Euskal Herriko Agintaritzaren Aldizkaria

146. zk., 2020ko uztailaren 27a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

KULTURA ETA HIZKUNTZA POLITIKA SAILA

2989

AGINDUA, 2020ko uztailaren 8koa, Kultura eta Hizkuntza Politikako sailburuarena, zeinaren bidez iragartzen eta arautzen baitira 2020. urteko Euskadiko museo eta bildumetarako dirulaguntzak.

Kultura eta Hizkuntza Politika Sailaren egitura organikoa eta funtzionala ezartzen duen apirilaren 11ko 82/2017 Dekretuaren arabera, Kultura Sailburuordetzako Kultura Ondarearen Zuzendaritzari dagokio Euskal Autonomia Erkidegoko museo eta bildumetarako laguntzen sistema kudeatzea.

Beraz, alde horretatik, Kultura Ondarearen Zuzendaritzak egoki iritzi dio laguntzak emateko bideari ekiteari Euskadiko museo eta bildumek beren lanean sustatzen eta garatzen dituzten jarduerak laguntzeko, Euskadiko Museoei buruzko Legearen (abenduaren 1eko 7/2006 Legea) 2.4 artikuluan ezarritakoari jarraikiz. Lege horren azalpenaren arabera, museo-jarduerak gizarte-zerbitzurako kultura-eskaintza gisa garatu behar dira; jarduera biziak eta eraldatzaileak izan behar dira, eta etengabeko eginkizun didaktiko erabakigarria izan behar dute, gizarte-eragileekin eta herritarrekin oro har etengabeko harremanean betiere.

Horregatik guztiagatik, lege-oinarriak mugatzeko tresna bat ezarri beharra dago; batetik, dirulaguntzak emateko prozesuaren objektibotasun-, lehia- eta publikotasun-printzipioak bermatzeko, eta bestetik, behar bezalako mekanismoak egon daitezen, Kultura eta Hizkuntza Politika Sailak funts publikoek xede zuzena dutela ezagutu ahal izateko. Funts horiek, halaber, deialdi honetan ezarritako balioespen-irizpideen arabera esleituko dira, Euskal Autonomia Erkidegoaren Aurrekontu Orokorretan hartarako jasotako aurrekontu-xedapena muga izanik.

Era berean, agindu honen dirulaguntza-lerroa 2018-2020 aldiko Dirulaguntzen Plan Estrategikoan (PES 2018-2020) jasota dago (Kultura eta Hizkuntza Politikako sailburuaren 2018ko urtarrilaren 31ko Aginduaren bidez onetsita, zeinaren bidez onetsi baitzen Sailaren Dirulaguntza Plan Estrategikoa 2018-2020 aldirako), bai eta 2020ko Dirulaguntzen Urteko Planean ere (Kultura eta Hizkuntza Politikako sailburuaren 2020ko urtarrilaren 30eko Aginduaren bidez onetsi zen).

Hori dena kontuan izanik, honako hau

EBAZTEN DUT:

1. artikulua.– Xedea eta helburua.

1.– Agindu honen xedea da Euskadiko Museo eta Bildumen Erregistroan inskribatuta dauden museo eta bildumetarako dirulaguntzak arautzea eta haietarako deialdia egitea; laguntzak 2020. urtean emango dira museo-jarduerak gauzatzeko.

2.– Euskadiko Museoei buruzko abenduaren 1eko 7/2006 Legearen 2.4 artikuluan ezarritako eginkizunak betetzeko jarduerak egiten laguntzea da dirulaguntzen xedea.

3.– Nolanahi ere, jarduerak honako jarduketa-ildo hauetako batean jaso beharko dira:

a) Bilduma osatzen duten funtsak katalogatzea eta dokumentatzea.

b) Erakusketa finkoa berritzea eta aldi baterako erakusketak egitea.

c) Bakoitzaren gaiaren eta jarduketa-eremuaren araberako jarduera didaktikoak eta kultura zabaltzekoak diseinatu eta eskaintzea.

d) Dituzten gai eta jarduketa-eremuarekin lotutako ezagutza sortzea.

e) Berrikuntza hobetu eta bultzatzea museoaren kudeaketan eta zabalpen- eta komunikazio-planean.

f) Bisitarientzako prebentzioko neurri higieniko-sanitarioak, eta museoetako langileei dagokienez, laneko arriskuak prebenitzeko neurriak.

4.– Eskabide bakoitzean ildo bakar bati lotutako proiektu bakar bat aurkeztuko da. Pertsona edo erakunde bakoitzak bi eskabide aurkeztu ahalko ditu gehienez.

Eskabideen xedea gai komun baten inguruko jarduera-programa bat izango da, jarduera nagusi batekin eta beste jarduera osagarri batzuekin, edo jarduera bakar bat; edonola ere, proiektuak aurreko paragrafoan zehaztutako jarduketa-ildoetako batean sailkatua egon beharko du.

Dirulaguntza jaso ahalko dute honako jarduketa hauek, betiere ez badira Kultura eta Hizkuntza Politika Sailak emandako dirulaguntzen beste programa baten xedea.

– Bildumak osatzen dituzten funts material eta immaterialen inbentarioa, katalogatzea eta/edo dokumentazio grafiko edo audiobisuala euskarri digitalean. Oro har, EMSIME informazio-sistema erabiliko da eta, interneten argitaratzen diren katalogazio-fitxak editatzean, bi hizkuntza ofizialak erabiliko dira. Salbuespen gisa, beste aplikazio informatiko batzuk ere erabili ahal izango dituzte funtsak katalogatzeko, baina arrazoiak emanez egiaztatu beharko dute EMSIME sistema erabiltzerik ez dagoela sistemaren datu-eredua ez delako egokia katalogatu beharreko funts motarako. Emaitza, gerora, «Euskariana» eta «Europeana» (Europako Kultura Ondarera linean sartzeko ataria) biltzaileetan gehitu ahal izango da.

– Erakusketa finkoa eguneratzea haren diskurtsoaren edo espografiaren edukiei dagokienez; horren barruan sartzen da eduki osagarri hauek garatu eta ekoiztea: ikus-entzunezkoak, audiogidak edo funtsetara hobeto jo ahal izateko geletan jendeak erabiltzeko dauden bestelako dokumentu-baliabideak. Ez da eguneratze gisa hartuko panelak eta beste elementu museografiko batzuk berritzea diseinua edo edukiak aldatu gabe, eta beraz ezingo dira jarduera horiek diruz lagundu.

– Museoaren lurralde-eremuaren eta/edo gaiaren araberako aldi baterako erakusketak.

– Museoaren gai-eremuarekin zerikusia duten jarduera didaktikoak edo jolas- eta kultura-jarduerak.

