Euskal Herriko Agintaritzaren Aldizkaria

100. zk., 2017ko maiatzaren 29a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

2624

1/2017 FORU ARAUA, maiatzaren 9koa, Gipuzkoako Lurralde Historikoko Zergen Foru Arau Orokorra zati batean aldatzen duena.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «1/2017 Foru Araua, maiatzaren 9koa, Gipuzkoako Lurralde Historikoko Zergen Foru Arau Orokorra zati batean aldatzen duena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2017ko maiatzaren 9a.

Diputatu nagusia,

MARKEL OLANO ARRESE.

HITZAURREA

I

2012ko abenduaren 27ko 7/2012 Lege Organikoak egindako Herri Ogasunaren aurkako delituaren erregulazioaren erreformaren ondorioz, beharrezkoa da 2005eko martxoaren 8ko 2/2005 Foru Araua, Gipuzkoako Lurralde Historikoko Zergen Foru Arau Orokorra aldatzea (aurrerantzean Zergen Foru Arau Orokorra). Aldaketen xedea da prozedura bat ezartzea, zigor arloko prozesu baten izapidea hasten denean ere zerga likidazioak egitea eta horiek kobratzea ahalbidetzeko, horixe baita Zigor Kodearen azaroaren 23ko 10/1995 Lege Organikoan izandako aldaketa nagusietako bat.

Bestetik, fiskalitatearen eremuan Europar Batasuneko Zuzenbideak eta Europar Batasuneko Justizia Auzitegiaren epaiek duten eragin berezia dela eta, beharrezkoa da Zergen Foru Arau Orokorrean hainbat mekanismo eta xedapen sartzea Europar Batasuneko Zuzenbidearen legezko integrazio maila eta eraginkortasuna handiagotze aldera.

Horri dagokionez. Europako Batzordeak estatu laguntzak exijitzeko hartutako erabakien alderdi guztiak bete beharrekoak dira estatu kideentzat. Izan ere, horiek laguntza eman aurretik izandako egoera lehengoratu behar dute atzerapenik gabe eta estatu kide hartzailearen barne zuzenbideko prozedurei jarraituz. Gipuzkoako araudian ez dago prozedura berezirik aurreikusita zerga arloko estatu laguntzak berreskuratzeko. Beraz, foru arau honen aldaketaren bidez konpontzen da gabezia hori.

Zergen Foru Arau Orokorraren aldaketa hau sustatzeko beharra gai horiekin lotuta dago, bai eta beste gai hauekin ere: zergapekoen nahiz Zerga Administrazioaren segurtasun juridikoa, arlo honetako auzi kopuruaren murriztapena, zerga iruzurraren aurkako borroka eta Administrazioak zergak aplikatzean izan beharreko eraginkortasuna areagotzea.

Aldaketa honetan hartutako neurri nabarmenak jarraian aipatzen dira.

II

Araua aplikatzean elusioaren aurkako klausularen figura aurreko lege iruzurraren bilakaera baten moduan eratu zen, haren oso modu desberdinean eratu ere. Hori horrela, tresna bihurtu zen zerga iruzurraren mekanismo sofistikatuenen aurka, hala frogatzen baitu praktikak abusuzkotzat hartu daitezkeen negozio figurak erabiltzean.

Zergen Foru Arau Orokorra indarrean jarri zenetik hamar urtetik gora igaro ondoren, institutu horren inguruan metatutako esperientziak komenigarri egiten du haren araubide juridikoa aldatzea, zehagarritasuna ahalbidetzeari begira, betiere bi xede betetze aldera.

Batetik, egokitzea araubide juridikoa jurisprudentziazko doktrinara, figura horretan baztertu gabe iruzurrezko borondatea. Konklusio hori partekatzen du, era berean, doktrina zientifikoaren sektore handi batek eta ohiko egoera izaten da zuzenbide konparatuan. Hori horrela, arauak bateragarri egiten ditu zuzenbide zehatzaileko tipikotasun printzipioaren babesaren araua, foru arauaren IV. tituluan zehaztua, eta abusuaren aurkako klausula batean beharrezkoa den malgutasuna.

Horretarako, arau-hausle mota berri bat eratzen da. Harengan bateratu egingo dira zergapekoaren portaeraren balizko emaitza materialak eta funtsean berdinak diren egintza edo negozioen abusuzko izaera determinatu duten eta lehendik badiren irizpide administratiboak bete ez izana.

Aldaketako foru arauak nabarmendu egiten du Zerga Administrazioak egiaztatu eta ikertzeko duen eskubidea, eta azpimarratu egiten du eskubide horren eta likidatzeko eskubidearen artean dagoen kontzeptuzko bereizketa.

Argitu egiten da egiaztatu eta ikertzeko eskubideak Zergen Foru Arau Orokorrean jasotako mugak izango dituela, arauzko testuan bertan espresuki adierazten diren kasuetan, berariaz, kreditu fiskal jakin batzuen egiaztapenak hasteko jarritako gehieneko epeei dagokienez, edo, bistan denez, zerga bakoitzaren foru araudian bertan ezarri daitezkeen egiaztapenei dagokienez.

Aldaketa bat sartzen da zerga betebehar formalen eremuan. Izan ere, horren helburua da zehaztea, erregistro liburuei dagokienez, erregelamenduzko arauaren bidez liburu horiek bitarteko telematikoez eramateko betebeharra arautzeko aukera.

Ordainagiri bidez aldizka kobratzekoak diren zergek ez dute behar ez aitorpenik ez autolikidaziorik, erregistroan, erroldan edo matrikulan alta eman ondoren. Beraz, preskripzio epea zerga hori sortzen den momentuan konputatzen hasten da, zeren eta une horrexetatik aurrera egin baititzake Zerga Administrazioak azken batean zergaren likidazioa egitera bideratutako jarduketak. Azalpen hori foru arauan jasota dago.

Elkarri lotutako zerga betebeharrak izateak preskripzioari buruzko arazoak planteatzen ditu, gaur egun Zergen Foru Arau Orokorrean ebatzi gabe daudenak. Hori horrela, Zerga Administrazioak zerga betebehar batekin lotuta dagoen zergapeko beraren beste zerga betebehar bat erregularizatzen duenean, baldin eta Administrazioak zerga betebehar lotua aldatu nahi baditu, ofizioz edo zergapekoak autolikidazioa zuzentzeko aurkeztutako eskaera baten bidez, lehen betebeharraren erregularizazioa oinarritzeko erabilitako irizpideak aplikatuz, gertatu daiteke ezinezkoa izatea, jadanik zorra preskribatuta baitago. Horren ondorioz, zergapekoak eta hartzekodun publikoa larriki kaltetuta gertatu daitezke.

Hori horrela, zergapetze bikoitzeko kasuak gertatu daitezke, zergapekoaren kaltetan. Halere, zergapetze nuluko egoerak ere gertatu daitezke, altxor publikoaren interesen kaltetan.

Arazo horiek konpontzeko, arautu egiten da zergapekoa bera titularra izanik elkarri lotutako zerga betebeharren preskripzioa eteteko araubidea.

Osagarri moduan, arautu egiten da Zerga Administrazioak likidatzeko eskubidea erabiltzeko hartuko duen prozedurazko bidea, lehenago azaldutakoaren arabera eten dena; era berean, ahalbidetu egiten da ordaintzekoak eta itzultzekoak izan daitezkeen diru kopuruen ofiziozko konpentsazioa; eta, azkenik, bermatu egiten da zergapeko berak errekurrituta edo erreklamatutako likidazioei lotuta dauden itzulketen ordainketa.

III

Sakondu egiten da zerga aholkularitzako profesionalen lanaren aitortza. Horretarako, aipatzen da zerga obligazioak modu kooperatiboan betetzearen sustapenerako lankidetza lerro berriak bideratzeko beharra dagoela.

Zerga Administrazioak datuak lagatzeari dagokionez, baimendu egiten da informazioa argitaratzea, hura Europar Batasuneko arauditik datorrenean, edo informazioa lagatzea, zigor prozesu batean enbargatutako edo konfiskatutako ondasunak aurkitzeari begira Aktiboen Bilketa eta Kudeaketako Bulegoarekin kolaboratzeko, aurretik zirkunstantzia hori akreditatuz gero.

Zehaztu egiten da zein den fakturen froga balioa. Izan ere, ukatu egiten da fakturen froga balioa eragiketen errealitateari gailentzen zaiola.

Kontuan hartuta doktrina administratiboa, alegia, balio erantsiaren gaineko zergaren likidazioak hilabete bateko edo hiru hilabeteko likidazio aldiei buruzkoak bakarrik izan daitezkeela, ahalbidetu egiten da Administrazioak urteko konputuan aurkitutako zergaren kuotak linealki aldi horien artean banatzea, zergapekoak justifikatzen ez duenean zergaren araudiari jarraituz kuotak beste likidazio aldi bati dagozkiola.

Aldatu egiten da agerraldi bidezko jakinarazpenen araubidea, horren erregulazioa erraztuta. Hori horrela, ezarri egiten da aste bakoitzeko astelehen, asteazken eta ostiraletan Gipuzkoako Aldizkari Ofizialean argitaratutako iragarkien bidezko jakinarazpena. Ulertzen da ediktu bidezko jakinarazpenak argitalpen horretatik aurrera duela ondorioa.

Espresuki adierazten da ezinezkoa dela egiaztapen edo ikerketa prozeduraren hasieran ordaintzeko dituzten diru kopuruak jadanik aplikatu edo konpentsatu dituzten zergadunek beste ekitaldi batean egindako aplikazioa edo konpentsazioa ondoriorik gabe uztea, aitorpen osagarri baten bidez, eta kopuru horien aplikazioa edo konpentsazioa egiaztatutako ekitaldian egitea eskatzea, horrek aldatu bailezake egin zitekeen arau-haustearen kalifikazioa.

Zerga kudeaketako organoen eskumenekoak diren egiaztapen prozedurei dagokienez, autolikidazioen eta gainerako zerga aitorpenen berrikuspenean jokatzeko irizpideak zehazten dira, eta hainbat doikuntza sartzen dira autolikidazio eta aitorpen prozeduretan. Izan ere, aurreko araubidean ez bezala, behin-behineko likidazio baten bidez eta egiaztapen mugatuko prozedura baten hasieraren bidez ere amaitu daitezke, ikuskapen prozedura baten hasieraz gain, baina ez, ordea, egiaztapen murriztuko prozedura baten bidez, aurretik jasotzen zen bezala.

Zehaztu egiten da zergadunak egiaztapen prozedura batean bere borondatez kontabilitate dokumentazioa aurkezteak ez duela ez eragotziko eta ez mugatuko ondorengo prozedura batean jasotako eragiketak geroago egiaztatzea.

Egiaztapen mugatuko prozedurari dagokionez, hiru hilabetez luzatzen da prozedura amaitzeko epea, 6tik 9 hilabetera aldatuta, eta xedatzen da Zerga Administrazioak dituen datuak likidazio proposamena egiteko nahikoak direnean, proposamen hori jakinaraziz hasi ahal izango dela.

Ezarri egiten da zehapen prozedura hasi edo amaitzeko epearen etena, perituen tasazio kontrajarria eskatzen denean. Izan ere, egungo erregulazioak berekin ekar dezake zehapen bat jartzea ezinezkoa izatea likidazioaren aurkako tasazio hori sustatzen denean.

Era berean, gerta liteke zehapena perituen tasazio kontrajarria eskatzen denean jada jarrita egotea. Kasu horretan, beharrezkoa da zehapena tasazioaren ondorengo likidaziora egokitzea, horretarako beharrezkoa izan gabe errebokazio prozedura batera jotzea.

Zeharkako zenbatespeneko metodoaren erregulazioa ez da nahikoa izan alderdi batzuei dagokienez. Hori dela eta, argitu eta zehaztu egiten dira arlo horretako alderdi batzuk. Horrenbestez, adierazi egiten dira zeharkako zenbatespenean erabili beharreko datuen jatorria izan daitezkeen iturriak: zenbatespen objektiboko metodoaren zeinu, indize eta moduluak, enpresa bera, estatistikako azterlanak edo Ikuskaritzak egindako laginketa bat.

Zehaztu egiten da zeharkako zenbatespena salmentei edo diru sarrerei bakarrik aplikatu ahal izango zaiela, edo erosketei eta gastuei bakarrik, edo biei aldi berean, ezkutuan gelditu diren edo ez dauden datuei erreparatuta.

Balio erantsiaren gaineko zergan (BEZ) jasandako kuotei dagokienez, onartu egiten da horiek sistema honetan kengarriak izatea, nahiz eta zergaren araudian oro har exijitutako fakturak edo agiriak ez izan, baldin eta Administrazioak lortzen dituen datu edo zantzuen arabera frogatzen bada zergapekoak benetan zerga jasan duela.

BEZa bezalako tributuetan oinarri eta kuoten zenbatespena urtero egiten denez, urtetik beherako likidazio aldietan, urtean zenbatetsitako kuota linealki banatuko da dena delako likidazio aldien artean, salbu eta zergapekoak justifikatzen badu hura denbora banaketa desberdin batetik datorrela.

Zerga-bilketako jarduketa eta prozedurei dagokienez, foru arauan jasotzen da maila bereko hipotekarekin bermeak exekutatzeko berariazko kasu bat. Horren arabera, ezarri egiten da Ogasun eta Finantza Departamentuko Foru Diputatuak erabaki dezakeela, Zerga-bilketako Zuzendariordetza Nagusiari txostena eskatu ondoren, maila berean bermatutako gainerako hartzekodunekin batera, zer baldintza partikular aplikatu behar diren bermearen exekuzioan, Herri Ogasunaren interesak ahalik eta gutxien kaltetu daitezen. Exekuzio hori auzibidetik nahiz auzibidetik kanpo ere egin ahal izango da, baina, kasu horretan, ezinbestekoa izango da Diputatuen Kontseiluak hala erabakitzea.

IV

Arau-hausteen eta zehapenen araubideari dagokionez, egokitu egiten da subjektu arau- hauslearen kalifikazioa baterakuntza fiskalaren araubidean zergapetuta dauden taldeen eremuan, sozietateen gaineko zergaren erregulazioan araubide horrek hartutako konfigurazio berriaren ondorioz.

Zehapenak barkatzeko araubidean, barkatze proposamena lehenago Batzar Nagusiei komunikatu beharrean barkatzea onartzeko erabakia geroago komunikatuko da, zehapenak kudeaketa edo ikuskapen prozedura beretik eratorriak direnean eta haien zenbateko metatua 6.000 eurokoa edo handiagoa denean.

Aukera zabalik gelditzen da adostasunezko murrizpena zehapenari bakarrik aplikatzeko, iruzurrezko bitartekoak erabiltzeagatik mailakatze irizpideak ez diren kontabilitate eta erregistro betebeharrak betetzen ez diren kasu jakin batzuetan, bai eta fakturazio betebeharrak betetzen ez diren kasu jakin batzuetan ere, nagusiki arau-hausteen eraginari eta portaera horien ondorioz jarri beharreko zehapenen zenbatekoari erreparatuta.

Azpimarratzekoa da iruzurrezko portaeran ezkutaketaren existentziari dagokionez sartutako aldaketa. Ezkutaketa desagertu egiten da mailaketa irizpide moduan, eta hark eragindako arau-hausteen motei lotuta dagoen zirkunstantziatzat hartzen da, hala nola zerga zorra ez ordaintzea, likidazioak egiteko beharrezkoak diren aitorpenak edo agiriak ez aurkeztea eta itzulketak oker lortzea.

Autolikidazioak edo aitorpenak horretarako onartutako ereduan edo bide elektronikoez, informatikoez edo telematikoez bestelako bitartekoetan aurkezteko betebeharrari buruzko arau-haustea zerga arloan garrantzia duten beste agiri batzuetara zabaltzen da. Hori horrela, zehapena larriagotu egiten da bide elektronikoez, informatikoez edo telematikoez bestelako bitartekoetan aurkezteagatik, bitarteko horietan aurkezteko betebeharra dagoenean.

Era berean, kontabilitate eta erregistro obligazioak betetzeari dagokionez, aldatu egiten da zehapen araubidea, obligazio hori izaera orokorrez ez-betetzeari dagokion gutxieneko zehapena handituta. Gainera, gehitu egiten da arau-hauslearen negozio zifraren 100eko 10era diru isun proportzionala, gutxienez 15.000 euro izanik, ez-betetzea kontabilitatea, liburuak eta erregistroak eramateko balio duten programa eta artxibo informatikoak gordetzeko betebeharrari eta erabilitako kodeketa sistemei buruzkoa denean. Era berean, are isun handiagoak ezartzen dira, Zerga Administrazioak egiaztatzen duenean fakturazioa kontrolatzeko euskarri diren programa eta artxibo informatikoak eta erabilitako kodeketa sistemak suntsitu, ezabatu edo manipulatu direla. Halaber, 30.000 euroraino igotzen da diru isun finkoa, jarduera eta ekitaldi ekonomiko berean kontabilitate desberdinak eramaten badira eta horrek oztopatzen badu zergapekoaren benetako egoera zein den ezagutzea. Gainera, zehapenak gehitu egiten dira fakturak edo egiaztagiriak egin, bidali edo emateko obligazioak behar bezala ez betetzeagatik edo agiri haiek ez gordetzeagatik: gutxieneko zehapena 300dik 1.000 eurora aldatzen da. Hori horrela, berariazko zehapen bat ezartzen da, Zerga Administrazioak egiaztatzen badu faktura egin, bidali edo ematen ez dela eta zirkunstantzia hori frogatzen bada egiaztapenaren momentuan oraindik amaitu ez den zergaldi bati dagokionez; zehapena 1.000 euro izango da faktura egin, bidali edo eman ez den eragiketa bakoitzeko.

Zerga Administrazioaren lanari aurre egiteari, eragozpen edo aitzakiak jartzeari edo uko egiteari dagokion zerga arau-haustearen barruan, izaera orokorreko zehapenak 150etik 300 eurora gehitzen dira. Gainera, aurreikusten da berariazko zehapen handiagoak jartzea, arau-haustea gertatzen bada egiaztapen eta ikerketa prozedura batean, egiaztapen murriztuko prozedura batean edo egiaztapen mugatuko prozedura batean.

Azkenik, hitzaurre honen II. atalean jasotakoaren arabera, arau-hausle mota berri bat sartzen da, zeinean biltzen baitira foru arauaren 14. artikuluan jasotako elusioaren aurkako klausula aplikatzeko gertatu behar diren zirkunstantziak. Horrelako kasuetan aplikagarriak diren zehapenak ere sartzen dira.

V

Zergen Foru Arau Orokorrean jasotako berrikuspen bideari dagokionez, aldaketen xedea da bide horretako jarduketak arintzea eta auzien kopurua murriztea.

Helburu horiek lortzeko, erreformak prozeduraren fase guztietan bitarteko elektronikoak gehiagotan eta hobeto erabiltzea bilatzen du, eta arindu egiten ditu prozedurak. Gainera, indarrean dagoen araudia teknikoki hobetzen du, hutsuneak betez eta praktikan zalantzazkotzat hartzen diren eta, beraz, auzi juridikoak eragiten dituzten alderdi batzuk argituz.

Hori horrela, aurreikusten da interesdunek prozedurak, errekurtsoak eta erreklamazioak hasteko bitarteko elektronikorik erabiltzen ez dutenean, nahiz eta Zerga Administrazioarekin bitarteko elektronikoez harremana izatera behartuta egon, errekeritu egingo zaiela 15 egun naturaleko epean huts horiek aurkezpen elektronikoaren bidez konpondu ditzaten, eta adieraziko zaie horrela egin ezean ulertuko dela prozeduran, errekurtsoan edo erreklamazioan atzera egin dutela, zentzu horretan aurretik eman beharreko ebazpenaren bidez.

Erreklamazioen metaketari dagokionez, erraztu egiten dira derrigorrezko metaketaren erregelak, eta aukerazko metaketa sartzen da.

Bestetik, ezarri egiten da borondatezko ordezkaritzaren presuntzioa, inpugnatutako egintzaren jatorri den zerga aplikazioko prozeduran presuntzioa egiaztatu zutenen alde. Argi eta garbi, horrek zeharkako kostuak kenduko dizkie zergapekoei.

Jakinarazpen elektronikoa sartzen da derrigorrez bide horretan aurkezten diren erreklamazioetarako.

Azalpen bat egiten da, kostuen arloan, erreklamazioa onartzen ez denean: zehaztu egiten da kostuetako kondenaren eremu subjektiboa.

Kendu egiten da isiltasun kasuetan errekurritzeko epea zenbatzeko erregela berezia, Auzitegi Gorenak eman berri duen jurisprudentziaren eta doktrinaren arabera. Horrenbestez, eta zergapekoen defentsa legitimorako eskubidea babesteko, baldin eta erreklamazioa jarri ondoren eta hori ebatzi aurretik ebazpen espresua ematen bada, Auzitegira bidaliko da, behin interesdunari jakinarazita. Jakinarazpenaren bidez, ohartaraziko da ebazpen espresua bide ekonomiko-administratiboan inpugnatutzat hartuko dela, haren edukiaren arabera, edo prozedura amaituko duela auzia prozesutik kanpo betetzeagatik –egoera hori Auzitegiak deklaratuko du–.

Espresuki zehazten da foru arauan Administrazioak zer epe duen Foru Auzitegi Ekonomiko-Administratiboaren ebazpena exekutatzeko, atzeraeginarena ez diren kasuetan, hau da, funtsezko edo mamizko arrazoiengatik ebazten den kasuetan.

Osatu egiten da partikularren arteko erreklamazioen arloko erregulazioa, zergen aplikazioaz arduratzen den zerga administrazioaren aurrean ematen diren ebazpenen eraginkortasuna espresuki aitortuta.

Hobekuntzak sartzen dira deuseztatze errekurtsoaren arloan, errekurtso hori jartzea bidezkoa ez duten kasuak espresuki araututa.

Errekurtso berri bat sortzen da, exekuziokoa, orain arte exekuzio intzidente deitua, Auzitegiaren onespen ebazpen baten ondorioz emandako egintzen aurka aurkeztekoa. Argitu egiten da aplikazio eremu objektiboa, erraztu egiten da prozedura eta, azkenik, premiazko izaera ezartzen da errekurtso hori izapidetzean.

Sei hilabetera murrizten da berrikuspen errekurtso berezia ebazteko epea.

VI

2012ko abenduaren 27ko 7/2012 Lege Organikoak egindako Ogasun Publikoaren aurkako delituaren erregulazioaren aldaketa organikoaren garrantziak berez justifikatzen du foru arauan horrelako kasuetan egitekoak diren jarduketak berariaz garatzen dituen VI. titulu bat sartzea. Izan ere, legegile organikoaren asmo nagusia nabarmena da: arau orokorra izango da likidazioa egitea eta horren bitartez kuantifikatutako zerga zorra biltzeko jarduketak egitea. Horrek guztiak ez du eragozten, zerga arloko arauan jasotako kasu jakin batzuetan, legegileak aukera dezala, puntu honetan zigor arloko arauan finkatutako hautazko izaerari zorrotz jarraituz, jarduketak geldiaraztea, likidaziorik egin gabe, harik eta egoitza jurisdikzionalean erabakia hartu arte.

Aldaketa horrek ahalbidetuko du, kasurik gehienetan, zerga zorra likidatzeko jarduketa administratiboak geldiarazteko derrigortasuna gainditzea. Izan ere, horrek berekin zekarren, besteak beste, zerga zorra bestelako izaerako figura bat bihurtzea –delitutik eratorritako erantzukizun zibila–, Herri Ogasunari sortutako kaltea ordaintzeko formula moduan.

Ondorio horretaz gain, arauaren egitura berriak ahalbidetuko du gainditzea lehendik dagoen erregulazioak Herri Ogasunaren aurkako delitu baten ustezko egilea zenari, arau-hausle administratiboa zenari ez bezala, ematen zitzaion aldeko tratu desberdina eta justifikatu gabea. Izan ere, azken hori behartuta zegoen, lehendabizikoa ez bezala, egintza administratiboaren exekutibotasunaren etena ordaintzera edo bermatzera.

Horrenbestez, zerga araudi berriak iruzurraren zigor epaiketarekin uztartzen ditu likidazio egintza administratiboak aldi berean egotearen ondorioz sortutako egoera bereziei buruzko arauak.

Herri Ogasunaren aurkako delitua taxutzean, erregulazioaren kontzeptua sartu da, arau positiboan. Horrela, erregulazioa zerga zorraren erabateko aitortza eta ordainketatzat hartzen da, delituaren benetako ifrentzua izanik, posible egiten baitu berriro legezkotasunera itzultzea eta bukaera ematen baitio iruzurrak eragindako ondasun juridiko babestuaren behin-behineko kalteari. Horretarako, arauan gogora ekartzen da zer elementuk osatzen duten zerga zorra, Zergen Foru Arau Orokorraren 57. artikuluaren arabera, eta berretsi egiten da Zerga Administrazioaren ahalmena erregularizazioaren arabera exijigarria den zorraren erabateko aitortza eta ordainketa gertatu dela erabakitzeko behar diren egiaztapenak egin ditzan.

Erregularizazioa gertatu izanari buruzko ziurtasunik ezak berekin ekarriko du erruduntasun testigantza jurisdikzio eskudunari pasatzea edo espedientea Fiskaltzari bidaltzea.

Beste ondorioa izango da, oro har, gorago adierazitakoaren arabera, likidazio administratibo bat egitea. Horretarako, berariazko prozedura bat arautzen da, zeinak aldaketa nabarmenak sartzen baititu, delituari lotutako likidazioaren aldean, egiaztapen eta ikerketa prozeduraren amaierako fasean, Zergen Foru Arau Orokorrean jasotako egiaztapen eta ikerketa prozeduraren egiturari eutsita, horren hasierari eta izapideari dagokienez.

