RSS
14. zk., 2019ko urtarrilaren 21a, astelehena
- Bestelako formatuak:
- PDF (232 KB - 3 orri.)
- EPUB (192 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
JUSTIZIA ADMINISTRAZIOA
DONOSTIA / SAN SEBASTIÁNGO LEHEN AUZIALDIKO 3 ZENBAKIKO ZUZENEKO LAGUNTZA EMATEKO UNITATE PROZESALA
314
EDIKTUA, ezkontzaz kanpoko seme-alabentzako neurrietarako 333/2017 prozeduraren ondoriozkoa.
Donostiako Lehen Auzialdiko 3 zenbakiko Epaitegia (Familia) – Zibileko Zuzeneko Laguntza emateko Unitate Prozesala.
Judizioa: 333/2017 ezkontzaz kanpoko seme-alabentzako neurriak.
Demandatzailea: Ibai Arias Elissalt.
Abokatua: Ane Iturbe Mujika.
Prokuradorea: Ainhoa Kintana Martinez.
Demandatua: Elsa Maria Obama Nzang.
Gaia: ezkontzaz kanpoko seme-alabentzako neurriak.
Aipatu judizioan epaia eman da 2019-01-08an, eta honako hauek dira xedapenak:
XEDAPENAK
Partez baiesten dut Kintana prokuradoreak Ibai Arias Elissalt-en izenean eta ordez aurkeztu duen demanda, Elsa Maria Obama Nzang-en aurka; horrenbestez, erlazioa desegitearen ondoriozko neurri hauek hartzen ditut adingabeko XXXXX alaba komunari dagokionez:
1.– Guraso-ahalaz baliatzea. Guraso-ahala elkarrekin baliatzen jarraituko dute bi gurasoek. Adingabeari dagozkion erabaki garrantzitsu guztiak guraso biek elkarrekin adostuta hartu beharra dakar gurasoek guraso-ahala elkarrekin baliatzeak. Erabakiak hartzeko, egokien zaien komunikazio-bidea hautatu beharko dute; komunikazio-bide hori errespetatzera eta betetzera behartuta daude. Besterik adierazi ezean, komunikazioa posta elektronikoz edo burofaxez gauzatuko da, eta, hortaz, beste gurasoak ere bide horiek baliatuta erantzun beharko du. Hala egiten ez badu, ados dagoela ulertuko da. Adostasunik ez badago, Epaitegiak erabakiko du Kode Zibilaren 156. artikuluan ezarritako izapidearen arabera. Guraso-ahalaren arloan hartu beharreko erabakien artean, honako hauek daude, besteak beste:
– Adingabearen egoitza ohiko bizileku duen udalerritik kanpora aldatzea; adingabea atzerrira joatea, oporraldiko bidaietan ez bada.
– Ikastetxea aukeratzea edo ikastetxez aldatzea.
– Eskolaz kanpoko jarduerak edo jarduera osagarriak zehaztea.
– Gizarte- eta erlijio-ospakizun garrantzitsuak; hala nola, bataioa, lehen jaunartzea eta beste erlijio batzuetako antzeko ekitaldiak.
– Premiazkoak ez diren ekintza medikoak, ebakuntza egitea edo tratamendu mediko luzea dakartenak, edo tratamendu psikologikoak.
Guraso biei aitortzen zaie adingabearen eskola-bilakaerari buruzko informazioa jasotzeko eskubidea, bai eta ikastetxeko jarduera tutorialetan parte hartzekoa ere. Halaber, alabaren tratamenduei buruzko argibide medikoak ere eskatu ahal izango dituzte biek.
Alabarekin dagoen gurasoak hari buruzko erabakiak hartzerik izango du beste gurasoari aldez aurretik galdetu gabe, baldin larrialdiko egoerarik gertatu bada, edo erabakiak adingabearen eguneroko bizimoduko gorabehera arrunt eta ohikoei buruzkoak eta garrantzirik gabekoak badira.
2.– Zaintza eta jagoletzaren gaineko araubidea. Alaba adingabearen zaintza eta jagoletza amari esleitzen zaio.