– Haien bildumak osatzen duten ondare material eta immaterialari buruzko ikerketa-lanak edo gai-eremuari buruzkoak, haien emaitzak erakusketa-diskurtsora gehitzeko edo museoaren hezkuntza- eta zabalkunde-programara txertatzeko helburuarekin. Agindu honen ondoreetarako, ez dira diruz lagun daitezkeen ikerketa-lantzat hartuko museoaren titularra den pertsonak edo erakundeak Euskal Kultura Ondarearen 6/2019 Legearen 63. artikulutik 74.era bitartekoak aplikatuta nahitaez egin behar dituen esku-hartze arkeologikoak.

– Edizio- eta itzulpen-lanak, museoaren bildumei eta gai-eremuari buruzko zientzia- eta dibulgazio-edukiak, formatu digitalean gutxienez, argitaratzeko (katalogoak, monografiak, aldizkako argitalpenak, ikus-entzunezko eta multimediako produktuak).

– Kudeaketa hobetu eta berritzeko agiriak eta azterlanak egitea: Plan estrategikoak, plan zuzentzaileak, zerbitzu-gutunak, hartzaileei buruzko azterlanak, komunikazio eta marketin kulturaleko planak, museoaren barneko kudeaketari eta jarduera-programazioari begira emakumeen eta gizonen berdintasunaren aldeko aurretiko diagnostikoak eta neurrien plangintza, bai eta inklusibitaterako neurriak ere.

– Museoaren webgunean orriak sortzea eta hobekuntza teknikoak egitea.

– Garbiketa-zerbitzua indartzea lan-, erakusketa- eta zerbitzu-eremuetan, eskuak garbitzeko gel hidroalkoholikoen banagailuak eta manparak erosi eta jartzea, eta bisitetan nahitaez bete beharreko osasun- eta higiene-neurriei buruzko seinaleak jartzea.

– Euskadiko Museoei buruzko 7/2006 Legearen 2.4 artikuluan ezarritako eginkizunen bat artikulu honetan adierazitako ildoetakoren baten barruan garatzen dituen beste edozein jarduera, betiere haren museo-izaera egoki justifikatzen badute eskabidearekin batera aurkeztutako proiektuan, artikulu honen 5. zenbakian adierazitakoak izan ezik.

5.– Jarraian zehaztutako jardueren ondoriozko gastu eta inbertsioak ez dira inola ere diruz lagunduko, eta agindu honen xedetik kanpo geratuko dira: eraikin eta instalazio orokor iraunkorrak erostea, handitzea, birgaitzea, hobetzea edo kontserbatzea; funtsak eskuratzeko eta horiek zaharberritzeko esku-hartzeak, erakusketa-proiektuei eta zabalkunde-jarduerei lotuta daudenean izan ezik; tokiko sustapen turistikoko jarduerak; museoko espazioak hirugarrenei alokatzean oinarritutako jarduera ekonomikoak; hirugarrenentzako ekitaldiak antolatzea; ostalaritza- eta ostatu-zerbitzuak eskaintzea; eta merchandisingeko produktuak saltzeko jarduerak.

6.– Deialdi honetako dirulaguntzak jaso ahal izateko, jarduerak 2020. urtean gauzatu behar dira, hasiera eta amaiera barne.

2. artikulua.– Baliabide ekonomikoak.

Aurreko artikuluan aurreikusitako xederako 780.000 euro erabiliko dira.

3. artikulua.– Onuradunak eta onuradun izateko baldintzak.

1.– Agindu honetan araututako dirulaguntzak eskatu ahal izango dituzte agindu hau Euskal Herriko Agintaritzaren Aldizkarian argitaratzen den egunean Euskadiko Museoen eta Bildumen Erregistroan inskribatutako museoen edo bildumen titular diren pertsona fisiko eta juridikoek, honako hauek baztertuta:

a) Foru-titulartasuneko museoak eta bildumak.

b) Fundazioak, Eusko Jaurlaritzako Kultura eta Hizkuntza Politika Sailak haien gobernu-organoetan parte hartzen badu.

c) Merkataritza-erakundeak, Euskal Autonomia Erkidegoko Administrazio Orokorrak haien kapitalean partaidetza badu.

d) Xede bereko dirulaguntza izendunen hartzaile diren museoen eta bildumen erakunde titularrak, horiek Euskal Autonomia Erkidegoaren 2019rako aurrekontuetan esleituta egonik, Kultura eta Hizkuntza Politika Sailari dagozkion gastu-partidetan. Kudeaketa-organoak automatikoki egiaztatuko du baldintza hori betetzen dela.

e) Beren kapital sozialean, fundazio-ondarean edota gobernu-, administrazio- edo zuzendaritza-organoetan partaidetza handiena banku-fundazio edo finantza- edo kreditu-erakunde batena duten erakundeak.

2.– Ezin izango dituzte deialdi honetako dirulaguntzak eskuratu Dirulaguntzei buruzko azaroaren 17ko 38/2003 Lege Orokorraren 13.2 eta 3 artikuluan aurreikusitako egoeraren batean dauden pertsonek edo erakundeek; besteak beste, egoera hauetan daudenak:

a) Egunean ez izatea zerga-betebeharrak eta Gizarte Segurantzarekikoak.

b) Ordainduta ez izatea dirulaguntzak itzultzeko betebeharrak.

c) Dirulaguntza edo laguntza publikoak eskuratzea galarazten duen zehapen penal edo administratiboren bat izatea, edo horretarako desgaitzen duen legezko debeku baten pean egotea.

3.– Dirulaguntzen onuradun izateko aurreko apartatuetan adierazitako baldintzak laguntza-eskabidea aurkezten denetik bete beharko dira, eta hala egin beharko da onartutako dirulaguntza likidatu arte.

4. artikulua.– Baldintzak egiaztatzea.

1.– Zerga-betebeharrak eta Gizarte Segurantzarekiko ordainketenak betetzen direla automatikoki egiaztatuko du organo kudeatzaileak eskabidea aurkezten denean eta, dagokionean, egin beharreko ordainketen aurretik. Pertsona eskatzaileek egiaztatze automatiko horren kontra daudela adierazi ahal izango dute espresuki. Hori egitekotan, Ogasuneko eta Gizarte Segurantzako instantzia administratiboek emandako ziurtagiriak aurkeztu beharko dituzte.

2.– Eskabidean jasotako erantzukizunpeko adierazpen bidez egiaztatuko dira gainerako baldintzak.

5. artikulua.– Dirulaguntza jaso duten jardueren azpikontratazioa.

1.– Pertsona edo erakunde onuradunak hirugarrenekin azpikontratatu ahal izango du diruz lagundutako jarduera osoa edo zati bat, betiere azpikontratazio horrek diruz lagundutako jardueraren kostua balio erantsirik gabe handitzea ez badakar. Ondore horietarako, azpikontratazioa dagoela ulertuko da erakunde onuradunak hirugarrenekin hitzartzen badu dirulaguntzaren xede den jarduera guztiz edo zati batez gauzatzea. Kontzeptu horretatik kanpo gelditzen dira erakunde onuradunak dirulaguntza jaso duen jarduera bere kontura gauzatu ahal izateko egin behar dituen gastuak.

