Euskal Herriko Agintaritzaren Aldizkaria

88. zk., 2020ko maiatzaren 12a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

1959

1/2020 FORU ARAUA, apirilaren 24koa, Europako zuzentarauen transposizioarekin lotutako zerga aldaketa batzuk ekarri eta beste zenbait aldaketa tekniko sartzen dituena.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «1/2020 Foru Araua, apirilaren 24koa, Europako zuzentarauen transposizioarekin lotutako zerga aldaketa batzuk ekarri eta beste zenbait aldaketa tekniko sartzen dituena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2020ko apirilaren 24a.

Diputatu nagusia,

MARKEL OLANO ARRESE.

HITZAURREA

Azken urteotan, Gipuzkoako zerga ordenamenduaren erregulazioan zuzeneko eragina duten hainbat zuzentarau onartu dira Europar Batasunaren esparruan. Zuzentarau horietan ezartzen da estatu kideak behartuta daudela haietan jasotakoa beren barne ordenamendura ekartzera epe jakin batzuetan.

Kontuan hartuta lurralde historikoek badutela ahalmena beren zerga araubidea nork bere lurraldean mantendu, ezarri eta arautzeko –maiatzaren 23ko 12/2002 Legearen bidez onartutako Euskal Autonomia Erkidegoarekiko Ekonomia Itunak ematen die ahalmen hori–, beharrezko gertatzen da zuzentarau horien transposizioa egitea haietan adierazitako terminoetan.

Horrela, Kontseiluaren 2018ko maiatzaren 25eko 2018/822/EB Zuzentarauak, zeinak 2011/16/EB Zuzentaraua aldatu baitzuen informazioa eman beharra dakarten mugaz gaindiko mekanismoen kasuan fiskalitate arloko informazio truke automatiko eta derrigorrezkoa emateari dagokionez (DAC 6 izenaz ezagutzen da), ezartzen du planifikazio fiskaleko mugaz gaindiko mekanismoak erasokorrak gerta daitezkeenean, haiei buruz informatu beharra egongo dela.

Komunikazio betebehar horrek bi helburu nagusi ditu. Batetik, informazioa lortzea zerga elusioaren eta zerga ihesaren aurka borrokatzeko. Bestetik, disuasio baliabide bat izatea planifikazio fiskal erasokorreko mekanismoak erabili ez daitezen. Alde horretatik, argitu beharra dago mugaz gaindiko mekanismo bat aitortu beharrak ez duela esan nahi, nahitaez, mekanismo hori iruzurrezkoa edo elusiboa denik, baizik eta mekanismo horretan badirela planifikazio fiskaleko zantzuak aitortzeko betebeharra aktibatzen dutenak. Komeni da zehaztea ezen informazioa emateak eta Zerga Administrazioaren aldetik erreakziorik ez izateak ez dakartela berekin aitortutako mugaz gaindiko mekanismoen legezkotasuna onartzea.

Zuzentarau horren transposizioa egiteko, bi xedapen gehigarri sartzen dira Gipuzkoako Lurralde Historikoko Zergen Foru Arau Orokorrean (martxoaren 8ko 2/2005 Foru Arauan), hamazazpigarrena eta hamazortzigarrena zehazki. Lehenengoan planifikazio fiskaleko mekanismo jakin batzuei buruz informatu beharra arautzen da, eta bigarrenean jasotzen da zer betebehar sortzen den partikularren artean, planifikazio fiskaleko mugaz gaindiko mekanismoak aitortzen direnean. Informazio betebehar hori garatzeko, erregelamenduan txertatuko dira betebehar hori behar bezala betetzeko beharrezkoak diren alderdiak.

Kontseiluaren 2016/1164/EB Zuzentaraua, uztailaren 12koa, zeinaren bitartez arauak ezartzen baitira barne merkatuaren funtzionamenduan zuzeneko eragina duen saiheste fiskalaren aurka –saiheste fiskalaren aurkako zuzentaraua ere esaten zaio, edo ATAD zuzentaraua ingelesezko sigla erabiliz–, krisi ekonomikoaren ondoren sozietate zergaren esparruan hartu diren neurri multilateralen barruan kokatzen da.

Zuzentarau horretan jasotzen diren neurrietako batzuk txertaturik daude, jada, Gipuzkoako zerga araudian, sozietateen gaineko zergak izan dituen azken aldaketak direla medio. Hala ere, badira beste neurri batzuk oraindik jaso gabe daudenak eta, gauden datagatik, lehenbailehen txertatu behar direnak.

Horien artean, aipatzekoa da barne ordenamendura ekarri beharra dagoela Espainiako lurraldean egoiliar diren entitateen atzerriko establezimendu iraunkorrek lortzen dituzten errententzat nazioarteko gardentasun fiskaleko araubidean ezarritako egozpena, eta egozpen horren barruan sartu behar direla lehendik egindako aldaketetan sartu ez ziren zenbait errenta, hala nola finantza errentamenduko eragiketetatik, aseguru edo banku jardueretatik eta bestelako jarduera finantzarioetatik datozenak.

Sozietate zergaren nazioarteko gardentasun fiskaleko araubidea eta errenta zergarena elkarloturik daudenez -berezkoa dute haien arteko harmonizazioa-, komeni da, mutatis mutandis, zentzu berean aldatzea araubidea pertsona fisikoen errentaren gaineko zergan.

Orobat, beharrezko gertatzen da «Exit Tax» edo «Irteerako zerga» deitutako araubidearen aldaketa egokitzea aipatu dugun ATAD Zuzentarauan aurreikusten diren kasu guztiak Gipuzkoako araudian jasotzeko. Kasu honetan, Espainiako lurraldean kokatutako establezimendu iraunkorren ondare elementuak atzerrira lekualdatzea sartu nahi da araubidean, lekualdaketa hori jarduera atzerrira eramateagatik gertatzen denean.

Aldaketa horrek ezinbesteko egiten du adierazitako kasua ez-egoiliarren errentaren gaineko zergaren araudian ere sartzea, haren barruan kasu horren tributazio araubidea ere jaso dadin, bereziki, lekualdaketa hori Europar Batasuneko edo Europako Esparru Ekonomikoko estatuen artean egiten denean, baldin eta Espainiarekin edo Europar Batasunarekin laguntzari buruzko akordio bat sinatu badute martxoaren 16ko 2010/24/EB Zuzentarauan aurreikusitakoari jarraituz.

Bestalde, asimetria hibridoen araubideak epe bikoitz bat aurreikusten du transposiziorako, gaiaren arabera; 2019ko abenduaren 31 eta 2021eko abenduaren 31, hain zuzen. Bada, horri araubide horren konplexutasuna gehitzen bazaio, komenigarri dirudi transposizioari beste momentu batean heltzea.

Ez-egoiliarren errentaren gaineko zergaren barruan ere, beharrezko gertatzen da haren araudira ekartzea Kontseiluaren 2017ko urriaren 10eko 2017/1852/EB Zuzentaraua, Europar Batasunean auzi fiskalak ebazteko mekanismoena, adiskidetasunezko prozedurak ebazteko esparrua harmonizatu eta segurtasun juridikoa indartzearren.

Zehazki, 2017/1852/EB Zuzentarauak dio estatu kideek ukatu ahal izango dutela zuzentarauaren 6. artikuluan arautzen den ebazpen prozedura erabiltzea zehapenak zerga iruzurragatik, nahita ez ordaintzeagatik edo zabarkeria larriagatik ezarri direnean. Ildo horretan, zuzentarauak kontzeptu horien definizioa jasotzen du erregelamenduz garatuko diren adiskidetasunezko prozedurei aplikatuko zaien barne araudiaren ondorioetarako.

Era berean, berrikuspen prozedura judizial eta administratiboetan, adiskidetasunezko prozeduren tramitazioan lehenetsita dagoen araubide orokorretik kanpo uzten dira gorago aipatutako zehapenak inpugnatzeko kasuak, eta berandutze interesen sortzapenari buruzko salbuespena ezabatzen da.

Azkenik, Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauak Kontseiluaren 2016ko maiatzaren 25eko 2016/881/EB Zuzentarauan ezarritakoa jasotzen du 43. artikuluko 10. apartatuan. Zuzentarau horrek 2011/16/EB Zuzentaraua aldatu zuen fiskalitatearen arloko nahitaezko informazio truke automatikoari dagokionez. Europako Batzordeak adierazi duenez, egindako transposizioa osatu gabe dago, eta aldaketak egin behar dira. Hori dela eta, aipatutako apartatua aldatzen da erregulazio horren inguruan egin diren oharrak jasotzeko.

Zuzentarau horien transposizioaz gain, foru arau honek beste aldaketa batzuk ere jasotzen ditu, gehienbat teknikoak, zerga ordenamenduaren ulermena eta argitasuna hobetzeko eta, aldi berean, hura behar bezala aplikatzeko, betiere segurtasun juridikoaren printzipioa bete dadin.

Horrela, pertsona fisikoen errentaren gaineko zergan aldatzen dira ondoren adierazten dien alderdiak.

Salbuetsita uzten dira bularreko haurrak zaintzeko erantzunkidetasunagatik jasotzen diren prestazioak, hain zuzen ere, urriaren 30eko 8/2015 Legegintzako Errege Dekretu bidez onartutako Gizarte Segurantzaren Lege Orokorraren testu bateginean aurreikusten direnak, martxoaren 1eko 6/2019 Errege Lege Dekretuak, enpleguari eta okupazioari dagokienez emakumeen eta gizonen arteko tratu eta aukera berdintasuna bermatzeko presako neurriei buruzkoak, lege hori aldatu eta gero.

Edozein motatako entitateen funts propioetan parte hartzeagatik lortutako etekinen zehaztapenean, eta zuzenean edo zeharka arrisku-kapitaleko sozietate edo funtsetatik datozen eskubide ekonomiko bereziak gauzatzeagatik jasotako zenbatekoen kasuetarako, argitzen da zer kasutan ulertzen den betetzen dela zergaduna sozietate kudeatzailean edo arrisku-kapitaleko sozietatean langile edo goi-zuzendaritzako kide izateari buruzko baldintza. Zehazki, argitzen da baldintza hori betetzat joko dela, baita ere, baldin eta, zergadunari ezkontzaren araubide ekonomikoa edo irabazpidezko sozietatearen ondare araubidea aplikatuta, sozietate kudeatzailean edo arrisku-kapitaleko sozietatean langile edo goi-zuzendaritzako kide izateko baldintza ezkontide batek edo bikotekide batek betetzen badu. Azalpen hori sozietateen gaineko zergaren erregulazioan ere sartzen da, sozietate bat ondare sozietatetzat hartzeko eragiten duen neurrian.

Enpresak edo entitateetako akzio edo partaidetzak eskualdatzeagatik lortzen den ondare irabazia edo galera Ondarearen gaineko Zergari buruzko ekainaren 11ko 2/2018 Foru Arauak 6. artikuluko lehen apartatutik seigarrenera bitartean jasotakoaren arabera ez zergapetzeari dagokionez (eskualdaketa enpresan, entitatean edo taldeko entitateetan jarduten duen langile baten edo gehiagoren alde egiten denean), argitzen da ezen zuzendaritza funtzioak uzteari buruzko betekizuna bete dadin, ezinbesteko baldintza dela eskualdatzaileak bene-benetan uztea funtzio horiek egiteari, hori izan baita legegilearen hasierako borondatea neurria onartu zenetik.

Ohiko etxebizitza alokatzeagatik aplikatzen den kenkarian, argitzen da nola aplikatu behar den kenkari hori epailearen erabakiz bi zergadunak daudenean behartuta familia etxebizitzaren alokairua ordaintzera eta portzentajeak eta mugak desberdinak direnean.

Ohiko etxebizitza erosteagatik araututako kenkarian, argitzen da ohiko etxebizitzaren erosketan aplikatzen den kreditu fiskalari eskualdaketatik datozen irabazi salbuetsiek ere eragiten diotela saltzaileak mendekotasun larria edo handia duten pertsonak edo 65 urtetik gorakoak direnean.

Sozietateen gaineko zergan, portu agintaritzen zerga araubidea aldatzen da Europako Batzordearen 2019ko urtarrilaren 8ko Erabakira egokitzeko.

Europako Batzordeak aztertu egin du zer tributazio aplikatzen zaien Europar Batasuneko estatuetan portuen kudeaketaz arduratzen diren entitateei Europar Batasunaren Funtzionamenduari buruzko Tratatuko 107. artikulutik 109. artikulura bitartean ezarrita dauden estatu laguntzen araubidearen ikuspegitik, eta, gaia aztertu ondoren, adierazi du portuetako azpiegiturak kudeatzeaz arduratzen diren entitateentzat salbuespen bat ezartzea ez dela barne merkatuarekin bateragarria, merkatu batean jarduten dutelako eta, ondorioz, jarduera ekonomikoak egiten dituztelako.

Bateragarritasun hori lortze aldera, sozietateen gaineko zergan gaur egun ezarrita dagoen salbuespen araubidearen ordez, berariazko kenkari bat ezartzen da, hain zuzen ere, jarduera ekonomikotzat hartzen ez diren portuko zerbitzu eta azpiegituretan inbertitutako zenbatekoaren baliokidea dena.

Kenkari berri horrekin aintzat hartzen dira portu agintaritzen araubide juridikoak Europar Batasuneko beste estatuei dagokienaren aldean dituen berezitasunak, eta, horrela, bermatzen da zergapetzearen printzipioak erabat errespetatzen direla; izan, kuotan egiten den kenkariari esker, kargatik kanpo gertatzen dira portu agintaritzek sozietatearen zerbitzu publikora bideratutako azpiegituretan egiten dituzten gastu eta inbertsioak; hau da, kargatik kanpo uzten dira funtsean portuko jardueren zerbitzura ez dauden azpiegiturak, kolektibitateak ere kontraprestaziorik gabe erabil ditzakeenak.

Era horretan, bukatutzat ematen da, Gipuzkoako Lurralde Historikoari dagokionez, Europako Batzordearen eta Espainiako Erresumako agintaritza eskudunen arteko lankidetza prozedura, Kontseiluaren 2015eko uztailaren 13ko 2015/1589/EB Erregelamenduan aurreikusitakoa (Europar Batasunaren Funtzionamenduari buruzko Tratatuaren 108. artikulua aplikatzeko arau zehatzak ezartzen ditu Erregelamenduak).

Hori hala izanik ere, foru arau honetan xedapen gehigarri bat gehitzen da bertan kontuan izateko ezen Europar Batasuneko Justizia Auzitegiak erabakitzen badu foru arau hau indarrean jarri aurretik Sozietateen gaineko Zergaren araudian portu agintaritzetarako aurreikusitako tratamendu fiskala ez dela estatu laguntza bat, Europar Batasunaren Funtzionamenduari buruzko Tratatuaren 107. artikuluan xedatutako eran, edo badela barne merkatuarekin bateragarria, Zerga Administrazioak ofizioz erregularizatu beharko duela foru arau honetan xedatutakoa aplikatu zaien zergadunen zerga egoera, hura aplikatu den zergaldietan.

Sozietateen gaineko zergarekin jarraituz, eta sozietate bat ondare sozietatetzat hartzearen ondorioetarako, argitzen da ezen sarreren 100eko 80, gutxienez, errenta iturri jakin batzuetatik etortzeari buruzko baldintza betetzat joko dela entitateak diru sarrerarik izan ez duenean. Orobat, argitzen da ezen partaidetzen eskualdaketan lortzen diren gainbalioak jarduera ekonomikoetatik eratorritako mozkinekin parekatzen direla, partaidetutako entitateak lortu dituen sarreren 100eko 80, gutxienez, jarduera ekonomikoetatik datozenean.

Dibidenduen zergapetze bikoitza ez aplikatzeko garaian, mozkinak ez integratzea baztertzen da dibidenduen edo mozkin partaidetzen banaketak entitate ordaintzailearentzat fiskalki kengarria den gastua sortzen duen kasuetan.

Zerga baterakuntzaren araubidean, eta zerga oinarri negatiboen konpentsazioarekin lotuta, argitzen da ezen talde fiskalean sartzean konpentsatzeko dauden oinarriak haren zerga oinarrian konpentsatu daitezkeela, betiere entitatearen beraren zerga oinarriari zergaren foru arauko 55. artikulua aplikatuta ateratzen den mugarekin. Muga hori aplikagarria izango da, halaber, araubidea galdu eta talde fiskala desagertzen denean.

Ondarearen gaineko zergan, aldaketak sartzen dira entitateetako kapital edo ondare partaidetzei aplikatzen zaien salbuespenaren erregulazioan, entitatearen jarduerari buruz ezarrita dagoen beharkizuna, hau da, haren jarduera nagusia ondare higigarri edo higiezin baten kudeaketa ez izatea, zeharkako partaidetzetara ere zabaltzeko baldintza berdinetan. Era berean, zuzenketa tekniko batzuk egiten dira bai euskarazko testuan bai gaztelaniazkoan.

Ondare eskualdaketen eta egintza juridiko dokumentatuen gaineko zergan, erregulazioaren zenbait alderdi aldatzen dira. Horrela, bermea eratua duten mailegu eragiketa eskrituratuetan, orain arau mailan ere zehazten da zein den egintza juridiko dokumentatuen gaineko zergaren subjektu pasiboa, eta mailegu-hartzailea eskuratzailetzat jotzen da. Baloreen egiaztapenari dagokionez, haren derrigortasunaren ordez, hura egiteko ahalmena ezartzen da, kontuan hartuta zergadunak Administrazioak emandako edo argitaratutako balio berak esleitzen dituenean, ez dagoela egiaztapen hori zertan egin.

Salbuespen objektibo berri bat ezartzen da Hiri Errentamenduei buruzko azaroaren 24ko 29/1994 Legearen 2. artikuluan aipatzen diren erabilera egonkor eta iraunkorreko etxebizitzen errentamenduetarako.

Jarduera ekonomikoen gaineko zergan, aldaketak sartzen dira bai jarduera hasteagatik aplikatzen diren salbuespenetan eta bai 1.000.000 eurotik beherako negozio zifra garbia duten subjektu pasiboentzat araututakoan. Lehenengo kasuan, aldaketa terminologikoa da, eta, bigarrenean, negozio zifraren konputua argitzen da sozietate taldeak dauden kasuetarako. Ondorio horietarako, taldea dagoela ulertzen da entitate batek, zuzenean edo zeharka, beste baten edo batzuen kontrola duenean edo izan dezakeenean. Zehazki, zirkunstantzia hori betetzen dela joko da Merkataritza Kodeko 42.1 artikuluan jasotzen diren egoeretako bat gertatzen denean, entitatearen egoitza non dagoen eta urteko kontu bateratuak aurkeztu beharra duen aintzat hartu gabe.

Era berean, araututa gelditzen da interesdunek beren jarduerei buruzko informazioa eta zergaren matrikulan jasotako babesik gabeko datuei buruzko informazioa eskuratzeko aukera, eta, aldi berean, zeintzuk diren babespeko datuak zehazten da.

