Euskal Herriko Agintaritzaren Aldizkaria

158. zk., 2018ko abuztuaren 17a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HERRI-KONTUEN EUSKAL EPAITEGIA

4275

ERABAKIA, Herri Kontuen Euskal Epaitegiaren Osokoak 2018ko apirilaren 26ko bilkuran hartua Legutioko Udalari buruzko 2016ko fiskalizazio txostena behin betiko onesten duena.

Herri Kontuen Euskal Epaitegiaren Osokoak 2018ko apirilaren 26a egindako bilkuran,

ERABAKI DU:

Legutioko Udalari buruzko 2016ko fiskalizazio txostena behin betiko onestea, erabaki honen eranskin modura ageri dena.

HKEEren 1/1988 Legearen 13.2 artikuluak aurreikusten duena betez, txostenaren ondorioak dagozkion aldizkari ofizialetan argitaratzeko xedatzea.

Vitoria-Gasteiz, 2018ko apirilaren 26a.

HKEEko lehendakaria,

JOSÉ LUIS BILBAO EGUREN.

HKEEko idazkari nagusia,

JULIO ARTETXE BARKIN.

ERANSKINA

LEGUTIOKO UDALARI BURUZKO FISKALIZAZIO TXOSTENA, 2016

Laburdurak:

2/2016 Legea: 2/2016 Legea, Euskadiko Toki Erakundeei buruzkoa.

27/2013 Legea: 27/2013 Legea, Toki Administrazioaren Arrazionalizazio eta Iraunkortasun neurriei buruzkoa.

38/2013 FA: 38/2013 Foru Araua, Arabako toki erakundeen aurrekontuaren egonkortasun eta finantzaren iraunkortasunari buruzkoa.

56/2015 FD: 56/2015 Foru Dekretua, Arabako Lurralde Historikoko toki erakundeen kontularitzako esparru arautzailea onartzen duena.

57/2003 Legea: 57/2003 Legea, Toki administrazioa eraberritzeko neurriei buruzkoa.

AFA: Arabako Foru Aldundia.

ALHAO: Arabako Lurralde Historikoaren Aldizkari Ofiziala.

EAE: Euskal Autonomia Erkidegoa.

EAO: Estatuko Aldizkari Ofiziala.

EBAO: Europar Batasuneko Aldizkari Ofiziala.

FOFEL: Arabako Toki-erakundeak Finantzatzeko Foru Funtsa.

HKEE: Herri Kontuen Euskal Epaitegia.

JEZ: jarduera ekonomikoen gaineko zerga.

LZ: Lanpostuen Zerrenda.

SPKLTB: 3/2011 Legegintzako Errege Dekretua, Sektore Publikoko Kontratuei buruzko Legearen testu bategina.

TAOAL: 7/1985 Legea, Toki Araubidearen Oinarriak Arautzen dituena.

I.– Sarrera.

Herri Kontuen Euskal Epaitegiak otsailaren 5eko 1/1988 Legeak eta Epaitegiaren Osokoak onetsitako Lan Programak agindutakoari jarraikiz, Legutioko Udalaren 2016ko ekitaldiko Kontu Orokorraren fiskalizazio lana mamitu du.

HKEEk gauzatutako aurreko fiskalizazio lana 2000ko ekitaldiaren gainekoa izan zen.

Fiskalizazio lan honek honako alderdi hauek besarkatzen ditu:

– Legezkotasuna: honako aurrekontuaren atal hauetan ezargarria den arautegia bete izana: aurrekontua, zuzenbide publikoko sarrerak, zorpetzea eta finantza eragiketak, langileria, obren kontratazioa, zerbitzuak eta hornidurak eta diru-laguntzen emakida. Azterketa lan hau fiskalizazioaren ekitaldiari dagokio, beharrezko irizten diren beste ekitaldi batzuei buruzko egiaztaketak egitea kaltetu gabe, fiskalizazio-gai den ekitaldian eragina dutelako.