2.– Alabaina, erakunde onuradunak ezingo du diruz lagundutako jarduera zati batez gauzatzea honako hauekin hitzartu:

a) Agindu honen 3. artikulua aplikatuz dirulaguntza hauetatik baztertuta dauden pertsona edo erakundeekin.

b) Dirulaguntzei buruzko 38/2003 Lege Orokorraren 13. artikuluak ezarritako debekuren bat duten pertsona edo erakundeekin.

c) Kontratuaren xede den jarduera egiteko beste dirulaguntza batzuk jaso dituzten pertsona edo erakundeekin.

d) Bitartekari edo aholkulari aritzen diren pertsona edo erakundeekin, haien kontratuetan ordainketak eragiketaren kostu totalaren ehuneko gisa definitzen badira; non eta ordainketa hori ez dagoen justifikatuta egindako lanak edo emandako zerbitzuak merkatuan daukan balioaren erreferentziaren arabera.

e) Pertsona edo erakunde onuradunarekin lotutako pertsona edo erakundeekin, Dirulaguntzei buruzko 38/2003 Lege Orokorraren 29.7 artikuluko d) letran adierazitako baldintzak daudenean izan ezik.

f) Deialdi edo programa berean laguntza edo dirulaguntza eskatu, baina betekizunak betetzen ez dituztelako edo behar den balorazioa lortu ez dutelako laguntzarik gabe geratu diren pertsona edo erakundeekin.

3.– Sektore Publikoko Kontratuei buruzko Legearen testu bategina onartzeko azaroaren 8ko 9/2017 Legean (Lege horren bidez Espainiako ordenamendu juridikoan txertatu ziren Europako Parlamentuko eta Kontseiluko 2014ko otsailaren 26ko 2014/23/EB eta 2014/24/EB Zuzentarauak) kontratu txikirako ezarritako zenbatekoak gainditzen dituenean diruz lagundu daitekeen gastuaren zenbatekoak, pertsona edo erakunde onuradunak, zerbitzua edo ondasuna emateko konpromisoa hartu aurretik, pertsona edo enpresa hornitzaile desberdinen hiru eskaintza eskatu beharko ditu gutxienez, salbu eta ezaugarri bereziak izateagatik merkatuan ez badago halako zerbitzurik eskaintzen duen nahikoa erakunde, edo salbu eta gastua dirulaguntza eskatu aurretik egin bada.

Aurkeztutako eskaintzen arteko hautaketa (eskaintza horiek justifikazioan aurkeztuko dira), efizientzia- eta ekonomia-irizpideei jarraikiz egingo da, eta memoria batean berariaz justifikatu beharko da proposamen ekonomikoki abantailatsuena hautatzen ez denean.

4.– Dena den, Dirulaguntzei buruzko Lege Orokorraren (azaroaren 17ko 38/2003 Legea) 29. artikuluan xedatutakoa beteko dute.

6. artikulua.– Diruz lagun daitezkeen eta lagundu ezin diren gastuak.

1.– Diruz lagun daitezkeen gastutzat hartuko dira diruz lagundutako jardueraren izaerari zalantzarik gabe erantzuten diotenak, ezinbestekoak direnak eta deialdi honetan eta emateko ebazpenean edo hark izan ditzakeen aldaketetan ezarritako epearen barruan egiten direnak. Inola ere, diruz laguntzeko moduko gastuak eskuratzeko kostua ezin izango da izan merkatuko balioaren gainetikoa. Egindako gastutzat hartuko dira justifikatzeko epea amaitu aurretik egiazki ordaindu direnak.

2.– Zeharkako kostuak, erakunde onuradunak diruz lagundutako jarduerari oro har onartutako kontabilitate-printzipioei eta arauei jarraikiz arrazoiz dagokion partean egozten badizkio baino ez dira diruz laguntzeko modukoak, eta, edozelan ere, jarduera egin egiten den aldiari badagozkio kostu horiek. Eskabidearekin batera aurkezten duten aurreikusitako gastuen aurrekontuan halakotzat jaso eta zenbatuta egon beharko dira horiek, nolanahi ere. Justifikatu ere egin beharko dituzte.

3.– Diruz lagundutako jarduera egiten duten eremuak estetikoki edo funtzionalki egokitzeko lan txikiek eragindako gastu korronteak diruz laguntzeko modukoak izango dira, betiere proiektuan ezinbestekoak direla justifikatzen badute eta eskabidearekin aurkeztutako aurrekontuan adierazita badaude. Diruz lagundu daitekeen gastutzat hartu hala izango da, halaber, erakusketa-espazioetako argiztapena argi hotzeko sistemara egokitzea, funtsak kontserbatzeko edo museografia hobetzeko justifikatuta dagoenean.

4.– Honako gastu hauek, berriz, ez dira diruz lagunduko:

– BEZaren zenbatekoa, berreskuratu edo konpentsatzeko modukoa denean. Horrelakoetan, gastu gisa egotz daitekeen zenbatekoa egiaztagirien zerga-oinarriari dagokiona izango da. Autonomoen fakturei dagokienez, diruz lagun daitekeen gastua zerga-oinarria edo guztizkoa izango da, kasuaren arabera, baina, nolanahi ere, PFEZaren atxikipena aplikatu gabe, onuradunak Ogasunari ordaintzean egindako gastua baita.

– Eraikina eta instalazio orokor iraunkorrak handitu, hobetu, eraberritu edo kontserbatzea xedetzat duten ibilgetu materialeko inbertsioak diren gastuak.

– Langileen gastuak, dirulaguntzaren xede den jarduerari zuzenean ordurik egotzi ezean.

5.– Pertsona edo erakunde eskatzaileak aurkeztutako aurrekontuan –Euskal Autonomia Erkidegoko Administrazio Publikoaren egoitza elektronikoan eskuragarri dagoen eredu normalizatuaren arabera aurkeztuta– artikulu honetan diruz laguntzeko modukoak ez diren gastuak biltzen badira, balioespen-batzordeak desagerrarazi edo kendu egingo ditu, diruz laguntzeko moduko gastuen aurrekontua zenbatekoa den zehazteko; aurrekontu hori dirulaguntzaren zenbatekoa ezartzeko oinarria izango da.

6.– Betiere, Dirulaguntzei buruzko azaroaren 17ko 38/2003 Lege Orokorraren 31. artikuluan xedatutakoa beteko dute.

7. artikulua.– Dirulaguntzen zenbatekoa eta muga.

Diruz lagundutako proiektu bakoitzeko gehieneko dirulaguntza aurkeztutako aurrekontu osoaren % 90 izango da (45.000 euro gehienez). Diruz lagun daitekeen gehieneko zenbatekoa baino gehiago eskatuz gero, dirulaguntzaren zenbatekoa kalkulatzeko, diruz lagun daitekeen gehieneko mugara doituko da. Pertsona edo erakunde onuradun bakoitzaren diruz lagundutako proiektuen baturaren gehieneko zenbatekoa 90.000 eurokoa izango da.