3.– Bisita, egonaldi eta komunikazioen erregimena. Alabaren eta aitaren artean, bisita, egonaldi eta komunikazioen erregimena malgutasunez gauzatu beharko da. Alderdiak ados jartzen ez badira, aitaren aldeko bisita-araubide hau ezartzen da:
Hiru aste jarraian udan, uztailean edo abuztuan, amari jakinarazita gutxienez hamabost egun lehenago. Lehenengo astean, bisitak lau ordukoak izango dira egunean, amak edo amaren senitarteko batek ikuskatuta. Hurrengo bi asteetan, bisitak 12:00etatik 18:00etara izan ahalko dira, ikuskapenik gabe, betiere ama ados baldin badago horrela egitearekin. Nolanahi ere, bisitak adingabea bizi den herrian izango dira, amak herri horretatik ateratzeko baimena ematen ez badu behintzat. Adingabea amaren etxean jaso eta utzi beharko da.
Urteko gainerako egunetan, bi aldeek ez badira ados jartzen, aita astero jarri ahalko da harremanetan alabarekin telefonoz, gutunez, posta elektronikoz, internet bidez, edo sare sozialak, SMS edo bestelako bitarteko egokiren bat erabiliz, fede oneko jokabidearekin bat etorriz, eta betiere ikasketa-, jarduera- eta atseden-orduak errespetatuz.
4.– Mantenu-pentsioa. Alaba adingabearen elikadura-premiei aurre egiteko, aitak mantenu-pentsio bat ordaindu beharko du, hileko 50 eurokoa; betebehar hori izango du alaba adinez nagusi izanik, ekonomikoki burujabe izaten den arte edo burujabetza lortzeko moduan izaten den arte, fede oneko jokabidearekin bat etorriz. Urteko hamabi hilabeteetarik bakoitzeko lehen bost egunen barruan ordainduko zaio kopuru hori amari. Pentsioa urtero eguneratuko da, horretarako errekerimendua egin beharrik izan gabe, Estatistikako Institutu Nazionalak edo horren ordezko erakundeak ezarritako Kontsumoko Prezioen Indizeak aurreko urtean –abendutik abendura– izandako aldaketen arabera; 2020. urtean eta urtarrilaren 1etik aurrera izango ditu ondorioak eguneraketak.
Aitak zuzenean ordaindu behar dituen era horretako gastuak ez dira kenduko ebazpen honen arabera ordaindu behar duen pentsiotik.
Independentzia ekonomikorik ez duen bitartean alabak dituen aparteko gastuak erdi bana ordainduko dituzte aitak eta amak, betiere ados badaude eta agiri bidez hala frogatzen badute. Adostasunik ez bada, epailaren baimena beharko da, eta horiek biek gastua egin aurretik lortu beharko dira, presazko kasuetan izan ezik.
Aparteko gastuak ordaintzeko obligazioa amaituko da alaba, adin nagusikoa izanik edo legez emantzipatuta egonik, ekonomikoki independentea denean, hartara eragotzi gabe Kode Zibilaren 150. eta 152. artikuluetan obligazioa amaitzeko adierazten diren kausak.
Ez da berariaz kosturik ezartzen.
Epaiaren aurka aurkeztutako errekurtsoek ez dute etengo aurreko neurrien eraginkortasuna.
Elsa Maria Obama Nzang demandatuaren egungo bizilekua ezezaguna denez, ebazpena Estatuko Aldizkari Ofizialean ediktu bidez jakinaraztea erabaki da, Prozedura Zibileko 1/2000 Legearen 497.2 artikuluan xedatutakoaren arabera (PZLb).
Ebazpen horren aurka, auzi-ihesean den demandatuak apelazio-errekurtsoa aurkez dezake.
Interesdunak eskuragarri dauka jakinarazten den ebazpenaren testu osoa, auzitegi honetako bulego judizialean.
Donostia, 2019ko urtarrilaren 9a.
JUSTIZIA ADMINISTRAZIOAREN LETRADUA.