Euskal Herriko Agintaritzaren Aldizkaria

33. zk., 2021eko otsailaren 15a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

829

1/2021 FORU DEKRETU-ARAUA, urtarrilaren 19koa, Kontseiluaren 2016/1164/EB Zuzentaraua hirugarren herrialdeekiko asimetria hibridoei dagokienez aldatzen duen maiatzaren 29ko 2017/952/EB Zuzentarauaren transposizioari buruzkoa.

2015eko urriaren 5ean, Ekonomia Lankidetza eta Garapenerako Antolakundeak (ELGA) argitara eman zituen zerga oinarriaren higaduraren eta mozkinen lekualdaketaren aurkako hamabost ekintza puntuei buruz (BEPS) egindako azken txostenak. Europako Kontseiluak 2015eko abenduaren 8ko Ondorioetan jaso zituen haiek, eta azpimarratu zuen Europar Batasunaren mailan irtenbide komunak eta, aldi berean, malguak aurkitzeko beharra, betiere azken txostenetan adierazitakoari jarraituta.

ELGAren BEPS proiektuaren ondorioak zehazteko, 2016ko urtarrilaren 28an Europako Batzordeak saiheste fiskalaren aurkako neurri sorta aurkeztu zuen, zeinaren esparruan geroago onartu baitzen Kontseiluaren uztailaren 12ko 2016/1164/EB Zuzentaraua, barne merkatuaren funtzionamenduan zuzeneko eragina duen saiheste fiskalaren aurkako arauak ezartzen dituena.

Kontseiluaren uztailaren 12ko 2016/1164/EB Zuzentarauaren bidez, asimetria hibridoen aurka borrokatzeko esparrua ezarri zen. Halere, zuzentarau hori aldatu zuen Kontseiluaren maiatzaren 29ko 2017/952 (EB) Zuzentarauak, 2016/1164/EB Zuzentaraua hirugarren herrialdeekiko asimetria hibridoei dagokienez aldatzen duenak.

Aipatutako 2017/952/EB Zuzentarauaren 2. artikuluaren 1. apartatuak jasotzen duenez, estatu kideek beharrezko lege, erregelamendu eta administrazio xedapenak onartu eta argitaratuko dituzte zuzentarau horretan ezarritakoa betetzeko, eta berehala jakinaraziko diote Batzordeari xedapen horien testua.

Maiatzaren 23ko 12/2002 Legearen bidez onartutako Euskal Autonomia Erkidegoarekiko Ekonomia Itunak 1. artikuluan ezartzen duenez, lurralde historikoetako erakunde eskudunek beren zerga araubidea mantendu, ezarri eta arautu ahal izango dute beren lurraldean. Haren 14. artikuluak xedatzen du sozietateen gaineko zerga araudi autonomoko zerga itundua dela egoitza fiskala Euskal Autonomia Erkidegoan duten subjektu pasiboentzat. Bestalde, Ekonomia Ituneko 21. artikuluak ezartzen du ez-egoiliarren errentaren gaineko zerga tributu itundua dela, eta Estatuak une bakoitzean ezarritako funtsezko eta formazko arau berak aplikatuko zaizkiola. Aurretik xedatutakoa xedatuta ere, atzerrian egoitza duten pertsona edo entitateek Euskal Autonomia Erkidegoan dituzten establezimendu iraunkorrei sozietateen gaineko zergaren araudi autonomoa aplikatuko zaie, Ekonomia Itunaren 14. artikuluan ezarritakoaren arabera.

Horregatik, lurralde historikoetako erakundeek eskumena dute aipatutako bi zerga horiek arautzeko, eta erregulazio horietan txertatu behar dute 2017/952/EB Zuzentarauan jasotako mandatua.

Hala, testuinguru horretan, Kontseiluaren maiatzaren 29ko 2017/952/EB Zuzentarauak asimetria hibrido batzuk jasotzen ditu, ELGAren BEPS proiektuaren 2. ekintzari buruzko azken txostenean ezarritakoan oinarrituta. Asimetria horiek ezabatzeko beharrezko erregelak ezartzen ditu: lehen mandatu bat, asimetria hibrido bakoitza neutralizatzeko irtenbide egokientzat jotzen den irtenbidea; eta bigarren mandatu bat, berriz, dagokion jurisdikzioan aipatutako lehen mandatu hori aplikatzen ez bada bete behar den irtenbidea, bai Zuzentarauaren transposizioan desadostasun bat egoteagatik, bai asimetriak defentsa neurririk onartuta ez daukan hirugarren estatu bati eragiteagatik.

Foru dekretu-arau honen bidez, Kontseiluaren maiatzaren 29ko 2017/952/EB Zuzentarauan jasotako erregelak Gipuzkoako zerga antolamenduan txertatzen dira, eta nagusiki urtarrilaren 17ko 2/2014 Foru Arauan (Gipuzkoako Lurralde Historikoko Sozietateen gaineko Zergarena) eta abenduaren 10eko 16/2014 Foru Arauan (Ez-egoiliarren Errentaren gaineko Zergarena) sartzen dira, lehendabizikoan 31 bis artikulu berri bat txertatuz eta bigarrenean, aldiz, 18. artikuluko 11. apartatu berria.

Foru dekretu-arau honen bidez txertatzen diren asimetria hibridoei buruzko mandatuak aplikagarriak izango dira alderdien artean elkartze harreman bat dagoenean edo, bestela, alderdiek mekanismo egituratu baten esparruan jarduten dutenean, bi kasuetan Kontseiluaren uztailaren 12ko 2016/1164/EB Zuzentarauan xedatutakoaren ildotik. Horregatik, foru dekretu-arau honek lotura kasu berriak jasotzen ditu, asimetria hibridoak ezabatzeko bakarrik, Kontseiluaren uztailaren 12ko 2016/1164/EB Zuzentarauaren elkartze kasu guztiak estaltze aldera, eta eremu horretan mekanismo egituratu gisa zer ulertu behar den definitzen du.

Tresna finantzario hibridoen asimetriak, transferentzia hibridoak barne, zeintzuen bidez eragiten den Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoaren a) letran jasota dagoen sartu gabeko kenkari bat edo arrazoizko epe batean sartu gabeko kenkari bat, neutralizatu egin behar dira lehenik (lehen mandatua) agindu emailearen jurisdikzioan gastua ukatuta, eta subsidiarioki, inbertsorearen zerga oinarrian errenta sartuta, betiere hura salbuetsi gabe. Erregela horiek, hurrenez hurren, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 1. apartatuan eta 33. eta 34. artikuluetan jasotzen dira, salbu arrazoizko epe batean sartu gabeko kenkari kasuei dagokienez. Izan ere, azken kasu horiek foru arau beraren 54. artikuluan erregulatzen dira, horretarako Kontseiluaren maiatzaren 29ko 2017/952/EB Zuzentarauaren (22) kontuan hartuzkoaren azken tartekian jasotako aukera erabilita.

