Euskal Herriko Agintaritzaren Aldizkaria

42. zk., 2020ko martxoaren 2a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INGURUMEN, LURRALDE PLANGINTZA ETA ETXEBIZITZA SAILA

1263

EBAZPENA, 2020ko urtarrilaren 27koa, Ingurumen Administrazioaren zuzendariarena, zeinaren bidez formulatzen baita Arratzua-Ubarrundia eta Vitoria-Gasteiz udalerrietan «ST Vitoria-Salburua I.– II.» eta «ST Vitoria-Arana I.– II.» 30 kV-ko aireko eta lur azpiko linea elektrikoen lau zirkuitu eraikitzeko proiektuaren ingurumen-inpaktuaren adierazpena, IDE Redes Eléctricas Inteligentes-ek sustatuta.

AURREKARIAK

2017ko azaroaren 20an, Ingurumen Administrazioko zuzendariak Ebazpena eman zuen, zeinaren bidez formulatu baitzuen Arratzua-Ubarrundia eta Vitoria-Gasteiz udalerrietan «ST Vitoria-Salburua I.– II.» eta «ST Vitoria-Arana I.– II.» 30 kV-ko aireko eta lur azpiko linea elektrikoen lau zirkuitu eraikitzeko proiektuaren ingurumen-inpaktuaren azterketaren irismen-dokumentua, behin eraginpeko administrazio publikoei eta pertsona interesdunei kontsultak eginda, Ingurumen-ebaluazioari buruzko abenduaren 9ko 21/2013 Legearen 34. artikuluaren 3. apartatuan ezarritakoarekin bat.

2019ko maiatzaren 15ean, Eusko Jaurlaritzako Ekonomiaren Garapen eta Azpiegitura Sailaren Arabako Lurralde Ordezkaritzak jendaurreko informazioaren izapidea hasi zuen Arratzua-Ubarrundia eta Vitoria-Gasteiz udalerrietan, IDE Redes Eléctricas Inteligentes-ek sustatuta, «ST Vitoria-Salburua I.– II.» eta «ST Vitoria-Arana I.– II.» 30 kV-ko aireko eta lur azpiko linea elektrikoen lau zirkuitu eraikitzeko proiektuaren eta proiektuaren ingurumen-inpaktuaren azterketaren gainean, Ingurumen-ebaluazioari buruzko abenduaren 9ko 21/2013 Legearen 36. artikuluaren arabera, egoki iritzitako alegazioak aurkeztu ahal izateko; izapide horri dagokion iragarkia Arabako Aldizkari Ofizialean argitaratu zen (56. zk.). Jendaurrean jartzeko izapidea amaituta, Eusko Jaurlaritzako Ekonomiaren Garapen eta Azpiegitura Sailaren Arabako Lurralde Ordezkaritzak adierazi du alegazioak jaso dituela, eta horien kopia hitzez hitzezkoa aurkeztu du. Aldi berean, abenduaren 9ko 21/2013 Legearen 37. artikuluan xedatutakoa aplikatzeko, Eusko Jaurlaritzako Ekonomiaren Garapen eta Azpiegitura Sailaren Arabako Lurralde Ordezkaritzak, 2019ko maiatzaren 16an, kontsulta egin zien eraginpeko administrazio publikoei eta interesdunei. Emaitza espedientean jasota dago. Hori dela eta, sustatzaileak kontuan hartu ditu jendaurreko informazioaren eta administrazio publiko ukituei eta pertsona interesdunei kontsultatzeko izapideetan jasotako alegazioak eta txostenak, eta aldaketak egin ditu proiektuan eta ingurumen-inpaktuaren azterlanean.

2019ko azaroaren 21ean, proiektu honi buruzko ingurumen-inpaktuaren adierazpena egiteko eskabidea osatu zuen Eusko Jaurlaritzako Ekonomiaren Garapen eta Azpiegitura Sailaren Arabako Lurralde Ordezkaritzak Eusko Jaurlaritzako Ingurumen Administrazioaren Zuzendaritzan, «ST Vitoria-Salburua I.– II.» eta «ST Vitoria-Arana I.– II.» 30 kV-ko aireko eta lur azpiko linea elektrikoen lau zirkuitu eraikitzeko proiektua –Redes Eléctricas Inteligentes-ek sustatua–.

Eskabidearekin batera, dokumentazio hau aurkeztu zen:

– Proiektuaren dokumentu teknikoa.

– Ingurumen-inpaktuaren azterlana, 2019ko urrian egina.

– Informazio publikoaren izapidearen emaitzak deskribatzen dituzten zenbait dokumentu.

– Eraginpeko administrazioei eta norbanako interesdunei egindako kontsulta-izapidearen emaitza deskribatzen duten zenbait dokumentu.

ZUZENBIDEKO OINARRIAK

Ingurumen-ebaluazioari buruzko abenduaren 9ko 21/2013 Legearen 1. artikuluan xedatutakoaren arabera, lege horren helburua da ingurumenean ondorio adierazgarriak izan ditzaketen planen, programen eta proiektuen ingurumen-ebaluazioa arautu behar duten oinarriak ezartzea. Eta, horrenbestez, ingurumenaren babes-maila handia bermatzen du lege horrek, garapen jasangarria sustatzea helburu hartuta.

Era berean, Ingurumena babesteko otsailaren 27ko 3/1998 Lege Orokorraren 42. artikuluarekin bat etorriz, ingurumen-inpaktuaren ebaluazioak era egokian bermatuko dira. Helburua, besteak beste, ingurumenean dauzkan ondorioen analisia plangintza-prozesuaren lehen faseetan sartzea da, aukerarik egokienak hautatzeko xedearekin, jarduerek eragindako metaketa- eta sinergia-ondorioak aintzat hartuta.

Ingurumena babesteko otsailaren 27ko 3/1998 Lege Orokorrak bana-banako ingurumen-inpaktuaren ebaluazio-prozedura arautzen du, abenduaren 9ko 21/2013 Legean jasotzen den ingurumen-inpaktuaren ebaluazio-prozedura arruntaren baliokidea dena.

Horiek horrela, aipatu behar da «ST Vitoria-Salburua I.– II.» eta «ST Vitoria-Arana I.– II.» 30 kV-ko aireko eta lur azpiko linea elektrikoen lau zirkuitu eraikitzeko proiektua EAEko ingurumena babesteko otsailaren 27ko 3/1998 Lege orokorraren IB eranskinaren 3.4 epigrafean jasotako kasuetarik bat dela. «Energia elektrikoaren banaketa-lineak eta energia elektrikoa transformatzeko azpiestazioak eraikitzeko proiektuak, guztia edo zati bat ingurugiro-zona sentikorretan eraikitzen denean. Azken kasu horretatik kanpo geldituko dira nagusiki edo bakarrik iltzatzeko metodoaren bidez gauzatutako energia elektrikoko linea txikiak eraikitzea».

