Euskal Herriko Agintaritzaren Aldizkaria

152. zk., 2017ko abuztuaren 10a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

DONOSTIA-SAN SEBASTIÁNGO LEHEN AUZIALDIKO 3 ZENBAKIKO EPAITEGIA

4043

EDIKTUA, ezkontzaz kanpoko seme-alabentzako neurrietarako 65/2017 prozeduraren ondoriozkoa.

JAKINARAZPEN-ZEDULA

Donostia-San Sebastiángo Lehen Auzialdiko 3 zenbakiko Epaitegian, ezkontzaz kanpoko seme-alabentzako neurriei buruzko 65/2017 prozedura bideratu da, Yuri Tatiana Jara Centeno-k eskatuta, Jorge Edison Rivera Barrera-ren aurka. Prozedura horren gainean epaia eman da. Hona hemen idazpurua eta epaitza, kopiatuta:

206/2017 EPAIA

Epailea: Elisabet Garcia Alegre.

Lekua: Donostia.

Eguna: bi mila eta hamazazpiko ekainaren hogeita hirua.

Alderdi demandatzailea: Yuri Tatiana Jara Centeno.

Abokatua: Miguel Angel Escribano Uzcudun.

Prokuradorea: Amets Maider Ruiz de Arbulo Aizpuru.

Alderdi demandatua: Jorge Edison Rivera Barrera.

Abokatua.

Prokuradorea.

Judizioko gaia: guraso eta seme-alaben arteko harremanen demanda.

XEDAPENAK

Zati batean baiesten dut Ruiz de Arbulo epaitegietako prokuradoreak jarritako demanda, Yuri Tatiana Jara Centeno andrearen izenean eta haren ordezkari gisa, Jorge Edison Rivera Barrera jaunaren aurka. Horrenbestez (.......), seme adingabekoarekiko haien harremana haustearen ondoriozko neurri hauek hartzea erabaki dut.

1.– Guraso-ahalaz baliatzea. Guraso-ahala erdibana izaten jarraituko dute aitak eta amak. Gurasoek guraso-ahala elkarrekin baliatzeak zera dakar: adingabeari dagozkion erabaki garrantzitsu guztiak guraso biek elkarrekin adostuta hartu beharra. Erabakiak hartzeko, egokien zaien komunikazio-bidea hautatu beharko dute; komunikazio-bide hori errespetatzera eta betetzera behartuta daude. Besterik adierazi ezean, komunikazioa posta elektronikoz edo burofaxez gauzatuko da, eta, hortaz, beste gurasoak ere bide horiek baliatuta erantzun beharko du; hala egiten ez badu, ados dagoela ulertuko da. Adostasunik ez badago, Epaitegiak erabakiko du Kode Zibilaren 156. artikuluan ezarritako izapidearen arabera. Guraso-ahalaren arloan hartu beharreko erabakien artean, honako hauek daude, besteak beste:

– Adingabearen egoitza, hark ohiko bizileku duen udalerritik kanpora aldatzea; adingabea atzerrira joatea, oporraldiko bidaietan ez bada.

– Ikastetxea aukeratzea edo ikastetxez aldatzea.

– Eskolaz kanpoko jarduerak edo jarduera osagarriak zehaztea.

– Gizarte- eta erlijio-ospakizun garrantzitsuak; hala nola, bataioa, lehen jaunartzea eta beste erlijio batzuetako antzeko ekitaldiak.

– Premiazkoak ez diren ekintza medikoak, ebakuntza egitea edo tratamendu mediko luzea dakartenak, edo tratamendu psikologikoak.

Guraso biei aitortzen zaie adingabearen eskola-bilakaerari buruzko informazioa jasotzeko eskubidea, bai eta ikastetxeko jarduera tutorialetan parte hartzekoa ere. Halaber, seme-alaben tratamenduei buruzko argibide medikoak ere eskatu ahal izango dituzte guraso biek.

Semearekin dagoen gurasoak haiei buruzko erabakiak hartzerik izango du beste gurasoari aldez aurretik galdetu gabe, baldin eta larrialdiko egoerarik gertatu bada, edo erabakiak adingabeen eguneroko bizimoduko gorabehera arrunt eta ohikoei buruzkoak eta garrantzirik gabekoak badira.

2.– Zaintza eta jagoletzaren gaineko araubidea. Seme adingabearen zaintza eta jagoletza amari esleitzen zaizkio.