– Kontabilitatea: Kontu Orokorra ezargarri zaizkion kontularitzako printzipioekin bat datorrela egiaztatzea. Kontu Orokorrak honako hauek besarkatu behar ditu: Udalaren aurrekontuaren likidazioa, balantzea, ekonomia-ondarearen emaitzaren kontua eta oroitidazkia.

– Lanaren zabalak ez du gastuaren eraginkortasun eta zuhurtasunari buruzko azterlan berariazkorik besarkatu; ezta, kudeaketa prozedurei buruzkorik ere. Nolanahi den ere, fiskalizazioan zehar sortu diren alderdi partzialak txosten honen III. idazpuruan aztertu ditugu.

– Udalaren egoera ekonomikoaren finantza analisia.

Legutioko udalerriak 1.747 biztanle zituen 2016ko urtarrilaren 1ean eta Udalaz gain, honako kontzeju hauek esku hartzen dute bertan: Elosu, Goiain, Legutio, Urbina eta Urrunagak; horiek guztiek, batik bat, ur hornidura eta saneamendu, argiteria publiko eta bideak mantentzeko zerbitzuak ematen dituzte. Udalak Gorbeialdeko Kuadrillan esku hartzen du, zeinak modu mankomunatuan oinarrizko gizarte-zerbitzuak ematen dituen eta beste udal zerbitzu batzuetan laguntzen duen; orobat, Gorbeiako Inguruak partzuergoan ere partaide da, zaborrak biltzeko zerbitzua modu mankomunatuan emateko sortutakoa.

II.– Iritzia.

II.1.– Legea betetzeari buruzko iritzia.

Epaitegi honen ustetan, Legutioko Udalak zuzentasunez bete du 2016ko ekitaldian ekonomia-finantzaren jarduera arautzen duen lege arautegia.

II.2.– Urteko kontuei buruzko iritzia.

1.– Hona hemen 2016ko abenduaren 31n Legutioko Udalaren Diruzaintza Geldikinean, data horretan itxitako Balantzean eta Ondare Garbian eragina duten doiketak:

(Ikus .PDF)

2.– Ibilgetu materialak beste administrazio batzuei utzitako instalazioak barne hartzen zituen, guztira 1,3 milioi euroren kostuarekin; horiek, baina, ez dira Udalaren aktiboan barne hartu behar. Halaber, Ibilgetuko materialeko hainbat elementu, 2,7 milioi euroren kostua dutenak, ez dira amortizatzen. Elementu horien balio-galera aintzat hartzeak 2016ko abenduaren 31n pilatutako amortizazioa 2,4 milioi euroan gehituko luke, aurreko ekitaldietako emaitzak kopuru berean murriztuz.

3.– Udalak ez du Araba Garapen Agentzia, SA foru sozietateari kobratzeko duen 216.037 euroren kontua erregistratu, Goiain poligonoaren hirigintzako aprobetxamendu kontzeptuan. Berebat, ez da erregistratu sozietate horrek gauzatutako 43.041 m2-ko lursail baten eskualdaketa, 1993an onartutako poligonoaren birpartzelaziotik eratorria; izan ere, horren formalizazioa eta zorren kitatzea Udalak hirigintza lanak jasotzeari meneratu zitzaion.

Epaitegi honen iritzira, 1etik 3. paragrafora bitartean adierazitako salbuespenak alde batera, Legutioko Udalaren Kontu Orokorra osatzen duten erakundeen Urteko Kontuek alderdi esanguratsu guztietan 2016ko ekitaldiaren jarduera ekonomikoa eta abenduaren 31ko ondarearen eta finantza egoeraren isla zuzena erakusten dute; baita, data horretan amaitutako urteko ekitaldiari dagozkion bere eragiketen eta eskudiruzko fluxuen emaitzena ere, ezargarria den finantza informazioaren arau-esparruaren arabera eta, zehazki, bertan jasotako kontularitzako printzipio eta irizpideen arabera.