8. artikulua.– Dirulaguntzak emateko prozedura.

1.– Deialdi hau lehiaketa bidez ebatziko da. Horretarako, aurkeztutako eskabideak alderatuko dira dirulaguntzak emateko, 14. artikuluan finkatutako balioespen-irizpideei jarraikiz haien arteko lehentasuna finkatzearren. Guztira gutxienez 60 puntu lortu dituztenei bakarrik emango zaie laguntza.

2.– Dirulaguntza bakoitzaren zenbatekoa finkatzeko, deialdiari zuzendutako gehieneko diru-kopuru osoaren hainbanaketa egingo du Balioespen Batzordeak, gutxienez 60 puntu lortu dituzten eskabideen artean. Betiere, dirulaguntzaren zenbatekoak ezingo du izan eskatutako zenbatekoa edo 7. artikuluan ezarritako mugak baino handiagoa.

a) Banaketa hori egiteko, kontuan hartuko dira lortutako puntuazioa eta eskatutako zenbatekoa, formula hau erabiliz:

(Ikus .PDF)

non,

Si = programa edo jarduera bakoitzari dagokion dirulaguntzaren zenbatekoa.

Ei = kasu bakoitzean eskatutako laguntzaren zenbatekoa.

Pi = Batzordeak programa edo jarduera bakoitzari emandako puntuazioa.

b) Baldin eta aurreko atalean ezarritako prozeduraren arabera kalkulatutako zenbatekoen baturak aurrekontu-muga gainditzen badu, kasu bakoitzean eman beharreko laguntzaren zenbatekoa formula honen bidez zehaztuko da:

(Ikus .PDF)

non,

Si’ = Programa edo jarduera bakoitzari dagokion behin betiko zenbatekoa.

D = Dirulaguntzaren helburu diren programa edo jardueren artean banatu beharreko zenbatekoa.

Si = Aurreko formularen arabera programa edo jarduera bakoitzari dagokion dirulaguntzaren hasierako zenbatekoa.

9. artikulua.– Eskabideak aurkeztea.

1.– Eskabideak aurkezteko epea hilabetekoa izango da, agindu hau argitaratu eta hurrengo egunetik hasita.

2.– Pertsona fisiko interesdunek bitarteko elektronikoak nahiz presentzialak erabili ahal izango dituzte prozedura honetako izapide guztiak eskatu, kontsultatu eta gauzatzeko, hala xedatuta baitago Administrazio Publikoen Administrazio Prozedura Erkidearen Legearen (urriaren 1eko 39/2015 Legea) 14. artikuluan. Pertsona juridikoek, ordea, bitarteko elektronikoak erabili beharko dituzte, nahitaez, prozedura administratiboaren edozein izapide egiteko.

3.– Eskabideak, halaber, bitarteko elektronikoz aurkeztu ahal izango dira egoitza elektronikoan (www.euskadi.eus) eta Administrazio Publikoen Administrazio Prozedura Erkidearen Legearen (urriaren 1eko 39/2015 Legea) 16.4 artikuluan jasotako erregistro elektronikoetan:

Eskaerak aurrez aurre ere aurkeztu ahal izango dira, Zuzenean zerbitzuan, aurretik hitzordua eskatuta (https://www.euskadi.eus/hitzordua-zuzenean EAEko erregistro osagarrietan (Euskal Autonomia Erkidegoko Administrazio Orokorraren eta haren erakunde autonomoen erregistroen sorrera, antolaketa eta funtzionamenduari buruzko apirilaren 29ko 72/2008 Dekretuan jasotakoetan) edo Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan aurreikusitako organoetan. Eusko Jaurlaritzaren Egoitza Elektronikoan (www.euskadi.eus) eskuratu ahal izango da eskabide-eredua.

4.– Pertsona fisikoek, eskaera egiteko eta dokumentuak aurkezteko bide presentziala edo elektronikoa erabiltzen badute, ez dituzte nahitaez baliabide horiek erabili behar prozeduraren ondorengo izapideetan, edozein unetan alda daitezke eta.

Eskaeraren osteko izapideak helbide honetan egingo dira, bide elektronikoz: https://www.euskadi.eus/nirekarpeta/

5.– Eskaerak, erantzukizunpeko adierazpenak eta gainerako ereduak aurrez aurre nahiz bide elektronikoz izapidetzeko zehaztapenak eskuragarri daude egoitza elektroniko honetan: https://www.euskadi.eus/zerbitzuak/0037508. Bide hori erabilita aurkeztutako eskaera elektronikoak baino ez dira onartuko, eta ez dira onartuko erregistro elektroniko orokorraren inprimakiaren bidez aurkezten direnak.

6.– Erakunde edo pertsona eskatzaileek euskaraz edo gaztelaniaz aurkez dezakete eskabidea eta dokumentazioa, aukeran. Halaber, pertsona edo entitate eskatzaileak aukeratzen duen hizkuntza hori erabiliko da prozedura osoan, hala xedatuta baitago Euskararen Erabilpena Arautzen duen azaroaren 24ko 10/1982 Oinarrizko Legearen 5.2.a) eta 6.1 artikuluetan.

7.– Identifikaziorako eta sinadura elektronikorako bitartekoak, Euskal Autonomia Erkidegoko Administrazio Publikoaren egoitza elektronikoan onartutakoak, helbide honetan daude eskuragarri: https://www.euskadi.eus/ziurtagiri-elektronikoak

8.– Hirugarrenen alta elektronikoki izapidetu daiteke (hala egin beharko dute izapideak elektronikoki egitera behartuta daudenek), eta, horretarako, egoitza elektronikoaren helbide honetan eskuragarri dagoen zerbitzua erabiliko da: https://www.euskadi.eus/hirugarrenak

9.– Izapidetze elektronikoa ordezkari baten bidez ere egin ahal izango da, eta, horretarako, ordezkaritza hori Eusko Jaurlaritzaren Ordezkarien Erregistroan inskribatu beharko da, helbide honetan: https://www.euskadi.eus/ordezkariak

10. artikulua.– Eskaerarekin batera aurkeztu beharreko agiriak.

1.– Nahitaez aurkeztu behar dira honako agiri hauek:

a) Eskabidea. Laguntzen onuradun izateko 4. artikuluan ezarritako baldintzak egiaztatzeko behar diren erantzukizunpeko adierazpenak jasoko dira inprimaki honetan, baita beste erantzukizunpeko adierazpen bat ere, eskabidean eta aurkeztutako agirietan jasotako datuak egiazkoak direla adierazita. Eskabide-inprimakian erantzukizunpeko adierazpen bidez jasoko da, orobat, pertsona edo erakunde eskatzaileak BEZaren aitorpena egin behar duen edo zerga hori ken edo konpentsa dezakeen.

