horiek Osoko Bilkurari edo, hala badagokio, lehendakariari proposatzea, onar ditzan; eta irizpide horiek behar bezala aplikatzen direla kontrolatzea.

6.– Segurtasun eta Osasun Batzordea kide anitzeko organo paritarioa da, Epaitegian lan-arriskuen prebentzioaren arloan egiten diren jarduerei buruzko kontsulta erregularra eta aldizkakoa egiteko. Idazkari nagusiak eta gutxienez hiru kidek osatzen dute. Horietako bi langileen ordezkariek proposatuko dituzte, prebentzio-ordezkari eta batzordeko kide gisa eta 3.a Idazkaritza Nagusiko titular den pertsonak proposatuko du.

7.– Prestakuntza Batzordean, Euskara Batzordean eta Garbiketa Batzordean batzordeburua Epaitegiko Idazkaritza Nagusia betetzen duen pertsona edo hark izendatzen duena izango da, eta Batzordeko idazkariaren funtzioak beteko ditu egiten den lehenengo bileran hautatutako batzordekideetako batek. Batzordeetako kide guztiak, proposatu ondoren, Lehendakaritzaren Ebazpen bidez izendatuko dira.

Batzordeek telematikoki egiten dituzten bileretan – halakotzat joko dira, halaber, telefono bidezkoak eta ikus-entzunezkoak –, parte-hartzaileak hainbat tokitan egon ahal izango dira, baldin eta bermatzen bada, bitarteko elektronikoen bidez, parte-hartzaileen nortasuna, haien adierazpenen edukia, adierazpen horiek egiten diren unea eta aldiberekotasuna, bai eta haien arteko elkarreragina eta interkomunikazioa denbora errealean eta bileran zehar duten baliabideen eskuragarritasuna ere. Idazkaritza Nagusiari dagokio, behar den laguntza teknologikoarekin, baldintzak eta erabilitako baliabideak egokiak direla bermatzea eta egiaztatzea.

II. TITULUA
EKONOMIA, ONDARE ETA PERTSONALEKO ARAUBIDEA
I. KAPITULUA

11. artikulua.– Araubide ekonomikoa.

1.– Herri Kontuen Euskal Epaitegiak aurrekontua mamitu eta onartzen du. Idazkaritza Nagusiari dagokio aurrekontuaren aurreproiektua idaztea eta Osoko Bilkurara bidaltzea, onar dezan. Aurreproiektuarekin batera, azalpen-memoria bat, langileen plantilla eta uneko ekitaldiko aurrekontuaren likidazioaren aurrerapen bat aurkeztuko dira. Osoko Bilkurak onartu ondoren, Euskal Autonomia Erkidegoko Administrazio Orokorrari bidaliko zaio, Aurrekontu Orokorretan atal independente gisa sar dezan eta, ondoren, gerora Eusko Legebiltzarrak onar dezan.

2.– Herri Kontuen Euskal Epaitegiaren aurrekontuak genero-ikuspegia txertatuko du, bereziki diseinu-fasean.

3.– Herri Kontuen Euskal Epaitegiko organoei dagokie aurrekontu hori gauzatzea, Eusko Legebiltzarrak onartu ondoren.

4.– Epaitegiko lehendakariari dagokio gastuak eta ordainketak agintzea, onartutako aurrekontuko kredituen arabera. Lehendakaritzak Idazkaritza Nagusiari eskuordetu ahal izango dio gastuak baimentzeko ahalmena, betiere hark zehazten duen zenbatekoan.

5.– Epaitegiko aurrekontuaren aldaketak baimentzea Osoko Bilkuraren eskumena izango da, programa berekoak diren kapitulu bereko kredituen arteko transferentziak izan ezik, horiek Epaitegiko Lehendakaritzari baitagozkio.

6.– Idazkaritza Nagusiak aurrekontuaren gauzatze-egoeraren berri emango du hiru hilean behin.

7.– Herri Kontuen Euskal Epaitegia Euskal Autonomia Erkidegoko Administrazioari dagokion kontabilitate publikoaren araubidearen mende dago, Eusko Legebiltzarraren baitako estatutu-organo bat izateak berekin duen berezitasunarekin.

8.– Osoko Bilkurari dagokio, Idazkaritza Nagusiak proposatuta, Herri Kontuen Euskal Epaitegiaren aurrekontuaren likidazioa eta dagozkion urteko kontuak onartzea. Horiek Legebiltzarrera urtero bidali behar den Memoriaren parte izango dira.

II. KAPITULUA

12. artikulua.– Ondare- eta kontratazio-araubidea.