Abenduaren 9ko 21/2013 Legearen 35. artikuluan eta hurrengoetan xedatutakoa aplikatzeko, Eusko Jaurlaritzako Ekonomiaren Garapen eta Azpiegitura Sailaren Arabako Lurralde Ordezkaritzak, organo substantiboa den aldetik, linea elektrikoa eraikitzeko proiektuaren ingurumen-inpaktuaren ebaluazio-prozedura arrunta egiteko beharrezkoa dena xedatu du. Horretarako, ingurumen-inpaktuaren azterlan bat gehitu du espedientean eta kontsulta publikoak egin ditu; gainera, eragindako administrazio publikoek zein interesdunek prozeduran parte hartu dute.

Proiektuaren ingurumen-ebaluazioaren espedienteko dokumentazio teknikoa eta txostenak aztertuta, eta ikusirik ingurumen-inpaktuaren azterketa zuzena dela eta indarreko araudian ezarritako alderdien araberakoa dela, irismen-dokumentuan jasotako baldintzak barne, Ingurumen Administrazioaren Zuzendaritzak ingurumen-inpaktuaren adierazpen hau eman du; bertan, proiektuaren proposamenean ingurumen-arloko alderdiak sartzearen alde egin da, eta plana aplikatzearen ondorio adierazgarrien aipamena jaso da, baita sartu beharreko azken oharrak ere, soilik ingurumen arlokoak. Zuzendaritza hori eskumeneko organoa da Euskal Autonomia Erkidegoko ingurumena babesteko otsailaren 27ko 3/1998 Lege Orokorraren arabera, baita Ingurumen, Lurralde Plangintza eta Etxebizitza Sailaren egitura organikoa eta funtzionala ezartzeko den apirilaren 11ko 77/2017 Dekretuaren arabera ere.

Horrenbestez, zenbait xedapen aztertuta –Euskal Autonomia Erkidegoko ingurumena babesteko otsailaren 27ko 3/1998 Lege Orokorra; Ingurumen-ebaluazioari buruzko abenduaren 9ko 21/2013 Legea; Ingurumen, Lurralde Plangintza eta Etxebizitza Sailaren egitura organikoa eta funtzionala ezartzen duen apirilaren 11ko 77/2017 Dekretua; Administrazio Publikoen Administrazio Prozedura Erkidearen urriaren 1eko 39/2015 Legea eta aplikatzekoak diren gainerako arauak–, honako hau

EBAZTEN DUT:

Lehenengoa.– Ingurumen-inpaktuaren adierazpen hau formulatzea IDE Redes Eléctricas Inteligentes-ek Arratzua-Ubarrundia eta Vitoria-Gasteiz udalerrietan sustatzen duen «ST Vitoria-Salburua I.– II.» eta «ST Vitoria-Arana I.– II.» 30 kV-ko aireko eta lur azpiko linea elektrikoen lau zirkuitu eraikitzeko proiektuaren alde.

Aipatu proiektuan, 30 kV-ko aireko eta lur azpiko linea elektrikoen lau zirkuitu eraikiko dira; alegia, zirkuitu bikoitzeko linea bat, «ST Vitoria-Salburua I.– II.», ST Vitoriaren eta «A» kutxatilaren artean, eta zirkuitu bikoitzeko beste linea bat, «ST Vitoria-Arana I.– II.», ST Vitoriaren eta 901350600 «Varsovia-Obras» transformazio-zentroaren artean. Bi-biak Arratzua-Ubarrundia eta Vitoria-Gasteiz udalerrietan daude.

Vitoria azpiestazio elektrikotik abiatzen dira lineak zirkuitu bikoitzeko bi linea paralelotan, eta lurpetik doaz Zurbano parean, eta berriz ere airetik, zirkuitu bikoitzeko bi lineatan, Dulantzi ibaia zeharkatzeko. Ondoren, berriz ere lurpetik doa linea Arkauteko akademia mendebaldetik eta Salburuko hezegunea ekialdetik eta hegoaldetik inguratzeko, eta N-104 errepidearekiko paraleloan egiten du aurrera Brusela hiribidera arte. Gasteizko hirigunean jada, lurpetik doa Elorriagako Atea kalean barrena Aranako TEAra arte.

30 kV-ko zirkuitu bikoitzeko bi aireko linea eraikiko dira, 1.590 metro ingurukoa bakoitza, eta 30 kV-ko lur azpiko linea elektrikoak, 4.870 metro ingurukoak, hodi berean. Zirkuitu bikoitzaren osagaiak:

– ST VITORIA-SALBURUA 1 eta 2, eta «A» kutxatila, aireko linea, guztira 1.593 m-koa (830 m, 1. eta 6. euskarrien artean, eta 763 m, 7. eta 11. euskarrien artean); lur azpiko linea, 762 m-koa, 6. eta 7. euskarrien artean, eta lur azpiko linea, 3.778 m-koa, 11. euskarriaren eta «A» kutxatilaren artean.

– ST VITORIA-ARANA 1 eta 2, eta 901350600 «Varsovia-Obras» transformazio-zentroa, aireko linea, guztira 1.586 m-koa (836 m, 1. eta 6. euskarrien artean, eta 750 m, 7. eta 11. euskarrien artean); lur azpiko linea, 794 m-koa, 6. eta 7. euskarrien artean, eta lur azpiko linea, 4.088 m-koa, 11. euskarriaren eta 901350600 «Varsovia-Obras» transformazio-zentroaren artean.

Gainera, ebaketa-zentro bat instalatuko da.

Lehenago aipatutako jarduketek berekin dakarte lur-mugimenduak egitea, landaredia moztu eta eskokatzea, lurzorua okupatu eta haren erabilera aldatzea eta paisaian eragitea.

Lur azpiko lineak eta euskarrien zimenduek behar dituzten zangak induskatzeko, 10.441 m³ lur mugituko dira.

Lineak Dulantzi ibaia zeharkatzen du airetik, eta lur azpitik, aldiz, Errekabarri erreka, izenik gabeko hiru erreka, putzuaren ubidea, San Tomas erreka eta Errekaleor ibaia. Hauek dira ukitutako Batasunaren intereseko habitatak: haltzadiak eta lizardiak (91E0* kodea) (1.699 m²), Salix alba eta Populus alba galeria-basoak (92A0 kodea) (138 m²), bisoi europarraren interesgunea (2.036 m²) eta uhalde-enararen interesgunea (2.123 m²). Halaber, aireko linearen 25 m Ingurumen eta Lurralde Politikako sailburuaren 2016ko maiatzaren 6ko Aginduan zehazten den hegaztiak linea elektrikoetatik babesteko eremuaren barnean daude. Gainera, lur azpiko linea elektrikoaren 4.520 m Salburua KBE/HBBEaren (ES2110014 kodea) ingurutik doaz. Korridore ekologikoen sareari ere eragiten dio lineak.