Jarraian, aurreikusten da espedientea egoitza administratibora itzultzeko aukera, goian aipatutako salaketa edo kereila onartzen ez den kasuan. Hori horrela, Administrazioak bere jarduketak berriro hasiko ditu osorik, eta, horretarako, dena delako epeak ezartzen dira.

Egiaztapen administratiboari dagokionez, eta Herri Ogasunaren aurka ustez delitua egon dela zehaztu ondoren, gerta daiteke, zerga betebehar, kontzeptu eta zergaldi berari dagokionez, delituzko iruzurra egon dela adierazten duten betebeharraren elementuak egotea eta, aldiz, iruzurrak eragiten ez dien beste elementu batzuk izatea. Kasu horretarako, bereizketa mekanismo bat arautzen da, zeinak bi likidazio desberdinetan banatzen baititu egoera batak eta besteak eragindako elementuak, zigor arloko arauak adierazitakoari jarraituz. Argi eta garbi zergapekoari bermea emate aldera, zigor arloko arauan jasotako gutxieneko esku hartzearen printzipioan oinarrituta, erregela orokor bat finkatzen da, zeinaren arabera zergapekoaren alde oinarrian edo kuotan konpentsatzekoak edo kentzekoak diren partida guztiak delituari lotutako likidazioari egotziko baitzaizkio. Halere, zergapekoari aukera emango zaio partida horiek proportzionalki banatzeko sistema bat hautatzeko.

Herri Ogasunaren aurkako delitu bati lotutako espediente horien izapidearen ikuspuntutik, abiapuntu hau hartu behar da: arauek araubide juridiko desberdin bat taxutu dezakete zuzenbide publikoko zor desberdinetarako, horien izaera partikularraren arabera. Zerga arloan, beharrezkoa da berariazko funtsezko arauak ezartzea, zerga iruzurraren forma larrienetik eratorritako zerga zorretarako, hala nola, Herri Ogasunaren aurkako deliturako. Haien berezitasuna dela eta, arau horiek prozedurazko tratamendu desberdina ere badute, arlo administratiboan hasi eta arlo judizialean amaitzen dena. Nagusiki, araubide juridiko desberdin horrek baztertu egiten du zorra osorik edo partzialki amaitzea egiaztapen prozedura administratiboan akatsak edo atzerapenak izateagatik. Gainera, araubide hori bat dator delituzko portaerak behar bezala zigortzeko ohiko ereduekin, eta ez du aukera ematen portaera horiek zigorrik gabe gelditu daitezen delituzko iruzurraren existentziari edo zenbatekoari eragiten ez dioten edo horiek auzitan jartzen ez duten egiaztapen espedientearen izapide administratibo soilean izandako irregulartasunekin lotutako arazo soilengatik. Berariazko funtsezko arau horiek aplikatuko badira, beharrezkoa da Herri Ogasunaren aurkako delituei lotutako likidazioek izapide berezi bat izatea, zeinean ez baitira aztertuko, funtsezko araubide aplikagarriarekin bat etorrita, zerga betebeharraren amaiera oso edo partzialarekin lotuta ez dauden gaiak, hala nola, zor mota hauetan, atzerapenak edo prozedurazko akatsak. Horrenbestez, irregulartasun horiek tratatzeko ezintasuna bat dator lehendik dagoen araudiari jarraituz zigor jurisdikzioak behin eta berriz hartutako erabakiekin, delituzko egitate bat epaitzean eragiten ez duten aurretiazko prozedurazko alderdi administratiboen tratamendua saihestuta.

Nabarmentzekoa da bi agintaritzak esku hartzen dutela delituzko zerga iruzur batean, alegia, administratiboak eta judizialak. Nor bere arloan jarduten da.

Hori horrela, garrantzitsua da adieraztea zigor arloak lehentasuna duela bi alderditan: alde batetik, zigor arloko epailearena da kobrantzako jarduketa administratiboak eteteko aukera, modu horretan zerga likidazioaren exekutibotasunaren aldean kautelazko justiziari bidea emanez; bestetik, zigor arloaren lehentasuna beteta gelditzen da zerga likidazioa zigor arloko epaileak frogatutzat ematen dituen egitateetara derrigorrez egokitzen denean, hark epaitu eta iruzurraren existentziaz eta zenbatekoaz erabakitzen duenean, zigor bat jartze aldera. Epaileak erabakian Herri Ogasunaren aurkako delitua egon dela baztertzen denean, baina likidazio administratiboa egin daitekeenean, babes judiziala Herri Ogasunaren aurkako delitu bati lotutako beste edozein zerga likidaziorako aurreikusitako eran gauzatuko da, gaur egun egiten ari den moduan.

Goian adierazi den moduan, zigor arloko aldaketak berekin ekarri du, likidazioa egiteaz gain, Zerga Administrazioak likidatutako zerga zorra kobratzeko jarduketak egin ahal izatea Zergen Foru Arau Orokorrean eta hura garatzen duen araudian erregulatutako bilketa mekanismoak erabiliz.

Horren ondorioz, berariazko arau bat ezartzen da, likidatutako zerga zorra ordaintzeko epeari dagokionez. Izan ere, epe hori salaketa edo kereila onartu ondoren irekiko da; kasu horretan, aukera ematen da diru bilketako jarduketak zerga prozedura administratibo arrunten bidez foru arauan jasotako arrazoiengatik berrikusteko.

Erreforma honen esparruan, bada une honetan baztertu ezin den arlo bat: zerga erantzuleen esparrua. Goian aipatutako aldaketa organikoaren asmoa da pribilegiozko egoerak deuseztatzea eta ustezko delitugilea beste edozein zerga zordunen egoera berean kokatzea. Xede horiekin bat eginik, beharrezkoa da zerga erantzukizun kasu berri bat ezartzea, iruzurraren kausatzaile edo kolaboratzaile izaeran oinarritua eta zigor arloko prozesuan ikertuaren izaeraren beharrak kualifikatua.

Horrelako kasuetan erantzukizun deklarazioak ahalbidetuko du Zerga Administrazioak joko duela hasieran zergapeko subjektu pasiboari erantzule moduan likidatutako zerga zorra kobratzera: horrela, bururaino eramango da zigor arloko aldaketaren agindua, ustezko delituari lotutako zerga zor likidatua biltze aldera.

Aldaketak beharrezko egiten du Zergen Foru Arau Orokorraren beste artikulu batzuk ere aldatzea. Zehazki, alde batetik, VI. titulu berria aplikatuta garatu beharreko jarduketa administratiboak zergen aplikazioaren zatia diren neurrian, haiek egiten dituzten organoak Zerga Administraziokoak dira. Era berean, ordezkaritza arau orokorrak jarduketa horiek egitean aplikatuko dira.

Bestetik, aldatu egiten dira kautelazko neurriak hartzeari buruzko xedapenak, bai eta behin-behineko likidazioen zerrenda ere, eta bi kasuetan, orain arauan erregulatzen diren likidazio berrien ondorioz –orain arte ez zeuden–.

Era berean, egokitu behar da zerga egoera borondatez erregularizatzeko balio izan duten eta, Herri Ogasunaren aurkako delituaren erregulazio berriaren indarrez, legezkotasunera erabat itzultzea dakarten diru kopuruak ez itzultzea ezartzen duen xedapena.

VII

Titulu berri bat sartzen da Zergen Foru Arau Orokorrean. Horren bidez, foru arau hori Europar Batasuneko araudira egokitzen da legez kanpoko estatu laguntza bateraezinen arloan.

Estatu laguntzak berreskuratzean, Zerga Administrazioak Europako Batzordeak hartutako erabaki baten exekutatzaile gisa jarduten du, eta, horretarako, arlo hori erregulatzen duen batasuneko araudiari jarraitu behar dio, eta, bereziki, erabakiaren berehalako exekuzio efektiboaren printzipioei, zeinak 16. artikuluan jasotzen baititu Europako Kontseiluaren 2015eko uztailaren 13ko 2015/1589 Erregelamenduak, Europar Batasunaren Funtzionamendu Itunaren 108. artikulua aplikatzeko xedapenak ezartzen dituenak.

Printzipio horiek berreskuratze erabakien exekuzioaren erregulazioaren iturri dira, eta haren bereizgarri nagusiak justifikatzen dituzte:

– Egintza administratibo irmoak aldatzeko aukera, bai eta gauza epaituaren indarrez ere, Europar Batasuneko Justiziako Auzitegiak jasotakoaren arabera.

– Zerga zorrak geroratu edo zatikatu ezinezkotzat hartzea.

Gainera, sartu egiten dira europar araudiak ezarritako preskripzio erregela bereziak. Beraz, barruko preskripzio epeak ez dira aplikagarriak, erabakiaren exekuziotik bakarrik ateratzen den zerga zorrari dagokionez.

Berreskuratze erabakiak exekutatzeko bi prozedura mota sortzen dira, eta bata edo bestea aplikatzen dira erabakian aipatutako zerga betebeharraren elementuen izaeraren arabera. Bata edo bestea aplikatzeko, kontuan hartu behar da erabakiaren exekuzioak zerga zorraren kuantifikazioan edo likidazioan eragiten ote duen.

Dena den, berreskuratze erabakiak ikuskapen prozedura arruntaren bidez ere exekutatu ahal izango dira, zergapekoari beste betebehar batzuk edo berreskuratze erabakiaren xedea ez diren betebeharraren beste elementu batzuk egiaztatzen zaizkionean.

Zergen Foru Arau Orokorraren 5. eta 46.2 artikuluetan, sartu egiten dira titulu berri honi buruzko bi aipamenak. Izan ere, alde batetik, Zerga Administrazioaren eskumena da titulu hartan araututako jarduketen exekuzioa eta, bestetik, ordezkaritza arau orokorrak berreskuratze prozeduretan aplikatuko dira.

VIII

Aldatu egiten da laugarren xedapen gehigarria, identifikazio fiskaleko zenbakiari buruzkoa. Aldaketaren xedea da, alde batetik, identifikazio fiskaleko zenbakia ezeztatzeak arlo fiskalean dakartzan ondorioak esplizitu egitea eta, bestetik, ondorio horiek pertsona fisikoei esleitutako zenbakiei luzatzea subjektiboki.

Era berean, aldatu egiten da zazpigarren xedapen gehigarria, Herri Ogasunaren aurkako delituengatik ezarritako erantzukizun zibila ordainarazteari buruzkoa. Xede bakarra da zerga araudia Zigor Kodearen azken aldaketetara egokitzea.

Indarrean dagoen araudiari jarraituz, Ez-egoiliarren Errentaren gaineko Zergaren abenduaren 10eko 16/2014 Foru Arauak, hirugarren xedapen gehigarrian jasotako adiskidetasunezko prozeduren hasiera bateragarria da adiskidetasunezko prozedurari lotutako arazo berberen inguruan aurkeztutako errekurtso administratibo bat edo administrazioarekiko auzi errekurtso bat izapidetzearekin.

Mekanismo hori zorrotz berrikuslea den instantzia batekin batera erabiltzea saihestu behar denez, eta babes judizial efektiboaren printzipioari eragin gabe, ezarri egiten da bide administratiboan nahiz judizialean hasitako ezarritako berrikuspen prozesuak etetea, harik eta adiskidetasunezko prozedura bideratu arte.

Azkenik, arauak sakabanatuegi egon ez daitezen eta haien aplikazioa erraztu dadin, Zergen Foru Arau Orokorrean sartzen da 1988ko azaroaren 22ko 45/1988 Foru Dekretuak, zerga araudia Baloreen Merkatuaren uztailaren 28ko 24/1988 Legera egokitzen duenak, jasotako baloreei buruzko informazio betebeharra, eta indargabetu egiten da azken xedapen hori.

Xedapen iragankorrari dagokionez, nabarmentzekoak dira bertan jasotako ondorioak, foru arauan sartutako hainbat aldaketari dagokionez. Bereziki aipatzekoak dira arau-hausteen eta zehapenen araubideari eragiten dioten aldaketak.

Artikulu bakarra.– Gipuzkoako Lurralde Historikoko Zergei buruzko martxoaren 8ko 2/2005 Foru Arau Orokorra aldatzea.

Aldaketa hauek sartzen dira Gipuzkoako Lurralde Historikoko Zergei buruzko martxoaren 8ko 2/2005 Foru Arau Orokorrean:

Bat.– 5. artikuluko 1. apartatua honela geratzen da idatzita:

«1.– Foru arau honen ondorioetarako, III., IV., V., VI. eta VII. tituluetan araututako eginkizunak garatzen dituzten organoek eratzen dute Zerga Administrazioa.»

Bi.– 8. artikulua edukirik gabe geratzen da.

Hiru.– 11. artikuluko 3. apartatua honela geratzen da idatzita:

«3.– Foru Aldundiaren eskumenen esparruan, Ogasun eta Finantza Departamentuko Foru Diputatuak soilik eman ditzake zergen arloko foru arauak eta gainerako xedapenak interpretatu edo argitzeko xedapenak.

Xedapen horiek Gipuzkoako Lurralde Historikoko Aldizkari Ofizialean argitaratuko dira, eta Zerga Administrazioaren organo guztiek bete beharko dituzte.

Apartatu honetan aipatzen diren xedapenak eman aurretik, eta haien testua behin prestaturik, jendaurrean jarri ahal izango dira haien izaeragatik hala komeni denean.»

Lau.– 14. artikuluko 3. apartatua honela geratzen da idatzita:

«3.– Artikulu honetan xedatutakoaren ondorioz egiten diren likidazioetan, tributua exijituko da ohikoak edo propioak diren egintza edo negozioei dagokien araua aplikatuta edo lortutako abantaila fiskalak kenduta. Horrez gain, berandutze interesak likidatuko dira, eta, hala badagokio, foru arau honen 211 bis artikuluan xedatutakoa izango da aplikagarria.»

Bost.– 29. artikuluko 3. apartatua honela geratzen da idatzita:

«3.– Artikulu honetan xedatutakoa garatzeko, zerga betebehar formalen konplimenduari buruzko zirkunstantziak erregelamenduzko xedapenetan arautu ahal izango dira.

Zehazki, arautuko da zer kasutan aurkeztu edo eraman behar diren erregistro liburuak aldian-aldian eta bitarteko telematikoak erabilita.»

Sei.– 39. artikuluko 1. apartatua honela geratzen da idatzita:

«1.– Zergapeko bat hiltzen denean, bete gabe gelditzen diren zerga betebeharrak oinordekoei eskualdatuko zaizkie, betiere legeria zibilean herentziaren eskurapenari buruz ezarritakoa eragotzi gabe, eta, bereziki, Euskal Zuzenbide Zibilari buruzko ekainaren 25eko 5/2015 Legearen 21. artikuluan erantzukizunari dagokionez aipatzen den muga kontuan hartuta.

Herentzia legatuen bidez banatzen denean eta zati alikuotako legatuak eratzen direnean, zerga betebehar horiek oinordekoentzat ezarritako baldintza berdinetan eskualdatuko zaizkie legatudunei.

Zehapenak ez dira inoiz ere eskualdatuko. Erantzulearen betebeharra ere ez da eskualdatuko, salbu eta erantzukizuna deribatzeko erabakia heriotza gertatu aurretik jakinarazi bada.»

Zazpi.– 40. artikuluko 1. apartatua honela geratzen da idatzita:

«1.– Bete gabeko zerga obligazioak nortasun juridikoa duten sozietate eta entitate desegin eta likidatuetatik datozenean eta sozietate eta entitate horietan bazkide, partaide edo titularkideen ondare erantzukizuna legez mugatuta dagoenean, zerga obligazioak azken horiei eskualdatuko zaizkie, eta horiek izango dira erantzule solidarioak betebehar horietan, gehienez muga honekin: bazkide, partaide edo titularkideei dagokien likidazio kuotaren balioa eta sozietatea desegin edo konkurtso adierazpena (lehenago izan bada) gertatu aurreko lau urteetan jasotako ondareak –betebehar horiengatik erantzun beharreko sozietate ondarea gutxitzen dutenak–, ezertan ere kendu gabe foru arau honetan bazkide, partaide edo titularkide horien erantzukizun kasuetarako ezarritakoa.

Nortasun juridikodun sozietate edo entitate bat desegiten eta likidatzen bada eta legeriak bazkideen, partaideen edo titularkideen ondasun erantzukizuna mugatzen ez badu, bete gabeko zerga betebehar guztiak haiei eskualdatuko zaizkie, eta solidarioki bete beharko dituzte.»

Zortzi.– 42. artikuluko 4. apartatua honela geratzen da idatzita:

«4.– Orobat, jarraian aipatzen diren pertsonak edo entitateak ere zerga zorraren eta, egonez gero, zehapenen ordainketaren erantzule solidarioak izango dira, epe exekutiboko errekargua eta berandutze interesak barruan sartuta, Zerga Administrazioak bahitu edo besterendu dituen ondasun edo eskubideen balioa berdindu arte:

a) Zerga Administrazioaren lana galarazteko asmoz, ordaintzera behartutakoaren ondasunak edo eskubideak ezkutatzen edo eskualdatzen dituztenak edo horretan laguntzen dutenak.

b) Beren erruz edo zabarkeriaz enbargo aginduak betetzen ez dituztenak.

c) Enbargoa, kautelazko neurria edo bermea eratu dela jakin arren, enbargatutako ondasunak edo eskubideak edo kautelazko neurria edo bermea ezarria duten bestelakoak altxatzen laguntzen dutenak edo altxaketa onartzen dutenak.

d) Zordunaren ondasunak gordailutzen dituzten pertsonak edo entitateak, baldin eta, enbargoaren jakinarazpena behin jaso ondoren, haiek altxatzen lagundu edo altxaketa onartzen badute.»

Bederatzi.– 46. artikuluko 2. apartatua honela geratzen da idatzita:

«2.– Errekurtso edo erreklamazioak aurkezteko, horietan atzera egiteko, eskubideei uko egiteko, obligazioak zergapekoaren izenean hartu edo onartzeko, bidegabeko sarreren itzulketak edo errenboltsoak eskatzeko, eta foru arau honetako III., IV., V., VI. eta VII. tituluetan araututako prozeduretan zergapekoak sinatu behar duen gainerako kasuetarako, bi modutan frogatu daiteke ordezkaritza: Zuzenbidean balioduna den edozein bide erabilita –modu sinesgarrian uzten badu jasota ordezkaritza– edo, bestela, interesduna administrazio organo eskudunaren aurrean agertuta eta ordezkaria zein den adierazita.

Ondorio horietarako, baliodunak izango dira Zerga Administrazioak onartzen dituen ordezkaritza agiri normalizatuak.»

Hamar.– 64. artikuluko 2. apartatua honela geratzen da idatzita:

«2.– Hurrengo zerga zorrak ezingo dira zatikatu edo geroratu:

a) Efektu tinbradunen bidez ordainarazten direnak.

b) Zenbait garraiobideren gaineko zerga berezitik eratorritako zerga zorrak.

c) Jokoaren gaineko tributuetatik datozenak.

d) Atxikitzailearen edo kontura sartzera behartutakoaren zerga obligazioei dagozkienak, erregelamenduz ezartzen diren kasuetan.

e) Zergapekoa konkurtsopean geratzen bada, konkurtso legeriaren arabera masaren aurkako kreditutzat hartzen direnak.

f) Foru arau honetako VII. tituluan araututako estatu laguntzak berreskuratzeko erabakiak exekutatzearen ondorioz sortutakoak.

Apartatu honetako letretan aipatzen diren gerorapen edo zatikapen eskaerak ezetsi egingo dira.»

Hamaika.– 65.bis artikulua gehitzen da, eta honela dio:

«65.bis artikulua.– Egiaztatzeko eta ikertzeko eskubidea.

1.– Foru arau honetako 65. artikuluan eskubideen preskripzioari buruz ezarritakoak ez dio eragingo Zerga Administrazioak foru arau honetako 111. artikuluari jarraituz egiaztapenak eta ikerketak egiteko duen eskubideari, hurrengo apartatuan xedatutakoan izan ezik.

2.– Konpentsatutako zein konpentsatu gabeko oinarriak edo kuotak edo aplikatutako zein aplikatu gabeko kenkariak egiaztatzeko prozedura abiatzeari dagokionez Zerga Administrazioak duen eskubidea hogei urteren buruan preskribatuko da, eta epe hori hasiko da kontatzen oinarri edo kuota horiek konpentsatzeko edo kenkariak aplikatzeko eskubidea sortu zen zergaldiko aitorpen edo likidazioa aurkezteko epea amaitu eta biharamunetik aurrera.

Foru arau honetako 145. artikuluan aipatzen diren egiaztapen eta ikerketa prozedura orokorretan, zerga betebeharrak eta likidazio-aldiak preskribatuta ez daudenean, ulertuko da egiaztapenaren barruan konpentsatu gabeko oinarri edo kuota guztiak eta aplikatu gabeko kenkari guztiak sartzen direla, baldin eta horiek egiaztatzeko eskubidea ez badago preskribatuta aurreko paragrafoan xedatutakoaren arabera. Beste edozein kasutan, berariaz adierazi beharko da apartatu honetan aipatzen den egiaztapena prozeduraren xedean sartzen dela, eta, beharrezkoa izango da zehaztea zein ekitaldi edo zergalditan sortu zen egiaztapenak hartuko dituen oinarri edo kuotak konpentsatzeko edo kenkariak aplikatzeko eskubidea.

Apartatu honetan aipatzen den egiaztapena, eta, kasua bada, konpentsatutako edo konpentsatu gabeko oinarri edo kuotak eta aplikatutako edo aplikatu gabeko kenkariak, lehen paragrafoan aipatutako eskubidea preskribatu gabe dutenak, zuzendu edo erregularizatzeko lana, likidatzeko eskubidea preskribatu gabe duten zerga betebeharrak eta zergaldiak egiaztatzeko prozeduren barruan baino ezingo dira egin.

3.– Tributu bakoitzaren araudiak besterik esaten ez badu, egiaztapenak egiteko eskubideari aurreko apartatuan ezartzen zaion mugak ez du eraginik izango oinarriak, kuotak edo kenkariak jasotzen dituzten likidazioak edo autolikidazioak eta haien kontabilitatea aurkezteko obligazioan, baldin eta obligazio sortu bada apartatu horretan adierazitako konpentsazio edo aplikazioak izan diren eta preskribatu gabe dauden ekitaldiak egiaztatu eta ikertzeko prozeduren barruan.»

Hamabi.– 66. artikuluko 1. apartatua honela geratzen da idatzita:

«1.– Foru arau honetako 65. artikuluan aipatzen diren kasuetan, preskripzio epea erregela hauen arabera konputatuko da:

a) kasuan, aitorpena edo autolikidazioa aurkezteko arauzko epea amaitu ondorengo egunetik aurrera.

Tributuak ordainagiri bidezko aldizkako kobrantzakoak direnean, zerga zorra dagokion likidazioaren bidez zehazteko ez bada beharrezkoa aitorpena edo autolikidazioa aurkeztea, preskripzio epea tributuaren sortzapen egunean hasiko da.

b) kasuan, ordaintzeko borondatezko epea amaitu ondorengo egunetik aurrera, artikulu honen 2. apartatuan xedatutakoa eragotzi gabe.

c) kasuan, tributu bakoitzaren araudiaren arabera bidezkoa den itzulketa eskatzeko epea amaitu ondorengo egunetik aurrera, edo eperik ez badago, itzulketa hori eskatzeko aukera izan eta hurrengo egunetik aurrera; bidegabeko sarrera egin ondorengo egunetik aurrera edo, bidegabeko sarrera hori epe horren barruan egin bada, autolikidazioa aurkezteko epea amaitu ondorengo egunetik aurrera; edo inpugnatutako egintza erabat edo partzialki bidegabea dela adierazten duen epaia edo ebazpen administrazioa irmo bihurtu ondorengo egunetik aurrera.

Eragiketa bat bateraezinak diren hainbat zergak kargatzen badute, eta haien egozpen tenporalari buruz desadostasuna badago, bidegabeko sarreraren itzulketa eskatzeko preskripzio epea kontatzen hasiko da tributu edo ekitaldi egokiari buruz erabaki behar duen organoak ebazpena ematen duenetik aurrera.

d) kasuan, tributu bakoitzaren arauditik ondorioztatzen diren itzulketak egiteko epeak amaitu ondorengo egunetik aurrera, edo itzulketa zein bermeen kostua jasotzeko eskubidea aitortzen duen erabakia jakinarazi ondorengo egunetik aurrera.»

Hamahiru.– Eduki berria gehitzen zaio 67. artikuluko 10. apartatuari, eta, horren ondorioz, orain arteko 10. apartatua 11. apartatua izatera pasatzen da:

«10.– Foru arau honetako 65. artikuluko a) letran zerga betebehar bat exijitzeko eskubideari dagokionez aipatzen den preskripzio epea eteteak berekin ekarriko du, halaber, artikulu horretako a) eta c) letretan aipatzen diren eskubideen preskripzio epea etetea zergapekoaren zerga obligazio konexoei dagokienez, baldin eta zerga obligazio horietan tributazioa beste era batera egiten bada edo egin beharra badago, eta horren arrazoia bada Zerga Administrazioak edo zergapekoek aplikatu dituzten irizpide edo elementuek zerga betebehar konexo horiekin lotutako obligazioaren erregularizazioa oinarritzen dutela.

Apartatu honetan xedatutakoaren ondorioetarako, zerga betebeharra konexoa dela joko da haren elementuetakoren bat beste betebehar edo beste zergaldi baten eraginpean dagoenean edo beste betebehar edo zergaldi bati dagozkion elementuen arabera zehazten denean.»

Hamalau.– Indarrik gabe geratzen da 68. artikuluko 4. apartatua.

