RSS
122. zk., 2018ko ekainaren 26a, asteartea
- Bestelako formatuak:
- PDF (256 KB - 6 orri.)
- EPUB (269 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
Indargabetutako xedapena
XEDAPEN OROKORRAK
EUSKAL HERRIKO UNIBERTSITATEA
3288
ERABAKIA, 2017ko azaroaren 2koa, Universidad del País Vasco / Euskal Herriko Unibertsitatearen Gobernu Kontseiluarena, zeinaren bidez ezartzen baita Universidad del País Vasco / Euskal Herriko Unibertsitateko Gipuzkoako Ingeniaritza Eskolan Ingeniaritza Mekanikoko eta Industria Elektronikaren eta Automatikaren Ingeniaritzako Gradu Bikoitza.
Ingeniaritza Mekanikoko eta Industria Elektronikaren eta Automatikaren Ingeniaritzako Gradu Bikoitza egiteko plangintza bat prestatze aldera, errektoreordetza honek behar diren akordioak sustatu ditu gradu hau 2018-2019 ikasturtetik aurrera abian jartzeko.
Hori dela eta, Graduko eta Graduondoko Ikasketen arloko errektoreordearen proposamenez, eta unibertsitateko Graduko Batzordeak 2017ko urriaren 19an aldeko txostena egin eta gero, Gobernu Kontseiluak honako hau
ERABAKI DU:
Universidad del País Vasco / Euskal Herriko Unibertsitateko Ingeniaritza Mekanikoko eta Industria Elektronikaren eta Automatikaren Ingeniaritzako Gradu Bikoitza lortzeko arautegia onartzea, agiri honetako eranskinean jasota dagoena.
Leioa, 2017ko azaroaren 2a.
Errektorea,
NEKANE BALLUERKA LASA.
Idazkari nagusia,
PEDRO MARÍA IRIONDO BENGOA.
ERANSKINA
ARAUTEGIA, UPV/EHUKO GIPUZKOAKO INGENIARITZA ESKOLAKO INGENIARITZA MEKANIKOKO ETA INDUSTRIA ELEKTRONIKAREN ETA AUTOMATIKAREN INGENIARITZAKO GRADU BIKOITZA ESKURATZEKO DENA
1. artikulua.– Xedea.
Arautegi honen xedea programazio bat zehaztea da, ikasleek Ingeniaritza Mekanikoko Graduaren ikasketa planeko irakasgaiak eta Industria Elektronikaren eta Automatikaren Ingeniaritzako Graduaren ikasketa-planeko irakasgaiak egin ahal izateko, hartara graduko titulu biak eskura ditzaten. Programazio honen kudeaketa Gipuzkoako Ingeniaritza Eskolari dagokio, hargatik eragotzi gabe arautegi honen 5. artikuluan aurreikusten den Batzorde Akademikoak dituen eskumenak.
2. artikulua.– Aplikazio-eremua.
2.1.– Arautegi hau aplikatuko zaie Ingeniaritza Mekanikoko eta Industria Elektronikaren eta Automatikaren Ingeniaritzako Gradu Bikoitzean (aurrerantzean «gradu bikoitzean») UPV/EHUk emango dituen ikasketei.
2.2.– Gradu bikoitzean matrikulatuta dauden eta haren programazioko ikasketak gainditzen dituzten ikasleek bi titulu ofizialak eskuratuko dituzte aldi berean: Ingeniaritza Mekanikoko Gradua eta Industria Elektronikaren eta Automatikaren Ingeniaritzako Gradua, eta bi tituluek balioa izango dute estatu osoan.
2.3.– Erregimen akademikoa, gaien irakaskuntza, ikasleen ebaluazioa eta, oro har, gradu bikoitzaren programazio espezifikoaren alderdi akademiko guztiak arautegi honen bitartez arautuko dira, eta hemen jasotzen ez den guztirako, Universidad del País Vasco / Euskal Herriko Unibertsitateko arautegi orokorrari jarraituko zaio.