Bigarrena.– Baldintza hauek jartzea proiektua gauzatzeko; baldintza lotesleak dira, Euskal Autonomia Erkidegoko ingurumena babesteko otsailaren 27ko 3/1998 Lege Orokorrak 47.2 artikuluan xedatzen duenaren arabera.

A) Proiektua garatzeko baldintzak bat etorriko dira indarrean dagoen araudiarekin eta ebazpen honen apartatu hauetan ezarritakoarekin, eta, aurrekoari aurka egiten ez dion guztian, bat etorriko dira proiektuaren ingurumen-inpaktua ebaluatzeko Eusko Jaurlaritzako Ekonomiaren Garapen eta Azpiegitura Sailaren Arabako Lurralde Ordezkaritzak Ingurumeneko Sailburuordetza honen aurrean aurkeztutako dokumentazioan aurreikusten denarekin.

B) Proiektua aldatzen edo zabaltzen bada, Ingurumen Ebaluazioari buruzko abenduaren 9ko 21/2013 Legeak 7. artikuluan xedatuari men egingo zaio.

Aldaketa puntualak egin behar badira proiektuan, eta aurreko paragrafoan aipatutakoak baino garrantzi txikiagoa badute eta obrak egiteko falta diren gainerako izapideetan sortu badira, ingurumenaren ikuspuntutik ere justifikatu beharko dira. Neurri babesle eta zuzentzaileetan, ingurumena zaintzeko programan, aurrekontuan eta baldintza-pleguetan jasoko dira proiektuari egiten zaizkion aldaketak.

C) Ingurumen-ebaluazioko prozeduraren alderdi garrantzitsuak.

Ebaluazioan, Salburuko hezegunea nabarmendu behar da, Natura 2000 Sareko Naturagunea. KBE/HBBE figura du (ES2110014 kodea) eta RAMSAR nazioarteko garrantziko hezegunea da. Hezegunea berebizikoa da hegazti urtar askok babesteko, elikatzeko eta ugaltzeko erabiltzen baitute, baita migrazioetan atseden hartzeko ere. Hezegune horretan, Batasunaren eta probintziaren kontserbazio-intereseko habitat hauek daude: haltzadiak eta lizardiak (91E0* kodea), Salix alba eta Populus alba galeria-basoak (92A0 kodea) eta hezeguneei loturiko landare-formazio gehiago, nagusiki, lezkak eta ihiak. Interes handikoa da habitat horietako fauna komunitatea, tartean, bisoia, igaraba eta saguzar, odonatu, urlehortar eta narrasti espezie batzuk, Batasunaren interesekoak eta mehatxu-maila desberdinak dituztenak.

Halaber, hezegunearekin loturiko ur-ibilguen ertz estuetako erriberako landaredia aipatu behar da (makalak, zumarrak, sahastiak, etab.). Horiek, aldi berean, bisoi europarraren interes bereziko eremuak dira (Dulantzi ibaia), baita uhalde-enararena ere (Zaborraren erdiko tartea, eta bere ibai-adarrak). Espezie horiek Araban kudeatzeko plan onartua dute.

Salburuko hezegunearen KBEa eta hartara isurtzen diren ur-ibilguak EAEko korridore ekologikoen sarearen barnean daude. Hegoaldeko errekak Salburuaren eta Gasteizko Mendien KBEaren arteko zubia dira. Iparraldean, Zadorra ibaiaren KBEarekin lotuta dago, eta lotura horren bidez, Zadorraren urtegi-sistemaren KBEarekin eta Ebro arroko gainerako ibaien KBEekin.

D) Babes- eta zuzenketa-neurriak.

Babes- eta zuzenketa-neurriak indarreko araudiaren arabera gauzatuko dira, hurrengo apartatuetan adierazitakoa kontuan hartuta, eta, aurrekoari aurka egiten ez dion orotan, sustatzaileak funtsezko organoaren bidez Ingurumenaren Administrazioaren Zuzendaritza honetan aurkeztutako dokumentazioan aurreikusitakoa kontuan hartuta.

Bestalde, neurrien izaria eta kontrolerako langile kopurua nahikoak izango dira ingurumen-inpaktuaren azterketan finkatutako kalitate-helburuak eta ingurumenaren gaineko inpaktuaren adierazpen honek finkatzen dituenak bermatzeko.

Neurri horiek guztiak obra kontratatzeko baldintza-pleguetan sartu beharko dira, eta baldintza horiek betetzen direla bermatuko duen aurrekontua ere izan beharko dute. Era berean, obretako jardunbide egokiak ezarri beharko dira.

Honako apartatu hauetan adierazten diren neurriak gehitu beharko dira:

D.1.– Natura-ondarea babesteko neurriak.

Gainera, babesteko eta zuzentzeko neurri hauek hartuko dira:

D.1.1.– Arabako lurralde historikoko mendiei buruzko martxoaren 26ko 11/2007 Foru Arauak eta, hala dagokionean, Arabako Foru Aldundiaren mendi-arloko organo eskudunak ezarritakoaren kalterik gabe, oro har, mozketak linearen segurtasuna arriskuan jarri dezaketen zuhaitz espezieetara mugatuko da, eta gainerako zuhaitz espeziak eta zuhaixkak bere horretan lagako dira. Landaredia eskokatzea saihestuko da euskarriak, segurtasun-linea, sarbideak edo muntatze-plataformak eraikitzeagatik zuzeneko eragina aurreikusten ez den eremuetan.

D.1.2.– Eremu ahulenetan eta natura-balio handikoetan (bertako baso-masak, babestutako flora-espezieak dauden eremuak, faunarako interes berezia duten eremuak eta abar), bideragarria bada, inausi edo lepatu egingo dira zuhaitzak, eta bota, soilik, ezinbestekoa denean linearen segurtasunerako. Neurri hori zorrotz-zorrotz bete beharko da erreten-inguruetan, non lehentasuna baitu altuerako mozketak, inausketaren aldean; halako inguruetan, bereziki, eskuz jarriko dira kableak, ibilgailurik igaro gabe eta materialik garraiatu gabe.

D.1.3.– Zuhaitzak moztea edo soiltzea beste biderik ez bada, esku-erremintak erabiliko dira eta ez makina asunak, modu selektiboan lan egin ahal izateko. Zuhaitzak ipurditik moztea beti era zuzenduan egingo da, gainerako landaredia autoktonoari kalterik ez eragiteko.

D.1.4.– Moztu beharreko zuhaitz-eremuetako zuhaixka-geruzari eraginez gero, eremu horietan erriberako basoko zuhaixka-espezieak landatu beharko dira.