Bestalde, Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoaren b) letran jasotako alderantzizko entitate hibrido bati egindako ordainketak sartu gabeko kenkariaren asimetria neutralizatuta gelditzen da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 2. apartatuan jasotako erregelaren bidez. Kasu horretan, Kontseiluaren uztailaren 12ko 2016/1164/EB Zuzentarauak lehen mandatu gisa jasotzen du agindu emailearen estatu kidean kenkaria ukatzea, eta estatu kideei ahalmena ematen die bigarren mandatua barne araudira ez ekartzeko. Kontseiluaren uztailaren 12ko 2016/1164/EB Zuzentarauaren 9.4 artikuluaren a) letrak ematen duen aukera baliatuta, foru dekretu-arau honen bidez, asimetria hori neutralizatzeko lehen mandatua baizik ez da transposizioz jasotzen.

Ondorio horietarako, entitate hibridotzat hartzen da «jurisdikzio bateko legeriaren arabera zergapeko entitatetzat hartzen den entitate edo mekanismo oro, zeinaren errenta edo gastuak beste subjektu baten edo batzuen errenta edo gastutzat hartzen baitira beste jurisdikzio bateko legeriaren arabera».

Entitate hibrido batek egindako ordainketak sartu gabeko kenkariaren kasuan, onuradunaren jurisdikzioan Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoko e) letran jasotako ordainketa konputatzen ez denean, lehen mandatua da kenkaria ukatzea agindu emailearen jurisdikzioan, hau da, ordainketa horiek egindakotzat jotzen diren jurisdikzioan, eta bigarren mandatua, berriz, diru sarrera inbertsore edo onuradunaren zerga oinarrian sartzea. Bi mandatu horiek Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 3. apartatuan erregulatzen dira. Hala ere, asimetria hibridoen kategoria horri dagokionez, kontuan hartu behar da emaitzetan asimetria gertatuko dela baldin eta soilik baldin agindu emailearen jurisdikzioak ordainketaren kenkaria egitea ahalbidetzen badu bi aldiz sartzen ez diren diru sarrerekin. Gainera, foru dekretu-arau honetan Kontseiluaren maiatzaren 29ko 2017/952/EB Zuzentarauaren (20) kontuan hartuzkoaren azken tartekian jasotako gaikuntza ere erabiltzen da. Izan ere, gaikuntza horren arabera, «agindu emailearen jurisdikzioak kenkaria ondorengo zergaldi batera aldatzea ahalbidetzen badu, zuzentarau honen araberako doikuntzak egiteko beharkizuna atzeratu daiteke, harik eta kenkaria agindu emailearen jurisdikzioan bi aldiz sartzen ez den errenta batekin benetan konpentsatu arte».

Euskal Autonomia Erkidegoko entitate hibrido batek jasandako gastu edo galeren kenkari bikoitzaren kasuari dagokionez (Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoaren g) letra, lehen mandatua da estatu kidean inbertsorearen gastu edo galeraren kenkaria ukatzea eta bigarren mandatua, berriz, agindu emailearen herrialdean kenkari hori ukatzea. Kasu horretan, bi mandatuak jasota daude Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 4. apartatuan. Aurreko paragrafoan adierazi den bezala, asimetria hibridoen kategoria honetan, emaitzetan asimetria gertatuko da baldin eta soilik baldin agindu emailearen jurisdikzioak ahalbidetzen badu kenkaria bi aldiz sartzen ez diren diru sarrerekin konpentsatzea. Puntu honetan, gainera, Kontseiluaren maiatzaren 29ko 2017/952/EB Zuzentarauaren (21) kontuan hartuzkoaren azken tartekian jasotako gaikuntza ere erabiltzen da. Izan ere, gaikuntza horren arabera, «agindu emailearen jurisdikzioak kenkaria ondorengo zergaldi batera aldatzea ahalbidetzen badu, zuzentarau honen arabera doikuntza bat egiteko beharkizuna atzeratu daiteke, harik eta kenkaria agindu emailearen jurisdikzioan bi aldiz sartzen ez den errenta batekin benetan konpentsatu arte».

Sozietateen gaineko zergaren esparruan, establezimendu iraunkorren asimetriak erregulatuta ageri dira Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 5. apartatuan. Hala, Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoaren c), d) eta f) letretan jasota dagoen sartu gabeko kenkaria eragiten duten asimetriak neutralizatuta daude Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 5. apartatuaren a), b) eta c) letretan. Izan ere, haiei jarraituz, ukatu egiten da agindu emailearen jurisdikzioan jasandako gastu edo galeren kengarritasuna (lehen mandatua), bigarren mandatuaren transposizioa egin gabe, kasu horietarako ere Kontseiluaren uztailaren 12ko 2016/1164/EB Zuzentarauaren 9.4 artikuluaren a) letran emandako gaikuntza erabiliz.

Horrez gain, establezimendu iraunkorren asimetriei dagokienez ere, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 5. apartatuaren d) letrak Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoaren g) letran ezarritako kenkari bikoitzaren asimetriari dagokion lehen mandatua jasotzen du. Kasu honetan, lehen mandatuaren arabera, Gipuzkoan gastu edo galeraren kengarritasuna ukatzen da inbertsorearen lurraldea hura denean, eta, bigarren mandatuaren arabera, berriz, kenkaria hemen ukatzen da, lurralde hau agindu emailearen jurisdikzioa denean; bigarren erregela hori Ez-egoiliarren Errentaren gaineko Zergaren abenduaren 10eko 16/2014 Foru Arauan erregulatzen da. Kasu horietan, Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoaren f) letran jasotako asimetriaren kasuan bezala, emaitzetan asimetria gertatuko da baldin eta soilik baldin agindu emailearen jurisdikzioak ahalbidetzen badu ordainketa, gastu edo galeraren kenkaria, kasuaren arabera, bi aldiz sartzen ez diren diru sarrerekin egitea, betiere doikuntza kenkari hori benetan gertatzen den ekitaldira aldatuz, hala badagokio.

Kontseiluaren uztailaren 12ko 2016/1164/EB Zuzentarauaren 9 ter artikuluan jasotako egoitza bikoitzeko kasuak, zeintzuen bidez gastu edo galera beraren kenkari bikoitza eragin baitaiteke, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 6. apartatuan erregulatuta daude. Apartatu horren arabera, gastu edo galera horien kengarritasuna ukatzen da, baldin eta haiek beste jurisdikzioan bi aldiz sartzen ez diren errentekin konpentsatzen badira. Erregela horrek ez du eraginik zergapetze bikoitza saihesteko hitzarmena indarrean duten beste estatu kide batzuei dagokienez, egoitza bikoitzeko balizko kasuetan; izan ere, kasu horietan, zergaduna egoiliar fiskala den herrialde edo lurraldean gastuaren kenkaria egitea baimentzen da, hitzarmen horretan adierazitakoaren arabera.