III.– Barne kontrolerako sistemei eta kudeaketa prozedurei buruzko irizpenak.

Atal honetan ekonomia-finantzaren jarduera arautzen duten printzipioak gehiegi eragiten ez dituzten akatsak ez ezik, kudeaketa hobetzeko azpimarratu nahi diren prozedurazko alderdiak ere azaleratu dira.

III.1.– Aurrekontua, kontabilitatea eta diru-sarrerak.

– 2016rako Aurrekontua 2016an onartu zen, arautegiak ekitaldiari ekin aurretik onartu behar dela adierazten duen arren. Kontu Orokorra 2018ko martxoan onartu zen, naiz araudiak 2017ko uztailaren 31 baino lehenago onartu behar zela agintzen zuen.

– 2016ko aurrekontura aurreko urteko inbertsioetarako kredituak txertatu ziren, zeinak berriz 2017ko aurrekontuari 1,2 milioi euroren zenbatekoan txertatu zitzaizkion. Kreditu txertaketak gertatzen diren ekitaldian gauzatu behar dira eta ez dagokio txertaketa jarraituak egitea, helburudun sarrerak dituzten kapitalezko eragiketak salbu.

– Goiain poligonoko berariazko tasak dituzten erroldak, Araba Garapen Agentzia, SA foru sozietateak bildutakoak, alkateak onartu behar ditu aurrez. Udalak Udalak informazio xeheagoa jaso behar luke sozietate horrek ematen dituen udal zerbitzuen kostuen eta diru-bilketaren kudeaketaren gainean.

– Udalak, urteko itxiera dela eta, ekitaldiko sarreren kontularitzako saldoak alderatzen ditu diru-bilketarako sistema laguntzaileko saldoekin; komenigarria litzateke egiaztaketa itxitako ekitaldietara zabaltzea.

III.2.– Langileria.

– 2016ko abenduaren 31n indarrean zeuden lan-kontratuko lau kontratu mugagabe 2008, 2014 eta 2015ean gauzatutakoak, zerbitzu kontratuak eraldatu izanaren ondorioz. Horietako batean LZk ez du dagokion lanpostua barne hartzen eta gainerako 3etan lana funtzionarioek garatzea aurreikusten du. Egoera hau zuzentzea komeni da eta horretarako Udalbatzak LZ aldatu beharko luke edo zerbitzuak berrantolatu. Honi dagokionez, 2 langilek udal eskumenak mugatuak diren esparrutan garatzen dituzte lanak (hezkuntza eta ingurumena).

– Beste hiru lan kontratu mugagabe 2003 eta 2008koak dira eta lanpostu zerrendako laneko lanpostuak betetzen dituzte; 2008ko bi-biak, ordea, Udalbatzak lanpostuak sortu aurrekoak dira. Egokiagoa zatekeen LZn dauden 3 lanpostu hutsak betetzeko bitarteko kontratuak gauzatzea, harik eta nahitaezko hautaketa-prozesu bidez behin betiko zuzkitu bitartean.

– 2016ko aurrekontu plantillak funtzionarioen osagarrien zenbatekoa guztira adierazten zuen, osagarriak bereizi gabe (norakoa, berariazko orokorra, dedikazioa, e.a.). Gainera, lan-kontratuko langileei dagokienez ordainsari kontzeptuak bereizi gabe ematen da ordainsari osoa.

III.3.– Kontratazioa.

Fiskalizazio-gai izan den urtean indarrean zeuden 4 kontratu nagusiak aztertu ondoren, honako alderdi hauek azaleratu zaizkigu:

– Guztira 1,5 milioi euroren zenbatekoan esleitu diren 3 kontraturen administrazio klausulek ondotik adierazitako akatsak erakutsi dituzte esleipen irizpideei dagokienez (A1 akatsa):

* 1. eta 4. kontratuetan enpresa lehiatzaileen ziurtagiriak balio-neurtzea aurreikusten zen eta udalerriko langileak edo, ez baleude, lurraldekoak kontratatzea.

