Euskal Herriko Agintaritzaren Aldizkaria

93. zk., 2016ko maiatzaren 18a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

ENPLEGU ETA GIZARTE POLITIKETAKO SAILA

2084

EBAZPENA, 2016ko otsailaren 24koa, Osalan-Laneko Segurtasun eta Osasunerako Euskal Erakundeko zuzendari nagusiarena, 2015eko ekitaldirako prebentzioko ordezkarien oinarrizko prestakuntza emateko baimenari buruzko ebazpenak argitara emateko dena.

GERTAKARIAK

1.– 2015eko maiatzaren 15ean, Euskal Herriko Agintaritzaren Aldizkarian honako ebazpen hau eman zen argitara: ebazpena, 2015eko maiatzaren 6koa, Osalan-Laneko Segurtasun eta Osasunerako Euskal Erakundeko zuzendari nagusiarena, 2015eko ekitaldiari dagokionez prebentzioko ordezkarien oinarrizko prestakuntza emateko baimenaren eta diru-laguntzaren deialdia egiten duena.

2.– 2015eko irailaren 1ean, Euskal Herriko Agintaritzaren Aldizkarian argitaratu zen ebazpen hau: ebazpena, 2015eko abuztuaren 17koa, Osalan-Laneko Segurtasun eta Osasunerako Euskal Erakundeko zuzendari nagusiarena, 2015eko ekitaldirako prebentzioko ordezkarien oinarrizko prestakuntza emateko baimenari buruzko ebazpenak argitara emateko dena.

3.– Prebentzio-ordezkariei araudi-arloan eta arlo teknikoan oinarrizko prestakuntza emateko diru-laguntzak eskatzeko epea 2015eko abenduaren 1ean amaitu zen. Araban 16 eskabide aurkeztu dituzte, Bizkaian 46 eta Gipuzkoan 34; beraz, guztira 96 eskabide aurkeztu dituzte diru-laguntzetarako.

4.– 2015eko irailaren 7an, urriaren 2an eta 22an, azaroaren 12an eta 26an eta abenduaren 18an egindako batzarretan, Ebaluazio Batzordeak ebaluatu zituen eskabideak, betiere deialdiko oinarrietan ezarritako betekizunekin bat etorriaz. Proposamena Osalan-Laneko Segurtasun eta Osasunerako Euskal Erakundeko zuzendari nagusiari helarazi zitzaion, hark ebazpena eman zezan.

5.– 2015eko irailaren 23an, urriaren 5ean eta 23an, azaroaren 16an eta 30ean eta abenduaren 21ean, Osalan-Laneko Segurtasun eta Osasunerako Euskal Erakundeko zuzendari nagusiak honako ebazpen hauek eman zituen: 2015eko ekitaldiari dagokionez prebentzioko ordezkarien oinarrizko prestakuntza emateko baimenarenari buruzkoak.

ZUZENBIDEKO OINARRIAK

1.– Osalan-Laneko Segurtasun eta Osasunerako Euskal Erakundeko zuzendari nagusiak emandako 2015eko maiatzaren 6ko ebazpenaren bidez, 2015eko ekitaldiari dagokionez prebentzioko ordezkarien oinarrizko prestakuntza emateko baimenaren eta diru-laguntzaren deialdia egiten da. Bada, ebazpen horren 2. artikuluan xedatzen denez, «2015eko ekitaldiari dagokionez prebentzioko ordezkarien oinarrizko prestakuntza emateko baimena lortu ostean, diru-laguntza eskatu ahal izango dute honako hauek: prestakuntza-zentroek (publikoek zein pribatuek), sindikatuek, eta, orobat, enpresekin zerbitzuak itundurik izanik, haien prebentzioko ordezkariei dagokienez akreditatutako prebentzio-zerbitzuek, betiere egoitza Euskal Autonomia Erkidegoan badute»

2.– Aipatutako ebazpenaren 12. artikuluan xedatutakoarekin bat, «diru-laguntza eskatzen duen zentroak aurretiaz eskatu eta lortu behar izan du 2015eko ekitaldian prebentzio-ordezkariak trebatzeko oinarrizko mailako araudi-arloko prestakuntza zein prestakuntza teknikoa emateko baimena.»

3.– Lehen aipatutako ebazpenaren 13. artikuluan xedatutakoaren arabera, 2015eko urtarrilaren 1etik abenduaren 1era bitartean egiten diren araudi-arloko eta arlo teknikoko prestakuntza-ekintzetarako diru-laguntza eska daiteke «diru-laguntza eskatzen den prestakuntza-ekintza bukatu ondorengo hamar laneguneko epean»

4.– Lehen aipatutako 13. artikuluan xedatzen da beste hau ere: «Osalaneko zuzendari nagusiari dagokio, Balioespen Batzordeak proposamena egin ondoren, ebazpen honetan araututako deialdia ebaztea, diru-laguntzak emateari dagokionez.»

5.– Halaber, aipatutako ebazpenaren 13 artikuluak honako hau ezartzen du: «publizitatearen ondorioetarako, ebazpen egokiak argitaratu beharko dira EHAAn, prestakuntza emateko baimenari zein diru-laguntzari dagokienez».

Horregatik, honakoa

EBAZTEN DUT:

Lehenengoa.– 2015eko ekitaldirako prebentzioko ordezkarien oinarrizko prestakuntza emateko diru-laguntzari buruzko ebazpenak argitara ematea, ebazpen honetako I. eta II. eranskinetan jasotako erakundeei dagokienez.

Bigarrena.– Ebazpenak Euskal Herriko Agintaritzaren Aldizkarian argitaratzea.

Hirugarrena.– Ebazpen honek administrazio-bidea amaitzen du, eta beronen aurka aukerako berraztertzeko errekurtsoa aurkez dakioke Osalaneko zuzendari nagusiari hilabeteko epean, edo bestela, zuzenean administrazioarekiko auzi-errekurtsoa txandaz dagokion Bilboko Administrazioarekiko Auzietako Epaitegiaren aurrean, bi hilabeteko epean; bi kasuetan, jakinarazpena egin eta hurrengo egunetik aurrera kontatzen hasita, Administrazioarekiko Auzien Jurisdikzioa arautzen duen uztailaren 13ko 29/1998 Legearen 8.3. eta 46.1 artikuluetan ezarritakoaren arabera.

Barakaldo, 2016ko otsailaren 24a.

Laneko Segurtasun eta Osasunerako Euskal Erakundeko zuzendaria,

IZASKUN URIEN AZPITARTE.

(Ikus .PDF)

(Ikus .PDF)

Azterketa dokumentala