Aldaketak sartzen dira Zergen Foru Arau Orokorrean haren barruan hobekuntza tekniko batzuk egiteko. Horrela, zuzentzen da arau horren azken aldaketan egiaztapen mugatuko prozedurari buruzko azpisekzioa zenbakitzean izandako akatsa.

Aukera gaitzen da behin-behineko likidazioa aurretiazko proposamenik gabe emateko, baldin eta likidazioa Zerga Administrazioak argitaratutako merkatuko batez besteko prezioetan oinarritutako balio egiaztapenei buruzkoa bada.

Aldaketak sartzen dira zerga zorra ofizioz likidatzeko prozeduran, haren aplikazioa sinplifikatzeko, eta eskarmentu praktikoa aintzat hartuta, nabarmen murrizten da ezartzen den zehapena autolikidazioak, aitorpenak edo zerga ondorioak dituzten bestelako dokumentuak bitarteko elektroniko, informatiko edo telematikoen bidez aurkeztu beharra egonda, horiek erabiltzen ez direnean.

Era berean, hainbat zuzenketa tekniko egiteko, bi xedapen hauek aldatzen dira: 3/2004 Foru Araua, apirilaren 7koa, irabazi asmorik gabeko entitateen zerga erregimenari eta mezenasgoaren aldeko zerga pizgarriei buruzkoa, eta 4/2016 Foru Araua, azaroaren 14koa, Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duena.

Foru arau honek aldaketak sartzen ditu, baita ere, otsailaren 11ko 2/2019 Foru Arauan, Gipuzkoako Lurralde Historikoan kultur mezenasgoaren aldeko zerga-pizgarriak ezartzekoan, eta helburua da zehaztea dohaintzak oinordetzen eta dohaintzen gaineko zergan salbuetsita egon beharrean pertsona fisikoen errentaren gaineko zergari geratzen direla lotuta eta hartatik salbuetsita.

Azkenik, aldatzen da urriaren 3ko 7/2002 Foru Araua, bide azpiegiturak erabiltzeko kanona eta «Bidegi Gipuzkoako Azpiegituren Agentzia-Agencia Guipuzcoana de Infraestructuras, S.A.» foru sozietate publikoaren zerga araubide juridikoaren alderdi batzuk arautzen dituena. Zehazki, zaharkituta geratu diren bi igorpen zuzentzen dira arau horretan. Izan ere, arauan egin zen aldaketa bat dela medio, errepideak salbuetsita egotetik ondasun higiezinen gaineko zergan ez zergapetzera pasatu ziren, baina arauak egiten zuen igorpenean salbuespenaz jarraitzen zen hitz egiten. Alde horretatik, kontuan izan behar da ezen, errepideen salbuespen araubidea utzi eta haren ordez zergari ez lotzeko araubidea ezarri zenean, aldaketa horrek Bidegik kudeatzen dituen errepideei ere eragiten ziela. Gai hori berariaz jasotzen da orain foru arauan, eta, orobat, zuzentzen da sozietateen gaineko zergaren foru araura egiten den igorpena, hau ere zaharkiturik geratu baita.

Foru Araua Gipuzkoako Aldizkari Ofizialean argitaratu eta biharamunean jarriko da indarrean, bere xedapenetan espresuki jasotako ondorioak eragotzi gabe.

1. artikulua.– Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Araua aldatzea.

Aldaketa hauek sartzen dira urtarrilaren 17ko 3/2014 Foru Arauan, Gipuzkoako Lurralde Historikoko Pertsona Fisikoen Errentaren gaineko Zergari buruzkoan:

Bat.– 2019ko martxoaren 9tik aurrerako ondorioekin, 9. artikuluaren 12. zenbakiko b) letra honela geratzen da idatzita:

«b) Adingabeen jaiotza eta zaintzagatik eta bularreko haurrak zaintzeko erantzunkidetasunagatik Gizarte Segurantzaren erregimen publikoetatik jasotzen diren prestazioak, Gizarte Segurantzaren Lege Orokorraren testu bateginak, urriaren 30eko 8/2015 Legegintzako Errege Dekretuaren bidez onartuak, II. tituluko VI. eta VII. kapituluetan arautuak, eta funtzionarioek kontzeptu berdinengatik erregimen publikoetatik jasotzen dituztenak.»

Bi.– 2019ko urtarrilaren 1etik aurrerako ondorioekin, 34.f) artikuluko b’) letra honela geratzen da idatzita:

«b’) Zergadunak lan egitea edo lan egindakoa izatea aipatutako sozietate kudeatzailean edo arrisku-kapitaleko sozietatean, edo bertan goi zuzendaritzako kide gisa jardutea edo jardun izana.

Zergadunari aplikagarri zaionean ezkontzaren araubide ekonomikoa edo irabazpidezko sozietateen ondare araubidea, baldintza hori betetzat joko da sozietate kudeatzaileko edo arrisku-kapitaleko sozietateko langile edo goi zuzendaritzako kide izateko beharkizuna ezkontide edo bikotekide batek bakarrik betetzen duenean.

Langile edo goi zuzendaritzako kide izandako pertsona hil bada, baldintza hori oinordekoek ere betetzen dutela joko da. Oinordekoen heriotza kasuan, beste horrenbeste ulertuko da haien oinordekoei dagokienez ere, eta horrela hurrenez hurren.

Ondorio horietarako, ulertuko da goi zuzendaritzako kide direla azaroaren 12ko 22/2014 Legearen 45.2 artikuluan aipatzen diren pertsonak (22/2014 Legea, arrisku-kapitaleko entitateak, inbertsio kolektibo itxiko beste entitate batzuk, eta inbertsio kolektibo itxiko entitateen sozietate kudeatzaileak arautu, eta azaroaren 4ko 35/2003 Legea, Inbertsio kolektiboko erakundeei buruzkoa, aldatzen duena).»

Hiru.– 2020ko urtarrilaren 1etik aurrerako ondorioekin, bosgarren beharkizun bat gehitzen zaio 41.2 artikuluko d) letrari, honako hau:

«Bosgarrena. Eskualdatzaileak zuzendaritza funtzioak betetzea entitatean, eta haiengatik jasotzen dituen ordainsariak ez izatea bere jarduera ekonomikoengatik eta lan pertsonalarengatik lortzen dituen etekin guztien 100eko 50 baino handiagoak, Ondarearen gaineko Zergari buruzko ekainaren 11ko 2/2018 Foru Arauak 6.Bi.d) artikuluko lehen paragrafoan xedatutakoarekin bat, eta, gainera, aurreko c) letrako bigarren beharkizunean ezarritakoari jarraituz, eskualdaketaren unetik beretik zuzendaritza funtzio horiek egiteari uztea eta ordainsari gehiagorik ez jasotzea. Ondorio horietarako, sozietatearen administrazio kontseiluko kide izate hutsa ez da sartuko zuzendaritza funtzioen barruan.»

Lau.– 2020ko urtarrilaren 1etik aurrerako ondorioekin, 51. artikulua honela geratzen da idatzita:

«51. artikulua.– Errenten egozpena nazioarteko gardentasun fiskalaren araubidean.

1.– Zergadunek egotziko dute Espainiako lurraldean egoitzarik ez duen entitate batek lortutako errenta positiboa, baldin eta errenta hori artikulu honen 2. apartatuan aurreikusten diren motetako bat bada eta zirkunstantzia hauek betetzen badira:

a) Beraiek bakarrik, Sozietateen gaineko Zergaren Foru Arauko 42.3 artikuluan ezarritako zentzuan lotuta dauden entitateekin batera, edo bigarren gradura bitarteko (hori barne) zuzeneko edo zeharkako odol zein ezkontza bidezko ahaidetasun harreman batengatik edo izatezko bikotearen eraketak sortutakoagatik lotutako beste zergadun batzuekin batera, ezkontidea edo izatezko bikotekidea barruan direla, 100eko 50eko edo hortik gorako partaidetza edukitzea Espainiako lurraldean egoiliar ez den entitatearen kapitalean, funts propioetan, emaitzetan edo boto eskubideetan, haren ekitaldi soziala ixten den egunean.

Egotzi beharreko errenta positiboaren zenbatekoa emaitzetan duten partaidetzaren proportzioan zehaztuko da, eta halakorik ezean, kapitalean, funts propioetan edo boto eskubideetan duten partaidetzaren proportzioan.

b) Espainiako lurraldean egoitzarik ez duen entitateak ordaindutako kopurua, sozietateen gaineko zergaren pareko edo antzeko karga batengatik hurrengo 2. apartatuan jasotako errentetako bati egozgarria, txikiagoa izatea diferentzia hau baino: zerga horren arauei jarraituz ordaindu beharko litzatekeenaren eta entitate ez-egoiliarrak benetan ordaindutakoaren arteko diferentzia.

2.– Zergadunek egotziko dute Espainiako lurraldean egoiliar ez den entitateak lortutako errenta osoa, baldin eta entitate horrek ez badu baliabide material eta pertsonalen antolamendu egokia hori egiteko, baita eragiketek izaera errepikakorra dutenean ere. Nolanahi ere, dibidenduen, mozkin partaidetzen edo partaidetzak eskualdatzeagatik lortutako errenten kasuan, apartatu honetako azken hiru paragrafoetan xedatutakoari jarraitu beharko zaio.

Errenta osoa izango da Sozietateen gaineko Zergaren Foru Arauan eta zerga horren gainontzeko xedapenetan hura zehazteko ezarritako irizpide eta printzipioak aplikatuta ateratzen den zerga oinarriaren zenbatekoa.

Aurreko bi paragrafoetan xedatutakoa ez da aplikatuko baldin eta zergadunak frogatzen badu eragiketa horiek egiteko Espainiako lurraldean egoitzarik ez duen eta Merkataritza Kodeko 42. artikuluan ezarritakoari jarraituz talde berekoa den entitate baten baliabide material eta pertsonalak erabili direla, egoitza non duen eta urteko kontu bateratuak aurkezteko obligazioa aintzat hartu gabe, edo, bestela, entitatearen eraketa eta jarduna arrazoi ekonomiko baliodunen ondorio direla.

Apartatu honetako lehen bi paragrafoetan ezarritakoa ez bada aplikatzen haietan ezarritako inguruabarrak betetzen ez direlako edo aurreko paragrafoan xedatutakoa aplikagarri delako, bakarrik egotziko da iturri hauetako bat sorburu duen errenta positiboa:

a) Landa eta hiri ondasun higiezinen edo horien gaineko eskubide errealen titulartasuna, salbu eta ondasun horiek jarduera ekonomiko bati atxikita badaude –foru arau honetan xedatutakoaren arabera– edo Merkataritza Kodeko 42. artikuluari jarraituz haien erabilera titularraren sozietate talde berekoak diren entitate ez-egoiliarrei laga bazaie. Bigarren kasu horretan, berdin dio entitate horien egoitza non dagoen eta urteko kontu bateratuak aurkeztu beharra duten, baina lagatzen diren ondasunek beti egon behar dute jarduera ekonomiko bati atxikita.

b) Edozein motatako entitateen funts propioetan parte hartzea eta kapital propioak hirugarrenei lagatzea, foru arau honen 34. eta 35. artikuluetan aurreikusitako eran.

Errenta positiboa ez da sartuko letra honetan haren iturria aktibo finantzario hauek direnean:

a’) Jarduera ekonomikoak egiteak berekin dakartzan lege zein arauzko betebeharrak betetzeko edukitzen direnak.

b’) Jarduera ekonomikoak garatzeagatik ezartzen diren kontratu harremanetatik sortutako kreditu eskubideak dakartzatenak.

c’) Baloreen merkatu ofizialetan bitartekaritza jarduerak egiteagatik edukitakoak.

d’) Kreditu entitateek eta aseguru etxeek jarduera ekonomiak egiteagatik edukitako aktiboak, hurrengo i) letran ezarritakoaren kalterik gabe.

Kapital propioak hirugarrenei lagatzetik eratorritako errenta positiboa hurrengo i) letran aipatutako kreditu eta finantza jardueren ondorio dela joko da, baldin eta lagatzailea eta lagapen-hartzailea sozietate talde berekoak badira Merkataritza Kodeko 42. artikuluan zehaztutakoaren arabera, kontuan hartu gabe haien egoitza non dagoen eta urteko kontu bateratuak aurkeztu beharra duten, eta lagapen-hartzailearen diru sarrerak, 100eko 85ean gutxienez, jarduera ekonomikoetatik badatoz.

c) Sozietateen gaineko Zergaren Foru Arauak 42.3 artikuluan ezarritako zentzuan lotutako pertsona edo entitateek ondasun eta zerbitzuekin egindako eragiketak, baldin eta entitate ez-egoiliarrak edo establezimendu iraunkorrak gehitzen dion balio ekonomikoa urria edo nulua bada.

d) Kapitalizazio eta aseguru eragiketak, onuraduna entitatea bera denean.

e) Jabetza intelektual eta industriala, laguntza teknikoa, ondasun higigarriak, irudi eskubideak eta negozio edo meategien errentamendu edo azpierrentamendua, foru arau honen 37. artikuluan ezarritako baldintzetan.

f) Finantza tresna deribatuak, salbu eta jarduera ekonomikoetatik datorren eta berariaz identifikatuta dagoen arrisku bat estaltzeko zehaztutakoak.

g) Aurreko a), b), c), d) eta e) letretan aipatutako ondasun eta eskubideen eskualdaketak, errentak sortzen dituztenean.

h) Aseguru edo kreditu jarduerak, errentamendu finantzarioko eragiketak eta bestelako finantza jarduerak, jarduera ekonomikoak egiteagatik lortzen direnean izan ezik, hurrengo i) letran ezarritakoa eragotzi gabe.

i) Kreditu, finantza eta aseguru jarduerak eta zerbitzuak ematekoak, esportazio jarduerekin zuzenean lotutakoak izan ezik, baldin eta, zuzenean edo zeharka, Espainiako lurraldean egoiliar diren eta Sozietateen gaineko Zergaren Foru Arauaren 42.3 artikuluan ezarritako zentzuan lotuta dauden pertsona edo entitateekin egiten badira, pertsona edo entitate egoiliar horientzat fiskalki kengarriak diren gastuak dakartzaten neurrian.

Letra honetan aurreikusitako errenta positiboa ez da egotzi beharko, baldin eta entitate ez-egoiliarrak egindako kreditu, finantza edo aseguru jardueretatik edo emandako zerbitzuetatik ondorioztatutako diru sarreren 100eko 50 baino gehiago (esportazio jarduerak kanpoan utzita) Sozietateen gaineko Zergaren Foru Arauaren 42.3 artikuluan xedatutako eran lotuta ez dauden pertsona edo entitateekin egindako eragiketetatik badatoz.

Aurreko b) eta g) letretan aipatutako errentak, entitate ez-egoiliarrak lortutakoak, ez dira egotziko, baldin eta, zuzenean edo zeharka, 100eko 5etik gorako portzentajean partaidetuta dauden entitateen baloreetatik badatoz –edo 100eko 3tik gorako portzentajean, sozietate partaidetuaren akzioek bigarren mailako merkatu antolatu batean kotizatzen badute–, betiere bi baldintza hauek betez gero:

Lehenengoa.– Partaidetzak entitate ez-egoiliarrak zuzendu eta kudeatzea, baliabide materialak eta pertsonalak bere kabuz antolatuz.

Bigarrena.– Errenten sorburu diren entitateen diru sarreren 100eko 85, gutxienez, jarduera ekonomikoetatik etortzea.

Ondorio horietarako, b) eta g) letretan aipatutako errentak jarduera ekonomikoetan lortu direla joko da, baldin eta haien sorburu diren entitateek aurreko bigarren betekizuna betetzen badute eta, zuzenean edo zeharka, 100eko 5etik gorako portzentajean partaidetuta badaude –100eko 3tik gorako portzentajean, sozietate partaidetuaren akzioek bigarren mailako merkatu antolatuetan kotizatzen badute–.

Entitateak sozietate talde bereko kideak badira Merkataritza Kodeko 42. artikuluan ezarritako irizpideen arabera, partaidetza portzentajeari buruzko betekizunak eta partaidetzaren zuzendaritza eta kudeaketari buruzkoak zehaztuko dira taldea osatzen duten entitate guztiak kontuan hartuta, egoitza non dagoen eta urteko kontu bateratuak aurkezteko obligazioa duten aintzat hartu gabe.

3.– Aurreko 2. apartatuan aurreikusitako errentak ez dira egotziko haien zenbatekoen batura entitate ez-egoiliarrak lortutako errenta osoaren 100eko 15 baino txikiagoa denean.

Dena den, 2. apartatuko i) letran aipatu diren errentak beti egotziko dira, hargatik eragotzi gabe horiek kontuan izatea aurreko paragrafoan aipatu den batura kalkulatzeko.

Sozietate egoiliarrak sozietateen gaineko zergaren pareko edo antzeko zergan batengatik ordaindutako zerga ez da egotziko zergadunaren zerga oinarrian, sartu beharreko errenta zatiari dagokionez.

Aurreko 2. apartatuan aipatutako iturrietatik datozen errenta positiboak zerga oinarri orokorrean egotziko dira, foru arau honen 62. artikuluan aurreikusitakoaren arabera.

4.– Artikulu honen 1. apartatuko a) letran jasotako zergadunek zuzenean hartzen badute parte entitate ez-egoiliarrean, edo zeharka beste entitate ez-egoiliar baten bitartez, behartuta egongo dira bidezko egozpena egitera. Azken kasu horretan, errenta positiboaren zenbatekoa zeharkako partaidetzarena izango da.

5.– Egozpena egingo da Espainiako lurraldean egoitzarik ez duen entitateak ekitaldi soziala bukatu duen eguna barne hartzen duen zergaldian, eta, ondorio horietarako, ekitaldi hori ezingo da izan 12 hilabetetik gorakoa.

6.– Zerga oinarrian egotzi beharreko errenta positiboaren zenbatekoa kalkulatuko da sozietateen gaineko zergan zerga oinarria zehazteko ezarrita dauden printzipioak eta irizpideak aplikatuta.

Ondorio horietarako, aplikatuko da Espainiako lurraldean egoitzarik ez duen entitatearen ekitaldi soziala ixtean indarrean dagoen truke tasa.

Egozten den kantitatea ezingo da inoiz izan entitate ez-egoiliarraren errenta osoa baino handiagoa.

7.– Dibidenduak eta mozkin partaidetzak ez dira egotziko, egotzitako errenta positiboari dagokion zatian. Tratamendu bera aplikatuko zaie konturako dibidenduei.

Erreserbak banatzen badira, akordio sozialean jasotako izendapenari begiratuko zaio, eta erreserba horietarako ordaindu diren azken kopuruak joko dira aplikatutzat.

Errenta positibo bat behin bakarrik izango da egozgarria, daukan forma eta hura agerian jarri duen entitatea edozein direla ere.

