RSS
218. zk., 2020ko azaroaren 4a, asteazkena
- Bestelako formatuak:
- PDF (307 KB - 5 orri.)
- EPUB (236 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
HERRI-KONTUEN EUSKAL EPAITEGIA
4660
ERABAKIA, Herri-Kontuen Euskal Epaitegiaren Osokoak 2020ko urriaren 7ko bilkuran hartua, Fontechako Kontzejuaren fiskalizazio txostena, 2018koa, behin betiko onesten duena.
Herri-Kontuen Euskal Epaitegiaren Osokoak 2020ko urriaren 7an egindako bilkuran
ERABAKI DU:
Fontechako Kontzejuaren fiskalizazio txostena, 2018koa, behin betiko onestea; erabaki honen eranskin modura ageri da.
HKEEren 1/1988 Legearen 13.2 artikuluak aurreikusten duena betez, txostenaren ondorioak dagozkion aldizkari ofizialetan argitaratzeko xedatzea.
Vitoria-Gasteiz, 2020ko urriaren 7a.
HKEEren lehendakaria,
JOSÉ LUIS BILBAO EGUREN.
HKEEren idazkari nagusia,
JULIO ARTETXE BARKIN.
ERANSKINA
FONTECHAKO KONTZEJUAREN FISKALIZAZIO TXOSTENA, 2018 EKITALDEKOA
Laburtzapenak.
2/2016 Legea: 2/2016 Legea, apirilaren 7koa, Euskadiko Toki Erakundeei buruzkoa.
3/2004 FA: 3/2004 Foru Araua, otsailaren 9koa, Arabako Lurralde Historikoaren Toki Entitateen aurrekontuei buruzkoa.
56/2015 FD: 56/2015 Foru Dekretua, azaroaren 3ko Diputatuen Kontseiluarena, Arabako Lurralde Historikoko toki erakundeen kontularitzako esparru arautzailea onartzen duena.
AFA: Arabako Foru Aldundia.
ALH: Arabako Lurralde Historikoa.
ALHAO: Arabako Lurralde Historikoaren Aldizkari Ofiziala.
AO: Administrazio Orokorra.
EAE: Euskal Autonomia Erkidegoa.
FFFEL: Arabako Toki-erakundeak Finantzatzeko Foru Funtsa.
HHS: hiri-hondakin solidoak.
TAOAL: 7/1985 Legea, apirilaren 2koa, Toki Araubidearen Oinarriak Arautzen dituena.
I.– Sarrera.
Herri-Kontuen Euskal Epaitegiak, otsailaren 5eko 1/1988 Legeak eta Epaitegiaren Osoko bilkurak onetsitako Lan Programak agindutakoari jarraikiz, Fontechako Kontzejuaren 2018ko ekitaldiko Kontu Orokorraren fiskalizazio lana mamitu du.
Fiskalizazio-lan honek honako alderdi hauek besarkatzen ditu:
– Legezkotasuna: ezargarria den arautegia honako alor hauetan betetzen dela egiaztatzea: aurrekontua, zuzenbide publikoko diru-sarrerak eta obren kontratazioa, zerbitzuak eta hornidurak. Azterketa lan hau fiskalizazioaren ekitaldiari dagokio, beharrezko irizten diren beste ekitaldi batzuei buruzko egiaztaketak egitea kaltetu gabe, fiskalizazio-gai den ekitaldian eragina dutelako.
– Kontabilitatea: kontuak ezargarri zaizkion kontularitzako printzipioekin bat datorrela egiaztatzea. AFAk eskatutako kontuen eredu-orriak ekitaldiko kobrantzen eta ordainketen laburpena egiten du eta urte hasieran eta amaieran duen diruzaintzaren eta zorpetzearen berri ematen.
– Lanaren zabalak ez du gastuaren efikazia eta efizientziari buruzko azterlan berariazkorik besarkatu; ezta, kudeaketa-prozedurei buruzkorik ere. Alabaina, fiskalizazioan sortu diren alderdi partzialak txosten honen III. Idazpuruan aztertu ditugu.
Fontechako Kontzejuak 2018ko urtarrilaren 1ean 112 biztanle ditu eta Lantarongo udalerrian dago kokatua, Añanako Kuadrillan.
II.– Ondorioak.
1.– Kontzejuak ez zuen 2018rako aurrekontua egin. Toki entitateen aurrekontuko araudiak (3/2004 FA) agintzen du aurrekontu bat onartu behar dela eta jarduera ekonomikoa aurrekontuaren aurreikuspenetara egokituko dela; gainera, Urteko kontuetan aurrekontuaren likidazioa jasoko da.