Kontseiluaren uztailaren 12ko 2016/1164/EB Zuzentarauaren 9. artikuluaren 3. apartatutik ekarritako asimetrietarako jasotako erregela honako hau ukatzean datza: «zergadun batek gauzatutako ordainketa batengatik egin den kenkaria, baldin eta ordainketa horren bidez finantzatzen badira, zuzenean edo zeharka, transakzio baten bidez edo mekanismo egituratu baten esparruan elkartu edo adostutako enpresen artean egindako transakzio batzuen bidez asimetria hibrido bat eragiten duten gastu kengarriak, salbu transakzioek edo transakzio serieek eragindako jurisdikzioetako batek asimetria horri dagokion doikuntza baliokide bat egin badu». Kasu horietan, asimetria hibridoa hura neutralizatzeko erregelarik aplikatzen ez duen hirugarren herrialde batean gertatzen da, baina haren efektua Gipuzkoako lurraldera aldatzen da asimetria hori finantzatzen duen ordainketa baten bidez. Kontseiluaren uztailaren 12ko 2016/1164/EB Zuzentarauaren 9. artikuluaren 3. apartatu horretan jasotako mandatua Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 7. apartatuan erregulatzen da.

Kontseiluaren uztailaren 12ko 2016/1164/EB Zuzentarauaren 9. artikuluaren 5. apartatuan jasotako establezimendu iraunkor ez-konputatuaren asimetria neutralizatzeko, baldin eta ulertzen bada haren bidez establezimendu iraunkor bat dagoela etxe nagusiaren legeriaren arabera, baina ez, ordea, beste herrialde edo lurraldeko legeriaren arabera, eta, haren ondorioz, establezimendu iraunkor horri esleitutako errentak etxe nagusiaren jurisdikzioan bi aldiz sartzen ez direla, erregela berezi berri bat sartzen da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 35. artikuluan. Kasu horietan, Kontseiluaren uztailaren 12ko 2016/1164/EB Zuzentarauak ezartzen du etxe nagusiaren jurisdikzioak zergadunari exijitu behar diola bere zerga oinarrian sar ditzala bestela establezimendu iraunkorrari esleituko litzaizkiokeen errentak, salbu eta behartuta badago errenta horiei salbuespen bat aplikatzera Europar Batasunetik kanpoko hirugarren herrialde batekin sinatutako zergapetze bikoitza saihesteko hitzarmen baten arabera.

Bestalde, Kontseiluaren 2016ko uztailaren 12ko 2016/1164/EB Zuzentarauaren 9. artikuluaren 6. apartatuan jasotako atxikipenen erabilera bikoitzak eragindako transferentzia hibridoen asimetriak neutralizatzeko, zenbait zuzenketa sartzen dira Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 31 bis artikulu berriaren 9. apartatuan eta haren 60. artikuluan.

Errenta bat bi aldiz ez sartzearen efektua, hau da, errenta bat entitate bat eratu den edo egoitza duen herrialde edo lurraldean eta bere bazkide, kide, inbertsore edo partaideen herrialdean duen kalifikazio desberdina izatearen ondorioz errenta bat inongo herrialde edo lurraldetan ez zergapetzearen efektua (Kontseiluaren uztailaren 12ko 2016/1164/EB Zuzentarauaren 9 bis artikuluan jasotakoa) ezin da Gipuzkoako zerga antolamenduan gertatu. Izan ere, efektu hori gertatzea galarazten du Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauak eta Ez-egoiliarren Errentaren gaineko Zergaren abenduaren 10eko 16/2014 Foru Arauak horretarako ezarria duten erregulazioak; beraz, ez da beharrezkoa hari buruzko erregela berezirik ezartzea.

Azkenik, ez-egoiliarren errentaren gaineko zergaren esparruan, espresuki erregulatzen dira Ez-egoiliarren Errentaren gaineko Zergaren abenduaren 10eko 16/2014 Foru Arauan Kontseiluaren uztailaren 12ko 2016/1164/EB Zuzentarauaren 2.9 artikuluaren lehen paragrafoko c), d), f) eta g) letretan (bigarren mandatua) araututako asimetria hibridoei dagozkien berezitasunak; horretarako, 11. apartatu berri bat sartzen da foru arau horretako 18. artikuluan. Ez-egoiliarren Errentaren gaineko Zergaren abenduaren 10eko 16/2014 Foru Arauan xedatzen ez den guztian, bai letra horiei dagokienez bai asimetria hibridoen gainerako kasuei dagokienez, bete beharko da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauan adierazitakoa, zeren eta Ez-egoiliarren Errentaren gaineko Zergaren abenduaren 10eko 16/2014 Foru Arauak 18. artikuluaren 1. apartatuan hartara bidaltzen baitu.

Esku artean dugun gaiaren konplexutasunak eta COVID-19aren pandemiak eragindako egoerak ez dute aukerarik eman aipatutako transposizioa behar bezain azkar egiteko; beraz, barne antolamenduan ezarritako data kontuan hartuta, lehenbailehen ekin behar zaio zeregin horri.

Uztailaren 12ko 6/2005 Foru Arauak, Gipuzkoako Lurralde Historikoaren Erakunde Antolaketa, Gobernu eta Administrazioari buruzkoak, 14. artikuluan xedatzen du ezen, premiazko eta aparteko arrazoiak daudenean, Diputatuen Kontseiluak behin-behineko arau xedapenak eman ahal izango dituela; xedapen horiek foru dekretu-arauak izango dira eta ezin eragingo diete foru organoen antolaketari, araubideari eta funtzionamenduari eragin. Foru dekretu-arauak Batzar Nagusietan eztabaidatu eta bozkatu behar dira berehala, baliozkotuak izateko.

Horrenbestez, Ogasun eta Finantza Departamentuko foru diputatuak proposaturik, eta Diputatuen Kontseiluak gaurko bileran eztabaidatu eta onartu ondoren, honako hau

XEDATZEN DUT:

1. artikulua.– Aldatzea Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Araua.

