Euskal Herriko Agintaritzaren Aldizkaria

74. zk., 2015eko apirilaren 22a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

1802

1/2015 FORU ARAUA, martxoaren 6koa, Gipuzkoako Aldizkari Ofiziala arautzen duen martxoaren 27ko 5/2007 Foru Araua aldatzekoa.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «1/2015 Foru Araua, martxoaren 6koa, Gipuzkoako Aldizkari Ofiziala arautzen duen martxoaren 27ko 5/2007 Foru Araua aldatzekoa»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek bete eta betearazi dezaten.

Donostia, 2015eko martxoaren 6a.

Diputatu nagusia,

MARTIN GARITANO LARRAŃAGA.

HITZAURREA

Gipuzkoako Aldizkari Ofizialaren araubide juridikoa egun Gipuzkoako Aldizkari Ofiziala arautzen duen 2007ko martxoaren 27ko 5/2007 Foru Arauan eta oinarri izaera duen Probintzietako Aldizkari Ofizialen 2002ko apirilaren 4ko 5/2002 Legean arautzen da.

2007ko martxoaren 27ko 5/2007 Foru Araua onartzea aurrerapauso erabakigarria izan zen, batetik, aldizkaria editatu, kontsultatu eta argitaratzeko prozesuan komunikazio teknologia berriak sartzeko zereginean, paperezko edizioa desagerraraziz; eta bestetik, argitaratu beharreko agiriak modu elektronikoan bidaltzeko prozedura ezartzeko zereginean.

Ordutik zazpi urte igaro dira eta, azken hilabeteotan, bigarren prozesu bat jarri da abian, aldizkariaren produkzio eta gestio sistemak modernizatzeko, eta aldizkariko barne lanaren antolaketa eta zerbitzua bera hobetzeko.

Prozesu horren ondorioz, aldizkaria egiteko sistema azkarragoa ezarri da, iragarkiak banaka editatzen dituena eta haietako bakoitza banaka kudeatzea ahalbidetzen duena, betiere erantzun egokiagoa eman ahal izateko presazko argitalpen eskaerei, iragarkiak atzera botatzekoei, nahiz Izaera Pertsonaleko Datuak Babesteari buruzko 1999ko abenduaren 13ko 15/1999 Lege Organikoaren arabera egindako ezeztatze eskaerei.

Horrez gain, hemendik aurrera Gipuzkoako Aldizkari Ofizialaren edizio elektronikoa Gipuzkoako Foru Administrazioko Artxibo Elektronikoan gordeko da, betiere Foru Administrazioaren eremuan agirien kudeaketaren eta espediente elektronikoaren eredu orokorra arautzen duen 2011ko ekainaren 14ko 17/2011 Foru Dekretuarekin bat; eta bestetik, argitaratutako agirietan egiaztapen elektronikorako kodea agertuko da, inprimatzen diren argitaratutako agiriek kopia ofizial izaera izan dezaten.

Bestalde, aurrerantzean argitaratu beharreko agiriak derrigor aurkeztu beharko dira euskarri informatikoan, betiere zerbitzua atxikita duen departamentuko foru diputatuaren foru aginduz ezarri moduan.

Azkenik, aldizkariaren beste alderdi batzuk eguneratu dira, eguneratze hori honako aldaketa hauen bidez gauzatuz: batetik, berrantolatu egin dira egun II. kapituluan ezartzen diren aldizkari ofizialaren atalak eta horien ordena, eta bestetik, arauaren IV. kapituluan arautzen den araubide ekonomikoa argitu da eta zerga oinarria zehazteko prestazioak gehitu dira.

Aipatu egokitze horien ondorioz, araua aldatu beharra dago: I. kapituluan, 2, 4 eta 5. artikuluak; II. kapituluan, 6, 7 eta 8. artikuluak; III. kapituluan, 10 eta 12. artikuluak; IV. kapituluan, 16, 20 eta 24. artikuluak; eta bigarren xedapen gehigarria.

I. kapituluko 2. artikuluan soilik aldizkariaren edizio elektronikoak sinadura elektroniko onartua eramango duela gehitzen da, aldizkariaren benekotasuna, osotasuna eta aldaezintasuna bermatze aldera.

4. artikuluak jasotzen du Euskal Autonomia Erkidegoko Herri Administrazioetako eta Justizia Administrazioko organoek lurraldeko bi hizkuntza ofizialetan bidali beharko dituztela argitaratu beharreko agiriak.