8.– Dibidenduak edo mozkin partaidetzak banatzeagatik atzerrian ordaindutako zerga edo karga kuota osotik kendu ahal izango da, zerga oinarrian lehendik egotzitako errenta positiboari dagokion zatian, ordainketa hori zergapetze bikoitza saihesteko hitzarmen baten arabera egin edo herrialde edo lurralde hartako legeriaren arabera egin.

Egozpena egin zen zergaldiari ez beste batzuei dagozkien zergak direnean ere egingo da kenkari hori.

Ez dira inola ere kengarriak izango paradisu fiskaltzat hartutako herrialde edo lurraldeetan ordaindutako zergak.

Kenkari hau ezingo da izan zerga oinarrian egotzitako errenta positiboagatik ordaindu beharko litzatekeen kuota osoa baino handiagoa.

9.– Partaidetzaren eskualdaketatik eratorritako errenta kalkulatzeko, izan partaidetza hori zuzenekoa izan zeharkakoa, foru arau honen 47. artikuluko 1. apartatuaren c) letran zerga oinarrian egotzitako errenta positiboari dagokionez jasotzen diren erregelak erabiliko dira. Artikulu horretan aipatzen diren mozkin sozialak egotzitako errenta positiboari dagozkionak izango dira.

10.– Artikulu honetan aurreikusitakoa aplikagarri duten zergadunek egoitza Espainiako lurraldean ez duen entitateari buruzko datu hauek aurkeztu beharko dituzte zerga honen autolikidazioarekin batera:

a) Sozietatearen izena eta helbidea.

b) Administratzaileen zerrenda.

c) Balantzea eta galera-irabazien kontua.

d) Egotzi beharreko errenta positiboen zenbatekoa.

e) Zerga oinarrian egotzi beharreko errenta positiboagatik ordaindutako zergen frogagiria.

11.– Entitate partaidetuaren egoitza paradisu fiskaltzat edo zerga-ordainketarik gabeko lurraldetzat kalifikatutako herrialde edo lurralde batean dagoenean, presuntzio hauek egingo dira:

a) Aurreko 1. apartatuko b) letran aurreikusitako baldintza betetzen dela.

b) Entitate partaidetuak lortutako errenta aurreko 2. apartatuan aipatzen diren errenta iturrietatik datorrela.

c) Entitate partaidetuak lortutako errenta partaidetzaren eskurapen balioaren 100eko 15 dela.

Aurreko letretan jasotako presuntzioek kontrako froga onartuko dute.

Aurreko letretan jasotako presuntzioak ez dira aplikatuko entitate partaidetuak bere kontuak bateratzen dituenean, Merkataritza Kodeko 42. artikuluan ezarritakoari jarraituz, errenta positiboa egoztera behartuta dagoen entitate batekin edo batzuekin.

12.– Entitate partaidetua Europar Batasuneko beste estatu kide batean egoiliartuta edo kokatuta badago edo Europako Esparru Ekonomikoaren Akordioa sinatu badu, eta artikulu honen 11. apartatuan aipatu diren kasuen barruan sartzen ez bada, zergadunak saihestu ahal izango du artikulu honetan xedatutakoa aplikatzea baldin eta frogatzen badu entitate partaidetua benetan ezarrita dagoela bere egoitzako Estatuan eta haren egitura ez dela artifizio hutsa sozietateen gaineko zergan gutxiago ordaintzeko. Horretarako, frogatu beharko du zergadunaren zama tributarioa arindu lezaketen transakzio guztiak egoitzako Estatuan egindako prestazioei dagozkiela eta badutela interes ekonomikorik zergadunaren jarduerarako.

Bereziki, egitura hori artifizio hutsa ez dela frogatzeko, zergadunak froga elementu objektiboak aurkeztu beharko ditu entitate partaidetuak egoitzako Estatuan duen presentzia fisikoari buruz, sozietate partaidetuak egiten duen jardueraren benetakotasunari buruz, eta sozietate horren jarduerak zergadunaren eta talde osoaren jarduerarekiko duen balio ekonomikoari buruz.

13.– Era berean, artikulu honetan jasotakoa ez da aplikatuko entitate ez-egoiliarra Europar Batasuneko beste estatu kide batean egoiliartuta dagoenean edo Europako Esparru Ekonomikoaren Akordioa sinatu duenean, baldin eta Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauan araututa dagoen inbertsio kolektiboko entitate bat bada, eta Europar Batasuneko estatu kide batean sortuta eta helbideratuta badago (Zuzentarau horren bitartez koordinatzen dira balio higigarrietako inbertsio kolektiboko organismo jakin batzuei buruzko lege, arau eta administrazio mailako xedapenak, Sozietateen gaineko Zergaren foru arauaren 81. artikuluan aurreikusitakoak ez bezalakoak).

14.– Artikulu honetan jasotakoak ez du ezertan eragotziko barne ordenamenduaren parte bihurtu diren nazioarteko itun eta hitzarmenetan xedatutakoa.

15.– Artikulu honen ondorioetarako, ulertuko da Merkataritza Kodeko 42. artikuluan aipatzen den sozietate taldeak entitate taldeaniztunak eta elkartuak hartzen dituela barne, merkataritza arloko legedian jasotako terminoetan.»

Bost.– 57. artikuluko 3. apartatua honela geratzen da idatzita:

«3.– Zergadunak zergadun izateari uzten badio egoitza atzerrira aldatzeagatik, egozteko dauzkan errenta guztiak integratuko dira egoitza aldatu aurreko tokian zerga honengatik aitortu beharreko azken zergaldiaren zerga oinarrian, arauz finkatzen diren baldintzetan, eta, hala badagokio, autolikidazio osagarri bat eginez, zehapenik, berandutze interesik eta inolako errekargurik gabe

Egoitza Europar Batasuneko edo Europako Esparruko Ekonomikoko estatu kide batera aldatzen den kasuan, gertatzen bada estatu horrek baduela formalizatua Espainiarekin edo Europar Batasunarekin kreditu tributarioen kobrantzan elkarri laguntzeko akordio bat, Kontseiluaren 2010eko martxoaren 16ko 2010/24/EB Zuzentarauan aurreikusten den elkarrekiko laguntzarekin parekatzen dena (zerga, eskubide eta bestelako neurriei dagozkien kredituen kobrantzan elkarri laguntzeari buruzkoa), zergadunak aukeran izango du errentak egoztea aurreko paragrafoan xedatutakoari jarraituz edo, bestela, autolikidazio osagarri bat aurkeztea, zerga honengatik aitortu behar den azken zergaldiari buruz, zehapenik, berandutze interesik eta errekargurik gabe, egotzi beharreko errentak lortu ahala. Zergadun izaera galdu ez balitz errentok egotzi beharko ziren zergaldia aitortzeko epean aurkeztu beharko da autolikidazioa.»

Sei.– 2020ko urtarrilaren 1etik aurrerako ondorioekin, 86. artikuluko 4. apartatua honela geratzen da idatzita:

«4.– Epaile batek ebazpen bidez ezartzen badu zergadunak bere kargura ordaindu behar duela familia etxebizitzaren alokairua, berak aplikatu ahal izango du autolikidazioan artikulu honetan aipatzen den kenkaria. Betebehar hori bi zergadunei badagokie, kenkaria haien artean hainbanatuko da, eta bakoitzak bere autolikidazioan aplikatuko du dagokion proportzioan, artikulu honen 1. apartatuko lehen paragrafoan ezarritako portzentajea eta muga errespetatuz, salbu eta 1. apartatu horretako bigarren eta hirugarren paragrafoetan xedatutako betekizunak betetzen direnean; izan ere, horrelakoetan, paragrafo horietan adierazitako portzentajea eta muga aplikatu ahal izango dituzte.»

Zazpi.– 2020ko urtarrilaren 1etik aurrerako ondorioekin, 87. artikuluko 3. apartatua honela geratzen da idatzita:

«3.– Zergadun bakoitzak aurreko 1. apartatuan aipatu diren kontzeptuengatik zergaldi jarraituetan egindako kenkarien batura ezingo da izan 36.000 euro baino handiagoa, behin zifra horretatik gutxituta, hala badagokio, foru arau honen 49. artikuluan ezarritako berrinbertsioagatik edo 42.b) edo 42.c) artikuluen aplikazioagatik salbuetsita dagoen ondare irabaziari 100eko 18 aplikatu ondoren ateratzen den emaitza.»

2. artikulua.– Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Araua aldatzea.

Aldaketa hauek sartzen dira Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauan:

Bat.– 2020ko urtarrilaren 1etik aurrera hasten diren zergaldietan ondorioak izateko, edukirik gabe uzten da 12. artikuluaren 1. apartatuko d) letra.

Bi.– 2020ko urtarrilaren 1etik aurrera hasten diren zergaldietan ondorioak izateko, 13.4 artikuluko lehen paragrafoa honela geratzen da idatzita:

«Artikulu honen aurreko apartatuetako a) letran xedatutakoaren ondorioetarako, entitate batek ustiapen ekonomiko bat egiten duela joko da baldin eta ekitaldian lortzen dituen sarreren 100eko 85, gutxienez, enpresa edo lanbide jardueretatik datozen errentak badira; horien artean ez dira inola ere konputatuko foru arau honen 48. artikuluak, entitate ez-egoiliarrek lortutako errenta positibo batzuk zerga oinarrian sartzeari begira, 2. apartatuaren a), b), c), d), e), f), g) eta h) letretan aipatzen dituen errenta motak.»

Hiru.– 2020ko urtarrilaren 1etik aurrera hasten diren zergaldietan ondorioak izateko, 14.1 artikuluko c) letrari azken paragrafo bat gehitzen zaio, eta honela dio:

«Apartatu honetako c) letran ezarritako beharkizuna betetzen dela joko da entitateak diru sarrerarik ez duenean.»

Lau.– 2019ko urtarrilaren 1etik aurrera hasitako zergaldietan ondorioak izateko, 14.2.a) artikuluaren bosgarren marratxoko bigarren baldintza honela berridazten da:

«Bigarrena. Eskubide ekonomiko bereziak honako hauek jasotzea, zuzenean edo zeharka: inbertsio itxiko entitateen sozietate kudeatzaile batean edo kudeatzaile gisa diharduen arrisku-kapitaleko sozietate batean lan egiten dutenek edo lan egindakoak direnek, edo haietan goi zuzendaritzako kide direnek edo izandakoek.

Zergadunari aplikagarri zaionean ezkontzaren araubide ekonomikoa edo irabazpidezko sozietateen ondare araubidea, baldintza hori betetzat joko da sozietate kudeatzaileko edo arrisku-kapitaleko sozietateko langile edo goi zuzendaritzako kide izateko beharkizuna ezkontide edo bikotekide batek bakarrik betetzen duenean.

Langile edo goi zuzendaritzako kide izandakoa hil denean, baldintza hori oinordekoek betetzen dutela joko da. Oinordekoen heriotza kasuan, beste horrenbeste ulertuko da haien oinordekoei dagokienez, eta berdin gainerakoekin ere.

Ondorio horietarako, ulertuko da goi zuzendaritzako kide direla azaroaren 12ko 22/2014 Legearen 45.2 artikuluan aipatzen diren pertsonak (22/2014 Legea, arrisku-kapitaleko entitateak, inbertsio kolektibo itxiko beste entitate batzuk, eta inbertsio kolektibo itxiko entitateen sozietate kudeatzaileak arautu, eta azaroaren 4ko 35/2003 Legea, Inbertsio kolektiboko erakundeei buruzkoa, aldatzen duena).»

Bost.– 2020ko urtarrilaren 1etik aurrera hasten diren zergaldietan ondorioak izateko, 14.2 artikuluko b) letraren azken paragrafoa honela berridazten da:

«Ondorio horietarako, apartatu honetako a) letraren azken bi gidoietan aipatutako baloreetatik datozen dibidenduak eta, orobat, partaidetza horien eskualdaketan lortutako gainbalioak enpresa edo lanbide jardueretatik etorritako etekinekin parekatuko dira, baldin eta partaidetutako entitateak lortutako diru sarreren 100eko 80, gutxienez, jarduera ekonomikoetatik badatoz.»

Sei.– 2020ko urtarrilaren 1etik aurrera hasten diren zergaldietan ondorioak izateko, 31.1 artikuluari k) letra berria gehitzen zaio, eta honela dio:

«k) Foru arau honen 60 bis artikuluan ezarritako kenkariaren oinarri diren gastuak, kenkari horretarako eskubidea eman duten aktiboen amortizazioari dagozkionak ere barne.»

Zazpi.– 2020ko urtarrilaren 1etik hasten diren zergaldietan ondorioak izateko, 33.1 artikuluaren c) letrako lehen paragrafoa honela geratzen da idatzita:

«c) Banatzen diren edo partaidetuta dauden mozkinak enpresa jardueretatik etortzea. Horretarako, ezinbestekoa izango da dibidendua banatzen duen entitateak ekitaldian lortutako diru sarreren 100eko 85, gutxienez, era horretako errentak izatea; horien artean ez dira inola ere konputatuko foru arau honen 48. artikuluak, entitate ez-egoiliarren errenta positibo batzuk zerga oinarrian sartzeari begira, 2. apartatuaren a), b), c), d), e), f), g) eta h) letretan aipatzen dituen errenta motak.»

Zortzi.– 2020ko urtarrilaren 1etik aurrera hasten diren zergaldietan ondorioak izateko, 33. artikuluko 3. apartatua honela geratzen da idatzita:

«3.– Nolanahi ere, artikulu honen aurreko apartatuetan xedatutakoa ez da aplikatuko errentak honako hauek direnean:

a) Banatzeko momentuan entitate ordaintzaileari gastu kengarri bat sortzen dioten dibidenduak eta mozkin partaidetzak.

b) Sozietateen gaineko zergan edo haren pareko edo antzeko beste zerga batean 100eko 10etik beherako karga tasa nominalaren arabera tributatu duten entitateek banatutakoak.

c) Foru arau honen 14. artikuluan aipatutako ondare sozietateek banatutako dibidenduak eta mozkin partaidetzak, baldin eta horiek banatu badira entitate banatzaileak izaera hori eduki duen ekitaldietan sortutako mozkinen kargura.

d) Foru arau honen 14. artikuluan aipatzen diren ondare sozietateek jasotako dibidenduak eta mozkin partaidetzak.»

Bederatzi.– 2020ko urtarrilaren 1etik aurrera hasitako zergaldietan ondorioak izateko, 41. artikulua honela geratzen da idatzita:

«41. artikulua.– Egoitza aldaketak egitea eta ondare elementuak atzerrian kokatutako establezimendu iraunkorretara eramatea.

1.– Zerga oinarrian merkatuko balio normalaren eta balio fiskalaren arteko diferentzia sartuko da, ondare elementuak honako hauek direnean:

a) Egoitza Espainiako lurraldetik kanpora eramaten duen entitate baten jabetzako elementuak, elementu horiek entitate horrek Espainiako lurraldean duen establezimendu iraunkor bati atxikita geratzen direnean izan ezik. Kasu horretan, ondare elementu horiei foru arau honen 103. artikuluan jasotakoa aplikatuko zaie.

b) Atzerrian kokatuta dagoen establezimendu iraunkor batera eramaten direnak, baldin eta, lekualdaketa horren ondorioz, elementu horietatik datozen errentak ezin badira zergapetu Espainiako lurraldean.

2.– Europar Batasuneko edo Europako Esparruko Ekonomikoko estatu kide batera eramaten diren ondare elementuen kasuan, gertatzen bada estatu horrek baduela formalizatua Espainiarekin edo Europar Batasunarekin kreditu tributarioen kobrantzan elkarri laguntzeko akordio bat, Kontseiluaren 2010eko martxoaren 16ko 2010/24/EB Zuzentarauan aurreikusten den elkarrekiko laguntzarekin parekatzen dena (zerga, eskubide eta bestelako neurriei dagozkien kredituak kobratzeko elkarrekiko laguntzari buruzkoa), zergadunak zilegi izango du aurreko apartatuan xedatutakotik ondorioztatzen den zerga kuota zatikatzea eta bost urtetan ordaintzea, zatiki berdinetan, betiere baldintza hauek betetzen badira:

a) Aurreko apartatuko a) letraren kasuan zerga honengatik aurkeztu behar duen azken autolikidazioarekin batera, edo aurreko apartatuko b) letran aurreikusitako aktiboen transferentzia egiten den zergaldiko autolikidazioan, zergadunak aurreko 1. apartatuan xedatutakoa aplikagarri duten ondare elementuen zerrenda indibidualizatu bat aurkeztu behar du, eta bertan adierazi zein den elementu horien kontabilitate balioa, zer alde dagoen haietako bakoitzaren merkatuko balio normalaren eta balio fiskalaren artean, eta, azkenik, zer zati dagokion elementu bakoitzari kuota osoaren zenbatekoan.

b) Kuota ez kobratzeko arrisku frogagarri eta benetako bat dagoen guztietan, kreditu entitatearen edo elkarren bermerako sozietatearen abal solidario bidez edo kauzio aseguruko ziurtagiri bidez bermatu behar da kuota kobratuko dela zergadunak apartatu honetako baldintzetan zatikatu duen ordainketaren zenbatekoraino.

Lehen zatikia ordaintzeko borondatezko epea amaitu eta hurrengo 6 hilabeteetan zerga-bilketa organoak irizten badu badagoela kuota ez ordaintzeko arriskurik, zergadunari errekerimendu bat helaraziko zaio horren berri emateko eta, halaber, adierazteko 10 eguneko epean, errekerimendua jakinarazi eta biharamunetik aurrera kontatuta, behar diren bermeak aurkeztu beharko dituela. Errekerimenduari ez bazaio kasurik egiten, edo kasu eginda ere, ulertzen bada ez dela berme nahikoa aurkeztu edo ez dela behar bezala justifikatu hura ez dela beharrezkoa, zorraren zenbateko osoa exijituko da Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) 61.2 artikuluetan ezartzen duen epean. Zorra ez bada epe horretan ordaintzen, hasiera emango zaio epe exekutiboari, eta premiamenduzko prozedura abiatuko da Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) 171.1 artikuluan jasotako terminoetan.

Zatikapenaren aldeko hautua egingo da aurreko apartatuko a) letran aurreikusitako egoitza aldaketa egiten den zergaldiko autolikidazioan, edo aurreko apartatuko b) letran aurreikusitako aktiboen transferentzia egiten den zergaldiko autolikidazioan; lehen zatikia zergaldi horren aitorpena borondatez aurkezteko epean ordaindu beharko da.

Urteko beste lau zatikietako bakoitzaren mugaeguna eta exijigarritasuna, haietako bakoitzarengatik sortutako berandutze interesenekin batera, elkarren segidan gertatuko dira, aurreko apartatuan aurreikusitako zergaldia autolikidatzeko borondatezko epea amaitu eta urtebetetik aurrera.

Zergadunak eskatu dezake apartatu honetako b) letran xedatutakoa aplikatuz aurkeztutako bermea murriztu dadila egindako ordainketak kuota geroratu osoarekiko adierazten duen proportzioan.

