Euskal Herriko Agintaritzaren Aldizkaria

207. zk., 2017ko urriaren 30a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

BARAKALDOKO LEHEN AUZIALDIKO 5 ZENBAKIKO EPAITEGIA

5200

EDIKTUA, ezkontzaz kanpoko seme-alabentzako neurrietarako 616/2016 prozeduraren ondoriozkoa.

Barakaldoko Lehen Auzialdiko 5 zenbakiko Epaitegia (Familia).

Judizioa: 616/2016 ezkontzaz kanpoko seme-alabentzako neurriak.

Alderdi demandatzailea: Ismael Heredia Escudero.

Alderdi demandatua: Argentina Amaya Silva.

Gaia: seme-alabentzako neurriak.

Judizio horretan ebazpena eman da eta honela dio hitzez hitz:

538/2017 EPAIA

Epailea: Ana Isabel Viaña Ranilla andrea.

Lekua: Barakaldo (Bizkaia).

Eguna: bi mila eta hamazazpiko irailaren hamazortzia.

Alderdi demandatzailea: I.H.E.

Abokatua: Kepa Bilbao Gaubeka.

Prokuradorea: Maria Felicidad Llama Diaz De Cerio.

Alderdi demandatua: Argentina Amaya Silva.

Abokatua.

Prokuradorea.

Judizioaren gaia: zaintza, jagoletza eta elikagaiak.

EPAITZA

Argentina Amaya Silva andrearen aurka I.H.E. jaunak aurkeztutako demanda partez baiesten dudanez gero, alderdiek XXXXX alaba adingabekoarekin izango dituzten harremanak arautzeko neurri hauek onartzen ditut:

A) Argentina Amaya Silva andreak XXXXX alaba komunarekiko zuen guraso-ahala bertan behera uztea; izan ere, ahal hori aurrerantzean aitak baliatuko du esklusiboki, eta alabaren zaintza eta jagoletza ere aitari esleitzen zaizkio. Bestalde, ez da ezartzen inolako komunikazio- eta egonaldi-erregimenik zaintza ez duen gurasoaren alde.

B) Alabaren alde eta zaintza ez duen gurasoaren kargura, hileko 80 euroko mantenu-pentsioa ezartzea, zeina hilabeteko bakoitzeko lehen bost egunen barruan ordaindu beharko den, eta urtero eguneratuko da Estatistika Institutu Nazionalak edo haren ordezko erakundeak argitaratutako KPIk dituen aldaketen arabera; zenbaketa hasteko oinarritzat ebazpen honen eguna hartuko da.

C) Alaba adingabearen ezohiko gastuak, bi gurasoek ordainduko dituzte, erdibana, ebazpen honen zuzenbideko oinarrietan adierazitako eran. Guztiarekin ere, presazko ez diren aparteko gastuak guraso biek baimendu beharko dituzte. Dena dela, gastua beste parteari behar bezala jakinarazten zaionetik –gastuaren berri emanez, beharrezkoa dela adieraziz, zenbatekoa adieraziz eta dagozkion agiriekin batera– 10 egun igaro eta objekzio berariazkorik egiten ez bada, ulertuko da onartzen duela. Era berean, auzialdi honetan sortutako kostuen gaineko berariazko erabakirik ez da hartzen.

Aurkaratzeko modua: Bizkaiko Probintzia Auzitegiari zuzendutako apelazio-errekurtsoaren bidez (PZLb, 455. artikulua). Errekurtsoa egiteko, idazkia aurkeztu behar da epaitegi honetan, hogei egun balioduneko epean, jakinarazpena egin eta hurrengo egunetik aurrera. Idazki horretan, bestalde, honako hauek adieraziko dira: aurkaratzea zein alegaziotan oinarritzen den, eta zein diren apelatutako ebazpena eta aurkaratutako erabakiak (PZLb, 458.2 artikulua).

Errekurtsoa jarri ahal izateko, 50 euroko gordailua eratu beharko da, eta, baldintza hori bete ezean, ez da hura izapidetzea onartuko. Gordailua egiteko, zenbateko hori zainpean jarri beharko da epaitegi honek Banco Santanderren duen Gordailuan eta Zainpean jartzeko Kontuan. Kontuaren zenbakia hauxe da: ........... Ordainagiriaren kontzeptua idazteko hutsunean, «errekurtsoa» dela adierazi beharko da (kodea: 02-Apelazioa). Diru-kopuru hori zainpean jarri izana egiaztatu beharko da errekurtsoa aurkeztean (BJLOko 15. xedapen gehigarria).

Errekurtsoa jartzeko, gordailua eratzetik salbuetsita daude aipatutako xedapenaren 5. paragrafoan aipatzen direnak, eta doako laguntza juridikorako eskubidea aitortua dutenak.

Eta epai honen bidez erabaki, agindu eta sinatzen dut.

Alderdi demandatuaren gaur egungo helbidea edo bizilekua ezezaguna denez gero, Prozedura Zibilari buruzko 1/2000 Legearen 156.4 eta 164. artikuluetan xedatutakoarekin bat etorriz, ediktu hau EHAAn argitaratzea ebatzi da, epaia jakinarazteko eginbidea gauza dadin.

Barakaldo (Bizkaia), 2017ko urriaren 3a.

JUSTIZIA ADMINISTRAZIOAREN LETRADUA.

Azterketa dokumentala