3.– Bisita, egonaldi eta komunikazioen araubidea. Semearen eta aitaren artean, bisita, egonaldi eta komunikazioen araubidea, oro har, malgutasunez gauzatu beharko da. Alderdiak ados jartzen ez badira, aitaren aldeko bisita-araubidea ezartzen da. Honako hau:

– bi astebururik behin, ostiraletik (adingabea eskolatik ateratzen denetik edo 16:30etik, hala badagokio), igandeko 20:00etara arte; ordu horretan, amaren etxean utziko du.

– oporretan:

eskolarik ez duenean, aurreko araubide hori eten egingo da. Eskolarik ez duenean, oporrak bitan banatuko dira:

• Gabonetako oporretan bi aldi ezartzen dira: 1) Azken eskola-egunetik, eskolatik ateratzen denetik, abenduaren 30eko 20:00ak arte; eta 2) Abenduaren 30eko 20:00etatik eskolako lehenengo egunera arte. Aitak urte bikoitietako lehenengo aldietan egongo da adingabearekin, eta urte bakoitietako bigarren aldietan; amak alderantziz.

• Aste Santuko oporretan bi aldi ezartzen dira: 1) Azken eskola-egunetik, eskolatik ateratzen denetik, pazko-igandeko 20:00ak arte; eta 2) Pazko-igandeko 20:00etatik eskolako lehenengo egunera arte. Aitak urte bikoitietako lehenengo aldietan egongo da adingabearekin, eta urte bakoitietako bigarren aldietan; amak alderantziz.

• Udako oporrak behean adierazi bezala banatuko dira, eta modu alternatiboan hartuko dira:

1) Uztailaren 1eko 10:00etatik uztailaren 16ko 10:00etara arte.

2) Uztailaren 16ko 10:00etatik uztailaren 31ko 10:00etara arte.

3) Uztailaren 31ko 10:00etatik abuztuaren 16ko 10:00etara arte.

4) Abuztuaren 16ko 10:00etatik abuztuaren 31ko 10:00etara arte.

Aitak urte bikoitietako lehenengo hamabostaldietan egongo da adingabearekin, eta urte bakoitietako bigarren hamabostaldietan; amak alderantziz.

Edozelan ere, adingabearekin komunikatzeko bideetarik edozein baliatu ahal izango du (posta, telefonoa...etab.), betiere eskubide horren larregizko erabilerarik egiten ez bada eta semearen deskantsu- eta estudio-ordutegiak errespetatzen badira. Semea aitarekin dagoelarik, eskubide berbera izango du jagoletza duen gurasoak.

4.– Mantenu-pentsioa. Seme adingabearen elikadura-premiei aurre egiteko, aitak ordaindu egin beharko du mantenu-pentsio bat, hileko 250 eurokoa, zeinak iraungo baitu semea adinez nagusi izan arte, edo ekonomikoki burujabe izan arte edo halako izateko kondizioan izan arte, fede onezko jokabidearekin bat etorriz. Urteko hamabi hilabeteetarik bakoitzeko lehen bost egunen barruan ordainduko zaio kopuru hori amari. Pentsioa urtero eguneratuko da, horretarako errekerimendua egin beharrik izan gabe, Estatistikako Institutu Nazionalak edo horren ordezko erakundeak ezarritako Kontsumoko Prezioen Indizeak aurreko urtean –abendutik abendura– izandako aldaketen arabera; 2018. urtean eta urtarrilaren 1etik aurrera izango ditu ondorioak eguneraketak.

Aitak zuzenean ordaindu behar dituen era horretako gastuak ez dira kenduko ebazpen honen arabera ordaindu behar duen pentsiotik.

Pentsioa azkendu egingo da, noiz eta semea adinez nagusi, ekonomikoki burujabe edo halako izateko kondizioan delarik, fede onezko jokabidearekin bat etorriz.

5.– Aparteko gastuak. Ekonomikoki independente ez diren bitartean semearen bizitzan sortzen diren aparteko gastuak erdibana ordainduko dituzte gurasoek. Ebazpen honen oinarri juridikoetan ezarritakoarekin bat etorriz, kontzeptu horretatik kanpo utziko dira, esaterako, eskola-uniformearen edo -liburuen gastuak (izan ere, urtero errepikatzen dira); bestelako gastuak, berriz, sartu egingo dira apartekoen kontzeptuan, eta katalogo posible osoa adierazteko asmorik gabe, honako hauek sar daitezke: gastu medikoak, kirurgikoak, ospitalekoak, ortopedikoak, dentistarenak, psikologikoak, farmazeutikoak, ortodontziakoak, logopediakoak, eta, oro har, osasun-sistema publikoan edo dagokion medikuntza-erakundean sartzen ez diren gaixotasun fisiko edo mentalei lotutakoak, bai eta, prestakuntza-arloan, eta eskolan atzeratuta egonez gero, derrigorrezko ikasgaiei buruzko klase partikularretakoak ere. Egin beharreko gastua medikoa bada eta Gizarte Segurantzak edo dagokion erakunde medikoak ordaintzen ez badu eta beharrezkoa bada, erdibana ordainduko dute aitak eta amak; horretaz gain, fakultatiboa eta tratamendua bi gurasoek elkarrekin adostutakoak izango dira.