3. artikulua.– Zuzendaritza akademiko eta exekutiboa.
3.1.– Gradu bikoitzaren zuzendaritza akademikoa gradu bikoitzeko Batzorde Akademikoari dagokio. Bertan ordezkatuta daude Gipuzkoako Ingeniaritza Eskolako zuzendaritza eta bi graduetako batzorde akademikoak: Ingeniaritza Mekanikoko Gradukoa eta Industria Elektronikaren eta Automatikaren Ingeniaritzako Gradukoa.
3.2.– Gradu bikoitzaren koordinatzaile karguan txandakatuko dira, bi ikasturtean behin, Ingeniaritza Mekanikoko Graduko koordinatzailea eta Industria Elektronikaren eta Automatikaren Ingeniaritzako Graduko koordinatzailea.
4. artikulua.– Batzorde Akademikoaren osaera.
4.1.– Batzorde Akademikoak honako kide hauek izango ditu:
– Ingeniaritza Mekanikoko Graduko koordinatzailea eta Industria Elektronikaren eta Automatikaren Ingeniaritzako Graduko koordinatzailea.
– Ingeniaritza Mekanikoko mailako koordinatzaileak eta Industria Elektronikaren eta Automatikaren Ingeniaritzako mailako koordinatzaileak.
– Gradu bikoitzeko ikasleen ordezkari bat.
– Gipuzkoako Ingeniaritza Eskolako zuzendaritzaren ordezkari bat, bertako zuzendariak proposatua.
4.2.– Gipuzkoako Ingeniaritza Eskolako Zuzendaritzaren ordezkaria izango da Batzorde Akademikoko burua.
4.3.– Batzorde Akademikoko idazkari karguan txandakatuko dira, bi ikasturtean behin, titulazio bietako mailako koordinatzaileak.
5. artikulua.– Batzorde Akademikoaren eginkizunak.
5.1.– Gradu bikoitzaren zuzendaritza akademikoa Graduko Bikoitzaren Batzorde Akademikoaren ardura izango da. Zehazki, eginkizun hauek izango ditu:
– Gradu bikoitzaren antolaketa akademikoa.
– Onespena ematea enpresetatik heldutako gradu amaierako lanetarako proposamenei.
– Gradu bikoitzaren irakaskuntzaren kalitatea bermatzea eta zaintzea, ikastegiko Kalitate Batzordearekin koordinazioan.
5.2.– Batzorde Akademikoa gutxienez sei hilean behin bilduko da, batzordeko buruak deituta. Era berean, Batzorde Akademikoko hiru kidek gutxienez hala eskatzen dutenean ere bilera egin ahal izango da.
5.3.– Batzorde Akademikoak ahalegina egingo du erabakiak aho batez hartzeko, eta, ezinezkoa denean, ikastegiko zuzendariak hartuko du erabakia.
6. artikulua.– Gradu bikoitzaren koordinatzailearen eginkizunak.
Honako hauek izango dira gradu bikoitzaren koordinatzailearen eginkizunak:
– Batzorde Akademikoak hartutako erabakiak betetzea.
– Gradu bikoitzaren ordezkaria izatea.
– Beste zeregin batzuk, Batzorde Akademikoak emandakoak edo Universidad del País Vasco / Euskal Herriko Unibertsitateko arautegiek titulazioko koordinatzaileari esleitzen dizkiotenak.
7. artikulua.– Graduan sartzeko baldintzak eta irizpideak.
7.1.– Ikasleak gradu bikoitzean onartzeko aplikatuko dira UPV/EHUk ikasleak onartzeko dituen arau orokorrak.
7.2.– Gradu bikoitzeko onarpen-nota kalkulatzeko, kontuan hartuko da Industria Ingeniaritzako Graduari eta Industria Elektronikaren eta Automatikaren Ingeniaritzako Graduari dagozkien gai espezifikoen haztapenetik lortutako kalifikaziorik onena.
8. artikulua.– Matrikula eta tituluak.