Hamabost.– 69. artikuluko 3. apartatua honela geratzen da idatzita:

«3.– Preskribatutako zergaldietan egindako eragiketetako datuak nondik datozen frogatzeko obligazioa bere horretan mantenduko da dagokion eragiketak ukitutako zerga zorrak zehazteko eskubidearen preskripzio epeak dirauen bitartean, eta beti, foru arau honetako 65 bis artikuluko 2. eta 3. apartatuetan jasotako kasuetan.»

Hamasei.– 72. artikuluko 1. apartatua aldatzen da, eta 4. apartatua gehitzen zaio, jarraian datorren eran:

«1.– Zerga Administrazioak ofizioz konpentsatuko ditu epe exekutiboan dauden zerga zorrak.

Ordaindu edo itzuli beharreko kopuruak kudeaketa edo ikuskapen prozedura berberetik datozenean edo, aurreko likidazio bat foru arau honetako 26.5 artikuluan xedatutakoaren arabera baliogabetu ondoren egindako beste likidazio baten emaitza direnean, ofizioz konpentsatuko dira, borondatez ordaintzeko epean.

Orobat, foru arau honetako 231.3 eta 244.7 artikuluetan aipatzen den ebazpena exekutatzeagatik ordaindu edo itzuli beharreko kopuruak ere ofizioz konpentsatuko dira, borondatez ordaintzeko epearen barruan.»

«4.– Kasu berezietan, Foru Aldundiak, Zerga-bilketako Zuzendariordetza Nagusiaren txostena jaso eta gero, erabaki dezake epe exekutiboan dauden zerga zorren gerorapen edo zatikapenetan ofiziozko konpentsazioa ez aplikatzea, baldin eta konpentsazio horrek nabarmen eragin badezake jarduera ekonomikoaren produkzio ahalmenean edo enplegu kopuruan, edo Herri Ogasunaren interesetarako kalte handiak ekar baditzake. Erregelamenduz ezarri ahal izango da zer baldintza bete behar diren horrelako erabakiak hartzeko.»

Hamazazpi.– 78. artikuluko 6. eta 8. apartatuak aldatzen dira, eta honela geratzen dira idatzita:

«6.– Kautelazko neurrien ondorioak sei hilabeteko epean iraungiko dira, neurriak hartzen direnetik aurrera, honako kasuotan izan ezik:

a) Premiamenduzko prozeduran enbargo forma hartzen dutenean, edo artikulu honen 8. apartatuko neurri zein kautelazko neurri judizial bihurtzen direnean; kasu hauetan, kautelazko neurria hartu den egunetik izango dituzte ondorioak.

b) Neurria hartzeko arrazoiak desagertu direnean.

c) Haien ordez askitzat jotzen den beste berme bat jartzeko erabakia hartzen denean, interesdunak eskatuta.

Nolanahi dela ere, kautelazko neurriak kendu egin beharko dira baldin eta, neurriaren zenbatekoa kobratuko dela bermatzeko, zergapekoak kreditu entitate baten edo elkarren bermerako sozietate baten abal solidarioa edo kauzio aseguruaren ziurtagiria aurkezten badu.

Zergapekoak borondatezko epean ordaintzen badu kautelazko neurriak ziurtatzen zuen zerga obligazioa, ordainketan etendurarik izan gabe, Zerga Administrazioak aurkeztu den abalaren gastuak ordaindu beharko ditu.

d) Epe hori erabaki arrazoituaren bidez luzatzen denean (sei hilabete gehienez).

e) Neurriak hartzen direnean foru arau honetako 251. artikuluan jasotako prozedura izapidetzen den bitartean edo prozedura hori amaitutakoan. Horrelakoetan, neurriak hartu eta hogeita lau hilabeteko epean amaituko dira ondorioak.

Neurriak hartu badira foru arau honetako 251. artikuluan jasotako tramitazioa hasi baino lehen, foru arau honetako 248.2 artikuluan aipatzen den likidazioa egin ondoren, epea luzatu ahal izango da erabaki arrazoituaren bidez, baina hartutako neurrien luzapena, guztira, hamazortzi hilabetekoa izango da gehienez.

Letra honetan aipatzen diren neurriak egindako likidazioa kobratzeko hasitako premiamenduzko prozeduraren enbargo bihurtu ahal izango dira.

Neurriak hartu ondoren, zigor arloko organo judizial eskudunari Zigor Kodearen 305.5 artikuluan jasota dagoen etendura eskatzen bazaio, hartutako neurriak Fiskaltzari eta aipatutako organo judizialari jakinaraziko zaizkie, eta indarrean segituko dute, harik eta organo judizialak neurriak mantentzea edo kentzea erabaki arte.»

«8.– Egiaztapen edo ikerketa prozedura bat dela-eta, salaketa edo kereila bat formalizatu denean Ogasun Publikoaren aurkako delituagatik edo, delitu horrengatik, prozesu judiziala bideratu denean foru arau honetako 248.2 artikuluan aipatzen den likidazioa egin gabe, Zerga Administrazioko organo eskudunak artikulu honetan araututako kautelazko neurriak hartu ahalko ditu, foru arau honetako hamahirugarren xedapen gehigarrian xedatutakoa galarazi gabe.

Ustezko delituaren ikerketak ez badu bere jatorria egiaztapen eta ikerketa prozedura batean, Zerga Administrazioko organo eskudunak kautelazko neurriak hartu ditzake behin Fiskaltzak dagozkion ikerketa eginbideak abiarazi ostean, edo, hala badagokio, zigor eginbideak abiarazi ostean.

Aurreko paragrafoetan aipatutako kasuetan, kautelazko neurriak jarri daitezke salaketa edo kereilaren arabera Zigor Kodeko 126. artikuluko zenbatekoak ordaintzeko erantzukizun zuzena edo subsidiarioa izan dezaketen pertsona edo entitateetako edozeinen aurka.

Zerga Administrazioko organo eskudunak kautelazko neurria hartutakoan, interesdunari, Fiskaltzari eta organo judizial eskudunari jakinaraziko zaie, eta neurria bere horretan mantenduko da, harik eta organo judizialak neurri jurisdikzional bihurtzea edo neurria kentzea erabaki arte.»

Hemezortzi.– 89. artikuluko 1. apartatua honela geratzen da idatzita:

«1.– Interesdunek tributuen aplikazioan lagundu dezakete erregelamenduz erabakitzen diren modu eta baldintzen barruan.

Horretarako, Zerga Administrazioak akordioak sinatu ditzake beste herri administrazio batzuekin, erakunde pribatuekin eta gizarte, lan, enpresa edo lanbideetako sektore edo interesen ordezkari diren instituzio edo erakundeekin, eta, bereziki, zerga aholkularitzan jarduten duten profesionalen elkargo eta elkarteekin, azken horien kasuan, zerga betebeharren konplimendu kooperatiboa indartzeko egiten duten lana erraztearren.»

Hemeretzi.– 92. artikuluan, 1. apartatuko n) letra aldatzen da, p) letra gehitzen zaio apartatu horri, eta beste apartatu bat gehitzen da, 4.a. Horren ondorioz, orain arteko 4. eta 5. apartatuak 5. eta 6. apartatuak izatera pasatzen dira. Honela geratu dira idatzita:

«n) Merkataritza, Industria eta Nabigazio ganbera ofizialarekin lankidetzan aritzea, Merkataritza, Industria, Zerbitzu eta Nabigazioko Ganbera Ofizialei buruzko apirilaren 1eko 4/2014 Oinarrizko Legearen 8. artikuluan aipatzen diren erroldak egiteko.»

«p) Aktiboak Berreskuratu eta Kudeatzeko Bulegoarekin lankidetzan aritzea, zigor prozesu batean enbargatutako edo konfiskatutako ondasunak aurkitzeko beharrezkoak diren datu, txosten edo aurrekarien lagapena dela medio.»

«4.– Artikulu honetan datuen inguruan ezartzen den izaera erreserbatuak ez du eragotziko datu horiek publikoak egitea, publikotasun hori Europar Batasuneko arauditik ondorioztatzen denean.»

Hogei.– 95. artikuluaren 9. apartatuko a) letra honela geratzen da idatzita:

«a) Foru arau honen 126. artikuluko 1. apartatuan jasotako kasuetan.»

Hogeita bat.– 100. artikuluko 2. apartatua honela geratzen da idatzita:

«2.– Ebazpena jakinarazi beharra prozeduren gehieneko epearen barruan bete dela jotzeko eta ez bestetarako, nahikoa izango da frogatzea ebazpenaren testu osoa jakinarazteko saiakera bat egin dela.

Jakinarazpenak bitarteko elektronikoz jasotzera behartuta dauden edo hala jasotzea aukeratzen duten pertsona edo entitateen kasuan, prozeduren gehieneko epearen barruan jakinarazteko obligazioa betetzat hartuko da jakinarazpena Gipuzkoako Foru Aldundiaren egoitza elektronikoan jartzen denean.

Erregelamenduz ezartzen diren etenaldi justifikatuak eta Zerga Administrazioari leporatu ezin zaizkion arrazoiengatik prozeduran gertatzen diren atzerapenak ez dira konputatuko ebazteko epean.»

Hogeita bi.– 102. artikuluan 3. apartatua ezabatzen da, eta 2. apartatua aldatzen da, jarraian datorren eran:

«2.– Gastu kengarriak eta egindako kenkariak jarduera enpresarial edo profesionalak egiten dituzten pertsona edo entitateen eragiketengatik sortu badira, ahal dela frogatuko dira eragiketa egin duenak emandako fakturarekin, eta faktura horrek zerga araudiak ezarritako beharkizunak bete beharko ditu.

Aurrekoa gorabehera, faktura ez da eragiketak egiaztatzeko frogabide pribilegiatu bat, eta, beraz, Administrazioak haren eraginkortasuna zalantzan jartzeko arrazoiak baditu, zergapekoari dagokio eragiketak egin izanaren frogak aurkeztea.»

Hogeita hiru.– 5. apartatu bat gehitzen zaio 104. artikuluari, honela dioena:

«5.– Urtebetetik beherako likidazio-aldia duten zerga-betebeharren kasuan, zilegi izango da urteko kuota modu linealean banatzea dagozkion likidazio-aldien artean, baldin eta Zerga Administrazioak, bere esku duen informazioa kontuan hartuta, ezin badu kuota hori likidazio-aldi jakin bati egotzi tributuaren araudia aplikatuta, eta zergapekoak ez badu justifikatzen, horretarako berariaz errekerituta, beste denbora-banaketa bat aplikatu behar dela.»

Hogeita lau.– 108. artikulua honela geratzen da idatzita:

«108. artikulua.–Bertaratuta jakinaraztea.

1.– Interesdunari edo haren ordezkariari ezin bazaio jakinarazpena egin Zerga Administrazioari egotzi ezin zaizkion arrazoiengatik, eta jakinarazpen hori gutxienez bi aldiz saiatu bada egiten, dela interesdunaren zerga helbidean, dela interesdunak adierazitako lekuan –interesdunak berak eskatuta hasi bada prozedura–, saiatutako jakinarazpenen zirkunstantziak jaso beharko dira espedientean. Hartzailea ezezaguna denean helbide edo leku horretan, nahikoa izango da jakinarazpena behin bakarrik egiten saiatzea.

Kasu horretan, interesdunari edo haren ordezkariari deituko zaie jakinarazpena bertaratuta jasotzeko, eta hori egingo da «Gipuzkoako Aldizkari Ofizialean» iragarki bat behin argitaratuz interesdun bakoitzeko.

Aste bakoitzeko astelehen, asteazken eta ostiraletan argitaratuko dira iragarkiak «Gipuzkoako Aldizkari Ofizialean». Iragarki horiek ezagutzen den azken zerga helbideari dagokion udaletxean ere jarri ahal izango dira ikusgai. Ezagutzen den azken helbidea atzerrian badago, iragarkia tokian tokiko kontsuletxean edo enbaxadaren kontsulatu-sailean jarri ahal izango da.

2.– Iragarkian, egiteko dauden jakinarazpenen zerrenda jasoko da, alderdi hauek ere adierazita: zergapekoa edo ordezkaria, jakinarazpena eragin duen prozedura, hura tramitatzen duen organo eskuduna, eta nora eta zein epetan joan behar duen hartzaileak jakinarazpena jasotzera.

Jakinarazpena bertaratuta jasotzeko epea 15 egun naturalekoa izango da beti, iragarkia «Gipuzkoako Aldizkari Ofizialean» argitaratu eta hurrengo egunetik aurrera kontatuta. Aipatutako epea igarotzen bada inor agertu gabe, jakinarazpena adierazitako epea amaitu eta biharamunean egin dela joko da lege ondorio guztietarako.

3.– Prozedura baten hasiera edo haren izapideetako edozein jakinarazitzat jotzen bada zergapekoa edo ordezkaria agertu ez delako, prozedura horren hurrengo egintzak eta eginbideak ere jakinarazi zaizkiola ulertuko da, eta prozeduraren edozein unetan agertzeko duen eskubidea mantenduko zaio. Dena den, prozeduran egiten diren likidazioak eta, egonez gero, enbargatutako ondasunak besterentzeko erabakiak sekzio honetan ezarritakoaren arabera jakinarazi beharko dira.»

Hogeita bost.– 111. artikuluko 1. eta 2. apartatuak honela geratzen dira idatzita:

«1.– Zerga Administrazioak egitateak, egintzak, elementuak, jarduerak, ustiapenak, negozioak, baloreak, eta haiekin lotuta dagoen edozein zirkunstantzia, datu edo dokumentu egiaztatu eta ikertu ditzake, garrantzitsuak gerta daitezkeenean zerga obligazioak betetzen direla ziurtatzeko.

Egiaztapen eta ikerketa horiek egin ahal izango dira haien xede diren ekitaldi, zergaldi edo zerga kontzeptuak foru arau honetako 65.a) artikuluan arautakoaren arabera preskribatuta daudenean ere, baina, orduan, ezinbesteko baldintza izango da egiaztapen edo ikerketa hori beharrezkoa izatea foru arau honetako 65. artikuluan aipatzen diren eta preskribatu gabe dauden eskubideetako bati dagokionez, salbu eta foru arau honetako 65 bis artikuluaren 2. apartatuan aipatzen diren kasuetan, horrelakoetan apartatu horretan ezarritako muga aplikatuko baita.

Zehazki, egiaztapen eta ikerketa horiek zabaldu ahal izango dira aurreko paragrafoan aipatutako 65.a) artikuluaren arabera preskribatutako ekitaldi edo zergaldietan gertatu, gauzatu, bete edo formalizatutako egitate, egintza, jarduera, ustiapen eta negozioetara, baldin eta zerga ondorioak sortu behar badituzte preskripzio hori gertatu ez den ekitaldi edo zergaldietan.

2.– Artikulu honetan aipatzen diren egiaztapen eta ikerketa eginkizunak betetzean, Zerga Administrazioak zilegi izango du kalifikatzea zergapekoak gauzatutako egitate, egintza, jarduera, ustiapen eta negozioak, aintzat hartu gabe zer kalifikazio eman dien aldez aurretik zergapekoak eta kalifikazio hori zer ekitaldi edo zergalditan egin duen. Bidezkoa den kasuetan, foru arau honetako 12., 14. eta 15. artikuluetan xedatutakoa izango da aplikagarria.

Apartatu honetan xedatutakoa aplikatuz Zerga Administrazioak egiaztapen eta ikerketa prozeduretan egiten duen kalifikazioak ondorioak sortuko ditu, halaber, bai haien xede den zerga betebeharrari dagokionez eta, kasua bada, baita foru arau honetako 65.a) artikuluan araututako preskripzioa izan ez duten besteei dagokionez ere.»

Hogeita sei.– 5. apartatua gehitzen zaio 115. artikuluari, honela dioena:

«5.– Tributuak aplikatzeko prozedura batetik ondorioztatzen den likidazioan zilegi da zergapekoak konpentsatu edo kendu gabe dituen kopuruak aplikatzea, baina, ondorio horietarako, tributuak aplikatzeko prozedura behin hasita dagoenean, kopuru horiek ezingo dira aldatu aitorpen osagarriak aurkeztuz edo haiek zuzentzeko eskatuz, betiere tributu bakoitzaren araudian xedatutakoa eragotzi gabe.»

Hogeita zazpi.– 120. artikuluko 1. apartatua honela geratzen da idatzita:

«1.– Aurkeztutako autolikidazioaren emaitza itzultzekoa denean, Zerga Administrazioak bidezko itzulketa egin beharko du foru arau honetako 31. artikuluan ezarritakoari jarraituz.

Autolikidazioa formaz zuzena denean, eskatutako itzulketa beste ezein tramiterik gabe egin ahal izango da, baita modu automatizatuan ere, hala dagokionean.»

Hogeita zortzi.– 121. artikuluko 1. apartatua honela geratzen da idatzita:

«1.– Foru arau honetako 65. artikuluan ezarritako preskripzio epearen barruan, autolikidazio bidez hasitako prozedura amaituko da behin-behineko likidazio batekin, egiaztapen mugatuko prozedura bat hasteagatik edo ikuskapen prozeduretako bat abiatzeagatik, egiaztapen murriztua alde batera utzita.»

Hogeita bederatzi.– 124. artikulua honela geratzen da idatzita:

«124. artikulua.– Aitorpen bidez hasitako prozedura amaitzea.

Foru arau honetako 65. artikuluan ezarritako preskripzio epearen barruan, zergapekoak aurkeztutako aitorpen bidez hasitako prozedura amaituko da behin-behineko likidazio batekin, egiaztapen mugatuko prozedura bat hasteagatik edo ikuskapen prozeduretako bat abiatzeagatik, egiaztapen murriztuko prozedura alde batera utzita.»

Hogeita hamar.– 125. artikulua honela geratzen da idatzita:

«125. artikulua.– Autolikidazio eta aitorpenen berrikuspena.

1.– Zerga Administrazioak autolikidazio edo aitorpenak eta haien euskarri den edo haiei erantsita doan dokumentazioa berrikus ditzake, zerga araudia behar bezala aplikatu den eta adierazitako datuak berak dituenekin bat datozen egiaztatzearren.

2.– Aurreko apartatuan adierazitako ondorioetarako, Administrazioak ahal izango du:

a) Zerga Administrazioaren esku dauden datuak eta aurrekariak aztertu, baldin eta horietan agerian jartzen bada zerga egitatea edo zerga betebehar baten betekizuna gauzatu dela edo, datu edo aurrekari haietatik ondorioztaturik, zerga betebeharra dakarten elementu batzuk aitortu gabe daudela edo ez datozela bat zergapekoak aitortutakoekin.

b) Zergapekoari eskatu, aurkeztutako autolikidazio edo aitorpenetan jaso diren datuak argitzeko edo frogatzeko, baita tributua behar bezala aplikatzeko beharrezkoak diren agiriak aurkezteko ere.

c) Zergapekoak zerga araudiari jarraituz eraman behar dituen liburuak, erregistroak eta beste edozein agiri eskatu, bai eta liburu, erregistro eta dokumentu horietan jasotako eragiketak justifikatzeko fakturak edo agiriak aztertu ere.

d) Balioak egiaztatzeko jarduketak egin.

3.– Prozedura honetan, Zerga Administrazioak ezin izango du eskatu merkataritza kontabilitatearen kopia.

Dena den, prozeduraren barruan zergapekoak, eragiketa jakin batzuen kontabilitatea frogatze aldera, egoki irizten duen kontabilitate dokumentazioa aurkezten badu, horretarako errekerimendurik aldez aurretik jaso gabe, kontabilitate agirietan ageri dena eta Zerga Administrazioak duen informazioan jasotakoa bat datozela egiaztatzeko eta horretarako bakarrik aztertu ahal izango du Zerga Administrazioak dokumentazio hori. Esandako dokumentazioa aztertzeak ez du galaraziko ezta mugatuko ere bertan aipatzen diren eragiketak geroko prozedura batean egiaztatzea.»

Hogeita hamaika.– 126. artikulua honela geratzen da idatzita:

«126. artikulua.–Behin-behineko likidazioak egitea.

1.– Honako kasuotan, Zerga Administrazioak behin-behineko likidazioa egin dezake, likidazio proposamena zergapekoari aurrez zertan jakinarazi gabe:

a) Zergapekoek eskatutako kopuruak itzultzen direnean eta itzulketa hori egiteko foru arau honen 120.1 artikuluko bigarren paragrafoan ezarritakoari jarraitu ez zaionean.

b) Foru arau honetako 122. artikuluan aipatzen den likidazioa egin behar denean, salbu eta Zerga Administrazioak kontuan hartutako datu edo balioak zergapekoaren aitorpenean adierazitakoekin bat ez datozenean. Kasu horretan, likidazio proposamenean berariaz adierazi beharko da zirkunstantzia hori, zergapekoak zuzenbidean dagokiona alega dezan.

c) Zergapekoaren aitorpenak edo autolikidazioak akats formalak edo errore aritmetikoak dituenean.

d) Aitortutako datuak bat ez datozenean zergapeko berberak aurkeztutako beste aitorpenetan jasotakoekin edo Zerga Administrazioaren esku daudenekin, betiere datu horiek hirugarrengoek izaera orokorrez exijitzen diren aitorpenetan eman badituzte, foru arau honetako 90. eta 91. artikuluetan informazioa emateari buruz ezartzen den obligazioa betetzeko.

e) Foru arau honen 128. artikuluko 1. eta 2. apartatuetan aipatzen dituen kasuak direnean eta arau horren 56.1 artikuluko b) letran aurreikusitako bitartekoa aplikatzen denean.

f) Aurkeztutako aitorpenak edo likidazioak edo erakutsitako frogagiriek agerian uzten dutenean araudia ez dela modu egokian aplikatu.

g) Foru arau honetako 154. artikuluan aipatzen den egiaztapen murriztuko prozeduraren ondorio denean.

Dena den, behin-behineko likidazioa ez badator bat egiaztapen murriztuko prozeduran egindako txostenaren konklusioekin, behin-behineko likidazioa egin aurretik, zergapekoari likidazio proposamena jakinaraziko zaio zuzenbidean dagokiona alega dezan.

h) Behin-behineko likidazioa egiten denean foru arau honetako 27. artikuluan aurreikusitako errekarguengatik eta dagozkion berandutze interesengatik, halakorik bada.

2.– Zerga Administrazioak beti arrazoitu behar ditu egiten dituen proposamenak eta behin-behineko likidazioak, baita horietan kontuan izan dituen egitateak eta zuzenbidezko oinarriak labur azaldu ere.

3.– Zerga Administrazioa ohartzen bada berrikusitako autolikidazio edo aitorpenean artikulu honen 1. apartatuko c) eta h) letra bitartean aipatzen diren zirkunstantzietako bat gertatzen dela edo badirela beste zirkunstantzia batzuk behin-behineko likidazioetan kontuan hartu ez direnak, Zerga Administrazioak behin-behineko beste likidazio batzuk egin ahal izango ditu foru arau honetako 65. artikuluan aipatzen den preskripzio epearen barruan.

4.– Aurreko apartatuan aurreikusitakoa ezingo da inolaz ere egin autolikidazio edo aitorpen berberagatik behin betiko likidazioa egin bada foru arau honen 97. artikuluko 3. apartatuan xedatutakoari jarraituz.

Halaber, zerga betebeharrak edo haien elementuak egiaztapen mugatuko prozedura baten barruan sartuta egon badira, haiengatik ere ezingo da behin-behineko beste likidazio bat egin, foru arau honen 134. artikuluko 1. apartatuan xedatutakoa eragotzi gabe.»

Hogeita hamabi.– 127. artikuluko 4. apartatua honela geratzen da idatzita:

«4.– Aurreko apartatuetan xedatutakoa hala izanik ere, Zerga Administrazioak behin-behineko likidazio berriak egin ahal izango ditu foru arau honen 126. artikuluko 3. apartatuan xedatutakoaren arabera.»

Hogeita hamahiru.– 128. artikuluko 1. eta 2. apartatuak aldatzen dira, eta honela geratzen dira idatzita:

«1.– Zerga Administrazioak balioak egiaztatu ditzake foru arau honen 56. artikuluan aurreikusitako bitartekoak erabilita, arau honetan bertan edo tributu bakoitzaren araudian ezarritako eran.

Foru arau honen 126.1 artikuluko e) letran aurreikusitakoa eragotzi gabe, prozedura berariazko jakinarazpen batekin abiaraziko da, edo, behar besteko datuak egonez gero, likidazio proposamena eta artikulu honetako 2. apartatuan aipatzen den balorazioa batera jakinarazita. Nolanahi ere, prozedura foru arau honetako 65. artikuluan aipatzen den preskripzio epearen barruan amaitu beharko da.

2.– Zerga Administrazioak kalkulatutako balioa eta zergapekoak aitortutakoa bat ez badatoz, Administrazioak, egoera erregularizatzeko proposamena jakinaraztearekin batera, egindako balorazioaren berri emango dio zergapekoari, behar bezala arrazoitua, erabilitako bitarteko eta irizpideak ere adieraziz.

Zergapekoek ezin dute aurkeztu balorazioaren aurka errekurtso edo erreklamazio independenterik. Hala ere, zilegi dute perituen tasazio kontrajarria sustatzea edo balorazio horren inguruko arazoak planteatzea erregularizazio egintzaren aurka errekurtso edo erreklamaziorik jartzen duten kasuetan.»

Hogeita hamalau.– 129. artikuluko 1. apartatua honela geratzen da idatzita:

«1.– Interesdunek perituen tasazio kontrajarria sustatu dezakete, foru arau honetako 56. artikuluan balioen egiaztapenerako ezarritako bitartekoak zuzentzeko, epe honen barruan beti: Administrazioak egiaztatutako balioen aurka, edo, zerga araudiak hala ezartzen badu, behar bezala jakinarazitako balioen egiaztapen egintzaren aurka aurkezten den lehen errekurtso edo erreklamazioaren epearen barruan.