5. artikulua, aldizkariaren argitalpen, kontsulta eta artxiboari buruzkoa, agiri argitaratuetan sartzeko eskubidea hobe mugatzeko aldatzen da; sartzeko eskubide hori zehaztu egiten da, benetako kopiak eskuratzeko aukera ezartzen da, eta mugarik gabe eta modu iraunkorrean sartzeko eskubidea murriztu egiten da, argitalpenaren eskatzailearen ekimenez, eta betiere Izaera Pertsonaleko Datuak Babesteari buruzko 1999ko abenduaren 13ko 15/1999 Lege Organikoaren arabera.

Gainera, aldizkari ofizialeko argitalpenak Foru Administrazioko Artxibo Elektronikora gehituko direla ezartzen da eta aldizkariaren ale diligentziatu bat paperean gordetzeko betebeharra desagertu egin da.

II. kapituluan, 6 eta 7. artikuluak aldizkari ofizialaren egitura berrira egokitzen dira. Aldaketa horrek ale osoaren argitalpena desagertzea dakar eta banaka editatzen diren iragarkiz osatutako aldizkaria publikatzea. Iragarkiak eguneko laburpen bati lotuta argitaratuko dira. Laburpenak, aparteko sinadura elektronikoa eramango du, iragarki bakoitzaren antzera, eguneroko argitalpen osoaren osotasuna eta integritatea bermatzeko.

8. artikulua aldizkari ofizialaren egungo atalak berrantolatzeko aldatzen da. Orain arteko lehen eta bigarren atalak desagertu egiten dira, eta horiek lurralde historikoaren xedapen orokorrentzat eta lurralde historikoaren gainerako argitalpenentzat gordetzen dira, hurrenez hurren; hirugarren atala, Toki Administrazioko entitateen iragarkientzat gordetzen da; laugarren eta bosgarren atalak, Autonomia Erkidegoko eta Estatuko Administrazio Publikoen iragarkientzat; seigarren atala, Justizia Administrazioaren iragarkientzat; eta azkenik, zazpigarren atala, partikularren iragarkientzat eta gainerako ataletan argitaratu behar ez direnentzat.

III. kapituluko 10. artikuluan kendu egin da argitaratu beharreko agiriak paperean aurkezteko aukeraren aipamena.

12. artikuluan iragarkiak presaz argitaratzeko epea bost lanegunetik hiru lanegunetara jaisten da, nahiz eta eskaera ez onartzeko aukera gordetzen den, agiriaren ezaugarriek edo horien kopuruak eskaera betetzea ezinezkoa egiten badute.

Azkenik, IV. kapituluko 16. artikulua aldizkari ofizialaren araubide ekonomikoa argitzeko aldatzen da, tasaren salbuespenen sistema eta bere mugak hobe zehazteko.

Halaber, kapitulu berean 20 eta 24. artikuluak ere aldatu egiten dira: 20. artikulua, tasaren zerga oinarria zehazteko bi alderdi berri gehitzeko, bai irudien argitalpena, azken urteotan irudiak argitaratzeko eskaera kopurua asko handitu baita, bai presaz egindako argitalpenak ere; eta 24. artikulua, bigarren eta hirugarren atalak ezabatzeko.

Artikulu bakarra.– Aldatzea 5/2007 Foru Araua, martxoaren 27koa, Gipuzkoako Aldizkari Ofiziala arautzen duena.

2007ko martxoaren 27ko 5/2007 Foru Araua modu honetan aldatzen da:

Bat.– 2. artikuluaren 2. atala aldatzen da eta honela geratzen da idatzia:

«2.– Gipuzkoako Aldizkari Ofizialean argitaratutako testuak ofizialtzat eta benetakotzat hartzen dira. Aldizkariaren edizio elektronikoaren egiazkotasuna, osotasuna eta aldaezintasuna bermatze aldera, argitalpenak sinadura elektroniko onartua eramango du.»

Bi.– 4. artikuluaren 2. atala aldatzen da eta honela geratzen da idatzia:

«2.– Euskal Autonomia Erkidegoan egoitza duten Herri Administrazioetako eta Justizia Administrazioko organoek autonomia erkidegoko bi hizkuntza ofizialetan bidali beharko dituzte argitaratu beharreko iragarkiak.