Apartatu honetan jasotako berezitasunak kenduta, zatikapen horri aplikagarria izango zaio Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) eta hura garatzen duen araudiak berandutze interesen sortzapenari eta bermeen eraketari buruz ezarritakoa.

3.– Aurreko apartatuan xedatutakoa gorabehera, zatikapenak indarraldia galduko du, eta gainerako kuota zatikatua bere osoan ordainaraziko da, dagozkion berandutze interesekin batera, kasu hauetan:

a) Ukitutako ondare elementuak hirugarrenei eskualdatzen zaizkienean.

b) Ukitutako ondare elementuak geroago hirugarren estatu kide batera eramaten direnean eta estatu hori aurreko 2. apartatuko lehen paragrafoan adierazitakoen artean ez dagoenean.

c) Zergadunak geroago bere zerga egoitza hirugarren estatu batera aldatzen duenean eta estatu hori aurreko 2. apartatuko lehen paragrafoan adierazitakoen artean ez dagoenean.

d) Zergaduna likidazio prozesuan dagoenean eta exekuzio kolektiboko prozedura bat irekia duenean, hala nola konkurtso bat edo horren pareko prozedura bat.

e) Zergadunak ez duenean ordainketa egiten zatikapenean aurreikusitako epean.

Apartatu honetako a) eta b) letretan aipatzen diren ondare elementuak partzialki eskualdatzen edo lekuz aldatzen direnean, zatikapenak indarraldia galduko du, bakar-bakarrik, elementu horien merkatu balioaren eta balio fiskalaren arteko diferentzia positiboak zerga kuotan hartzen duen proportzioan, betiere baldin eta zergadunak frogatzen badu eskualdaketa edo lekualdaketa horrek ondare elementuetako bati edo batzuei bakarrik eragiten diela.

Indarraldia apartatu honetako a), b) eta c) letretan jasotako kasuetan galtzen denean, zatikapena indargabetua duten kopuruak hilabeteko epean ordaindu beharko dira, zatikapenak indarraldia galtzen duenetik aurrera. Ordainketa ez bada egiten epe horretan, premiamenduzko prozedura zatikapena indargabetua duten kopuruetarako bakarrik abiatuko da, eta horiek exijitzeko Gipuzkoako Lurralde Historikoko Zergen Foru Araua Orokorrak (martxoaren 8ko 2/2005 Foru Arauak) 61.5 artikuluan ezartzen duen epea aplikatuko da. Ordaintzen den zenbatekoa zatikapenaren azken epeei aplikatuko zaie. Kopuruak ez badira ezarritako epeetan ordaintzen, gainerako zor zatikatua epez kanpo dagoela joko da, eta haren aurka premiamendu prozedura abiatuko da.

Zatikapenak indarraldia galtzen badu apartatu honetako d) letran ezarritako kasuan, zorra bere osoan geratuko da epez kanpo, eta hilabeteko epea izango da, indarraldia galtzen duenetik aurrera, hura osorik ordaintzeko. Ordainketa ez bada epe horretan egiten, hasiera emango zaio epe exekutiboari, eta premiamenduzko prozedura abiatuko da Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) 171.1 artikuluetan jasotako terminoetan.

Zatikapenak indarraldia galtzen badu apartatu honetako e) letran ezarritako kasuan, ordaindu ez den zatikiagatik bakarrik abiatuko da premiamenduzko prozedura, eta ordainketa exijitzeko aplikatuko dira Gipuzkoako Lurralde Historikoko Zergen Foru Araua Orokorrak (martxoaren 8ko 2/2005 Foru Araua) 61.5 artikuluan ezartzen duen epea. Honako hauek ordainaraziko dira: zatikiaren zenbatekoa, ordaintzeko borondatezko epea amaitu ondorengo egunetik zatikapenaren epea amaitu arte sortzen diren berandutze interesak, eta bi kontzeptu horien baturaren gainean aplikatzen den errekargu exekutiboa.

Kopuru horiek ez badira ordaintzen aurreko paragrafoan ezarritakoaren arabera, ordaintzeke dauden gainerako zatikiak epez kanpokotzat joko dira, eta premiamenduzko prozedura zor guztiengatik abiatuko da. Ordaintzeko borondatezko epea amaitu ondorengo egunetik betegabeko zatikia ordaintzeko epea amaitu arte sortzen diren berandutze interesak exijituko dira.

4.– Egoitza Espainiako lurraldera aldatu edo bertara ondare elementuak edo jarduerak lekualdatzen diren kasuetan, aldaketa edo lekualdaketari irteerako zergapetze bat aplikatu bazaio Europar Batasuneko estatu kide batean, hori guztia Kontseiluaren 2016ko uztailaren 12ko 2016/1164/EB Zuzentarauak, barne merkatuaren funtzionamenduan zuzeneko eragina duen zerga ihesaren aurkako arauak ezartzen dituenak, 5. artikuluan ezarritakoarekin bat, irteerako estatu kideak kalkulatutako balioa balio fiskaltzat hartuko da Espainian, salbu eta merkatu balioa islatzen ez duenean.

5.– Artikulu honetan xedatutakoa ez da aplikatuko eta, beraz, transferitutako ondare elementuen merkatu balioaren eta balio fiskalaren arteko diferentzia ez da sartuko zerga oinarrian, baldin eta elementu horiek erlazionatuta badaude bermeen finantzaketa edo entregarekin, zuhurtziazko kapital beharkizunen konplimenduarekin edo likidezia kudeatzearekin, eta, betiere, aurreikusita badago elementu horiek, urtebeteko epean gehienez, Espainiako lurraldean egoiliartutako entitatera itzuli behar direla edo lurralde horretan kontatutako establezimendu iraunkor bati atxiki behar zaizkiola.»

Hamar.– 2020ko urtarrilaren 1etik aurrera hasten diren zergaldietan ondorioak izateko, 43. artikuluko 10. apartatua honela geratzen da idatzita:

«10.– Espainiako lurraldean egoiliar diren entitateak talde bateko entitate nagusi badira 42. artikuluko 3. apartatuan definitutako eran, eta aldi berean ez badira beste entitate egoiliar edo ez-egoiliar baten menpekoak, artikulu honen hurrengo apartatuan aipatzen den herrialdez herrialdeko informazioa aurkeztu beharko dute.

Era berean, informazio hori aurkeztera behartuta daude, batetik, Espainiako lurraldean egoiliar diren entitateak, Espainiako lurraldean egoiliar ez den eta aldi berean beste baten menpekoa ez den entitate ez-egoiliar baten menpe badaude zuzenean edo zeharka, eta, bestetik, taldeko entitate ez-egoiliarrek Espainiako lurraldean dituzten establezimendu iraunkorrak, baldin eta zirkunstantzia hauetako bat gertatzen bada:

a) Entitate ez-egoiliar horri dagokionez, haren egoitza fiskaleko herrialde edo lurraldean ez egotea informazioa herrialdez herrialde emateko obligaziorik apartatu honetan ezarritako moduan.

b) Entitate ez-egoiliarraren egoitza fiskaleko herrialde edo lurraldearekin ez egotea, informazio horri dagokionez, informazioa automatikoki trukatzeko akordiorik.

c) Entitate ez-egoiliar horren egoitza fiskaleko herrialde edo lurraldearekin informazio hori automatikoki trukatzeko akordiorik egonda ere, akordio hori sistematikoki ez betetzea, eta, apartatu honetan aurreikusitako epean, Zerga Administrazioak ez-betetze horren berri ematea Espainiako lurraldean egoiliar diren menpeko entitateei edo establezimendu iraunkorrei.

Aurrekoa gorabehera, menpeko entitate horiek edo Espainiako lurraldean kokatutako establezimendu iraunkor horiek ez dute izango informazio hori zertan aurkeztu, talde multinazionalak, esandako informazioa aurkezteari begira, Europar Batasuneko estatu batean egoiliartuta dagoen talde bateko entitate menpeko bat izendatu duenean. Orobat, informazio hori ez dute aurkeztu beharko beste entitate ez-egoiliar batek –taldeko entitate nagusiak aurkezpenaren ondorioetarako subrogatu bezala izendatuak– dagoeneko haien egoitza fiskaleko lurraldean aurkeztu duenean. Entitate subrogatuak Europar Batasunetik kanpo kokatutako lurralde batean baldin badu egoitza fiskala, Kontseiluaren 2011ko otsailaren 15eko 2011/16/EB Zuzentarauak III. eranskinaren II. sekzioko 2. apartatuan ezarritako baldintzak bete beharko ditu (2011/16/EB Zuzentaraua, fiskalitatearen esparruko lankidetza administratiboari buruzkoa, 77/799/EEE Zuzentaraua indargabetzen duena).

Espainiako lurraldean egoiliartutako menpeko entitateak bat baino gehiago badira, eta talde multinazionalak haietako bat izendatu badu informazioa aurkezteko, entitate hori bakarrik egongo da informazioa aurkeztera behartuta.

Aurreko paragrafoetan ezarritakoa ez da aplikagarria izango izendatutako entitateak ezin badu eskuratu behar den informazioa herrialdez herrialdeko informazioa hurrengo paragrafoan jasotakoari jarraituz aurkezteko.

Orobat, apartatu honetako bigarren paragrafoan aurreikusitako kasuaren barruan, informazioa herrialdez herrialde aurkeztu behar duen Espainiako entitate egoiliarrak edo bertan kokatutako establezimendu iraunkorrak entitate ez-egoiliarrari eskatu beharko dio taldeari buruzko informazioa. Entitate ez-egoiliarrak uko egiten badio informazio hori osorik edo partez emateari, Espainiako lurraldean egoiliar den entitateak edo bertan dagoen establezimendu iraunkorrak eskuan duten informazioa aurkeztu beharko dute, eta Zerga Administrazioari uko horren berri eman beharko diote.

Apartatu honetan xedatutakoaren ondorioetarako, Espainiako lurraldean egoiliar diren entitateak hemen ezarritako informazioa aurkeztera behartutako talde bateko kide badira, informazio hori prestatu behar duen entitatearen identifikazioa eta haren egoitzako herrialde edo lurraldea jakinarazi behar dizkiote Zerga Administrazioari. Komunikazio hori egin beharko da informazioan aipatzen den zergaldia amaitu baino lehen.

Erregelamenduz zehaztuko da nola eta zein epetan aurkeztu apartatu honetan aipatzen den informazioa.»

Hamaika.– 2020ko urtarrilaren 1etik aurrera hasitako zergaldietan ondorioak izateko, 48. artikulua honela geratzen da idatzita:

«48. artikulua.– Entitate ez-egoiliarrek eta atzerrian kokatutako establezimendu iraunkorrek lortutako errenta positibo batzuk zerga oinarrian sartzea.

1.– Zergadunek beren zerga oinarrian sartuko dute Espainiako lurraldean egoitzarik ez duen entitateak lortutako errenta positiboa, baldin eta errenta hori artikulu honetako 2. apartatuan jasotakoen artean badago eta baldintza hauek betetzen badira:

a) Beraiek bakarrik, edo foru arau honen 42.3 artikuluan xedatutako zentzuan lotuta dauden pertsona edo entitateekin batera, 100eko 50eko edo hortik gorako partaidetza edukitzea Espainiako lurraldean egoiliar ez den entitatearen kapitalean, funts propioetan, emaitzetan edo boto eskubideetan, entitatearen ekitaldi soziala ixten den egunean.

Zerga oinarrian sartu behar den errenta positiboaren zenbatekoa emaitzetan duten partaidetzaren proportzioan zehaztuko da, eta halakorik ezean, kapitalean, funts propioetan edo boto eskubideetan duten partaidetzaren proportzioan.

b) Espainiako lurraldean egoitzarik ez duen entitateak ordaindutako zenbatekoa, zerga honen pareko edo antzekoa den karga batengatik 2. apartatuan jasotako errenta motetako bati egotzi dakiokeena, txikiagoa izatea diferentzia hau baino: zerga honen arauei jarraituz ordaindu beharko litzatekeenaren eta entitate ez-egoiliarrak benetan ordaindutakoaren arteko diferentzia.

Errenta positiboa zerga oinarrian sartu ahal izango da, halaber, errentak establezimendu iraunkor baten bidez lortzen direnean, betiere apartatu honetako b) letran aurreikusitako zirkunstantzia betetzen bada; kasu horretan, foru arau honen 35. artikuluan aipatzen den ez-integrazioa ezingo da aplikatu.

2.– Zergadunek egotziko dute Espainiako lurraldean egoiliar ez den entitateak eta atzerrian kokatutako establezimendu iraunkorrak lortutako errenta osoa, baldin eta entitate edo establezimendu horrek ez badu baliabide material eta pertsonalen antolamendu egokia hori egiteko, baita eragiketek izaera errepikakorra dutenean ere. Alabaina, dibidenduen, mozkin partaidetzen edo partaidetzak eskualdatuta lortzen diren errenten kasuan, artikulu honetako 3. apartatuan ezarritakoari jarraituko zaio.

Errenta osotzat hartuko da foru arau honetan zein zerga honi buruzko gainerako xedapenetan zerga oinarria zehazteko ezartzen diren irizpideak eta printzipioak aplikatuta ateratzen den zerga oinarriaren zenbatekoa.

Aurreko bi paragrafoetan xedatutakoa ez da aplikatuko baldin eta zergadunak frogatzen badu eragiketa horiek egiteko Espainiako lurraldean egoitzarik ez duen eta Merkataritza Kodeko 42. artikuluan ezarritakoari jarraituz talde berekoa den entitate baten baliabide material eta pertsonalak erabili direla, egoitza non duen eta urteko kontu bateratuak aurkezteko obligazioa aintzat hartu gabe, edo, bestela, entitatearen eraketa eta jarduna arrazoi ekonomiko baliodunen ondorio direla.

Apartatu honetako lehen bi paragrafoetan ezarritakoa ez bada aplikatzen haietan ezarritako inguruabarrak betetzen ez direlako edo aurreko paragrafoan xedatutakoa aplikagarri delako, bakarrik egotziko da iturri hauetako bat sorburu duen errenta positiboa:

a) Landa eta hiri ondasun higiezinen edo horien gaineko eskubide errealen titulartasuna, salbu eta ondasun horiek jarduera ekonomiko bati atxikita badaude –Pertsona Fisikoen Errentaren gaineko Zergaren Foru Arauan xedatutakoaren arabera– edo Merkataritza Kodeko 42. artikuluari jarraituz haien erabilera titularraren sozietate talde berekoak diren entitate ez-egoiliarrei laga bazaie. Bigarren kasu horretan, berdin dio entitate horien egoitza non dagoen eta urteko kontu bateratuak aurkeztu beharra duten, baina lagatzen diren ondasunek beti egon behar dute jarduera ekonomiko bati atxikita.

b) Edozein motatako entitateen funts propioetan parte hartzea eta kapital propioak hirugarrenei lagatzea, Pertsona Fisikoen Errentaren gaineko Zergaren Foru Arauan aurreikusitako eran.

Errenta positiboa ez da sartuko letra honetan haren iturria aktibo finantzario hauek direnean:

a’) Jarduera ekonomikoak egiteagatik sortutako legezko eta arauzko obligazioak betetzeko edukitako aktibo finantzarioak.

b’) Jarduera ekonomikoak egitearen ondorioz finkatutako kontratu harremanetatik sorturiko kreditu eskubideak jasotzen dituzten aktiboak.

c’) Baloreen merkatu ofizialetan bitartekaritza jarduerak egitearen ondorioz edukitako aktiboak.

d’) Kreditu entitateek eta aseguru etxeek beren jarduerak egiteagatik edukitako aktiboak, hurrengo i) letran ezarritakoaren kalterik gabe.

Kapital propioak hirugarrenei lagatzetik eratorritako errenta positiboa hurrengo i) letran aipatutako kreditu eta finantza jardueren ondorio dela joko da, baldin eta lagatzailea eta lagapen-hartzailea sozietate talde berekoak badira Merkataritza Kodeko 42. artikuluan zehaztutakoaren arabera, kontuan hartu gabe haien egoitza non dagoen eta urteko kontu bateratuak aurkeztu beharra duten, eta lagapen-hartzailearen diru sarrerak, 100eko 85ean gutxienez, jarduera ekonomikoetatik badatoz.

c) Foru arau honen 42.3 artikuluan ezarritako zentzuan lotutako pertsona edo entitateek ondasun eta zerbitzuekin egindako eragiketak, baldin eta entitate ez-egoiliarrak edo Espainiako lurraldean kokatu gabeko establezimendu iraunkorrak gehitzen dion balio ekonomikoa urria edo nulua bada.

d) Kapitalizazio eta aseguru eragiketak, onuraduna entitatea bera denean.

e) Jabetza intelektual eta industriala, laguntza teknikoa, ondasun higigarriak, irudi eskubideak eta negozio edo meategien errentamendu edo azpierrentamendua, Pertsona Fisikoen Errentaren gaineko Zergaren Foru Arauko 37. artikuluan ezarritako terminoetan.

f) Finantza tresna deribatuak, salbu eta jarduera ekonomikoetatik datorren eta berariaz identifikatuta dagoen arrisku bat estaltzeko zehaztutakoak.

g) Aurreko a), b), c), d) eta e) letretan aipatutako ondasun eta eskubideen eskualdaketa, errentak sortzen dituenean.

h) Aseguru edo kreditu jarduerak, errentamendu finantzarioko eragiketak eta bestelako finantza jarduerak, jarduera ekonomikoak egiteagatik lortzen direnean izan ezik, hurrengo i) letran ezarritakoa eragotzi gabe.

i) Kreditu, finantza eta aseguru jarduerak eta zerbitzuak ematekoak, esportazio jarduerekin zuzenean lotutakoak izan ezik, baldin eta, zuzenean edo zeharka, Espainiako lurraldean egoiliar diren eta foru arau honen 42.3 artikuluan ezarritako zentzuan lotuta dauden pertsona edo entitateekin egiten badira, pertsona egoiliar horientzat fiskalki kengarriak diren gastuak dakartzaten neurrian.

Errenta positiboa ez da sartuko, baldin eta entitate ez-egoiliarrak egindako kreditu, finantza edo aseguru jardueretatik edo emandako zerbitzuetatik ondorioztatutako diru sarreren 100eko 50 baino gehiago (esportazio jarduerak kanpoan utzita) foru arau honen 42.3 artikuluan xedatutako zentzuan lotuta ez dauden pertsona edo entitateekin egindako eragiketetatik badatoz.

3.– Aurreko apartatuko b) eta g) letretan aipatutako errentak, entitate ez-egoiliarrak lortutakoak, ez dira sartuko zerga oinarrian, baldin eta zuzenean edo zeharka 100eko 5etik gora partaidetuta dauden entitateetatik badatoz –100eko 3tik gora partaidetuta, sozietate partaidetuaren akzioek bigarren mailako merkatu antolatu batean kotizatzen dutenean–, eta, betiere, bi baldintza hauek betez gero:

a) Partaidetzak entitate ez-egoiliarrak zuzendu eta kudeatzea baliabide material eta pertsonalak bere kabuz antolatuz, entitatea benetan egotea kokatuta egoitza daukan estatuan, eta haren egitura ez izatea artifizio hutsa hurrengo 12. apartatuan ezarritako terminoetan.

b) Errenten sorburu diren entitateen diru sarreren 100eko 85, gutxienez, jarduera ekonomikoetatik etortzea.