D.1.5.– Obrak hasi aurretik eta horien zuinketa egiten den bitartean, proiektuak eragindako azaleran ibilbide zehatzak egingo dira, aurreikusitako lanak oztopatzen ez dituzten eta kontserba daitezkeen zuhaitzak antzeman eta markatzeko; obratik gertuen dauden eta makinen kolpeak jasateko arriskua duten aleak babestu egingo dira. Eremuak kalteberak izanez gero, hala nola lehentasunezko eta Batasunaren intereseko habitatak, baso-masa autoktonoak eta mehatxupeko landaretzarentzat interes berezikoak diren eremuak, botanikan aditua den batek egon beharko du obran bertan, obra-zuzendaritzari edo obra-arduradunari aholkuak emateko.

D.1.6.– Neurri babes zorrotzak hartuko dira mehatxatutako flora- eta fauna-espezieen populazioak dauden eremuetan; lanek eragindako eremua in situ mugatuta geratu beharko da, eta obra-ingurunetik hurbil dauden balio handiko elementu naturalak behar bezala babestuta egongo dira, ustekabeko eraginak gerta ez daitezen.

D.1.7.– Obrak egin behar diren lekuetan sartzeko, ahal den neurrian, lehendik dauden bideak erabiliko dira, ingurumen-inpaktuaren azterlanean proposatutakoarekin bat etorriaz. Trazadura berriko sarbideak eta ditugun sarbideak egokitzeko lanak behar denean gauzatuko dira, betiere lur-mugimendua eta aurreko apartatuetan aipatutako eremu ahulen gaineko eragina murriztuz; halaber, ibilguak ez dira kanalizatuko, ez eta zuzenduko ere.

D.1.8.– Obrak proiektua gauzatzeko behar-beharrezkoa den gutxieneko eremuan gauzatuko dira, bai eta lurzorua okupatzea eragiten duten eragiketa osagarri guztiak ere. Ahalik eta gehien mugatuko da espazioak obrako materialez okupatzea, eta makineria eta ibilgailuak horretarako prestatutako esparrutik kanpo ibiltzea.

D.1.9.– Eremuren bat egokitu behar bada bertan makina uzteko, materialak bolada batean biltzeko, edo proiektuarekin zerikusia duen beste edozein jarduera gauzatzeko, ingurumen-inpaktu txikieneko irizpideei jarraikiz hautatuko dira eremu horiek. Eremu horiek inola ere ezin dira egon intereseko landaretza duten espazioetan (bertako zuhaiztiak, ibaiertzeko landaretza, lehentasunezko intereseko habitatak), ez eta ibilguetatik hurbil dauden lur-sailetan ere.

Obrak hasi aurretik, obrarako sarbideek, euskarriak muntatzeko plataformek, obrako materialek, baita hondeaketa-lurrak eta hondakinak aldi baterako metatzeko tokiek ere, okupatzen dituzten eremuak behar bezala zehaztuko dira xehetasunezko kartografian. Obra-zuzendaritzak baimendu beharko du zedarritze hori, eta, aldez aurretik, ebazpen honen D.10 apartatuan aipatutako ingurumen-aholkularitzak txostena egin ondoren, betiere.

D.1.10.– Ibai eta erreka inguruetan, kontu handiz mugituko da makineria, landaredia premiarik gabe ez eskokatzeko.

Lanak egin bitartean kalte egiten bazaio ibaiertzetako edo ur-bazterretako landarediari, ibaiertzak lehengoratzeko eta ur-bazterrak babesteko lanak egingo dira, ibilguak lehengo egoerara itzularazteko.

D.1.11.– Dulantzi ibaia bisoi europarraren interes bereziko eremua da, bisoi europarraren (Mustela lutreola) Arabako lurralde historikoko kudeaketa-planaren arabera (azaroaren 7ko 322/2003 Foru Aginduaren bitartez onartu zen). Ibai hori eta Zadorra ibaiaren erdiko tartearen ibaiadar guztiak uhalde-enararen interes bereziko eremuak dira, uhalde-enararen (Riparia riparia) Arabako lurralde historikoko kudeaketa-planaren arabera (martxoaren 7ko 22/2000 Foru Dekretuaren bitartez onartu zen). Horiek horrela, Arabako Foru Aldundiaren Ingurumen eta Hirigintza Sailak agintzen duenaren kalterik gabe, hauek hartu beharko dira kontuan:

– Ez da obra-lanik egingo erreketan eta horien inguruan aipatu espezieen ugaltze-aldian eta umatze-aldiaren hasieran.

– Dulantzi ibaian eta gainerako erreken ibilguetan egin beharreko jardueren aurretik, aditu batek prospekzio bat egingo du ezponda eta erribera ukituetan, biao-leku, babesleku edo habiarik badagoen zehazteko. Aztarnarik aurkituz gero, jakinaren gainean jarri beharko da Arabako Foru Aldundia, zer egin behar den esan dezan.

– Obrak hasi aurretik, obra-egutegia zehaztuko da, proiektuaren jarduerak adierazita. Egutegia faunan inpaktu adierazgarriak ekiditera egokituko da. Informazio hori, obra-zuzendaritzak baimendu beharko duen plano batean jasota egon beharko da, ebazpen honen D.10 apartatuan aipatutako ingurumen-aholkularitzak txostena egin ondoren, betiere.

D.1.12.– Adierazi den eremutik kanpo ustekabeko kalterik egingo balitz, neurri zuzentzaileak eta guneak oneratzeko neurri egokiak ezarriko dira; aldez aurretik, ebazpen honetako D.10 apartatuan aipatzen den txostena egingo du ingurumen-aholkularitzak.

D.1.13.– Ezertan eragotzi gabe zer xedatzen duen Hegaztiek goi-tentsioko linea elektrikoekin talka ez egiteko eta ez elektrokutatzeko neurriak ezartzen dituen abuztuaren 29ko 1432/2008 Errege Dekretuak, hegaztiak babesteko gailuak jarriko dira.

Ura eta lurzorua babesteko neurriak.

Ezarri daitezkeen prozeduren esparruan uren arloko organo eskudunak egoera honetan ezarriko dituen baldintzez gain, honako babes- eta zuzenketa-neurri hauek ere hartu beharko dira:

D.1.14.– Eraikuntza-lanak egin bitartean, ahalik eta material xehe eta kutsatzaile gutxien bota behar da drainatze naturaleko sarera. Horretarako, poltsa iragazleak, tratamendu-zangak, koipeak bereizteko gailuak, jalkinak atxikitzeko gailuak eta aquabarrierrak proposatu dira. Ebazpen honen D.11 puntuan aipatzen den lan-programan jasoko dira sistema horien ezaugarriak, kokalekua eta neurri zehatzak.