Aldaketa hauek sartzen dira Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauan:

Bat.– Honela idatzita gelditzen da 25 bis artikuluko 1. apartatuaren bigarren paragrafoa:

«Ondorio horietarako, honako hauek hartuko dira finantza gastu garbitzat: zergaldian zehar sortutako finantza gastuek kapital propioak hirugarrenei lagatzeagatik lortzen diren diru sarrerekiko ageri duten soberakina, foru arau honen 31. artikuluko 1. apartatuaren g) letran eta 31 bis artikuluan aipatutako gastuak kanpoan utzita.»

Bi.– Edukirik gabe uzten da 31.1 artikuluaren j) letra.

Hiru.– Idazkera berria ematen zaio 31. artikuluaren 6. apartatuari, eta honela idatzita gelditzen da:

«6. Aurreko 1. apartatuko a) letran xedatutakoa gorabehera, eta foru arau honetako 31 bis artikuluaren 1. apartatuan jasotakoa eragotzi gabe, partaidetza mailegu baten ondorioz sortzen diren interesak, finkoak zein aldakorrak, foru arau honetako 47. artikuluan xedatutakoa aplikatu behar zaienak izan ezik, kengarriak izango dira, baldin eta mailegu horrek beharkizun eta baldintza hauek betetzen baditu:

a) Entitate mailegu emailek interes aldakorra jasotzea, enpresa mailegu hartzailearen jardueraren bilakaeraren arabera zehazten dena.

Bilakaera hori zehazteko irizpide hauek erabili ahal izango dira: mozkin garbia, negozio bolumena, ondare osoa edo kontratuko alderdiek askatasunez adosten duten beste edozein.

b) Kontratuko alderdiek adostu ahal izango dute interes finkoa jartzea, jardueraren bilakaerarekin zerikusirik ez duena.

c) Kontratuko alderdiek amortizazio aurreratua zigortzeko klausula adostu ahal izango dute.

Aurreikusita eduki beharko da, mailegu hartzaileak garaiz aurretik amortizatzen badu partaidetza mailegua, amortizazio hori konpentsatu egingo dela haren funts propioak beste hainbeste handituz eta hori ez dela aktiboen eguneratzetik aterako.»

Lau.– 31 bis artikulu bat gehitzen da. Hona hemen haren edukia:

«31 bis artikulua. Asimetria hibridoak.

1.– Ez dira fiskalki kengarriak izango pertsona edo entitate lotuekin egindako eragiketei dagozkien gastuak, baldin eta, pertsona edo entitate horietan gastu edo eragiketaren kalifikazio desberdina izateagatik, diru sarrerarik sortzen ez badute edo, bestela, sortzen duten sarrera salbuetsita badago, zergapetze ekonomiko bikoitza ezabatu behar bazaio edo 100eko 10etik beherako karga tasa nominalean zergapetuta badago.

Aurreko paragrafoan xedatutakoa ez da aplikatuko tresna finantzario transferitu baten azpiko etekinaren gastuei dagokienez, ordainketa operadore finantzario batek egiten duenean merkatuan sartutako transferentzia hibrido baten esparruan, baldin eta agindu emailearen herrialde edo lurraldeak behartzen badu operadore finantzarioa tresna finantzario transferituari dagokionez jasotako zenbateko guztiak errenta gisa sartzera; ez da bidezkoa izango ez gastu horiek salbuestea eta ez zergapetze bikoitza ezabatzea.

Ondorio horietarako, operadore finantzariotzat hartuko da mozkin bat lortzeko asmoz erregulartasunez norberaren kontura tresna finantzarioak erosi eta saltzen dituen pertsona edo entitatea. Agindu emailearen herrialde edo lurraldetzat, berriz, gastua ondorio fiskaletarako egindakotzat jotzen dena hartuko da.

Bestalde, transferentzia hibridotzat hartuko da tresna finantzario baten transferentziari lotutako eragiketa oro, baldin eta tresna finantzario transferitu baten azpiko etekina, ondorio fiskaletarako, eragiketan esku hartzen duten alderdietako batetik baino gehiagotik aldi berean eratorritzat jotzen bada. Merkatuan sartutako transferentzia hibridotzat hartuko da, berriz, operadore finantzarioak bere jarduera profesionalean, eta ez, ordea, mekanismo egituratu baten zati gisa, sartu duen edozein transferentzia hibrido.

2.– Ez dira fiskalki kengarriak izango diru sarrerarik sortzen ez duten eragiketei dagozkien gastuak, baldin eta, pertsona edo entitate jasotzaileek beraiek egoiliar diren herrialde edo lurraldean eta beren bazkide, kide, inbertsore edo partaideen herrialde edo lurraldean kalifikazio fiskal desberdina izatearen ondorioz, zergaduna lotuta badago pertsona edo entitate horiekin edo haien bazkide, kide, inbertsore edo partaideekin.

3.– Ez dira fiskalki kengarriak izango beste herrialde edo lurralde batean egoitza duten pertsona edo entitate lotuekin egindako eragiketei dagozkien gastuak, baldin eta, zergadunak herrialde edo lurralde horretan kalifikazio desberdina izatearen ondorioz, diru sarrerarik sortzen ez badute, foru arau honi eta beste herrialde edo lurraldeko legeriari jarraituz zergapetutako diru sarrera batekin konpentsatzen ez den zatian.

Aurreko paragrafoan ezarritakoaren arabera kenkaririk izan ez duten gastuak hurrengo hogeita hamar urteetan amaitzen diren zergaldietan konpentsatu ahal izango dira zergadunak lortutako errenta garbi positiboekin, baldin eta haiek foru arau honi eta beste herrialde edo lurraldeko legeriari jarraituz zergapetuta badaude.

Zerga oinarrian sartu behar da beste herrialde edo lurralde batean egoitza duten pertsona edo entitate lotuekin egindako eragiketen zenbatekoa, baldin eta, haiek beste herrialde edo lurralde horretan beste kalifikazio fiskal bat izatearen ondorioz, beste herrialde edo lurralde horretan fiskalki kengarritzat hartu badira eta bertan zuzenean edo zeharka konpentsatu bada foru arau honi eta beste herrialde edo lurraldeko legeriari jarraituz zergapetuta ez dagoen diru sarrera batekin.

4.– Ez dira fiskalki kengarriak izango beste herrialde edo lurralde batean egoitza duten pertsona edo entitate lotuekin edo beraiek egindako eragiketei dagozkien gastu edo galerak, baldin eta, beraiek kalifikazio fiskal desberdina izatearen ondorioz, pertsona edo entitate lotu horietan fiskalki kengarriak diren gastu edo galerak ere badira, pertsona edo entitate lotu horiek foru arau honi eta beste herrialde edo lurraldeko legeriari jarraituz zergapetuta ez dagoen diru sarrera batekin zuzenean edo zeharka konpentsatu duten zatian. Aipatutako konpentsazioa zergadunak gastu edo galeraren kenkaria egin ondorengo ekitaldi batean gertatzen bada, zergadunak beste herrialde edo lurraldean konpentsazio horri dagokion zenbatekoa sartu beharko du bere zerga oinarrian.