Ondorio horietarako, artikulu honen aurreko apartatuko b) eta g) letretan aipatutako errentak jarduera ekonomikoetatik datozela joko da, b) letra honetan ezarritako beharkizuna betetzen duten entitateetatik datozenean eta entitate ez-egoiliarrak entitate horietan zuzenean edo zeharka duen partaidetza 100eko 5etik gorakoa denean –100eko 3tikgorakoa, sozietate partaidetuaren akzioek bigarren mailako merkatu antolatu batean kotizatzen badute–.

Entitateak sozietate talde bereko kideak badira Merkataritza Kodeko 42. artikuluan ezarritako irizpideen arabera, partaidetza portzentajeari buruzko betekizunak eta partaidetzaren zuzendaritza eta kudeaketari buruzkoak zehaztuko dira taldea osatzen duten entitate guztiak kontuan hartuta, egoitza non dagoen eta urteko kontu bateratuak aurkezteko obligazioa duten aintzat hartu gabe.

4.– Artikulu honen 2. apartatuan aurreikusten diren errentak ez dira sartuko zerga oinarrian, haien zenbatekoen batura txikiagoa bada entitate ez-egoiliarrak edo establezimendu iraunkorrak lortutako errenta osoaren 100eko 15 baino.

Dena den, 2. apartatuko i) letran jasotako errentak zerga oinarrian sartuko dira, hargatik eragotzi gabe horiek kontuan izatea aurreko paragrafoan aipatu den batura kalkulatzeko.

5.– Artikulu honen 2. apartatuan aipatutako errentak ez dira sartuko zerga oinarrian, Espainiako lurraldean egoitza duten entitateentzat kengarriak ez diren gastuei dagozkienean.

6.– Errenta positiboak entitate ez-egoiliarretan parte hartzeagatik lortzen direnean, artikulu honen 1. apartatuko a) letran aipatzen diren entitateak behartuta egongo dira errenta horiek integratzera, baldin eta zuzenean hartzen badute parte entitate ez-egoiliarrean, edo zeharka beste entitate ez-egoiliar baten bitartez.

Azken kasu horretan, errenta positiboaren zenbatekoa zeharkako partaidetzarena izango da.

7.– Espainiako lurraldean egoiliar ez den entitateak ekitaldi soziala amaitu duen eguna barne hartzen duen zergaldian sartu behar dira errentak, eta, ondorio horietarako, haren iraupena ezingo da izan hamabi hilabetetik gorakoa.

Establezimendu iraunkorren kasuan, errentak sartuko dira horiek lortzen diren zergaldian.

8.– Foru arau honetan eta zerga honen gainerako xedapenetan zerga oinarria zehazteko ezarritako printzipio eta irizpideak betez kalkulatuko da zerga oinarrian sartu beharreko errenta positiboaren zenbatekoa.

Ondorio horietarako, aplikatuko da Espainiako lurraldean egoitzarik ez duen entitatearen ekitaldi soziala ixtean indarrean dagoen truke tasa.

Zerga oinarrian sartzen den kantitatea ezingo da inoiz izan entitate ez-egoiliarraren errenta osoa edo Espainiako lurraldean kokatu gabeko establezimendu iraunkorrak lortutakoa baino handiagoa.

9.– Artikulu honetan jasotakoa aplikagarri duten zergadunek Espainiako lurraldean egoitzarik ez duen entitateari buruzko datu hauek aurkeztu behar dituzte zerga honen autolikidazioarekin batera:

a) Sozietatearen izena eta helbidea.

b) Administratzaileen zerrenda.

c) Balantzea eta galera-irabazien kontua.

d) Zerga oinarrian sartu beharreko errenta positiboaren zenbatekoa.

e) Zerga oinarrian sartu beharreko errenta positiboa dela eta ordaindutako zergen frogagiriak.

Establezimendu iraunkorren kasuan, zergadunak, zerga honen autolikidazioarekin batera, aurreko d) eta e) letretan aipatzen diren datuak aurkeztu beharko ditu, bai eta egiten dituen eragiketen eta haiei atxikitako aktibo eta pasiboen kontabilitate erregistroak ere.

10.– Entitate partaidetuaren egoitza edo establezimendu iraunkorra paradisu fiskaltzat edo zerga ordainketarik gabeko lurraldetzat hartutako herrialde edo lurralde batean badago, presuntzio hau egingo da:

a) Aurreko 1. apartatuko b) letran aurreikusitako baldintza betetzen dela.

b) Entitate partaidetuak edo establezimendu iraunkorrak lortutako errenta aurreko 2. apartatuan aipatu diren errenta iturrietatik datorrela.

c) Entitate partaidetuak lortutako errenta partaidetzaren eskurapen balioaren 100eko 15 dela.

Aurreko letretan jasotako presuntzioek kontrako froga onartuko dute.

Aurreko letretan jasotako presuntzioak ez dira aplikatuko entitate partaidetuak bere kontuak bateratzen dituenean, Merkataritza Kodeko 42. artikuluan ezarritakoari jarraituz, errenta positiboa egoztera behartuta dagoen entitate batekin edo batzuekin.

11.– Artikulu honen ondorioetarako, ulertuko da Merkataritza Kodeko 42. artikuluan aipatzen den sozietate taldeak entitate taldeaniztunak eta elkartuak hartzen dituela barne, merkataritza arloko legedian jasotako terminoetan.

12.– Entitate partaidetua edo establezimendu iraunkorra Europar Batasuneko beste estatu kide batean egoiliartuta edo kokatuta badago edo Europako Esparru Ekonomikoaren Akordioa sinatu badu, eta artikulu honen 10. apartatuan aipatu diren kasuen barruan sartzen ez bada, zergadunak saihestu ahal izango du artikulu honetan xedatutakoa aplikatzea baldin eta frogatzen badu entitate partaidetua benetan ezarrita dagoela bere egoitzako Estatuan eta haren egitura ez dela artifizio hutsa sozietateen gaineko zergan gutxiago ordaintzeko. Horretarako, frogatu beharko du zergadunaren zama tributarioa arindu lezaketen transakzio guztiak egoitzako Estatuan egindako prestazioei dagozkiela eta badutela interes ekonomikorik zergadunaren jarduerarako.

Bereziki, egitura hori artifizio hutsa ez dela frogatzeko, zergadunak froga elementu objektiboak aurkeztu beharko ditu entitate partaidetuak egoitzako Estatuan duen presentzia fisikoari buruz, sozietate partaidetuak egiten duen jardueraren benetakotasunari buruz, eta sozietate horren jarduerak zergadunaren eta talde osoaren jarduerarekiko duen balio ekonomikoari buruz.

13.– Era berean, artikulu honetan jasotakoa ez da aplikatuko entitate ez-egoiliarra Europar Batasuneko beste estatu kide batean egoiliartuta dagoenean edo Europako Esparru Ekonomikoaren Akordioa sinatu duenean, baldin eta Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauan araututa dagoen inbertsio kolektiboko entitate bat bada, eta Europar Batasuneko estatu kide batean sortuta eta helbideratuta badago (Zuzentarau horren bitartez koordinatzen dira balio higigarrietako inbertsio kolektiboko organismo jakin batzuei buruzko lege, arau eta administrazio mailako xedapenak, foru arau honen 81. artikuluan aurreikusitakoak ez bezalakoak).»

Hamabi.– 2020ko urtarrilaren 1etik aurrera hasitako zergaldietan ondorioak izateko, 58. artikuluaren 1. apartatua aldatzen da, eta honela idatzita gelditzen da:

«1.– Kuota likidotzat hartuko da kuota osoari foru arau honetako 60. artikuluan zergapetze bikoitza saihesteko ezarritako kenkarien zenbatekoa gutxituz ateratzen den kopurua, 60 bis artikuluan ezarritako portu agintaritzen inbertsioetako kenkaria eta hogeita laugarren xedapen iragankorrean ezarritako aldi baterako neurriak lehengoratzearen kenkaria.»

Hamahiru.– 2020ko urtarrilaren 1etik aurrera hasitako zergaldietan ondorioak izateko, V. tituluko II. kapitulua «Kuota osoko kenkariak» izendatzen da.

Hamalau.– 2020ko urtarrilaren 1etik aurrera hasitako zergaldietan ondorioak izateko, 60. artikuluko 5. eta 6. apartatuak honela idatzita geratzen dira:

«5.– Zergadunaren errenten artean egoitza Espainiako lurraldetik kanpo duen entitate baten dibidenduak edo mozkin partaidetzak badaude, hain zuzen ere egoitza Espainiako Erresumak nazioarteko zergapetze bikoitza saihesteko hitzarmena (aplikagarria zaiona edota informazioa trukatzeko klausula duena) sinatuta ez daukan herrialde bateko entitate batenak, zergadunak nazioarteko zergapetze bikoitza saihesteko kenkaria aplikatzea hauta dezake (kenkari hau ezin da bateratu artikulu honetako aurreko apartatuetako kenkariarekin): dibidenduei edo mozkin partaidetzei dagokien zerga oinarriaren zatiaren 100eko 14.

Aurreko paragrafoan xedatutakoa aplikatzeko, dibidenduei edo mozkin partaidetzei dagokien zerga oinarriaren zatia honela kalkulatu behar da: haien zenbateko osotik partaidetzaren inguruko gastuak gutxitu behar dira.

Apartatu honetan xedatutakoa ez da aplikatuko kasu hauetan: dibidenduei edo mozkin partaidetzei foru arau honetako 33. artikuluan ezarritakoa aplikatu ahal bazaie; dibidenduak edo mozkin partaidetzak foru arau honetako 33. artikuluko 1. apartatuko c) letrako azken paragrafoan xedatutakoari dagokionez konputatzen ez den jarduera batean sortu badira; eta dibidenduak edo mozkin partaidetzak foru arau honetako 48. artikuluko 2. apartatuko i) letran aipatzen diren jardueretako batek sortu baditu.

6.– Zergadunek zerga oinarrian sartu behar badituzte foru arau honetako 48. artikuluan ezarritakoaren arabera ez-egoiliar diren entitateek lortutako errenta positibo batzuk, zergadun horiek kontzeptu hauek kendu ahal izango dituzte kuota osotik:

a) Zerga honen antzeko izaera duten zergak edo kargak, benetan ordainduak, zerga oinarrian sartutako errenta positiboari dagokion zatian.

Benetan ordaindutako zergatzat hartuko dira entitate ez-egoiliarrak, haren sozietate partaidetuek, azken horiek partaidetutakoek, eta segida horretakoek ordaindutakoak, betiere ere baldin eta partaidetza horiek ez badira 100eko 5etik beherakoak –100eko 3tik beherakoak, sozietate partaidetuaren akzioek bigarren mailako merkatu antolatu batean kotizatzen dutenean-, eta, gainera, foru arau honen 33. artikuluak 1. apartatuaren a) letran partaidetzaren edukitza-aldiari buruz aipatzen duen baldintza betetzen badute.

b) Dibidenduak edo mozkin partaidetzak banatzeagatik atzerrian benetan ordaindutako zerga edo karga, bai zergapetze bikoitza saihesteko hitzarmen baten arabera bai herrialde edo lurralde hartako legeriaren arabera, lehendik zerga oinarrian sartutako errenta positiboari dagokion zatian.

Entitate ez-egoiliarraren gaineko partaidetza zeharkakoa denean, beste entitate ez-egoiliar baten edo batzuen bitartez, azken horrek edo horiek benetan ordaindutako zerga honen berdina edo antzekoa den zerga edo karga kenduko da, lehendik zerga oinarrian sartutako errenta positiboari dagokion zatian.

Errenta positiboa sartu zen zergaldian ez ezik, beste zergaldi batzuetan ordaindutako zergak direnean ere egingo dira kenkariak.

Paradisu fiskaltzat hartutako herrialde edo lurraldeetan ordaindutako zergak ez da inoiz ere izango kengarriak.»

Hamabost.– 2020ko urtarrilaren 1etik aurrera hasitako zergaldietan ondorioak izateko, 60 bis artikulu berria sartzen da. Hona hemen haren edukia:

«60 bis artikulua.– Kenkaria portu agintaritzek egindako inbertsioengatik.

1.– Portu agintaritzek kuota osoaren kenkari bat egiteko eskubidea izango dute, honako hauekin zuzenean lotutako inbertsio eta gastuen zenbatekoei dagokienez:

a) Itsas trafikoaren kontrolerako azpiegitura eta zerbitzuak.

b) Nabigazioaren segurtasuna eta Espainiako itsasertzeko ontzien mugimenduak hobetzeko zerbitzuak eta azpiegiturak, barnean sartuta itsas seinaleen, balizamenduen eta nabigaziorako laguntzaren elementuak, baldin eta haien onuradunak nagusiki ez badira haiek egin eta mantentzen dituen portuaren erabiltzaileak.

c) Zerbitzu publiko orokorreko errepide eta trenbide arloko lehorreko sarbideak, itsas sarbideak eta dragatzeak, –baldin eta kolektibitate osoaren mesederako badira eta haien onuradunak nagusiki ez badira portuaren erabiltzaileak–, bai eta erabilera orokorreko garraio sare orokorrak hobetzeko azpiegiturak ere.

d) Muturreko klima egoeren aurka babestu eta haiei aurre egiteko azpiegiturak, baldin eta haien onuradunak nagusiki ez badira portuaren erabiltzaileak.

e) Botere publikoaren ariketari lotutako itsas salbamenduko zerbitzuak eta azpiegiturak –baldin eta azpiegitura horiek ez badira komertzialki ustiatuak–, eta larrialdi, segurtasun eta salbamendu arloaz arduratzen diren zerbitzu publikoen prestakuntza, betiere prestakuntza hori ez bada derrigorrezkoa enpresentzat.

f) Segurtasun eta babes arloko planen prestaketa eta ezarpena, kostu horiek konpainia guztiek bete behar dituzten derrigorrezko segurtasuneko baldintzei lotuta ez dauden neurrian, eta babes zibileko larrialdien arreta, bi kasuetan jarduera horiek botere publikoaren ariketari lotuta daudenean eta haien onuradunak nagusiki ez badira portuaren erabiltzaileak.

g) Suteen, luizien eta babes zibilarekin lotutako beste arrisku batzuen aurkako zerbitzuak eta azpiegitura, betiere botere publikoaren ariketari lotuta badaude, komertzialki ustiatuak ez badira, enpresentzat derrigorrezkoak ez badira, kolektibitate osoaren mesederako badira eta haien onuradunak nagusiki ez badira portuaren erabiltzaileak.

h) Botere publikoaren ariketan Segurtasun Indar eta Kidegoek eta portuetako Poliziak bakarrik erabilitako zerbitzuak eta azpiegitura.

i) Ahultasun egoeran daudenei arreta emateko osasun zerbitzuak eta azpiegiturak, betiere azpiegiturak ez badira erabiltzen portuaren jarduera ekonomikoetarako.

j) Merkantzien aduana kontrolerako eta mugako ikuskapenerako azpiegiturak eta zerbitzuak, betiere haiek lege mailako arauek exijituak badira –hala nola, animalien eta landareen osasunaren eta kanpo osasunaren arloan eta industria segurtasunaren eta interes publikoaren arloan–, bai eta bidaiarien eta etorkinen kontrolarekin lotutakoak ere.

k) Kutsaduraren zaintzarako, ingurumen arloko larrialdietarako eta kutsaduraren aurkako borrokarako azpiegiturak eta zerbitzuak, botere publikoaren ariketari lotuta daudenean, baldin eta beren kostuak ez bazaizkio legez jasanarazi beharrekoak larrialdiaren sortzaileari eta kostu horien arrazoiak badira enpresa guztientzat legez derrigorrezkoa den araudia betetzea, jarduera ekonomiko bat egiteko erabiltzen ez diren lurzoruen kutsadura kentzea, itsasontzi eta ekipo abandonatuak desegitea, baldin eta haien tratamendua portu agintaritzaren esku bakarrik badago –haiek desegin, zirkulaziotik kendu edo txatar bihurtzeko interes pribatua identifikatzeko prozedurak bete gabe gelditzeagatik–, eta saneamendua egitea, portuaren garbiketa orokorra egitea eta portuaren erabiltzaileek sortutakoez besteko hondakinak kentzea –hala nola, itsasontziek sortutako hondarrak, zamaketaren hondakinak eta antzekoak–.

l) Espainiako Erresumak nazioarteko itun baten barruan hartutako diplomazia betebeharren ondorioz nazioarteko organismoentzat egin diren zerbitzuak eta azpiegiturak.

m) Defentsa nazionaleko zerbitzuak eta azpiegiturak.

n) Zientzia jardueretarako zerbitzuak eta instalazioak, baldin eta haien emaitzen xedea ez bada haien ustiapen ekonomikoa, eta meteorologiako ikerketari eta informazioari lotuta dagoen inguru fisikoaren monitorizazio eta iragarpen jarduketak, baldin eta haien emaitzak ez badira komertzialki ustiatuak.

o) Kolektibitatearen onurarako, herri erabilerarako eta irekiak diren zona komunen argiztapenerako zerbitzuak, baldin eta haien onuradunak nagusiki ez badira portuaren erabiltzaileak.

p) Itsasertzeko korrontea babestu edo zuzentzeko jarduketak, baldin eta beraien onuradunak nagusiki ez badira portuaren erabiltzaileak.

q) Kultura eta historia eta kultura arloko ondarea sustatzearekin lotutako inbertsioak eta zerbitzuak, barnean sartuta Espainiako Historia Ondarearen ekainaren 25eko 16/1985 Legearen 68.1 artikuluan jasotakoak, baldin eta obra publikoak ez badaude lotuta portu agintaritzaren jarduera ekonomikoarekin, bai eta komertzialki ustiatuak ez diren eta gizarte osoari onura ekartzen dioten kultur babesdun ondasunak birgaitzeko jarduketak.

r) Lurzoru publikoa urbanizatu nahiz garatu eta haren erabilera publikoa bizkortzeko jarduketak, baldin eta hura komertzialki ustiatua ez bada.

2.– Gainera, portu agintaritzek beraien kuota osotik kendu ahal izango dituzte itsas portuetako azpiegiturak eraiki, ordeztu edo hobetzeko egindako inbertsio eta gastuei dagozkien diru kopuruak, haietan sartzeko azpiegiturak egin, ordeztu edo hobetzeko egindakoei dagozkienak nahiz dragatze jardueretarako egindakoei dagozkien kopuruak, betiere Europako Batzordearen 2014ko ekainaren 17ko 651/2014 Erregelamenduak (EB), Itunaren 107. eta 108. artikuluak aplikatuta barne merkatuarekin bateragarri diren laguntza kategoria jakin batzuk deklaratzen dituenak, I. kapituluan eta 56 ter artikuluan jasotako moduan eta baldintzetan.

