RSS
72. zk., 2018ko apirilaren 16a, astelehena
- Bestelako formatuak:
- PDF (216 KB - 3 orri.)
- EPUB (203 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
INGURUMEN, LURRALDE PLANGINTZA ETA ETXEBIZITZA SAILA
1978
EBAZPENA, 2018ko apirilaren 5ekoa, Ingurumen, Lurralde Plangintza eta Etxebizitza Saileko Zerbitzu zuzendariarena, Ingurumen, Lurralde Plangintza eta Etxebizitza Sailaren menpeko zenbait administrazio-zentro elektrizitatez hornitzeko kontratazioa Gobernantza Publiko eta Autogobernu Saileko Administrazio eta Zerbitzu Orokorretako sailburuordeari eskuordetzeko dena.
Euskal Autonomia Erkidegoko Sektore Publikoaren kontratazio-araubidea onartzen duen uztailaren 27ko 116/2016 Dekretuaren 15. eta 17. artikuluetan eta Gobernantza Publiko eta Autogobernu Sailaren egitura organikoa eta funtzionala onartzen dituen apirilaren 11ko 71/2017 Dekretuko 19.d) artikuluan ezarritakoaren arabera, Administrazio eta Zerbitzu Orokorretako Sailburuordetzari dagokio kudeaketa bateratuaren eremuko eta kudeaketa bateratuko higiezinen kontratuak gauzatzea.
Bestalde, aipatu 116/2016 Dekretuaren 20. artikuluan xedatutakoaren arabera, Euskal Autonomia Erkidegoko sektore publikoko erakundeek orokorrean eta funtsean ezaugarri homogeneoak dituzten hornidurak, obrak eta zerbitzuak kontratatzen dituztenean, kontratazio zentralizatuko izaera dutelako adierazpena lor dezakete.
Urte batzuetatik hona, kudeaketa bateratuko eraikinak goi- eta behe-tentsioko energia elektrikoz eta gas naturalez hornitzeko kontratazioa modu zentralizatuan egiten da, baita sare korporatiboko telekomunikazio-zerbitzuez hornitzekoa ere –Administrazio eta Zerbitzu Orokorretako Sailburuordetzaren eskumena dena–, Euskal Autonomia Erkidegoaren Administrazio Orokorreko eta haren erakunde autonomoetako –baita sektore publiko izanik, Euskal Autonomia Erkidegoaren sektore publikokoak ez direnak ere– gainerako sailei atxikitako eraikinenarekin batera. Hori guztia horrela eginda, zerbitzuen kudeaketa hobetu eta gastu publikoa arrazionalizatzen laguntzen da.
Gaur egun –energia elektrikoz hornitzeko kontratazioa modu zentralizatuan egiteko dekretua onartu bitartean–, kontratazioa modu zentralizatuan burutzeko formula egokia eskumenak eskuordetzeari buruz Sektore Publikoko Araubide Juridikoari buruzko urriaren 1eko 40/2015 Legearen 9. artikuluan ezarritakoa da, non honako hau xedatzen baita:
«1.– Herri-administrazioetako organoek beste organo batzuei beren eskumenak eskuordetzan eman diezazkiekete, baldin eta organo horiek administrazio berekoak badira, nahiz eta bata bestearen mendekoa ez izan...».
Hori dela eta, Ingurumen, Lurralde Plangintza eta Etxebizitza Sailaren egitura organiko eta funtzionala ezartzen duen apirilaren 11ko 77/2017 Dekretuak Zerbitzu zuzendariari ematen dizkion eskumenak baliatuz –horien artean dago sailaren kontratazio-organo izatea–, honako hau
EBAZTEN DUT:
I.– Administrazio eta Zerbitzu Orokorretako sailburuordeari eskuordetzea 2019. urtean –erosketa zentralizatuaren adierazpenari buruz egingo den dekretuaren ondoriozko erosketa zentralizatuaren prozeduratik aterako den kontratua indarrean jartzen den arte– I. eranskinean agertzen diren eraikinak energia elektrikoz hornitzeko kontratazioa egiteko eskumena.
II.– Sektore Publikoko Kontratuei buruzko azaroaren 8ko 9/2017 Legean aurreikusitako arlo hauek ere hartuko ditu eskuordetzeak, betiere kontratuari aplikatzekoak badira:
– Kontratua prestatzea (II. liburua, I. titulua, I. kapitulua, 1. atala).
– Kontratua esleitzea (II. liburua, I. titulua, I. kapitulua, 2. atala).
– Administrazioaren eskuduntzak, aldaketa, iraungitzea, lagapena eta azpikontratazioa (II. liburua, I. titulua, I. kapitulua, 3. atala).
– Kontratua formalizatzea (II. liburua, I. titulua, I. kapitulua).
Eta bereziki hornidura-kontratuari dagokionez ezarritakoa (II. liburua, II. titulua, IV. kapitulua).
III.– Organo eskuordetzailearen esku jarraituko dute kontratazio-organoari dagozkion gainerako eskumenak eta, bereziki, emandako zerbitzuak gauzatzeari oniritzia emateko eta zerbitzuak ordaintzeko agindua emateko ahalmena.
IV.– Eskuordetze hau Euskal Herriko Agintaritzaren Aldizkarian argitaratuko da, eta argitaratu eta hurrengo egunean jarriko da indarrean.
Vitoria-Gasteiz, 2018ko apirilaren 5a.
Zerbitzu zuzendaria,
PALOMA USATORRE MINGO.