Euskal Autonomia Erkidegotik kanpo egoitza duten Herri Administrazioetako eta Justizia Administrazioko organoek, nahiz egoitza edo helbidea autonomia erkidego barruan edo handik kanpo duten gainerako pertsona fisiko edo juridikoek, lurraldeko bi hizkuntza ofizialetako batean bidali ahal izango dituzte iragarkiak, edo bietan.

Iragarkiak hizkuntza ofizial bakarrean bidali badira, Foru Aldundiak ofizioz itzuliko ditu eta Aldizkari Ofizialean bi hizkuntzetan argitaratuko dira. Itzulpen horrengatik dagokion prezio publikoa ordaindu beharko da, eskatzailea egoitza edo helbidea Euskal Autonomia Erkidegoan duen pertsona fisiko edo juridikoa bada.»

Hiru.– 5. artikuluaren lehen eta bigarren atala aldatu egiten dira eta hirugarren, laugarren eta bosgarren atalak gehitzen dira. Honela geratzen da idatzia:

«5. artikulua.– Argitalpena, kontsulta eta artxibatzea.

1.– Gipuzkoako Aldizkari Ofiziala euskarri elektronikoan argitaratuko da eta Gipuzkoako Aldizkari Ofizialaren web orrian kontsultatu ahal izango da. Webgunera Foru Aldundiaren egoitza elektronikotik sartu ahal izango da. Sarbidea unibertsala eta doakoa izango da.

Gipuzkoako Aldizkari Ofizialaren edizio elektronikoa egokituta egongo da aniztasun funtzionala duten pertsonen beharretara, pertsona guztiek kontsulta ahal dezaten aldizkaria.

2.– Uneoro eskuragarri egongo da Gipuzkoako Aldizkari Ofizialaren webgunean datu base bat, haren bidez bilatu, ikusi eta eskuratu ahal izateko aldizkari ofizialean argitaratzen diren egintza, ebazpen eta xedapenak.

3.– Aurreko ataletan jarritakoaren kalterik gabe, Gipuzkoako Foru Aldundiak izaera pertsonaleko datuetarako sarbidea mugatu ahal izango du, betiere argitalpenaren eskatzaileak aginduta, argitalpenak bere helburua betetzeko epea igarotzen denean eta mugarik gabeko sarbidea mantentzeko interes publikoko beste arrazoirik ez dagoenean, betiere Izaera Pertsonaleko Datuen Babesari buruzko 1999ko abenduaren 13ko 15/1999 Lege Organikoaren arabera.

4.– Interesatuek edozein iragarkiren paperezko kopia ofiziala eskuratu ahal izango dute Gipuzkoako Aldizkari Ofizialaren webgunetik iragarkia inprimatuz euren bitartekoen bidez.

Gipuzkoako Aldizkari Ofizialaren webgunean dagoen «aldizkariaren egiaztapen elektronikoa» formulario bidez eta bertan egiaztapen elektronikorako kodea sartuz (EEK), egiaztatu ahal izango da paperezko formatuan dagoen edozein iragarkiren egiazkotasuna, betiere sinadura elektronikoa duen jatorrizko agiria elektronikoarekin alderatuz.

5.– Gipuzkoako Aldizkari Ofizialean argitaratutako agiriak Foru Administrazioko Artxibo Elektronikoan gordeko dira, hain zuzen ere Foru Administrazioaren eremuan agirien kudeaketaren eta espediente elektronikoaren eredu orokorra arautzen duen 2011ko ekainaren 14ko 17/2011 Foru Dekretuak arautzen duen horretan, agirien osotasuna, egiazkotasuna, konfidentzialtasuna, kalitatea, babesa, sarbidea, eskuragarritasuna eta zaintza bermatzeko.»

Lau.– 6. artikulua aldatu egiten da eta horrela geratzen da idatzia:

«6. artikulua.– Aurkibidea eta banakako iragarkiak.

1.– Gipuzkoako Aldizkari Ofizialaren zenbaki bakoitzaren hasieran edukiaren aurkibidea agertuko da, ataletan banatuta, 8. artikuluaren arabera.

Aurkibidea pdf formatuan argitaratuko da eta Gipuzkoako Foru Aldundiaren sinadura eramango du bere egiazkotasuna, osotasuna eta aldaezintasuna bermatzeko.

2.– Iragarki bakoitza banaka argitaratuko da eta ez da argitalpen zenbakitu batean txertatuko. Iragarki bakoitzak ere Foru Aldundiaren sinadura elektronikoa eramango du.