* 3. eta 4. kontratuetan hobekuntzak balioztatzen dira, hobegarri diren zerbitzuaren alderdi zehatzak zeintzuk diren adierazi gabe, ez eta balioztatze-sistema zein den ere.

– Irizpide subjektiboen balorazioa ez zegoen justifikatua 2., 3. eta 4. kontratuetan, 1,5 milioi euroan esleitutakoetan (B1 akatsa).

– Lehiatzaileek esleipenaren jakinarazpenak ez zuen adierazten aztertutako 4 kontratuetan hautaketa egiteko baliatutako argudioak (B2 akatsa).

– Argindarra hornitzeko kontratua 74.998 euroren zenbatekoan esleitu zen publikotasundun prozedura negoziatu bidez, prozedura irekia baliatu beharrean (C akatsa).

– Haur eta gazteen aisialdi-zerbitzuaren kontratua 86.468 euroren zenbatekoan esleitu zen presako prozedura baliatuta, horren erabilera justifikatu gabe. Gainera, urtebeteko 2 luzapen aurreikusi ziren; ordea, araudiak kontratuaren hasierako iraupenera –urtekoa zena– mugatzen ditu luzapenak (C akatsa).

– Balio judizioaren mendeko zenbatespena duten irizpideek formula bidez kalkulatutako irizpideek baino pisu handiagoa zuten garbiketa zerbitzuen kontratuan, 101.685 euroren zenbatekoan esleitutakoan; honenbestez, pleguek adituen batzorde bat osatzea edo berariaz gaitutako entitate baten laguntza aurreikusi behar zuketen (C akatsa).

Alderdi orokorrak eta erosketa txikiak.

– Udalak ez ditu udal kudeatzaileen eta zerbitzu kontratuen esleipendun diren enpresen arteko harremana argitzeko eskatutako jarraibideak ebatzi.

– 2 kontratutan prezioa balioztatzeko baliatutako formulak mugatu egiten zituen eskainitako merkatzeak eta beste 2tan proportzionaltasun soileko formula baliatu zen, faktore honen egiazko balioa murrizten duena, lizitazio prezioa berdintzen zuten eskaintzei puntuak emanez.

– Erosketa txiki modura izapidetutako erosketak aztertzean ikusi da zerbitzu bat, hornidura bat eta obra bat zuzenean esleitu direla, guztira 155.435 euroan; horiek prozedura negoziatu modura izapidetu behar ziratekeen.

III.4.– Transferentziak eta Diru-laguntzak.

– Udalerrian diharduten 5 kontzejuek honako zerbitzu hauek ematen dituzte. Argiteria publikoa, ur hornidura eta saneamendua, kale garbiketa e.a. Tokiko araudiak zerbitzu hauek Udalaren eskumen modura definitzen ditu eta kontzejuek eskuordetze bidez gara ditzakete; eskuordetze hori, baina, formalizatu egin beharko litzateke eta udalerrian diharduten 6 administrazioen egiteko eta jarduera eremuak bereizi, betiere eskuordetze zerbitzua modu egokian emateari mugatuz. Zehatzago esanda, zerbitzu bakoitzari dagozkion ondasunak identifikatu behar lirateke eta hobekuntza lanak kudeatuko dituen erakundea zehaztu. Alderdi hauek guztiak kontzejuei udal laguntzak esleitzen zaizkienean har litezke aintzat, 2016an 73.686 eurorenak izan direnak eta Udalak arautu ez dituenak (banaketa irizpideak, laguntzen norakoa, aurkeztu beharreko justifikazioa, e.a.).

– Gorbeiako Inguruen Partzuergoari egindako 89.634 euroren ekarpenak kalkulatzen dira zabor bilketa zerbitzua finantzatzen duten udal tasen balioetsitako sarreren arabera, bertako estatutuetan aurreikusitako biztanleriaren irizpidea baliatu beharrean. Gainera, ekarpena aurrekontuaren egiazko egikaritza aintzat hartuta kitatu behar litzateke.