Tributu bakoitzaren araudiak hala ezartzen duen kasuetan, interesdunak beretzat gorde dezake tasazio kontrajarria sustatzeko eskubidea, baldin eta irizten badu jakinarazpenak ez duela behar bezala jasotzen zer datu eta arrazoi izan diren aitortutako balioak aldatzeko, eta, horrez gain, omisio hori salatzeko berraztertze errekurtso bat edo erreklamazio ekonomiko-administratibo bat aurkezten badu. Horrelakoetan, zergapekoak hilabeteko epea izango du tasazio kontrajarria sustatzeko, aurretik aurkeztutako errekurtsoa edo erreklamazioa ebazten duen erabakia administrazio-bidean irmo bihurtzen den egunetik aurrera.

Perituen tasazio kontrajarria egiteko eskaera aurkezten bada, edo zergapekoak, aurreko paragrafoan adierazi bezala, beretzat gordetzen badu hura sustatzeko eskubidea, likidazioaren exekuzioa eta haren aurka errekurritu edo erreklamatzeko epea eten egingo dira.

Halaber, interesdunak perituen tasazio kontrajarria egiteko eskatzen badu, etenda geratuko da likidaziotik erator daitekeen zehapen prozedura hasteko epea, edo, prozedura hasita badago, zehapen prozedura amaitzeko gehieneko epea. Perituen tasazio kontrajarriaren prozedura amaitu ondoren, dagokion likidazioaren jakinarazpenean adierazi beharko da foru arau honen 214.2 artikuluan aipatzen den epea osorik hasi behar den zenbatzen jakinarazpen horretatik aurrera, edo, prozedura hasita badago, epea amaitzeko falta den denboratik aurrera.

Perituen tasazio kontrajarria likidazioaren aurka eskatzen den unean zehapena ezarrita badago eta haren ondorioz likidazio berri bat egin bada, orduan, zehapena baliogabetu egingo da, eta beste zehapen bat ezarriko da, likidazio berriaren kuantifikazioa aintzat hartuta.»

Hogeita hamabost.– 130. artikuluko 2. apartatua honela geratzen da idatzita:

«2.– Prozedura horretan, Zerga Administrazioak foru arau honetako 125. artikuluaren 2. apartatuan jasotako jarduketak egin ahal izango ditu, honako hauekin batera:

a) Aztertzea Zerga Administrazioaren esku dauden eta erregularizatu beharreko ondare irabazi justifikatu gabeak daudela agerian jartzen duten datuak eta aurrekariak.

b) Aztertzea merkataritza kontabilitatearen kopia. Horretarako, foru arau honek 125.3 artikuluaren bigarren paragrafoan jasotakoa ere aplikatuko da.

c) Hirugarrengoei errekerimenduak egin, foru arau honetako 90. eta 91. artikuluetan ezarritakoa betez eman behar duten informazioa aurkez dezaten, edo informazio hori bidezko frogagirien bidez berretsi dezaten.»

Hogeita hamasei.– 131. artikuluko 2. apartatua honela geratzen da idatzita:

«2.– Zergapekoei jakinarazi behar zaie egiaztapen mugatuaren jarduketak hasi direla, eta horretarako, komunikazio bat igorri behar zaie bertan adieraziz zer izaera eta hedadura duten jarduketek eta jarduketa horien barruan zer eskubide eta betebeharrak dituzten.

Zerga Administrazioaren esku dauden datuak nahikoak badira likidazio proposamena egiteko, proposamen hori jakinaraziz hasi ahal izango da prozedura.»

Hogeita hamazazpi.– 133. artikuluari 1. apartatuaren b) letra aldatzen zaio, eta 3. apartatu bat gehitzen zaio, honela dioena:

«b) Prozedura iraungiz, behin 9 hilabeteko epea igarota, prozedura hasteko erabakia jakinarazten denetik aurrera; nolanahi ere, horrek ez du eragotziko Zerga Administrazioak prozedura hori berriro hasi ahal izatea preskripzio epearen barruan.»

«3.– Ebazpen judizial edo ekonomiko-administratibo batek akatsak atzeman eta egiaztapen jarduketen atzeraeragina agintzen duenean, jarduketa horiek bukatu beharko dira atzera eraman diren unetik 1.b) apartatuan adierazitako epea bukatu arteko tartean, edo hiru hilabetean, azken epe hori laburragoa bada. Ebazpena exekutatzeko eskumena duen organoak espedientea jasotzen duenetik aurrera hasiko da kontatzen epe hori.»

Hogeita hemezortzi.– 140. artikuluko 4. apartatua honela geratzen da idatzita:

«4.– Zerga izaerako arauek ezarritako erregistro eta dokumentuak edo haiek exijitu eta foru arau honetako 125. artikuluaren 2. apartatuko c) letran eta 130. artikuluaren 2 apartatuko b) letran aipatutako egiaztagiriak direnean, haiek aurkezteko eskatu ahal izango da Zerga Administrazioko bulegoetan aurkeztu daitezela.»

Hogeita hemeretzi.– 145. artikuluko 3. apartatuari c) letra gehitzen zaio, eta honela dio:

«c) Edonola ere, foru arau honetako 248.2 artikuluan xedatutakoaren arabera egiten diren likidazioak behin-behinekoak izango dira beti.»

Berrogei.– 147. artikuluko 4. eta 5. apartatuak honela geratzen dira idatzita:

«4.– Erruduntasun-testigantza jurisdikzio eskudunari pasatzen zaionean edo espedientea Fiskaltzari igortzen zaionean foru arau honek 249. artikuluan jasotakoaren arabera, helarazte horrek ondorio hauek izango ditu ikuskapen jarduketen iraupen epeari dagokionez:

a) Arrazoi justifikatutzat hartuko da jarduketa horien epearen zenbaketa eteteko.

b) Arrazoi izango da epea artikulu honen 1. apartatuan xedatutakoarekin bat luzatzeko, baldin eta administrazio prozedurak aurrera egin behar badu foru arau honen 249. artikuluan adierazitako zioetako bat gertatzeagatik.

5.– Ebazpen judizial edo ekonomiko-administratibo batek edo Ekonomia Itunean aurreikusitako Arbitraje Batzordearen erabaki batek ikuskapen jarduketen atzeraeragina agintzen duenean, jarduketa horiek bukatu beharko dira atzera eraman diren unetik artikulu honetako 1. apartatuan adierazitako epea bukatu arteko tartean, edo sei hilabetean, azken epe hori laburragoa bada. Ebazpena exekutatzeko eskumena duen organoak espedientea jasotzen duenetik aurrera hasiko da kontatzen epe hori.

Espediente hori jasotakoan, zergapekoari jakinarazi behar zaio, dela bidezko komunikazioaren bidez dela egiaztapen eta ikerketa prozeduran sinatzen den lehen eginbidean, zein egunetan jaso den aurreko paragrafoan aipatutako administrazio espedientea edo ebazpen judiziala.

Berandutze interesak eskatuko dira prozedurari amaiera ematen dion likidazio berria dela eta. Berandutze interesa zenbatzen hasteko data foru arau honetako 26. artikuluaren 2. apartatuan jasotakoari jarraituz likidazio baliogabetuari zegokion data bera izango da, eta interesa likidazio berria eman bitartean sortuko da.»

Berrogeita bat.– Honela idatzita gelditzen dira 152. artikuluaren 2. eta 4. apartatuak:

«2.– Aktan formalizatutako erregularizazio proposamena aldatzen bada haren proposamenean jasotakoaren aldean, zergapekoak alegazioak aurkeztu ahal izango dizkio, espedientea aztertu ondoren, ikuskapenean diharduen organoari, hamabost egun naturaleko epean akta egin edo jakinarazi denetik aurrera, edo, bestela, adostasuna eman ahal izango dio proposamenari; azken kasu horretan, izapideak adostasun akta gisa jarraituko du.

Alegazio epe berdina izango du zergapekoak, baldin eta, aktan formalizatutako erregularizazio proposamena akta proposamenean komunikatutakoaren aldean aldatu ez denean, zergapekoak ez badu alegaziorik aurkeztu entzute izapidean.»

«4.– Likidazio egintza eman baino lehen, organo eskudunak erabakia hartu ahal izango du foru arau honetako 151.3 artikuluaren a), b) edo d) letretan jasotako edukietako batzuekin.»

Berrogeita bi.– 153. artikuluko 3. apartatua aldatzen da, eta beste hiru apartatu gehitzen zaizkio artikuluari, 4.etik 6.era, jarraian zehazten den eran:

«3.– Zeharkako zenbatespenaren metodoa aplikatzeko erabiltzen diren datu eta aurrekarien iturriak hauek izan daitezke:

a) Zenbatespen objektiboaren metodorako ezarritako zeinu, adierazle eta moduluak, tributu bakoitzaren araudiak hala ezartzen duenean, zeinak erabiltzekoak izango baitira, batik bat, zergapekoek metodo horri uko egin diotenean edo, horretarako aukera izanik, hura aukeratu ez dutenean. Dena den, Ikuskaritzak egiaztatzen badu jarduera ekonomikoaren etekinak edo kuotak zenbateko handiagokoak direla, azken horiek hartuko dira kontuan erregularizazioa egiteko.

Zeinu, indize eta modulu horiek aplikatu ahal izango dira, Gipuzkoako lurralde historikoko araudian jasotakoari jarraituz aplikagarria ez izan arren, baldin eta beste araudi batek, lurralde erkidekoa izan edo foru lurraldekoa izan, hala aurreikusten badu egiaztapen edo ikerketari lotutako jarduera ekonomikorako.

b) Zergapekoak berak lortutako datu ekonomikoak eta ekoizpen-prozesuaren ondorioz sortutakoak.

Erregularizatutako ekitaldiaren aurreko zein ondorengo ekitaldietako datuak erabili daitezke, ekitaldiotako informazioa nahikotzat eta fidagarritzat jotzen bada. Bereziki, ikuskapen jarduketa garatzen den momentuko informazioa erabili ahal izango da, eta informazio hori aurreko ekitaldiei aplikatu modukotzat hartu ahal izango da, non eta ikuskatzaileek edo zergapekoak ez duten justifikatzen eta kuantifikatzen datu horiek doitu egin behar direla.

Metodo hau zergapekoaren eragiketa homogeneoak kuantifikatzeko aplikatzen bada, eta zergapekoak ez badu ematen horri buruzko informaziorik, informazio okerra ematen badu edo aurkeztutakoa nahikoa ez bada, edo ikusten bada eragiketa horien laginean akatsak agertzen direla behin eta berriro, orduan, zerga ikuskaritzak laginketa bidez erregularizatu ahal izango ditu. Horrelakoetan, egiaztatutako epealdiko eragiketa guztien laginetik lortzen den batez bestekoa aplikatu ahal izango da, salbu eta zergapekoak frogatzen duenean badirela arrazoi bereziak proportzio hori desegokitzat jotzeko.

c) Organismo publikoek edo erakunde pribatuek estatistika teknika egokien bitartez sektoreari buruz egindako azterlanetatik ateratako datuak, erregularizatu behar den epealdiari dagozkionak. Horrelakoetan, azterlanen iturria identifikatuko da, zergapekoak azterlan horien aurrean egoki iruditzen zaiona argudiatu dezan.

d) Ikuskaritzako organoek enpresa, jarduera edo produktuei buruz lortu duten laginaren datuak, urte berberari dagozkionak, enpresa, jarduera edo produktu horiek ezaugarriak esanguratsuak dituztenean eta zergapekoak egiten dituenen parekoak badira. Kasu honetan, Ikuskaritzak aukeratu den lagina identifikatu behar du, zergapekoaren ezaugarrietara egokitzen dela bermatzeko, eta, orobat, adierazi behar du zer erregistro publiko edo iturritatik lortu diren datuak. Erabilitako datuak Zerga Administrazioarenak berarenak badira, lagina egingo da erregelamenduz ezarritakoarekin bat.

4.– Zuzeneko zergen kasuan, salmentak eta prestazioak, erosketak eta gastuak edo jardueraren etekin garbia zehaztuko ahal izango dira zeharkako zenbatespenaren metodoaren arabera. Kontabilitatean edo erregistro fiskaletan ageri diren erosketak eta gastuak behar bezala frogatuta daudela jotzen bada, zilegi izango da zeharkako zenbatespena salmentei eta prestazioei bakarrik aplikatzea. Orobat, erosketei eta gastuei bakarrik aplika dakieke, salmentak eta prestazioak behar bezala frogatuta daudenean.

Kontsumoa zergapetzen den kasuetan, oinarria eta kuota jasanarazia, jasandako kuota kengarria edo bi zenbatekoak zehaztu ahal izango dira zeharkako zenbatespenaren metodoan. Jasandako kuota kengarria kalkulatzeko, salmentak eta prestazioak eskuratzeko normalean beharrezkoak liratekeen ondasun eta zerbitzuei legozkiekeen kuotak zenbatetsi behar dira, baina bakarrik zerga jasanarazi den eta zergapekoak benetan jasan duen zenbatekoan. Zerga Administrazioak ez badu kuoten jasanarazpena argitzeko informaziorik, zergapekoari dagokio behar den informazioa aurkeztea zerga zer pertsona edo entitatek jasanarazi dioten identifikatu eta haren zenbatekoa kalkulatzeko.

Zeharkako zenbatespenaren bidez erregularizatutako ekitaldi batean egindako gastuengatik edo jasandako kuotengatik ezin izango da kenkaririk egin beste ekitaldi batean.

5.– Urtebetetik beherako likidazio-aldia duten tributuen kasuan, Ikuskaritzak urterako zenbatetsitako kuota modu linealean banatuko da dagozkion likidazio-aldien artean, salbu eta zergapekoak justifikatzen duenean beste denbora-banaketa bat aplikatu behar dela.

6.– Zeharkako zenbatespenaren metodoa aplikatzea ekarri zuten zirkunstantziekin lotutako datu, agiri edo frogak honako kasu hauetan bakarrik kontuan hartu ahal izango dira erregularizazioan edo horren aurkako errekurtso edo erreklamazioen ebazpenean:

a) Erregularizazio proposamenaren aurretik aurkezten direnean. Kasu horretan, zirkunstantzia horiek hauteman direnetik datu, agiri edo frogak aurkeztu diren arte igarotako denbora ez da sartuko foru arau honek 147. artikuluan aipatutako epearen konputuan.

b) Zergapekoak frogatzen duenean erregularizazio proposamenaren ondoren aurkeztutako datu, agiri edo frogak ezin izan zirela azaldu prozeduraren barruan. Kasu horretan, jarduketak aipatutako zirkunstantziak hauteman ziren unera atzeratzea aginduko da, foru arau honek 147. artikuluaren 5. apartatuan jasotakoa aplikatuta.»

Berrogeita hiru.– 172. artikulua honela geratzen da idatzita:

«172. artikulua.–Bermeak exekutatzea.

1.– Zerga zorra bermatuta badago, aurrenik bermea exekutatuko da, premiamenduzko prozedura administratiboaren bidez.

Hala ere, Zerga Administrazioak erabaki dezake bermea exekutatu baino lehen beste ondasun edo eskubide batzuk enbargatu eta besterentzea, baldin eta berme hori eta bermatutako zorra proportzionalak ez badira edo zergapekoak hala eskatzen badu horretarako ondasun nahikoak dituela adierazita. Kasu hauetan, emandako bermeak ez du ondoriorik izango enbargoek aseguratutako zatian.

2.– Aurreko apartatuan xedatutakoa hala izanik ere, maila bereko hipotekarekin bermatutako zorren kasuan, Ogasun eta Finantza Departamentuko foru diputatuak, Zerga-bilketako Zuzendariordetza Nagusiari txostena eskatu ondoren, maila berean aseguratutako gainerako hartzekodunekin adostu dezake zer baldintza partikular aplikatu behar diren bermearen exekuzioan, Herri Ogasunaren interesak ahalik eta gutxien kaltetu daitezen.

Orobat, exekuzio hori auzibidetik nahiz auzibidetik kanpo egin ahal izango da, baina, kasu horretan, ezinbestekoa izango da Diputatuen Kontseiluak hala erabakitzea.»

Berrogeita lau.– 184. artikuluko 2. apartatua honela geratzen da idatzita:

«2.– Foru arauetan edo legeetan tipifikatutako ekintzek edo omisioek ez dute sorraraziko zerga arloko arau-haustearen erantzukizunik kasu hauetan:

a) Tributuen arloan jarduteko gaitasunik ez dutenek egiten dituztenean.

b) Ezinbesteko egoera bat gertatzen denean.

c) Talde erabaki baten ondorio direnean, beren botoa salbatu zutenentzat edo erabakia hartu zen bileran izan ez zirenentzat.

d) Zerga obligazioak betetzeko behar adinako arreta jarri denean.

Besteak beste, behar adinako arreta jarri dela ulertuko da zergapekoak araua arrazoizko eran interpretatuz jardun duenean. Bereziki, ulertuko da jarduketa arauaren arrazoizko interpretazio batean oinarritu dela zergadunak ondoko hauek kontuan hartuz jardun duenean:

a’) Foru Auzitegi Ekonomiko-Administratiboaren edo administrazioarekiko auzietako auzitegien ebazpenak, edo Konstituzio Auzitegiaren epaietako eta Europar Batasuneko Justizia Auzitegiaren auto eta epaietako doktrina, funtsean egitate eta zirkunstantzia berdinak gertatzen diren kasuetan.

b’) Ondoko hauek egitean Zerga Administrazioak emandako irizpideak:

– Aitorpenak eta autolikidazioak aurkezteko prestatutako eredu eta gidaliburuetako jarraibideak;

– Foru Arau honetako 81. artikuluan aipatzen diren dibulgazio eta komunikazioak;

– Edo foru arau honetako 83. artikuluaren arabera aurkezten diren zerga kontsulten erantzunak, kontsulta horiek beste zergapeko batzuek aurkeztu dituztenean, funtsean egitate eta zirkunstantzia berdinak dituzten kasuei dagokienez, baldin eta irizpideak aldatu ez badira.

2. apartatu honetan xedatutakoaren ondorioetarako, foru arau honetako 211 bis artikuluan aipatzen diren kasuetan ezingo da ulertuko, kontrakoa frogatu ezean, d) letra honetan adierazitako bi baldintzak betetzen direnik, hau da, zerga obligazioen konplimenduan behar den arretaz jokatzea eta arauaren arrazoizko interpretazio bat egitea.

e) Ekintzak edo omisioak Zerga Administrazioak zerga obligazioak betetzeko eskaintzen dituen programa informatikoen akats batengatik gertatzen direnean.»

Berrogeita bost.– 185. artikulua honela geratzen da idatzita:

«185. artikulua.–Zerga zehapenak ez pilatzeko printzipioa.

1.– Ekintza edo omisio bat arau-hauste bat mailakatzeko irizpide gisa aplikatu behar denean, ekintza edo omisio hori ezin da arau-hauste independente moduan zehatu.

2.– Arau-hauste bat baino gehiago sor dezaketen ekintzak edo omisioak eginez gero, zehapenak guztiengatik jarriko dira.

3.– Zerga arloko arau-hausteen ondorioz ezartzen diren zehapenak bateragarriak dira berandutze interesekin eta epe exekutiboko errekarguekin.»

Berrogeita sei.– 186. artikuluaren 1. apartatuko e) letra honela geratzen da idatzita:

«e) Talde fiskala ordezkatzen duen entitatea, zerga baterakuntzaren araubidean.»

Berrogeita zazpi.– 190. artikuluko 1. eta 2. apartatuak aldatzen dira, eta honela geratzen dira idatzita:

«1.– Arau-hauste bat egiteagatik ezarri den diruzko isuna 30.000 eurokoa edo handiagoa denean eta, zehapena mailakatzeko irizpide gisa, datuak ezkutatzeaz gainera, erabili denean zerga arloko arau-hausteak behin eta berriro egitea –foru arau honetako 191.1.a) artikuluan aipatu bezala–, iruzurrezko baliabideak erabiltzea edo tarteko pertsona baten bidez jokatzea –apartatu bereko b) letra–, zehapen osagarri hauek ere ezarri ahal izango dira:

a) Urtebetetik bi urtera bitartean, ezin jasotzea diru-laguntzak edo laguntza publikoak eta ezin lortzea eskabidezko zerga onurak edo pizgarriak, erregelamenduz erabakitzen den eran.

b) Zehapena ezarri duen herri administrazioarekin kontratatzeko debekua izatea urtebetetik bi urtera bitartean, erregelamenduz erabakitzen den eran.

2.– Arau-hauste bat egiteagatik ezarri den diruzko isuna 60.000 eurokoa edo handiagoa denean eta, zehapena mailakatzeko irizpide gisa, datuak ezkutatzeaz gainera, erabili denean zerga arloko arau-hausteak behin eta berriro egitea –foru arau honetako 191.1.a) artikuluan aipatu bezala–, iruzurrezko baliabideak erabiltzea edo tarteko pertsona baten bidez jokatzea –apartatu bereko b) letra–, zehapen osagarri hauek ere ezarri ahal izango dira:

a) Hiru, lau edo bost urtez ezin jasotzea diru-laguntzak edo laguntza publikoak eta ezin aplikatzea eskabidezko zerga onurak edo pizgarriak, ezarritako zehapenaren zenbatekoa, hurrenez hurren, 60.000, 150.000 edo 300.000 eurokoa edo handiagoa izan denean.

b) Zehapena ezarri duen herri administrazioarekin kontratatzeko debekua izatea, hiru, lau edo bost urtez, ezarritako zehapenaren zenbatekoa, hurrenez hurren, 60.000, 150.000 edo 300.000 eurokoa edo handiagoa izan denean.»

Berrogeita zortzi.– 191. artikuluko 1. apartatua honela geratzen da idatzita:

«1.– Zerga zehapenak irizpide hauen arabera bakarrik mailakatuko dira, aplikagarriak diren heinean:

a) Zerga arloko arau-hausteen errepikapena.

Zirkunstantzia hau gertatuko da subjektu arau-hausleak, arau-haustea egin aurreko lau urteen barruan, beste zehapen bat jaso duenean administrazio bidean hartutako ebazpen irmoaren indarrez, izaera bereko beste arau-hauste batengatik.

Ondorio horietarako, izaera berekotzat joko dira titulu honen III. kapituluko artikulu berean aurreikusitako arau-hausteak. Dena den, foru arau honen 195., 196. eta 197. artikuluetan aurreikusitako arau-hausteak ere izaera berekotzat hartuko dira.

Zirkunstantzia hori gertatzen denean, gutxieneko zehapena 10 eta 30 puntu portzentual bitartean gehituko da, erregelamenduz erabakitzen den eran.

Zehapena ez bada proportzionala, 100eko 100etik 100eko 300era bitartean gehituko da, erregelamenduz erabakitzen den eran.

b) Iruzurrezko bitartekoak erabiltzea edo tarteko pertsona bidez jokatzea.

Hauek hartuko dira iruzurrezko bitartekotzat, erregelamenduz erabakitzen den eran:

– Kontabilitatean eta zerga araudiak ezarritako liburu edo erregistroetan anomalia garrantzitsuak agertzea;

– Faktura, frogagiri edo bestelako agiri faltsu edo faltsutuak erabiltzea, baldin eta agiri edo euskarri faltsu edo faltsutuen eragina zehapenaren oinarriaren 100eko 10etik gorakoa bada;

– Tarteko pertsonak edo entitateak erabiltzea, kasu honetan: subjektu arau-hausleak, bere identitatea ezkutatu nahian, hirugarren baten izenean jartzen dituenean, haren baimenarekin edo hura jaso gabe, ondasun edo eskubideen titulartasuna, berak lortutako errentak edo ondare irabaziak, edo, berak egin dituen eta zerga alorrean garrantzitsuak diren eragiketak, hain zuzen ere zerga obligazioa ez betetzeagatik zehatutako arau-haustea eragin dutenak.

Zirkunstantzia hori gertatzen denean, gutxieneko zehapena 25 eta 100 puntu portzentual bitartean gehituko da, erregelamenduz erabakitzen den eran.

c) Ikuskapen jarduketetan zehar, interesdunak Zerga Administrazioari modu berezian laguntzea, hark nekez lortu ditzakeen eta zerga zorra gehitzea dakarten datuak haren esku jartzen dituelako.

Arau-hauste batean zirkunstantzia hori gertatzen denean, laguntza horregatik gehitutako zenbatekoari aplikatu behar zaion zehapenaren portzentajea 10 eta 30 puntu bitartean murriztuko da, erregelamenduz finkatzen den eran.»

Berrogeita bederatzi.– 5. apartatu berri bat gehitzen zaio 192. artikuluari. Hona hemen haren edukia:

«5.– 1. apartatuan jasotakoa jasota ere, 100eko 40ko murriztapena aplikatu ahal izango da, erregularizaziorik ez izan arren, zehapenari adostasuna ematen zaionean, betiere espresuki hala jasotzen bada zerga araudian. Bereziki, murriztapen hori foru arau honetako 205.2 artikuluaren c) eta d) letretan eta 206.2 artikuluaren b) letraren bigarren paragrafoan jasotako zehapenei aplikatuko zaie.»

Berrogeita hamar.– Paragrafo bat gehitzen zaio 193. artikuluari, 3. apartatuaren amaieran, honela dioena:

«Foru Arau honen 67. artikuluko 10. apartatuan xedatutakoa berdin aplikatuko zaio Zerga Administrazioak zerga zehapenak ezartzeko duen ahalmenari.»