Pertsona fisikoek aurkeztutako eskabideen kasuan, eskabidean espresuki kontra egiten bazaio nortasun-datuak automatikoki egiaztatzeko aukerari, eskaeraren titularraren eta/edo, dagokionean, ordezkariaren NANaren fotokopia aurkeztu beharko da nahitaez.

b) Proiektuaren Datuen inprimakia, honako hauek jasota:

– Proiektuaren memoria; Agindu honen 14. artikuluaren a), b) eta c) letretan adierazitako irizpideei jarraikiz balioetsiko da. Memoriak honako alderdi hauek aipatu beharko ditu diruz laguntzeko eskaera egiten duen jarduerari dagokionez:

Proposatutako jardueraren justifikazio orokorra, haren helburu espezifikoek zer lotura duten museoaren Urteko Jarduera Planean ezarritako helburu orokorrekin azalduta.

Jardueraren ezaugarrien deskribapen zehatza: formatua, edukia, jardueraren publikoa edo hartzaileak, esku hartzen duten giza baliabideak (kopurua, kualifikazioa eta esperientzia, beren langileak edo kanpokoak diren), erabilitako hizkuntzak eta gauzatzeko kronograma (faseak, zereginak eta esku hartzen duten pertsonak), bai eta garrantzitsu deritzeten bestelako alderdi teknikoak ere.

Berrikuntzara edo hobekuntzara bideratuta egotearen justifikazioa, dagokionean aurreikusitako ebaluazio-sistema deskribatuz. Sistema hori espezifikoa edo museoaren jarduera orokor edo globalaren ebaluazio sisteman integratutakoa izan daiteke, eta haren xedea garapenaren emaitzak eta/edo prozesua izan daitezke.

Hala dagokionean, jarduerak kulturaren, hezkuntzaren, zientziaren eta gizartearen arloko beste eragile batzuekin duen lotura-mailaren justifikazioa.

Dirulaguntzaren xede den proiektuak emakumeen eta gizonen arteko berdintasunaren alde zer eduki duen.

– Jardueraren diru-sarreren eta gastuen guztizko aurrekontua; orekatua izango da, eta, hala dagokionean, beren langileen gastuak, kanpoko zerbitzuen gastuak, hornidurak eta zeharkako kostuak bereizi beharko ditu. Diru-sarreren atalean, eskatutako dirulaguntza eta laguntza publiko eta pribatu guztien zenbateko osoa adieraziko dute, baita pertsona edo erakunde eskatzaileak bideratutako baliabide propioak eta aurreikusitako gastuen zenbateko osoa estali arteko beste edozein diru-sarrera mota ere. Proiektuaren xedea jarduera bat baino gehiago barnean dituen programa bada, kostuak jarduera bakoitzeko taldekatuta zehaztuko dituzte, jarduera bakoitzari dagokion guztizko partziala kalkulatu ahal izan dadin. Halaber, zerga-oinarriaren zenbatekoa eta dagokion BEZa ere zehaztuko dituzte, hala dagokionean. Aurrekontuaren edukia agindu honen 14. artikuluko d) irizpideari jarraikiz balioetsiko da.

– Hala dagokionean, erakundeak beste administrazio nahiz erakunde publiko zein pribatuetatik xede berarekin eskatu edo eskuratu dituen dirulaguntzak, laguntzak, diru-sarrerak edo bestelako baliabideak zehatz-mehatz azaltzeko atala ere beteko dute.

c) Museoaren jardueraren memoria, 2019. urteari dagokion urteko jarduketa-planarekin lotuta. Memoria horretan museoaren jarduketaren helburuak, egindako jarduerak eta emaitzak jasoko dira gutxienez, eta posible denean, eragin kulturala, zientifikoa, soziala eta/edo ekonomikoa neurtzen duten adierazle objektiboen bidez deskribatuko dira. Agiri hori erabiliko da 14. artikuluko e) apartatuan adierazitako irizpidea balioesteko.

2.– Gainera, beste agiri osagarri batzuk aurkeztu ahalko dira, eranskin gisa, Proiektuaren Datuen Inprimakian jasotako informazioa zabaltzeko edo hari buruzko irudiak emateko, Proiektuaren Datuen Inprimakian editatu ezin diren objektuak daudenean (irudiak, taulak, kalkulu-orriak, grafikoak, bideoak eta abar). Kasu horretan, Proiektuaren Datuen Inprimakian dagokion erreferentzia egingo zaio eranskinean zabaldutako informazioari.

11. artikulua.– Laguntzen kudeaketa.

Kultura Ondarearen Zuzendaritzak kudeatuko ditu deialdi honetan aurreikusten diren dirulaguntzak.

12. artikulua.– Aurkeztutako eskabideetako akatsak zuzentzea.

1.– Ikusiz gero eskabidea izapidetzea onartzeko eskatzen diren agiri batzuk falta direla edo agirietan forma-akatsak daudela, edo eskabidea balioesteko aurkeztutako agirietan akatsak aurkituz gero, hamar egun balioduneko epea emango zaio interesdunari huts-egitea konpontzeko edo aginduzko agiriak aurkezteko, eta jakinaraziko zaio hori egin ezean haren eskabidean atzera egin duela ulertuko dela edo izapidetzeko eskubidea galdu duela; betiere, aurrez dagokion ebazpena emango da.

2.– Agindu honi jarraikiz eskabidea bitarteko elektronikoz aurkeztu behar duen eskatzaileren batek eskabidea modu presentzialean aurkezten badu, bitarteko elektronikoz aurkeztuz hori zuzentzeko eskatuko zaio. Horretarako, zuzenketa egin zen eguna hartuko da eskabidearen aurkezpen-eguntzat.

13. artikulua.– Balioespen Batzordea.

1.– Eskabideak aurkezteko aldia amaituta, Balioespen Batzorde bat eratuko da, eskabideak onartu eta baztertzeko eta laguntza-eskaeren xede diren jarduerak balioesteko. Kide hauek izango ditu batzorde horrek:

– Kultura Ondarearen zuzendaria. Batzordeburua izango da eta kalitate-botoa izango du, boto-berdinketa gertatuz gero azken erabakia emateko. Postua hutsik dagoenean, zuzendaria azaltzen ez denean edota gaixorik dagoenean, edo legezko beste arrazoiren bat izanez gero, Sektore Publikoaren Araubide Juridikoaren Legearen (urriaren 1eko 40/2015 Legea) 19.2 artikuluan ezarritakoari jarraikiz ordeztuko da.

– Kultura Ondarearen Zuzendaritzako teknikari bat.

– Agindu honen xede den gaiko aditu bat edo bi, Kulturako sailburuordeak izendatuta. Batzordekideak izango dira.

– Kultura Ondarearen Zuzendaritzako Aholkularitza Juridikoko langile bat, Kulturako sailburuordeak izendatuta. Batzordeko idazkaria izango da, eta hitza izango du, baina botorik ez. Idazkariaren egitekoa izango da kide anitzeko organo horren jarduketen legezkotasun formala eta materiala zaintzea, haren jarduketak ziurtatzea eta eraketarako nahiz erabakiak hartzeko prozedura eta arauak errespetatzen direla bermatzea.

