Euskal Herriko Agintaritzaren Aldizkaria

207. zk., 2016ko azaroaren 2a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

ENPLEGU ETA GIZARTE POLITIKETAKO SAILA

4612

EBAZPENA, 2016ko urriaren 10ekoa, Laneko eta Gizarte Segurantzako zuzendariarena, zeinaren bidez agintzen baita gordailutzeko Euskal Autonomia Erkidegoko Enplegu eta Gizarte Segurantzako Lan-ikuskatzaileordeen Elkarte Profesionalaren estatutuen aldaketa, eta horren berri ematen baita.

Sindikatu eta Enpresa Erakundeen Estatutuak Gordailutzeko Bulego Publiko honetan hasitako espedientea ikusita, Euskal Autonomia Erkidegoko Enplegu eta Gizarte Segurantzako Lan-ikuskatzaileordeen Elkarte Profesionalaren estatutuak aldatzeko dokumentazioa gordailutzeko, zeina idazkariak aurkeztu baitu, ebazpena eman da, hauek oinarri hartuta:

AURREKARIAK

Lehenengoa.– 2016ko maiatzaren 12an aurkeztutako dokumentazioaren bidez, aipatutako elkartearen estatutuak aldatzeko dokumentazioa eta estatutuak gordailutzeko eskatu da.

Bigarrena.– Aurkeztutako dokumentazioa bat dator sindikatuen eta enpresa-erakundeen estatutuak gordailutzeari buruzko maiatzaren 29ko 416/2015 Errege Dekretuarekin, eta aurkeztutako agirien artean daude gordailutze-eskabidea, batzorde exekutiboak hartutako erabakiaren ziurtagiria, estatutu aldatuak eta sinatzaileen identitatea egiaztatzeko agiriak.

Hirugarrena.– Lurraldeko jarduera-esparrua Euskal Autonomia Erkidegoa da, eta eremu funtzionala estatutuen 2. artikuluan ezarritakoa.

Laugarrena.– 2016ko maiatzaren 20an, errekerimendua egin zen, aldatutako estatutuen amaieran dagokion eginbidea sar zedin, eta bertan adierazteko batzar orokorrean erabakitako aldaketak sartu direla estatutuetan eta aldaketa hori egitea zer egunetan erabaki zen, bai eta igor zitezen elkartearen ordezkariek orrialde guztietan sinatutako bi ale, eta batzar orokorraren erabakiaren ziurtagiria eta batzar horretako presidentearen eta idazkariaren NANa. Eta errekerimendu hori legez ezarritako eran eta epeetan egin zen.

Aurrekari horiei oinarri hauek aplikatu behar zaizkie:

ZUZENBIDEKO OINARRIAK

Lehenengoa.– Sindikatuen eta enpresa-erakundeen estatutuak gordailutzeko eskumena organo honi ematen dio Enplegu eta Gizarte Politiketako Sailaren egitura organikoa eta funtzionala ezartzen duen Eusko Jaurlaritzaren apirilaren 9ko 191/2013 Dekretuaren 11.m) artikuluak.

Bigarrena.– Sindikatu Askatasunari buruzko abuztuaren 2ko 11/1985 Lege Organikoan eta Sindikatuen eta enpresa-erakundeen estatutuak gordailutzeari buruzko maiatzaren 29ko 416/2015 Errege Dekretuan dago jasota administrazio-prozedura honetan aplikagarri den funtsezko araudia.

Hirugarrena.– Gordailutzeko aurkeztutako dokumentazioa aztertuta, zuzenbidearen araberakoa dela egiaztatu da; horrenbestez, gordailutzeko onartu behar dira estatutuak aldatzeko erabakiari dagokion dokumentazioa eta elkartearen estatutu aldatuak, eta horren berri eman.

Aipatutako oinarriak eta oro har aplikatzekoak diren xedapenak aztertu ondoren, honako hau

EBAZTEN DUT:

Lehenengoa.– Agintzea Euskal Autonomia Erkidegoko Enplegu eta Gizarte Segurantzako Lan-ikuskatzaileordeen Elkarte Profesionalaren estatutuak aldatzeko erabakiaren ziurtagiria gordailutzeko.

Bigarrena.– Agintzea gordailutze hori Euskal Herriko Agintaritzaren Aldizkarian argitaratzeko, sindikatuen eta enpresa-erakundeen estatutuak gordailutzeari buruzko maiatzaren 29ko 416/2015 Errege Dekretuaren 13. artikuluan aurreikusitako baldintzetan.

Hirugarrena.– Eman den egunaren biharamunetik aurrera izango ditu ondorioak ebazpen honek.

Laugarrena.– Edozein interesdunek aztertu ahal izango du gordailututako agiria, baita kopia eskatu ere. Agiria aurkaratu ahal izango da Euskal Autonomia Erkidegoko Auzitegi Nagusiaren Lan Arloko Salan, lan-arloko jurisdikzioa arautzen duen urriaren 10eko 36/2011 Legean (2011ko urriaren 11ko BOE) xedatutakoaren arabera.

Vitoria-Gasteiz, 2016ko urriaren 10a.

Laneko eta Gizarte Segurantzako zuzendaria,

JOSÉ JAVIER LOSANTOS OMAR.

Azterketa dokumentala