– Oinarrizko gizarte-zerbitzuak mankomunaturik kudeatzen dituzte Gorbeialdeko Kuadrillak eta zati batean Udalak finantzatzen ditu; Udalbatzak 2017an egungo egoera baliokidetu zuen, modu iragankorrean dirauena, baina Kuadrilla eta GFArekin hitzarmen bidez arautu behar dena. Kuadrillak hirigintzaren kudeaketan eta beste udal zerbitzu batzuetan ere laguntzen du, dagozkion hitzarmen bidez arautu behar direnak.

– Kultur jardueretarako emandako 23.900 euroren diru-laguntzak aurkeztu ziren 5 eskabideen artean hainbanatu ziren, deialdian aurreikusitako balorazio irizpideak aplikatu gabe. Laguntzak ematean eta aurkeztutako ziurtagiriarekin egindako likidazioan ez ziren aintzat hartu jarduerek sortu zituzten diru-sarrerak. Gainera, ziurtagirietarik 4tan oker egindako hartu-agiri, emate-agiri eta fakturak azaleratu ziren.

– 2016ko ekainean onartutako Diru-laguntzen Plan Estrategikoa baliogabe utzi zen 2017an lehenengo instantzian, Planaren helburu estrategikoak, horiek lortzeko epeak, eta balio-neurketarako banakako baliabideak ez zehazteagatik; Udalak sententzia hau errekurritu zuen.

III.5.– Berankortasuna eta bestelako alderdiak.

– Udalak ez ditu ordainketa epeei buruzko nahitaezkoak diren hiruhileko txostenak egiten.

– Toki erakundeak gardentasun eta informazio publikorako irispideari buruzko araudira egokitzeko prozesua 2015eko abenduan amaitu behar zatekeen. Informazio ekonomikoari dagokionez, udalaren web-orrian aurrekontuan barne hartu dira, baina horien egikaritzari buruzko informazioa gaineratu behar da. Berebat, Udalaren jabetzako diren ondasun higiezinen zerrenda ere barne hartu behar litzateke, baliatutako kontratazio moldeei buruzko estatistikak, emandako diru-laguntzen xehapena kopuruak eta onuradunak adieraziaz, hautetsien ordainsariak eta zinegotzien ondasun eta jardueren gaineko aitorpenak.

IV.– Finantza Analisia.

Udalak azken ekitaldietan eta fiskalizazio-gai izan den urtean kitatutako magnitude nagusien bilakaera ondoko taulan dago zehaztua:

(Ikus .PDF)

Sarrera arruntak: % 7 egin dute gora 2016 eta 2014 artean, berezko sarrerek eta hein txikiagoan, transferentziek izandako igoeren ondorioz:

– Zerga zuzenak, zeharkakoak eta tasak: % 11 egin dute gora, izan ere jarduera ekonomikoen gaineko zergan igoerak izan dira ikuskaritzako ekintzengatik, jarduera handiagoaren ondorioz Goiaingo poligonoko tasen bilketan hobekuntzak izateagatik eta 2016an udala Larrabea auzoari ura hornitzeko zerbitzua ematen hasi izateagatik. Zerga eta tasen tarifak ez dira aldatu hirurtekoan. 2015ean unean uneko igoaldi bat izan da hirigintzako eragiketa baten ondorioz 677.623 euroren likidazioa jaso ostean.

– Transferentzia eta diru-laguntza arruntak: % 3 egin dute gora itunpeko zergen partaidetzako diru-sarrerak % 9 hobetzean, nahiz helburudun diru-laguntzak % 35 murriztu diren.

Funtzionamendu gastuak: % 9 egin dute gora 2014 eta 2016 bitartean, xehapen honekin:

– Langile gastuak: % 22 egin zuten gora aztertutako aldian langile berriak kontratatu zirelako, % 1eko soldata igoera izan zelako eta 2012ko abenduko aparteko ordainsaria ordaindu zelako.