Era berean, gai zehatzak aztertzeko Balioespen Batzordearen bileretan parte har dezakete bertaratuen gehiengoak onartzen dituen eta jorratu beharreko gaiari buruz jantzita dauden pertsona guztiek, eta hitz egin ere bai, baina botorik ezin izango dute eman.

2.– Balioespen Batzordearen osaera Kulturako sailburuordearen ebazpen bidez jakinaraziko da, eta Euskal Herriko Agintaritzaren Aldizkarian argitaratuko da, batzordea eratu aurretik.

3.– Balioespen Batzordeko kideak abstenitu egingo dira eta ezetsiak izan daitezke, Sektore Publikoaren Araubide Juridikoaren Legearen (urriaren 1eko 40/2015 Legea) 23. eta 24. artikuluetan ezarritako kasuetan.

4.– Balioespen Batzordeko kideak izendatzeko orduan, ahaleginak egingo dira gizon eta emakume kopurua berdintsua izan dadin, Emakumeen eta Gizonen Berdintasunerako Legearen (otsailaren 18ko 4/2005 Legea) 23. artikuluan ezarritakoarekin bat etorriz.

5.– Batzordeak dagokion ebazpen-proposamena egingo dio Kulturako sailburuordeari, agindu honen 14. artikuluan ezarritako balioespen-irizpideak oinarri hartuta.

14. artikulua.– Balioespen-irizpideak.

Aurkeztutako eskabideak irizpide hauei jarraikiz ebaluatuko ditu Balioespen Batzordeak:

a) Proiektuaren eduki teknikoaren interesa eta kalitatea, 0 eta 35 puntu bitartean. Osotara balioetsiko da honako azpi-irizpide hauek aintzat hartuta:

– Jardueraren xehetasunen maila eta deskribapenaren eta plangintzaren barne-koherentzia. Gehienez, 25 puntu.

– Berrikuntzara eta hobekuntzara bideratuta egotea, plangintzan jarduera garatzeko eta gauzatzeko prozesua edo jardueraren emaitzak ebaluatzeko sistema txertatuta. Gehienez, 10 puntu.

b) Jarduerak edo museoaren programazioak kulturaren, hezkuntzaren, zientziaren eta gizartearen arloko beste eragile batzuekin duen lotura-maila, ingurunearekiko loturak sendotzeko eta haren eragina handitzeko. Gehienez, 10 puntu.

c) Dirulaguntzaren xede den proiektuak emakumeen eta gizonen arteko berdintasunaren alde zer eduki duen. Gehienez, 5 puntu. Proiektuak baldintza hauetakoren bat bete beharko du; puntuazioa modulatu egingo da, gauzatzearen konplexutasunaren eta proposatutako edukiaren irismen potentzialaren arabera:

– Jarduerak berak xede nagusitzat du emakumeen eta gizonen arteko berdintasunaren aldeko ekintza positibo bat egitea.

– Proiektuan, egin nahi diren jarduerei buruzko berdintasun-diagnostiko bat txertatu da.

– Ikuspegi estereotipatuak desagerraraztea eta genero-rolak apurtzea sustatzen duen eduki teknikoa du proiektuak.

– Erakunde onuradunak konpromisoa hartzen du dirulaguntza justifikatzeko aurkeztu beharreko jarduera-memorian proiektuarekin zerikusia duen pertsonei buruzko informazioa sexuaren arabera bereizteko.

d) Aurrekontuari dagokionez, xehetasun-maila eta arrazoizkotasuna gastuak jardueraren ezaugarrien arabera banakatzean, eta diru-sarrerei dagokienez, eskatutako dirulaguntza ez diren baliabide propioen eta kanpokoen proportzioa. Gehienez, 25 puntu.

– Aurrekontuaren xehetasun-maila eta arrazoizkotasuna, jardueraren eduki eta irismenarekin lotuta: 0 eta 15 puntu artean. Eskala honen arabera emango dira:

(Ikus .PDF)

– Eskatutako dirulaguntzaz besteko baliabideekin finantzatzen den jardueraren ehunekoa. Gehienez 10 puntu, eskala honen arabera modu proportzionalean banatuta:

(Ikus .PDF)

e) Erakundeak azkenaldian izandako ibilbideari dagokionez, museoaren edo bildumaren jarduera-memoriaren bidez balioetsiko da, 2019. urteari dagokion jarduera-planaren arabera; gehienez, 25 puntu.

Puntuazioa modu global batean emango da, dokumentuak ematen duen informazioaren zehaztasun- eta xehetasun-mailari erreparatuz, eta kontuan hartuta bertan jarduketaren emaitzaren ebaluaziorako adierazle objektiboak txertatu diren, eragin kultural, zientifiko, sozial eta ekonomikoari dagokionez.

f) Museo eta bildumek lortutako puntuazioari 1,05eko koefiziente biderkatzailea aplikatuko zaio Euskadiko Museo eta Bilduma gisa aitortu badira Euskadiko Museoei buruzko 7/2006 Legearen II. kapituluan ezarritakoarekin bat etorriz, bai eta 132/2011 Dekretuaren III. eta IV. kapituluetan ezarritakoarekin bat etorriz ere (Euskadiko Museo eta Bildumen Erregistroaren antolamenduari eta funtzionamenduari buruzko araudia onartu eta museo edo bilduma bat «Euskadiko Museoa» edo «Euskadiko Bilduma» dela onartzeko aitorpena arautzen du dekretu horrek).

15. artikulua.– Beste dirulaguntza edo laguntza batzuekiko bateragarritasuna.

Deialdi honetan aurreikusitako dirulaguntzak bateragarriak dira beste erakunde publiko edo pribaturen batek helburu bererako emandako dirulaguntzekin edo beste edozein diru-sarrera edo baliabiderekin, baldin eta gehiegizko finantzaziorik ez badago. Izan ere, gainfinantzaketarik gertatuz gero, dagokion gehienezko mugaraino murriztuko da dirulaguntzaren zenbatekoa.

16. artikulua.– Ebazpena.

1.– Kulturako sailburuordeak ebatziko ditu deialdi honetan aurreikusitako dirulaguntzak, Balioespen Batzordeak helarazitako proposamena aztertu ondoren, eta, gehienez, sei hilabeteko epean jakinaraziko du ebazpena, agindu honek ondorioak sortzen dituen egunetik aurrera. Ebazpenak emandako dirulaguntza guztiak zein ukatutako eta onartu gabeko eskabideak jasoko ditu. Emandako dirulaguntzan jasotako diruz lagun daitekeen gastuaren zenbatekoa txikiagoa bada aurkeztutako aurrekontuaren zenbatekoa baino, diruz laguntzeko modukoak ez direla iritzita zer gastu baztertu diren jasoko da ebazpenean.