D.1.15.– Tratamendu-sistemen mantentze-lanak eta berrikuspenak egin beharko dira aldian behin, errendimendua behar bezalakoa dutela ziurtatzeko.

D.1.16.– Berariaz debekatuta egongo da makinak konpontzea edo makinei olioa aldatzea, zeregin horretarako berariaz ezarritako eremuetatik kanpora. Obrak egiten ari diren inguruan ez badago horretarako azpiegitura egokirik, berariazko gune bat egokitu beharko da lan horiek egiteko. Esparru hori mugatuta egongo da, eta zorua iragazgaiztu egin beharko da; era berean, efluenteak jasotzeko sistema bat izango da, zorua eta urak kutsatzea ekiditeko.

D.1.17.– Proiektua Lurzorua kutsa dezaketen jarduerak edo instalazioak izan dituzten edo dituzten lurzoruen inbentarioari buruzko irailaren 30eko 165/2008 Dekretuan jasotako zenbait lekutan garatzen da. Zehazki, 01059-01787, 01059-01722 eta 1059-01531 lurzatiez ari gara. Horietan, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legean kasu horietarako ezarritakoari jarraikiz jardungo da.

D.1.18.– Sarbide berriak ireki edo antzeko ekintzak egin behar izanez gero, eta, horretarako, lur-mugimenduak egin behar badira, eragina izan lezaketenak Lurzorua kutsa dezaketen jarduerak edo instalazioak jasan dituzten lursailetan, ekainaren 25eko 4/2015 Legean xedatutakoa bete beharko da.

D.1.19.– Makineriak eta ibilgailuek ez dituzte inoiz zeharkatuko linearen eta haren sarbideen trazaduran dauden ibilguak.

D.2.– Kutsadura atmosferikoa prebenitzeko eta hautsa aireratzea murrizteko neurriak.

D.2.1.– Lanek dirauten artean, zorrotz kontrolatuko dira ibilgailuak iragan ondoko garbiketa-lanak, bai egin beharreko jardunaren eraginpeko ingurunean, bai jardun-eremuetara sartzeko guneetan. Sistema bat eduki beharko da aldi baterako hutsik dauden pistak eta inguruak ureztatzeko.

D.2.2.– Garraio-ibilgailuek eta obretako makinek ez dute lokatzez zikinduko jarduera-eremuetatik bide publikoetara bitarteko tartea.

D.3.– Zarataren eta bibrazioen ondorioak gutxitzeko neurriak.

D.3.1.– Obra-faseak dirauen artean, ingurumen-inpaktuaren azterketan zehaztutako neurri babesleak ezarri beharko dira, honako gai hauei dagokienez: obretako makinen mantentze orokorrari, zarata eta bibrazioak jatorrian murrizteari, zarata egiten den ordu kopurua murrizteari, obretan erabilitako tresnek egiten duten zarata kontrolatzeari, etab.

D.3.2.– Halaber, Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuaren 22. artikuluan aurreikusitakoaren arabera, zonifikazio akustiko, kalitate-helburu eta igorpen akustikoei dagokienez, obrak egitean erabiliko diren makinak egokitu egin beharko dira kanpoan erabiltzeko makinen soinu-igorpenei buruz indarrean dagoen araudian ezarritako aginduetara, eta, bereziki, eta hala badagokie, kanpoan erabiltzeko makinek ingurumenean sortzen dituzten soinu-igorpenak arautzen dituen otsailaren 22ko 212/2002 Errege Dekretuan eta arau osagarrietan ezarritakora.

D.4.– Hondakinak kudeatzeko neurriak.

D.4.1.– Hondakin eta lurzoru kutsatuei buruzko uztailaren 28ko 22/2011 Legeak araututako moduan eta aplikatzekoak diren berariazko araudiek agindutako moduan kudeatuko dira obretan sortutako hondakinak, hondeaketakoak, ebakiak, bilgarriak, eta errefuseko nahiz garbiketa-kanpainetako materialak.

Hondakinak kudeatzeko hierarkia-printzipioei jarraituz, hondakinen sorreran prebentzioa sustatu behar da, edo, hala badagokio, uztailaren 28ko 22/2011 Legearen 8. artikuluan ezarritako lehentasun-hurrenkerari jarraituz kudeatu behar dira, hau da: prebenitzea, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa barne. Hondakinak kasu honetan baino ezingo dira deuseztatu: haiek balorizatzea teknikoki, ekonomikoki eta ingurumenaren ikuspegitik bideraezina dela behar bezala frogatzen bada.

Berariaz debekatuta dago sortzen diren tipologia ezberdineko hondakinak elkarrekin edo beste hondakin nahiz efluente batzuekin nahastea; beraz, hondakinak jatorritik bertatik bereiziko dira, eta horiek bildu eta biltegiratzeko bide egokiak jarriko dira, nahasketak ekiditeko.

D.4.2.– Eraikitze- eta eraispen-jardueren ondorioz sortutako hondakinak Eraikuntza- eta eraispen-hondakinen ekoizpena eta kudeaketa arautzeko den otsailaren 1eko 105/2008 Errege Dekretuan eta Eraikuntza- eta eraispen-hondakinen ekoizpena eta kudeaketa arautzeko den ekainaren 26ko 112/2012 Dekretuan aurreikusitakoa betez kudeatuko dira.

Aipatutako 112/2012 Dekretuaren 4. artikuluaren arabera, proiektuaren sustatzaileak gehitu beharko dio eraikitze-proiektuari hondakinen eta eraikitze- eta eraispen-materialen kudeaketa-azterlan bat; eta I. eranskinean ezarritako gutxieneko edukia izan beharko du.

Halaber, otsailaren 1eko 105/2008 Errege Dekretuan aurreikusitako eskakizunak betetzeaz gain, plan bat prestatuko du kontratistak, obrako eraikuntza- eta eraispen-lanetan sortzen diren hondakinekiko eta materialekiko betebeharrak nola beteko dituen azaltzeko. Ebazpen honen bigarren apartatuaren D.11 puntuan aipatzen den lan-programan txertatuko da plan hori.

D.4.3.– Hondakinen azken helmuga zabortegi baimenduan ezabatzea dela aurreikusten baldin bada, orduan hondakin horiek ezaugarrituko dira, Kontseiluaren 2002ko abenduaren 19ko 2003/33/EE Erabakiak, Hondakinak hondakindegietan hartzeko irizpideak eta prozedurak ezartzen dituenak, xedatutakoari jarraikiz, eta otsailaren 24ko 49/2009 Dekretuak, Hondakinak hondakindegietan biltegiratuta eta betelanak eginda ezabatzea arautzen duenak, ezarritako jarraibideen arabera.

Jarduerako soberakinak betelanak egiteko erabiltzen badira, aipatutako otsailaren 24ko 49/2009 Dekretuan ezarritako baldintzak bete beharko dira.