Berrogeita hamaika.– 194. artikuluko 3. apartatua honela geratzen da idatzita:

«3.– Zerga zehapen irmoak honako hauek bakarrik barkatu ditzakete grazia bidez:

a) Diputatuen Kontseiluak, baldin eta barkamen eskaera zerga arloko kudeaketa edo ikuskapen prozedura beretik eratorritako zehapenekin lotuta badago eta haien zenbateko metatua 6.000 eurokoa edo handiagoa bada. Ondoren, Batzar Nagusiei barkamen horren berri emango zaie.

b) Ogasun eta Finantza Departamentuko foru diputatuak, gainerako kasuetan.

Zerga zehapenak barkatzeko beharkizunak eta prozedura erregelamenduz garatuko dira.»

Berrogeita hamabi.– 195. artikulua honela geratzen da idatzita:

«195. artikulua.–Autolikidazio batetik ondorioztatzen den zerga zorra ez ordaintzeagatik egindako arau-haustea.

1.– Zerga arloko arau-haustetzat hartzen da tributuaren autolikidaziotik ateratzen den zerga zorra bere osoan edo zati batean ez ordaintzea tributu bakoitzaren araudian ezarritako epearen barruan, salbu eta foru arau honetako 27. artikuluan xedatutakoaren arabera erregularizatzen denean edo foru arau bereko 165. artikuluaren 1. apartatuko b) letra aplikatzea zilegi denean aurretiazko errekerimendurik egin gabe.

Zerga arloko arau-haustea izango da, halaber, bazkide, oinordeko, komunero edo partaideen zerga zorra bere osoan edo zati batean ez ordaintzea, zor hori errentak esleitzeko araubidean dauden entitateek oker esleitutako edo esleitu gabeko kopuruetatik datorrenean.

2.– Zehapenaren oinarria arau-haustearen ondorioz autolikidazioan ordaindu ez den zenbatekoa izango da.

3.– Zerga arloko arau-hauste hau egiteagatik, 100eko 50etik 100eko 150era bitarteko diruzko isun proportzionala ezarriko da, betiere tartean daturik ezkutatu ez bada.

Hala ere, arau-haustea atxikitako kopuruak, konturako sarrerak edo benetan jasanarazitako tributuak ez ordaintzeagatik gertatzen denean, zehapenaren oinarriaren 100eko 75 eta 100eko 150 bitarteko isuna ezarriko da, betiere tartean daturik ezkutatu ez bada.

4.– Daturik ezkutatu bada, zerga arloko arau-hauste hau egiteagatik 100eko 80tik 100eko 150era bitartezko diruzko isun proportzionala ezarriko da.

Hala ere, arau-haustea atxikitako kopuruak, konturako sarrerak edo benetan jasanarazitako tributuak ez ordaintzeagatik gertatzen denean, zehapenaren oinarriaren 100eko 105 eta 100eko 150 bitarteko isuna ezarriko da.

5.– Zerga Administrazioari datuak ezkutatu zaizkiola ulertuko da autolikidazioak aurkezten ez direnean, edo aurkeztutako autolikidazioetan existitzen ez diren egitateak edo eragiketak sartzen direnean, zenbateko faltsuak aitortzen direnean, edo haietatik kanpo uzten direnean, erabat edo zati batean, eragiketak, sarrerak, errentak, produktuak, ondasunak edo zerga zorraren zehaztapenerako garrantzitsua den beste edozein datu, baldin eta ezkutaketatik ondorioztatutako zorraren eragina zehapenaren oinarriaren 100eko 10etik gorakoa bada.

6.– Zergapekoak berari ez zegokion itzulketa bat jaso badu eta, egindako erregularizazioaren ondorioz, artikulu honetan araututako zehapenetako bat ezartzea badagokio, ordaindu gabeko zenbatekotzat hartuko da bidegabe jasotako itzulketaren zenbatekoari autolikidazioan ordaindu beharreko zenbateko osoa gehitzearen emaitza.

Kasu horietan, foru arau honetako 197. artikuluan aipatzen den arau-haustea, hau da, itzulketa bat bidegabe lortzea, ez da zehagarria izango.

7.– Aurreko apartatuetan jasotakoa gorabehera, zergapekoak ez baditu epe barruan ordaintzen geroago aurkeztuko den autolikidazio batean berak sartutako edo erregularizatutako tributuak edo konturako ordainketak, eta aurkezpen horretan ez badira betetzen foru arau honen 27.4 artikuluak aitorpena epez kanpo eta aurretiazko errekerimendurik gabe aurkezteagatik aurreikusten dituen errekarguak aplikatzeko baldintzak, 100eko 30eko zehapena ezarriko da.

Apartatu honetan ezarritakoa ez da aplikagarria izango baldin eta aurkeztutako autolikidazioan jasotzen diren sarrerak Zerga Administrazioaren aurretiazko errekerimendu bat izan duten kontzeptuei eta zergaldiei badagozkie.»

Berrogeita hamahiru.– 196. artikulua honela geratzen da idatzita:

«196. artikulua.–Likidazioak egiteko behar diren aitorpen edo agiriak osorik eta modu egokian aurkeztu beharra ez betetzeagatik zerga alorrean egindako arau-haustea.

1.– Zerga arloko arau-haustetzat hartzen da ez aurkeztea osorik eta modu egokian Zerga Administrazioak autolikidazio prozedura bidez exijitzen ez diren tributuak behar bezala likidatzeko beharrezkoak dituen aitorpen edo agiriak, salbu eta foru arau honetako 27. artikuluan xedatutakoari jarraituz erregularizatzen denean.

2.– Zehapenaren oinarria likidazioaren zenbatekoa izango da aitorpena aurkeztu ez denean, edo, bestela, tributuaren likidazio egokitik ateratzen den zenbatekoaren eta aitortutako datuen arabera aterako litzatekeenaren arteko aldea.

3.– Zerga arloko arau-hauste hau egiteagatik 100eko 50etik 100eko 150era bitarteko diruzko isun proportzionala ezarriko da, tartean daturik ezkutatu ez bada.

Daturik ezkutatu bada, zerga arloko arau-hauste hau egiteagatik, 100eko 80tik 100eko 150era bitartezko diruzko isun proportzionala ezarriko da.

4.– Zerga Administrazioari datuak ezkutatu zaizkiola ulertuko da aitorpenak aurkezten ez direnean, edo aurkeztutako aitorpenetan existitzen ez diren egitateak edo eragiketak sartzen direnean, zenbateko faltsuak aitortzen direnean, edo haietatik kanpo uzten direnean, erabat edo zati batean, eragiketak, sarrerak, errentak, produktuak, ondasunak edo zerga zorraren zehaztapenerako garrantzitsua den beste edozein datu, baldin eta ezkutaketatik ondorioztatutako zorraren eragina zehapenaren oinarriaren 100eko 10etik gorakoa bada.»

Berrogeita hamalau.– 197. artikulua honela geratzen da idatzita:

«197. artikulua.–Itzulketak bidegabeki lortzeagatik zerga alorrean egindako arau-haustea.

1.– Zerga arloko arau-haustea da tributu bakoitzaren arauditik eratorritako itzulketak bidegabeki lortzea.

2.– Zehapenaren oinarria arau-haustearen ondorioz bidegabeki itzulitako zenbatekoa izango da.

3.– Zerga arloko arau-hauste hau egiteagatik 100eko 50etik 100eko 150era bitarteko diruzko isun proportzionala ezarriko da, tartean daturik ezkutatu ez bada.

Daturik ezkutatu bada, zerga arloko arau-hauste hau egiteagatik 100eko 80tik 100eko 150era bitartezko diruzko isun proportzionala ezarriko da.

4.– Zerga Administrazioari datuak ezkutatu zaizkiola ulertuko da autolikidazioak aurkezten ez direnean, edo aurkeztutako autolikidazioetan existitzen ez diren egitateak edo eragiketak sartzen direnean, zenbateko faltsuak aitortzen direnean, edo haietatik kanpo uzten direnean, erabat edo zati batean, eragiketak, sarrerak, errentak, produktuak, ondasunak edo zerga zorraren zehaztapenerako garrantzitsua den beste edozein datu, baldin eta ezkutaketatik ondorioztatutako zorraren eragina zehapenaren oinarriaren 100eko 10etik gorakoa bada.»

Berrogeita hamabost.– 204. artikulua honela geratzen da idatzita:

«204. artikulua.–Autolikidazioak, aitorpenak edo zerga ondorioak dituzten bestelako agiriak onartutako ereduan edo bitarteko elektroniko, informatiko edo telematiko bidez aurkeztu beharra ez betetzeagatik egindako arau-haustea.

1.– Zerga arloko arau-haustetzat hartzen da autolikidazioak, aitorpenak edo zerga ondorioak dituzten bestelako agiriak aurkeztea Zerga Administrazioak kasu bakoitzerako onartu eta argitaratutakoa ez den ereduan.

Zehapena 100 euroko isun finkoa izango da.

2.– Zerga arloko arau-haustea izango da, halaber, autolikidazioak, aitorpenak eta zerga ondorioak dituzten bestelako agiriak bitarteko elektroniko, informatiko edo telematikoen bidez ez aurkeztea, horretarako obligazioa dagoenean.

Arau-hauste hori 1.500 euroko isun finkoaz zehatuko da.

3.– Dena den, aitorpenak baldin badira foru arau honetako 90. eta 91. artikuluetan ezarritako informazio betebeharra izaera orokorrez betetzeko exijitutakoak, artikulu honetan xedatutakoaren arabera jartzen diren zehapenak 100eko 100 gehituko dira.»

Berrogeita hamasei.– Honela idatzita gelditzen dira 205. artikuluaren 2. apartatuko c) eta d) letrak:

«c) Zerga arauetan ezarritako kontabilitatea, liburu eta erregistroak eraman edo gorde beharra ez betetzea: arau-haustearen ekitaldian arau-hausleak izandako negozio zifraren 100eko 10eko diruzko isun proportzionala, eta gutxienez 15.000 euro. Zergaldi hori urte naturala baino laburragoa izan bada, negozio zifrari dagokion magnitudea urtebetera eramango da.

Ez-betetzea aurreko paragrafoan adierazitako kontabilitate, liburu eta erregistroen euskarri diren programa edo artxibo informatikoak gordetzeko betebeharrari buruzkoa denean, edo erabilitako kodeketa sistemei buruzkoa, aurreko paragrafoan jasotako zehapena izango da aplikagarria.

Zerga Administrazioak egiaztatzen badu fakturazioaren kontrolerako euskarri diren programa edo artxibo informatikoak eta erabilitako kodeketa sistemak suntsitu, ezabatu edo manipulatuak izan direla eta inguruabar hori egiaztapenaren unean amaitu gabe dagoen zergaldi batean gertatu dela, orduan, diruzko isun proportzionala arau-haustea gertatu aurreko ekitaldian arau-hausleak izandako negozio zifraren 100eko 20koa izango da, eta gutxienez 30.000 euro. Aurreko zergaldi hori urte naturala baino laburragoa izan bada, negozio zifrari dagokion magnitudea urtebetera eramango da.

d) Jarduera eta ekitaldi ekonomiko berean kontabilitate desberdinak eramaten badira eta horrek oztopatzen badu zergapekoaren benetako egoera zein den ezagutzea, 30.000 euroko diruzko isun finkoa jarriko da kontabilitatea hala egin den ekitaldi ekonomiko bakoitzeko.»

Berrogeita hamazazpi.– 205. artikuluko 2. apartatuari g) letra gehitzen zaio, eta honela dio:

«g) Erregistro liburuak Gipuzkoako Foru Aldundiaren egoitza elektronikoaren bitartez eramateko obligazioa berandu betetzea, fakturazio erregistroak erregelamenduz ezarritako eran aurkeztuz: erregistratu beharreko fakturaren zenbatekoaren ehuneko 0,5eko diruzko isun proportzionala (gutxienez 300 euro, eta gehienez 6.000 euro, hiruhilekoan).»

Berrogeita hamazortzi.– 206. artikuluaren 2. apartatuko b) letra honela geratzen da idatzita:

«b) Ez-betetzea gertatzen bada fakturak edo frogagiriak egin, bidali edo eman edo gorde ez direlako, arau-haustea eragin duten eragiketen zenbateko osoaren 100eko 2ko diruzko isun proportzionala jarriko da. Ezin denean jakin zein den arau-hausteari dagozkion eragiketen zenbatekoa, zehapena 600 eurokoa izango da faktura edo agiria egin edo gorde ez den eragiketa bakoitzeko.

Zerga Administrazioak egiaztatzen badu bidezko faktura ez dela egin, bidali edo eman, eta inguruabar hori egiaztapenaren unean amaitu gabe dagoen zergaldian gertatu dela, zehapena 1.000 eurokoa izango da faktura egin, bidali edo eman ez den eragiketa bakoitzeko.»

Berrogeita hemeretzi.– Honela idatzita gelditzen da 208. artikulua:

«208. artikulua.–Zerga arau-haustea, Zerga Administrazioaren lanari aurre egin, eragozpen edo aitzakiak jarri edo uko egiteagatik.

1.– Zerga arau-haustetzat hartuko da Zerga Administrazioaren lanari aurre egin, eragozpen edo aitzakiak jartzea edo uko egitea.

Zirkunstantzia hori gertatu dela ulertuko da, arau-hausleak, berari behar bezala jakinarazi ondoren, Zerga Administrazioaren lana luzatu, oztopatu edo eragozteko jarduketak egin dituenean, bere obligazioak betetzeari dagokionez.

Besteak beste, ulertuko da honako portaera hauek Zerga Administrazioaren lanari aurre egitea, eragozpen edo aitzakiak jartzea edo uko egitea direla:

a) Ez erraztea ondoko hauek aztertzea: agiriak, txostenak, aurrekariak, liburuak, erregistroak, fitxategiak, fakturak, frogagiriak eta kontabilitate nagusi eta osagarriko idazpenak, programa eta artxibo informatikoak, sistema eragile eta kontrolatzaileak nahiz zerga arloan garrantzia duen beste edozein datu.

b) Ez erantzutea behar bezala egindako errekerimenduren bati.

c) Ez agertzea aurrez adierazitako tokian eta denboran, arrazoituta dagoenean izan ezik.

d) Uko egitea edo behar ez bezala eragoztea Zerga Administrazioko funtzionarioak finka edo lokaletan sartu edo egoteko aukera, edo zerga betebeharrei lotutako lokal, makina, instalazio eta ustialekuak aztertzeko aukera.

e) Zerga Administrazioko funtzionarioen aurkako mehatxuak.

f) Ez betetzea edo zehaztasunik gabe betetzea zerga-bilketako organoen enbargo eginbideak.

2.– Arau-haustea 300 euroko diruzko isun finkoaz zehatuko da, salbu artikulu honen ondorengo apartatuetan jasotakoa aplikaziozkoa bada.

3.– Baldin eta Zerga Administrazioaren lanari aurre egin, eragozpen edo aitzakiak jarri edo uko egitean errekerimenduei epe barruan erantzuten ez bazaie, diruzko isun finko hauek jarriko dira:

a) 150 euro, errekerimendua lehendabiziko aldiz bete ez denean.

b) 300 euro, errekerimendua bigarren aldiz bete ez denean.

c) 600 euro, errekerimendua hirugarren aldiz bete ez denean.

4.– Baldin eta Zerga Administrazioaren lanari aurre egin, eragozpen edo aitzakiak jarri edo uko egiten bazaio pertsona fisikoen edo entitateen jarduera ekonomikoei dagokienez, isun hauek jarriko dira:

a) 300 euroko diruzko isun finkoa, baldin eta prozeduran agertzen ez bada edo jarduketa administratiboa errazten ez bada edo exijitutako informazioa ematen ez bada horretarako egindako lehendabiziko errekerimenduan emandako epean.

b) 1.500 euroko diruzko isun finkoa, baldin eta prozeduran agertzen ez bada, jarduketa administratiboa errazten ez bada edo exijitutako informazioa ematen ez bada horretarako egindako bigarren errekerimenduan emandako epean.

c) Arau-hausleak arau-haustea egin aurreko urte naturalean izandako negozio zifraren 100eko 2rainoko diruzko isun proportzionala, gutxienez 10.000 eurokoa eta gehienez 400.000 eurokoa, baldin eta prozedurara agertu ez bada edo prozeduran agertzen ez bada, jarduketa administratiboa errazten ez bada edo exijitutako informazioa eman ez bada horretarako jakinarazitako hirugarren errekerimenduan emandako epean.

Erregelamenduz zehaztuko da, aipatutako mugen barruan, zer zehapen jarriko den kasu bakoitzean, aitortu ez diren eragiketek aitortu beharreko zenbateko osoaren gainean hartzen duten portzentajearen arabera.

Baldin eta Zerga Administrazioaren lanari aurre egin, eragozpen edo aitzakiak jarri edo uko egitean errekerimenduei epe barruan erantzuten ez bazaie foru arau honek 90. eta 91. artikuluetan xedatutakoaren arabera izaera orokorrez exijitutako aitorpenetan jaso beharreko informazioari dagokionez, zehapena izango da arau-hausleak arau-haustea egin aurreko urte naturalean izandako negozio zifraren 100eko 3rainoko diruzko isun proportzionala, gutxienez 15.000 eurokoa eta gehienez 600.000 eurokoa.

Erregelamenduz zehaztuko da, aipatutako mugen barruan, zer zehapen jarriko den kasu bakoitzean, aitortu ez diren eragiketek aitortu beharreko zenbateko osoaren gainean hartzen duten portzentajearen arabera.

Baldin eta eragiketen zenbatekoa ezezaguna bada edo errekerimendua magnitude monetarioei buruzkoa ez bada, aurreko bi paragrafoetan jasotako gutxieneko isuna jarriko da, hurrenez hurren.

Zehapen prozedura amaitu aurretik errekerimendu administratiboa erabat betetzen denean, zehapena 6.000 eurokoa izango da.

5.– Baldin eta 1. apartatuko a), b), c), d) eta e) letretan jasotako arau-hausteak egiten dituen zergapekoari egiaztapen eta ikerketa prozedura bat, egiaztapen murriztuko prozedura bat edo egiaztapen mugatuko prozedura bat egiten ari bazaio, isun hauek jarriko dira:

a) Arau-haustea jarduera ekonomikorik egiten ez duten pertsona edo entitateek egina bada eta arau-haustea honelakoa bada:

1. Ez agertzea edo ez erraztea jarduketa administratiboa edo informazioa horretarako emandako epean:

a’) 1.000 euroko diruzko isun finkoa, ez bada betetzen horretarako jakinarazitako lehen errekerimendua.

b’) 5.000 euroko diruzko isun finkoa, ez bada betetzen horretarako jakinarazitako bigarren errekerimendua.

c’) 10.000 euroko diruzko isun finkoa, ez bada betetzen horretarako jakinarazitako hirugarren errekerimendua.

2. Zerga Administrazioko funtzionarioen aurkako mehatxuak egitea, 10.000 euroko diruzko isun finkoa.

b) Ez-betetzea jarduera ekonomikoak egiten dituzten pertsona edo entitateek egina bada eta jarduera horiei buruzko informazioarekin lotuta badago. Isun hauek jarriko dira:

1. Arau-haustea gertatzen bada kontabilitate liburuak, erregistro fiskalak, fitxategiak, programak, sistema operatiboak eta kontrol sistemak ez aurkezteagatik edo horien azterketa ez errazteagatik edo finka edo lokaletako sarrera edo egonaldia edo elementu edo instalazioen azterketa errazteko betebeharra ez betetzeagatik edo Zerga Administrazioko funtzionarioen aurkako mehatxuak egiteagatik, arau-haustearen datan aitorpen epea amaitu zaion azken zergaldian arau-hausleak izandako negozio zifraren 100eko 2ko isun proportzionala, gutxienez 20.000 eurokoa eta gehienez 600.000 eurokoa.

2. Arau-haustea gertatzen bada aurreko 1. zenbakian jasotakoak ez diren datu, txosten, aurrekari, agiri, faktura edo besta frogagiri batzuk ez aurkezteagatik:

a’) 3.000 euroko diruzko isun finkoa, baldin eta prozeduran agertzen ez bada edo exijitutako informazioa ematen ez bada horretarako egindako lehendabiziko errekerimenduan emandako epean.

b’) 15.000 euroko diruzko isun finkoa, baldin eta prozeduran agertzen ez bada edo exijitutako informazioa ematen ez bada horretarako egindako bigarren errekerimenduan emandako epean.

c’) Arau-haustearen datan aitorpen epea amaitu zaion zergaldian arau-hausleak izandako negozio zifraren 100eko 3rainoko diruzko isun proportzionala, gutxienez 30.000 eurokoa eta gehienez 600.000 eurokoa, baldin eta prozeduran agertzen ez bada edo exijitutako informazioa ematen ez bada horretarako jakinarazitako hirugarren errekerimenduan emandako epean.

b) letran aipatutako zergaldia urte naturala baino laburragoa izan bada, negozio zifrari dagokion magnitudea urtebetera eramango da.

Erregelamenduz zehaztuko da, aipatutako mugen barruan, zer zehapen jarriko den kasu bakoitzean, aitortu ez diren eragiketek aitortu beharreko zenbateko osoaren gainean hartzen duten portzentajearen arabera.

Ez bada ezagutzen eragiketen zenbatekoa edo errekerimendua magnitude monetarioei buruzkoa ez bada, b) letra honen 1. zenbakian eta 2. zenbakiko c’) letran jasotako gutxieneko isuna.

Zehapen prozedura amaitu aurretik osorik betetzen direnean apartatu honetan jasotako errekerimendu administratiboak, zehapena aurreko erregelen arabera ateratzen den zenbatekoaren erdira jaitsiko da.

6.– Aurreko apartatuetan ezarritakoa berdin-berdin aplikatuko da aurre egitea, oztopatzea, aitzakiak jartzea edo ezezkoa ematea atzerriko funtzionarioek elkarren laguntzaren esparruan egiten dituzten jarduketak direla-eta egiten badira.

7.– Administrazioaren lanari aurre egin, eragozpen edo aitzakiak jarri edo uko egitean foru arau honek 143., 166. eta 215. artikuluetan jasotakoaren arabera hartutako kautelazko neurriak betetzen ez direnean, zehapena izango da arau-hausleak arau-haustea egin aurreko urte naturalean izandako negozio zifraren 100eko 2rainoko diruzko isun proportzionala, gutxienez 3.000 eurokoa.

8.– Baldin eta, foru arau honek 90.1 artikuluaren c) letran jasotakoari dagokionez, Administrazioaren zordunen funtsak, baloreen edo beste ondasun batzuen gordailuzainek lanari aurre egitea, eragozpen edo aitzakiak jartzea edo uko egitea zerga-bilketako organoek egindako enbargo eginbideak ez betetzeari edo zehaztasunik gabe betetzeari buruzko bada, zehapena efektiboki enbargatu behar izan ziren funts, balore edo ondasunen zenbatekoaren 100eko 25eko diruzko isun proportzionala izango da, gutxienez 1.000 eurokoa.

Zehapen hori aplikagarria izanik ere, erantzukizun solidarioa izango dute foru arau honek 42.4 artikuluaren b) letran xedatutakoaren arabera erruz edo zabarkeriaz enbargo aginduak betetzen ez dituztenek.»

Hirurogei.– Beste artikulu bat gehitzen da, 211.bis artikulua, eduki hau duena:

«211.bis artikulua.– Arau-haustea saiheste fiskalaren aurkako klausularen aplikazioan.

1.– Zerga arloko arau-haustetzat hartzen da zerga betebeharrak ez betetzea foru arau honetako 14. artikuluaren arabera erregularizatutako egintza edo negozioetan egoera hauetako bat gertatu dela egiaztatzen denean:

a) Zerga zor osoa edo haren zati bat tributu bakoitzaren araudiak ezarritako epean ez ordaintzea.

b) Tributu bakoitzaren arauditik ondorioztatutako itzulketa bidegabeki lortzea.

c) Itzulketak, zerga onurak edo zerga-pizgarriak bidegabeki eskatzea.

d) Norberaren zein hirugarrengoen geroko aitorpenen oinarrian edo kuotan konpentsatzekoak edo kentzekoak diren partida positibo edo negatiboak nahiz zerga kredituak bidegabeki zehaztu edo frogatzea.

2.– Aurreko apartatuan aipatzen den ez-betetzea zerga arloko arau-haustea izango da, bakar-bakarrik, baldin eta frogatzen bada erregularizatu beharreko kasuaren eta irizpide administratiboa ezarria duen beste kasu baten edo batzuen artean badagoela berdintasun nabarmena, eta irizpide hori ezagutzera ematen bada, denok jakin dezaten, dagokion aitorpena edo autolikidazioa aurkezteko epea hasi baino lehen.

Ondorio horietarako, irizpide administratibotzat hartuko da foru arau honetako 163.6 artikuluan xedatutakoa aplikatuz ezarritakoa.

Erregelamenduz arautuko da nola eman publikotasuna foru arau honetako 163.6 artikuluan ezarritako irizpenetatik sortzen den irizpide administratiboari.

3.– Honako zehapena ezarriko da:

a) Ordaindu gabeko zenbatekoaren 100eko 50eko diruzko isun proportzionala, 1.a) apartatuan jasotako kasuan.

b) Bidegabeki itzulitako zenbatekoaren 100eko 50eko diruzko isun proportzionala, 1.b) apartatuan jasotako kasuan.

c) Bidegabeki eskatutako zenbatekoaren 100eko 15eko diruzko isun proportzionala, 1.c) apartatuan jasotako kasuan.

d) Bidegabeki zehaztutako edo frogatutako zenbatekoen 100eko 15eko diruzko isun proportzionala, zerga oinarrian konpentsatu edo kendu beharreko kantitateak badira, eta 100ekoa 50ekoa kuotan kendu beharreko partidak edo itxurazko kredituak badira, 1.d) apartatuan jasotako kasuan.