2.– Ebazpen hori Eusko Jaurlaritzako egoitza elektronikoaren iragarki-taula elektronikoan argitaratuko da, pertsona interesdunei haren berri eman dakien. Pertsona edo erakunde interesdunak eskabidean aurretik emandako gailu elektronikora eta/edo helbide elektronikora oharra bidaliko zaio, ebazpena argitaratu dela jakinarazteko. Abisu hori ez emanagatik ere, jakinarazpena guztiz baliozkoa izango da. Ebazpena «Nire karpeta» aplikazioaren bidez jakinaraziko da, Euskal Autonomia Erkidegoko Administrazio Publikoaren egoitza elektronikoan: https://www.euskadi.eus/nirekarpeta

3.– Ebazpen-epea igarota, pertsona interesdunari ebazpena jakinarazi ez bazaio, eskabidea ezetsi zaiola ulertuko da, hala xedatzen baita Herri Administrazioen Araubide Juridikoaren eta Administrazio Prozedura Erkidearen Legean (urriaren 1eko 39/2015).

4.– Erakunde onuradunei dirulaguntza horiek emateko, eta, bidezko denean, ordaintzeko, ezinbestekoa izango da amaiera ematea Euskal Autonomia Erkidegoko Administrazio Orokorrak eta haren erakunde autonomoek emanda dauzkaten izaera bereko laguntzen edo dirulaguntzen arloan hasi eta oraindik izapidetzen ari diren itzulketa- edo zehapen-prozedura guztiei.

17. artikulua.– Onuradunen betebeharrak.

Deialdi honetan arautzen diren dirulaguntzen pertsona edo erakunde onuradunek betebehar hauek izango dituzte:

a) Emandako dirulaguntza onartzea. Era horretan, dirulaguntza onartutzat hartuko da pertsona edo erakunde onuradunek horri berariaz uko egiten ez badiote hamar egun balioduneko epean, dirulaguntza ematen duen ebazpena argitaratzen denetik aurrera zenbatuta.

b) Dirulaguntza eman den xederako erabiltzea.

c) Ogasun eta Ekonomia Saileko Kontrol Ekonomikoko Bulegoari eta Herri Kontuen Euskal Epaitegiari dirulaguntzen fiskalizazio-lanetarako behar duten informazio guztia ematea.

d) Publikoarekiko harreman ahozko zein idatzietan euskararen erabilera bermatzea.

e) Diruz lagundutako jardueran sortutako dokumentazio, publizitate, irudi edo material guztietan sexismorik gabeko hizkera erabili behar da, emakumeen kontrako bereizkeria edo estereotipo sexistak bultzatzen dituzten irudiak saihestu behar dira, eta berdintasunaren aldeko irudiak sustatu behar dira, presentzia orekatua, aniztasuna, erantzunkidetasuna eta rol eta genero-identitateen pluraltasuna sustatzen dutenak.

f) Emateko ebazpena argitaratzen den egunetik aurrera Eusko Jaurlaritzako Kultura eta Hizkuntza Politika Sailaren babesa aipatu beharko dute, eta haren logotipoa jaso beharko dute diruz lagundutako proiektuak zabaltzeko erabiltzen dituzten material guztietan.

g) Arau hauetan xedatutako obligazioak betetzea kasu guztietan: 38/2003 Lege Orokorra, azaroaren 17koa, Dirulaguntzei buruzkoa, 14. eta 46. artikuluak; 1/1997 Legegintzako Dekretua, azaroaren 11koa, Euskadiko Ogasun Nagusiaren Antolarauei buruzko Legearen testu bategina onartzen duena, 50.2 artikulua.

18. artikulua.– Dirulaguntzen ordainketa.

1.– Agindu honen babesean emandako dirulaguntzak zatituta ordainduko dira, zehazki, bi ordainketa eginez. Honela egingo dira ordainketak:

a) Lehenengoan, emandako dirulaguntzaren zenbatekoaren % 50 ordainduko da, 17 a) artikuluan adierazitako epean dirulaguntzari uko egin ez bazaio.

b) Bigarren ordainketan, zenbatekoaren gainerakoa emango zaie, 2021ean, onuradunak diruz lagundutako jarduketa eta haren benetako kostua 19. artikuluan adierazitako eran justifikatu ondoren.

2.– Ez da inolako ordainketarik egingo onuradunak egunean ez baditu zerga-betebeharrak eta Gizarte Segurantzarekikoak, edo itzulketa-ebazpen batek adierazita zordun bada.

19. artikulua.– Dirulaguntza justifikatzea.

Dirulaguntzei buruzko Lege Orokorraren (azaroaren 17ko 38/2003 Legea) 30. artikuluarekin bat etorriz, agindu honetan emandako dirulaguntzen pertsona edo erakunde onuradunek diruz lagundutako jardueren justifikazioko kontua aurkeztu beharko dute dena delako jarduera edo proiektua amaitu ondorengo hiru hilabeteko epearen barruan. Nolanahi ere, 2021eko martxoaren 31 izango da justifikazioa aurkezteko epearen azken eguna. Justifikazioko kontuak honako dokumentazio hau jaso beharko du:

a) Dirulaguntza ematean ezarritako baldintzak bete dituztela justifikatzeko jarduketa-memoria, egindako jarduerak eta lortutako emaitzak zehatz-mehatz azalduta. Memoria horren barruan, edo bereiz erantsita, jardueraren gauzapena edo emaitzak egiaztatzen dituzten irudiak ere aurkeztuko dituzte. Horretarako, aukeran, egoitza elektronikoan eskuragarri dagoen «justifikazio-memoria» izeneko inprimakia ere erabili ahal izango dute.

b) Egindako jardueren kostua justifikatzen duen memoria ekonomikoa, honako hauek jasota:

– Jardueraren diru-sarreren eta gastuen balantze orokorra. Egoitza elektronikoan dagoen «Balantzea» izeneko inprimakia bete edo eredu gisa erabiliko dute. Beste dirulaguntza edo diru-sarrerarik jaso ez badute, dagokion erantzukizunpeko adierazpena egingo dute justifikazioa aurkezteko inprimakian.

– Egindako gastuen zerrenda sailkatua, hartzekoduna eta dokumentua zehaztuta, baita alderdi hauek ere: zenbatekoa, jaulkipen-data, jarduerari egotzitako gastuaren zenbatekoa (hala dagokionean, zerga-oinarria eta BEZa banakatuko dira) eta, behar denean, ordainketa-data. Balantzea izeneko inprimakian jasotako taularen bidez egin ahalko da, edo bereiz aurkeztu, kalkulu-orri batean, betiere datu-eredu berari jarraituta.

– Egindako gastuen zerrendan jasotako zeharkako kostuak banatzeko irizpideak, halako kosturik badago.

– Diruz lagundutako jarduera finantzatu duten beste diru-sarrera edo dirulaguntza batzuen zerrenda zehatza, zenbatekoa eta jatorria adierazita.