Betelanak jalkitzeko, kutsatzaile-edukia A ebaluazioko balio adierazleetan (EBA-A) ezarritako baloreen azpitik duten materialak bakarrik baimenduko dira. Lurzorua ez kutsatzeko eta kutsatutakoa garbitzeko ekainaren 25eko 4/2015 Legearen III. eranskinean daude jasota adierazle horiek.

D.4.4.– Hondakin arriskutsuak biltzeko sistemak bereiziak izango dira, duten tipologia dela-eta isurketaren baten ondorioz nahastuz gero arriskutsuago bihurtu badaitezke edo kudeaketa zaildu badezakete. Halaber, Hondakin toxiko eta arriskutsuei buruzko maiatzaren 14ko 20/1986 Legea betearazteko Erregelamendua onartzen duen uztailaren 20ko 833/1988 Errege Dekretuaren 13. artikuluan ezarritako segurtasun-arauak bete beharko dituzte, eta itxita egon beharko dute kudeatzaileari eman arte, isurita edo lurrunduta gal ez daitezen.

Aipatutako ontziak edo bilgarriak argi eta modu irakurgarri eta ezabaezinean etiketatu beharko dira, baita indarreko araudiaren arabera ere.

D.4.5.– Industrian erabilitako olioaren kudeaketa arautzen duen ekainaren 2ko 679/2006 Errege Dekretuari jarraituz kudeatu beharko da sortutako olio erabilia.

Olio erabiliak, baimendutako kudeatzaile bati eman arte, estalpean utziko dira behar bezala etiketatutako depositu estankoetan; zola iragazgaitz baten gainean egon beharko dute, kubo txikietan edo ihesei eta isuriei eusteko sistemen barruan.

D.4.6.– Araudi hori betetzea errazagoa izan dadin, lanen ondorioz sortutako hondakinak kudeatzeko sistemak prestatu beharko dira. Lan horien arduradunek kudeatuko dituzte sistemok, eta haien ardura izango da, halaber, beharginek hondakinak behar bezala erabiltzea. Bereziki, erregaiak eta produktuak biltegiratzearen, makinen mantentze-lanak egitearen edo hondakinak erretzearen ondorioz ez dira inolaz ere efluente kontrolatu gabeak sortuko.

Aurrekoaren haritik, eremu jakin bat egokituko da aldi batean hondakin arriskutsuak pilatzeko; hala nola, olio-potoak, iragazkiak, olioak, pinturak eta abar. Gainera, hondakin inerteak biltzeko edukiontzi espezifikoak jarriko dira, hondakin arriskutsuen guneetatik bereizita.

D.4.7.– Obretan sortutako hondakinen ingurumen-jarraipenari buruzko txosten osoa egin beharko da, eta txosten horretan sartu beharko dira indarreko legerian jasotako identifikazio-dokumentuak eta tratamendu-kontratuak.

D.5.– Kultura-ondarea babesteko neurriak.

Euskal Kultura Ondareari buruzko maiatzaren 9ko 6/2019 Legean ezarritako gainerako xedapenak gorabehera, obrak egiterakoan aztarna arkeologikoren bat egon daitekeela pentsarazten duen zerbait aurkitzen bada, berehala jakinaraziko zaio Arabako Foru Aldundiko Ondare historiko-arkitektonikoko Zerbitzuari.

D.6.– Obrak integratzeko eta paisaia leheneratzeko neurriak.

D.6.1.– Erauzketa-lanek erasandako alde guztiak lehengoratuko dira; baita lehengoratze-planean agertzen ez zirenak baina azkenean ustiapenaren ondorioz kaltetu direnak ere. Ingurumen-lehengoratzean sartuko dira lurraren berroneratze geomorfologikoa eta edafikoa, bai eta landare-estalkia izan dezaketen guneen landare-berritzea ere.

D.6.2.– Lur-mugimenduak dauden bitartean, landaretza daukaten lur-eremuak kendu, metatu eta era bereizian zabalduko dira, aldatutako eremuan landare berriak jartzea eta eremua lehengoratzea errazteko.

D.6.3.– Obrek ukitutako eremu guztietako lehengoratze-neurriak, ahal den neurrian, obrak egin ahala egingo dira; hala, obrak egin bitartean, ingurumen-inpaktuaren azterketan adierazten diren birmoldaketa- eta birlandaketa-lanak egingo dira.

D.6.4.– Era berean, lehengoratu egin behar dira proiektua gauzatzeko kaltetutako eremuak (aldi baterako pilaketa-eremuak, aldi baterako lur-zoru okupazioak eta abar). Berriz ere landareak jartzerakoan, kontuan hartu behar da bertako espezieak landatu behar direla, natural bihurtutako habitatak sorrarazteko, eta inguruan dagoen landaredia naturalarekin konektatzen saiatu behar da. Birlandaketa-eremuak eta egin beharreko landaketak identifikatuko dira, eta informazio hori obra-zuzendaritzak baimendu beharko du, eta, aldez aurretik, ebazpen honen D.10 atalean aipatzen den txostena egingo du Ingurumen Aholkularitzak.

D.6.5.– Lehengoratze-lanek barnean hartuko dituzte lan-plataformak, behin-behineko sarbideak, erabilgaitz geratuko diren pista-tarteak eta sarbideak, eta ebaketa-zentroak ukituko dituen ezpondak eta beste eremu batzuk. Horiek jatorrizko egoerara lehengoratuko dira ahal den neurrian, hala morfologiari dagokionez, nola osaera edafikoari dagokionez. Amaieran, lurzorua trinkotu gabe utzi beharko da, egokituta, erabilera-baldintza desegokiak ekiditeko. Eremuotan, landare-estaldura jatorrizko egoerara lehengoratuko da.

D.6.6.– Halaber, ebaketa-zentroaren diseinua inguruetako arkitektura-estilo nagusietara egokituko da, eta konponbide funtzionalak saihestuko dira, hormigoizko etxola prefabrikatuak, kasu, inguruetako eraikinetatik oso bestelakoa litzatekeelako.

D.6.7.– Obra kontratatzeko baldintza-agiriak eta aurrekontuek dokumentazioan aurreikusitako baldintza teknikoak eta aurrekontu-partidak jaso beharko dituzte, proposatutako jarduerak behar bezala betetzen direla bermatzeko.

D.6.8.– Lehengoratze edafikoaren lan horiek iraun bitartean, landare inbaditzaileak –hala nola, Robinia pseudoacacia eta Cortaderia selloana– hedatzea eragozteko ekintzak gauzatuko dira. Ildo horretan, bereziki kontrolatuko da landare-estalkia lehengoratzeko lurren jatorria, eta, ahal dela, ez da erabiliko horrelako espezieek kutsatuta egon litekeen lurra.