Kasu horretan, kenkariak ezingo du gainditu, kasu bakoitzean, ezarritako gehieneko portzentajea, aipatutako 56 ter artikuluan jasotakoaren arabera.

3.– Orobat, aurreko apartatuan aipatutako inbertsioak handiagoak direnean Europako Batzordearen 2014ko ekainaren 17ko 651/2014 Erregelamenduak (EB), Itunaren 107. eta 108. artikuluak aplikatuta barne merkatuarekin bateragarri diren laguntza kategoria jakin batzuk deklaratzen dituenak, 4. artikuluaren 1. apartatuko ee) letran jasotako mugak baino, inbertsio horiek sartuta geldituko dira artikulu honetan jasotako kenkariaren oinarrian, baldin eta Europako Batzordeak deklaratu badu barne merkatuarekin bateragarria dela Europar Batasunaren Funtzionamenduari buruzko Itunak 108.3 artikuluan jasotakoaren arabera.

Kasu horietan, beharrezkoa izango da, batetik, portuetako agintaritzek betetzea Europako Batzordearen dena delako erabakian barne merkatuarekiko bateragarritasuna deklaratzeko jarritako baldintzak eta, bestetik, kenkariak ez gainditzea erabaki horretan onartutako laguntzaren gehieneko intentsitatetik ateratzen den portzentajea.

4.– Aurreko apartatuetan aipatutako kenkariaren oinarria osatuko du apartatu horietako bakoitzean adierazitako gastu eta inbertsioen zenbatekoak, behin kenduta, hala badagokio, gastu eta inbertsio horiek egiteko jaso diren kapital eta ustiapen subentzioen gainean 100en eta portuetako agintaritzei aplikagarri zaien karga tasaren arteko diferentziatik eratorritako portzentajea aplikatzetik ateratzen den zenbatekoa.

5.– Artikulu honetan ezarritako kenkaria ordainketak egin ahala gauzatuko da, ordainketa horien zenbatekoan, salbu eta aurreko 3. apartatuan aipatutako kasuetan. Izan ere, ordainketak egin badira Europako Batzordeak laguntza barne merkatuarekin bateragarria dela deklaratzeko hartzen duen erabakiaren aurretik, haiei dagokien kenkaria erabaki hori hartu den zergaldian gauzatuko da.

6.– Portuetako agintaritzek behar diren berariazko kontabilitate eta agiri erregistroak eramango dituzte, artikulu honetan aipatutako kenkariari lotutako gastu eta inbertsioak identifikatzeko, eta, gainera, horretarako erregelamenduz ezar daitezkeen obligazio formalak beteko dituzte.

7.– Kuota osoa nahikoa ez izateagatik kenkaririk ez duten kopuruak ondoko eta jarraiko hogeita hamar urteetan amaitzen diren zergaldietako kuota osoetatik kendu ahal izango dira.»

Hamasei.– 2020ko urtarrilaren 1etik aurrera hasitako zergaldietan ondorioak izateko, 92. artikuluko 2. apartatua honela idatzita gelditzen da:

«2.– Talde fiskalean sartzean entitate batek konpentsatu gabe dauzkan zerga oinarri negatiboak taldearen zerga oinarrian konpentsatu daitezke, gehienez zergaren foru arauaren 55. artikulua entitatearen beraren banakako zerga oinarriaren gainean aplikatuz ateratzen den mugaraino.»

Hamazazpi.– 2020ko urtarrilaren 1etik aurrera hasitako zergaldietan ondorioak izateko, 99.1 artikuluko c) letra honela geratzen da idatzita:

«c) Zerga baterakuntzaren araubidea galtzen edo azkentzen den zergaldian talde fiskaleko kide diren entitateek eskubidea bereganatuko dute talde fiskalak kendu gabe dituen finantza gastu garbiak kentzeko –foru arau honetako 25 bis artikuluan aipatuak–, foru arau honetako 25 bis artikuluko 2. apartatuan ezarritako diferentzia beren alde egozteko, eta talde fiskalean konpentsatu ez diren zerga oinarri negatiboak konpentsatzeko, betiere haien osaketan esku hartu duten proportzioan.

Konpentsazioa banakako tributazio araubidean zehaztutako zerga oinarri positiboekin egingo da, zergaren foru arauaren 55. artikuluan jasotakoaren arabera, artikulu horretako 1. apartatuan aipatzen den epea osatu arte falta diren zergaldietan, talde fiskalaren zerga oinarri negatiboak zehaztu diren azken zergalditik edo zergaldietatik aurrera kontatuta.»

Hemezortzi.– 2020ko urtarrilaren 1etik aurrera hasitako zergaldietan ondorioak izateko, 101. artikuluaren 2. apartatua honela geratzen da idatzita:

«2.

1.a Zatiketatzat joko da hurrengoak burutuko dituen eragiketa:

a) Likidaziorik gabe desegin delako entitate batek bere sozietatearen ondare guztia zati batean edo gehiagotan banatzen du eta blokean eskualdatzen die aurretik dauden edo berriak diren entitate biri edo gehiagori, ekarpena hartuko duten entitateen sozietatearen kapitalaren ordezkaritasuna duten baloreak, proportziozko arau baten arabera, eta, hala bada, izendun balorearen 100eko 10etik gorakoa ez den diru-konpentsazio bat, edo, izendun balorerik ez balego, kontabilitateari kendutako balore horien bereko beste balore bat beren kideei eratxikiz.

b) Entitate batek jarduera adarrak osatzen dituzten ondare sozialeko zati bat edo batzuk segregatzea, eta aurretik dauden edo sortu berriak diren entitate bati edo batzuei blokean eskualdatzea, entitate eskualdatzailean gutxienez jarduera adar bat mantenduz, edo, bestela, beste entitate batzuen kapitaleko partaidetzak –haien kapital sozialean gehiengoa ematen diotenak– mantenduz. Horren truke, entitate horrek entitate eskuratzailearen kapital sozialeko balore adierazgarriak jasotzen ditu, bazkideei esleitu beharko dizkienak beren partaidetzaren arabera, kapital soziala eta erreserbak behar den zenbatekoan murriztuz, eta, hala badagokio, diru konpentsazio bat eginez aurreko letran ezarritako eran.

c) Entitate batek bere sozietatearen ondarearen zati bat bereizten du, beste entitate batzuen sozietate-kapitalean gehiengoa ematen dioten kapital-partaidetzek osatua, eta bere ondarean, gutxienez, beste entitate bat edo batzuen edo jarduera-adar batean antzeko ezaugarriak dituzten partaidetzak mantentzen ditu. Bereizitakoa beste entitate bati –sortu berria edo lehendik dagoena– eskualdatzen dio, eta trukean entitate eskuratzailearen kapitala ordezkatzen duten baloreak jasotzen ditu; jasotakoa entitatearen bazkideei esleitu behar die –bakoitzaren partaidetzaren arabera–, sozietate-kapitala eta erreserbak derrigorrezkoa den zenbatekoan gutxitu behar ditu, eta, hala bada, aurreko idatz-zatian ezartzen den bezalako diru-konpentsazioa eman beharko die.»

Hemeretzi.– 2020ko urtarrilaren 1etik aurrera hasitako zergaldietan ondorioak izateko, 102.1 artikuluaren a) eta c) letretako azken paragrafoak honela geratzen dira idatzita:

«Dena den, Espainiako lurraldean kokatutako establezimendu iraunkor bati atxikitako elementuak Europar Batasuneko beste estatu kide batera edo Europako Esparru Ekonomikoko beste estatu batera aldatzen diren kasuan, gertatzen bada estatu horrek baduela formalizatua Espainiarekin edo Europar Batasunarekin kreditu tributarioen kobrantzan elkarri laguntzeko akordio bat, Kontseiluaren 2010eko martxoaren 16ko 2010/24/EB Zuzentarauan aurreikusten den elkarrekiko laguntzarekin parekatzen dena (zerga, eskubide eta bestelako neurriei dagozkien kredituak kobratzeko elkarrekiko laguntzari buruzkoa), zergadunak zilegi izango du aurreko paragrafoan xedatutakoagatik ordaindu beharreko kuota zatikatzea hurrengo bost urte jarraituetan amaitzen diren zergaldietan kopuru bereko bost ordainketa eginez, betiere Ez-egoiliarren Errentaren gaineko Zergari buruzko 16/2014 Foru Arauak, abenduaren 10ekoak, 18. artikuluaren 7. eta 8. apartatuetan ezarritako baldintzetan eta aipatutako xedapenetan jasotako moduan.»

Hogei.– 2020ko urtarrilaren 1etik aurrera hasitako zergaldietan ondorioak izateko, 108. artikulua honela geratzen da idatzita:

«108. artikulua: Zerga arloko eskubide eta betebeharretan subrogatzea eta errentak egoztea.

1.– Foru arau honetako 101. artikuluan aipatutako eragiketek titulu unibertsaleko ondorengotza bat dakartenean, entitate eskuratzaileari eskualdatuko zaizkio entitate eskualdatzailearen zerga eskubide eta betebeharrak.

Entitate eskuratzaileak bere gain hartuko du beharrezkoak diren beharkizunak betetzea zerga onurak aplikatzen jarraitzeko edo entitate eskualdatzaileak zituenak kontsolidatzeko.

2.– Ondorengotza ez bada unibertsala, eskualdatutako ondasun eta eskubideei dagozkien zerga eskubide eta betebeharrak bakarrik eskualdatuko dira.

Entitate eskuratzaileak bere gain hartuko du entitate eskualdatzailearen zerga onurak aplikatzeko beharkizunak betetzea, eskualdatutako ondasun eta eskubideei buruzkoak diren heinean.

3.– Entitate eskuratzaileari entitate eskualdatzaileak konpentsatzeko dituen zerga oinarri negatiboak eskualdatuko zaizkio, honako egoera hauetakoren bat gertatzen denean:

a) Entitate eskualdatzailea iraungitzen denean.

b) Jarduera adar bat eskualdatzen denean, eta haren emaitzek entitate eskualdatzailean oraindik konpentsatzeko dauden zerga oinarri negatiboak sortu dituztenean. Kasu horretan, eskualdatutako jarduera adarrak sortu dituen eta oraindik konpentsatzeko dauden zerga oinarri negatiboak eskualdatuko dira.

Entitate eskuratzaileak entitate eskualdatzailearen kapitalean parte hartzen duenean, edo lehenengoa foru arau honen 42. artikuluan jasotako egoeretako batean dagoenean bigarrenarekiko, konpentsatzeko dagoen zerga oinarri negatiboari honako zenbateko hau gutxituko zaio: bazkideek, edozein titulu dela medio, duten partaidetzagatik edo elkarri lotutako entitateek entitate eskualdatzailean dituzten partaidetzengatik egindako ekarpenen balioaren eta balio fiskalaren arteko diferentzia positiboa.

Entitate eskualdatzaileak galerak izan baditu eta, horrek narriadura bat ekarri badu entitate eskuratzaileak edo beste entitate batek entitate eskualdatzailearen kapitalean duen partaidetzan, galerei dagozkien zerga oinarri negatiboak ezingo dira inoiz konpentsatu, entitate horiek foru arau honen 42. artikuluan aipatzen den lotura harremana dutenean.

4.– Foru arauen edo Espainiako legeen babespean sortutako eskubide eta betebeharrak baino ezingo dira subrogatu.»

3. artikulua.– Ekainaren 11ko 2/2018 Foru Araua, Ondarearen gaineko Zergarena, aldatzea.

Aldaketa hauek sartzen dira Ondarearen gaineko Zergaren ekainaren 11ko 2/2018 Foru Arauan:

Bat.– 2019ko urtarrilaren 1etik aurrerako ondorioekin, 6.Bi artikuluko a) letra honela idatzita geratzen da:

«a) Entitatearen jarduera nagusia ez izatea ondare higigarri edo higiezin bat kudeatzea. Ulertuko da entitate batek ez duela ondare higigarri edo higiezin bat kudeatzen eta, beraz, jarduera ekonomiko bat egiten duela, baldin eta, Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren 14. artikulua aplikaturik, entitate horrek ez baditu beharrezko baldintzak betetzen bere aktiboaren erdia baino gehiago baloreek osatzen dutela edo jarduera ekonomikoei atxiki gabe dagoela pentsatzeko.

Entitateak beste entitate batzuetan ere parte hartzen duenean, aurreko paragrafoan jarritako beharkizuna betetzeko, erreparatuko zaio entitate partaidetuen jarduera nagusia ondare higigarri edo higiezin bat kudeatzea ez dela ulertzeko bertan jasotakoari ere.»

Bi.– 6.Bi artikuluaren azken paragrafoa honela idatzita geratzen da:

«Hurrengo sei apartatuan xedatutakoa eragotzi gabe, salbuespenetik kanpo partaidetzen balio hau geratuko da (foru arau honetako 17.eta 18. artikuluetan ezarritako erregelen arabera zehaztua): jarduera ekonomikoa egiteko beharrezkoak ez diren aktiboen balioan, jardueratik ez datozen zorrekin gutxituan, partaidetzei dagokien zatia. Hala entitatearen aktiboen balioa nola haren zorrei dagokiena, bere kontabilitatetik eta foru arau honetako 17. eta 18. artikuluetan eta 11.Hiru artikuluko azken paragrafoan jasotako erregelen aplikaziotik ondorioztatuko dira, betiere, baldin eta kontabilitateak entitatearen benetako ondare egoera zehatz islatzen badu. Kontabilitaterik ez dagoenean, edo kontabilitateak entitatearen benetako ondare egoera zehatz islatzen ez duenean, balio guztiak foru arau honetan jasotakoaren arabera kalkulatuko dira.»

Hiru.– 15. artikuluaren euskarazko testua aldatzen da, eta honela idatzita geratzen da:

«15. artikulua.– Kapital propioak hirugarrenei laga izana adierazten duten baloreak, merkatu antolatuetan negoziatuak.

Kapital propioak hirugarrenei laga izanaren balore adierazgarriak, merkatu antolatuetan negoziatuak, zergaren sortzapenaren unean duten negoziazio balioaren arabera konputatuko dira, haien izendapena, adierazpena eta lortutako etekinen izaera edozein dela ere.»

4. artikulua.– Abenduaren 10eko 16/2014 Foru Araua, Ez-egoiliarren Errentaren gaineko Zergarena, aldatzea.

Aldaketa hauek sartzen dira Ez-Egoiliarren Errentaren gaineko Zergaren abenduaren 10eko 16/2014 Foru Arauan:

Bat.– 2020ko urtarrilaren 1etik aurrera hasitako zergaldietan ondorioak izateko, 18. artikuluaren 6. apartatua aldatu eta 7.etik 10.era bitarteko apartatuak gehitzen dira, eta honela geratzen dira idatzita:

«6.– Zerga oinarrian merkatuko balio normalaren eta balio fiskalaren arteko diferentzia sartuko da, ondare elementuak honako hauek direnean:

a) Establezimendu iraunkorra Espainiako lurraldean izanik jarduerari uzten dion establezimendu bati atxikita daudenak.

b) Espainiako lurraldean era iraunkorrean finkatutako establezimendu bati atxikita egon ondoren atzerrira lekualdatzen direnak.

c) Espainiako lurraldean kokatutako establezimendu iraunkor bati atxikita daudenak, establezimendu horrek atzerrira lekualdatzen duenean bere jarduera.

7.– Aurreko b) eta c) letretan jasotako kasuetan, Europar Batasuneko edo Europako Esparruko Ekonomikoko estatu kide batera eramaten diren ondare elementuen kasuan, gertatzen bada estatu horrek baduela formalizatua Espainiarekin edo Europar Batasunarekin kreditu tributarioen kobrantzan elkarri laguntzeko akordio bat, Kontseiluaren 2010eko martxoaren 16ko 2010/24/EB Zuzentarauan aurreikusten den elkarrekiko laguntzarekin parekatzen dena (zerga, eskubide eta bestelako neurriei dagozkien kredituen kobrantzan elkarri laguntzeari buruzkoa), zergadunak zilegi izango du aurreko apartatuan xedatutakotik ondorioztatzen den zerga kuotaren ordainketa zatikatzea eta bost urtetan ordaintzea, zatiki berdinetan, betiere baldintza hauek betetzen badira:

a) Aurreko 6. apartatuko c) letraren kasuan zerga honengatik aurkeztu behar duen azken autolikidazioarekin batera, edo 6. apartatu horretako b) letran aurreikusitako aktiboen transferentzia egiten den zergaldiko autolikidazioan, zergadunak aurreko 6. apartatuan xedatutakoa aplikagarri duten ondare elementuen zerrenda indibidualizatu bat aurkeztu behar du, eta bertan adierazi zein den elementu horien kontabilitate balioa, zer alde dagoen haietako bakoitzaren merkatuko balio normalaren eta balio fiskalaren artean, eta, azkenik, zer zati dagokion elementu bakoitzari kuota osoaren zenbatekoan.

b) Kuota ez kobratzeko arrisku frogagarri eta benetako bat dagoen guztietan, kreditu entitatearen edo elkarren bermerako sozietatearen abal solidario bidez edo kauzio aseguruko ziurtagiri bidez bermatu behar da kuota kobratuko dela zergadunak apartatu honetako baldintzetan zatikatu duen ordainketaren zenbatekoraino.

Lehen zatikia ordaintzeko borondatezko epea amaitu eta hurrengo 6 hilabeteetan zerga-bilketa organoak irizten badu badagoela kuota ez ordaintzeko arriskurik, zergadunari errekerimendu bat helaraziko zaio horren berri emateko eta, halaber, adierazteko 10 eguneko epean, errekerimendua jakinarazi eta biharamunetik aurrera kontatuta, berme nahikoak aurkeztu beharko dituela. Errekerimenduari ez bazaio kasurik egiten, edo kasu eginda ere, ulertzen bada ez dela berme nahikoa aurkeztu edo ez dela behar bezala justifikatu hura ez dela beharrezkoa, zorraren zenbateko osoa exijituko da Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) 61.2 artikuluetan ezartzen duen epean. Zorra ez bada epe horretan ordaintzen, hasiera emango zaio epe exekutiboari, eta premiamenduzko prozedura abiatuko da Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) 171.1 artikuluetan jasotako terminoetan.

Zatikapenaren aldeko hautua bakar-bakarrik egingo da aurreko apartatuko b) letran aurreikusitako aktiboen transferentzia egiten den zergaldiko autolikidazioan bertan, edo bestela, aurreko apartatuko c) letran jasotako kasuan, jardueraren lekualdaketa dela-eta amaitutako zergaldiko autolikidazioan; lehen zatikia zergaldi horren aitorpena borondatez aurkezteko epean ordaindu beharko da.

Urteko beste lau zatikietako bakoitzaren mugaeguna eta exijigarritasuna, haietako bakoitzarengatik sortutako berandutze interesenekin batera, elkarren segidan gertatuko dira, aurreko apartatuan aurreikusitako zergaldiak autolikidatzeko borondatezko epea amaitu eta urtebetetik aurrera.