3.– Gainera, eguneko ale oso bat egingo da, artxibatua izan dadin, eta ale horrek ere Foru Aldundiaren sinadura elektronikoa eramango du, eguneko argitalpenaren osoaren egiazkotasuna, osotasuna eta aldaezintasuna bermatzeko».

Bost.– 7. artikulua aldatzen da eta horrela geratzen da idatzia:

«7. artikulua.– Iragarkien goiburua eta oina.

1.– Iragarki bakoitzaren goiburuan Gipuzkoako armarria agertuko da, Gipuzkoako Lurralde Historikoaren identitate ezaugarriei buruzko 1990eko martxoaren 27ko 6/1990 Foru Arauaren 4. artikuluan edo etorkizunean hori arau dezakeen beste xedapenen baten arabera.

Goiburuan «Boletín Oficial de Gipuzkoa – Gipuzkoako Aldizkari Ofiziala» jarriko du.

2.– Iragarkiaren orrialde bakoitzean, argitalpen urtea eta eguna jarriko da, baita aldizkariaren zenbakia ere.

Iragarki bakoitzaren oinean edo alde batean, egiaztapen elektronikorako kodea jarriko da 5. artikuluaren 4. atalean ezarritako ondorioetarako, agiriaren orrialde zenbakia, legezko gordailuaren zenbakia eta erakundearen atariaren helbide elektronikoa.»

Sei.– 8. artikulua aldatu egiten da eta honela geratzen da idatzia:

«8. artikulua.– Atal banaketa.

1.– Gipuzkoako Aldizkari Ofizialean ondorengo atalak bereizten dira:

1) Gipuzkoako Lurralde Historikoko Xedapen Orokorrak.

2) Gipuzkoako Lurralde Historikoko Administrazioa.

3) Toki Administrazioa.

4) Autonomia Erkidegoko Administrazioa.

5) Estatuko Administrazioa.

6) Justizia Administrazioa.

7) Beste batzuk.»

Zazpi.– 10. artikulua aldatu egiten da eta honela geratzen da idatzia:

«10. artikulua.– Agiriak bidaltzea eta argitaratzeko prozedura hastea.

1.– Gipuzkoako Aldizkari Ofizialean agiriak argitaratzeko prozedurari hasiera emateko, eskaera bat bidali behar zaio Gipuzkoako Aldizkari Ofizialaren ardura duen departamentuko foru diputatuari, argitaratu nahi den testuarekin batera.

2.– Gipuzkoako Aldizkari Ofizialean argitaratu beharreko agiriak euskarri informatikoan bidaliko dira, zerbitzuaren ardura duen departamentuko foru diputatuak foru aginduz ezarritako prozedura, berme eta zehaztapenak betez.

3.– Bi agiriak legez edo erregelamendu bidez eskumena duen organo edo agintaritzaren sinadurak baimenduko ditu, eta horrela agirien benetakotasunaren erantzule egingo dira.

4.– Era berean, foru agindu bidez onartuko dira argitaratzeko diren testuak bidaltzeko inprimakiak, ereduak eta formatu elektronikoak, betiere Gipuzkoako Aldizkari Ofizialeko argitalpenaren kudeaketa bateratu eta erraztearren.

5.– Gipuzkoako Aldizkari Ofizialean argitaratzeko jasotzen diren jatorrizko agiriak ofizialak eta isilpekoak izango dira, eta ezingo da horiei buruzko inolako informaziorik eman bidali dituen organoaren berariazko baimenik izan gabe.»

Zortzi.– 12. artikulua aldatu egin da eta honela geratu da idatzia:

«12. artikulua.– Iragarkiak argitaratzeko epea.

1.– Oro har, inolako akats formalik gabe argitaratzeko bidaltzen diren agiriak gehienez ere hamar lan eguneko epearen barruan argitaratuko dira, erregistroan sarrera eman eta hurrengo egunetik aurrera, baldin eta doako agiria bada. Akats formalak egonez gero, epea akatsak zuzentzen diren egunaren biharamunetik aurrera kontatuko da.

Ordaindu beharreko iragarkien kasuan eta iragarkia itzuli beharra dagoenean, igortzaileak ez balu dagokion ordainketa helbideratua, epea ordainketa egiaztatzen den egunaren biharamunetik zenbatuko da.