D.7.– Eremu elektromagnetikoekiko esposizioaren inguruko kautelazko neurriak.

Linearen funtzionamendu-fasean, eremu elektriko eta magnetikoen balioek ezingo dituzte gainditu Europar Batasunaren Kontseiluaren 1999ko uztailaren 12ko Gomendioan adierazitako erreferentziako mailak eta oinarrizko mugak –gomendio hori pertsonen eremu elektromagnetikoekiko esposizioari buruzkoa da (0 Hz-tik 300 GHz-ra).

D.8.– Garbiketa eta obra-akabera.

Obrak bukatu ondoren, garbiketa-kanpaina zorrotz bat egingo da, eta proiektuak erasandako eremua obrako hondakinik batere gabe utzi beharko da. Egin daitezkeen eraispenetatik, kofratuak kentzetik, inausketetatik edo, oro har, edozein garbiketa-jardueratatik eratorritako hondakinak eremutik kenduko dira, eta ebazpen honen bigarren apartatuaren D.5 puntuan xedatutakoari jarraikiz kudeatuko dira.

D.9.– Ingurumen-arloko aholkularitza.

Obrak amaitu arte eta obra horren bermeak dirauen arte, ingurumen gaietan, kultura-ondarearen zaintzan eta neurri babesle eta zuzentzaileetan, aholkularitza gaitua eduki beharko du Obra Zuzendaritzak, ingurumen-inpaktuaren azterlanaren zehaztapenen arabera. Baldintza-pleguak gai horiei buruz esleitzen dizkion funtzioen alorrean Obra Zuzendaritzak hartu beharreko erabakiek, aipatu aholkularitzak egindako txostena izan beharko dute aldez aurretik.

Ingurumen-aholkularitzak, gainera, jardunbide egokien kontrola egingo du, obra gauzatzean; besteak beste, proiektuko ekintzen eragina egiaztatuko du, bereziki honako hauei dagokienez: makinen mugimenduak, hautsa eta zarata sortzea, makinak direla-eta zarata sortzea, hondakin-kudeaketa, natura- eta kultura-ondarea babestea.

Beraz, langileek jardunbide egokien sistema bat erabili beharko dute, besteak beste helburu hauek ahalik eta gehien ziurtatzeko: obraren okupatze-mugak kontrolatzea; natura-interes handiko landaretza-guneen gaineko eragina kontrolatzea; ibilguen eta haien ertzetako landarediaren gaineko eragina kontrolatzea; hondakinen isurketak ekiditea; olioen isurketen eta lurren arrastatzearen ondoriozko lurzoruaren eta uren kutsadura ekiditea, eta proiektuaren eragin-esparruko herriguneetako biztanleei zarata eta hautsa direla-eta eragindako eragozpenak ekiditea.

D.10.– Lan-programa diseinatzea.

Obrak hasi aurretik, proposamen zehatzak egin beharko ditu, jarraian datozen azpiapartatuetan azaltzen diren gaiei buruz. Lanak egiteko programari erantsiko zaizkio proposamen horiek, eta Obren Zuzendariak berariaz onartu beharko ditu; aurrez, txosten bat egin beharko du aurreko apartatuan aipatutako ingurumen-aholkularitzak. Dokumentu hauek bilduko ditu aipatutako programak:

– Sarbideek, euskarriak muntatzeko plataformek, eta obra-materialak eta indusketa-lurrak nahiz hondakinak behin-behinean metatzeko lekuek izan beharreko kokapena eta ezaugarriak, ebazpen honen D.1.9 apartatuan ezarritakoarekin bat.

– Obra-egutegia, jarduera bakoitza zehaztuta. Obra-egutegia adieraztea kokapen-plano batean, ebazpen honen D.1.11 apartatuan ezarritakoarekin bat.

– Drainatze-sarera ahalik eta material xehe eta kutsatzaile gutxien botatzeko tratamendu-sistemen ezaugarriak, kokapen zehatza eta neurriak, ebazpen honen D.2.1 apartatuan ezarritakoarekin bat.

– Eraikuntza- eta eraispen-lanetan sortzen diren hondakinak kudeatzeko plana, honako hauek errespetatuta: eraikuntza- eta eraispen-lanen hondakinen ekoizpena eta kudeaketa arautzen duen otsailaren 1eko 105/2008 Errege Dekretuaren 5.1 artikulua eta Eraikuntza- eta eraispen-hondakinen ekoizpena eta kudeaketa arautzeko den ekainaren 26ko 112/2012 Dekretuaren 7. artikulua, betiere ebazpen honen D.5.2 apartatuan ezarritakoarekin bat.

– Birlandaketa-eremuak, birlandaketa-azalerak eta landaketan erabiliko diren espezieak identifikatzea, ebazpen honen D.7 apartatuan ezarritakoarekin bat.

E) Ingurumena zaintzeko programa.

Ingurumena zaintzeko programa gauzatzeko, bete beharrekoa izango da sustatzaileak proiektuaren ingurumen-inpaktuaren ebaluazioan aurkeztutako dokumentazioan aurreikusitakoa; horretaz gain, jarraian zehazten diren kontrolak egin beharko dira.

Programa hori obra kontratatzeko baldintza-agirietan sartuta egon behar da, eta bete ahal izatea bermatuko duen aurrekontua izango du.

E.1.– Gorabeheren erregistroa.

Obrak egin ahala sortutako gorabeheren erregistroa egin beharko da, bai eta neurri babesle eta zuzentzaileak zenbateraino bete diren jasotzeko erregistroa ere. Ingurumen Administrazioaren Zuzendaritzak ikuskatzeko moduan egongo da erregistroa, eta, nolanahi ere, lanak amaitutakoan, hari bidaliko zaio. Proiektua gauzatzean aldaketarik egiten bada, aldaketa horiek xehetasunez adierazi beharko dira. Ingurumenean duten eraginaren ikuspegitik justifikatu beharko dira aipatutako aldaketak.

Horri dagokionez, obretan sortutako hondakinen ingurumen-jarraipenari buruzko txosten osoa egin beharko da, eta indarrean dagoen legediak hondakinen kontrolerako, jarraipenerako eta onarpenerako jasotzen dituen agiriak erantsi beharko dira txosten horretan.

E.2.– Lanek okupatzen dituzten mugak kontrolatzea.

Egiaztatuko da proiektuko aurreikuspenekin bat datorrela egindako okupazioa; obrek ez dute hartuko aurrez ikusitako azalera baino eremu handiagoa.

E.3.– Uren eta lurzoruaren kalitatea kontrolatzea.

Oro har, ingurumen urtarrera isurketak egin ditzakeen obra-lekurik izanez gero, bigarren apartatuaren D.10 puntuan aurreikusitako ingurumen-aholkularitzak egiaztapena egingo du, drainatze-sarera ahalik eta material xehe eta kutsatzaile gutxien botatzeko tratamendu-sistemaren funtzionamendua egokia dela egiaztatzeko batik bat, euri-aldietan.