Zergadunak eskatu dezake b) letran xedatutakoa aplikatuz aurkeztutako bermea murriztu dadila egindako ordainketak kuota geroratu osoarekiko adierazten duen proportzioan.

Apartatu honetan jasotako berezitasunak kenduta, zatikapen horri aplikagarria izango zaio Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) eta hura garatzen duen araudiak berandutze interesen sortzapenari eta bermeen eraketari buruz ezarritakoa.

8.– Aurreko apartatuan xedatutakoa gorabehera, zatikapenak indarraldia galduko du, eta gainerako kuota zatikatua bere osoan ordainaraziko da, dagozkion berandutze interesekin batera, kasu hauetan:

a) Ukitutako ondare elementuak hirugarrenei eskualdatzen zaizkienean.

b) Ukitutako ondare elementuak geroago hirugarren estatu kide batera eramaten direnean eta estatu hori aurreko 7. apartatuko lehen paragrafoan adierazitakoen artean ez dagoenean.

c) Establezimendu iraunkorrak egiten duen jarduera, geroago, aurreko 7. apartatuko lehen paragrafoan adierazitakoen artean ez dagoen hirugarren estatu batera lekualdatzen denean.

d) Zergaduna likidazio prozesuan dagoenean eta exekuzio kolektiboko prozedura bat irekia duenean, hala nola konkurtso bat edo horren pareko prozedura bat.

e) Zergadunak ez duenean ordainketa egiten zatikapenean aurreikusitako epean.

Apartatu honetako a) eta b) letretan aipatzen diren ondare elementuak partzialki eskualdatzen edo lekuz aldatzen direnean, zatikapenak indarraldia galduko du, bakar-bakarrik, elementu horien merkatu balioaren eta balio fiskalaren arteko diferentzia positiboak zerga kuotan hartzen duen proportzioan, betiere baldin eta zergadunak frogatzen badu eskualdaketa edo lekualdaketa horrek ondare elementuetako bati edo batzuei bakarrik eragiten diela.

Indarraldia apartatu honetako a), b) eta c) letretan jasotako kasuetan galtzen denean, zatikapena indargabetuta duten kopuruak hilabeteko epean ordaindu beharko dira, zatikapenak indarraldia galtzen duenetik aurrera. Ordainketa ez bada egiten epe horretan, premiamenduzko prozedura zatikapena indargabetuta duten kopuruetarako bakarrik abiatuko da, eta horiek exijitzeko Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Arauak) 61.5 artikuluan ezartzen duen epea aplikatuko da. Ordaintzen den zenbatekoa zatikapenaren azken epeei aplikatuko zaie. Kopuruak ez badira ezarritako epeetan ordaintzen, gainerako zor zatikatua epez kanpo dagoela joko da, eta haren aurka premiamendu prozedura abiatuko da.

Zatikapenak indarraldia galtzen badu apartatu honetako d) letran ezarritako kasuan, zorra bere osoan geratuko da epez kanpo, eta hilabeteko epea izango da, indarraldia galtzen duenetik aurrera, hura osorik ordaintzeko. Ordainketa ez bada epe horretan egiten, hasiera emango zaio epe exekutiboari, eta premiamenduzko prozedura abiatuko da Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) 171.1 artikuluetan jasotako terminoetan.

Zatikapenak indarraldia galtzen badu apartatu honetako e) letran ezarritako kasuan, ordaindu ez den zatikiagatik bakarrik abiatuko da premiamenduzko prozedura, eta ordainketa exijitzeko aplikatuko dira Gipuzkoako Lurralde Historikoko Zergen Foru Arau Orokorrak (martxoaren 8ko 2/2005 Foru Araua) 61.5 artikuluan ezartzen duen epea. Honako hauek ordainaraziko dira: zatikiaren zenbatekoa, ordaintzeko borondatezko epea amaitu ondorengo egunetik zatikapenaren epea amaitu arte sortzen diren berandutze interesak, eta bi kontzeptu horien baturaren gainean aplikatzen den errekargu exekutiboa.

Kopuru horiek ez badira ordaintzen aurreko paragrafoan ezarritakoaren arabera, ordaintzeke dauden gainerako zatikiak epez kanpokotzat joko dira, eta premiamenduzko prozedura zor guztiengatik abiatuko da. Ordaintzeko borondatezko epea amaitu ondorengo egunetik betegabeko zatikia ordaintzeko epea amaitu arte sortzen diren berandutze interesak exijituko dira.

9.– Baldin eta 2016ko uztailaren 12ko Kontseiluaren 2016/1164 Zuzentarauak (EB), Barne merkatuaren funtzionamenduan zuzeneko eragina duen zerga ihesaren aurkako arauak ezartzen dituenak, 5. artikuluan jasotakoaren arabera Europar Batasuneko estatu kide batean irteerako zerga ezarri zaien ondare elementuak Espainiara transferitu edo jarduerak lekualdatzen badira, irteerako estatu kideak zehaztutako balioa balio fiskaltzat hartuko da Espainian, salbu merkatuko balioa erakusten ez duenean.

10.– Artikulu honetako 6. apartatuan xedatutakoa ez da aplikatuko eta, beraz, transferitutako ondare elementuen merkatu balioaren eta balio fiskalaren arteko diferentzia ez da sartuko zerga oinarrian, baldin eta elementu horiek erlazionatuta badaude bermeen finantzaketa edo entregarekin, zuhurtziazko kapital beharkizunen konplimenduarekin edo likidezia kudeatzearekin, eta, betiere, aurreikusita badago elementu horiek Espainiara itzuli beharko direla urtebetean gehienez atxikitzeko.»

Bi.– 2020ko urtarrilaren 1etik aurrera hasitako zergaldietan ondorioak izateko, 20. artikuluaren 2. apartatua honela geratzen da idatzita:

«2.– Zergaldia amaitu dela ulertuko da establezimendu iraunkorrak jarduera egiteari utzi dionean edo, bestela, establezimendu iraunkorrak garai batean egindako inbertsioa desafektatzen duenean, bai eta bere jarduera atzerrira lekualdatzen duenean, establezimendu iraunkorra beste pertsona fisiko edo entitate bati eskualdatzen zaionean, etxe nagusiak egoitza aldatzen duenean eta titularra hiltzen denean ere.»

Hiru.– Hirugarren xedapen gehigarria honela idatzita geratzen da:

«Hirugarren xedapen gehigarria.– Adiskidetasunezko prozedurak.

1.– Beste estatu batzuetako administrazioekin nazioarteko hitzarmen eta itunak gauzatzean sor daitezkeen gatazkak hitzarmen edo itunetan jasotako adiskidetasunezko prozeduren bidez konponduko dira, bidezko errekurtso edo erreklamazioak aurkezteko eskubidea eragotzi gabe.

2.– Xedapen gehigarri honetan jasotakoa aplikatuko zaie, era berean, Kontseiluaren 2017ko urriaren 10eko 2017/1852/EB Zuzentarauak, Europar Batasunean auzi fiskalak ebazteko mekanismoenak, aipatzen dituen errentaren eta, hala badagokio, ondarearen zergapetze bikoitza desagertzea xedatzen duten nazioarteko hitzarmen eta itunetatik eratortzen diren Europar Batasuneko beste estatu kide batzuekiko auziak ebazteko mekanismoei ere.

3.– Adiskidetasunezko prozedura baten barruan bi administrazioen artean lortutako akordioa aplikatuko da akordioak behin irmotasuna hartzen duenean.

Ondorio horietarako, ulertuko da akordioak irmotasuna hartzen duela agintari eskudunek ukituta dauden gainerako estatuetako agintari eskudunei bidaltzen dieten azken jakinarazpenean adierazten dietenean interesdunek akordioaren edukia onartzen dutela eta uko egiten diotela adiskidetasunezko prozeduraren xede izan diren zerga betebeharraren elementuei buruz errekurritzeko duten eskubideari. Errekurtsoak hasita badaude, akordioa irmo bihurtuko da, baldin eta ukitutako pertsonak ukituta dauden beste estatuetako agintari eskudunei frogatzen badie neurriak hartu direla adiskidetasunezko prozeduraren xede izan diren zerga betebeharraren elementuekin lotutako prozedura horiek amaitzeko.

4.– Ondorio horietarako, erregelamenduz ezarriko da adiskidetasunezko prozedurak bideratu eta amaierako akordioa gauzatzeko prozedura.

Zerga Administrazioa arduratuko da prozedura izapidetzeaz, txostenak egiteaz, eta Espainiaren jarrera finkatzeko behar diren erabakiak hartzeaz, eta Espainiako Erresumako agintari eskudunari espedientea igorriko dio, kasu bakoitzean prozeduran aplikagarria den nazioarteko fasea garatzeko, aipatutako hitzarmen eta itunetan aurreikusitakoarekin bat etorriz.

5.– Ezin izango da batere errekurtsorik aurkeztu aipatutako akordioen aurka, eragotzi gabe akordio horiek gauzatzeko ematen diren egintza administratiboen aurka errekurtsoak jartzea.

6.– 1.a Adiskidetasunezko prozeduretan, zorraren ordainketa automatikoki etenda geratuko da, interesdunak eskatuta, baldin eta zorraren zenbatekoa, etendurak sortzen dituen berandutze interesak, eta etena eskatzeko unean bidezkoak izan daitezkeen errekarguak bermatzen badira, erregelamenduz ezarriko den eran.

Ezin izango da zorraren ordainketa eten, aurreko paragrafoan jasotakoaren arabera, etena bide administratiboan edo jurisdikzionalean eskatu daitekeen bitartean.

2.a Bakarrik berme hauek onartuko dira aurreko zenbakian aipatutako eten automatikoa lortzeko:

a) Diruaren edo balore publikoen gordailua.

b) Kreditu entitate edo elkarrekiko bermerako sozietate baten abal edo fidantza solidarioa, edo kauzio aseguruko ziurtagiria.

3.a Adiskidetasunezko prozedurek ez badute zor osoa hartzen, adiskidetasunezko prozedurek eragindako zenbatekora mugatuko da apartatu honetan jasotako etena.

7.– Baldin eta, 1. apartatuan jasotakoaren arabera, nazioarteko hitzarmen edo itunetan ezarritako adiskidetasunezko prozedura batekin batera martxoaren 8ko 2/2005 Foru Arauak, Gipuzkoako Lurralde Historikoko Zergen Foru Arau Orokorrak, V. tituluan erregulatutako berrikuspen prozeduretako bat gauzatzen bada, eten egingo da berrikuspen prozedura, adiskidetasunezko prozeduraren xede diren zerga obligazioaren elementuei dagokienez, harik eta azken prozedura hori amaitu bitartean.

8.– Zehapenak jarri izanak adiskidetasunezko prozeduraren arbitraje fasean sartzea baztertzen badu, 7. apartatuan jasotakoa ez da aplikatuko zehapenak administrazio bideak errekurritu direnean. Kasu horretan, adiskidetasunezko prozedurako arbitraje batzordean sartzea eragotziko da, harik eta zehapenari dagokionez bide administratiboan edo judizialean ebazpen irmoa eman arte.

9.– 90/436/EEE Hitzarmenaren babesean izapidetutako prozeduretan, baldin eta 10. apartatuan aipatutako zehapenen aurka jartzen bada edozein errekurtso edo erreklamazio administrazio bidean edo administrazioarekiko auzi bidean, eten egingo da adiskidetasunezko prozeduraren izapidea, bidezko lehen errekurtsoa jartzen denetik zehapenari dagokionez bide administratiboan edo judizialean ebazpen irmoa eman arte.

Ez da onartuko aurreko paragrafoan jasotako adiskidetasunezko prozedura hastea edo hura amaitzeko arrazoia izango da, baldin eta dena delako enpresei zehapen irmo bat jarri bazaie xedapen honetako 10. apartatuan jasotakoaren arabera.

10.– Aurreko 8. eta 9. apartatuetan jasotakoaren ondorioetarako, zehapentzat hartuko dira:

a) Zigor Kodearen 305. eta 305 bis artikuluetan aipatutako Herri Ogasunaren aurkako delituengatik jarritako zigorrak.

b) 195., 196. eta 197. artikuluetan aipatutako arau hausteengatik jarritako zehapenak, betiere datuak ezkutatu badira edo iruzurrezko bitartekoak edo tarteko pertsona erabili badira martxoaren 8ko 2/2005 Foru Arauak, Gipuzkoako Lurralde Historikoko Zergen Foru Arau Orokorrak, jasotakoaren arabera.

c) Urtarrilaren 17ko 2/2014 Foru Arauak, Gipuzkoako Lurralde Historikoko Sozietateen gaineko Zergarenak, 46. artikuluan jasotako arau hausteengatik jarritako zehapenak, betiere datuak ezkutatu badira edo iruzurrezko bitartekoak erabili badira martxoaren 8ko 2/2005 Foru Arauak, Gipuzkoako Lurralde Historikoko Zergen Foru Arau Orokorrak, jasotakoaren arabera. Ondorio horietarako, ulertu beharko da zirkunstantzia horiei buruzko aipamenak transferentzia prezioen dokumentazioari buruzkoak direla.

Apartatu honetako c) letran jasotakoa gorabehera, ez da zehapentzat hartuko, 8. eta 9. apartatuetan xedatutakoaren ondorioetarako, dokumentazioa osatu gabe aurkezteak dakarren arau hausteagatik jarritako zehapena, hark larriki eragozten ez duenean merkatuko balioa kuantifikatzea edo zehaztea.

11.– Xedapen honetan aipatutako prozedurak beren berariazko araudian erregulatuta daude, eta, haren ordez, aplikagarri den neurrian, zerga araudian.»

5. artikulua.– Abenduaren 30eko 18/1987 Foru Araua, Ondare Eskualdaketen eta Egintza Juridiko Dokumentatuen gaineko Zergarena, aldatzea.

Aldaketa hauek sartzen dira Ondare Eskualdaketen eta Egintza Juridiko Dokumentatuen gaineko Zergaren abenduaren 30eko 18/1987 Foru Arauan:

Bat.– 28. artikulua honela geratzen da idatzita:

«28. artikulua.– Subjektu pasiboa ondasun edo eskubidearen hartzailea izango da eta, bere faltan, notaritzako dokumentuak eragin edo eskatzen dituztenak, edo beren mesedetan luzatzen diren haiek.

Hipoteka bermea duten mailegu eskriturak direnean, mailegu emailea hartuko da subjektu pasibotzat.»

Bi.– 41. zenbakia gehitzen zaio 41.I artikuluko B) letrari. Hona hemen haren edukia:

«41.– Hiri Errentamenduei buruzko azaroaren 24ko 29/1994 Legearen 2. artikuluan aipatzen diren erabilera egonkor eta iraunkorreko etxebizitzen errentamenduek.»

Hiru.– 42. artikuluko 1. apartatua honela geratzen da idatzita:

«1.– Administrazioak eskubide eta ondasun eskualdatuen balio erreala egiaztatu ahal izango du, edo, hala badagokio, sozietate eragiketarena edo egintza juridiko dokumentatuena.»

Lau.– 45. artikuluko 1. apartatua honela geratzen da idatzita:

«1.– Aurreko 42.1 artikuluan xedatutakoa xedatuta ere, kasu hauek gelditzen dira balioaren egiaztapen administratibotik kanpo:

a) Zerga Administrazioak Zergen Foru Arau Orokorraren 85. artikuluan jasotakoaren arabera horretarako komunikatutako balioa.

b) Errepidean zirkulatzeko motor mekanikodun ibilgailu erabilien balioa eta urontzi erabilien balioa, betiere aldian-aldian foru agindu bidez argitaratzen diren batez besteko salmenta prezioen tauletan jasota agertzen badira.

Aipatutako tauletan, ibilgailu edo urontziaren erabilera urteen arabera aplikagarri diren balio galerako portzentajeak jasoko dira.»

6. artikulua.– Apirilaren 20ko 1/1993 Foru Dekretu Arauemaileak onartzen duen Jarduera Ekonomikoen gaineko Zergaren testu bategina aldatzea.

Aldatu egiten da Jarduera Ekonomikoen gaineko Zergaren testu bategina, apirilaren 20ko 1/1993 Foru Dekretu Arauemaileak onartua. Hona hemen aldaketak:

Bat.– Honela idatzita gelditzen dira 5. artikuluaren 1. apartatuko b) eta c) letrak:

«b) Beren jarduera hasten duten subjektu pasiboak, jarduera egiten duten zerga honen lehen bi zergaldietan.

Ez da ulertuko jarduera ekonomiko bat hasten denik, zergadunak aurretik jarduera bera zuzenean edo zeharka egina duenean. Horretarako, ulertuko da zergadunak jarduera bera egiten duela jarduera hori testu bategin honen I. eranskinaren barruko talde berean sailkatuta dagoenean.

Gainera, kasu hauetan ulertuko da jarduerari ez zaiola hasierarik eman:

a’) Jarduera batean lehenago beste titulartasun batekin aritu denean; zirkunstantzia hori betetzen dela joko da, besteak beste, bat egiteak, zatiketak edo jarduera adarren ekarpenak egiten badira.

b’) Subjektu pasiboa Merkataritza Kodeko 42. artikuluaren arabera sozietate talde bateko kide denean, non eta ez den taldeko enpresetako batek lehenago garatu gabeko jarduera berri bat.

c’) Jarduera bera egin duten enpresek 100eko 25eko partaidetza edo hortik gorakoa badute.

c) 1.000.000 eurotik beherako negozio zifra garbia duten subjektu pasiboak.

Ez-egoiliarren errentaren gaineko zergaren zergadunei dagokienez, salbuespena Espainiako lurraldean establezimendu iraunkor bidez jarduten dutenei bakarrik aplikatuko zaie, betiere haien negozio zifraren zenbateko garbia 1.000.000 eurotik beherakoa bada.

Salbuespena ez da aplikatuko letra honetan aipatutako negozio zifraren zenbateko garbiaren beharkizuna betetzen ez duten enpresek 100eko 25eko partaidetza edo handiagoa dutenean subjektu pasiboen kapitalean, zuzenean edo zeharka, non eta enpresa horiek ez diren arrisku kapitaleko funts edo sozietateak, hain zuzen Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren 77. artikuluan aipatuak.

Letra honetan jasotzen den salbuespena aplikatzeko, erregela hauek hartuko dira kontuan:

1.a Subjektu pasiboaren negozio zifraren zenbateko garbia Merkataritza Kodearen 35. artikuluko 2. apartatuaren bigarren paragrafoan xedatutakoari jarraikiz zehaztuko da.

2.a Pertsona fisikoen errentaren gaineko zergaren, sozietateen gaineko zergaren edo ez-egoiliarren errentaren gaineko zergaren zergadunen kasuan, negozio zifraren zenbateko garbia hauxe izango da, alegia, zerga horien aitorpena zerga honen sortzapena gertatu aurreko urtean aurkeztu beharreko zergaldikoa.