Aurreko paragrafoan azaldutako ezohiko gastuak aitak eta amak adostu beharko dituzte, gastua egin aurretik betiere; horrela, bada, gastu hori egin edo ez egin desadostasunik egonez gero, organo judizialaren pean jarriko da gaia; izan ere, organo horrek erabakiko du gastu hori ea bi gurasoek ordaindu behar duten ebazpen honetan ezarritako proportzioan. Ebazpena aldekoa izango da, baldin eta seme-alabentzako beharrezkoa eta egokia bada gastua eta familiaren zirkunstantziekin bat badator. Erregimen horretatik kanpo uzten dira behar-beharrezkoak diren presako gastuak; izan ere, aldez aurretik ezin bada, aski izango da beste gurasoari ondoren jakinaraztea.

Guraso biek erabakita, aldez aurretik premiazkoa ez den gastu bat egiten bada edo premiazko gastu bat egin ostean jakinarazten bada, komunikazioetarako mekanismo egiaztagarri bat ezarriko da: faxa, burofaxa, telefaxa edo posta elektronikoa. Guraso batek frogatzen badu besteari jakinarazi diola, modu egiaztagarri horretan, beharrezkoa edo komenigarria dela aparteko gastu hori egitea; ulertu egingo da beste gurasoa ados dagoela gastu hori egitearekin, erantzuten ez badu, behintzat (eta horrela egiaztatzen badu), eta berariaz adierazi beharko du horren kontra dagoela jakinarazpena jaso eta zazpi eguneko epean.

Gainera, gurasoek, ados jarrita, beste edozein gastu adostu ahal izango dute semearentzat (alde batera utzita ebazpen honetan aparteko gastutzat hartutakoak), eta ebazpen honetan adierazitako proportzioan ordaindu ahal izango dute, erdibana, edo eurek adostutako moduan.

Ezohiko gastuak ordaindu beharra amaitu egingo da semea, adin nagusikoa izanik edo legez emantzipatuta egonik, ekonomikoki independentea denean, hartara eragotzi gabe Kode Zibilaren 150. eta 152. artikuluetan betebeharra amaitzeko adierazten diren kausak.

Epaiaren aurka aurkeztutako errekurtsoek ez dute etengo aurreko neurrien eraginkortasuna.

Berariaz ez da kosturik ezartzen.

Aurkaratzeko modua: apelazio-errekurtsoa, Gipuzkoako Probintzia Auzitegian (PZLb, 455. artikulua). Errekurtsoa egiteko, idazkia aurkeztu behar da epaitegi honetan, hogei egun balioduneko epean, jakinarazpena egin eta biharamunetik aurrera. Idazki horretan, bestalde, hauek adieraziko dira: aurkaratzea zein alegaziotan oinarritzen den eta apelatutako ebazpena eta aurkaratutako erabakiak zein diren (PZLb, 458.2 artikulua).

Errekurtsoa jarri ahal izateko, 50 euroko gordailua eratu beharko da, eta baldintza hori bete ezean, ez da hura izapidetzea onartuko. Gordailua egiteko, zenbateko hori zainpean jarri beharko da epaitegi honek Banco Santanderren duen gordailuan eta zainpean uzteko kontuan. IBAN zenbakia hauxe da: ES55 0049 3569 9200 0500 1274; eta kontzeptua: 1847 0000 00 0065/17. Ordainagiriaren kontzeptua idazteko hutsunean, «Errekurtsoa» dela adierazi beharko da (kodea: 02-Apelazioa). Diru-kopuru hori zainpean jarri izana egiaztatu beharko da errekurtsoa aurkeztean (BJLOko 15. xedapen gehigarria).

Errekurtsoa jartzeko, gordailua eratzetik salbuetsita daude aipatutako xedapenaren 5. paragrafoan aipatzen direnak, eta doako laguntza juridikorako eskubidea aitortua dutenak».

Eta epai honen bidez erabaki, agindu eta sinatzen dut.

Eta Jorge Edison Rivera Barrera demandatuari behar bezalako jakinarazpena egiteko ematen eta sinatzen dut ediktu hau, Donostian, bi mila eta hamazazpiko ekainaren hogeita hiruan.

JUSTIZIA ADMINISTRAZIOAREN LETRADUA.

Azterketa dokumentala