2.– Halaber, testuaren igorleak eska dezake presazkotzat jotzea haren argitalpena; horrelakoetan, argitalpena hiru lan eguneko epean egingo da, dagokion tasaren ordainketa egiaztatu ondorengo lehen egun baliodunetik aurrera, eta betiere iragarkia ele bietan bidali bada.

Edonola ere, aldizkari ofizialak iragarki bat presaz argitaratzea ezinezkoa dela adierazi ahal izango du, iragarkiaren konplexutasunak epe hori betetzea ezinezkoa egiten badu edo presazko iragarkien kopuruak zerbitzuak duen ahalmena gainditzen badu.

3.– Gainera, Aldizkari Ofizialaren ardura duen departamentuko foru diputatuaren foru aginduaren bidez, gutxieneko epea ezarri ahal izango da, aurreko ataletan aipatu epeetatik aparte, toki entitateek dagokion araudiaren arabera argitalpen epe jakin eta zehaztu bat duten xedapen eta ebazpenen testuak bidal ditzaten. Epe hori zehazteko kontuan hartuko da argitaratu beharreko testuaren luzera eta testu hori zenbat toki entitateei doakien.

Aurretik bidaltzeko epe hori betez gero, Gipuzkoako Aldizkari Ofizialak nahitaez argitaratu behar du bidalitako testua.

4.– Artikulu honetan ezarritako epeak zenbatzeko, larunbatak ez dira lan eguntzat joko.»

Bederatzi.– 16. artikulua aldatzen da eta horrela geratzen da idatzia:

«16 artikulua.– Salbuespenak.

1.– Iragarkiak aldizkarian argitaratzeko tasa ordaintzetik salbuetsita daude:

a) Gipuzkoako Foru Aldundiaren xedapen, ebazpen eta iragarkiak, baldin eta horien kostua hirugarrenek ez badute hartu behar bere gain, aplikagarri diren xedapenen arabera.

b) Nahitaez sartu beharrekoak diren xedapen eta ebazpenak.

c) Epaitegi eta auzitegien ediktu eta iragarkiak, haien argitalpena ofizioz agintzen denean.

d) Toki Administrazioko entitateen eta horiei loturik edo horien mende dauden zuzenbide publikoko erakundeen zerga eta ordainarazpen parafiskalak biltzeko prozeduretan agerraldi bidez jakinarazteko zitazioak, zergak biltzea dagokion administrazioak interesdunari edo haren ordezkariari jakinarazten saiatu eta ez badu lortu.

e) Toki Administrazioko entitateek edo horiei loturik edo horien mende dauden zuzenbide publikoko erakundeek Gipuzkoako Aldizkari ofizialean ediktuen bidez egindako jakinarazpen administratiboak, betiere administrazio prozedurari buruz indarrean dagoen arautegiari jarraituz egindakoak.

f) Lege edo arautegi baten arabera nahitaez argitaratu beharreko iragarki ofizialak.

2.– Salbuespen hori ez zaie inoiz ezarriko honako iragarki hauei:

a) Partikularrek eskatuta argitaratutako iragarkiei.

b) Edonolako kontratu moten lizitazio iragarkiei, horri buruzko legeriak ezarritakoaren arabera.

c) Justizia Administrazioko iragarki ofizialei, partikularrek eskatuta argitaratzen badira.

d) Aplikatu daitezkeen xedapenen arabera iragarkien kostua interesatuei jasanarazi ahal zaienean.

e) Tasa, prezio publiko edo bestelako eskubide ekonomikoak ordaintzeari lotuta dauden prozeduretatik datozen iragarkiei.

f) Bidaltzaileari edo eskatzaileari, zuzenean edo zeharka, onura ekonomikoren bat ekarri ahal dioten iragarkiei, edo eduki ekonomikoa dutenei.

Ondorio hauetarako ulertuko da ez dutela onura ekonomikorik ez eduki ekonomikorik zerga eta ordainarazpen parafiskalen prozeduretan agerraldi bidez jakinarazteko zitazioek, horien bilketa dagokien Toki Administrazioko entitateek edo horiei loturik edo horien mende dauden zuzenbide publikoko erakundeek egin badute jakinarazpen horiek interesdunari edo bere ordezkariari egiteko saiakera eta ez badute lortu.

g) Legezko edo arauzko xedapenen baten arabera, egunkari idatzi batean ere argitaratu ahal edo behar diren iragarkiei. Salbuetsi egiten dira aurreko ataleko d) eta e) letretan aipatu iragarkiak.