Ez dira fiskalki kengarriak izango zergadunak egindako eragiketen gastu edo galerak, baldin eta pertsona edo entitate lotu baten herrialde edo lurraldean fiskalki kengarritzat ere hartzen badira, zergadunaren kalifikazio fiskal desberdinaren ondorioz, foru arau honi eta beste herrialde edo lurraldeko legeriari jarraituz zergapetuta dagoen diru sarrera batekin konpentsatzen ez den zatian.

Aurreko paragrafoan ezarritakoaren arabera kenkaririk izan ez duten zenbatekoak hurrengo hogeita hamar urteetan amaitzen diren zergaldietan konpentsatu ahal izango dira zergadunak lortutako errenta garbi positiboekin, baldin eta errenta horiek foru arau honi eta beste herrialde edo lurraldeko legeriari jarraituz zergapetuta badaude.

5.– Honako hauek ez dira fiskalki kengarriak izango:

a) Pertsona edo entitate lotu baten establezimendu iraunkorrekin edo establezimendu iraunkorrak dituen pertsona edo entitate lotu batekin egindako eragiketei dagozkien gastu edo galerak, baldin eta, establezimendu iraunkor baten edo gehiagoren eta beraien etxe nagusiaren artean edo establezimendu iraunkorren artean diru sarreren egozpenean diferentzia fiskal bat izatearen ondorioz, diru sarrerarik sortzen ez badute edo, bestela, sortzen duten diru sarrera salbuetsita badago edo zergapetze bikoitza ezabatu behar bazaio.

b) Pertsona edo entitate lotu baten establezimendu iraunkor batekin egindako eragiketei dagozkien gastu edo galerak, baldin eta diru sarrerarik sortzen ez badute edo, bestela, sortzen duten diru sarrera salbuetsita badago edo zergapetze bikoitza ezabatu behar bazaio, establezimendu iraunkor hori kokapen herrialde edo lurraldean fiskalki halakotzat ez hartzearen ondorioz.

c) Atzerrian establezimendu iraunkor batekin egindako barruko eragiketetan zenbatetsitako gastuak, nazioarteko zergapetze bikoitza saihesteko hitzarmen aplikagarri batean horrela aitortuta dauden kasuetan, baldin eta, establezimendu iraunkorraren herrialde edo lurraldeko legeriaren ondorioz, diru sarrerarik sortzen ez badute edo, bestela, sortzen duten diru sarrera salbuetsita badago edo zergapetze bikoitza ezabatu behar bazaio, foru arau honi eta beste herrialde edo lurraldeko legeriari jarraituz zergapetuta dagoen establezimendu iraunkorraren diru sarrera batekin konpentsatzen ez den zatian.

Letra honetan ezarritakoaren arabera kenkaririk izan ez duten gastuak hurrengo hogeita hamar urteetan amaitzen diren zergaldietan konpentsatu ahal izango dira establezimendu iraunkorrak lortutako errenta garbi positiboekin, baldin eta haiek foru arau honi eta beste herrialde edo lurraldeko legeriari jarraituz zergapetuta badaude.

d) Zergadunaren establezimendu iraunkor batekin edo berak egindako eragiketei dagozkien gastu edo galerak, baldin eta, era berean, fiskalki kengarriak badira establezimendu iraunkor horretan edo harekin lotutako entitate batean, establezimendu iraunkor horrek edo harekin lotutako entitate batek foru arau honi eta beste herrialde edo lurraldeko legeriari jarraituz zergapetuta ez dagoen diru sarrera batekin zuzenean edo zeharka konpentsatu den zatian. Aipatutako konpentsazioa zergadunak gastu edo galeraren kenkaria egin ondorengo ekitaldi batean gertatzen bada, zergadunak beste herrialde edo lurraldean konpentsazio horri dagokion zenbatekoa sartu beharko du bere zerga oinarrian.

6.– Ez dira fiskalki kengarriak izango zergaduna egoiliar fiskala den beste herrialde edo lurralde batean fiskalki kengarriak diren gastu edo galerak, foru arau honi eta beste herrialde edo lurraldeko legeriari jarraituz zergapetuta egon ez den diru sarrera batekin zuzenean edo zeharka konpentsatu den zatian. Aipatutako konpentsazioa zergadunak gastu edo galeraren kenkaria egin ondorengo ekitaldi batean gertatzen bada, zergadunak beste herrialde edo lurraldean konpentsazio horri dagokion zenbatekoa sartu beharko du bere zerga oinarrian.

Apartatu honetan xedatutakoa ez da aplikatuko beste herrialde edo lurraldea Europar Batasuneko estatu kide bat denean, zeinarekin Espainiak nazioarteko zergapetze bikoitza saihesteko hitzarmen bat sinatuta duen, baldin eta hitzarmen horretan zergaduna Espainiako lurraldeko egoiliar fiskaltzat hartzen bada.

7.– Ez dira gastu fiskalki kengarritzat hartuko beste herrialde edo lurralde batean egoitza duten pertsona edo entitate lotuekin egindako transakzio bati edo transakzio sorta bati dagozkion gastuak, baldin eta zuzenean edo zeharka finantzatzen badituzte artikulu honen aurreko apartatuetan aipatutako ondorioak sortzen dituzten eragiketen esparruan egindako gastu kengarriak, salbu eta eragindako herrialde edo lurraldeetako batek doikuntza bat egin duenean gastuaren kenkaria saihestu, diru sarrera zergapetu edo gastu beraren kenkari bikoitza saihesteko, apartatu horietan jasotakoaren arabera.

8.– Artikulu honen aurreko apartatuetan xedatutakoa aplikatuko da, era berean, apartatu horietan aipatutako eragiketak mekanismo egituratu baten esparruan egiten direnean.

Ondorio horietarako, mekanismo egituratutzat hartuko dira akordio, negozio juridiko, eskema, eragiketa edo haien multzo oro, baldin eta bertan gastu kengarri bat sortzen bada zergapetutako sarrera korrelatiborik gabe edo gastu kengarri bat sortzen bada bi herrialde edo lurraldetan edo gehiagotan, artikulu honetan adierazitako moduan, eta gastu horren sorrera baldintzetan kuantifikatuta edo tarifikatuta badago edo, bestela, aipatutako emaitzak sortzeko diseinatu bada, salbu eta, azken kasu horretan, ez zergadunak eta ez harekin lotutako pertsona edo entitate batek haiek zentzuz ezagutzerik izan ez dutenean eta emaitza horietatik datorren abantaila fiskalaren balioa partekatzen ez dutenean.

