Euskal Herriko Agintaritzaren Aldizkaria

190. zk., 2021eko irailaren 22a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

AGINTARIAK ETA LANGILERIA

Oposaketak eta lehiaketak

LAN HARREMANEN KONTSEILUA

4838

EBAZPENA, 2021eko irailaren 9koa, Lan Harremanen Kontseiluko presidentearena, zeinaren bidez argitara ematen baita Lan Harremanen Kontseiluko lanpostu huts bat –Ikerketa sozioekonomikoen arduradunena– izendapen askeko sistemaz betetzeko deialdia.

Euskal Funtzio Publikoari buruzko uztailaren 6ko 6/1989 Legearen 46. artikuluak eta hurrengoek xedatutakoarekin bat etorriz, eta Lan Harremanen Kontseiluaren zerbitzupeko langileak antolatzeko maiatzaren 8ko 2/1992 Legearen 3. artikuluak esleitzen dizkion eskumenak baliatuz, Kontseiluko presidenteak zera erabaki du: lanpostu huts bat, eranskinean zehazten dena, izendapen askeko sistemaz betetzeko deialdia egitea, ondoko oinarriekin bat etorriz

OINARRIAK

Lehenengoa.– Euskal Administrazio Publikoetako edo Estatuko Administrazio Zibileko karrerako funtzionarioek eskatu ahal izango dute deitutako lanpostua, baldin eta Euskal Funtzio Publikoari buruzko uztailaren 6ko 8/1989 Legearen 48.1 artikuluan deskribatutako egoera administratiboren batean badaude. A taldekoak izan beharko dute eta eranskinean adierazten diren gainerako baldintzak bete beharko dituzte.

Bigarrena.– Interesdunek Lan Harremanen Kontseiluko Idazkaritza Nagusira igorri beharko dituzte eskabideak (Urkixo zumarkalea 2, 3. solairua, 48008 Bilbao), edo, osterantzean, posta elektronikoz bideratu, crl-lhk@crlv.net posta-helbidera, ebazpen hau Euskal Herriko Agintaritzaren Aldizkarian argitaratu eta hurrengo egunetik harako hamabost egun balioduneko epean.

Hirugarrena.– Eskabide-idazkian datu pertsonalak eta interesdunen egungo destinoa jaso beharko dira, eta, horrez gain, curriculum vitaea erantsi beharko da, zeinetan honako hauek jaso beharko baitira:

a) Titulu akademikoak.

b) Betetako lanpostuak, bai administrazio publikoetan, bai enpresa pribatuan.

c) Egindako ikasketak eta kurtsoak, argitalpenak, hizkuntzak eta egoki irizten zaion beste edozein merezimendu.

Eskatutako baldintzak eta adierazitako merezimenduak ziurtatzeko agiriak aurkeztu beharko dira eskabidearekin batera.

Laugarrena.– Lan Harremanen Kontseiluko presidentearen ebazpen baten bidez ebatziko da deialdi hau; Euskal Herriko Agintaritzaren Aldizkarian argitaratuko da ebazpen hori, hain zuzen ere eskabideak aurkezteko epea bukatu eta hurrengo egunetik hasita hilabeteko epearen barruan.

Lanpostua lortzen duen pertsonak ezarritako epearen barruan hartu beharko du jabetzan lanpostua, eta, hala badagokio, aurreko lanpostuaren titulartasuna galduko du.

Bilbao, 2021eko irailaren 9a.

Lan Harremanen Kontseiluko presidentea,

TOMÁS ARRIETA HERAS.

ERANSKINA

– Lanpostuaren izena: Ikerketa sozioekonomikoen arduraduna.

– Kodea: 510101.

– Dotazioa: 1.

– Kidegoa: A.

– Destinoko udalerria: Bilbao.

– Destino-osagarria: 27.

– Hizkuntza-eskakizuna: 4.a

– Derrigortasun-data: D/G.

– Beharrezkoa da ekonomiari buruzko ezagutza zabala eta gutxienez 4 urteko esperientzia izatea.

Azterketa dokumentala