4.– Artikulu honetan erregulatutako arau-hausteak eta zehapenak ez dira bateragarriak izango foru arau honetako 195., 197, 198 eta 199. artikuluetan araututakoengatik zilegi izan litezkeenekin.

5.– Artikulu honetan araututako kasuetan, foru arau honetako 192. artikuluan xedatutakoa aplikatuko da.»

Hirurogeita bat.– 213. artikulua honela geratzen da idatzita:

«213. artikulua.–Zerga zehapenak ezartzeko prozedura.

1.– Zerga arloko zehapen prozedura eta foru arau honetako III. tituluan arautzen diren prozedurak –tributuak aplikatzekoak– bereiz izapidetuko dira, non eta zergapekoak ez duen uko egiten. Hala eginez gero, ukoa berariaz utzi beharko da jasota, eta prozedurak batera izapidetuko baitira.

2.– Foru arau honen 149.1.e) artikuluko bigarren paragrafoan aurreikusitako kasuetan, arau-hausteen inguruko kontuak zergak aplikatzeko prozeduran aztertzeko garaian prozedura horren araudian ezarritakoari jarraituko zaio, erregelamenduz erabakitzen den eran.

3.– Zerga arloko zehapen prozeduran, jakinarazpenak egingo dira foru arau honen III. tituluko II. kapituluaren 3. sekzioan ezarritakoaren arabera.»

Hirurogeita bi.– 219.bis artikulua gehitzen da. Hona hemen bere edukia:

«219.bis artikulua.– Bitarteko elektronikoen bidezko hasiera.

Zerga Administrazioarekin bitarteko elektronikoak erabiliz harremana izatera behartuta daudenek bitarteko horiek erabili beharko dituzte aurreko artikuluan jasotako prozedurak, errekurtsoak eta erreklamazioak hasteko. Obligazio hori bete ezean, eskatuko zaie 15 egun naturaleko epean hutsune hori konpondu dezatela aurkezpen elektronikoaren bidez. Gainera, adieraziko zaie horrela egiten ez badute ulertuko dela prozeduran, erreklamazioan edo erreklamazioan atzera egin dutela, zentzu horretan ebazpena eman ondoren.»

Hirurogeita hiru.– Aldatu egiten da 222. artikuluaren 1. apartatua, eta 6. apartatu berri bat gehitzen da artikulu horretan bertan. Hortaz, 6.etik 9.era bitarteko artikuluak 7.etik 10.era bitartekoak izango dira aurrerantzean:

«1.– Berraztertze errekurtso bidez edo bide ekonomiko-administratiboan inpugnatutako egintzaren exekuzioa automatikoki etenda geratuko da, interesdunak eskatuta, baldin eta egintza horren zenbatekoa, etenak dakartzan berandutza interesak eta bermea exekutatuz gero bidezkoak liratekeen errekarguak bermatzen badira, betiere erregelamenduz jasotzen denari jarraikiz.

Baldin eta zerga zor baten aurka egiten bada, horren exekuzioa automatikoki etenda geratuko da, eta ez da bermerik aurkeztu beharko foru arau honek 218. artikuluaren 2. apartatuan jasotakoaren arabera.

Baldin eta kudeaketa konpartituko zerga bati buruzko egintza zentsal baten aurka egiten bada, inoiz ez da etenda geratuko, horregatik, likidazioaren kobrantzako prozedura. Hala ere, baldin eta arlo zentsalean ematen den ebazpenak likidazio abonatuaren emaitzari eragiten badio, diru sarrerak itzultzeko eskatu ahal izango dira.»

«6.– Foru arau honek 67.10 artikuluan jasotako kasuetan, baldin eta errekurtsoak edo erreklamazioak eragiten badio zergapekoaren aldeko itzulketa baten onarpena ekarri duen zerga zor bati, etena lortzeko aurkeztutako bermeen bitartez bermatu egingo dira errekurtsoa edo erreklamazioa erabat edo partzialki onestearen ondorioz, hala badagokio, itzuli beharko diren diru kopuruak.»

Hirurogeita lau.– Honela idatzita gelditzen da 228. artikuluaren 1. apartatua:

«1.– Okerreko sarrerak itzultzeko eskubidearen aitorpen prozedura ofizioz edo interesdunak eskatuta hasiko da, kasu hauetan:

a) Zerga zorrak edo zehapenak bi aldiz ordaindu direnean.

b) Ordaindutako kopurua handiagoa izan denean administrazio egintza edo autolikidazio bat dela-eta ordaindu beharreko zenbatekoa baino.

c) Zerga zorren edo zehapenen zenbatekoak preskripzio epeak amaitu ondoren ordaindu direnean. Inoiz ez dira itzuliko foru arau honetako 250. artikuluan jasotako borondatezko erregularizazioan ordaindutako zenbatekoak.

d) Zerga araudiak horrela jasotzen duenean.

Erregelamenduz garatuko da apartatu honetan aurreikusitako prozedura, eta horri foru arau honek 227. artikuluaren 2 apartatuan xedatutakoa aplikatu zaio.»

Hirurogeita bost.– Apartatu berri bat sartzen da, 3. apartatua, 231. artikuluan. Hortaz, oraingo 3., 4. eta 5. apartatuak 4., 5. eta 6. apartatuak izango dira aurrerantzean. Hona hemen horien edukia:

«3.– Foru arau honetako 67.10 artikuluaren arabera zergapeko beraren beste zerga betebehar batekin lotuta dagoen zerga betebehar baten likidazioaren aurkako errekurtsoa osorik edo partzialki onesten duen ebazpen bat exekutatzen denean, errekurritu ez den betebehar lotua erregularizatuko da, baldin eta Administrazioak aplikatu badizkio erreklamatu den zerga betebeharraren likidazioaren oinarri izan diren irizpideak edo elementuak.

Erregularizazioaren ondorioz errekurritu ez den betebehar lotuaren likidazioa deuseztatu behar bada eta errekurtsoan ebatzitakoarekin bat datorren beste likidazio bat egin behar bada, aplikatu beharrekoa izango da foru arau honetako 26.5 artikuluan xedatutakoa.»

Hirurogeita sei.– Honela idatzita gelditzen da 236. artikulua:

«236. artikulua.–Erreklamazio ekonomiko-administratiboak metatzea.

1.– Erreklamazio ekonomiko-administratiboak metatu ahal izango dira, horiek tramitatzeko eta ebazteko, kasu hauetan:

a) Interesdun berak zerga berari dagokionez aurkeztu dituenean, erreklamazioak prozedura beretik eratorriak badira.

b) Hainbat interesdunek zerga berari dagokionez aurkeztu dituztenean, betiere espediente beretik eratortzen badira eta arazo berdinei buruzkoak badira.

c) Hainbat interesdunek administrazio egintza beraren aurka edo partikularren zerga jarduketa beraren aurka jarritako erreklamazioak.

2.– Nolanahi ere, zehapen baten aurkako erreklamazioa metatuta geldituko da, baldin eta hori dakarren zerga zorraren aurkako erreklamazioa aurkeztu bada.

3.– Aurreko zenbakietan jasotako kasuetatik kanpo, Auzitegiak metatu ahal izango ditu, ofizioz edo alde baten eskariz eta arrazoituta, bere ustez batera ebatzi beharrekoak diren eta zerga berari edo desberdinei eragiten dieten erreklamazioak, betiere haien artean loturarik badago. Erreklamatzaileak hainbat badira eta horiek hala eskatu ez badute, aurretik 15 eguneko epea eman beharko zaie, metaketaren egokitasunari buruz egoki deritzotena adierazi dezaten.

Apartatu honetan aipatutako metaketak ondoriorik gabe gelditu ahal izango dira, Auzitegiak erreklamazioak aparte ebaztea komenigarritzat hartzen duenean.

4.– Metaketari buruzko erabakiak edo metaketa bat ondoriorik gabe uzten duten erabakiak tramite egintzatzat hartuko dira, eta ezin ezingo dira erreklamatu.

5.– Aurreko apartatuetan jasotakoa aplikagarria izango da erreklamazio bakarra jartzen denean egintza edo jarduketa batzuen aurka.»

Hirurogeita zazpi.– Honela idatzita gelditzen da 239. artikulua:

«239. artikulua.–Arau orokorrak.

1.– Egiaztatutzat hartuko da borondatezko ordezkaritza, foru arau honek 46.2 artikuluan jasotako bideetako bat aurkeztu beharrik gabe, ordezkaritza lehendik egiaztatua izan denean Zerga Administrazioaren aurrean egintza inpugnatuari lotutako prozeduran.

2.– Prozedura ofizioz bultzatuko da jasotako epeak betez; epe horiek ezin izango dira luzatu eta haien amaiera ez da ohartarazi beharko, salbu eta foru arau honek 241.1 artikuluan jasotako kasuan.

3.– Interesdunei eragiten dieten edo erreklamazio ekonomiko-administratiboa amaitzen duten egintza eta ebazpen guztiak jakinarazi beharko dira, bai bitarteko elektronikoz bai adierazitako helbidean bai, horrelakorik ez badago, foru arau honek 108. artikuluan jasotakoaren arabera.

Jakinarazpena derrigorrez elektronikoki egingo zaie Gipuzkoako lurralde historikoko Zerga Administrazioarekin bitarteko elektronikoez harremana izatera behartuta dauden interesdunei.

Jakinarazpenean ebazpenaren testu osoa jaso beharko da, eta bidezko errekurtsoak, aurkezpen organoak eta epea zehaztu beharko dira. Halere, horrek ez du eragotziko interesdunek egoki deritzoten beste edozein errekurtso aurkeztea.

4.– Prozedura ekonomiko-administratiboa doakoa izango da. Dena den, erreklamazioa edo errekurtsoa ezesten bada edo onartua ez bada eta Foru Auzitegi Ekonomiko-Administratiboak ausarkeria edo fede txarra hautematen badu, ausarkeria edo fede txarra egozten zaion pertsonari exijitu ahal izango dio prozeduraren kostuak ordain ditzala, erregelamenduz jasotzen diren irizpideei jarraituz.

Kostuetako kondena horretarako ematen den ebazpenean ezarriko da, eta berariaz aipatuko da zer dela-eta hauteman duen Auzitegiak ausarkeria edo fede txarra eta zenbatekoa den kondena.

5.– Prozedura ekonomiko-administratiboa kapitulu honetako xedapenetan eta hura garatzeko ematen diren erregelamenduzko xedapenetan jasotakoaren arabera erregulatuko da.»

Hirurogeita zortzi.– Honela idatzita gelditzen da 240. artikulua:

«240. artikulua.–Prozedura hastea.

1.– Erreklamazio ekonomiko-administratiboa Foru Auzitegi Ekonomiko-Administratiboan aurkeztu behar da hilabeteko epean, inpugnaturiko egintza jakinarazi ondorengo egunetik aurrera edo, bestela, atxikipena edo konturako sarrera egin edo omititu dela, erreklamazioa eragin duen zerga jasanarazpena gertatu dela edo ordezkoaren eta zergadunaren arteko harremanen ondorioz eratorritako ordezkapena izan dela jasota geratu ondorengo egunetik aurrera.

Erreklamazio ekonomiko-administratiboa aurkeztu ahal izango da, baita ere, isiltasun administratiboaren ondorioak gertatu ondorengo egunetik aurrera. Erreklamazioa aurkeztu ondoren eta hori ebatzi aurretik berariazko ebazpena ematen bada, Auzitegira bidaliko da, behin interesdunari jakinarazi ondoren.

Jakinarazpenaren bidez, ohartaraziko da ebazpen espresua bide ekonomiko-administratiboan inpugnatutzat hartuko dela, haren edukiaren arabera, edo prozedura amaituko duela auzia prozesutik kanpo betetzeagatik –egoera hori Auzitegiak deklaratuko du–.

Baldin eta enpresari eta profesionalek faktura egin eta emateko betebeharrari buruzko erreklamazioak badira, aurreko paragrafoan aipatutako epea kontatzen hasiko da obligazio hori betetzea formalki eskatu eta hilabetea igaro denetik.

Aldizkako epemuga duten eta taldeka jakinaraztekoak diren zorren kasuan, errekurtsoa borondatez ordaintzeko epean edo hori amaitu ondorengo egunetik aurrera kontatuko den hilabeteko epean aurkeztu ahal izango da.

2.– Prozedura Auzitegiari zuzendutako idatziaren bidez hasiko da eta, erreklamatzailea, auzipeko egintza edo jarduketa eta helbidea jasotzearekin batera, egoki iritzitako alegazio eta frogak aurkeztu ahal izango dira. Dena den, erreklamatzailea beretzat gorde ahal izango du horiek zabaltzeko eskubidea, behin espedientea aztertuta, alegazio tramitea espresuki eskatzen duenean.

Baldin eta erreklamazioek hartzen badituzte atxikipenak, konturako sarrerak, jasanarazpenak, faktura egin eta emateko betebeharra eta ordezkoaren eta zergadunaren arteko harremanak, idatzian identifikatu behar dira auzipeko pertsona eta haren helbidea ere, eta erreklamatzailearen esku dauden edo erregistro publikoetan dauden aurrekari guztiak erantsiko dira.

3.– Erreklamazioa Gipuzkoako Foru Aldundiaren egoitza elektronikoaz aurkeztuko da derrigorrez, erreklamatzaileak derrigortuta daudenean Gipuzkoako lurralde historikoko Zerga Administrazioarekin harreman elektronikoa izatera.»

Hirurogeita bederatzi.– Honela idatzita gelditzen da 241. artikuluaren 1. apartatua:

«1.– Behin espedientea jasota eta, hala badagokio, amaituta, Foru Auzitegi Ekonomiko-Administratiboak hura ikusgai jarriko die erreklamazioan agertu eta erreklamazio idatzian alegaziorik aurkeztu ez duten edo, aurkeztu arren, izapide horren eskaera espresuarekin batera formulatu dituzten interesdunei, hilabeteko epean oro har. Alegazio idatzia aurkeztu beharko dute epe horretan, bidezko frogekin batera.

Espediente elektronikoa bitarteko elektronikoen bitartez jarri ahal izango da ikusgai, eta bitarteko horiek ere erabili ahal izango dira alegazioak eta frogak aurkezteko. Erreklamazioa elektronikoki aurkeztera behartutakoek bide hori bera erabili beharko dute alegazioak, frogak eta beste edozein idatzi aurkezteko. Tramitea elektronikoki egitea eragozten duen akats teknikoa gertatu eta Zerga Administrazioari leporatu ahal bazaio, Auzitegiak neurri egokiak hartuko ditu interesdunari kaltea saiheste aldera, besteak, beste: beste epe bat jarri, aurreko epea luzatu edo beste bitarteko batzuk erabiliz egitea baimendu.»

Hirurogeita hamar.– 3. apartatu bat gehitzen zaio 242. artikuluari, honela dioena:

«3.– Erregelamenduz garatuko da judizio aurreko arazoak Europar Batasuneko Justizia Auzitegian aurkezteko prozedura. Interesdunek erreklamazio ekonomiko-administratiboan judizio aurreko arazoa planteatzeko eskatu ez dutenean, planteamendua aurkeztu aurretik hamabost eguneko epea emango zaie interesdun horiei, alegazioak egin ditzaten. Baina alegazio horiek bakarrik izango dira judizio aurreko arazoa planteatzearen egokitasunari buruz.

Halakoetan, judizio aurreko arazoa aurkeztu aurretik, Auzitegiak hamabost eguneko epea emango dio egintzaren egile den organo administratiboari, alegazioak egin ditzan.

Europar Batasuneko Justizia Auzitegian judizio aurreko arazo bat aurkeztu bada (aurreko paragrafoetan ezarritakoarekin bat), eten egingo da prozedura ekonomiko-administratiboa, haren hasieratik judizio aurreko arazoa ebazten duen ebazpena jaso arte. Halaber, etenda geratuko da beste prozedura ekonomiko-administratibo batzuen izapidetzea, prozedura horiek ebazteko beharrezkoa bada aurkeztutako judizio aurreko arazoaren emaitza ezagutzea. Etendura hori prozedura ekonomiko-administratiboko interesdunei jakinaraziko zaie, eta, haren ondorioz, foru arau honetako 65. artikuluak ezarritako eskubideen preskripzio epearen konputua ere etenda geratuko da. Etenduraren ondoren, planteatutako arazoaren ebazpena Foru Auzitegi Ekonomiko-Administratiboan jasotzen denean hasiko da berriro konputatzen epea.»

Hirurogeita hamaika.– Honela idatzita gelditzen da 243. artikuluaren 2. apartatua:

«2.– Baldin eta erreklamatzailea uko egin edo atzera egiten badu, auzialdia iraungi edo prozesutik kanpo gogobetetzen bada, Auzitegiak erabaki behar du, behar bezala arrazoituta, jarduketak artxibatzea. Auzitegiko kideek banaka hartu ahal izango dute erabaki hori, foru arau honek 237. artikuluaren 4. apartatuan jasotakoari jarraituz.

Jarduketak artxibatzeko erabakia foru arau honek 245. bis artikuluan jasotakoaren arabera berrikusi ahal izango da.»

Hirurogeita hamabi.– Aldatu egiten dira 244. artikuluaren 3., 5. eta 6. apartatuak, eta 7. apartatu berri bat sartzen da, oraingo 7. apartatua 8. apartatu bihurtuta. Hona hemen haien idazkerak:

«3.– Ebazpena onespenekoa edo ezespenekoa izan daiteke, edo onartezintasuna adierazi ahal izango du. Onespeneko ebazpenean, auzipeko egintza erabat edo zati batean deuseztatu ahal izango da, funtsezko zuzenbideari lotutako arrazoiak edo akats formalak direla eta.

Baldin eta ebazpenean hautematen badira erreklamatzailearen defentsa aukerak ahuldu dituzten akats formalak, egintza deuseztatu behar da akatsak eragindako zatian, eta jarduketak akats formala gertatu zen unera atzeratzea aginduko da.

Aurreko paragrafoan aipatutako kasuan izan ezik, exekuzio egintzak –erabakien ondoriozko likidazioak barne– ez dira izango inpugnatutako egintza eman den prozeduraren parte.

Atzeraeragin kasuetan izan ezik, ebazpena exekutatzearen ondoriozko egintzak jakinarazi egin behar izango dira, hilabeteko epean, ebazpen hori haren exekuziorako eskumena duen organoaren erregistroan sartzen denetik aurrera. Ez da berandutze interesik exijituko Administrazioak hilabeteko epea betetzen ez duenetik aurrera.»

«5.– Ematen den ebazpenak eraginkortasun osoa izango du erreklamazioaren berri eman zaien interesdunei dagokienez. Auzitegiak foru arau honeako 233.4 artikuluan aipatutako partikularren jarduketei edo ez-egiteei buruzko erreklamazioetan ematen dituen ebazpenek lotu egingo dute Zerga Administrazioa, ebazteko kontuan hartu diren egitateen kalifikazio juridikoari dagokionez, egiaztatzeko eta ikertzeko ahalmenak eragotzi gabe. Horretarako, ebazpenok jakinarazi egin behar izango zaizkio Zerga Administrazioari.

6.– Legez ezarritako epean ez bada betetzen faktura egiteko betebeharra ezartzen duen Auzitegiaren ebazpena, orduan, erreklamatzaileak eragiketa dokumentatzen duen faktura egin ahal izango du, erreklamatuaren izenean eta kontura. Horretarako, arau hauei jarraituko zaie:

1. Faktura egiteko ahalmenaren erabilera idatziz jakinarazi behar zaio Auzitegiari, eta hari adierazi epaia ez dela bete eta dagokion faktura egingo dela. Halaber, erreklamatzaileak jakinarazi behar dio erreklamatuari ahalmen hori erabili egingo duela faktura jaso izana egiaztatzen duen edozein bitarteko erabiliz.

2. Erreklamatzaileak prestatuko du eragiketa dokumentatzen duen faktura; bertan, eragiketaren jasotzaile gisa agertuko da, eta betebeharra bete ez duena, berriz, fakturaren egile gisa.

3. Erreklamatzaileak fakturaren kopia bidaliko dio erreklamatuari, eta bere esku geldituko da jatorrizko faktura. Halaber, Ogasun eta Finantza Departamentuari bidaliko dizkio fakturaren kopia eta Auzitegian aurkeztutako idazkia, non jakinarazi baitzen ez zela bete emandako ebazpena.

7.– Zergapeko beraren beste zerga betebehar batekin lotuta dagoen zerga betebehar baten likidazioaren aurkako erreklamazioa osorik edo partzialki onesten duen ebazpen bat exekutatzen denean, erregularizatu egingo da errekurritu ez den betebehar lotua, foru arau honetako 67.10 artikuluaren arabera, baldin eta Administrazioak aplikatu badizkio erreklamatu den zerga betebeharraren likidazioaren oinarri izan diren irizpideak edo elementuak.

Erregularizazioaren ondorioz errekurritu ez den betebehar lotuaren likidazioa deuseztatu behar bada eta Auzitegiak ebatzitakoarekin bat datorren beste likidazio bat egin behar bada, aplikatu beharrekoa izango da foru arau honetako 26.5 artikuluan xedatutakoa.»

Hirurogeita hamahiru.– Honela idatzita gelditzen da 245. artikuluaren 1. apartatua:

«1.– Gehienez urtebete iraungo du prozedurak, erreklamazioa aurkezten denetik aurrera. Epe hori bukaturik, interesdunak ezetsitzat jo dezake erreklamazioa, bidezko errekurtsoa jartzeko.

Auzitegiak espresuki ebatzi behar du beti. Errekurtsoak aurkezteko epeak ebazpen espresua jakinarazi ondorengo egunetik aurrera hasiko dira.

Apartatu honen lehen paragrafoan eta foru arau honetako 242. artikuluaren 3. apartatuan jasotakoa eragotzi gabe, Auzitegiak uste badu auzipeko egintzak egon daitezkeela beste esparru edo jurisdikzio batzuetan bideratutako prozeduretan eman gabe dauden ebazpenen eraginpean, erabaki dezake, arrazoituta eta interesdunari entzutea eman ondoren, haiei buruzko jarduketak geldiaraztea eta ebazteko epearen eta foru arau honetako 65. artikuluan jasotako preskripzio aldiaren konputua etetea, harik eta haiek amaitu arte.»

Hirurogeita hamalau.– Beste artikulu bat gehitzen da, 245.bis. Hona hemen bere edukia:

«245.bis artikulua.– Deuseztatze errekurtsoa.

1.– Erreklamazio ekonomiko-administratiboen aurka, administrazioarekiko auzi errekurtsoa aurkeztu aurretik eta hori jartzeko epeari eragin gabe, interesdunek deuseztatze errekurtsoa jarri ahal izango dute Foru Auzitegi Ekonomiko-Administratiboaren aurrean, 15 eguneko epean ebazpena jakinarazi eta biharamunetik aurrera, kasu hauetan bakarrik:

a) Behar ez bezala deklaratu denean erreklamazioa onartezina dela.

b) Deklaratu denean ez direla baliogarriak bide ekonomiko-administratiboan behar den moduan aurkeztutako alegazioak edo frogak.

c) Alegatzen denean ebazpenean erabateko eta ageriko inkongruentzia dagoela.

2.– Foru arau honetako 243. artikuluan aipatzen den jarduketak artxibatzeko erabakiaren aurka ere jarri ahal izango da deuseztatze errekurtsoa, aurreko 1. apartatuaren lehen paragrafoan jasotakoaren arabera.

3.– Auzitegiak deuseztatze errekurtsoaren onartezintasuna deklaratuko du, aurreko apartatuetan jasotako kasuetako bat ez denean, errekurtsoa epez kanpo aurkezten denean edo legitimazio edo ordezkaritza akatsak gertatzen direnean.

4.– Deuseztatze errekurtso baten ebazpenaren aurka ezin izango da beste deuseztatze errekurtso bat jarri. Deuseztatze errekurtsoa ezin izango da aurkeztu berrikuspen errekurtso berezi baten ebazpenaren aurka.

5.– Errekurtsoaren idatzian alegazioak jaso behar dira, eta bidezko frogak aurkeztuko dira. Auzitegiak hilabeteko epean ebatziko du, izapide gehiago egin gabe; ebatzi ezean, errekurtsoa ezetsi dela ulertuko da.»

Hirurogeita hamabost.– Beste artikulu bat gehitzen da, 245.ter. Hona hemen bere edukia:

«245.ter artikulua.– Exekuzioaren aurkako errekurtsoa.

1.– Ebazpen ekonomiko-administratiboak exekutatzeko egintzek zehatz beteko dute ebazpenetan xedatutakoa.

2.– Interesduna ebazpen ekonomiko administratiboa exekutatzeko emandako egintzekin ados ez dagoenean, exekuzioaren aurkako errekurtsoa aurkeztu ahal izango du.

3.– Foru Auzitegi Ekonomiko-Administratiboak izango du errekurtso honen berri izateko eskumena. Emandako ebazpenean jaso ahal izango da zehazki nola jokatu beharko den epaia behar bezala betetzeko.

4.– Errekurtso hau aurkezteko epea hilabetekoa izango da, inpugnatutako egintza jakinarazi eta biharamunetik aurrera. Auzitegiak sei hilabeteko epean ebatziko du. Epe hori ebazpen espresurik eman gabe igaroz gero, interesdunak ulertu dezake errekurtsoa ezetsita dagoela.

5.– Inola ere ez da onartuko errekurritutako egintzen etendura, ez bada gai berririk planteatzen exekutatu beharreko ebazpen ekonomiko-administratiboari dagokionez.

6.– Ezin izango da berraztertze errekurtsoa aurkeztu exekuzioaren aurkako errekurtsoaren aurretik.