2.– 2018ko ekitaldian argindarra hornitzeagatik 38.687 euroren kobrantzak erregistratu ziren; alabaina, ez dago diru-sarrera horiek arautuko dituen ordenantzarik, ez tarifak onartzen dituen erabakirik ere. Egindako irakurketen informazioa ere ez da eskuratu.
3.– Fontechako Kontzejuaren Kontuen liburuak, AFAk Kontzejuen esku jarritako eredu-orriaren arabera egindakoak, ez du 2018ko abenduaren 31n ordaintzeko dauden saldoen berri ematen, 115.499 euroren zenbatekoan.
4.– Fontechako Kontzejuko auzotarren batzordeak 2017ko otsailaren 5ean egindako bileran onartu zuen ongizateko fundazio pribatu batek egindako proposamena, zeinaren arabera 70.000 euroko aurrekontua zuten gastu judizialei aurre egitea bere gain hartuko zuen, trukean Fontechako 2. poligonoko 7. finka –Errege kalea, 21 zk. modura jasoa– Kontzejuari esleituz gero; ez dago, baina, kontraprestazio horren egokitasuna ondorioztatzeko bide emango duen peritu-baloraziorik. Azkenik, Kontzejuak ordaindutako gastu juridikoak 65.151 eurorenak izan ziren.
5.– Administrazio Batzordeak erabaki zuen erregidore-batzarburuak Kontzejuari 30.000 euro aurreratuko zizkiola, likidezia ezaren eta adierazitako gastu judizialei aurre egiteko beharraren ondorioz. Aurrerakina gauzatu zen eragiketa euskarrituko zuen kontratu edo agiririk batere izenpetu gabe, aipatutako erabakia besterik ez zegoela.
6.– Nahiz eta 2018ko itxieran Kontzejuaren zorpetze-bolumenak sarrera arrunten ehuneko ehun eta hamar gainditu, ez zen kapital bizia murrizteko nahitaezko plana onartu, bost urteko gehieneko epean zorraren bolumena zuzentzeko (2018ko urterako ALHko Aurrekontuaren egikaritzari buruzko abenduaren 22ko 21/2017 Foru Arauaren 4. xedapen gehigarria).
III.– Barne-kontroleko sistemei eta kudeaketa-prozedurei buruzko irizpenak.
Atal honetan azpimarratu dira bai ekonomia-finantzaren jarduera arautzen duten printzipioak betetzeari gehiegi eragiten ez dioten akatsak, bai kudeaketa hobetzeko azpimarratu nahi diren prozedurazko alderdiak.
III.1.– Aurrekontua eta kontabilitatea.
– Urteko Kontuak onartu ziren kontu-hartzailetza organoaren nahitaezko txostenak izan gabe eta ez ziren egin merkataritzako zorraren ordainketa-epeak betetzeari buruzko hiruhileko txostenak. Ezargarria zaion araudiaren arabera, Kontzejuaren legezko aholkularitza eta kontu-hartzailetzako egitekoak Lantarongo Udaleko karrerako funtzionario batek bete behar ditu (martxoaren 16ko 128/2018 Errege Dekretua, Estatuan jarduteko gaikuntza duten toki-administrazioko funtzionarioen araubide juridikoa ezartzen duena).
– Kontzejuak egindako Kontuen Liburuak 1.578 euroren saldoa adierazten du 2018ko abenduaren 31n baina ez du bere jabetzako banku-kontu bati buruzko informaziorik ematen.
III.2.– Tasek eragindako diru-sarrerak.
– Kontzejuak ez ditu aplikatzen ur-hornidura eta saneamendu kontzeptuko tasa arautzen duen ordenantza fiskalean jasotako tarifak. Soil-soilik zerbitzuaren kuota finkoak fakturatzen ditu eta ez metro kuboen araberako kontsumoko kuotak.
III.3.– Kontratazioa.
– Kontzejuak ez du kontratatzailearen profila internet bidez zabaldu, ez eta lizitazioen deialdiari eta horren emaitzari buruzko informaziorik argitaratu ere Sektore Publikoko Kontratazioaren Plataforman.
– Kontzejuak egindako gastuak berrikustean ikusi dugu zuzenean esleitu dela gasaren hornidura, 39.822 euroren zenbatekoan; ordea, prozedura ireki erraztu laburtu bidez kontratatu behar zatekeen.
III.4.– Beste alderdi batzuk.
Gardentasuna.
– Kontzejuak bere edo Lantarongo Udalaren webgune edo egoitza elektroniko bitartez hainbat informazio zabaldu behar luke, abenduaren 9ko 19/2013 Legeak, Gardentasunari, informazio publikoa eskuratzeko bideari eta gobernu onari buruzkoak, eskatutakoa.
Inbentarioa.
– Kontzejuaren inbentarioa ez da gaurkotu 2002ko urtean formulatu zenez geroztik.
IV.– Kontuen liburua.