Sistema horien funtzionamendua eraginkorra ez dela ikusiko balitz, beharrezkoak diren neurriak hartuko dira, kaltea sortzen duten obra-lantegietan lanak aldi baterako gelditzea barne, material esekiz betetako urak lur gaineko ur-ibilguetara irits ez daitezen.

E.4.– Ingurumena zaintzeko programaren arrakasta kontrolatzea.

Bermealdian, aldian-aldian aztertuko da zenbaterainoko arrakasta izan duen proiektuaren eraginpeko gainazalak lehengoratzeko lanak.

E.5.– Ingurumena zaintzeko programaren agiri bategina.

Ingurumena zaintzeko programaren dokumentu bateratua egin beharko du sustatzaileak, non bilduko baitira ingurumen-inpaktuaren azterlanean proposatutako betebeharrak eta ebazpen honetan jasotakoak.

Kontrolatuko diren parametroak eta parametro bakoitzerako erreferentziako balioak zehaztuko dira programa horretan, bai eta beste hauek ere: laginketarako eta analisirako metodologia; kontrol-puntuak xehetasun-kartografian non dauden kokatuta; kontrol horien maiztasuna, eta guztia gauzatzeko aurrekontuaren xehetasunak.

E.6.– Ingurumena zaintzeko programaren emaitzak bidaltzea.

Ingurumena zaintzeko programaren barruko txostenen eta analisien emaitzak behar bezala erregistratu beharko dira, eta Ingurumeneko Sailburuordetza honetara igorriko dira, ondoren, organo substantiboaren bitartez. Obrak bukatuta eta lehengoratze-lanen berme-aldia amaituta egingo da bidalketa hori, zehazki, lehengoratzea egin eta bi urtera. Ingurumena zaintzeko programaren emaitzekin batera, ingurumen-gaietan espezializatutako entitate independente batek egindako txostena ere aurkeztu beharko da. Txosten hori emaitzen analisi bat izango da, aldi horretan gertatutako gorabeherak, balizko kausak eta konponbideak bereziki aipatuta, eta aldez aurretik zehaztu ez denean, laginak hartzearen xehetasunak baita ere.

Kasuan-kasuan aplikatu beharreko araudia betetzeaz gain, proiektuaren sustatzaileak datuak euskarri egoki batean bilduko ditu, bi urtez gutxienez, eta administrazio publikoetako ikuskaritza-zerbitzuen eskura edukiko ditu.

F) Baldin eta arautegi berria indarrean jartzeak edo barneratzen diren sistemen egitura eta funtzionamenduari buruzko ezagutza berri esanguratsuetara egokitu beharrak hala eginarazten badigute, babes- eta zuzenketa-neurriak eta ingurumen-zaintzako programa aldarazi ahal izango dira, bai neurtu behar diren parametroen kasuan, bai eta neurketaren aldizkakotasuna eta aipatutako parametroek hartu behar duten tarteari dagozkion mugen kasuan ere. Halaber, ingurumen-organoak erabaki ahal izango du, jardueraren sustatzaileak hala eskatuta edo ofizioz, babes- eta zuzenketa-neurriak eta ingurumena zaintzeko programa aldatzea, baldin eta egiaztatzen bada, ingurumena zaintzeko programan lortutako emaitzetan edo bestelakoetan oinarrituta, gerta litezkeen ingurumen-inpaktuak saihesteko ezarri diren babes-, zuzenketa- eta konpentsazio-neurriak ez direla nahikoak.

G) Ebazpen honen aurreko apartatuetan ezarritakoa gorabehera, jarraian aipatzen diren agiriak helarazi beharko zaizkio ingurumen-organo honi, espedientean sartzeko.

Agiri horiek Ingurumen Administrazioaren Zuzendaritzara bidali beharko ditu organo substantiboak oniritzia eman ondoren, proiektuaren sustatzaileak aurkeztutako dokumentazioarekin batera.

G.1.– Obrak hasi baino lehen, ingurumena zaintzeko programaren testu bategina.

G.2.– Obrak amaitu eta bi hileko epea igaro baino lehen, lur-mugimenduei buruzko balantze zehatza eta hondeaketa-soberakinen eta hondakinen ingurumen-jarraipenari dagozkion txostenak, ebazpen honen D.5 apartatuan aurreikusitakoaren arabera.

G.3.– Obrak amaitu eta bi hileko epea igaro baino lehen, obrak bukatzen direnean zenbatzen hasita, obrak garatu bitartean sortutako gorabeheren erregistroa, babes- eta zuzenketa-neurriak noraino bete diren jasoko duena, ebazpen honen bigarren apartatuaren E.1 puntuan xedatutakoaren arabera.

Hirugarrena.– Lau urteko epea ezartzen da proiektua egikaritzen hasteko; ingurumen-inpaktuaren adierazpen hau Euskal Herriko Agintaritzaren Aldizkarian argitaratzen denetik hasiko da kontatzen epea. Epe hori igaro eta artean ez bada proiektua egikaritzen hasi, ingurumen-inpaktuaren adierazpen honi amaitu egingo zaio iraunaldia, eta dagozkion ondorioak sortzeari utziko dio. Kasu horretan, sustatzaileak berriro hasi beharko du proiektuaren ingurumen-inpaktua ebaluatzeko izapidea, aipatu epea luzatzea adosten ez bada behintzat. Hori guztia, otsailaren 27ko 3/1998 Legearen 47.8 artikuluan eta Ingurumen-ebaluazioari buruzko abenduaren 9ko 21/2013 Legearen 43. artikuluan ezarritakoarekin bat.

Laugarrena.– Aurreko paragrafoan xedatutakoaren ondorioetarako, proiektuaren sustatzaileak ingurumen-organoari jakinarazi beharko dio, aldez aurretik, noiz hasiko den proiektua gauzatzen.

Bosgarrena.– Ebazpen honen edukiaren berri ematea Eusko Jaurlaritzako Ekonomiaren Garapen eta Azpiegitura Sailaren Arabako Lurralde Ordezkaritzari eta Arratzua-Ubarrundiako eta Vitoria-Gasteizko udalei.

Seigarrena.– Ingurumen-inpaktuari buruzko adierazpen hau Euskal Herriko Agintaritzaren Aldizkarian argitara dadila agintzea.

Vitoria-Gasteiz, 2020ko urtarrilaren 27a.

Ingurumen Administrazioko zuzendariara.

E (apirilaren 11ko 77/2017 Dekretuaren lehenengo xedapen gehigarria).

Ingurumeneko sailburuordea,

MARIA ELENA MORENO ZALDIBAR.

Azterketa dokumentala