7.– Auzitegiak exekuzioaren aurkako errekurtsoa onartezina dela deklaratuko du, honako kasu hauetan: errekurtsoan planteatutako gaiak exekutatu beharreko ebazpenean dagoeneko erabakita dauden arazoekin lotuta daudenean edo exekutatu beharreko ebazpenari lotutako erreklamazioan planteatu direnean edo foru arau honetako 244.4 artikuluan aipatutako kasuetako bat gertatzen denean.»

Hirurogeita hamasei.– Honela idatzita gelditzen da 246. artikuluaren 5. apartatua:

«5.– Berrikuspen errekurtso berezia sei hilabeteko epean ebatziko da. Epe hori ebazpen espresurik eman gabe igaroz gero, interesdunak ulertu dezake errekurtsoa ezetsita dagoela.»

Hirurogeita hamazazpi.– Titulu berri bat sartzen da, VI.a. Hona hemen bere edukia:

«VI. TITULUA

Tributuak aplikatzeko jarduketak eta prozedurak Herri Ogasunaren aurkako delitua dagoenean

248. artikulua.– Likidazioak egitea Herri Ogasunaren aurkako delitu baten zantzuak daudenean.

1.– Zerga Administrazioak Herri Ogasunaren aurkako delitu baten zantzuak antzematen dituenean, prozedura izapidetzen jarraituko da, kasuan-kasuan aplikatu beharreko arau orokorren arabera eta titulu honetan ezarritako arauei jarraituz, eragotzi gabe erruduntasun testigantza jurisdikzio eskudunari pasatzea edo espedientea Fiskaltzari bidaltzea.

Ondorengo artikuluan adierazitako kasuetan izan ezik, egiaztatu behar diren zerga betebeharraren elementuen likidazioa eman beharko da; likidazio desberdinetan jasoko dira Herri Ogasunaren aurkako ustezko delituari lotutako elementuak eta Herri Ogasunaren aurkako ustezko delituari lotuta ez daudenak.

2.– Titulu honetan ezartzen denera egokituko da Herri Ogasunaren aurkako ustezko delituari lotuta dauden zerga betebeharraren elementuak direla-eta ematen den likidazioa.

Apartatu honetan adierazitako kasuetan, Zerga Administrazioak ez dio hasiera edo, hala badagokio, jarraipena emango egitate horiei dagokien zehapen prozedurari. Zehapen espediente bat hasi bada eta aurretik amaitu ez bada, prozedura hori amaitutzat joko da, betiere, erruduntasun testigantza jurisdikzio eskudunari pasatu edo espedientea Fiskaltzari bidaltzen zaionean; hala ere, beste zehapen prozedura bat has liteke apartatu honetako azken paragrafoan jasotako kasuetan.

Agintaritza judizialaren kondena epaiak eragotziko du egitate berak direla-eta administrazio zehapena ezartzea.

Deliturik ez dagoela ikusten badu, Zerga Administrazioak, dagokion unean, zehapen prozedura administratiboa abiaraziko du, auzitegiek frogatutzat jo dituzten egitateekin bat.

3.– Herri Ogasunaren aurkako delituari lotu gabeko tributu elementuak direla-eta ematen den likidazioaren izapidetzea foru arau honetako III. tituluaren IV. kapituluan xedatutakoaren arabera dagokion prozedura arruntera egokituko da, eta haren V. tituluan ezarritako berrikuspen araubidearen mende egongo da.

249. artikulua.– Likidazioak egitetik salbuestea Herri Ogasunaren aurkako delitu baten zantzuak daudenean.

1.– Zerga Administrazioak ikusten badu Herri Ogasunaren aurkako delitu baten zantzuak daudela, erruduntasun testigantza jurisdikzio eskudunari pasatuko dio edo espedientea Fiskaltzari bidaliko dio, eta ez du egingo foru arau honetako 248.2 artikuluan adierazitako likidazioa, kasu hauetan:

a) Likidazio administratiboa izapidetzeak delituaren preskripzioa ekar badezake Zigor Kodeko 131. artikuluan ezarritako epeen arabera.

b) Ikerketa edo egiaztapenaren ondorioz, likidazioaren zenbatekoa zehaztu ezin bada edo likidazioa ezin bazaio zergapeko konkretu bati egotzi.

c) Likidazio administratiboak moduren batean kaltetu badezake iruzurra ikertzea edo egiaztatzea.

Gorago aipatutako kasuetan, Zerga Administrazioak aurkeztutako salaketa edo kereila idazkiarekin batera, erabaki arrazoitu bat bidaliko da, likidaziorik ez emateko erabaki administratiboa hartzea dakarten inguruabarretako bat gertatzen dela justifikatzeko.

Kasu honetan, zergapekoari ez zaio aukerarik emango entzunaldirako edo alegazioak egiteko.

2.– Aurreko apartatuan jasotako kasuetan, Administrazioak ez dio hasiera edo, hala badagokio, jarraipena emango administrazio prozedurari; beraz, prozedura etenda geratuko da agintaritza judizialak epai irmoa eman arte, jarduketen largespena edo artxibatzea gertatu arte edo Fiskaltzak espedientea itzuli arte.

Hala ere, zehapen prozedura bat hasi bada, prozedura edozein kasutan amaitutzat joko da erruduntasun testigantza jurisdikzio eskudunari pasatu edo espedientea Fiskaltzari bidaltzen zaionean. Nolanahi ere, aukera egongo da beste zehapen prozedura bat hasteko, baldin eta azkenean deliturik ez dagoela ikusten bada, auzitegiek kasuan-kasuan frogatutzat jotzen dituzten egitateekin bat.

Erruduntasun testigantza jurisdikzio eskudunari pasatzearekin edo espedientea bidaltzearekin batera, etenda geratuko dira zerga zorra zehaztu eta zehapena jartzeko eskubidearen preskripzio epeak, foru arau honek 67.1 eta 193.3 artikuluetan jasotakoaren arabera.

Agintaritza judizialaren kondena epaiak eragotziko du egitate berberak direla-eta administrazio zehapena ezartzea.

Salatutako egitateak direla-eta egiaztapen eta ikerketa prozeduraren jarduketak eten aldiaren barruan egiten badira, jarduketek ez dute inolako baliorik izango.

3.– Aurreko kasuetan, deliturik ez dagoela uste badu, Zerga Administrazioak hasiera edo jarraipena emango die jarduketei. Horretarako, kontuan hartuko ditu jurisdikzio organoek foru arau honetako 147.1 artikuluan aipatzen den epea amaitu bitarteko aldian edo 6 hilabeteko epean (azken epe hau luzeagoa bada) frogatutzat jotako egitateak. Epea zenbatzen hasiko da prozedurari jarraipena eman behar dion organo eskudunak ebazpen judiziala edo Fiskaltzak itzulitako espedientea jasotzen duenetik aurrera.

Preskripzio epeak berriro zenbatzen hasiko dira foru arau honetako 67.7 artikuluan jasotakoaren arabera.

250. artikulua.– Borondatezko erregularizazioa.

Zerga Administrazioak ez dio erruduntasun testigantza jurisdikzio eskudunari pasatuko edo Fiskaltzari espedientea bidaliko, salbu eta egiaztatu bada zergapekoak ez duela bere zerga egoera erregularizatu. Egoera erregularizatuta egoteko, zerga zorra erabat onartuta eta ordainduta egon behar da, zerga zorra zehazteko egiaztapen eta ikerketa jarduketak hasiko direla jakinarazi aurretik edo, jarduketa horiek hasi ez badira, Fiskaltzak edo Zerga Administrazioaren prozesuko ordezkariak zergapekoaren kontrako kereila edo salaketa jarri aurretik, edo Fiskaltzak edo instrukzio epaileak eginbideak hasi direla formalki ezagutzeko bidea ematen duten jarduketak egin aurretik.

Foru arau honetako 57. artikuluan adierazitako elementuek osatuko dute zerga zorra, eta zergapekoa behartuta egongo da zorraren kuota eta ordainketa egiten duen unera arte sortutako berandutze interesak zein legezko errekarguak autolikidatzera eta aldi berean ordaintzera. Edonola ere, borondatez erregularizatutako tributuak autolikidazio prozeduraren bidez eskatzen ez badira, zergapekoak dagokion aitorpena aurkeztu beharko du, eta osorik ordainduko du Administrazioak likidatutako zerga zorra, zerga araudian ordainketarako ezarritako epean.

Artikulu honetan ezarritakoa aplikatzekoa izango da, era berean, Administrazioak zerga zorra zehazteko duen eskubidea preskribatu ondoren egiten bada erregularizazioa.

Artikulu honetako lehenengo paragrafoan dioena zehazteko, hau da, zorra erabat onartu eta ordaindu dela, Zerga Administrazioak behar diren egiaztapen eta ikerketa jarduketak egin ahal izango ditu, nahiz eta horiek foru arau honetako 65.a) artikuluan araututako preskripzioa gertatzen den zergaldien eta kontzeptuen gainekoak izan.

251. artikulua.– Egiaztapen eta ikerketa prozedura izapidetzea likidazioa egin behar denean.

1.– Zerga Administrazioak Herri Ogasunaren aurkako delituaren zantzuak daudela uste badu eta foru arau honetako 249.1 artikuluan ezarritakoaren arabera likidazioa ematea eragozten duen inguruabarrik gertatzen ez bada, delituari lotutako likidazio proposamen bat formalizatu beharko da, non adieraziko den likidazio hori zer egitatetan eta zuzenbideko oinarritan funtsatzen den.

Proposamen hori zergapekoari jakinaraziko zaio, eta entzunaldiaren izapidea egiteko aukera emango zaio, haren eskubideari begira komeni zaiona alegatu dezan. Horretarako, 15 egun naturaleko epea izango du, proposamena jakinarazi eta biharamunetik aurrera.

Izapidetze administratiboan gertatutako prozedura akatsek ez dute inola ere eragingo delituari lotutako zerga betebeharra partzialki edo erabat amaitzea, ez eta zerga zorra likidatzeko Zerga Administrazioak eginiko jarduketak direla-eta foru arau honetako 147.2 artikuluaren a) eta b) letretan aurreikusitako ondorioak amaitzea ere. Dena den, beste ondorio batzuk gerta daitezke, baldin eta Fiskaltzak espedientea itzultzen badu edo Herri Ogasunaren kontrako deliturik ez dagoelako foru arau honetako 255.2 artikuluaren c) letran ezarritako doikuntza egitera behartzen duen ebazpen judizial irmoa ematen bada.

Entzunaldiaren izapidea egiteko epea amaitu eta aurkeztutako alegazioak aztertu ondoren, organo eskudunak likidazio administratiboa emango du, Ogasuneko zuzendari nagusiaren aurreko edo aldi bereko baimenarekin, ikusten badu erregularizazioak argi uzten duela Herri Ogasunaren aurkako delitua dagoela.

Likidazio administratiboa eman ondoren, organo eskudunaren bidez Zerga Administrazioak erruduntasun testigantza pasatuko dio jurisdikzio eskudunari edo espedientea bidaliko dio Fiskaltzari, eta egiaztapen prozedura zergapekoari jakinarazpena eginda amaituko da, likidazio horren bidez erregularizatutako zerga betebeharraren elementuei dagokienez. Jakinarazpen horretan, zergapekoari ohartaraziko zaio salaketa edo kereila izapidetzeko onartu dela jakinarazten denean baino ez dela hasiko ordainketa egiteko epea, foru arau honetako 253. artikuluan ezarritakoaren arabera.

Erruduntasun testigantza jurisdikzio eskudunari pasatzearekin edo espedientea bidaltzearekin batera, geldiarazita geratuko dira zerga zorra zehazteko eta zehapena jartzeko eskubidearen preskripzio epeak, foru arau honek 67.1 eta 193.3 artikuluetan jasotakoaren arabera.

2.– Salaketa edo kereila onartzen ez bada, ikuskapen jarduketak atzera eramango dira delituari lotutako likidazio proposamena eman zen aurreko unera; kasu horretan, ikuskapen akta edo behin-behineko likidazioa formalizatuko da, eta foru arau honetan edo hori garatzeko araudian ezarritakoarekin bat izapidetuko da.

Foru arau honetako III. tituluko IV. kapituluko 3. sekzioaren 3. azpisekzioan ezarritakoa kontuan hartuko da ikuskapen jarduketak amaitzeko.

Jarduketak atzera eramaten diren unetik foru arau honetako 147.1 artikuluan adierazitako epea amaitu bitartera doan aldian bukatu beharko da prozedura, edo, bestela, sei hilabeteko epean, azken epe hau luzeagoa bada. Epe hori zenbatzen hasiko da prozedura bideratzen jarraitu behar duen organo eskudunak ebazpen judiziala edo Fiskaltzak itzulitako espedientea jasotzen duenetik aurrera.

Berandutze interesak eskatuko dira prozedurari amaiera ematen dion likidazio berria dela eta. Berandutze interesak zenbatzen hasteko data foru arau honetako 26.2 artikuluaren arabera baliogabetutako likidazioari zegokiona izango da, eta likidazio berria eman arte sortuko da interesa.

Kasu horietan, berriro hasiko dira zenbatzen zorra zehazteko eta zehapena jartzeko eskubidearen preskripzio epeak, foru arau honetako 67.7 artikuluan jasotakoaren arabera.

3.– Baldin eta zerga kontzeptu beragatik eta zergaldi berean bereizi ahal badira Herri Ogasunaren aurkako delitua dagoela zehazteko bide ematen duen dolozko jokabidea duten elementuak eta dolozko jokabide hori antzeman ez zaien beste elementu eta kopuru erregularizatu beharreko batzuk, bi likidazio egingo dira bata bestetik bereizita.

Likidazio bien kuantifikazioa egiteko, delituari lotutako likidazio proposamen bat eta ikuskapen akta proposamen bat egingo dira, arau hauei jarraituta:

a) Delituari lotutako likidazio proposamenean, aitorpenaren helburu diren elementuak jasoko dira. Elementu horiei dolozko jokabidea duten elementuak gehituko zaizkie, eta zergapekoaren eskubidearen arabera egin beharreko doikuntzak kenduko dira, bai eta zerga oinarrian edo kuotan hari konpentsatu edo kendu beharreko partidak ere. Aurkeztutako aitorpenean, ordaindu beharreko kuota bat ezarri bada, kuota horren deskontua egingo da likidazio proposamena kalkulatzean.

b) Akta proposamenean jasotako likidazio proposamenean, egiaztatutako elementu guztiak jasoko dira, ustezko delituari lotuta daudenak zein lotuta ez daudenak, eta aurreko paragrafoan adierazitako likidazio proposamenaren ondoriozko kopurua kenduko da.

Edonola ere, zergapekoak aukeratu dezake kuota biak kalkulatzeko sistema bat aplikatzea: sistema horretan, oinarrian edo kuotan konpentsatu edo kendu beharreko partidak proportzionalki aplikatuko dira, erregelamenduz ezarritakoaren arabera. Aukera hori hartuz gero, Administrazioari jakinarazi egin beharko zaio, delituari lotutako likidazio proposamena jakinarazi ondorengo alegazio epean.

252. artikulua.– Likidazioen inpugnazioa.

1.– Foru arau honetako 248.2 artikuluan xedatutakoaren ondorioz emandako likidazio administratiboaren kontra, ezin izango da errekurtsorik edo erreklamaziorik jarri administrazio bidean; hala ere, prozesu penalean ezarritakoa betetzeko dagokion doikuntza egingo da, Zigor Kodeko 305. artikuluan eta foru arau honetako 255. artikuluan xedatutakoaren arabera. Zigor arloko epaileari egokituko zaio epaian zehaztea Herri Ogasunaren aurkako delituei lotutako iruzurraren kuota, Zigor Kodeko 305. artikuluaren 5. apartatuan eta titulu honetan ezarritakoaren babesean likidatu behar zena.

Izapidetze administratiboan gertatutako prozedura akatsek ezin izango dute inola ere delituari lotutako zerga betebeharra partzialki edo erabat amaitu, ez eta zerga zorra likidatzeko Zerga Administrazioak eginiko jarduketak direla-eta foru arau honetako 147.2 artikuluaren a) eta b) letretan aurreikusitako ondorioak ere.

2.– Ustezko delituari lotu gabe dauden elementu eta zenbatekoen erregularizazioaren ondoriozko likidazioaren kontra, berriz, foru arau honetako V. tituluan aurreikusitako errekurtso eta erreklamazioak jarri ahal izango dira.

253. artikulua.– Likidatutako zorra biltzea Herri Ogasunaren aurkako delitu baten zantzuak daudenean.

Foru arau honetako 248.2 artikuluan adierazitako kasuetan, Herri Ogasunaren aurkako delitua egoteak ez ditu geldiaraziko likidatutako zerga zorra kobratzeko administrazio jarduketak, salbu eta epaileak erabaki badu exekuzio jarduketak etetea.

Aurreko paragrafoan zerga zorra kobratzeko aipatutako administrazio jarduketetan, foru arau honetako III. tituluko V. kapituluan ezarritako arau orokorrak beteko dira, titulu honetan ezarritako kasu berezietan izan ezik.

Herri Ogasunaren aurkako delituaren ondoriozko salaketa edo kereila onartu denean, Zerga Administrazioak ordainketa egiteko borondatezko epea jakinaraziko dio zergapekoari, eta eskatuko dio likidatutako zerga zorra foru arau honetako 61.2 artikuluan ezarritako epeetan ordain dezala.

254. artikulua.– Zerga-bilketako jarduketen aurka egiteko arrazoiak.

Foru arau honetako 248.2 artikuluan xedatutakoaren arabera likidatutako zerga zorra kobratzeko diru bilketako prozeduraren egintzen kontra, foru arau honetako 171.3 artikuluan, 174.3 artikuluan eta 176.1 artikuluaren bigarren paragrafoan aurreikusitako arrazoiak baino ezin izango dira inpugnatu, eta berrikuspena foru arau honetako V. tituluan xedatutakoaren arabera egingo da.

255. artikulua.– Ebazpen judizialak zerga likidazioaren gainean dituen ondorioak.

1.– Azkenean prozesu penalean iruzurrari eta haren zenbatekoari dagokienez ezartzen denera egokituko da foru arau honetako 248.2 artikuluan adierazitako kasuetan Zerga Administrazioak egindako likidazioa.

2.– Honela egingo da doikuntza:

a) Prozesu penalean epaia ematen bada, epai hori Herri Ogasunaren aurkako delitua dela-eta kondenatzekoa bada eta iruzurra dela-eta prozesu horretan ezarritako kuota eta administrazio bidean likidatutakoa berdinak badira, ez da beharrezkoa izango likidatutako kuota aldatzea; hala ere, dagozkion berandutze interesak eta errekarguak ezarriko dira.

Iruzurra dela-eta prozesu penalean zehaztutako zenbatekoa administrazio bidean ezarritakoa baino txikiagoa edo handiagoa bada, aldatu egin beharko da foru arau honetako 248.2 artikuluan babesean emandako likidazioa. Kasu horretan, hasierako egintzak iraungo du, eta epaiaren edukiaren arabera zuzenduko da, iruzurra dela-eta prozesu penalean finkatutako zenbatekora egokitzeko.

Aurreko paragrafoan xedatutakoaren arabera Zerga Administrazioak eginiko aldaketa horrek ez du eraginik izango zerga-bilketan eginiko jarduketen balioan, prozesu penalean berretsitako zenbatekoari dagokionez.

Epaia exekutatzeko eskumena duen auzitegiari, ordaindu behar duenari eta prozedura penalean pertsonatutako gainerako alderdiei helaraziko zaie aldaketaren erabakia.

Iruzurra dela-eta prozesu penalean zehaztutako zenbatekoa administrazio bidean ezarritakoa baino txikiagoa bada, aplikatzekoak izango dira sarrerak eta bermeen kostua itzultzeko zerga araudian ezarritako arau orokorrak.

b) Prozesu penalean azkenean uste bada deliturik ez dagoela zerga betebeharrik ez dagoelako, baliorik gabe geratuko da likidazio administratiboa, eta aplikatzekoak izango dira sarrerak eta bermeen kostua itzultzeko zerga araudian ezarritako arau orokorrak.

c) Prozesu penalean ebazpen irmoa ematen bada eta uste bada deliturik ez dagoela zerga betebeharrik ez dagoelako, administrazio jarduketak atzera eramango dira foru arau honetako 251.1 artikuluan ezarritakoaren arabera delituari lotutako likidazio proposamena eman zen aurreko unera; kontuan hartuko dira organo judizialak frogatutzat jotako egitateak, eta akta formalizatuko da. Akta hori foru arau honetan eta hori garatzeko araudian ezarritakoaren arabera izapidetuko da.

Foru arau honetako III. tituluaren IV. kapituluko 3. sekzioko 3. azpisekzioan ezarritakoa kontuan hartuko da ikuskapen jarduketak amaitzeko.

Jarduketak atzera eramaten diren unetik foru arau honetako 147.1 artikuluan adierazitako epea amaitu bitartera doan aldian bukatu beharko da prozedura, edo, bestela, sei hilabeteko epean, azken epe hau luzeagoa bada. Epea zenbatzen hasiko da jarduketak berriro abiarazteko eskumena duen organoak ebazpen judiziala edo Fiskaltzak itzulitako espedientea jasotzen duenetik aurrera.

Berandutze interesak eskatuko dira prozedurari amaiera ematen dion likidazio berria dela eta. Baliogabetutako likidazioari foru arau honetako 26.2 artikuluaren arabera zegokiona izango da berandutze interesak zenbatzen hasteko data, eta likidazio berria eman arte sortuko da interesa.

Zerga likidazio guztietarako berezkoa den berrikuspen eta errekurtso araubidearen mende egongo da likidazioa; foru arau honetako V. tituluan dago erregulatuta araubide hori. Hala ere, epai judizialean frogatutzat jotako egitateak ezin izango dira inpugnatu.

Kasu horietan, zorra zehazteko eta zehapena jartzeko eskubidearen preskripzio epea zenbatzen hasiko da foru arau honetako 67.7 artikuluan jasotakoaren arabera.

256. artikulua.– Erantzuleak.

1.– Foru arau honetako 248.2 artikuluan ezarritakoaren arabera likidatutako zerga zorraren erantzule solidarioak izango dira likidazioa eragin duten egitateen kausatzaileak izan edo egitate horietan lankidetza aktiboa izan dutenak eta salatutako delitua dela-eta hasitako prozesu penalean ikertuta edo inputatuta egon edo prozesu hori dela-eta kondenatuak izan direnak.

Baldin eta artikulu honetan ezarritako erantzukizuna eskatzeko prozeduran kontuan hartzen badira, ebazpen proposamena egin aurretik likidazio prozeduran formalki jasoko dira prozedura hori dela-eta dauden edo lortu diren datu, froga edo inguruabarrak.

2.– Foru arau honetako 248.2 artikuluko adierazitako likidazioetan, aplikatzekoak izango dira, era berean, foru arau honetako 42.4 artikuluan araututako erantzukizun kasuak.

3.– Aurreko 1. apartatuan aurreikusitako erantzukizuna adierazten duen erabakiaren kontrako errekurtsoan edo erreklamazioan, erantzukizun horren hedadura orokorra bakarrik inpugnatu ahal izango da.

4.– Prozesu penalean 1. apartatuan adierazitako erantzuleetako edozein dela-eta largespena edo absoluzioa erabakitzen bada, baliogabetutik geratuko da haren erantzukizunaren adierazpena, eta aplikatzekoak izango dira sarrerak eta bermeen kostua itzultzeko zerga araudian ezarritako arau orokorrak.

5.– Foru arau honetako 67.9 artikuluan xedatutakoa eragotzi gabe, artikulu honen 1. apartatuan adierazitako erantzukizun kasuetan zergapeko baten preskripzio epea eteten bada, ondorio hori gainerako zergapekoei zabalduko zaie, erantzuleei barne.

6.– Zerga-bilketan eskumena duen organoari egokituko zaio artikulu honen 1. eta 2. apartatuetan araututako kasuetan erantzukizuna adierazteko erabakiak emateko eskumena.

7.– Erantzukizuna adierazteko prozeduraren epea etentzat joko da Fiskaltzaren edo organo judizialaren aurrean salaketa edo kereila aurkezten denetik auzipetuen inputazio formala egin arte.

Foru arau honetako 78.6 artikuluaren e) letran ezarritakoa aplikatuko zaie artikulu honetan aurreikusitako erantzukizunaren adierazpenaren prozedura izapidetzean hartutako kautelazko neurriei.»

Hirurogeita hemezortzi.– VII. titulua gehitzen da, eduki honekin:

«VII. TITULUA

Tributuen arloan eragina duten estatu laguntzak berreskuratzea

I. KAPITULUA

Xedapen orokorrak

257. artikulua.– Xedapen orokorrak.

1.– Zerga Administrazioari dagokio tributuen arloan eragina duten estatu laguntzak berreskuratzeko erabakiak exekutatzeko behar diren jarduketak egitea.

2.– Tributuen aplikaziotzat joko da tributuen arloan eragina duten estatu laguntzak berreskuratzeko erabakiak exekutatzeko beharrezkoak diren administrazio jardueren erabilera, bai eta erabaki horien ondorioz zergapekoek beren eskubideak erabiltzeko edo zerga betebeharrak betetzeko egiten dituzten jarduketak ere.

3.– Artikulu honetako aurreko apartatuetako kasuez gainera, titulu honetan xedatutakoa aplikatzekoa izango da baldin eta Europar Batasuneko Zuzenbidean ezarritakoaren arabera eskatu behar bada zerga arloan eragina duen estatu laguntza gisa jasotako kopuruak itzultzeko.

258. artikulua.– Estatu laguntzak berreskuratzeko erabakien exekuzio prozedurak.

1.– Estatu laguntzak berreskuratzeko erabakien exekuzio prozedurak dira:

a) Berreskuratze prozedura erabakiak eragindako zerga betebeharraren elementuak erregularizatu behar direnean.

b) Berreskuratze prozedura, beste kasu batzuetan.