– Ondasun arrunten eta zerbitzuen kontratazioa: % 4 egin zuten gora eta azpimarratzekoa da uraren hornidurak izandako igoera, 2015ean Larrabea auzoaren hornidura zerbitzua bere gain hartzearekin; baita, gastu juridikoek eta Goiaingo poligonorako kontrataturiko zerbitzuek ere (zaborrak eta ur hornidura), 2015ean bi zerbitzu-kontratu desagertzearekin berdintzen direnak, udal langileek beteko baitituzte.

– Transferentzia eta diru-laguntza arruntak: hirurtekoan egonkor eutsi diote.

Aurrezki gordina eta garbia: aurrezki gordinak sarrera arrunten % 15 egin zuen 2014an eta hobetu egin zuen 2015ean, ekitaldi horretako sarrera jakin batzuen ondorioz; ordea, % 13ra jaitsi zen hirurtekoaren azken urtean, funtzionamendu gastuak sarrerak baino handiagoak izan baitziren.

Kapital eragiketen emaitza: hiru ekitaldietan kapital-eragiketek ez dute eragiketa arruntek sortutako aurrezkia kontsumitzen eta kontzejuei emandako diru-laguntzak gailentzen dira, administrazio hauek udalerrian egikaritutako garrantzizko lanak zati batean finantzatzen dituztenak.

Diruzaintza geldikina: aldaki honek egonkor eutsiko dio hirurtekoan, taulako bi geldikinen arteko aldea milioi 1 euroren finantzaketako desbideratzeak izateari zor zaiolarik, aurreko urteetako hirigintzako diru-sarreren kontzeptuan; horiek udal zerbitzuetako ekipamenduetan inbertsioak egiteko erabil daitezke. 4,2 milioi euro likidoren Diruzaintza Geldikinak ekitaldiko sarrera arruntak gainditzen ditu eta hirurtekoaren kapital-eragiketen emaitza laukoizten du. Gogoan izan behar da 2016ko abenduaren 31n zeuden konpromisoek 1,6 milioi euro egiten zutela.

Zorpetzea: hirurtekoan Udalak ez du kanpoko finantzaketarik behar izan.

Ondorioa: gastu korronteek izaera bereko sarrerekiko izan duten igoera handiagoak zertxobait murriztu du eragiketa korronteek sortutako aurrezki maila, 2016an sarrera korronteen % 13 egin duena. Alabaina, kopurua behar hainbatekoa izan da hirurteko zerbitzu publikoetan inbertsioak finantzatzeko eta etorkizunean autofinantzaketak eta une jakinetan Geldikina baliatzeak bide emango dio Udalak kudeatzen dituen zerbitzu publikoek behar dituzten inbertsioei aurre egiteko.

Aurrekontuaren egonkortasuna: 38/2013 Foru Arauan ezarritakoari jarraikiz, Udalaren kontu-hartzailetzak txostena egin zuen aurrekontuaren egonkortasun printzipioa, zor publikoa eta gastuaren araua betetzen zela adieraziaz. 2016ko Likidazioari buruzko txostenak ondorioztatu du:

– Aurrekontuaren egonkortasunari buruzko helburua bete da eragiketa ez finantzarioetan 283.993 euroren superabita eskuratu baita.

– Gastuaren araua bete da, 2016ko Likidazioan zenbakarria den gastua % 1 gehitu baita, % 1,8ko mugaz beheiti.

Zorpetzeari dagokionez, Udalak ez du kanpoko finantzaketarik behar izan.

V.– Urteko Kontuak.

V.1.– Udala.

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

TXOSTENAREN ONDORIOEI EGINDAKO ALEGAZIOAK

II.– Iritzia.

II.2.– Urteko kontuei buruzko iritzia.