– Gastuak egiaztatzea fakturen, langileen nominen eta abarren bitartez edo merkataritzako trafiko juridikoan froga-balio bera duen edota administrazio-eraginkortasuna duen beste edozein dokumentu gastuen zerrenda sailkatuan erantsiz.

c) Hala badagokio, pertsona edo erakunde onuradunak, agindu honen 5. artikulua aplikatuz, eskatu behar zituen hiru aurrekontuen kopia, edo horiek ez aurkeztea justifikatzen duen memoria, betiere 5. artikulu horretan ezarritako salbuespenekin bat etorriz.

d) Jarduerara erakunde onuradunaren langileen iraunkorren gastuak egotziz gero, erakunde onuradunaren erantzukizunpeko adierazpena; horretan, pertsona bakoitzeko, egindako zereginak, jarduerara egotzitako ordu kopurua eta dagokien kostua zehaztuko dituzte. Erakunde onuradunak jarduera egiteko langileak aldi baterako kontratatu baditu, dagokien kontratuaren kopia; bertan jarduera zehatza eta zer eginkizun egiteko kontratatu dituzten azalduko dute.

20. artikulua.– Likidazio-ebazpena.

Dirulaguntza ematerakoan kontuan hartutako baldintzak aldatzen badira –betiere dirulaguntzaren xedea bete bada– edo beste erakunde publiko zein pribatu batzuetatik beste laguntzaren bat jaso bada, dirulaguntzaren zenbatekoa likidatu ahal izango da. Horretarako, Kulturako sailburuordeak dagokion likidazio-ebazpena emango du, eta ebazpen horretan, emandako dirulaguntzen zenbatekoak doituko dira, abenduaren 17ko 698/1991 Dekretuaren 5. artikuluan ezarritakoaren arabera (698/1991 Dekretua, Euskal Autonomia Erkidegoaren Aurrekontu Orokorraren kontura emandako dirulaguntzen bermeen eta itzulketaren jardunbide orokorra arautzen duena eta kudeaketan parte hartzen duten erakunde laguntzaileen baldintzak, jardunbidea eta betebeharrak ezartzen dituena).

21. artikulua.– Ez-betetzeak.

1.– Ez-betetzeak izango dira honako hauek:

a) Jasotako dirulaguntzak, osorik zein partez, aurreikusitako jardueretarako erabili beharrean, beste proiektu batzuetarako erabiltzea.

b) Agindu honetan ezarritako betebeharrak edo, hala badagokio, laguntza ematerakoan ezartzen direnak ez betetzea.

c) Dirulaguntzaren likidazio-ebazpenean adierazten den zenbatekoa ez itzultzea, hala badagokio, horretarako ezarritako epean.

d) Dirulaguntzei buruzko Lege Orokorraren (azaroaren 17ko 38/2003 Legea) 37. artikuluan eta Euskadiko Ogasun Nagusiaren Antolarauei buruzko Legearen testu bategina onartzen duen Legegintzako Dekretuaren (azaroaren 11ko 1/1997 Dekretua) 53. artikuluan ezarritakoak.

e) Dirulaguntzen arloko edozein xedapenek ezarritako beste edozein betebehar orokor ez betetzea.

2.– Horrelako ez-betetzeren bat gertatuz gero, jasotako zenbateko guztiak edo haien zati bat eta dagozkien berandutze-interesak Euskal Autonomia Erkidegoko Diruzaintza Nagusiari itzuli beharko zaizkio, betiere honako hauetan xedatutakoari jarraikiz: Dirulaguntzei buruzko Lege Orokorraren 37.2 artikulua; azaroaren 11ko 1/1997 Legegintzako Dekretua, Euskal Autonomia Erkidegoko Ogasun Nagusiaren Antolarauei buruzko Legearen testu bategina onartu zuena, eta abenduaren 17ko 698/1991 Dekretua, Euskal Autonomia Erkidegoaren Aurrekontu Orokorraren kontura emandako dirulaguntzen bermeen eta itzulketaren jardunbide orokorra arautzen duena eta kudeaketan parte hartzen duten erakunde laguntzaileen baldintzak, jardunbidea eta betebeharrak ezartzen dituena.

XEDAPEN GEHIGARRIA

Datu pertsonalak babestearen arloko informazio-klausula.

– Arduraduna: Kultura eta Hizkuntza Politika Saila; Kultura Ondarearen Zuzendaritza. Donostia, 1 – 01010 Vitoria-Gasteiz, Araba Telefonoa: 945 01 80 00. Webgunea: http://euskadi.eus

– Xedea: 2020. urteko Euskadiko museo eta bildumetarako dirulaguntzak ematea.

– Legitimazioa: interes publikoan edo tratamenduaren arduradunari emandako ahalmen publikoak erabili bitartean eginkizun bat betetzeko behar den tratamendua (Dirulaguntzei buruzko azaroaren 17ko 38/2003 Lege Orokorra eta Euskadiko Ogasun Nagusiaren Antolarauei buruzko Legearen testu bategina onartzen duen azaroaren 11ko 1/1997 Legegintzako Dekretua).

– Hartzaileak: arlo honetan eskumenak dituzten administrazio publikoei eman ahal izango zaizkie datu pertsonalak.

– Eskubideak: zuk eskubidea duzu zure datuak eskuratu, zuzendu eta ezerezteko, bai eta tratamendua mugatu zein aurkaratzeko, informazio gehigarrian azaltzen den moduan.

– Informazio gehigarria: datuen babesari buruzko informazio gehiago dago webgune honetan: https://www.euskadi.eus/rgpd/0037508

AZKEN XEDAPENETAKO LEHENENGOA

Agindu honetan aurreikusitakoaz gain, honako hauek ere aplikatuko dira: azaroaren 11ko 1/1997 Legegintzako Dekretuak onetsitako Euskal Autonomia Erkidegoko Ogasun Nagusiaren Antolarauei buruzko Legearen testu bateginaren VI. titulua; 38/2003 Legea, azaroaren 17koa, Dirulaguntzei buruzko Lege Orokorra; 39/2015 Legea, urriaren 1ekoa, Administrazio Publikoen Administrazio Prozedura Erkidearena; eta 40/2015 Legea, urriaren 1ekoa, Sektore Publikoaren Araubide Juridikoarena.

AZKEN XEDAPENETAKO BIGARRENA

Agindu honek administrazio-bideari amaiera ematen dio, eta, beraren aurka, aukerako berraztertzeko errekurtsoa aurkez diezaiokete interesdunek Kultura eta Hizkuntza Politikako sailburuari hilabeteko epean, agindua argitaratu eta hurrengo egunetik aurrera; bestela, administrazioarekiko auzi-errekurtsoa Euskal Autonomia Erkidegoko Auzitegi Nagusian, Administrazioarekiko Auzien Salan bi hileko epean, agindua argitaratu eta hurrengo egunetik aurrera.

AZKEN XEDAPENETAKO HIRUGARRENA

Agindu honek Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.

Vitoria-Gasteiz, 2020ko uztailaren 8a.

Kultura eta Hizkuntza Politikako sailburua,

BINGEN ZUPIRIA GOROSTIDI.

Azterketa dokumentala