2.– Estatu laguntzak berreskuratzeko erabakiak III. tituluaren IV. kapituluko 3. sekzioan araututako ikuskapen prozeduraren bidez ere exekutatu ahal izango dira, prozedura horren hedadurak foru arau honetako 262.1 artikuluan jasotakotik harago doanean.

Kasu horietan, bidezkoa izango da egiaztatzen den zerga betebeharraren elementuen likidazioa egitea, erabakian jasotako elementuak eta hari lotu gabeko elementuak likidazio desberdinetan bereizita.

259. artikulua.– Preskripzioa.

1.– Hamar urteko epean preskribatuko da berreskuratzeko erabakiaren exekuziotik eratortzen den zerga zorra zehaztu eta horren ordainketa eskatzeko Zerga Administrazioak duen eskubidea.

2.– Erregularizatu beharreko zerga betebeharra betetzeko estatu laguntzaren aplikazioak zerga araudiaren arabera ondorio juridikoak sortu eta biharamunean hasiko da preskripzio epea.

3.– Arrazoi hauek direla-eta etengo da preskripzio epea:

a) Estatu laguntzari lotuta Europako Batzordeak edo haren eskariz Zerga Administrazioak eginiko edozein jarduketa dela-eta.

b) Berreskuratzeko erabakiak edo ordaindu beharrak eragindako elementuen ondoriozko zerga zorra onartu, erregularizatu, egiaztatu, ikuskatu, segurtatu eta likidatzeko Zerga Administrazioak egindako edozein egintza dela-eta, zergapekoa horren berri formala izanik egin bada.

c) Zerga zorra likidatu edo ordaintzeko zergapekoak eginiko edozein jarduketa sinesgarri dela-eta edo dagozkion errekurtsoak jartzearen ondorioz.

4.– Preskripzio epea etenda geratuko da berreskuratzeko erabakia Europar Batasuneko Justizia Auzitegian prozedura baten mende dagoen bitartean.

260. artikulua.– Berreskuratzeko erabakiaren exekuzioaren ondorioak.

1.– Zerga betebeharra dela-eta Zerga Administrazioak aurretik ebazpena eman edo likidazioa egin badu eta estatu laguntza berreskuratzeko erabakiak eragina badu betebehar horretan, erabaki horren exekuzioak berekin ekarriko du ebazpena edo likidazioa aldatzea, horiek irmoak izan arren.

2.– Berandutze interesak Europar Batasuneko araudiari jarraituz arautuko dira.

261. artikulua.– Exekuzio egintzaren aurkako errekurtsoak.

Berreskuratzeko erabakiaren exekuzioaren ondoriozko ebazpenaren edo likidazioaren aurka, berraztertze errekurtsoa jarri ahal izango da eta, hala badagokio, erreklamazio ekonomiko-administratiboa, foru arau honetan ezarritakoaren arabera.

Aurreko paragrafoan ezarritakoaren arabera ebazpena edo likidazioa berrikusten bada, administrazio egintzen exekuzioa etetea bakar-bakarrik onartuko da baldin eta horretarako adierazten den Foru Diruzaintzaren kutxan edo kontuan diru gordailu bat jartzen bada berme gisa.

II. KAPITULUA

Berreskuratze prozedura berreskuratzeko erabakiak eragindako zerga betebeharraren elementuak erregularizatu behar direnean

262. artikulua.– Berreskuratze prozedura berreskuratzeko erabakiak eragindako zerga betebeharraren elementuak erregularizatu behar direnean.

1.– Berreskuratzeko erabakiak eragindako zerga betebeharraren elementuak erregularizatu behar direnean egiten den berreskuratze prozeduran, Zerga Administrazioak soilik egiaztatuko ditu erabaki horren mende dauden betebeharraren elementuak.

2.– Prozedura honetan, Zerga Administrazioak jarduketa hauek baino ezin izango ditu egin:

a) Aztertzea zergapekoek beren aitorpenetan emandako datuak eta aurkeztutako frogagiriak edo berariaz eskatzen direnak.

b) Aztertzea Zerga Administrazioaren esku dauden datu eta aurrekariak.

c) Aztertzea bai Zerga araudiak ezarritako erregistroak eta gainerako agiriak eta izaera ofizialeko beste edozein liburu, erregistro edo dokumentu, merkataritzako kontabilitatea barne, eta bai liburu, erregistro eta dokumentu horietan jasotako eragiketak justifikatzeko balio duten fakturak edo agiriak.

d) Hirugarrenei egitea informazioa eskatzeko errekerimenduak.

3.– Prozeduraren jarduketak Zerga Administrazioaren bulegoetatik kanpo egin ahal izango dira; horretarako, aplikatzekoak izango dira foru arau honetako 136.2 artikuluan eta 140. artikuluan jasotako arauak.

4.– Ulertuko da estatu laguntza berreskuratu behar den ala ez erabakitzeko baino ez dela egin aurreko apartatuetan aipatutako dokumentu eta agirien azterketa, baina egitate edo dokumentu horiek ondoren egiaztatzea eragotzi edo mugatu gabe.

263. artikulua.– Prozeduraren hasiera.

1.– Ofizioz hasiko da, Ikuskaritzako zuzendariordearen ebazpenez, berreskuratzeko erabakiak eragindako zerga betebeharraren elementuak erregularizatu behar direnean egiten den berreskuratze prozedura.

2.– Prozeduraren jarduketen hasiera zergapekoei jakinarazi behar zaie, komunikazio baten bidez, non adieraziko zaien zeintzuk diren jarduketen izaera eta hedadura eta zeintzuk diren jarduketen barruan dituzten eskubideak eta betebeharrak.

Zerga Administrazioaren esku dauden datuak likidazio proposamena egiteko nahikoak direnean, proposamen hori jakinarazita hasi ahal izango da prozedura.

264. artikulua.– Izapidetzea.

1.– Foru arau honetako 95.8 artikuluan adierazitako komunikazio eta eginbideetan dokumentatuko dira erabakiak eragindako zerga betebeharraren elementuak erregularizatu behar direnean egiten den berreskuratze prozeduraren jarduketak.

2.– Zergapekoak behartuta egongo dira Zerga Administrazioari kasu egitera eta, haren eginkizunak bete ditzan, hari laguntza ematera.

Zergapekoa, hala eskatzen bazaio, jarduketak egiteko adierazitako lekuan, egunean eta orduan pertsonatu beharko da, eta eskatutako dokumentazioa eta gainerako elementuak aurkeztu edo Zerga Administrazioaren esku jarri beharko ditu.

3.– Behin-behineko likidazioa egin aurretik, Zerga Administrazioak likidazio proposamena komunikatu beharko dio zergapekoari, 10 eguneko epean bere eskubidez egoki deritzona alegatu dezan.

265. artikulua.– Amaiera.

1.– Erabakiak eragindako zerga betebeharraren elementuak erregularizatu behar direnean, berreskuratze prozesua honela amaituko da:

a) Zerga Administrazioaren ebazpen espresu bidez. Ebazpen horretan, behintzat eduki hau jaso beharko da:

1. Berreskuratzeko erabakiak eragindako zerga betebeharraren elementuak eta jarduketen denbora eremua.

2. Ebazpena arrazoitzen duten egitateen eta zuzenbideko oinarrien zerrenda.

3. Behin-behineko likidazioa edo, hala badagokio, berreskuratzeko erabakiaren ondorioz zerga egoera erregularizatu behar ez dela jasotzen duen adierazpen espresua.

b) Berreskuratze prozedura barnean hartzen duen egiaztapen eta ikerketa prozedura baten hasieraren bidez.

2.– Foru arau honetako 100. artikuluan araututako prozeduraren iraupen epea ez betetzeak ez du ekarriko prozedura iraungitzea, amaitu arte jarraituko baitu. Kasu horretan, preskripzioa ez da etentzat joko epe horretan eginiko administrazio jarduketak direla-eta.

Kasu horretan, preskripzioa etentzat joko da aurreko paragrafoan aipatutako epea amaitu ondoren interesdunari formalki jakinarazitako jarduketak egiteagatik.

3.– Ebazpen judizial batean formazko akatsak antzematen denean eta administrazio jarduketak atzera eramatea agintzen denean, jarduketa horiek atzera eramaten diren unetik foru arau honetako 100. artikuluan adierazitako epea amaitu bitartera doan aldian bukatu beharko dira edo, bestela, hiru hilabeteko epean, azken epe hau luzeagoa bada. Epe hori zenbatzen hasiko da estatu laguntzak berreskuratzeko prozedura berriro hasteko eskumena duen organoak espedientea jasotzen duenetik aurrera.

4.– Aurreko apartatuan aipatutako ebazpen judiziala exekutatzeak ez du inola ere ekarriko zergapekoarengandik berreskuratutako zenbatekoak itzultzea; izan ere, Zerga Administrazioan gordailuan geratuko dira prozedurari amaiera ematen dion administrazio egintzan xedatutakoaren arabera aplikatu arte.

III. KAPITULUA

Berreskuratze prozedura beste kasu batzuetan

266. artikulua.– Berreskuratze prozedura beste kasu batzuetan.

1.– Berreskuratzeko erabakia exekutatzeak zerga betebeharra erregularizatzea ez badakar, kapitulu honetan ezarritakoa izango da jarraitu beharreko prozedura.

2.– Berreskuratzeko erabakia exekutatzeko, foru honetako 166. artikuluan Zerga Administrazioari aitortzen zaizkion ahalmenak izango ditu organo eskudunak, bai eta artikulu horretan ezarritako baldintzak ere.

267. artikulua.– Hasiera.

Berreskuratze prozedura ofizioz hasiko da, Zerga Administrazioaren erabakiz.

Prozeduraren jarduketen hasiera jakinarazi behar zaie zergapekoei, komunikazio baten bidez, non adieraziko zaien zein den jarduketen izaera eta zeintzuk diren jarduketen barruan dituzten eskubideak eta betebeharrak.

Hasiera emateko jakinarazpenean, ebazpen proposamena jasoko da, eta zergapekoari hamar eguneko epea emango zaio bere eskubidez egoki deritzona alegatzeko.

268. artikulua.– Amaiera.

1.– Zerga Administrazioaren ebazpen espresu bidez amaituko da berreskuratze prozedura; ebazpen hori jakinarazteko lau hilabeteko epea egongo da zergapekoari prozeduraren hasiera jakinarazi zaionetik, salbu eta berreskuratzeko erabakian beste epe bat ezartzen bada. Puntu honetan, aplikatzekoa izango da foru arau honetako 265.2 artikuluan xedatutakoa.

2.– Prozedurari amaiera ematen dion ebazpenean, behintzat eduki hau jasoko da:

a) Zerga Administrazioak berreskuratzeko erabakiaren zentzuan aurretik emandako ebazpena aldatzeko erabakia edo, hala badagokio, berreskuratzeko erabakiaren ondorioz ezer ere aldatu behar ez dela jasotzen duen adierazpen espresua.

b) Ebazpena arrazoitzen duten egitateen eta zuzenbideko oinarrien zerrenda.

c) Likidazioa, berreskuratzeko erabakia exekutatzeak zerga zorra badakar; bereziki, zor hori foru arau honetako 260.2 artikuluan ezarritakoaren arabera sortutako berandutze interesetatik badator.

3.– Ebazpen judizialean formazko akatsak antzematen direnean eta administrazio jarduketak atzera eramatea agintzen denean, jarduketa horiek atzera eramaten diren unetik 1. apartatuan adierazitako epea amaitu bitartera doan aldian bukatu beharko dira edo, bestela, bi hilabeteko epean, azken epe hau luzeagoa bada. Epea zenbatzen hasiko da estatu laguntzak berreskuratzeko prozedura berriro hasteko eskumena duen organoak espedientea jasotzen duenetik aurrera.

4.– Aurreko apartatuan aipatutako ebazpen judiziala exekutatzeak ez du inola ere ekarriko zergapekoarengandik berreskuratutako zenbatekoak itzultzea; izan ere, Zerga Administrazioan gordailuan geratuko dira prozedurari amaiera ematen dion administrazio egintzan xedatutakoaren arabera aplikatu arte.»

Hirurogeita hemeretzi.– Honela idatzita gelditzen da laugarren xedapen gehigarriaren 4. apartatua:

«4.– Identifikazio fiskaleko zenbakiaren ezeztapena Gipuzkoako Aldizkari Ofizialean argitaratzeak berekin ekarriko du zenbaki horrek identifikazio ondorioetarako zerga arloan duen baliagarritasuna galtzea.

Era berean, aipatutako ezeztapena argitaratuz gero, kreditu entitateek ez dute kargurik edo abonurik egingo zenbaki ezeztatu horien titularrak titular edo baimendu moduan jasotzen dituzten banku kontu edo gordailuetan, salbu eta zenbakia birgaitu edo identifikazio fiskaleko zenbaki bat ematen bada.

Entitate baten zenbakia ezeztatzen denean, haren ezeztapenaren argitalpenak haren inskripzioaren erregistro publikoak bazterreko ohar bat idatziko du, entitate motaren arabera, ezeztapenak eragindako entitateari irekitako orrian. Ohar horretan, jasota utziko da aurrerantzean ezin izango dela egin entitate hari buruzko inskripziorik, salbu eta zenbakia birgaitu edo identifikazio fiskaleko zenbaki bat ematen bada.

Apartatu honetan xedatutakoa ez da oztopo izango Zerga Administrazioak bete gabe dauden zerga obligazioak betetzea eskatu dezan. Dena den, identifikazio fiskaleko zenbaki ezeztatu bat jasotzen duten autolikidazio, aitorpen, komunikazio edo idatziak onartuko badira, identifikazio fiskaleko zenbakia birgaitu edo, hala badagokio, zenbaki berri bat lortu beharko da, erregelamenduz onartutakoaren arabera.»

Laurogei.– Honela idatzita gelditzen da zazpigarren xedapen gehigarria:

«Zazpigarrena.– Erantzukizun zibila ordainaraztea eta isuna jartzea, Herri Ogasunaren aurkako delituak direla-eta.

1.– Herri Ogasunaren aurkako delituagatik irekitako prozeduretan, premiamenduzko prozedura administratiboaren bidez exijituko da erantzukizun zibila. Horrek barnean hartuko ditu, batetik, foru arau honen arabera preskripzioagatik edo legezko beste kausa batengatik Zerga Administrazioak likidatu ez duen zerga zorraren zenbatekoa, haren berandutze interesekin batera, eta, bestetik, isunaren zenbatekoa.

2.– Epaia irmoa denean, hori exekutatzea dagokion epaileak edo auzitegiak testigantza bidaliko die Zerga Administrazioko organoei, eta hura ordainarazteko aginduko die. Gauza bera egingo da epaileak edo auzitegiak epai errekurritu bat behin-behinik exekutatzea erabakitzen duenean.

3.– Kode Penaleko 125. artikuluari jarraituz erantzukizun zibila edo isuna zatika ordaintzea erabakitzen denean, epaileak edo auzitegiak horren berri eman beharko dio Zerga Administrazioari. Halakoetan, premiamenduzko prozedura hasiko da zatika ordaintzeko ezarritako arauak hausten badira.

4.– Zerga Administrazioak epaia ematen duen epaileari edo auzitegiari emango dio, Espainiako Konstituzioaren 117.3 artikuluaren ondorioetarako, bere ardurapean utzitako exekuzioaren izapidearen eta, hala badagokio, hari buruzko gorabeheren berri.»

Laurogeita bat.– Edukia ematen zaio hamabigarren xedapen gehigarriari:

«HAMABIGARREN XEDAPEN GEHIGARRIA.– Etetea adiskidetasunezko prozedurak izapidetzean.

Foru arau honetako V. tituluan jasotako berrikuste prozedura etenda geratuko da adiskidetasunezko prozedura amaitu arte, baldin eta, Ez-egoiliarren Errentaren gaineko Zergaren abenduaren 10eko 16/2014 Foru Arauaren hirugarren xedapen gehigarriaren 1. apartatuan xedatutakoaren arabera, nazioarteko hitzarmen edo itunetan aurreikusitako zuzeneko zergapetzearen arloko adiskidetasunezko prozedura bat eta berrikuste prozedura horietako bat aldi berean egiten badira.»

Laurogeita bi.– Xedapen gehigarri bat eransten da, hamaseigarrena. Hona hemen bere testua:

«HAMASEIGARREN XEDAPEN GEHIGARRIA.– Baloreei buruzko informazio betebeharrak.

Baloreak jaulkitzen dituzten entitateak, balore sozietatea eta agentziak eta gainerako bitarteko finantzarioak behartuta daude Zerga Administrazioari beraiek esku hartu duten balore jaulkipen, harpidetza eta eskualdaketako edozein eragiketaren berri ematera. Komunikazio horretan honako hauek aurkeztuko dira, erregelamenduz ezartzen diren epeetan eta moduan: erosle eta saltzaileen izenen zerrendak, eskualdatutako baloreen mota eta kopurua, salerosketako prezioak, eskualdaketaren data eta eskuratzaile eta eskualdatzailearen identifikazio fiskaleko zenbakia.

Aurreko paragrafoan jasotako ondorioetarako, baloreak eskuratu edo eskualdatu nahi dituenak identifikazio fiskaleko zenbakia komunikatu beharko die, dena delako agindua ematearekin batera, entitate jaulkitzaileari eta bitartekari finantzarioei. Betebehar hori bete arte, azken horiek ez dute agindua beteko.»

XEDAPEN IRAGANKOR BAKARRA.– Araubide iragankorra.

1.– Foru arau honek Gipuzkoako Lurralde Historikoko Zergen Foru Arau Orokorrari buruzko martxoaren 8ko 2/2005 Foru Arauaren 14. artikuluko 3. apartatuari emandako idazkera berria (aurrerantzean 2/2005 Foru Araua) aplikagarria izan zaie likidazio aldia foru arau hau indarrean jarri ondoren amaitzen zaien zerga ekitaldiei.

2.– 2/2005 Foru Arauaren 65.bis artikuluan, 69. artikuluaren 3. apartatuan eta 111. artikuluaren 1. eta 2. apartatuetan jasotakoa, foru arau honek emandako idazkeretan, aplikagarria izango da foru arau hau indarrean jartzean jadanik hasita dauden kudeaketa eta ikuskapen prozeduretan, baldin eta horietan data hartan likidazio proposamenik formalizatu ez bada.

3.– Foru arau honek 2/2005 Foru Arauaren 67. artikuluan sartutako 10. apartatu berria aplikagarria izango da 2/2005 Foru Arauaren 66.1 artikuluaren a) paragrafoan aipatutako eskubidearen preskripzio epea foru arau hau indarrean jartzen denetik aurrera eteten denean.

4.– 2/2005 Foru Arauaren 120.1, 121.1, 124., 125. eta 126. artikuluetan foru arau honen bitartez sartzen diren aldaketak aplikagarriak izango dira horiek indarrean jartzean hasita dauden prozeduretan, baldin eta indarrean jartzen diren egunean ez bada likidazio proposamenik formalizatu edo, bestela, likidaziorik egin ez bada.

Foru arau honek 2/2005 Foru Arauaren 129.1 artikuluari emandako idazkera berria aplikagarria izango da foru arau hau indarrean jartzen denetik aurrera aurkezten diren peritu tasazio kontrajarriaren eskaeretan.

Foru arau honek 2/2005 Foru Arauaren 130.2, 131.2 eta 133.1.b) artikuluetan sartzen dituen aldaketak aplikagarriak izango dira horiek indarrean jartzen direnetik aurrera hasten diren prozeduretan.

5.– 2/2005 Foru Arauaren 133. artikuluko 3. apartatuan jasotakoa, foru arau honek emandako idazkeran, aplikagarria izango da foru arau hau indarrean jartzen denetik aurrera ematen diren errekurtso judizial edo ekonomiko-administratiboei buruzko ebazpenetan.

6.– Foru arau honek 2/2005 Foru Arauaren 194.3 artikuluari emandako idazkera berria aplikagarria izango da foru arau hau indarrean jartzen denetik aurrera hasten diren zehapen barkamenerako prozeduretan eta hura indarrean jarri aurretik hasi arren ebatzi gabe daudenetan.

7.– Foru arau honek 2/2005 Foru Arauaren 190.1 eta 2, 191.1, 192.1, 195., 196. eta 197 artikuluei emandako idazkera berria aplikagarria izango da foru arau hau indarrean jarri aurretik egindako arau hausteetan eta zehapenetan, baldin eta haren aplikazioa onuragarriagoa bada arau hauslearentzat eta horri jarritako zehapena ez bada irmoa.

Erreklamazio eta errekurtsoez arduratzen ari diren organo administratibo eta jurisdikzionalek berrikusiko dituzte irmoak ez diren zehapenak eta aplikatuko dute aipatutako artikuluei emandako idazkera berria.

8.– Honela aplikatuko dira foru arau honek 2/2005 Foru Arauaren V. tituluaren IV. kapituluan egindako aldaketak:

a) 2/2005 Foru Arauaren 236, 239.1, 240.3 eta 245.ter artikuluen idazkera berria aplikagarria izango da hori indarrean jartzen denetik aurrera aurkezten diren erreklamazio eta errekurtsoetan.

b) 2/2005 Foru Arauaren 222.6 artikuluaren idazkera berria aplikagarria izango da hori indarrean jartzen denetik aurrera egiten diren etendura eskaeretan.

c) 2/2005 Foru Arauaren 240.1 artikuluaren idazkera berria aplikagarria izango da 2018ko urtarrilaren 1etik aurrera ematen diren ebazpen espresuetan.

d) 2/2005 Foru Arauaren 244.6 artikuluaren idazkera berria aplikagarria izango da hori indarrean jartzen denetik aurrera ematen diren ebazpenetan.

9.– Foru arau honek 2/2005 Foru Arauaren VI. tituluari emandako idazkeran jasotakoa aplikagarria izango da foru arau hau indarrean jarri aurretik hasitako prozeduretan, baldin eta 2/2005 Foru Arauaren 248.1 artikuluan adierazitako zantzuak badaude eta data hartan erruduntasun testigantza jurisdikzio eskudunari oraindik pasatu ez bazaio edo espedientea Fiskaltzari oraindik bidali ez bazaio.

10.– Foru arau honetan sartutako 2/2005 Foru Arauaren 256. artikuluan ezarritakoaren arabera, pertsona hauek erantzuletzat jo ditzake Zerga Administrazioak: xedapen horretan araututako baldintza guztiak beteta, Herri Ogasunaren aurkako delitu baten prozesu penala izapidetzearen ondorioz foru arau hau indarrean jarri aurretik formalki adierazi ezin izan den zerga arloko arau-hauste batean kausatzaile edo laguntzaile diren pertsonak.

XEDAPEN INDARGABETZAILEA

Salbu eta foru arau honetako xedapen iragankor bakarrean jasotakoa, hura indarrean jartzean indargabetuta geldituko dira bertan jasotakoaren aurka doazen xedapen guztiak. Bereziki, indargabetuta gelditzen da 1988ko azaroaren 22ko 45/1988 Foru Dekretua, zerga araudia Baloreen Merkatuaren uztailaren 28ko 24/1988 Legera egokitzen duena.

AZKEN XEDAPENAK

Lehenengoa.– Aldatzea Gipuzkoako Lurralde Historikoko Pertsona Fisikoen Errentaren gaineko Zergaren urtarrilaren 17ko 3/2014 Foru Araua.

Aldatu egiten da Gipuzkoako Lurralde Historikoko Pertsona Fisikoen Errentaren gaineko Zergaren urtarrilaren 17ko 3/2014 Foru Arauaren 111. artikuluaren 1. apartatua, eta honela idatzita gelditzen da:

«1.– Foru arau honek 94. artikuluaren 1. apartatuan aipatzen dituen diru kopuruen batura kuota likidoa baino handiagoa denean, Zerga Administrazioak behin-behineko likidazioa egingo du, bidezkoa bada, autolikidazioa aurkezteko epea amaitu ondorengo sei hilabeteen barruan.

Autolikidazioa epez kanpo aurkeztuz gero, horren aurkezpen egunetik aurrera hasiko da aurreko apartatuan aipatzen den sei hilabeteko epea.»

Bigarrena.– Aldatzea Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Araua.

Aldatu egiten da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 129. artikuluaren 1. apartatua, eta honela idatzita gelditzen da:

«1.– Foru arau honetako 68. artikuluan aipatutako kopuruen batura autolikidazioaren kuota baino gehiago bada, Zerga Administrazioak behin-behineko likidazioa egingo du, bidezkoa bada, aitorpena aurkezteko epea amaitu ondorengo sei hileko epearen barruan.

Autolikidazioa epez kanpo aurkeztuz gero, horren aurkezpen egunetik aurrera hasiko da aurreko apartatuan aipatzen den sei hilabeteko epea.»

Hirugarrena.– Herri Ogasunaren aurkako balizko delituei lotutako zorren borondatezko erregularizaziorako eredua.

Ogasun eta Finantza Departamentuko foru diputatuaren foru aginduz, onartu egingo dira 2005eko martxoaren 8ko 2/2005 Foru Arauak, Gipuzkoako Lurralde Historikoko Zergen Foru Arau Orokorrak, 250. artikuluan aipatzen dituen zerga zorra borondatez erregularizatzeko ereduak.

Laugarrena.– Indarrean jartzea.

Foru arau hau Gipuzkoako Aldizkari Ofizialean argitaratu eta biharamunean jarriko da indarrean.

Aurrekoa gorabehera, foru arau honek 2/2005 Foru Arauaren 120.1, 121.1, 124., 125., 126., 130.2, 131.2 eta 133.1.b) artikuluetan sartzen dituen aldaketak 2017ko abuztuaren 1etik aurrera jarriko dira indarrean.

Azterketa dokumentala