2.– Ibilgetu materialari buruz esandakoari dagokionez, aipatu beharra dago 2016ko ekitaldiko kontu orokorrean, kontuan hartu ez arren, datorren ekitaldietarako kontuan hartuko dela, aipatutakoa betetze aldera.

3.– Araba Garapen Agentziari buruz esandakoari dagokionez, ez dago hartarako arrazoirik, egun dauden urbanizazio-lanak ez baitaude jasoak, eta ondorioz, momentuz, bere mantenua Legutioko Udalari ez dagokio.

III.– Barne kontrolerako sistemei eta kudeaketa prozedurei buruzko irizpenak.

III.1.– Aurrekontua, kontabilitatea eta diru sarrerak.

2016ko ekitaldiko aurrekontuen onarpen datari buruz, aipatu beharra dago 2016ko martxora arte, Udal honetako Idazkari-Kontu-hartzailetza postua, egoera ezberdinen aurrean egon zela, postu honetako lanak Udaleko administrari-diruzaintzako arduradunak halabeharrez bete behar izanez, ondorioz aurrekontuaren onarpena atzeratu zela.

2016ko aurrekontura aurreko urteko inbertsioetarako kredituak txertatu ziren zeinak berriz 2017ko aurrekontuari 1,2 miloi euroren zenbatekoan txertatu zitzaizkionaren harira, 2016ko ekainaren 2ko dataz txertaketa egin zen, Legutioko Udalak eta esleipendunak ebatzitako kontratu proposamena, 2015eko urriaren 26ko dataz San Rokeoste gunean udako igerileku publikoa eraikitzekoa, eta lizitazio berri baten deialdia, Udal osoko bilkurak horrela onartua. Osoko bilkurako akordio ziurtagiria atxikitzen da.

Azkenik, 2018ko ekitaldirako Goiaingo poligonoko berariazko tasak dituzten erroldari buruz, egindako aholkuak kontuan hartuko dira. Era beran, itxitako ekitaldietara, ekitaldiko sarreren kontularitzako saldoak alderatzen dituen diru-bilketako sistema laguntzaileko saldoekin zabaltzea ere kontuan hartuko da.

III.2.– Langileria.

Langileen zerrendan ageri ez den lanpostuari buruz (lan-kontratu mugagabea), 2017ko abuztuaren 24an, erregistro irteera 1480 zenbakiduna, lanpostuari buruzko hizkuntz eskakizun eta pertzepzio-data esleipen txostena Herri Administrazioetako Hizkuntza Normalizatzeko Zuzendaritza, Hizkuntza Politikarako sailburuordetza, Eusko Jaurlaritzako Kultura eta Hizkuntz Politikarako sailari eskatu zitzaion.

Aipaturiko txostena 2017ko irailaren 15ean jaso zen, Udal honen asmoa 2018. ekitaldiko aurrekontuak onarpenarekin batera aipaturiko lanpostua Langileen zerrendan onartzea da.

Era berean, 2018ko martxoaren 5ean, Udal honek Osoko bilkuran ekitaldi honetan egindako lanpostuen balorazioa onartu zuen, lanpostua langileen zerrendan gehitu aurretik lanpostuen balorazioa onartzea gomendagarria zela adostu zuen.

Bestetik, txostenak dio bi langilek udal eskumenak mugatuak diren esparrutan garatzen dituztela lanak (hezkuntza eta ingurumena). Azken honi buruz, 7/1985 Legea, apirilaren 2koa, Toki-araubidearen oinarriak arautzen dituena, 25. artikuluak, bigarren atala, b letrak dio «Udalerriak, beti, Estatuko eta autonomia erkidegoetako legedian ezarritako moduan, gai hauetako eskumenak beteko ditu: Hiri-ingurumena: batik bat parke eta lorategi publikoak, hiriko hondakin solidoen kudeaketa, eta hiri-eremuetako hots-, argi- eta atmosfera-kutsaduraren aurkako babesa.» Legutioko Udalerriak Goiango industriagunean enpresa asko dituela azpimarratu behar da, hau dela eta, ingurumen teknikari bat izatea beharrezkoa da.

