Euskal Herriko Agintaritzaren Aldizkaria

240. zk., 2016ko abenduaren 20a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HEZKUNTZA, HIZKUNTZA POLITIKA ETA KULTURA SAILA

5416

EBAZPENA, 2016ko azaroaren 21ekoa, Kudeaketa Ekonomikoaren zuzendariarena, zeinaren bidez Ogasun eta Finantzetako sailburuari eskuordetzen baitzaio Hezkuntza, Hizkuntza Politika eta Kultura Sailaren mendeko zentro administratiboen posta-zerbitzuak kontratatzeko eskumena 2017., 2018. eta 2019. urteetarako (2020. eta 2021. urteetara luza daiteke).

Euskal Autonomia Erkidegoko Sektore Publikoaren Kontratazioaren araubidea ezartzeko uztailaren 27ko 116/2016 Dekretuaren I. tituluko III. kapituluaren (Kontratazioaren arrazionalizazio teknikoa) I. sekzioaren arabera (Kudeaketa bateratua), Ogasun eta Finantza Sailaren egitura organikoa eta funtzionala ezartzen duen apirilaren 9ko 192/2013 Dekretuaren 12.c) artikuluarekin lotuta, Baliabide Orokorren Zuzendaritzari dagokio kudeaketa bateratuko eraikinetan kontratazioak egitea, hain zuzen ere Baliabide Orokorren Zuzendaritzari esleituak izanik erabilpen orokorrekoak diren material edo zerbitzuei dagokienez.

Kontuan izan behar da azken urteetan Ogasun eta Finantzetako sailburuak hainbat erakundetarako zerbitzuak eta hornidurak lizitatu eta kontratatu dituela, teknika horrek ahalbidetu duela eskala-ekonomiez baliatzea eta horrek emaitza onak izan dituela, bai arlo ekonomikoari dagokionez bai kontratuen betearazpenari dagokionez.

Posta-zerbitzuak kontratazio bateratuko teknika horren bidez kontratatu izan dira, eta teknika hori, gaur egun, berariaz jasota dago kontratazio publikoari buruzko Europako Parlamentuaren eta Kontseiluaren 2014ko otsailaren 26ko 2014/24/EE Zuzentarauan, eta bateragarria da Sektore Publikoko Kontratuen Legearen testu bategineko 1. artikuluan jasotako printzipioekin, eta, bereziki, funts publikoen erabilera eraginkorrarekin.

Kontratazio bateratua egin aurretik, eskumenak esleitu behar dira –edo, hala badagokio, «enkargua» egin– esleipena egitea dagokion kontratazio-organoak behar den prozedura egin dezan; horretaz gain, kontratua kofinantzatuko duten ekarpen guztien eskuragarritasun osoa ziurtatu behar da.

Ildo horretan, aipatutako eremuan posta zerbitzuak era bateratuan kontratatzeko bide edo formula egokia Sektore publikoaren araubide juridikoaren urriaren 1eko 40/2015 Legearen 9.1 artikuluan eskumenen eskuordetzerako jasotakoa da, eta honako hau xedatzen du:

«1.– Administrazio publikoetako organoek administrazio bereko beste organo batzuei beren eskumenak eskuordetzan eman ahal dizkiete, nahiz eta bata bestearen mendekoak ez izan, edo administrazio horiei lotuta edo administrazio horien mendean dauden zuzenbide publikoko erakundeetakoak badira».

Horregatik, 192/2013 Dekretuaren 3.2.f) artikuluak kontratazioaren arloan Ogasun eta Finantzetako sailburuari eskuordetzen dizkion eskumenei jarraikiz, eta Hezkuntza, Hizkuntza Politika eta Kultura Sailaren egitura organikoa eta funtzionala ezartzen duen apirilaren 9ko 193/2013 Dekretuan ezarritakoaren arabera, Kudeaketa Ekonomikoaren Zuzendaritzari dagokio –zuzendariaren bitartez–, kontratazio-organoari esleitutako ahalmenak baliatzea. Horrenbestez, honako hau

EBAZTEN DUT:

I.– Ogasun eta Finantzetako sailburuari eskuordetzea Hezkuntza, Hizkuntza Politika eta Kultura Sailaren mendeko ikastetxeen eta laguntza-zerbitzuen posta-zerbitzuak kontratatzeko eskumena 2017., 2018. eta 2019. urteetarako (2020 eta 2021era luzatu daiteke).

Haren esku utzitako eskumena Sektore Publikoko Kontratuen Legearen testu bategina onartzen duen irailaren 14ko 3/2011 LEDen aurreikusitako eta kontratuari aplikagarriak zaizkion honako gai hauek ere bideratzeko da:

Kontratua prestatzea (II. liburua).

Kontratuaren esleipena (III. liburua, I. titulua, I. kapitulua).

Administrazioaren eskuduntzak, aldaketa, iraungitzea, lagapena eta azpikontratazioa, izaera orokorrarekin IV. liburukiko I. tituluko I. kapituluan aurreikusten direnak, eta izaera partikularrarekin –hornidura-kontratuetarako– IV. liburukiko II. tituluko IV. kapituluan aurreikusten direnak.

Kontratua formalizatzea (III. liburua, I. titulua, I. kapitulua).

II.– Eskumena ematen duen organoaren baitan jarraituko dute kontratazio-organoari dagozkion gainerako eskumenek, eta, bereziki, egindako zerbitzuen betetzeari onespena emateko eta euren ordainketa agintzeko eskumenek.

III.– Eskuordetze hau sinatu eta hurrengo egunean jarriko da indarrean.

Vitoria-Gasteiz, 2016ko azaroaren 21a.

Kudeaketa Ekonomikoaren zuzendaria,

AMAIA JAUREGIBERRI GOENAGA.

Azterketa dokumentala