9.– Zerga honen kuota efektiboan haren kontura egindako atxikipenaren zenbatekoa kengarria izango da, zerga oinarrian integratu den eta mekanismo egituratu baten esparruan egin den transferentzia hibrido batean lortutako errentari dagokion proportzioan.

10.– Artikulu honetan adierazitakoaren ondorioetarako, ulertuko da diru sarrera bat foru arau honi eta beste herrialde edo lurraldeko legeriari jarraituz zergapetuta dagoela, baldin eta diru sarrera hori ez badago salbuetsita eta ez bazaio zergapetze bikoitza ezabatu behar.

11.– Artikulu honetan adierazitakoaren ondorioetarako, foru arau honetako 42.3 artikuluan xedatutakoaz gain, honako hauek joko dira pertsona edo edo entitate lotutzat:

a) Beste pertsona edo entitate batekin batera entitate baten boto eskubideei edo kapitalaren jabetzari dagokienez jarduten duen pertsona edo entitatea. Pertsona edo entitate hori partaidetza baten titulartzat hartuko da, beste pertsonaren jabetzakoak diren entitate horren boto eskubide guztiei edo kapitalaren jabetzari dagokienez.

b) Entitate bat, zeinean zergadunak haren kudeaketan eragin esanguratsua duen, edo entitate bat, zeinak zergadunaren kudeaketan eragin esanguratsua duen.

12.– Zergadunek memorian jakinarazi beharko dituzte artikulu honen 3. apartatuko hirugarren paragrafoan, 4. apartatuko lehen paragrafoan, 5. apartatuaren d) letran eta 6. apartatuko lehen paragrafoan aipatzen diren zenbatekoak, zeintzuk zergaren zerga oinarrian integratu behar baitira, baldin eta beste herrialde edo lurralde batean konpentsatzen badira foru arau honi eta beste herrialde edo lurralde horretako legeriari jarraituz zergapetuta ez dagoen diru sarrera batekin. Era berean, adierazi beharko dute konpentsazioa zer ekitalditan egiten den eta zenbatekoa den.

Aipamen hori ekitaldi guztietako memorian jaso beharko da, aurreko paragrafoan adierazitakoaren arabera, zenbateko horiek beste herrialde edo lurralde batean foru arau honi eta beste herrialde edo lurraldeko legediari jarraituz zergapetuta ez dagoen diru sarrera batekin konpentsatzeko aukera dagoen bitartean, eta haien konpentsazio efektiboa gertatzen den ekitaldiko memorian ere jakinarazi beharko dituzte.

Apartatu honetan adierazitako memorian aipamen obligazioa ez betetzea zerga arloko arau haustea izango da, eta aipatu gabeko zenbatekoen 100eko 5eko diruzko isun proportzionalarekin zehatuko da.»

Bost.– Honela idatzita gelditzen da 33.3 artikuluaren a) letra:

«a) Banatzeko momentuan entitate ordaintzaileari fiskalki kengarria den gastu bat sortzen dioten edo neurri baliokide bat aplikatzeko eskubidea ematen duten dibidenduak eta mozkinetako partaidetzak.»

Sei.– e) letra berri bat eransten zaio 33.3 artikuluari. Hona hemen bere edukia:

«e) Dibidenduak edo mozkinetako partaidetzak, haien zenbatekoa beste entitate bati eman behar zaionean haien jatorrizko baloreetan oinarritutako kontratu bat dela eta, zergadunarentzat fiskalki kengarria den gastu bat eraginez.

Aipatutako kontratuari jarraituz zenbateko hori jasotzen duen entitateak artikulu honetan ezarritako salbuespena aplikatu ahal izango du, beharkizun hauek betetzen badira:

a’) Gordetzea baloreen kontabilitate erregistroa.

b’) Frogatzea dibidendua entitate kontratatzaileak edo bi entitateetako edozeinen sozietate talde bereko entitate batek jaso duela, Merkataritza Kodearen 42. artikuluan jasotakoaren arabera.

c’) Betetzea artikulu honetan salbuespena egiteko jarritako baldintzak.»

Zazpi.– Honela idatzita gelditzen dira 35. artikuluaren 1. eta 2. apartatuak:

«1. Ez dira zergadunaren zerga oinarrian sartuko atzerrian diren establezimendu iraunkorren bitartez lortutako errenta positiboak, betiere:

a) Errenta horiek zerga honen pareko edo antzeko zerga bati lotuta eta salbuetsi gabe badaude, foru arau honetako 33. artikuluko 1. apartatuaren b) letran ezarritakoari jarraituz, eta haiek lortzen dituzten establezimendu iraunkorrak ez badaude zerga paradisutzat jotzen den herrialde edo lurralde batean kokatuta, salbuespen honekin: egoitza Europar Batasuneko estatu kide batean edukitzea eta zergadunak frogatzea haiek eratzeko eta jarduteko arrazoi ekonomiko baliozkoak izan direla eta enpresa jarduerak egiten dituztela.

b) Establezimendu iraunkorraren errenta enpresa jarduerak egitetik sortua bada, foru arau honetako 33. artikuluko 1. apartatuaren c) letran ezartzen den moduan, hain zuzen.

Artikulu honetan xedatutakoa ez zaie aplikatuko establezimendu iraunkorrak lortutako errentei, baldin eta establezimendu hori kokatuta dagoen estatuan errenta horiek salbuetsita badaude edo sozietate zergaren pareko edo antzeko zerga batean 100eko 10etik beherako karga tasa nominalaren arabera tributatu badute.

Era berean, artikulu honetan xedatutakoa ez zaie aplikatuko establezimendu iraunkor baten bidez lortutako errentei, baldin eta, haren kokapen herrialde edo lurraldeak hura fiskalki ez onartzearen ondorioz, ez badaude herrialde edo lurralde horretan zergapetuta, salbu eta errenta horien salbuespena ezarria bada Europar Batasuneko estatu kide bat ez den herrialde edo lurralde batekin sinatutako nazioarteko zergapetze bikoitza saihesteko hitzarmen bati jarraituz.

2.– Aurreko paragrafoan xedatutakoa gorabehera, eta foru arau honetako 31 bis artikuluaren 4. apartatuan eta 5. apartatuaren d) letran jasotakoa eragotzi gabe, zergadunak aurreko zergaldi batean halako establezimenduetatik eratorritako errenta negatiboak sartu baditu zerga oinarrian, errenta positiboak ez sartzeak –artikulu honetan aipatzen dena– muga izango du errenta positibo horien eta aldez aurretik zerga oinarrian sartutako errenta negatiboen arteko diferentzia.»