1.– Herri Kontuen Euskal Epaitegiak bere eskumenak eta ahalmenak erabiliko ditu atxikita dituen, atxikitzen zaizkion edo edozein tituluren bidez eskuratzen dituen ondasun edo eskubideen gainean. Herri Kontuen Euskal Epaitegiaren ondarearen titulartasuna Euskal Autonomia Erkidegoko Administrazioari dagokio.

2.– Herri Kontuen Euskal Epaitegian kontratatzeko eskumena bere organo propioek gauzatzen dute, Sektore Publikoko Kontratuen azaroaren 8ko 9/2017 Legeak ezarritako kontratazio publikoaren araubidearen esparru orokorrarekin bat etorriz, zehazki haren berrogeita laugarren xedapen gehigarriarekin.

3.– 1/1988 Legearen 25.2 artikuluak Herri Kontuen Euskal Epaitegia gaitzen du, kontratazioari eta ondare-araubideari dagokienez, Euskal Autonomia Erkidegoko zeinahi organori edo haren mendeko bitarteko propioari beharrezko laguntza teknikoa eskatu ahal izateko.

4.– Kontratazio-arloko errekurtso bereziari dagokionez, Sektore Publikoko Kontratuei buruzko azaroaren 8ko 9/2017 Legearen 44. artikuluan aurreikusitako kasuetan, Herri Kontuen Euskal Epaitegiaren Osoko Bilkurak atxikipena eskatu ahal izango dio Eusko Legebiltzarreko Kontratuen inguruko Errekurtsoen Administrazio Auzitegiari, zeinak, hala badagokio, horien berri izango baitu, Eusko Legebiltzarraren kontratazio-arauek laugarren xedapen gehigarrian aurreikusitakoaren arabera (arau horiek Legebiltzarreko Mahaiak onartu zituen 2022ko apirilaren 26an).

III. KAPITULUA

13. artikulua.– Herri Kontuen Euskal Epaitegiko langileak.

1.– 1/1988 Legeak Herri Kontuen Euskal Epaitegiari esleitzen dizkion eginkizunak betetzeko, Osoko Bilkurak, ekitaldi bakoitzeko aurrekontuarekin batera, aurrekontu-plantilla osatzen duten plazen zerrenda onartuko du.

2.– Herri Kontuen Euskal Epaitegiko Lanpostuen Zerrenda Epaitegiaren barne-egitura arrazionalizatu eta antolatzen duen tresna da, eta langile-beharrak zehazten ditu, lanpostuak betetzeko eskatzen diren baldintzak definituz eta horietako bakoitza sailkatuz. Aurrekontuetan diruz hornituta dauden guztiak barne hartu beharko ditu, funtzionarioentzat eta behin-behineko langileentzat gordetakoak bereiziz.

Lanpostuen zerrendak eta horien aldaketak Herri Kontuen Euskal Epaitegiaren Osoko Bilkurak onartuko ditu, aurrez lehendakariak proposatuta eta haren aginduz, eta Euskal Herriko Agintaritzaren Aldizkarian argitaratuko dira.

3.– Indarreko legeriaren arabera, dauden langileekin bete ezin diren giza baliabideen beharrizanak, aurrekontuan diru-izendapena dutenak, enplegu publiko bidez eskainiko dira. Eskaintza hori Herri Kontuen Euskal Epaitegiaren Osoko Bilkurak onartuko du, eta Euskal Herriko Agintaritzaren Aldizkarian argitaratuko da, Lehendakaritzaren aginduz.

14. artikulua.– Langileen araubide juridikoa.

Herri Kontuen Euskal Epaitegiko langileen araubide juridikoa euskal funtzio publikoaren legeria orokorrean ezarritakoa da, dagozkion berezitasunekin; izan ere, Herri Kontuen Euskal Epaitegia Eusko Legebiltzarrari funtzionalki lotutako organoa da, Herri Kontuen Euskal Epaitegiaren otsailaren 5eko 1/1988 Legeak berariaz ezartzen duen bezala.

XEDAPEN GEHIGARRIA

Herri Kontuen Euskal Epaitegiak, bere organoen bidez, erregelamendu hau garatzeko, aplikatzeko eta betearazteko beharrezkoak diren barne-arauak onartu ahal izango ditu, bai eta egoki diren zirkularrak eta jarraibideak ere.

XEDAPEN INDARGABETZAILEA

Indargabetuta geldituko dira Erregelamendu honetan xedatutakoari aurka jartzen zaizkion erabaki haiek.

AZKEN XEDAPENA

Indarrean sartzea.

Erabaki hau Euskal Herriko Agintaritzaren Aldizkarian argitaratu eta hurrengo egunean jarriko da indarrean.


Azterketa dokumentala