3.– Iragarki bat presaz argitaratzea eskatzen bada, ohiko zerbitzua nahikotzat jotzen ez delako, tasa ordaindu egin beharko da. Ohiko zerbitzuagatik tasa ordaindu behar duten iragarkien kasuan bi zenbatekoak batuko dira.

4.– Doan argitaratu behar diren eskaerek iragarkiaren argitalpena tasa ordaintzetik salbuetsitzat jotzeko arauaren erreferentzia jaso beharko dute.»

Hamar.– 20. artikulua aldatu egiten da eta honela geratzen da idatzia:

«20. artikulua.– Zerga oinarria.

Tasaren zerga oinarria Gipuzkoako Aldizkari Ofizialak emandako zerbitzuek osatzen dute, eta zehazteko ondoko irizpideak hartuko dira kontuan:

a) Argitaratu beharreko testuaren karaktere kopurua.

b) Argitaratu beharreko irudien tamaina.

c) Presaz argitaratutako iragarkiak.

d) Egiaztatu beharreko orrialde kopurua.»

Hamaika.– 24. artikulua aldatu egiten da eta honela geratzen da idatzia:

«24. artikulua.– Tasaren kudeaketa.

Tasaren kudeaketa eta bilketa Gipuzkoako Aldizkari Ofizialaren ardura duen departamentuari dagokio.»

Hamabi.– Bigarren xedapen gehigarria aldatu egingo da eta horrela geratzen da idatzia:

«Bigarrena: Gipuzkoako Aldizkari Ofiziala atxikita dagoen departamentuko foru diputatuaren foru aginduaren bidez onartuko dira: prozedura eta Gipuzkoako Aldizkari Ofizialean argitaratu behar diren xedapen, egintza administratibo eta gainerako iragarkiak bide elektroniko eta informatikoaz bidaltzeko erabili behar diren programa eta aplikazio elektroniko, informatiko eta telematikoak; sinadura elektronikoen erregistroa sortu eta abian jartzeko beharrezko diren bitarteko tekniko eta informatikoak; edizio elektronikoaren alderdi teknikoak, maketazioa eta dagokien tasen likidazioa eta kobrantza; eta gainera, aldizkariaren atal bakoitzeko azpiatalak zehaztea argitaratu beharreko iragarkiak hobe antolatzeko.»

XEDAPEN GEHIGARRIAK

Lehenengoa.– Tasaren zenbatekoak.

1.– Foru arau hau indarrean sartzen den egunetik aurrera tasaren zenbatekoak ondoko hauek izango dira:

– Irudiak argitaratzeagatik: 200 euro/or.

– Testuak argitaratzeagatik: 0,0492 euro/karakterea.

– Testuak edo irudiak presaz argitaratzeagatik, zerbitzu arrunta tasatik salbuetsita ez badago: % 100eko gainordaina.

Iragarkiari zerbitzu arruntagatik tasarik ez badagokio, testua bada: 0,0492 euro/karakterea; eta irudien kasuan, 200 euro/or.

– Aldizkariaren orri inprimatua egiaztatzeagatik: 1,09 euro/or.

2.– Tasaren zenbateko horiek, hala badagokio ekitaldi bakoitzeko aurrekontuen foru arauaren bidez eguneratuko dira.

Bigarrena.– Erregimen iragankorra.

Honako foru arau honetan ezarritakoaren aurka ez doan guztian, indarrean jarraituko du 2009ko maiatzaren 19ko Foru Aginduak, Gipuzkoako Aldizkari Ofizialean argitaratu beharreko dokumentuak bidaltzeko prozedura ezartzen duenak.

XEDAPEN INDARGABETZAILEA

Indargabetuta gelditzen dira Gipuzkoako Aldizkari Ofizialaren tasak eguneratzeari buruzko 2014ko abenduaren 22ko 48/2014 Foru Dekretua, eta foru dekretu honetan xedatutakoaren aurka doazen maila bereko edo txikiagoko xedapen guztiak.

AMAIERAKO XEDAPENA.– Indarrean jartzea.

Foru arau hau Gipuzkoako Aldizkari Ofizialean argitaratu eta hurrengo hileko lehenengo egunean jarriko da indarrean.

Azterketa dokumentala