III.3.– Kontratazioa.

Aztertutako lau kontratuetan, lehiatzaileen jakinarazpen esleipenetan kontratuetan hautaketa egiteko baliatutako argudioak adierazten ez direlaren inguruan, esan beharra dago, kontratazio mahaiko aktetan argudio hauek ageri direla zeinek kontratazio-organoari eskaintzarik onena aurkeztu duen lizitatzailea proposatzen dio, hauek kontratatzailearen profilean, udaleko web orrian, argitaratzen dira. Adibide gisa, honen laburpen bat atxikitzen da.

Argindarra hornitzeko kontratua publikotasundun prozedura negoziatu bidez esleitu zenari buruz: Alkatearen 2013ko abenduaren 16ko erabakiarekin bat etorriz, 131216B Dekretua, Legutioko Udalaren zerbitzu eta eraikinak energia elektrikoz hornitzeko kontratua esleitzeko deia egin zen, prozedura ireki bidez, eta ekonomia eskaintzarik onena eta hainbat esleipen irizpide oinarritzat hartuta. 2013ko abenduaren 27ko 148. ALHAO-n argitaratu zen, hamabost eguneko epea ezarriz eskaintzak aurkezteko, epea amaituta ez zen eskaintzarik jaso, 2014ko otsailaren 6ko 140206A Alkatetza dekretuan ageri bezala, ziurtagiri hau txostenari eransten zaio.

III.4.– Transferentziak eta diru-laguntzak.

Udalerrian dauden bost kontzejuek txostenean ageri bezala, argiteria publikoa, ur hornidura eta saneamendua, kale garbiketa e.a. zerbitzuak ematen dituzte. HKEE-k igorritako txostenaren arabera Tokiko araudiak zerbitzu hauek Udalaren eskumen modura definitzen ditu eta kontzejuek eskuordetze bidez gara ditzakete; eskuordetze hori, baina formalizatu beharko litzateke eta udalerrian diharduten sei administrazioen egiteko eta jarduera eremuak bereizi, betiere eskuordetze zerbitzua modu egokian emateari mugatuz. Aipatu behar da, zerrendaturiko zerbitzu hauek tradizionalki Kontzejuek ematen dituztela, baina ez soilik Legutiokoek baizik eta Arabako Kontzeju guztiek.

11/1995 Foru Araua, martxoaren 20koa, Arabako Lurralde Historikoko Herri Batzarrei buruzkoa, 7. artikuluaren lehen atalak dioenari jarraikiz «Bete ditzaketen eskumenak Foru Arau honek aitortzen dituenak, eta legean arabera udalerri mailaren azpiko barrutia duten erakunde lokalek dauzkatenak dira.»

Era berean, 2/2016 Legea, apirilaren 7koa, Euskadiko Toki Erakundeei buruzkoa.12. artikuluaren 3. atalak dioenari jarraikiz «Era berean, lurralde historikoetako foru-organoek, toki-araubidearen oinarrizko legerian xedatutakoarekin eta lege honetan eta beren eskumenetan aurreikusitakoarekin bat, babestu eta bermatu egingo dituzte bakoitzak bere lurralde-eremuko toki-erakundeen ezaugarri historikoak.» Honen adibide, TEFFFaren oinarrizko osagarriaren banaketa, zeinetan Arabako Foru Aldundiak Arabako Herri-Batzarrek eskainitako zerbitzu batzuen prestazio erreala onartzen duen.

Azkenik, Gorbeiako Inguruen Partzuergoari buruz azaldu, ospatuko den hurrengo batzarrean gai hau aipatuko dela, txostenean aipatutakoa zuzentzeko asmoz.

III.5.– Berankortasuna eta bestelako alderdiak.

Egindako ohartarazpenak kontuan hartuko dira, datozen ekitaldietan hauek betetze aldera.

Azterketa dokumentala