Zortzi.– 12. eta 13. apartatuak gehitzen zaizkio 54. artikuluari. Hona hemen beren edukia:

«12. Pertsona edo entitate lotuekin egindako eragiketei dagozkien gastuak kengarriak izango dira, baldin eta, pertsona edo entitate horietan gastu edo eragiketaren kalifikazio desberdina izatearen ondorioz eta beraien artean alderdi independenteen artean adostuko liratekeen ordainketa baldintzez bestelako batzuk adostearen ondorioz, eragiketa horiek sortzen badituzte zergadunarentzat kengarriak diren ekitaldia amaitzen denetik hamabi hilabete baino gehiago igaro ondoren hasten den zergaldi batean integratu beharreko diru sarrerak. Gastu horiek kengarriak izango dira pertsona edo entitate horiek aipatutako diru sarrerak zerga honen zerga oinarrian edo pareko edo antzeko zerga baten zerga oinarrian sartu behar dituzten zergaldian.

Apartatu honi dagokionez, aplikagarria izango da foru arau honetako 31 bis artikuluaren 1. apartatuko bigarren, hirugarren eta laugarren paragrafoetan eta 8. eta 11. apartatuetan jasotakoa.

13.– Pertsona edo entitate lotuekin egindako eragiketei dagozkien diru sarrerak integratu beharko dira, baldin eta, pertsona edo entitate horiek sarreraren edo eragiketaren kalifikazioa desberdina izateagatik eta alderdi independenteen artean adostuko liratekeen ordainketa baldintzez bestelako batzuk elkarrekin hitzartzeagatik, beraien ondorioz sortzen badira jasotzailearentzat diru sarrera horiek sortzen diren ekitaldia hasi baino hamabi hilabete lehenago amaitu den zergaldian sartu beharreko gastuak, eta betiere haiek pertsona edo entitate horientzat kengarriak diren zergaldiko zerga oinarrian.

Apartatu honi dagokionez, aplikagarria izango da foru arau honetako 31 bis artikuluaren 1. apartatuko bigarren, hirugarren eta laugarren paragrafoetan eta 8. eta 11. apartatuetan jasotakoa.»

Bederatzi.– Honela idatzita gelditzen da 60. artikuluaren 1. apartatua:

«1. Zergadunaren zerga oinarrian atzerrian lortu eta kargatutako errentak sartzen badira, kuota osotik kendu behar da zerga honen pareko edo antzeko karga baten zioz atzerrian ordaindutako zenbatekoa.

Foru arau honetako 34. artikuluko 2. apartatuan aipatzen diren kasuetan, aurreko paragrafoaren xedatutakoaren ondorioetarako zenbateko hau soilik hartuko da kontuan: atzerrian zerga honen pareko edo antzeko karga baten zioz benetan ordaindutako kopurutik foru arau honetako 33. artikuluko 1. apartatuaren b) edo c) letran ezarritakoaren arabera zerga oinarrian integratu behar ez diren errentei dagokion zatia, hain zuzen ere partaidetzaren eskualdaketari esker lortutako guztirako errenten proportziozkoa.

Gainera, mekanismo egituratuen esparruan egindako transferentzia hibridoen kasuetan, zerga honen pareko edo antzeko karga dela-eta atzerrian ordaindutakoaren zenbateko efektiboak ezin izango du gainditu mekanismo horien esparruan zergadunak lortutako errenta garbiei proportzionalki dagokien zatia.

Salbuespena, hobaria edo beste edozein zerga onura dela bide ordaindu ez diren zergak ez dira kenduko. Halaber, foru arau honetako 39. artikuluko 3. apartatuan xedatutakoarekin bat etorriz zerga oinarrian sartu ez diren errentei dagokienez ordaindutako zergak ere ez dira kengarriak izango.

Zergapetze bikoitza saihesteko hitzarmen bat ezarri behar denean, kenkaria ezin da izan hitzarmen horren arabera ordaindu beharreko zergak ezarritakotik gorakoa.»

Hamar.– Honela idatzita gelditzen da 60. artikuluaren 4. apartatua:

«4. Gainera, zerga oinarrian entitate batek ordaindutako dibidenduak edo mozkinetako partaidetzak sartuz gero, entitate horrek dibidenduen iturri diren mozkinengatik benetan ordaindutako zerga karga kenduko da, hain zuzen ere dibidenduei dagokien zenbatekoa, baldin eta zenbateko hori zergadunaren zerga oinarrian sartuta badago.

Apartatu honetan xedatutakoa aplikatzeko, ezinbestekoa da foru arau honetako 33. artikuluko 1. apartatuko a) letran ezarritakoa betetzea; kasu horretan artikulu bereko 3. eta 5. apartatuetan xedatutakoa ere aplikatuko da.

Partikularki, apartatu honetan ezarritako kenkaria ez da aplikagarria izango jasotako dibidenduei edo mozkinetako partaidetzei dagokienez, haien zenbatekoa beren jatorrizko baloreetan oinarritutako kontratu baten ondorioz beste entitate bati eman behar zaionean, horretarako gastu bat erregistratuz. Zenbateko hori jasotzen duen entitateak apartatu honetan ezarritako kenkaria aplikatu ahal izango du, baldin eta balore horien kontabilitate erregistroa gordetzen badu eta bertan ezarritako baldintzak betetzen baditu.

Hori dela eta, benetan ordaindutako zergatzat hartuko da dibidendua banatzen duen sozietateak zuzenean partaidetzen dituen entitateek eta azken horiek aldi berean zuzenean partaidetzen dituzten entitateek –eta horrela hurrenez hurren– ordaindu duten zerga, dibidenduak ordaintzeko erabili diren mozkinei egotzitako zatian, baldin eta partaidetza horiek 100eko 5 baino txikiagoak ez badira (edo 100eko 3 baino txikiagoak, sozietate partaidetuak bigarren mailako merkatu antolatu batean kotizatzen badu) eta foru arau honetako 33. artikuluko 1. apartatuko a) letran ezarritako beharkizuna betetzen badute partaidetzaren edukitza aldiari dagokionez.

Apartatu honetan xedatutakoa ez zaie aplikatuko foru arau honetako 14. artikuluan aipatutako ondare sozietateei.»

Hamaika.– Honela idatzita gelditzen da 75. artikuluko 4. apartatua:

«4. Foru arau honetako 33., 34. eta 35. artikuluetan ezarritakoa aplikatzea aukeratzen bada, aldi baterako enpresa elkartea amaitu arte aplikatu beharko da. Foru arau honetako 31 bis artikuluko 4. apartatuan eta 5. apartatuaren d) letran jasotakoa eragotzi gabe, aldi baterako enpresa elkartetik lortutako errenta negatiboa entitate kideen zerga oinarriari egotziko zaio. Halakoetan, hurrengo ekitaldietan aldi baterako enpresa elkarteak errenta positiborik daukanean, enpresa kideek beren zerga oinarrietan, positibo modura, aurretiaz egotzitako errenta negatiboa sartuko dute, errenta positibo horien zenbatekoaren mugarekin.»