8.1.– Kontu administratiboei dagokienez, gradu bikoitz honen kudeaketa Gipuzkoako Ingeniaritza Eskolak egingo du.
8.2.– Gradu bikoitzean onartutako ikasleak bertan matrikulatuko dira Universidad del País Vasco / Euskal Herriko Unibertsitateko gainontzeko ikasleen baldintza berberetan.
8.3.– Graduan onartutako ikasleek ordaindu beharko dituzte ikasketen prezioei buruzko arauetan zehaztutako prezio publikoak, eta, baldintzak betetzen dituztenean, aplikatuko zaizkie arau horietan edo beste lege batzuetan jasotako salbuespenak.
8.4.– Gradu bikoitz honetako programazioa gainditu ondoren, titulua eskatzen duten ikasleek bi tituluen tasak ordaindu beharko dituzte: Ingeniaritza Mekanikoko Graduko tituluarena eta Industria Elektronikaren eta Automatikaren Ingeniaritzako Graduko tituluarena.
9. artikulua.– Ebaluazioa.
Gradu bikoitzean matrikulatutako ikasleen ebaluazioa egingo da gainontzeko titulazioetako ohiko prozedurari jarraituz, eta graduko titulu ofizialetarako Gobernu Kontseiluak onartutako egutegiaren arabera.
10. artikulua.– Gradu bikoitzaren arautegi akademikoa.
10.1.– Gradu bikoitzean onartutako ikasleak beren programazioko irakasgaietan baino ez dira matrikulatuko maila bakoitzean. Ikasketen programazioa arautegi honen I. eranskinean dago jasota.
10.2.– Lehenengo mailan, maila horretarako kreditu guzti-guztietarako egin beharko dute matrikula. Hurrengo maila bakoitzean ikasleak gutxienez 60 kreditutan matrikulatu beharko dira, gradu bikoitzeko programa osoa amaitzeko 60 kreditu baino gutxiago falta zaizkienean izan ezik.
10.3.– Hirugarren mailako irakasgaietan matrikulatu ahal izateko, ezinbestekoa izango da lehen mailako 60 kreditu gutxienez gaindituta izatea, guztiak ere oinarrizkoak.
10.4.– Ikasturte bakoitzean ikasleek gutxienez 36 kreditu gainditu beharko dituzte. Edozelan ere, gehienez ere zazpi ikasturtetan osatu beharko dute programa.
10.5.– Aurreko puntuko (10.4) baldintzaren bat betetzen ez duten ikasleek utzi egin beharko dute gradu bikoitza. Hori gertatzen zaienek jarraitu ahal izango dute Ingeniaritza Mekanikoko Graduan edo Industria Elektronikaren eta Automatikaren Ingeniaritzako Graduan, nahi bezala. Horretarako, eskaria aurkeztu beharko dute ikastegiko idazkaritzan. Ikasle horiek eskolak ezarritako epeetan eta irizpideen arabera egin beharko du matrikula.
Era berean, ikasle batek erabakitzen badu gradu bikoitza bere borondatez uztea, aurreko paragrafoan azaldutako prozedura aplikatuko zaio pasa dadin Ingeniaritza Mekanikoko Gradura edo Industria Elektronikaren eta Automatikaren Ingeniaritzako Gradura.
10.6.– Mekanikako Graduko titulua eta Industria Elektronikaren eta Automatikaren Ingeniaritzako Graduko titulua lortzeko kredituen aitorpena egingo da ikasleak gaindituta dituenean gradu bikoitzeko ikasketa programako irakasgai guztiak, bi titulazioetako gradu amaierako lanak barne.
11. artikulua.– Arautegiaren onarpena.
Gradu bikoitz honetan matrikulatutako ikasleek arautegi honi jarraitu beharko diote, eta hemen jasota ez dagoenerako, ordea, Universidad del País Vasco / Euskal Herriko Unibertsitateko arautegi orokorrari.
AZKEN XEDAPENA
Arautegi hau 2018-2019 ikasturtean jarriko da indarrean.