Sozietate zibiletan eta Zergen Foru Arau Orokorrak 35. artikuluaren 3. apartatuan aipatzen dituen entitateetan, negozio zifraren zenbateko garbia zerga honen sortzapena gertatu aurreko bi urte lehenagokoa izango da.

Zergaldia urte naturala baino laburragoa izan bada, negozio zifraren zenbateko garbia urtebetera eramango da.

3.a Negozio zifraren zenbateko garbia kalkulatzeko, subjektu pasiboak egindako jarduera ekonomiko guztiak hartuko dira kontuan.

4.a Entitatea sozietate talde bateko kide bada Merkataritza Kodeak 42. artikuluan jasotakoaren arabera, adierazitako magnitudeak talde horretako entitate guztiei buruzkoak izango dira.

Ondorio horietarako, ulertuko da sozietate taldea badela entitate batek zuzenean edo zeharka beste bat edo batzuk kontrolatzen dituenean edo kontrolatu ahal dituenean. Zehazki, zirkunstantzia hori betetzen dela joko da Merkataritza Kodeko 42.1 artikuluan jasotzen diren egoeretako bat gertatzen denean, entitatearen egoitza non dagoen eta urteko kontu bateratuak aurkeztu beharra duen aintzat hartu gabe.

5.a Subjektu pasiboak ez-egoiliarren errentaren gaineko zergaren zergadunak badira, Espainiako lurraldean dituzten establezimendu iraunkor guztiengatik egotzi beharrekoa izango da negozio zifraren zenbateko garbia.»

Bi.– Eduki hau ematen zaio 18. artikuluari:

«18. artikulua.– Matrikularen datu babestuak.

Herritarrek eskura eduki ahal izango dute beren jarduerei buruzko informazioa eta zergaren matrikulan jasotako datu babesgabeei buruzko informazioa.

Datu babestutzat hartzen dira, eta, beraz, Zergen Foru Arau Orokorrak 92. artikuluan jasotako araubidera bildutakotzat, jarduera ekonomikoen gaineko zergaren titular edo subjektu pasibo moduan agertzen direnen izen-abizenak, sozietate izena, identifikazio kodea eta zerga egoitza.»

7. artikulua.– Martxoaren 8ko 2/2005 Foru Araua, Gipuzkoako Lurralde Historikoko Zergen Foru Arau Orokorra, aldatzea.

Aldaketa hauek sartzen dira Gipuzkoako Lurralde Historikoko Zergen martxoaren 8ko 2/2005 Foru Arau Orokorrean:

Bat.– 126.1 artikuluko d) letra honela geratzen da idatzita:

«d) Foru arau honetako 128. artikuluko 1. eta 2. apartatuetan aipatzen diren kasuak gertatu eta haietan foru arau honetako 56.1 artikuluko c) letran aurreikusitako bitartekoa aplikatzen denean.»

Bi.– 127. artikuluaren 1. apartatua honela geratzen da idatzita:

«1.– Zergapekoek autolikidazio edo aitorpenak aurkezteko obligazioa epe barruan bete ez dutenean eta Zerga Administrazioak zerga zorra kuantifikatzeko informazio nahikoa duenean, azken horrek zerga zorra likidatzeko prozedura hasi ahal izango du, eta behin-behineko likidazio bat egin, non artikulu honetan jasotakoaren arabera zerga zorra zehaztuko duen.»

Hiru.– Zenbakia aldatzen zaio III. tituluko III. kapituluaren 2. sekzioan jasotako egiaztapen mugatuko prozedurari buruzko azpisekzioari, eta 7. azpisekzioa izatera pasatzen da.

Lau.– 204.2 artikuluko bigarren paragrafoa honela geratzen da idatzita:

«Arau hauste hori 300 euroko diru isun finkoz zehatuko da.»

Bost.– 2020ko uztailaren 1etik aurrerako ondorioekin, hamazazpigarren xedapen gehigarria gehitzen da. Hona hemen haren edukia:

«Hamazazpigarren xedapen gehigarria.– Planifikazio fiskaleko mekanismo jakin batzuei buruz informatzeko betebeharra.

1.– Pertsona edo entitate bitartekariek eta zergapeko interesdunek Zerga Administrazioari informazio hau eman beharko diote, Kontseiluaren 2011ko otsailaren 15eko 2011/16/EB Zuzentarauan (Fiskalitatearen esparruko lankidetza administratiboari buruzkoa, 77/799/EEE Zuzentaraua indargabetzen duena) eta foru arau honetako 17. artikuluaren 4. eta 5. apartatuetan eta 29. eta 91. artikuluetan jasotakoaren arabera:

a) Aurreko paragrafoan aipatutako araudiari jarraituz zehaztutako ezaugarri bereizietako bat gertatzen denean esku hartu edo parte hartzen duten mugaz gaindiko mekanismoak.

b) Mugaz gaindiko mekanismo komertzializagarrien eguneratzeari buruzko informazioa.

c) Planifikazioko mugaz gaindiko mekanismoen erabilpenari buruzko informazioa.

2.– Kontseiluaren 2011/16/EB Zuzentarauaren 8 bis ter artikuluko 5. apartatuan aipatutako sekretu profesionala gorde beharraren titular izango dira zuzentarau horren arabera pertsona edo entitate bitartekaritzat jotzen direnak, aintzat hartu gabe haiek egindako jarduera ekonomikoa, zuzentarauan definitutako mugaz gaindiko mekanismoetako batean interesa duten zergapekoei buruz jaso edo lortzen dituzten foru arau honetako 90.5 artikuluko datu pribatu ez-ondarezkoei eta datu konfidentzialei dagokienez.

Sekretu profesionala gordetzera behartutako pertsona edo entitate bitartekaria betebehar horretatik libre gelditu ahal izango da, zergapeko interesdunak modu frogagarri batean komunikatutako baimenaren bidez.

3.– Erantzukizunik gabe.

Planifikazio fiskaleko mekanismoei buruz informatzeko obligazioa, Kontseiluaren 2011/16/EN Zuzentarauan aipatua, pertsona edo entitate bitartekariek betetzea legez ezarritako terminoetan, ez da izango kontratu edo arauetan informazioa zabaltzeari buruz ezartzen diren murrizketen urratze bat, eta behartutako subjektuentzat ez du inolako erantzukizunik ekarriko informazio horren titular diren zergapekoekiko.

4.– Arau hausteen eta zehapenen araubidea.

Zerga arloko arau haustetzat jotzen da xedapen gehigarri honetan aipatzen diren aitorpen informatiboak epe barruan ez aurkeztea, bai eta aitorpenok osatu gabe, okerreko datuekin edo datu faltsuekin aurkeztea ere.

Zerga arloko arau haustetzat joko da, orobat, aitorpen horiek bitarteko elektroniko, informatiko eta telematikoekin aurkeztu behar direnean bestelako bitartekoekin aurkeztea.

Aurreko arau hausteetan, zehapena 1.000 euroko isun finkoa izango da aitorpen berari buruzko datu edo datu multzo bakoitzeko edo modu osatu gabe, oker edo faltsuan emandako datu bakoitzeko. Gutxieneko kopurua 3.000 eurokoa izango da, eta, gehienekoa, berriz, jasotako ordainsariak, jaso beharrekoak, edo mugaz gaindiko mekanismotik eratorritako balio fiskalari dagokion zenbatekoa, erregelamenduz ezarritako eran kalkulatua, arau hauslea pertsona edo entitate bitartekaria den edo zergapeko interesduna den, hurrenez hurren. Gehieneko muga ez da aplikatuko hura 3.000 euro baino txikiagoa denean.

Aurrekoa gorabehera, mugaz gaindiko mekanismoak ez badu baliorik erregelamenduz ezarritako baldintzetan eta arau hauslea zergapeko interesduna bada, gehieneko muga pertsona edo entitate bitartekariak jasotako edo jaso beharreko ordainsarien balioa izango da.

Ordainsaririk ez badago, muga izango da arau hauslea pertsona edo entitate bitartekaritzat hartzera eraman duen jardueraren merkatuko balioa, Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren 42.1 artikuluan xedatutakoaren arabera kalkulatua.

Aipatu diren gehieneko mugak aplikatzeko, ordainsarien edo balio fiskalaren existentzia eta kopuruak frogatu beharko ditu, modu sinesgarrian, arau hausleak.

Informazioa epez kanpo eta Zerga Administrazioak errekerimendurik egin gabe aurkezten bada, apartatu honetan aurreikusitako zehapena eta gutxieneko eta gehieneko mugak erdira murriztuko dira.

Informazioa ez bada aurkezten bitarteko elektroniko, informatiko eta telematikoak erabilita, horretarako obligazioa dagoenean, 250 euroko isun finkoa ezarriko da aitorpen berari buruzko datu edo datu multzo bakoitzeko. Gutxieneko muga 750 eurokoa izango da, eta gehienekoa 1.000 eurokoa.

5.– Xedapen gehigarri honetan arautzen diren zehapenak eta arau hausteak ez dira bateragarriak izango foru arau honen 202. eta 203. artikuluetan ezarritakoekin.»

Sei.– 2020ko uztailaren 1etik aurrerako ondorioekin, beste xedapen gehigarri bat gehitzen da, hemezortzigarrena. Hona hemen haren edukia:

«Hemezortzigarren xedapen gehigarria.– Planifikazio fiskaleko mugaz gaindiko mekanismoak aitortu beharrak partikularren artean sortzen dituen obligazioak.

1.– Sekretu profesionala gorde beharra dela eta, planifikazio fiskaleko mugaz gaindiko mekanismoen aitorpena aurkeztetik salbuetsita dauden pertsona edo entitate bitartekariek salbuespen horren froga sinesgarria eman beharko diete mekanismo horietan parte hartzen duten pertsona edo entitate bitartekariei eta zergapeko interesdunei, erregelamenduz ezarritako baldintzetan.

2.– Legez aitortzera behartuta dauden pertsonek edo entitateek aitorpena behin aurkeztuta, gertatzen bada aurkezpen horrek berekin dakarrela obligazio horretatik salbuestea gainerako pertsona edo entitate bitartekariak edo, hala badagokio, mugaz gaindiko mekanismo horietan parte hartzen duten beste zergapeko interesdunak, aurkezpen hori komunikatu beharko diote, modu sinesgarrian, salbuetsi diren zergapeko horiei, erregelamenduz ezarritako baldintzetan.

3.– Zehapen araubidea.

Zerga arloko arau hausteak dira xedapen gehigarri honetan aipatzen diren komunikazioak ezarritako epean ez egitea, edo komunikazio horiek egitea datuak kenduta edo datu faltsuak, osatugabeak edo okerrak sartuta.

Artikulu honetako arau hausteari 600 euroko isun finkoa ezarriko zaio.»

Zazpi.– 2020ko uztailaren 1etik aurrerako ondorioekin, bosgarren xedapen iragankorra gehitzen da. Hona hemen haren edukia:

«Bosgarren xedapen iragankorra. 2020ko uztailaren 1a baino lehen gauzatu diren mugaz gaindiko mekanismoak aitortzeko obligazioen araubide iragankorra.

Mugaz gaindiko mekanismoak aitortzeko betebeharra 2018ko ekainaren 25etik 2020ko ekainaren 30era bitartean jaio bada erregelamenduz ezarritako baldintzetan, mekanismo horiek 2020ko uztail eta abuztuan aitortuko dira.»

8. artikulua.– Apirilaren 7ko 3/2004 Foru Araua, irabazi-asmorik gabeko entitateen zerga erregimenari eta mezenasgoaren aldeko zerga-pizgarriei buruzkoa, aldatzea.

Aldaketa hauek sartzen dira apirilaren 7ko 3/2004 Foru Arauan, irabazi asmorik gabeko entitateen zerga erregimenari eta mezenasgoaren aldeko zerga-pizgarriei buruzkoan.

Bat.– 25 bis artikuluko lehen paragrafoa honela geratzen da idatzita:

«Entitate onuraduna 18. artikuluko b) letran eta i) letrako bigarren paragrafoan aipatzen direnetako bat denean, emaitza, dohaintza eta ekarpen kengarrien eraginkortasuna justifikatzeko, dokumentazio hau aurkeztu beharko dute onura fiskala aplikatzen duten zergadunek:»

Bi.– 32. artikulua honela geratzen da idatzita:

«32. artikulua.– Zerga onurak aplikatzeko baldintza komunak.

Titulu honetan jasotzen diren zerga onurak aplikagarriak izan daitezen, mezenasgoa hartzen duten entitateek ezinbesteko izango dute jasotako dohaintza eta ekarpenen berri ematea Zerga Administrazioari, zerga araudian ezarritako eredu eta epeetan.»

9. artikulua.– Otsailaren 11ko 2/2019 Foru Araua, Gipuzkoako Lurralde Historikoan kultur mezenasgoaren aldeko zerga pizgarriak arautzen dituena, aldatzea.

17. artikulua aldatzen da otsailaren 11ko 2/2019 Foru Arauan, Gipuzkoako Lurralde Historikoan kultur mezenasgoaren aldeko zerga pizgarriak arautzekoan, eta honela berridazten da:

«17. artikulua.– Beste zerga onura batzuk.

1.– Foru arau honen 8. artikuluan aipatutako dohaintzengatik dohaintza-emaileak lortzen dituen ondare irabaziak eta errenta positiboak salbuetsita egongo dira baldin eta pertsona fisikoen errentaren gaineko zergari, sozietateen gaineko zergari eta establezimendu iraunkor bidez jarduten duten ez-egoiliarren errentaren gaineko zergari lotuta badaude.

2.– Foru arau honetan aurreikusitako dohaintzen eta lankidetza enpresarialeko hitzarmenen ondorioz pertsona fisikoek egiten dituzten doako eskurapenak ez dira lotuta egongo oinordetzen eta dohaintzen gaineko zergari; pertsona fisikoen errentaren gaineko zergari egongo dira lotuta, eta hartatik salbuetsita.»

10. artikulua.– Urriaren 3ko 7/2002 Foru Araua, bide azpiegiturak erabiltzeko kanona eta «Bidegi Gipuzkoako Azpiegituren Agentzia-Agencia Guipuzcoana de Infraestructuras, S.A.» foru sozietate publikoaren zerga araubide juridikoaren alderdi batzuk arautzen dituena, aldatzea.

Honela aldatzen da urriaren 3ko 7/2002 Foru Araua, bide azpiegiturak erabiltzeko kanona eta «Bidegi Gipuzkoako Azpiegituren Agentzia-Agencia Guipuzcoana de Infraestructuras, S.A.» foru sozietate publikoaren zerga araubide juridikoaren alderdi batzuk arautzen dituena:

Bat.– 10. artikulua honela geratzen da idatzita:

«10. artikulua.– Bide azpiegituren ondasun higiezinen gaineko zerga, haien ustiapena "Bidegi Gipuzkoako Azpiegituren Agentzia-Agencia Guipuzcoana de Infraestructuras, S.A." foru sozietate publikoari dagokionean.

"Bidegi Gipuzkoako Azpiegituren Agentzia-Agencia Guipuzcoana de Infraestructuras, S.A." foru sozietate publikoak ustiatzen dituen errepide, bide eta gainerako lehorreko bideei Ondasun Higiezinen gaineko Zergari buruzko uztailaren 5eko 12/1989 Foru Arauaren 1. artikuluko 5. paragrafoan aurreikusitako ez-zergapetzea aplikatuko zaie, nahiz eta haien erabilera doakoa ez izan.»

Bi.– 11. artikulua honela geratzen da idatzita:

«11. artikulua.– "Bidegi Gipuzkoako Azpiegituren Agentzia-Agencia Guipuzcoana de Infraestructuras, S.A" foru sozietate publikoa sozietateen gaineko zergatik salbuestea.

"Bidegi Gipuzkoako Azpiegituren Agentzia-Agencia Guipuzcoana de Infraestructuras, S.A." foru sozietate publikoa entitate salbuetsitzat hartuko da, Sozietateen gaineko Zergari buruzko urtarrilaren 17ko 2/2014 Foru Arauak 12. artikuluko 1. apartatuan jasotakoaren arabera.»

11. artikulua.– Azaroaren 14ko 4/2016 Foru Araua, Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duena, aldatzea.

13. artikuluko gaztelaniazko epigrafea zuzentzen da azaroaren 14ko 4/2016 Foru Arauan, Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzekoan, eta honela berridazten da:

«Artículo 13.– Impuesto sobre el patrimonio.»

XEDAPEN GEHIGARRIA.– Sozietateen gaineko zergan sartutako aldaketek ondoriorik ez izatea foru arau honetan aipatzen diren portu agintaritzen zerga araubideari dagokionez.

Foru arau honen 2. artikuluko bat, sei, hamabi, hamahiru eta hamabost apartatuetan sartu diren aldaketek ez dute ondoriorik izango portu agintaritzen zerga araubidean, baldin eta Europar Batasuneko Justizia Auzitegiak erabakitzen badu ezen foru arau hau indarrean jarri aurretik Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauak portu agintaritzetarako aurreikusten duen tratamendu fiskala ez dela estatu laguntza bat Europar Batasunaren Funtzionamenduari buruzko Tratatuaren 107. artikuluan xedatutako eran, edo badela barne merkatuarekin bateragarria. Horrelakoetan, Zerga Administrazioak ofizioz erregularizatu beharko du foru arau honetan xedatutakoa aplikatu zaien zergadunen zerga egoera, hura aplikatu den zergaldietan.

Xedapen gehigarri honetan aurreikusitako kasuan, Gipuzkoako Foru Aldundiak foru dekretu-arau bat onartuko du foru arau honen bidez aldatu diren prezeptuei haietarako aurreikusi diren ondorioak baino lehen zuten idazketa emateko.

XEDAPEN IRAGANKORRA.– Araubide iragankorra adiskidetasunezko prozeduren arloan.

1.– Ez-egoiliarren Errentaren gaineko Zergari buruzko abenduaren 10eko 16/2014 Foru Arauaren hirugarren xedapen gehigarriari foru arau honek emandako idazkera berria indarrean jarri aurretik hasitako adiskidetasunezko prozedurak data horren aurreko araudiaren arabera arautuko dira, amaitu arte, hurrengo apartatuetan xedatutakoa izan ezik.

2.– Ez-egoiliarren Errentaren gaineko Zergari buruzko abenduaren 10eko 16/2014 Foru Arauaren hirugarren xedapen gehigarriko 7. eta 8. apartatuei foru arau honen 4. artikuluko hirugarren apartatuak emandako idazkera berrian xedatutakoa 2015eko urriaren 12tik aurrera hasitako adiskidetasunezko prozedurei aplikatuko zaie.

XEDAPEN INDARGABETZAILEA

Indarrik gabe geratzen dira foru arau honetan xedatutakoarekin bat ez datozen maila bereko edo txikiagoko xedapen guztiak.

AZKEN XEDAPENA.– Indarrean jartzea.

Foru arau hau Gipuzkoako Aldizkari Ofizialean argitaratu eta biharamunean jarriko da indarrean, bere xedapenetan espresuki jasotako ondorioak eragotzi gabe.

Azterketa dokumentala