Euskal Herriko Agintaritzaren Aldizkaria

33. zk., 2021eko otsailaren 15a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIAREN GARAPEN, JASANGARRITASUN ETA INGURUMEN SAILA

839

AGINDUA, 2021eko otsailaren 5ekoa, Ekonomiaren Garapen, Jasangarritasun eta Ingurumeneko sailburuarena, zeinaren bidez ingurumenaren arloan eskumena duen sailburuordeari eskuordetzen baitzaizkio ingurumenaren arloko zenbait eskumen.

Euskal Autonomia Erkidegoko Ingurumena Babesteko otsailaren 27ko 3/1998 Lege Orokorraren 115. artikuluak ezartzen duenez, sailburu eskudunari dagokio arau-hauste larri eta arinetarako zehapenak ezartzea, erakunde komunen eskumeneko gaiak direnean.

Bestalde, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legearen 62. artikuluak ezartzen du ingurumen-arloko sail eskuduneko titularrari dagokiola arau-hauste larrien kasuan zehapen-prozedura ebaztea.

Gainera, Uraren ekainaren 23ko 1/2006 Legearen 6. artikuluaren 4. apartatuak ezartzen duenez, Uraren Euskal Agentziaren ebazpenen aurka, gora jotzeko errekurtsoa aurkeztu ahal izango zaio ingurumenaren arloan eskumena duen sailaren titularrari.

Sektore Publikoko Araubide Juridikoari buruzko urriaren 1eko 40/2015 Legearen 9. artikuluak hauxe ezartzen du bere 1. apartatuan: «Administrazio publikoetako organoek beste organo batzuei delegatu diezazkiekete beren eskumenak, baldin eta organo horiek administrazio berekoak badira, nahiz eta hierarkikoki bata bestearen mendekoa ez izan...».

Hori horrela, eta kontuan izanik egitura berria sortu dela Euskal Autonomia Erkidegoaren Administrazioko sailak sortu, ezabatu eta aldatzen dituen eta horien egitekoak eta jardun-arloak finkatzen dituen lehendakariaren irailaren 6ko 18/2020 Dekretuaren ondorioz, eta bertan adierazitako eskumenak ere kontuan izanik,

EBAZTEN DUT:

Lehenengoa.– Ingurumenaren arloan eskumena duen sailburuordearen esku uztea honako eskumen hauek:

a) Euskal Autonomia Erkidegoko Ingurumena Babesteko otsailaren 27ko 3/1998 Lege Orokorrean aurreikusitako arau-hauste larri eta arinetarako zehapenak ezartzea.

b) Lurzorua kutsatzea saihestu eta kutsatutakoa garbitzeko ekainaren 25eko 4/2015 Legean aurreikusitako arau-hauste larriak ezartzea.

c) Uraren Euskal Agentziaren zuzendari nagusiaren ebazpenen aurkako gora jotzeko errekurtsoak ebaztea.

Bigarrena.– Eskuordetza honen bidez emandako ebazpen guztietan, berariaz aipatuko da horrela eman direla, eta organo eskuordetzaileak emandakotzat joko dira.

Hirugarrena.– Ekonomiaren Garapen, Jasangarritasun eta Ingurumeneko Sailaren titularrak edozein unetan baliogabetu ahal izango du agindu honetan aipatzen diren eskumenen eskuordetza. Baliogabetzeak Euskal Herriko Agintaritzaren Aldizkarian argitaratzen den egunetik aurrera izango ditu ondorioak.

Laugarrena.– Ekonomiaren Garapen, Jasangarritasun eta Ingurumeneko Sailaren titularrak bereganatu egin ditzake agindu honek aipatzen duen eskuordetzan jasotako edozein gairen ardura eta ebazpena, hartara eragotzi gabe eskuordetzak iraun ahal izatea, espresuki aldatzen edo baliogabetzen ez den bitartean.

Bosgarrena.– Agindu honek Euskal Herriko Agintaritzaren Aldizkarian argitaratzen den egunetik aurrera izango ditu ondorioak.

Vitoria-Gasteiz, 2021eko otsailaren 5a.

Ekonomiaren Garapen, Jasangarritasun eta Ingurumeneko sailburua,

MARÍA ARANZAZU TAPIA OTAEGUI.

Azterketa dokumentala