2. artikulua.– Aldatzea Ez-egoiliarren Errentaren gaineko Zergaren abenduaren 10eko 16/2014 Foru Araua.

11. apartatu berri bat gehitzen zaio Ez-egoiliarren Errentaren gaineko Zergaren abenduaren 10eko 16/2014 Foru Arauaren 18. artikuluari. Hona hemen bere edukia:

«11. Honako hauek ez dira fiskalki kengarriak izango:

a) Etxe nagusiarekin edo haren establezimendu iraunkorren batekin egindako eragiketei dagozkien gastu edo galerak, bai eta etxe nagusi horri edo haren establezimendu iraunkorren batekin lotutako pertsona edo entitate batekin egindako eragiketei dagozkienak ere, baldin eta, etxe nagusi horretan edo haren establezimendu iraunkorretan diru sarrerak esleitzean kalifikazio fiskal desberdin bat izatearen ondorioz, diru sarrerarik sortzen ez bada edo, bestela, sortzen den diru sarrera salbuetsita badago edo zergapetze bikoitza ezabatu behar bazaio.

b) Etxe nagusiaren edo harekin lotutako pertsona edo entitate baten establezimendu iraunkor batekin egindako eragiketei dagozkien gastu edo galerak, baldin eta diru sarrerarik sortzen ez badute edo, bestela, sortzen dituzten diru sarrerak salbuetsita badaude edo zergapetze bikoitza ezabatu behar bazaie, establezimendu iraunkor hori kokapen herrialde edo lurraldean fiskalki halakotzat ez hartzearen ondorioz.

c) Etxe nagusiarekin edo haren establezimendu iraunkorren batekin edo pertsona edo entitate lotu batekin egindako barruko eragiketengatik zenbatetsitako gastuak, baldin eta, onuradunaren herrialde edo lurraldeko legeriaren ondorioz, diru sarrerarik sortzen ez bada edo, bestela, sortzen den diru sarrera salbuetsita badago edo zergapetze bikoitza ezabatu behar bazaio, foru arau honi eta beste herrialde edo lurraldeko legeriari jarraituz zergapetuta dagoen etxe nagusiaren edo establezimendu iraunkorraren diru sarrera batekin konpentsatzen ez den zatian.

Aurreko paragrafoan ezarritakoaren arabera kenkaririk izan ez duten gastuak hurrengo hogeita hamar urteetan amaitzen diren zergaldietan konpentsatu ahal izango dira establezimendu iraunkorrak lortutako errenta garbi positiboekin, baldin eta haiek foru arau honi eta beste herrialde edo lurraldeko legeriari jarraituz zergapetuta badaude.

d) Establezimendu iraunkorraren eragiketei dagozkien gastu edo galerak, baldin eta etxe nagusian edo pertsona edo entitate lotu batean fiskalki kengarriak badira, foru arau honi eta beste herrialde edo lurraldeko legeriari jarraituz zergapetua dagoen diru sarrera batekin konpentsatzen ez den zatian.

Aurreko paragrafoan ezarritakoaren arabera kenkaririk izan ez duten zenbatekoak hurrengo hogeita hamar urteetan amaitzen diren zergaldietan konpentsatu ahal izango dira establezimendu iraunkorrak lortutako errenta garbi positiboekin, baldin eta errenta horiek foru arau honi eta beste herrialde edo lurraldeko legeriari jarraituz zergapetuta badaude.

Apartatu honetan xedatutakoaren ondorioetarako:

a) Ulertuko da diru sarrera bat foru arau honi eta beste herrialde edo lurraldeko legeriari jarraituz zergapetuta dagoela, baldin eta diru sarrera hori ez badago salbuetsita eta ez bazaio zergapetze bikoitza ezabatu behar.

b) Foru arau honetako 15. artikuluaren 2. apartatuan adierazitakoaz gain, honako hauek joko dira pertsona edo entitate lotutzat:

a’) Beste pertsona edo entitate batekin batera entitate baten boto eskubideei edo kapitalaren jabetzari dagokienez jarduten duen pertsona edo entitatea. Pertsona edo entitate hori partaidetza baten titulartzat hartuko da, beste pertsonaren jabetzakoak diren entitate horren boto eskubide guztiei edo kapitalaren jabetzari dagokienez.

b’) Entitate bat, zeinean zergadunak haren kudeaketan eragin esanguratsua duen, edo entitate bat, zeinak zergadunaren kudeaketan eragin esanguratsua duen.»

XEDAPEN INDARGABETZAILEA.– Arauak indargabetzea.

Indargabetuta gelditzen da Zerga neurri jakin batzuk onartzen dituen apirilaren 6ko 2/2004 Foru Arauaren bigarren xedapen gehigarriaren 2. apartatua, sozietateen gaineko zergari eta establezimendu iraunkorrik gabeko ez-egoiliarren errentaren gaineko zergari dagokienez.

AZKEN XEDAPENETAKO LEHENENGOA.– Europar Batasuneko zuzenbidea txertatzea.

Foru dekretu-arau honen bidez, Gipuzkoako lurralde historikoko zerga sisteman sartzen dira Kontseiluaren uztailaren 12ko 2016/1164/EB Zuzentarauak, barne merkatuaren funtzionamenduan zuzeneko eragina duten saiheste fiskaleko jardunbideen kontrako arauak ezartzen dituenak jasotzen dituen asimetria hibridoei buruzko arauak, betiere Kontseiluaren maiatzaren 29ko 2017/952/EB Zuzentarauak, hirugarren herrialdeekiko asimetria hibridoei dagokienez 2016/1164/EB Zuzentaraua aldatzen duenak, emandako idazkeran.

AZKEN XEDAPENETAKO BIGARRENA.– Indarrean jartzea.

Foru dekretu-arau hau Gipuzkoako Aldizkari Ofizialean argitaratu eta biharamunean jarriko da indarrean, eta 2020ko urtarrilaren 1etik aurrera hasten diren eta foru dekretu-arau hau indarrean jartzean amaitu ez diren zergaldietarako izango ditu ondorioak.

Donostia, 2021eko urtarrilaren 19a.

Diputatu nagusia,

MARKEL OLANO ARRESE.

Ogasun eta Finantza Departamentuko foru diputatua,

JOKIN PERONA LERCHUNDI.

Azterketa dokumentala